འབྲོག་རུ་ཆོས་གྲགས།
ང་རང་ཉིན་རྒྱུན་ལྟར་སྔ་བོ་ལངས་ནས་ཁ་སང་དགེ་རྒན་གྱིས་སྤྲད་པའི་ནང་སྦྱོང་ནང་གི་དབྱིན་ཇིའི་མིང་ཚིག་དེ་དག་བློར་འཛིན་ཆེད་ཁང་ཐོག་ལ་སོང་། སྐབས་དེར་སྐྱ་རེངས་གསལ་ལ་ཉེ་བ་འདུག ད་སྐབས་གནམ་གཤིས་འཁྱག་པས་ཡིན་ནམ། གཏི་མུག་ལྗིད་པས་ཡིན། གང་ཡིན་ཆ་མ་འཚལ་མོད། ངའི་ཁོར་ཡུག་ཡོད་ཚད་ད་དུང་གཉིད་ལ་ཡུར་འདུག ངས་འབྲི་དེབ་ཀྱི་ཁ་ཕྱེས་ནས་དབྱིན་ཇིའི་མིང་ཚིག་དེ་དག་བསྐྱར་ཟློས་ཡང་ཟློས་བྱས། དུས་ཡུན་ཅུང་ཙམ་ཕྱིན་རྗེས་ང་རང་འདར་ཟུག་བརྒྱབ་བྱུང་། རྐང་ལག་དང་ལུས་པོ་ཡོད་ཚོད་འདར་ཟུག་བརྒྱབ་བྱུང་། ཡིན་ནའང་། ངས་ཟློ་བཞིན་པའི་ཚིག་གྲུབ་དེ་དག་གིས་ངའི་སེམས་ལ་དྲོད་ཁོལ་སྤྱིན་བྱུང་པས་ངས་མུ་མཐུད་དུ་དེའི་ནང་དོན་ལ་བསམ་གཞིག་བྱས། ཚིག་གྲུབ་དེ་དག་ནི་འདི་ལྟར།
“There is no need for temple. No need for complicated philosophies. My brain and my heart are my temple. My philosophy is kindness.”
དེའི་ནང་དོན་བོད་བསྒྱུར་བྱས་ན། ལྷ་ཁང་དགོས་གི་མ་རེད་ལ། རྙོག་དྲ་ཅན་གྱི་གྲུབ་མཐའ་འམ་མཚན་ཉིད་རིག་པ་ཡང་དགོས་གི་མ་རེད། ངའི་ཀླད་པ་དང་ངའི་སེམས་ནི་ངའི་ལྷ་ཁང་ཡིན། ངའི་མཚན་ཉིད་རིག་པའམ་ཆོས་གཞུང་ནི་བྱམས་བརྩེ་ཡིན་ཞེས་པའི་ཚིག་གྲུབ་འདི་བསྐྱར་ཟློས་ཡང་ཟློས་བྱེད་ཞོར་ངས་འུ་ཚང་གི་ལོ་རྒྱུས་ཀྱི་བྱུང་རིམ་ཞིག་དྲན་བྱུང་། བཙན་པོས་རྟ་ཁ་དམག་ལ་བསྐོར་ཞིང་། མདའ་དུང་གྲི་གསུམ་གཟན་འོག་ལ་བཅུག་མྱོང་པའི་ཁྲག་དམར་གྱི་རྡོ་རིང་ཞིག་དྲན་བྱུང་། ལྷག་པར་དུ་བོད་ཀྱི་མཐོ་རིམ་མི་སྣ་ཚོའི་སེམས་ཁོང་ན་བཞེངས་པའི་རྡོ་རིང་དེར་མཁས་དབང་མང་པོ་ཞིག་གིས་ཡང་དང་བསྐྱར་དུ་གསལ་འདེབས་དང་སྐུལ་སློང་བྱས་ཀྱང་། ངའི་མི་རིགས་འདི་ད་དུང་གཉིད་ལས་སད་མ་བྱུང་།
མཚམས་ཤིག་ནས་ངས་འབྲི་དེབ་མཆན་ལ་བཙུར་ནས་ཚིག་གྲུབ་ངག་ལ་སྐྱོར་ཞོར་བློ་འདོན་བྱས་པ་ཡིན་མོད། སྐྱི་གཡའ་བའི་ལོ་རྒྱུས་ཀྱི་འགག་འཕྲེང་དེ་ལས་ང་རང་ཕྱིར་ཐར་མ་སོང་བས། དེ་རིང་ཞོགས་པའི་ངའི་དྭངས་གཙང་གི་སེམས་པ་དེ་ཡང་གཙབ་རུལ་དུ་བཏང་སོང་།
གནད་དོན་འདི་ཟུར་གཞན་ཞིག་ནས་གླེང་ན། སྔ་མའི་ཉམས་མྱོང་གཞུག་མའི་ལམ་སྟོན་གྱི་སྒྲོན་མེ་ཞེས་པ་ལྟར། སྤྱིར་ང་ཚོས་ལོ་རྒྱུས་ལས་ཉམས་མྱོང་ལེན་རྒྱུ་གལ་ཆེན་ཡིན་ཡང་། མི་རིགས་འདིའི་གོམས་སྲོལ་ཞིག་གིས་ལོ་རྒྱུས་ལ་ནག་ཉེས་ཡོད་ཀྱང་སྤས་འགེབ་བྱེད་ཀྱིན་འདུག དངོས་ཡོད་ལ་བདེན་པ་ཡོད་ཀྱང་དོར་ཐབས་བྱེད་ཀྱིན་འདུག འདི་ནི་ང་ཚོས་ངེས་པར་དུ་ཤེས་དགོས་པ་ཞིག་རེད་ལ། ལྷག་པར་དུ་གཞོན་སྐྱེས་ཚོས་རྟོག་དགོས་པ་ཞིག་ཀྱང་རེད། གནད་དོན་ཞིག་རྟོག་པའི་ཆེད་དུ། བདེན་པ་ཞིག་སྲུང་བའི་ཆེད་དུ། ང་ཚོས་ཅིས་ཀྱང་ཤེས་དགོས། བདེན་པའི་ངོས་དང་། དྲང་པོའི་གཞུང་ཅིས་ཀྱང་ཤེས་དགོས།
འབྲོག་ཆོས་ལགས་ཀྱིས་ཡག་པོ་བྲིས་འདུག ཚང་མས་འདི་ལྟར་བསམ་བློ་གཏོང་རྒྱུ་གལ་ཆེན་རེད།
འབྲོག་ཆོས་ལགས་ཀྱིས་ཡག་པོ་བྲིས་འདུག ཚང་མས་འདི་ལྟར་བསམ་བློ་གཏོང་རྒྱུ་གལ་ཆེན་རེད་ལ། འདི་ལྟར་སོ་སོར་བསྐྱར་ཞིབ་གནང་རྒྱུ་ནི་འགག་རྩ་རེད་འདོད།
ད་རང་གཟུགས་མངོན་ཡོང་གི་འདུག
དགོས་རྒྱུའི་ཚིག་སྒྲུབ་བློ་ལ་མ་འཛིན་པར། མི་དགོས་རྒྱུ་བཙན་པོའི་རྟ་དམག་ཡིན་ན་གཅིག་དྲན་སོང་ལོ།