རྟ་ནག་སྐལ་བཟང་ལུང་རིགས།
_______________________རྡ་སའི་སྙན་ངག་གི་ཁག་དང་བོ།
ལམ་ཕྲན་དང་གཞུང་ལམ་བརྒལ་ཏེ་ས་གཞི་ཞིག་པང་དུ་བླངས་སོ།།
འཁོར་ལོ་དང་རྨི་ལམ་བརྡར་ནས་ནམ་མཁའ་ཞིག་ཤར་གྱིས་བཏེགས་སོ།།
ཁ་ཆར་དང་གྲང་རླུང་བསུས་ནས་སེམས་པ་ཞིག་དུང་བས་བརྡེགས་སོ།།
ཚོར་བ་དང་བརྩེ་བས་དྲུད་ནས་གནམ་མཐའ་ལ་ཆམ་གྱིས་བརྡས་སོ།།
རྡ་ས་ལ་བདེ་མོ་བཞག་དུས་མིག་ཆུ་ཞིག་ཆར་གྱིས་ཟགས་སོ།།
རྡ་ས་རུ་ཡུད་ཀྱིས་འབྱོར་དུས་དགའ་བ་ཞིག་རླབས་ཀྱིས་འཕྱུར་རོ།།
དུང་བ་འདི་ཟོལ་མ་མིན་ཏེ་སེམས་པ་ཡང་མིག་ཆུས་བྱབས་སོ།།
སྣང་ཞེན་འདི་གསོག་པོ་མ་ཡིན་གཉུག་སེམས་ཀྱི་གདགས་གཞི་དེའོ།།
མར་མར་ལ་ཟགས་པའི་ཁ་བས་སྙིང་གཏམ་ཅིག་ཨེ་ཤོད་བསམས་སོང་།།
ཡར་ཡར་ལ་ལྡིང་བའི་བསེ་རུས་ལག་འཇུ་ཞིག་ཨེ་རེག་འདོད་སོང་།།
ཤག་ཤག་ཏུ་འབབ་པའི་ཆུ་མོས་དྲན་གླུ་ཞིག་ཨེ་གྱེར་དྲན་སོང་།།
རྡ་ས་ཡི་སེམས་པ་དྲོན་མོས་བྱིལ་བྱིལ་ཞིག་ཨེ་རེག་བསམས་སོང་།།
རྒྱ་གར་བའི་གྲོང་སྡེ་ཐར་ཐོར་འགུལ་མེད་དང་འགྲིབ་མེད་ཟོལ་དུ།།
གྲོགས་པོ་ཚོའི་བརྩེ་བ་ལིང་ལིང་ཡན་མེད་དང་འབྲལ་མེད་ཚུལ་དུ།།
སྨུག་པ་དང་ཆར་བ་གཉིས་པོ་ཧྲེང་ཧྲེང་གི་སྐྱོ་རོགས་བཞིན་དུ།།
རྟ་ནག་དང་རྨི་ལམ་གཉིས་པོ་ཡད་ཡུད་ཀྱི་སྐྱོ་བས་བཞག་སོང་།།
མཚམས་མཚམས་སུ་ཁ་ཆར་ཟགས་ཤིང་སྐབས་སྐབས་སུ་ཉི་མས་བཞུ་བ།།
ཚོད་ཚོད་དུ་རླུང་བུ་ལྡིང་ཞིང་མཚམས་མཚམས་སུ་སྨུག་པས་གཅུད་པ།།
ས་གཞི་དང་ནམ་མཁའ་གཉིས་པོའི་ཁྲོས་རྫོགས་ཤིག་ཨེ་ཡིན་འདོད་པ།།
སྐུ་ངོ་དང་སྲུང་མ་དག་གི་ཀོ་ལོང་ཞིག་མཛད་སོང་བསམ་པ།།
༢༠༡༡། ༢། ༡༤། ནོར་གླིང་དུ་སྦྱར།
རྟ་ནག་པས་རྟ་མཆོག་བཞོན་ཏེ་བལ་ཡུལ་དེ་ལྷོད་ཀྱིས་བསྐོར་སོང་།།
འཇིག་རྟེན་འདི་མུ་མཐའ་ཐུང་བས་རྡ་ས་རུ་ཡང་སྐྱར་ཕེབས་བྱུང་།།
རྟ་ནག་འདི་ལྟ་ལོག་ཡིན་ཡང་སྙན་ངག་གི་ཉམས་འགྱུར་བཟང་བ།།
ཁ་བརྡ་ཡི་དྲ་བའི་ཐོག་ཏུ་སྙན་ཚིག་གི་གླུ་དབྱངས་གྱེར་འདུག།
སྙན་ངག་གི་རོ་བཅུད་ཞིམ་ཡང་དྲ་འབུ་ཚོ་གཉིད་ལ་ཤོར་འདུག།
གྱེས་འཛོམས་ཀྱི་ཉིན་མོ་འདི་ལ་རྟ་ནག་ལ་བསུ་བ་བྱས་སོ།།