གཡུ་ཞུན་དྲ་བ་ནས་བླངས།
སྐུའི་གཅེན་པོ་དམ་པ་སྟག་རྩེར་རིན་པོ་ཆེའི་སྲས་འཇིགས་མེད་ནོར་བུ་ལགས་ཀྱིས་ཨ་རིའི་ཧྥུ་ལོ་རེ་ཌ་མངའ་སྡེའི་ནང་བོད་དོན་ཆེད་གོམ་བགྲོད་གནང་བཞིན་པའི་སྐབས། རླངས་འཁོར་གྱི་རྡབ་སྐྱོན་ཁྲོད་སྐུ་གྲོངས་པས་གནས་ཚུལ་བྱུང་བའི་རྗེས་སུ།ཨ་རིའི་ཕྱོགས་མཐའ་ཁག་ནས་བོད་མི་ན་གཞོན་ཁག་ཅིག་ ཧྥུ་ལོ་རེ་ཌ་མངའ་སྡེའི་ནང་སོང་སྟེ་ བོད་དོན་གོམ་མགྲོད་ཀྱི་ལས་འགུལ་དེ་མུ་མཐུད་དུ་མཇུག་སྐྱོང་གི་ཡོད་པ་རེད།
སྐུའི་གཅེན་པོ་དམ་པ་སྟག་རྩེར་རིན་པོ་ཆེའི་སྲས་འཇིགས་མེད་ནོར་བུ་ལགས་ ཟླ་བ་འདིའི་ཚེས་ ༡༤ ཉིན་ ཨ་རིའི་ཧྥུ་ལོ་རེ་ཌ་མངའ་སྡེའི་ནང་ རྒྱང་ཐག་མེ་ལེ་༣༠༠ ལྷག་གི་བོད་དོན་གོམ་བགྲོད་ཀྱི་ལས་འགུལ་འགོ་འཛུགས་གནང་སྟེ་ ཉིན་དང་པོའི་གོམ་བགྲོད་ཀྱི་དགོངས་དྲོའི་ཚོུད་༧དང་ཕྱེད་ཀ་ཙམ་ལ་ གཞུང་ལམ་སྟེང་གློ་བུར་རླངས་འཁོར་རྡབ་སྐྱོན་ཁྲོད་སྐུ་གྲོངས་པའི་ཡིད་སྐྱོའི་གནས་ཚུལ་བྱུང་ཡོད་ལ། ས་ཁུལ་དེའི་ནང་སྲས་འཇིགས་མེད་ནོར་བུ་ལགས་ཀྱིས་བོད་དོན་གོམ་མགྲོད་ཀྱི་ལས་འགུལ་ཐོག་ གོ་སྒྲིག་མཐུན་འགྱུར་གནང་མཁན་ཨ་རི་བ་བུད་མེད་ཌོན་ཁེམ་རྦུ་རན་ཌི་ཡིས་ཨེ་ཕིས་གསར་སྤེལ་ཁང་ལ་བརྗོད་ན། ཚེས་༡༧ཉིན་གྱི་ཞོགས་པའི་དུས་ཚོད་བཅུ་བའི་ཐོག་སྲས་འཇིགས་མེད་ནོར་བུ་སྐུ་གྲོངས་སའི་ས་ཆ་དེ་ནས་བསྔོ་བ་སྨོན་ལམ་གྱི་ཞལ་འདོན་རྗེས་སུ།བོད་རང་བཙན་དང་འཛམ་གླིང་ཞི་བདེའི་ཆེད་ཀྱི་གོམ་མགྲོད་ཀྱི་ལས་འགུལ་དེ་ཡང་བསྐྱར་འགོ་བཙུགས་ཡོད་པ་དང་། ལས་འགུལ་འགོ་འཛུགས་ཀྱི་ཉིན་དང་པོའི་གོམ་མགྲོད་ནང་མཉམ་ཞུགས་གནང་མཁན་།བྱང་ཨ་རིའི་བོད་མིའི་སྤྱི་འཐུས་ཟུར་བ་དབང་ཕྱུག་རྡོ་རྗེ་ལགས་དང་། དེ་མིན་ནིའུ་ཡོག་ནས་བོད་མི་གསུམ་སོང་ཡོད་པའི་སྐོར་། ནིའུ་ཡོག་དང་ནིའུ་རྗིར་སུ་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ངག་དབང་བཀྲ་ཤིས་ལགས་ཀྱིས་གསུང་རྒྱུར་།ནིའུ་ཡོག་ནས་ཚེ་རིང་དབང་མོ་དང་བློ་དགའ། སངས་དགའ་བཅས་གསུམ་པོ་སྲས་འཇིགས་མེད་ནོར་བུ་དམ་པ་དེའི་གོམ་བབགྲོད་མཇུག་སྐྱོང་ཆེད་འགྲོ་གི་ཡོད་ཟེར། དེ་བཞིན་མེ་ནི་སོ་ཌ་སོགས་ཨ་རིའི་ས་གནས་གཞན་དག་ནས་ཀྱང་བོད་མི་ཁ་ཤས་གོམ་བགྲོད་མཇུག་སྐྱོང་གི་ལས་འགུལ་ནང་མཉམ་ཞུགས་བྱེད་རྒྱུ་ཡིན་་པ་རྒྱལ་སྤྱིའི་བོད་རང་བཙན་ལས་འགུལ་ཁང་གིས་གནས་ཚུལ་སྤེལ་འདུག
དགུང་ལོ་༤༥ ཡིན་པའི་སྲས་འཇིགས་མེད་ནོར་བུ་དམ་པ་དེ་ནི། སྐུའི་གཅེན་པོ་དམ་པ་སྟག་འཚེར་རིན་པོ་ཆེ་མཆོག་གི་སྲས་གསུམ་ཡོད་པའི་ནང་གི་ཆུང་ཤོས་དེ་ཡིན་ལ། ༢༠༠༨ལོའི་ཟླ་དགུ་བར་སྟག་འཚེར་རིན་པོ་ཆེ་སྐུ་སྙུང་ནས་དགོངས་པ་རྗོགས་པའི་རྗེས་།སྲས་དམ་པ་འཇིགས་མེད་ནོར་བུ་ལགས་ཀྱིས་ཁོང་གི་ཡབ་དམ་པའི་ ལོ་མང་རིང་ནས་ བྱང་ཨ་རི་ཁུལ་དུ་བོད་རང་བཙན་དོན་ཆེད་གོམ་མགྲོད་ཀྱི་ལས་འགུལ་གནང་བཞིན་ཡོད་པ་དེ་མུ་མཐུད་མཇུག་སྐྱོང་ཆེད་།སྔ་རྗེས་སུ་བྱང་ཨ་རིའི་མངའ་སྡེ་མང་པོའི་ནང་ བོད་དོན་གོམ་མགྲོད་གནང་ཡོད་པ་མ་ཟད་། ན་ནིང་གི་སྤྱི་ཟླ་ ༡༢ པའི་ནང་ཐའེ་ཝན་གྱི་རྒྱལ་ས་ཐེ་པེ་ནས་ གྲོང་ཁྱེར་ཀོ་ཞུང་བར་ ཉིན་གྲངས་ ༡༣ རིང་གོམ་བགྲོད་གནང་ཡོད་པ་རེད་། ཡང་གནས་ཚུལ་ནང་བརྗོད་ན།ཨ་རིའི་ཨིན་ཏིས་ཨན་ན་མངའ་སྡེའི་རྦུ་ལུའུ་མིན་ཌོན་གྲོང་ཁྱེར་ནང་ཡོད་པའི་སྐུའི་གཅེན་པོ་སྟག་རྩེར་རིན་པོ་ཆེས་གསར་འཛུགས་དང་། དེང་སྐབས་ཨ་ཀྱྭ་རིན་པོ་ཆེས་བདག་སྐྱོང་གནང་བཞིན་པའི་སྐུ་འབུམ་བྱམས་བརྩེ་གླིང་དང་བོད་སོག་རིག་གཞུང་ལྟེ་གནས་ཁང་གིས་སྲས་དམ་པ་འཇིགས་མེད་ནོར་བུ་ལགས་ཀྱི་ཆེད་དུ་བསྔོ་སྨོན་བདུན་ཚིག་དང་ཞེ་དགུའི་སྨོན་ལམ་འགོ་འཛུགས་འགོ་འཛུགས་གནང་ཡོད་པ་ཨེ་ཕིས་གསར་སྤེལ་ཁང་གིས་ཚེས་༡༧ཉིན་གནས་ཚུལ་སྤེལ་འདུག
གསར་འགྱུར | གཡུ་ཞུན |
གདུང་སྲས་དམ་པ་འཇིགས་མེད་ནོར་བུ་ལགས་སུ། མྱ་ངན་ཆེན་པོས་གུས་འདུད་ཞུ།
སྐྱེ་ཕོ་རབ་ཚོར་སྙིང་ནས་ཐུགས་རྗེ་ཆེ་ཞུ།