བསྟན་འཛིན་ཤེས་རབ།
ཉིན་འདི་ཚོར།
ངས་ཁ་གྲགས་མི་འདོད་པའི་ཉི་མ་རེ་རེ་བཞིན་ཨུ་ཚུགས་ཀྱིས་བགྲང་ཞིང་།
ཤོག་སྦག་མེ་ཏོག་བཞད་པ་ལྟ་བུའི་ནམ་མཁའི་སྐར་ཚོགས་ལ་ལྟ་བཞིན།
གཅིག་རྗེས་གཉིས་མཐུད་ཀྱིས་མགོ་ཐོག་ནས་བཞུད་འགྲོ་བའི་སྐར་མདའ་དེ་ཚོར་ལག་བརྡ་རེ་བྱས།
ཉིན་འདི་ཚོར།
ངས་རང་གི་ཉེ་འཁོར་དང་ཕྱོགས་བཞི་མཚམས་བརྒྱད་ལ་མིག་ཟུང་བསྲིངས་ཏེ།
རེ་སྨོན་དང་དོགས་སློང་གི་སྐུད་པ་ཡང་ཡང་ཁེད་ཅིང་།
རླུང་བུ་ཤུར་སེར་བུད་འགྲོ་བའི་གཡས་གཡོན་གྱི་བྱེའུ་དེ་ཚོ་མཐོང་ཐེངས་བཞིན།
རང་ཉིད་ལ་ཡང་ལྟ་བསྐྱར་ལྟ་རེ་བྱེད་དགོས་བྱུང་།
ཉིན་འདི་ཚོར།
ངས་ཤར་ནུབ་ལ་བྲེལ་བཞིན་པའི་ཉི་མ་དམར་བོ་དེ་མཐོང་ན།
རང་ཉིད་ལ་སུ་ཞིག་གིས་བསླུ་བྲིད་མཚར་བོ་ཞིག་བྱེད་ཀྱིན་པའི་སྣང་བ་ཤར་ལ།
ཆུ་གཉེར་བཞིན་འདས་འགྲོ་བའི་དུས་ཚོད་དེ་དག་གིས།
རང་ཉིད་ཀྱི་ཡོད་ཚད་ཐལ་བའི་རྡུལ་བཞིན་བརླག་པར་འཇིགས་ཤིང་སྐྲག
ཉིན་འདི་ཚོར།
ངས་རླུང་བུ་བསིལ་མོ་ཞིག་ལྡང་བར་རེ་བས་ལྟོས་ཤིང་།
ཉི་འོད་འཇམ་པོ་ཞིག་འཕྲོ་བར་སྨོན་པ་འཆང་མོད།
འདས་ཟིན་པའི་རས་གཟན་ཐེད་པོ་དེ་མིག་ཁར་འཕྱན་འོངས་དུས།
སེམས་པའི་གཏིང་རིམ་ནས་འཁྱག་འདར་ཤིག་གེར་འགྲོ་ལ།
ཡོད་ལ་མེད་པ་འདྲ་བའི་ལམ་ཁ་དེར་མུ་མཐུད་དུ་འགྲོ་འོས་སམ་སྙམ།
ཉིན་འདི་ཚོར།
ངས་ར་གན་གསེར་དུ་འཁྲུལ་བའི་ལམ་བུ་དེར་ཡིད་མུག་ཅིང་།
འདུ་ཤེས་ཀྱི་ཕྱི་ནང་བར་གསུམ་ལ་གཙང་སེལ་གྱིས།
རྨི་ལམ་གྱི་བར་རོལ་ནས་བརླགས་པའི་མུ་ཏིག་ཚོམ་བུ་དག་སླར་སྒྲུག་སྟེ།
ལུས་ངག་ཡིད་གསུམ་གྱིས་འགྱོད་བཤགས་བླ་མེད་ཅིག་བྱེད་འདོད།
ཉིན་འདི་ཚོར།
ངས་ངོ་གདོང་བཅོས་མའི་རྒྱབ་རོལ་ཏུ་སྦས་པའི་འཇིགས་རུང་གི་ངོ་གདོང་དག་མཐོང་བས།
ཞེད་སྣང་གིས་སྙིང་རྩ་སྦྲུད་ཅིང་།
སུ་ཞིག་གིས་སྔ་མོ་ནས་སྡོམ་ཚིག་བརྒྱབ་པའི་ངོ་གདོང་དེར་ལྟ་བཞིན།
སྡོམ་ཚིག་དེ་ཇི་འདྲའི་བདེན་པ་ལ་ཨང་སྙམ་བྱུང་།
ཉིན་འདི་ཚོར།
ངས་ངོ་གདོང་མཁའ་དབྱིངས་སུ་ཕྱོགས་ཏེ་རང་ཉིད་ལ་ལེ་བདའ་བྱེད་བཞིན་ཡོད།
ད་དུང་སྙིང་རུས་ཀྱི་རྩིག་པ་རེ་ཡང་རྩིག་བཞིན་ཡོད།
སྨྲ་ལྕེ་མང་བོར་སྒུལ་སྐྱོད་རྒྱག་ཆེད། ཚོད་ཚོད་ལ་འུར་རེ་རྒྱག་བཞིན་ཡོད།
སྐེད་ལམ་ཕྲ་མོ་ཡིན་རུང་རྙི་རེ་འཛུགས་ཆོག་པར་སྙམ་གྱི་ཡོད།
ཉིན་འདི་ཚོར།
ངས་་་་་་་་་་་་་་་་་