སྲས་འཇིགས་མེད་ནོར་བུས་མགོ་བཙུགས་པའི་ཧྥི་ལོ་ཪཱི་ཌའི་ནང་གི་བོད་རང་བཙན་གྱི་གོམ་བགྲོད་དེ་དེ་རིང་མཇུག་སྒྲིལ་རྒྱུ་ཡིན་པ་རེད།
དགུང་ལོ་དྲུག་ཅུ་རེ་བདུན་ལ་སོན་པའི་བོད་མི་མང་སྤྱི་འཐུས་ཟུར་པ་དབང་ཕྱུག་རྡོ་རྗེ་ལགས་ཀྱིས་གསུངས་པ་ལྟར་ན། བོད་རང་བཙན་གོམ་བགྲོད་པ་མི་གྲངས་ ༢༢ ཡོད་པ་དག་གིས་དེ་རིང་ཕྱི་དྲོར་མེལ་ལེ་སུམ་བརྒྱ་ལྷག་གི་གོམ་བགྲོད་མཇུག་སྒྲིལ་རྒྱུ་ཡིན་པ་དང་། གོམ་བགྲོད་པའི་ཁོངས་སུ་སྲས་ཀུན་དགའ་ནོར་བུ་དང་། འཇིགས་མེད་དམ་པའི་སྲས་རྒན་པ་གཉིས། དེ་བཞིན་མཱེ་ནེ་སོ་ཊ་དང་ནིའུ་ཡོག་ནས་ཕེབས་པའི་བོད་རིགས་བཅས་བོད་མི་ཁྱོན་བསྡོམས་ ༡༢ ཡོད་པ་དང་། མཇུག་སྒྲིལ་གྱི་ལས་རིམ་ཁོངས་སུ་ ཁོང་ཚོས་ ས་དེའི་གྲོང་ཁྱེར་སྤྱི་ཁྱབ་པ་ལ་མཇལ་འཛོམས་དང་བོད་ཀྱི་གློག་བརྙན་གཟིགས་འབུལ་སོགས་ཡོད་པ་རེད།
སྤྱི་ཟུར་དབང་ཕྱུག་རྡོ་རྗེ་ལགས་ཀྱིས་འདས་པའི་ལོ་ངོ་བཞི་ཡི་རིང་སྲས་དམ་པ་འཇིགས་མེད་ནོར་བུ་དང་ལྷན་དུ་གོམ་བགྲོད་མང་པོ་གནང་ཡོད་པ་དང་། ཐེངས་འདིའི་གོམ་བགྲོད་ལ་ཡང་ཞུགས་ཡོད་པ་རེད། ཁོང་གིས་གསུངས་དོན། “ང་གཉིས་ལོ་ ༤ ཡི་རིང་གོམ་བགྲོད་ལ་ཕྱིན་པ་རེད། ཁོང་ནི་མི་ཐུགས་གཤིས་བཟང་པོ་དང་རང་བཞིན་ཡག་པོ། བགད་མོ་འཚེར་འཚེར་གནང་མཁན་དེ་འདྲ་ཞིག་རེད། གོམ་བགྲོད་རིང་ངས་ཁོང་ལ་བོད་ཀྱི་སྒྲུང་རྙིང་པ་འདྲ་བོ་དེ་འདྲ་བཤད་ནས་ང་ཚོ་སེམས་ཐག་ཉེ་བོ་ཆགས་སོང་ལ། ང་ལ་མཚོན་ན་ཡང་ཕ་བུ་ལྟ་བུའི་བརྩེ་བ་ཞིག་སླེབས་སོང་།” ཅེས་གསུངས་སོང་།
ཟླ་འདིའི་ཚེས་ ༡༤ ཉིན་ཁོང་གིས་འཇིགས་མེད་དམ་པ་དང་ལྷན་དུ་རང་བཙན་གོམ་བགྲོད་འདི་མགོ་བཙུགས་པའི་སྐོར་ལ་འགྲེལ་བཤད་སྐབས། “ང་ཚོ་ལ་གནས་ཚང་ཡག་པོ་ཞིག་རག་ཡོད། ང་ཚོ་མགོ་འཛུགས་ཀྱི་མཛད་སྒོ་ཞིག་བྱས་ཏེ་གོམ་པ་བརྒྱབ་པ་ཡིན། འཇིགས་མེད་ལགས་ཀྱིས་ད་དུང་གོམ་བགྲོད་གཞན་དག་ཀྱང་བྱེད་འཆར་ཡོད་པའི་སྐད་ཆ་བཤད་གི་འདུག ད་དུང་༧རྒྱལ་བ་རིན་པོ་ཆེ་ཌི་སཱི་ལ་ཕེབས་པའི་སྐབས་སུ་ཡང་གོམ་བགྲོད་བྱེད་རྒྱུའི་སྐོར་གསུངས་གི་འདུག ངས་ཁོང་ལ་དེ་དུས་ཁྱོད་ནས་གོམ་བགྲོད་ཀྱི་སྐོར་ལ་གསུང་བཤད་ཅིག་གནང་ཐུབ་ན་ཡག་པོ་འདུག་ཅེས་བཤད་པ་ཡིན། ཁོང་གིས་ཀྱང་དེ་ཡག་པོ་འདུག་དགོངས་འདུག ད་འཆར་གཞི་དེ་ཚོ་འཁྲུགས་པ་རེད། སེམས་སྐྱོ་པོ་འདུག སེམས་ཕམ་ཆེན་པོ་འདུག”ཅེས་གསུངས་སོང་།
ཡང་ཁོང་གིས་ གོམ་བགྲོད་འདི་མུ་མཐུད་དགོས་པའི་སྐོར་ལ་གསུངས་སྐབས། “ཚེས་ ༡༥ ཉིན་ནས་ང་དང་ཨ་རིའི་བུ་མོ་ཌོ་ནཱ་གཉིས་གྲོས་བྱས་ཏེ་གོམ་བགྲོད་མུ་མཐུད་བྱེད་རྒྱུའི་ཐག་གཅོད་བྱས་པ་ཡིན། དེ་ལ་ང་ཚོའི་གནས་ཚང་བཟའ་མི་གཉིས་ཀྱིས་ཀྱང་། ཁྱོད་གཉིས་གཅིག་པུ་འགྲོ་ན་ཉེན་ཁ་ཆེན་པོ་རེད། ང་གཉིས་ཀྱིས་ཀྱང་ལས་ཀ་ནས་དགོངས་པ་ཞུས་ཏེ་ལྷན་དུ་བཅར་གི་ཡིན་ཞེས་གསུངས་ནས་ང་ཚོ་ཕྱིན་པ་རེད། རྗེས་ལ་བོད་རིགས་རྣམས་ཀྱང་ཕྱོགས་མང་པོ་ནས་ཕེབས་པ་རེད།”ཅེས་གསུངས་བྱུང་།
ཡང་ཁོང་གིས་གསུངས་པ་ལྟར་ན། འཇིགས་མེད་ནོར་བུ་ནི་བོད་རྩ་དོན་ལ་ཕྱག་ལས་གནང་སྐབས་སྐྱིད་འདོད་དང་རྫིག་འདོད་བྱེད་མཁན་ཞིག་རྩ་བ་ནས་མིན་པ་མ་ཟད། དཀའ་ལས་དང་སྡུག་རུས་ལ་བཟོད་སྒོམ་བྱེད་ཐུབ་མཁན་ཞིག་ཡིན་པ་རེད་ལ། རྐང་པ་ལ་ཆུ་ལྒང་ཐོན་པ་སོགས་ན་ཚ་ཅི་ཙམ་ཆེ་ན་ཡང་ཨ་ཚ་ཙམ་ཡང་མི་གསུངས་པར་གོམ་བགྲོད་གནང་མཁན་ཞིག་ཡིན་པ་རེད། ཁོང་གིས་གོམ་བགྲོད་ཆེད་འཁྱེར་བའི་སྒམ་དེའི་ནང་དུ་འང་ ཨུ་མུ་སུ་འགའ་རེ་དང་། སྟོད་ཐུང་ཊི་ཤིར་ཊི་འགའ་རེ། ལྷམ་ཆ་གཅིག དེབ་ཁ་ཤས་བཅས་མ་གཏོགས་ གྱོན་ཆས་རྫིག་པོ་སོགས་གང་ཡང་བསྣམས་མི་འདུག་ཅེས་གསུངས་སོང་ལ། མཐར་ཁོང་གིས། “འཇིགས་མེད་ནོར་བུ་སྐུ་གཤེགས་པ་དེ་བོད་ཀྱི་རྩ་དོན་ཆེད་སྐུ་གཤེགས་སོང་། ད་ང་ཚོས་ཁོང་གིས་བརྩམས་པའི་ལས་དོན་འདིའི་མཇུག་འཁྱོལ་བ་བྱེད་རྒྱུ་དེ་གལ་ཆེན་པོ་རེད། ད་ལས་ཀ་བྱེད་རྒྱུ་དེ་གལ་ཆེན་པོ་འདུག”ཅེས་གསུངས་སོང་།
འཇིགས་མེད་དམ་པའི་འདས་མཆོད་ཀྱི་མྱ་ངན་ཞིག་ཁོང་བཞུགས་སའི་གྲོང་ཁྱེར་སྤྱི་ཁང་དུ་ ཟླ་ ༣ ཚེས་༡ རེས་གཟའ་མིག་དམར་ཉིན་གནང་གི་ཡོད་པ་རེད། འཇིགས་མེད་དམ་པའི་བྱིས་པ་ཚོའི་ཆེད་དུ་ཡིད་ཆེས་ཐེབས་རྩ་ཞིག་འཛུགས་བཞིན་པ་དེར་ཞལ་འདེབས་ཀྱང་འབུལ་ཆོག་ཡོད་པ་རེད།
ང་ཚོའི་རྒྱལ་སྲས་གྲོངས་སོང།ད་སྨེ་ངག་བཏོན་ནས་གང་ཡང་ཕན་གྱི་མ་རེད་།མུ་མཐུད་དུ་ཁོང་གི་ཕྱག་ལས་རྒྱུན་སྐྱོང་གནང་མཁན་ཚོར་མཐུན་འགྱུར་རོགས་རམ་དང་ཤུལ་ལུས་བུ་ཕྲུག་ཚོར་ཞལ་འདེབས་རེ་ཕུལ་྆རྒྱུ་དེ་རེད།