སྤོབས་པ་མཐའ་ཡས།
འབྱུང་འཇིག་གི་འགྱུར་བ་ཆེས་མང་བའི་འཇིག་རྟེན་འདིའི་སྐམ་སར་གྱུར་པའི་དུམ་བུ་ཆུང་ཆུང་ཞིག་གི་སྟེང་ན་ང་ཚོ་གནས་བཞིན་པ་རེད། འཛམ་གླིང་ཞེས་འབོད་པའི་གོ་ལ་ཆུང་ཆུང་འདིའི་སྟེང་ཁོ་ནར་ང་ཚོ་གནས་ཐུབ་པ་ཡིན་སྟབས་ང་ཚོས་འདི་ལྟ་བུའི་གནས་གཞི་ཞིག་རྙེད་པ་དེ་ནི་དགའ་བ་སྒོམ་འོས་པ་ཞིག་རེད། གོ་ལ་འདིའི་ཡང་ཆ་ཤས་ཕལ་མོ་ཆེ་ནི་གྲང་ཆེ་བ་དང་། ཚ་དྲགས་པ། སྐམ་ཆེ་བ། གཟར་དྲགས་པ། མཐོ་ཆེས་པ་སོགས་ལ་བརྟེན་ནས་ང་ཚོ་འཚོ་སྡོད་ཐུབ་ཀྱིན་མེད་པ་རེད། དེ་ནི་ཕྱོགས་གཅིག་ནས་ང་ཚོ་རང་གི་སྐྱོན་ཡང་རེད།
ནུས་སྟོབས་ཞན་པའི་མིའི་རིགས།
ང་ཚོ་མིའི་རིགས་འདི་ནི་དཀའ་ངལ་ལ་གདོང་ལེན་བྱེད་པའི་ནུས་སྟོབས་ཧ་ཅང་ཞན་པའི་སྲོག་ཆགས་རིགས་ཤིག་རེད། ང་ཚོ་ཚ་བ་ཆེ་སར་མི་དགའ། དེ་ནི་ང་ཚོ་ལ་རྔུལ་ནག་བཞུར་སླ་ཞིང་ཚ་བའི་ཟ་འཕྲུག་དང་པགས་ནད་ཀྱིས་གོས་སླ། ཐ་ན་བྱེ་ཐང་ཚ་བོའི་སྟེང་དུ་བཏུང་ཆུ་མེད་པར་ཆུ་ཚོད་བདུན་བརྒྱད་ཅིག་གི་རིང་ལ་ཡང་གོམ་བགྲོད་བྱེད་མི་ནུས། དེ་དང་མཚུངས་པར་ང་ཚོས་གྲང་ངར་ལ་གདོང་ལེན་གཏན་ནས་མི་ནུས། སྤྱིར་ན་འོ་འཐུང་སྲོག་ཆགས་ཚང་མ་དང་མཚུངས་པར་མི་ལ་ཡང་ལུས་དྲོད་འཛིན་པའི་ནུས་སྟོབས་ཡག་པོ་ཡོད། ཡིན་ན་ཡང་ཐབས་སྡུག་པ་ཞིག་ལ་ང་ཚོ་མིའི་རིགས་ལ་ལུས་དྲོད་འཛིན་ནུས་པའི་སྤུ་ཆེར་མེད། དེར་བརྟེན་དྲོ་ཤས་ཆེ་བའི་ཡུལ་དུ་ཡང་མིའི་རིགས་ཀྱིས་ཟས་བཅུད་ཞུ་བའི་ནུས་སྟོབས་ཀྱི་ཕྱེད་ཀ་ཙམ་ལུས་དྲོད་འཛིན་པའི་ཆེད་དུ་གཏོང་ཀྱིན་ཡོད།
སྐལ་པ་བཟང་པོའི་སྐད་ཅིག་མ།
སྲིད་པ་འཇིག་རྟེན་གཞན་རྣམས་ཅི་འདྲ་ཞིག་ཡིན་པ་ལ་བསམ་བློ་ཞིག་ཐོངས་དང་། ང་ཚོ་ལ་གནས་གཞི་ཆུང་ཆུང་ཞིག་ལས་མེད་རུང་ང་ཚོས་རང་ཉིད་ཀྱི་སྡོད་ཁྱིམ་ཞིག་རྙེད་ཡོད་པ་དེ་ནི་ངོ་མཚར་འོས་པ་ཞིག་རེད། དྲོད་གྲང་སྙོམ་ཞིང་། ཆུ་བོའི་བཞུར་རྒྱུན་གྱིས་བརྒྱན་པ། འཚོ་བ་ལ་སྨན་པའི་རླངས་རྫས་སྔོ་དུང་ངེ་བས་བཏུམ་པའི་ང་ཚོའི་གཞིས་ཁྱིམ་སྙིང་དུ་སྡུག་པ་དེར་བསམ་ཚེ་ཡོས་རྔོད་སའི་སླ་ང་བཞིན་ཚ་བའི་སྐར་ཁྱིམ་ཝེ་ན་སི་དང་གྲང་འཁྱགས་ཀྱིས་གཟིར་བའི་སྐར་ཁྱིམ་མར་སི་སོགས་སྲིད་པ་འཇིག་རྟེན་གཞན་རྣམས་ནི་ཆེས་ཡིད་ལ་མི་སྡུག་ཅིང་ལུས་ལ་མི་འཕྲོད་པ་ཤ་སྟག་ཏུ་སྣང་། བར་སྣང་རིག་པ་བ་ཚོས་ཉི་ཁྱིམ་ཡས་མས་སུ་དངོས་གཟུགས་ཐེར་འབུམ་དང་ཐེར་འབུམ་ཆེན་པོའི་གྲངས་སུ་ལོངས་པ་ཞིག་གི་ཁྲོད་དུ་གོ་ལའི་གྲངས་སུ་བགྲངས་འོས་པ་ཙམ་ཡང་་༢༥༠ཡས་མས་ལས་རྙེད་མེད། གནས་སྟངས་དེ་དག་ལ་བསམ་ན་ང་ཚོ་ལ་སྐྱེ་ལྡན་གྱི་དངོས་པོ་སྐྱེད་འཕེལ་གྱི་སྣོད་དུ་གྱུར་བའི་ཁྱིམ་གཞི་ཞིག་ཡོད་པ་དེ་ཡང་ཆེས་རྨད་དུ་བྱུང་བ་ཞིག་རེད།
གནས་ཡུལ་ཕུན་སུམ་ཚོགས་པ།
ང་ཚོའི་ཁྱིམ་གཞི་འདི་ནི་ཉི་མ་དང་ཐག་རིང་ཐུང་ཆེས་འཚམས་པའི་ས་ཚོད་ཅིག་ན་ཆགས་ཡོད་འདུག ཐག་རིང་ཐུང་སྙོམ་དགོས་པའི་སྐར་མ་ཞིག་ལ་ཐག་རིང་ཐུང་སྙོམ་པའི་ས་ཚོད་ཅིག་ན་ཆགས་ཡོད་པའི་དེ་ནི་བཤད་ཀྱང་བདེན་དུ་འཛིན་དཀའ་བའི་སྐལ་བ་བཟང་པོ་ཞིག་རེད་འདུག ང་ཚོའི་གོ་ལ་འདི་ཆེ་མ་དྲགས་ནས་མེ་རུ་མི་འབར་ཞིང་། ཆུང་མ་དྲགས་ནས་རང་སྟོབས་ཀྱིས་རླངས་རྫས་ཕྱིར་སྤྲོས་ནས་རླངས་ཁམས་ཀྱི་ཡོལ་བའི་རིམ་པ་གྲུབ་སྟེ་སྐྱེ་དངོས་སྐྱེད་འཕེལ་ཀྱི་ཆ་རྐྱེན་སྟེར་ནུས། སྐར་མ་ག་ཚོད་ཆེ་ན་དེ་ཙམ་གྱིས་མེ་རུ་འབར་མགྱོག གལ་སྲིད་ཉི་མ་འདི་ཡང་འདི་ལས་བཅུ་འགྱུར་ཙམ་གྱིས་ཆེ་བ་ཡིན་ན་མི་ལོ་ཐེར་འབུམ་བཅུ་ལ་འདངས་བ་ལས་ལྡོག་སྟེ་ས་ཡ་བཅུ་ཙམ་གྱིས་རྫོགས་འགྲོ་བ་ཡིན་འདུག གལ་སྲིད་ང་ཚོའི་གོ་ལ་འདི་ད་ལྟའི་གནས་ཡུལ་འདི་ལས་བརྒྱ་ཆ་ལྔ་ཙམ་ཉི་མ་དང་ཐག་ཉེ་བར་གྱུར་ན་སྐྱེ་ལྡན་གྱི་དངོས་པོ་ཡོད་ཚད་ཚིག་ཅིང་སྐམ་པར་འགྱུར་ཞིང་། གལ་སྲིད་བརྒྱ་ཆ་བཅོ་ལྔ་ཙམ་ཐག་རིང་བར་གྱུར་ན་ཐམས་ཅད་གྲང་བས་འཁྱགས་རོམ་དུ་འགྱུར་བ་ཡིན།
གོ་ལ་མཚེ་མ།
ང་ཚོའི་གོ་ལ་དང་ཟླ་བ་གཉིས་ལ་ཆེ་ཆུང་གི་ཁྱད་པར་ཆེན་པོ་ཡོད་པ་བདེན་ཡང་དོན་དུ་དེ་གཉིས་མཚེ་མ་རེད། ཟླ་བའི་འཐེན་ཤུགས་ཀྱིས་ང་ཚོའི་གོ་ལ་འཛིན་མ་ཐུབ་ན་ང་ཚོའི་གོ་ལ་འདི་ཆང་བཟི་མའི་གོམ་བགྲོད་བཞིན་དུ་གྱུར་ནས་གཡོ་འཁྱོམས་ཀྱིས་རང་ཚུགས་མི་ཐུབ་པར་འགྱུར། ཟླ་བའི་འཐེན་ཤུགས་ལ་བརྟེན་ནས་ང་ཚོའི་གོ་ལའི་འཁོར་སྐྱོད་ཀྱི་མགྱོག་ཚད་དང་ལམ་ཐིག་གཏན་ཁེལ་གྱི་ནང་དུ་རྒྱུ་ནུས་པ་ཡིན། གོ་ལའི་འཁོར་སྐྱོད་ཀྱི་མྱུར་ཚད་དང་ལམ་ཐིག་གཏན་ཁེལ་ཀྱི་ནང་དུ་འཁོར་ནུས་པ་འདི་ནི་སྐྱེ་དངོས་སྐྱེད་འཕེལ་བརྟན་པོར་ཡོང་བར་ཕན་ཐོགས་ཡོད། ཡིན་ན་ཡང་སྟབས་ཉེས་པ་ཞིག་ནི་ཟླ་བས་དུས་གཏན་དུ་ང་ཚོ་ལ་རོགས་པ་བྱེད་ཀྱི་མ་རེད། ཟླ་བ་འདི་ལོ་རེ་བཞིན་མི་ཊར་སྟོང་ཆ་བཞི་ཙམ་རེ་ཕྱིར་བཀྱེད་ནས་འགྲོ་བཞིན་ཡོད་སྟབས་ད་ནས་ལོ་ཐེར་འབུམ་གཉིས་ཙམགྱི་རྗེས་སུ་ཟླ་བའི་འཐེན་ཤུགས་ཀྱིས་ང་ཚོ་གོ་ལ་གཏན་ནས་འཛིན་མི་ཐུབ་པ་ཡིན་འདུག
ཁྱིམ་ཡག་ཤོས་ཤིག
ང་ཚོའི་ཁྱིམ་འདི་ཁྱིམ་ཡག་ཤོས་ཤོས་ཤིག་ཡིན་དོན་ནི་ང་ཚོ་ཉི་མ་དང་ཐག་རིང་ཐུང་སྙོམ་པ་ཁོ་ན་ཙམ་ཡང་མ་རེད། ཉི་མ་དང་ཐག་རིང་ཐུང་འཚམས་པ་ཙམ་ཁོ་ནས་འགྲིགས་ཡོད་ན་ཟླ་བ་ལ་ཡང་ནགས་ཚལ་འཐུག་པོ་སྐྱེ་དགོས་པར་འགྱུར། ང་ཚོ་གོ་ལ་ནི་མེ་ཞུན་ཁོལ་མའི་ནང་སྙིང་ཅན་ཞིག་ཡིན། གལ་སྲིད་ང་ཚོའི་འོག་ན་ཞུན་མར་འཁྱིལ་བའི་མེ་ཡི་ནང་སྙིང་འདི་མེད་ན་ད་ལྟ་ང་ཚོ་འདིར་ཡོད་མི་སྲིད། མེ་ཞུན་ཁོལ་མའི་ནང་སྙིང་འདིས་རླངས་རླབས་ཕྱིར་ཕྱུངས་བས་ང་ཚོའི་བར་སྣང་ལ་རླངས་རྫས་ཀྱི་ཡོལ་བ་རིམ་པ་བཞིན་གྲུབ་པས་ཕྱི་རོལ་ནས་འཕྲོས་པའི་དུག་ལྡན་གྱི་ཟེར་མདའ་འགོག་པའི་ནུས་པ་ཡོད་འདུག ད་དུང་དེ་ཙམ་གྱིས་ག་ལ་ཚད། མེ་ཞུན་ཁོལ་མའི་ནང་སྙིང་འདིས་ས་ཆེན་པོའི་འོག་གཞིར་བྱང་བུ་ལེབ་ཆེན་དག་བསྐྲུན་པར་བྱེད། མེ་ཞུན་ཁོལ་མའི་ནུས་ཤུགས་ཀྱིས་བྱང་བུ་ལེབ་མོ་རྙིང་པ་རྣམས་གཏིང་ཏུ་ཐིམ་རིམ་བཞིན་གསར་པ་གྲུབ་སྟེ་སའི་ངོས་སུ་རི་རྒྱུད་སྒང་གཤོང་གི་རྣམ་པ་སྙོམ་སྒྲིག་ཡོང་བ་ཡིན། གལ་སྲིད་ང་ཚོའི་གོ་ལ་འདི་ལ་སྒང་གཤོང་གི་རྣམ་པ་མེད་པར་ངོས་སྙོམ་པོ་ཞིག་ཡིན་ན་ས་ངོས་ཡོངས་རྫོགས་མཐོ་ཚད་ལ་ཀི་ལོ་མི་ཊར་གསུམ་གྱི་མཐོ་ཚད་དང་ལྡན་པའི་ཆུའི་ནང་དུ་བྱིངས་རྒྱུ་རེད།
བསྐལ་བ་བཟང་པོ།
འཇིག་རྟེན་ཁམས་འདི་འབྱུང་འཇིག་གི་འགྱུར་ཤིན་ཏུ་མང་བའི་རང་བཞིན་ཅན་ཞིག་རེད།འདི་འདྲའི་ཆགས་འཇིག་གི་འགྱུར་བ་དྲག་ཅིང་རྩུབ་པའི་བར་གསེང་ཞིག་ལ་ང་ཚོ་སྐྱེད་འཕེལ་བྱུང་བ་དེ་ཡང་ངོ་མཚར་འོས་པ་ཞིག་རེད། མི་ལོ་ཐེར་འབུམ་བཞི་ཕྱེད་ཡས་མས་ཀྱི་ནང་ཚུན་དུ་ཡང་རྙོགས་འཛིངས་ཆེ་བའི་ལོ་རྒྱུས་ཀྱི་བྱུང་རིམ་མི་འདྲ་བ་སྣོ་ཚོགས་པ་དེ་དག་གི་ནང་ནས་བྱུང་བ་ཁྱད་པར་བ་དང་བྱུང་སྟངས་ཁྱད་པར་བ་མང་པོ་ཞིག་གྲ་འགྲིགས་ནས་ང་ཚོ་སྐྱེད་འཕེལ་བྱུང་བ་རེད། དཔེར་ན། གནམ་རྡོའི་བརྡབ་སྐྱོན་གྱིས་མི་ལོ་ས་ཡ་བརྒྱ་ཕྲག་དུ་མའི་རིང་འཛམ་གླིང་གི་བདག་པོར་གྱུར་པའི་སྲོག་ཆགས་ཌེ་ནོ་སོར་གྱི་རིགས་རྩ་མེད་དུ་མ་སོང་ན་མིའི་རིགས་ཟེར་བ་ཞིག་སྐྱེད་འཕེལ་ཐུབ་ཡོད་ག་ལ་སྲིད། གཅིག་བྱས་ན་ང་ཚོ་སྐབས་འདིར་ཡང་རིང་ཐུང་ལ་མི་ཊར་བརྒྱ་ཆ་བཞི་ལྔའི་རིང་ཐུང་ལས་མེད་ཅིང་སྤུ་གྲ་ཁ་ཅན་དང་རྔ་མ་རིང་པོ་ཅན་རེ་ཡིན་ཡང་སྲིད།
རྩོམ་ཡིག་འདི་ལ་ལྟད་མོ་འདུག ལོ་གསར་བཟང་། ཁ་དྲོ་བཀྲ་ཤིས།
ཚར་གཅིག་བཀླག་ཡིན། ད་དུང་ཀློག་དགོས་ཀྱི་འདུག ང་ཚོའི་མཛོད་གནས་གསུམ་པ་བརྗེ་བོ་རྒྱག་རྒྱུ་མིན་ཡང་། འདི་ལྟ་བུའི་འཇིག་རྟེན་ཆགས་སྟངས་གསར་པའི་སྐོར་གྱི་ཤེས་བྱ་མང་ཙམ་སྣོན་དགོས་པར་ངེས།
སྤོབས་པའི་རྩོམ་ཡིག་འདི་ང་ལ་མཚོན་ན་སློབ་ཚན་ཆུང་ཆུང་ཞིག་དང་འདྲ། ལན་རྒྱུ་མང་པོ་ཞིག་འདུག་པ་གང་ཏུབ་ཀྱིས་བལངས་ཟིན་པ་ཡིན། ད་དུང་ཡོད་ན་གནང་རོགས་ཞུ།