ྋགོང་ས་མཆོག་ནས་གྲོས་ཚོགས་སུ་སྩལ་བའི་གསུང་འཕྲིན་ལས་འཕྲོས་པའི་བསམ་ཚུལ།
འཇིགས་བྲལ་བསྟན་འཛིན།
བཙན་བྱོལ་བོད་གཞུང་གི་ཆབ་སྲིད་ཀྱི་འགོ་ཁྲིད་བཀའ་ཁྲི་དང་གྲོས་ཚོགས་ཀྱི་འཐུས་མི་རྣམས་འོས་འདེམས་བྱེད་པར་ཉིན་གྲངས་བདུན་ལས་མེད་པའི་སྐབས་འདིར། སྐབས་བཅུ་བཞི་པའི་བོད་མི་མང་སྤྱི་འཐུས་གྲོས་ཚོགས་སུ་༸གོང་ས་མཆོག་གིས་གསུང་འཕྲིན་ཕེབས་དོན་ལ། སྐབས་རྗེས་མའི་འཛིན་སྐྱོང་བཀའ་ཤག་དང་། ཁྲིམས་བཟོ་གྲོས་ཚོགས་ཕེབས་སྐབས་འོས་འདེམས་བྱས་པའི་བོད་གཞུང་གི་ཆབ་སྲིད་ཀྱི་འགོ་ཁྲིད་རྣམས་ལ་༸གོང་ས་མཆོག་གི་མཚན་གནས་རྗེས་འབྲེལ་ཆབ་སྲིད་ཀྱི་དབང་ལུང་ཡོངས་རྫོགས་རྩིས་སྤྲོད་ཀྱིས་བོད་གཞུང་མང་གཙོའི་འཕེལ་རིམ་གསར་པ་ཞིག་གི་ཐོག་ནས་རྒྱལ་སྤྱིའི་དཀྱིལ་འཁོར་ནང་བོད་ཀྱི་དབུ་ཁྲིད་གསར་པའི་གཟུགས་བརྙན་ངེས་པར་མདུན་བསྐྱོད་བྱེད་ཐུབ་པ་བཟོ་དགོས་པས་ཁྲ ིམས་དོན་བཟོ་བཅོས་ཀྱི་ལས་དོན་ལག་བསྟར་ངེས་པར་བྱེད་དགོས་པའི་གསུང་འཕྲིན་ཕེབས་པ་ཞིག་ཡིན་ལ། འཕེལ་རིམ་འདི་༸གོང་ས་མཆོག་བགྲེས་ཡོལ་དུ་ཕེབས་པ་ཁོ་ནའི་གནད་དོན་ཞིག་རེད་དམ། འབྱུང་འགྱུར་ཕེབས་རྒྱུར་ངེས་པའི་བཀའ་སྤྱི་གཉིས་ཀྱི་དངོས་གཞིའི་འོས་མི་ཚོས་གནད་དོན་འདིའི་ཐད་བསམ་བློའི་གྲ་སྒྲིག་གང་འདྲ་ཞིག་གནང་གི་ཡོད་པ་དང་ཁོང་རྣམ་པས་མི་མང་ལ་འདིའི་ཐད་བསམ་ཚུལ་དོན་དངོས་གང་ཡོད་པ་བརྗོད་སྲིད་དམ། དེ་ནི་དངོས་གཞིའི་འོས་བསྡུ་ལ་གསུང་འཕྲིན་འདིས་ཤུགས་རྐྱེན་གང་འདྲ་ཞིག་ཐེབས་མིན་དང་ཐད་ཀར་འབྲེལ་ཡོད། དེ་བཞིན་ཤེས་རྟོགས་བྱུང་བ་ལྟར་ན་༸གོང་ས་མཆོག་གིས་བོད་ཀྱི་ཆབ་སྲིད་ཀྱི་དབང་ལུང་ཡོངས་རྫོགས་རྩིས་སྤྲོད་གནང་རྗེས་མཛད་པ་ག་རེ་སྐྱོང་འཆར་ཡོད་པ་ཡང་བང་བསྒྲིགས་ཟིན་ཡོད་འདུག ཡིན་ནའང་ཐེངས་འདིའི་གསུང་འཕྲིན་གྱི་དགོངས་དོན་ལ་བོད་མི་མང་སྤྱི་འཐུས་ལྷན་ཚོགས་ནས་༸གོང་ས་མཆོག་ལ་དེ་ལྟའི་དགོངས་བཞེས་རྩ་བ་ནས་མི་གནང་བའི་གསོལ་འདེབས་ཨུ་ནན་ཞུ་རྒྱུ་ཡིན་པ་བརྗོད་མི་དགོས་པ་ཞིག་རེད། གསོལ་འདེབས་དེ་ལྟར་བྱེད་པ་ལ་བོད་མི་མང་སྤྱི་འཐུས་ལྷན་ཚོགས་ནས་༸གོང་ས་མཆོག་གི་མཛད་འཆར་གྱི་བང་རིམ་བསྒྲིགས་ཟིན་པ་ལྡོག་ཐུབ་པ་དང་། བོད་མིའི་རྩ་དོན་འཐབ་རྩོད་ལ་ཡང་༸གོང་ས་མཆོག་གི་ཐུགས་རེ་གང་འཚམས་འགྲུབ་ཡོད་པའི་ཐག་གཅོད་གང་འདྲ་ཞིག་གནང་གི་རེད། ཡིན་ནའང་༸གོང་ས་མཆོག་གིས་གསུང་འཕྲིན་ནན་པོ་དེ་ཙམ་ཞིག་གྲོས་ཚོགས་ལ་ཕེབས་པ་རྒྱལ་སྤྱིའི་ཁྱོན་ལ་བསྒྲགས་གནང་བ་དེའི་རྒྱབ་ལྗོངས་ལ་བསམས་ན་ཞལ་བཞེས་གནང་སྲིད་དམ། གང་ལྟར་ད་ལན་ཕེབས་པའི་གསུང་འཕྲིན་དུ་༸གོང་ས་མཆོག་གིས་བོད་རྒྱལ་ཁབ་ཀྱི་རྒྱལ་རབས་རིམ་བྱུང་ལ་དྲན་གསོ་དང་། རྒྱལ་རབས་སོ་སོའི་ལོ་རྒྱུས་ཐོག་བོད་ལ་དགེ་སྐྱོན་གང་བྱུང་བ་ངོ་སྤྲོད་མདོར་བསྡུས་དང་འབྲེལ། ༸གོང་ས་མཆོག་གི་མཚན་གནས་རྗེས་འབྲེལ་ལས་གྲུབ་པའི་དགའ་ལྡན་ཕོ་བྲང་གིས་བོད་ཀྱི་སྲིད་སྐྱོང་བའི་ལོ་རྒྱུས་མཇུག་བསྡུ་དགོས་པ་དང་། དེ་དང་ལྷན་དུ་༸གོང་ས་མཆོག་གི་མཚན་ཐོག་ནས་ལག་བསྟར་གྱིས་སྤེལ་བའི་མ་འོངས་བོད་ཀྱི་རྩ་ཁྲིམས་འཆར་ཟིན་དང་ཆབ་སྲིད་ལམ་སྟོན་སོགས་སྲིད་དོན་གྱི་ཡིག་ཆ་འགའ་ཤས་རང་བཞིན་ནུས་མེད་དུ་འགྲོ་རྒྱུར་གསུངས་ཡོད་ལ། བཀའ་ཁྲི་ཟམ་གདོང་རིན་པོ་ཆེས་ཟླ་འདིའི་ཚེས་ ༡༠ ཉིན་གསུམ་དུས་གསུང་འཕྲིན་ཕེབས་མ་ཐག་གསར་འགོད་པར་བརྗོད་དོན་ལ། རྒྱ་ཕྱོགས་ནས་ད་ལྟའི་བོད་རྒྱའི་འབྲེལ་མོལ་འདི་༧གོང་ས་མཆོག་སྐུ་སྒེར་གྱི་ཆབ་སྲིད་གནད་དོན་ཞིག་ཏུ་བརྩི་བཞིན་ཡོད་སྟབས། ༧གོང་ས་མཆོག་ཆབ་སྲིད་ཀྱི་འགན་དབང་ལས་བགྲེས་ཡོལ་དུ་ཕེབས་པ་ཡིན་ན། ད་ལྟའི་འབྲེལ་མོལ་འདིར་སྐད་ཆ་གང་ཡང་ལྷག་ཡོད་པ་མ་རེད། ཆབ་སྲིད་ཀྱི་འགན་དབང་ཆ་ཚང་མི་མང་གིས་འོས་འདེམས་བྱས་པའི་དབུ་ཁྲིད་ཀྱི་སྟེང་དུ་བབས་རྗེས། བོད་རྒྱའི་དཀའ་རྙོག་སེལ་རྒྱུར་འབྲེལ་ལམ་འཛུགས་སྟངས་ཐད། གྲུབ་འབྲས་དང་ཕན་ནུས་ལྡན་པའི་སྲིད་ཇུས་གང་འདྲ་ཞིག་གཏན་འབེབས་བྱ་དགོས་ཀྱང་། གྲོས་ཚོགས་ཀྱིས་ཐག་གཅོད་དང་ཐབས་ལམ་འཚོལ་དགོས་པ་རེད། ཅེས་གསུངས་ཡོད་པས་༸གོང་ས་མཆོག་གི་ཆབ་སྲིད་དབང་ལུང་རྩིས་སྤྲོད་གནང་བ་ཡིན་ན་ད་ལྟའི་བོད་རྒྱ་འབྲེལ་མོལ་དེ་ཡང་རང་བཞིན་གྱིས་ལྷག་གི་མེད་པ་ཞིག་ཆགས་ཀྱི་ཡོད་འདུག་པས། གལ་ཏེ་གསུང་འཕྲིན་ཕེབས་པའི་དགོངས་དོན་ལག་བསྟར་དོན་འཁྱོལ་བྱེད་དགོས་བྱུང་ན། ད་ལྟ་༸གོང་ས་མཆོག་གིས་དབུ་ཁྲིད་པའི་དགའ་ལྡན་ཕོ་བྲང་གིས་བོད་ཀྱི་ཡུལ་མིའི་སྲིད་གཞུང་དུ་ངོ་བོ་བསྒྱུར་བའི་བོད་གཞུང་མང་ལ་ལོ་རྒྱུས་ཀྱི་ཤུལ་བཞག་རྩ་ཆེ་ཤོས་གཉིས་ཡོད་པ་ནི་ཐག་གཅོད་ཀྱི་ཐབས་ལམ་མང་གཙོ་དང་། འཐབ་རྩོད་ཀྱི་རང་བཞིན་འཚེ་མེད་ཞི་བ་གཉིས་རེད། དེས་ན་༸གོང་ས་མཆོག་གིས་བོད་ཀྱི་སྲིད་དབང་རྩིས་སྤྲོད་གནང་དགོས་པའི་རྒྱུ་མཚན་དུ་ནན་གསུངས་གནང་བ་ནི། ༸གོང་ས་མཆོག་ཞལ་མ་བཞུགས་པའི་དུས་སྐབས་སུ་བོད་ཀྱི་སྒྲིག་འཛུགས་དང་། བོད་མིའི་འཐབ་རྩོད་རྒྱུན་སྐྱོང་བྱེད་དགོས་ཆགས་ན་དཀའ་ངལ་མི་ཡོང་ཆེད་ད་ལྟ་ནས་བོད་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པའི་སྒོ་ནས་མང་གཙོ་ཆ་ཚང་བ་ཞིག་ལག་བསྟར་བྱེད་བཞིན་དཀའ་ངལ་མང་པོ་ཞིག་ལ་གདོང་ལེན་བྱེད་བཞིན་འགྲོ་དགོས་པ་འདི་རེད། ཡིན་ནའང་༸གོང་ས་མཆོག་གི་མཚན་གནས་དང་མ་འབྲེལ་བའི་བོད་གཞུང་ལ་བོད་མི་རང་གིས་ངོས་ལེན་བྱེད་མིན་ཐད་བཀའ་ཁྲི་ཟམ་གདོང་རིན་པོ་ཆེས་གསར་འགོད་པར། ༧གོང་ས་མཆོག་འགན་འཁྲི་འདི་ནས་ཕྱིར་ཕེབས་པ་ཡིན་ན། བོད་མི་མང་གི་མིག་ནང་དུ་བཙན་བྱོལ་སྒྲིག་འཛུགས་འདི་ལུགས་མཐུན་གྱི་གཞུང་ཞིག་ཏུ་མཐོང་གི་མ་རེད། དེ་དངོས་ཡོད་རེད། ཅེས་གསུངས་གནང་ཡོད་པ་འདི་༸གོང་ས་མཆོག་གིས་བོད་ཀྱི་སྲིད་དབང་རྩིས་སྤྲོད་ཀྱི་དགོངས་པ་ལྡོག་ཐབས་དང་ཐུགས་འཚབ་ཀྱི་བཀའ་མོལ་ཡིན་དུ་ཆུགས། ༸གོང་ས་མཆོག་གིས་ཐུགས་རེ་ཡིད་ཆེས་ཀྱི་སྒོ་ནས་སྲིད་དབང་རྩིས་སྤྲོད་གནང་སའི་བཙན་བྱོལ་བོད་ཀྱི་ཡུལ་མིའི་སྲིད་གཞུང་དེ་བཞིན་བོད་གཞིས་བྱེས་གཉིས་ཀྱི་བོད་མིས་ལུགས་མཐུན་གྱི་གཞུང་ཞིག་ཏུ་ངོས་ལེན་བྱས་ནའང་། ད་དུང་མིག་མདུན་དུ་གལ་གནད་ཆེ་བའི་དྲི་བ་ཁག་ཅིག་ཡོད་པ་ནི། ༸གོང་ས་མཆོག་ད་ལྟ་ཞལ་བཞུགས་བཞིན་པའི་གནས་སྟངས་འདིས་གཤམ་གསལ་དྲི་བ་ཁག་གི་ནང་དོན་དུ་གྱུར་པའི་དཀའ་ངལ་སེལ་ཐུབ་ཀྱི་རེད་དམ། ༸གོང་ས་མཆོག་གི་མཚན་གནས་དང་མ་འབྲེལ་བའི་ཐོག་ནས་བོད་ཀྱི་ཡུལ་མིའི་སྲིད་གཞུང་གིས་གལ་ཆེའི་ཆབ་སྲིད་ཀྱི་ལས་དོན་མུ་མཐུད་བྱེད་རྒྱུར་གནས་ཚང་རྒྱ་གར་གྱིས་མཐུན་འགྱུར་རྒྱབ་སྐྱོར་ད་ཡོད་ལ་འཕེལ་གྲིབ་ག་ཚོད་ཡོང་སྲིད་དམ། དེ་ཡང་དོན་དངོས་སུ་རྒྱ་གར་གྱིས་ད་བར་བོད་དོན་ཐད་འཛིན་པའི་བྱེད་ཕྱོགས་ཀྱི་སྲིད་བྱུས་རྒྱུན་སྐྱོང་གི་ཡོད་དམ། རྒྱ་གར་གྱིས་བོད་ཀྱི་ཡུལ་མིའི་སྲིད་གཞུང་གི་དུས་སྐབས་དེར་འཕགས་བོད་ཐུན་མོང་ལ་རྩ་དོན་ཞིག་ཡོད་པར་གཟིགས་ཀྱི་རེད་དམ། ཡོད་ཀྱང་སྔར་བཞིན་བོད་ཀྱི་ཡུལ་མིའི་སྲིད་གཞུང་ལ་ཡིད་ཆེས་བྱེད་ཀྱི་རེད་དམ། ༸གོང་ས་མཆོག་གི་མཚན་གནས་དང་རྗེས་སུ་མ་འབྲེལ་བའི་བོད་ཀྱི་གནད་དོན་དེ་ལ་རྒྱ་གར་གྱི་ཕྱི་འབྲེལ་སྲིད་བྱུས་ཀྱི་ཐོག་རིན་ཐང་གང་འདྲ་ཞིག་ཡོད་རྒྱུ་རེད། མདོར་ན་༸གོང་ས་མཆོག་གིས་མཚན་གནས་རྗེས་འབྲེལ་གྱི་སྲིད་དབང་རྩིས་སྤྲོད་གནང་བར་གནད་དོན་འདི་དག་ལ་ཐག་གཅོད་ཀྱི་ཁ་ཕྱོགས་ཤིག་དགོས་པ་ཡིན་པས་གནས་སྟངས་གང་འདྲ་ཞིག་ཡོད་དམ། ཉིན་འགའི་སྔོན་དུ་རྒྱ་གར་གཞུང་གིས་༸གོང་ས་མཆོག་གིས་བོད་ཀྱི་སྲིད་དབང་རྩིས་སྤྲོད་གནང་བ་ཡིན་ནའང་ཁོང་ནི་རྒྱ་གར་གྱི་བཀུར་འོས་པའི་སྐུ་མགྲོན་ཡིན་ཅེས་བརྗོད་ཡོད་ལ། རྒྱ་ནག་གཞུང་གིས་རྒྱ་གར་གཞུང་ལ་བཙན་བྱོལ་བོད་གཞུང་མེད་པ་བཟོ་དགོས་པར་བརྗོད་མུས་ཡིན་སྐོར་གྱི་གནས་ཚུལ་རྒྱ་གར་གྱི་གསར་ལམ་ཁག་ཏུ་ཐོན་བཞིན་ཡོད་པ་འདིས་ག་རེ་མཚོན་གྱིན་ཡོད་དམ། དེ་བཞིན་རྒྱ་ནག་ལ་མཚོན་ན་ཏཱ་ལའི་བླ་མའི་གནད་དོན་ཟེར་བ་ལ་གྲོས་མོལ་བྱེད་དགོས་དོན་མེད་པས་ད་དུང་མུ་མཐུད་བོད་ཀྱི་གནད་དོན་ཟེར་བ་མེད་ཅེས་བརྗོད་རྒྱུ་ཡིན་ནམ། ཡང་ན་༸གོང་ས་མཆོག་གི་མཚན་གནས་དང་འབྲེལ་བ་མེད་པའི་བོད་ཀྱི་ཡུལ་མིའི་སྲིད་གཞུང་དང་གྲོས་མོལ་བྱས་ཏེ་བོད་ཀྱི་གནད་དོན་སེལ་ཐབས་བྱེད་རྒྱུ་ཡིན་དང་། རྒྱ་ནག་གིས་རྒྱ་གར་ལ་ཁེ་ཕན་གང་འཚམས་སྤྲད་པ་བརྒྱུད་༸གོང་ས་མཆོག་གི་མཚན་གནས་དང་འབྲེལ་མེད་པའི་བོད་ཀྱི་ཡུལ་མིའི་སྲིད་གཞུང་མེད་པར་གཏོང་ཐབས་བྱེད་ཀྱི་རེད། མདོར་ན་རྒྱ་དཀར་ནག་གཉིས་ཀའི་ངོས་ནས་༸གོང་ས་མཆོག་གིས་བོད་ཀྱི་ཆབ་སྲིད་ཀྱི་དབང་ལུང་བརྒྱུད་སྤྲོད་གནང་རྒྱུར་གསུངས་པ་འདི་བརྒྱུད་ནས་བོད་ཐོག་ལངས་ཕྱོགས་གང་འདྲ་ཞིག་འཛིན་གྱི་རེད། སྟོབས་ཆེན་ཨ་རིའི་རྒྱལ་ཁབ་རྒྱ་དཀར་ནག་སུའི་ཕྱོགས་སུ་ལངས་ཀྱི་རེད། འཛམ་གླིང་གི་རྒྱལ་ཁབ་ཚོས་རྒྱ་ནག་ལ་ཏཱ་ལའི་བླ་མ་དང་ལྷན་དུ་གྲོས་མོལ་བྱེད་དགོས་ཅེས་བརྗོད་ཤེས་ཀྱི་རེད་དམ། ཡང་ན་བོད་དོན་བདག་མེད་དུ་གཡུགས་ཀྱི་རེད་དམ། མདོར་ན་འཛམ་གླིང་གིས་བོད་ཤི་བར་ངོས་འཛིན་བྱེད་ཀྱི་རེད་དམ། བོད་ལངས་པར་ངོས་འཛིན་བྱེད་ཀྱི་རེད། གང་ལྟར་༸གོང་ས་མཆོག་ཞལ་བཞུགས་རིང་བོད་དོན་ཐག་གཅོད་མ་བྱུང་བ་ཡིན་ན་གནད་དོན་འདི་དག་ལ་སྔ་ཕྱི་མ་གཏོགས་གདོང་ལེན་བྱེད་དགོས་པ་ཡིན་པས་ཐེངས་འདིའི་གསུང་འཕྲིན་ནི་དཀའ་ཁག་མང་པོ་ཞིག་གི་ཐད་གྲ་སྒྲིག་འཐུས་ཚང་ད་ལྟ་ནས་བྱེད་པར་སྐུལ་མ་གནང་བ་ཞིག་ཡིན་པ་གསལ་པོ་རེད། དེས་ན་བོད་མི་ཚོས་མདུན་བསྐྱོད་གང་འདྲ་ཞིག་བྱེད་མིན་དང་། མ་འོངས་པར་བོད་འདི་ཤི་གསོན་གང་ཞིག་ཏུ་འཇོག་མིན་ནི་བོད་མི་མང་གི་བོད་སྤྱིའི་རྩ་དོན་གྱི་ཐོག་འཛིན་པའི་བསམ་སྤྱོད་ཁོ་ན་ལ་གཙོ་བོ་རག་ལས་ཡོད་པ་བསྟན་ཏེ་གཟབ་གཟབ་ངེས་པར་བྱེད་དགོས་པའི་ལམ་སྟོན་མཐར་ཐུག་པ་གནང་འདུག དེ་ཡང་གསུང་འཕྲིན་འདིའི་ངོ་བོ་ནི་༸གོང་ས་མཆོག་གིས་བོད་ཤི་གསོན་གང་དུ་འགྲོ་མིན་གྱི་དུས་སྐབས་དེར་བོད་དང་བོད་ཀྱི་མི་མང་ལ་ཐར་ལམ་ག་རེ་གཟིགས་པ་དེ་རེད་ལ། བརྗོད་ཚུལ་གཞན་ཞིག་གི་ལམ་ནས་བཤད་ན་གསུང་འཕྲིན་འདི་ཆུ་སྤྲེལ་ཞལ་གདམས་དང་མཚུངས་པའི་༸གོང་ས་སྐུ་ཕྲེང་བཅུ་བཞི་པས་བོད་ལ་སྙིང་བརྩེ་ཆེན་པོས་གདམས་པའི་ལམ་སྟོན་ལོ་རྒྱུས་ཀྱི་དོན་སྙིང་ལྡན་པ་ཞིག་རེད།