མི་འདི་ཚོ །

བསྟན་འཇམ་ནས །

མི་འདི་ཚོ །

མི་བུའི་རིགས་དར་གྱི་རྣམ་ཤེས་འཁྲུངས་པ་ནས

མི་རྣམས་ཀྱིས་རྫུན་བཤད་ནས་རྒྱུ་འབྲས་སྣོག

མགོ་སྐོར་དང་གཡོ་ཁྲིད་བྱས་ཏེ་ཁེ་ཕན་རེ་བྱུང་ན

ལྐོག་ཏུ་གཞའ་ནས་ཁེར་ཟ་ཁེར་འཐུང་བགྱིས

མི་འདི་ཚོ

མི་འདི་ཚོ་དུད་འགྲོ་ལས་སྡུག་རེད

དུད་འགྲོ་རྣམས་ཀྱིས་ཀྱང་རང་གི་ལྟོ་རྒྱབ་འགྲིག་ཙམ་བྱུང་ན

སྲོག་ཆགས་གཞན་ལ་འཚེ་བ་མེད་པར་རང་གནས་སུ་ཁུ་སིམ་པོ་གཞེས

མི་འདི་ཚོ སྒོ་ཁྱི་ལས་ངན་རེད བཏགས་ཁྱི་ཞིག་ཡིན་ན་ཡང་

རྩམ་ལྡུར་ཁུ་འཁྱགས་གང་གི་དྲན་ལན་འཇལ་ཕྱིར

སོ་ལྟ་དང་ཟུག་སྐད་ནམ་ཡང་ལྷང་དུ་འཇགས་མ་མྱོང

མི་འདི་ཚོ དུད་འགྲོ་ལས་ཞན་ཆ་ཆེས་ཆེར་འདུག

བདེ་སྡུག་རགས་པའི་སྦུ་རིས་འབྱེད་པའི་རྣམ་ཤེས་གུད་པའི་ཉིན་མོར་ནས་

བློ་རྒྱ་ཡངས་པོ་ཁོག་ཏུ་རུབ་པའི་ལ་རྩེར་ན

མི་འདི་ཚོས ཕྲག་དོག་བདོ་བས་རླུང་རྟ་རེ་བཙུགས་ཏེ

ང་རྒྱལ་ ཁྱོད་ཕམ དབྱེན་དཀྲུག གཤོག་ཀ་འཐེན་འཁྱེར

དེ་ལྟ་དེ་ལྟར བདེ་སྐྱེད་སྣང་བ་དང འདོད་པའི་བདེ་བ མིག་གི་རྫི་མིའི་རྩེར་ནས

དམྱལ་ཟངས་ཁྲོ་ཆུ་ཁོལ་མའི་ནང་དུ་གཡུགས་ཏེ

བླ་མེད་དུ་འཕགས་པའི་མི་བུའི་བློ་གྲོས་དེ རང་མགོ་རྡུང་གི་ཐོ་བ རང་སྲོག་གཅོད་ཀི་སྟ་རེ་

རང་ཉིན་རང་ཉིན་གྱི་བྲན་པོ་ཡིན་པར་གཞི་ནས་ཤེས་ ད་བཟོད་ཚོར་གྱིན་འདུག