འགར་ཚེ་རྒྱལ།
༡ མི་རབས་གསར་པས་ཤེས་ཡོན་རོལ་མྱོང་གི་གནད་དོན།
ཁོ་བོ་ནི་ཤེས་ཡོན་པ་ཟེར་བའི་གྲས་སུ་ཚུད་མེད་ལ། ཁོ་བོར་མཚོན་ན་ཤེས་ཡོན་པ་ཞིག་བྱེད་རྒྱུ་ཧ་ཅང་གི་ཁག་པོ་ཞིག་ཏུ་བརྩི་བཞིན་ཡོད། ཤེས་ཡོན་པ་ཞིག་ཡིན་ན་དེའི་བསམ་བློ་དང༌། ཀུན་སྤྱོད། རང་གཤིས། བློ་སྟོབས། ལྷག་བསམ་བཅས་ཀྱི་ཐད་ནས་གཞན་ལས་ཁྱད་དུ་འཕགས་པ་ཞིག་དགོས་པའི་ལྟ་སྟངས་འཛིན་གྱིན་ཡོད་ལ། ལྟ་སྟངས་འདི་འཛིན་པའི་བསམ་བློ་ནི་ད་ལྟའི་འུ་ཚོའི་སྤྱི་ཚོགས་ནང་ཤེས་ཡོན་པའི་མིང་འཁྱེར་ནས་མ་ཡིན་ཡིན་མདོག་བྱེད་མཁན་གྱི་ཤེས་ཡོན་པ་རྐྱལ་སྟོང་ཚོའི་བསམ་བློ་ངན་པ་དང༌། ཀུན་སྤྱོད་བཙོག་པ། རིག་སྟོབས་ཞན་པ་སོགས་ཀྱི་ཀུན་གཤིས་དེས་ཁོ་བོ་སློབ་སྦྱོང་གི་ལམ་སྣེར་འཇུས་པའི་ཉིན་མོ་ནས་སྐྱེ་རུ་བཅུག་སོང༌།
གནས་སྟངས་འདི་ད་ལྟའི་བོད་ཕྱི་ནང་གཉིས་ཀྱི་ནང་དུ་ཤེས་ཡོན་སློབ་གཉེར་བྱེད་པའི་འུ་ཚོ་མི་རབས་གསར་པ་ཚོར་མངོན་གྱིན་ཡོད་པའི་རྒྱུད་གཤིས་ཡན་གར་བ་ཤིག་རེད། དྲང་མོར་བཤད་ན་དུས་རབས་ཉེར་གཅིག་པ་འདི་ཤེས་རིག་དང་ཚན་རྩལ་རིག་གནས་སོགས་ཐོལ་བརྒལ་གྱི་དུས་རབས་ཤིག་རེད་ལ། མིའི་རིགས་ཀྱི་སྤྱི་ཚོགས་ཀྱང་ཚད་ཐུབ་ཀྱིས་གོང་འཕེལ་ཡར་རྒྱས་སུ་འགྲོ་དང་འགྲོ་བཞིན་པའི་དུས་རབས་ཤིག་ཏུ་སླེབས་ཏེ། གནའ་རབས་སྤྱི་ཚོགས་དང་བསྡུར་ན་དེང་མིའི་རིགས་འཚོ་གནས་དང༌། བདེ་འཇགས་སོགས་ཀྱི་སླད་དོན་ངལ་རྩོལ་འཚོ་བའི་ལས་གཞི་དང༌། ཤེས་བྱ་ཡོན་ཏན་ལེན་པའི་སློབ་གཉེར་སོགས་རྩོལ་སྒྲུབ་ལས་རིགས་གང་ལ་གང་མཁོའི་ཆ་རྐྱེན་གྱིས་ནི་ལག་མི་ཐོགས་པའི་ཚུལ་དུ་ཡོད། ཡིན་ནའང༌། ད་ལྟའི་མདུན་མཆོང་གི་དུས་རབས་སམ་སྤྱི་ཚོགས་གསར་པ་འདི་ལྟ་བུའི་གནས་བབ་ལ་དཔག་ནས་ང་ཚོ་བོད་མི་རིགས་ཀྱི་སྤྱི་ཚོགས་ནང་མི་རབས་གསར་པའི་གྲས་ཀྱིས་ཤེས་ཡོན་ལ་རོལ་མྱོང་བྱེད་སྟངས་དང༌། ཤེས་ཡོན་པའི་ཚད་གཞི་འཛིན་སྟངས། ཤེས་ཡོན་ཀྱི་ཟབ་ཁྱད་འཇལ་སྟངས། ཤེས་ཡོན་གྱི་རིན་ཐང་འཚོལ་ཞིབ་བྱེད་སྟངས་བཅས་ཀྱི་ཐད་ནས་གནའ་རབས་དང་བསྡུར་ན་སྐྱ་ཆད་སྔོ་སྡུག་གི་ཚད་དུ་ཡོད་པ་འདི་ནི་ད་ལྟའི་མགོ་ཐོག་གི་དུས་རབས་གསར་པའི་སྤྱི་ཚོགས་ཀྱིས་ང་ཚོའི་མི་རབས་འདིར་ཕྱིན་པའི་ཆམ་པ་ལྟ་བུའི་ནད་ཡམས་ཤིག་རེད་ལ། ནད་ཡམས་འདི་ཇི་ལྟར་བྱུང་བའི་ཚུལ་ནི། ཚ་ཚ་འུར་འུར་གྱིས་སྤྱི་ཚོགས་མགྱོགས་མྱུར་ངང་འཕེལ་རྒྱས་སོང་བ་དང་བསྟུན་མིའི་རིགས་ཀྱི་བློ་སྒོའང་དེར་བརྟེན་གྱིས་ཡར་ཐོན་ཅན་དུ་གྱུར་ཡོད་ནའང༌། དོན་དངོས་མིའི་རིགས་ཀྱི་བསམ་བློའི་འཁོར་བསྐྱོད་དང་གཡོ་འགུལ་བྱེད་ཕྱོགས་ཀྱིས་སྤྱི་ཚོགས་འཁོར་འགྲོས་ཀྱི་རྗེས་མ་ཟིན་པར། ཕར་སྤྱི་ཚོགས་ཀྱི་གནས་བབ་དང་བསྟུན་ནས་རང་ཉིད་ཀྱི་ཀུན་གཤིས་དང༌། བསམ་བློ། སྤྱོད་ཟོལ། བྱེད་སྒོ། ནུས་པ་སོགས་ལ་བབ་ཚུགས་ཀྱིས་བལྟ་མ་ཐུབ་པར། ལོ་ཤས་ཙམ་གྱི་དུས་ཡུན་ཐུང་ཐུང་ཞིག་གི་སྦྱངས་གཉེར་ཤེས་ཡོན་གྱི་དྲི་ཙམ་འགོས་པའི་ཚད་གཞིས་བློ་ཡིད་ཁེངས་ནས། ངའོ་སྙམ་པའི་ཁ་ཕོ་ཆེར་སྒྲོགས་ཀྱི་ཀུན་གཤིས་ངན་པ་དེ་ཁྱབ་བརྒྱུད་དུ་གྱུར་ནས། ང་ཚོའི་ཁོར་ཡུག་ཆུང་ཆུང་འདིར་རང་གིས་རང་ཤེས་ཡོན་པ་ཡིན་པར་རློམ་པ་དང་གཞན་ལའང་དེ་མཚུངས་ཀྱི་བློ་ཡིད་ཚིམ་ཆོག་ཆོག་གི་གཤིས་ཉེས་ཀྱིས་ཤེས་ཡོན་པ་རེད་ཅེས་ཟེར་སྒྲོས་ཀྱི་ཆོ་ལོ་ཕུལ་བའི་རྐྱེན་པས། ༼ཆུ་བོ་ཆུང་ཆུང་ལ་འུར་སྒྲ་ཆེ་༽ཞེས་པའི་ལེགས་བཤད་འདིས་བསྟན་དོན་ཇི་བཞིན། ད་ཆ་མང་པོ་ཞིག་གིས་གང་སར་མཁས་ཉམས་ཀྱིས་སྐད་ཆ་སྦོམ་པོ་རེ་འུར་སྒྲོགས་བྱས་ཏེ་ཡུན་ཐུང་གི་མི་ཚེ་མཐའ་ཟད་ལ་སྐྱེལ་ནས་འདུག་པ་ལས། དངོས་གནས་ཡོན་ཏན་གྱི་གཞི་རྐང་ཚུགས་པའི་ཚད་ཐུབ་ཀྱི་ཤེས་ཡོན་པ་ཞིག་ནི་ང་ཚོའི་སྤྱི་ཚོགས་ཀྱི་མི་རབས་གསར་པའི་ནང་མངོན་ཐུབ་ཀྱི་མེད་ནི་འུ་ཚོས་ངེས་པར་དུ་ཤེས་དགོས་གནད་ཅིག་རེད།
གནའ་བོའི་སྐབས་ཡིན་ན་བོད་འདི་རྗེས་ལུས་ཀྱི་མི་རིགས་ཤིག་སྟེ། ཀུན་གྱིས་ཀླ་ཀློའི་མི་རིགས་ཤིག་ཡིན་པར་ངོས་བཟུང་སྟེ་དམའ་འབེབས་དང་མཐོང་ཆུང་བྱས་མྱོང་ཡོད་མོད། འོན་ཀྱང་མི་རིགས་འདིའི་གཤིས་རྒྱུད་ལ་ཁོར་ཡུག་དང་བསྟུན་པའི་རྟག་བརྟན་གྱི་བློ་སྤོབས་དང༌། འགྱུར་མེད་ཀྱི་རང་རྟོན་ཞིག་ཡོད་སྟབས་བོད་བཙན་པོའི་དབུ་འཕངས་དགུང་ལ་བཏེགས་ཤིང་འཛམ་གླིང་སུམ་ཉིས་ས་ལ་དབང་བསྒྱུར་བྱས་ཏེ་ཐུ་བྷོད་པ་ཞེས་མཚན་སྙན་གླིང་ལ་གྲགས་མྱོང་ཡོད་ལ། མ་ཟད་གནའ་བོའི་སྐབས་དེར་ད་ལྟ་དང་མི་མཚུངས་པར་ཁོར་ཡུག་དང་འཚོ་བའི་མཁོ་ཆས་སོགས་ཀྱི་མཐུན་རྐྱེན་ཤིན་ཏུ་ནས་ཞན་ནའང༌། ཤེས་ཡོན་སློབ་སྦྱོང་བྱེད་རྒྱུ་ནི་རང་གི་སྲོག་ལས་གཅེས་པར་བཟུང་སྟེ་ཟླ་མཐུད་ལོ་མཐུད་ཀྱིས་ཕྱོགས་གང་སའི་ཤེས་ཡོན་སློབ་སའི་བསྟི་གནས་ཁག་ཏུ་དཀའ་སྤྱད་སྡུག་རུས་ཀྱིས་འགྲིམས་ཤིང༌། འཚོ་བའི་གསེར་དངུལ་གང་ཡོད་སྲང་ལ་འཇལ་ཏེ་སློབ་པའི་ཡོན་དུ་ཕུལ་ནས་ལྟོ་གོས་འཚོ་བ་ངན་ངོན་ཙམ་ལ་བསྟེན་ནས་ཤེས་ཡོན་སློབ་གཉེར་ལོ་ནས་ལོར་མཐུད་ཀྱིས་གནང་བའི་འབྲས་བུར། གནའ་བོའི་ལོ་པཎ་མཁས་གྲུབ་དམ་པ་གནམ་གྱིས་ས་བཀབ་པ་ལྟ་བུ་རྣམས་བྱུང་སྟེ། ད་ལྟ་འུ་ཚོས་མིག་ཅེར་ལག་སྲིངས་ཀྱིས་སྐྱབས་རེ་ནས་ཡོད་པའི་ཁོང་ཚོའི་བརྩམས་གྲུབ་གླེགས་བམ་རི་རབ་འདྲ་བ་འདི་དག་འུ་ཚོའི་བགོ་སྐལ་དུ་ཐོབ་ཅིང་། ད་ལྟ་འུ་ཚོས་ང་ཚོའི་བོད་ནི་རིན་ཐང་ལྡན་པའི་རིག་གཞུང་གི་གཏེར་མཛོད་ཡིན་ཞེས་གཞན་ལ་ངོམ་སོ་བྱེད་ཀྱིན་པའི་ཚུལ་འདི་དག་བྱུང་བ་རེད་མ་གཏོགས། ད་ལྟའི་ཚུལ་འདི་བཞིན་གང་དགོས་ཅི་འདོད་ཀྱི་མཐུན་རྐྱེན་ཕུན་སུམ་ཚོགས་པའི་དགའ་སྐྱིད་ཁྲོད། ལྟག་ཆུ་ཆད་པའི་རྫིང་བུ་བཞིན་ཆ་མ་ཆད་དང་ཡ་མ་གཡེང་གིས་སློབ་གཉེར་ལ་རོལ་ཁུལ་གྱིས་མི་ཚེ་བསྐྱལ་བའི་འབྲས་བུ་ལས་བྱུང་བ་ཞིག་མ་རེད།
ད་ལྟ་འུ་ཚོའི་མི་རབས་འདིས་ནི་མུ་མཐུད་འདི་ལྟར་ཤེས་བྱ་ཡོན་ཏན་ཉི་ཚེ་བ་ཙམ་ཞིག་ལ་འཇུས་ནས་མ་ཡིན་ཡིན་མདོག་གིས་ཆོས་ལུགས་ཀྱིས་མཚོན་སྲོལ་རྒྱུན་རིག་གནས་ཕལ་ཆེར་ལ། དཔྱད་སྟོབས་དང་ཚད་ཐུབ་ཀྱིས་བལྟ་མ་ནུས་པར་སྣང་བ་གང་དྲན་གྱིས་རྒྱབ་འགལ་འགོག་རྒོལ་གྱི་ཁ་ཕོ་ཆེ་རུ་སྒྲོགས་ནས་བསྐྱོད་ན། འུ་ཚོའི་བུ་རབས་ཚ་རྒྱུད་སྟེ་མ་འོངས་པའི་མི་རབས་གཞུག་མ་རྣམས་ལ་འུ་ཚོའི་མི་རབས་འདིས་ལག་རྗེས་ཡིན་པའི་རིག་གཞུང་གསར་པ་ཞིག་སྟོན་དུ་ཡོད་པ་ཕར་ཞོག སྔོན་བྱུང་གི་མེས་པོ་དམ་པ་ཚོས་ཤུལ་བཞག་གི་ད་ཡོད་རིག་གཞུང་འདི་དག་ཀྱང་འུ་ཚོའི་རིང་འདིར་མེ་རུ་བསྲེག་སྟེ་ཐལ་རྡུལ་དང་བསྲེས་ནས། མི་རབས་གཞུག་མ་ཚོར་སྤུས་གཙང་ཅིག་རྩིས་འབུལ་བྱ་རྒྱུ་མེད་པ་ཐག་གིས་ཆོད། སྐབས་དེ་དུས་བོད་མི་རིགས་ས་མཐོའི་རི་ལུང་འདི་ནས་བྱ་སྤུ་རླུང་གི་འཁུར་བ་བཞིན་ཡལ་འགྲོ་བའི་འཇིག་ཉེན་དེ་ཡང་འུ་ཚོའི་མི་རབས་འདིའི་ནག་ཉེས་སུ་རྩིས་ཆོག དེར་བརྟེན་འུ་ཚོའི་མི་རབས་འདིས་ཤེས་བྱ་ཡོན་ཏན་ཉི་ཚེ་བ་ཙམ་ཞིག་གིས་བློ་ཡིད་ཚིམ་ཏེ་སྟོང་སེམས་ཀྱིས་ངའོ་སྙམ་པའི་ང་རྒྱལ་གྱི་མགོ་འཕང་མཐོ་རུ་བཏེགས་ནས། གནས་བཟོ་བདེ་བོའི་ངང་འཚོ་བའི་དགའ་སྐྱིད་ཀྱི་ཉལ་ཐས་བཟི་ནས་སེམས་ལ་ཅི་དྲན་དང་ངག་ལ་གང་ཡོང་བབ་ཅོལ་གྱི་གཏམ་དུ་གླེང་སྟེ་མི་ཚེ་མཐའ་ལ་བསྐྱལ་ནས་འདུག་རྒྱུ་མ་ཡིན་པར། རང་རང་གི་ས་ནས་མགོ་བོ་བཀྱག་སྟེ་རང་སྟེང་གི་བྱས་ཉེས་རང་བློ་ཡིས་ངོས་ཟིན་པར་བྱས་ཏེ། གང་ཅི་ཐད་ནས་བློ་རྩེ་གཅིག་སྒྲིམ་གྱིས་ཤེས་ཡོན་ལ་རྩོལ་སྒྲུབ་རོལ་མྱོང་ཡ་མ་བྲལ་བ་ཡིད་མ་ཆད་པའི་སྒོ་ནས་རྐང་ཚུགས་ཤིང་མཐའ་འཁྱོལ་པ་བྱས་ཏེ་རང་ནུས་རྩྭ་རྩེའི་ཆུ་ཟིལ་ཙམ་ཞིག་ལས་མེད་ནའང་། ཁ་ཞེ་གཉིས་མེད་དང་བློ་སེམས་དག་པས་རང་གི་མི་རིགས་དང་རིག་གཞུང་སྲུང་སྐྱོབ་ཀྱི་སླད་དོན་ཕུལ་ཐུབ་པ་བྱ་དགོས་སོ།།
༢ མི་རབས་གསར་པས་ཤེས་ཡོན་པའི་ཚད་གཞི་འཛིན་སྟངས་ཀྱི་གནད་དོན།
ཤེས་ཡོན་པ་ཞིག་ཡིན་ན་དེར་སྤྱི་ཚོགས་ལ་དཔག་པའི་ཚད་ཐུབ་ཀྱི་ཤེས་བྱ་ཡོན་ཏན་གཏིང་ཟབ་པོ་ཞིག་དང་རང་གྲུབ་ཀྱི་བསམ་བློའི་གོ་རྟོགས་ཀྱང་ཚད་གཞི་མཐོ་བོ་ཞིག་དགོས་ངེས་ཡིན། སྤྱིར་ཤེས་ཡོན་པ་ནི་མིའི་རིགས་ཀྱི་སྤྱི་ཚོགས་ཁྲོད་དགོས་གལ་རང་བཞིན་གྱི་གོ་གནས་ངེས་ཅན་ཞིག་བཟུང་ཡོད་སྟབས། མི་ཚང་མས་ཤེས་ཡོན་པ་ལ་བརྩི་བཀུར་དང་གདེང་འཇོག་བྱེད་ངེས་ཡིན་ལ། མི་ཚང་མའི་སེམས་སུ་ཤེས་ཡོན་པའི་ལམ་དུ་བསྐྱོད་པར་རེ་བ་དང་མོས་འདུན་ཆེན་པོ་བཅངས་ཡོད། དེ་ནི་ཤེས་ཡོན་པ་ཞིག་ཏུ་གྱུར་ཕྱིན་མི་དེ་ལ་གཞན་དང་མི་མཚུངས་པར་མིའི་རིགས་ལ་རང་ནུས་ཀྱི་འཇོན་ཐང་སྦྱིན་ཐུབ་པའི་རིག་སྟོབས་ཀྱི་ཁྱད་ཡོན་མངའ་བས་ཡིན། ཤེས་ཡོན་པའི་རིག་སྟོབས་ཁྱད་ཡོན་དེ་ནི་མི་རྣམས་སྐྱེས་མ་ཐག་ནས་ལྷན་སྐྱེས་སུ་ཡོད་པ་ཞིག་མིན་པར། མིའི་རྩོལ་སྒྲུབ་ཀྱི་སྙིང་སྟོབས་དང་འབད་འབུངས་ལ་བརྟེན་ནས་ཕྱིས་སུ་བྱུང་བ་ཞིག་ཡིན་སྟབས་དེ་ནི་མི་སུའང་ཡོད་ཆོག་ཆོག་ཡིན།
ཡིན་ནའང་ད་ལྟའི་དུས་རབས་འདིར་སྤྱི་ཚོགས་ཀྱི་གནས་བབ་དང་བསྟུན་ནས་ཤེས་ཡོན་པ་དང་ཤེས་རྨོངས་པའི་བར་ཁྱད་ནི་ངེས་པར་དུ་འབྱེད་དགོས་པའི་གནད་འགགས་ཤིག་ཆགས་ཡོད། ང་ཚོའི་བོད་མི་རིགས་ལ་མཚོན་ན་ཤེས་ཡོན་པའི་ལམ་དུ་བསྐྱོད་པའི་གནས་ནི་སློབ་གྲྭ་ཁག་དང་ཡང་ན་དགོན་སྡེ་ཁག་ཡིན་པས། སློབ་གྲྭ་དང་དགོན་པ་གཉིས་ནི་ཤེས་ཡོན་པ་གསོ་སྐྱོང་དང་བསྐྱེད་བསྲིངས་བྱེད་སའི་བསྟི་གནས་གལ་ཆེན་གཉིས་ཆགས་ཡོད། ཡིན་ནའང་སློབ་གྲྭ་དང་དགོན་པར་འགྲིམ་པ་ཙམ་གྱིས་མཐའ་གཅིག་ཏུ་ཤེས་ཡོན་པ་ཞིག་ཆགས་ཐུབ་པའི་ངེས་པ་གཏན་ནས་མེད། དེ་ནི་མི་སྒེར་རང་ཉིད་ལ་བདོག་པའི་བསམ་བློ་དང༌། ཀུན་གཤིས། རིག་སྟོབས་བཅས་ལ་རག་ལས་ནས་ཡོད། དོན་དངོས་སུ་བཤད་ན་ད་ལྟའི་སྐབས་འདིར་ཤེས་ཡོན་གྱི་ཚད་གཞི་ལོངས་མེད་པར་ཤེས་ཡོན་པའི་ཁ་ཕོ་སྒྲོགས་མཁན་ནི་མང་བའི་ཚད་དུ་འདུག དེའི་ཕྱིར་འུ་ཚོས་ཕ་རོལ་པོ་ཤེས་ཡོན་པ་ཡིན་པའི་ཚད་གཞི་ལ་གཏིང་ཚུགས་ཀྱིས་བལྟ་ཐུབ་དགོས་པ་མ་ཟད། ཚུར་རོལ་རང་ཉིད་ཀྱང་ཚད་ཐུབ་ཀྱི་ཤེས་ཡོན་པ་ཞིག་ཡིན་མིན་མགོ་རྟིང་མེད་པར་བལྟ་ཐུབ་དགོས། ངས་བལྟས་ན་ད་ལྟའི་ཤེས་ཡོན་པ་ཡིན་ཟེར་ནས་སྲོལ་རྒྱུན་རིག་གནས་ལ་དགག་རྒོལ་གྱིས་ཁ་ཕོ་སྒྲོགས་མཁན་ཚོ་ནི་སློབ་གྲྭ་ཆེན་མོ་ནས་ཐོན་པའི་གཞོན་སྐྱེས་སྙན་ངག་འབྲི་མཁན་རེ་ཟུང་དང༌། དགོན་པ་ནས་གཞུང་ཆེན་མོ་གོ་མ་ཐུབ་མཐའ་མ་འཁྱལ་བར་ཕྱི་རུ་བུད་ནས་རིག་གནས་ཙམ་པོ་ལ་ཕྱོགས་པའི་གྲྭ་བ་རེ་འགའ་དང་གྲྭ་ལོག་འགའ་ཞིག་ཡིན་པར་སེམས། ཁོ་ཚོ་ནི་ཤེས་ཡོན་པ་རེད་ཟེར་ནས་འུད་བསྟོད་བྱེད་མཁན་ཚོ་ནི་སློབ་གཉེར་གྱི་བྱ་བར་རོལ་བཞིན་པའི་གཞོན་སྐྱེས་བརྡ་སྤྲོད་དག་ཡིག་སོགས་ཀྱི་འགྲོ་སྟངས་ཙམ་ཡང་མ་ཤེས་གོང་ནས་སྙན་ངག་འབྲི་བ་ལ་ཕྱོགས་པ་འགའ་ཞིག་ཡིན་འདུག གནས་སྟངས་འདིར་མི་རང་ཉིད་ཀྱི་ངོས་ནས་ཞིབ་ཏུ་བསམ་བློ་གཏིང་ཟབ་པོ་ཞིག་གཏོང་ཤེས་བྱ་ཐུབ་དགོས། དཔེར་ན། རང་ཉིད་ཀྱིས་སློབ་གཉེར་བྱས་པའི་དུས་ཀྱི་ཡུན་ཚད་དང༌། དེར་བསྟུན་རང་ཉིད་ཀྱིས་སློབ་གཉེར་ལ་བསྐྲུན་པ་ཇི་ལྟར་བསྐྱེད་ཚུལ། དེ་ལ་དཔག་ནས་ད་ལྟ་རང་ཉིད་ཀྱི་རྒྱུད་ལ་འབྱོར་བའི་ཤེས་ཡོན་གྱི་རྨང་གཞི། དེ་ལས་བསྐྱེད་པའི་རང་ཉིད་ཀྱི་ཀུན་སློང་དང་བསམ་བློའི་ཕྱུག་ཚད་ཅི་འདྲ་ཡིན་མིན་བཅས་ལ་རང་ཉིད་ཀྱིས་ཚད་མཇལ་དང་རྒྱུས་ལོན་ཚགས་ཚུད་པོ་བྱ་ཐུབ་དགོས་པ་དང༌། མ་ཟད་ཤེས་བྱ་ཡོན་ཏན་ལ་མཐའ་མེད་པས་ན་རང་ཉིད་ཀྱི་སྲོག་གི་རྒྱུ་བ་མ་འགག་བར་དུ་རང་རྒྱུད་ལ་འབྱོར་བར་མུ་མཐུད་ནས་འབད་པ་མི་ལྷོད་པ་བྱ་དགོས་རྒྱུ་དང༌། ཤེས་བྱ་ཡོན་ཏན་དེ་རང་རྒྱུད་ལ་དབང་འབྱོར་ནའང་སྒེར་གཅོད་ཀྱི་བསམ་བློའི་དབང་དུ་མི་འགྲོ་བར་བོད་སྤྱི་ཚོགས་ལ་ཕན་ཕྱིར་ཇི་ལྟར་བཀོལ་སྤྱོད་བྱ་དགོས་ཚུལ་བཅས་ལ་བབ་ཚུགས་ཀྱིས་བལྟ་ཤེས་བྱ་དགོས་སོ།།
༣ མི་རབས་གསར་པས་སྙན་ངག་པར་ཤེས་ཡོན་པའི་ཚད་གཞི་
འཛིན་སྟངས་ཀྱི་གནད་དོན།
ང་ཚོ་བོད་མི་རིགས་ཀྱི་སྙན་ངག་གྲུབ་རིམ་ནི་མང་པོ་ཞིག་གིས་གདོད་མའི་དུས་རབས་ཏེ། མིའི་རིགས་ཀྱི་སྐྱེ་འཕེལ་ཁྲོད་ཕན་ཚུན་ལ་ལག་པ་དང་རྣམ་འགྱུར་སོགས་ཀྱིས་གོ་བརྡ་སྟོན་རིམ་ལས་ངག་གི་སྐད་བརྡ་སྟོན་ཐུབ་པའི་དུས་རིམ་ངེས་ཅན་ཞིག་བརྒྱུད་འོང་སྟེ། བོད་མི་རིགས་ཀྱི་ངལ་རྩོལ་མང་ཚོགས་ཁྲོད་འཚོ་བའི་དགའ་སྐྱོ་མཚོན་པའི་གླུ་གྱེར་བ་ནི་སྙན་ངག་གི་ཐོག་མ་ཡིན་པར་ཚོད་འཛིན་བྱེད་ཀྱིན་ཡོད། དེ་བས་ན་སྙན་ངག་གི་འབྱུང་སའི་ལྟེ་བའམ་གཞི་རྩ་ནི་ངལ་རྩོལ་མང་ཚོགས་ཡིན་པ་ཤེས་ཐུབ། དེར་བརྟེན་གནའ་བོའི་སྐབས་ཐོག་དེར་སྙན་ངག་ནི་ཤེས་ཡོན་པ་ཁོ་ནའི་སྤྱོད་སྒོ་ཞིག་མ་ཡིན་པར། བླུན་པོ་གནག་རྫི་སོགས་ཀྱི་ངག་སྒོ་ནའང་སྙན་ངག་གི་ཀློང་བརྡོལ་ཡོད་ཅེས་བཤད་ན་དེ་ནི་འུད་ཤོབ་ཅིག་མ་ཡིན་པ་ནི། དེང་ང་ཚོའི་མཐོང་སྣང་དུ་ཡོད་པའི་གླུ་དང༌། མགུར། ལ་གཞས་སོགས་དམངས་ཁྲོད་ཀྱི་རྩོམ་རིག་དེ་དག་གིས་གསལ་འདོན་བྱས་ཡོད་པས་ན་ཁོ་ཚོ་ནི་ངག་ཐོག་གི་སྙན་ངག་པ་རྐྱང་རེད་ཟེར་ཆོག འོ་ན། གནའ་བོའི་དམངས་ཁྲོད་ཀྱི་གླུ་མགུར་སོགས་ཐོལ་བྱུང་དུ་རྩོམ་པར་ཀློང་བརྡོལ་བའི་ངལ་རྩོལ་མང་ཚོགས་དག་ནི་ཤེས་ཡོན་པ་རེད་དམ་ཟེར་ན། དེ་ནི་སྐབས་དོན་གནད་དུ་འཁེལ་བའི་དྲི་གཞི་ཞིག་སྟེ། ངས་ནི་ཁོང་ཚོ་དུས་རབས་དེའི་ངག་ཐོག་གི་སྙན་ངག་པ་ཙམ་ལས་ཤེས་ཡོན་པར་མི་འཇོག དེ་ནི་ཁོ་ཚོས་དུས་རབས་དང་སྤྱི་ཚོགས་ཀྱི་དབང་གིས་མི་གཞི་དང་བསམ་བློ་ཀུན་སྤྱོད་སོགས་འདུལ་གཅུན་གྱི་ཤེས་བྱ་ཡོན་ཏན་སྦྱངས་པའི་གོ་སྐབས་དེ་ཙམ་རེག་མེད་པས་ན་ངག་ཐོག་སྙན་ངག་གི་ཁྱད་ཡོན་ཙམ་གྱིས་ནི་ཤེས་ཡོན་པར་བརྩི་མི་རུང་ཟེར་བ་ཡིན། རྒྱུ་མཚན་འདི་གཞི་ལ་བཞག་ནས། ཤོག་སྨྱུག་བཀོལ་སྤྱོད་ཀྱི་ཡིག་ཐོག་རྩོམ་རིག་གི་བརྒྱུད་རིམ་ལས་དེང་སྐབས་དྲ་ཐོག་རྩོམ་རིག་གི་དུས་རབས་འདིར་ཡང་ང་ཚོ་བོད་མི་རིགས་འདི་སྔར་བཞིན་སྙན་ངག་ལ་དུང་ཁ་ཧ་ཅང་ཟབ་ནའང་། སྙན་ངག་ལ་འཕོ་འགྱུར་གྱི་གནས་རིམ་ངེས་ཅན་ཞིག་བྱུང་སྟེ། དེང་སྙན་ངག་ནི་ངལ་རྩོལ་མང་ཚོགས་ཁྲོད་ནས་རྒྱང་བཀྱེད་ཀྱིས་ཡིག་ཐོག་རྩོམ་པ་པོ་ཁོ་ནར་དབང་བའི་སྒྱུ་རྩལ་རྩོམ་རིག་ཅིག་ཏུ་གྱུར་ནས་ཡོད།
དེར་བརྟེན་འུ་ཚོས་འདི་ལས་ཤེས་པར་བྱ་རྒྱུའི་གནད་དོན་ཞིག་ཡོད་པ་ནི། སྙན་ངག་པ་དང་ཤེས་ཡོན་པའི་བར་ཁྱད་དེ་རེད། སྙན་ངག་འབྲི་ཤེས་པ་ཙམ་གྱིས་ནི་ཤེས་ཡོན་པར་འཇོག་མི་རུང་ལ། སྙན་ངག་འབྲི་ཤེས་པ་ཙམ་གྱིས་ཤེས་ཡོན་པ་ཡིན་ཟེར་ནས་ཁེངས་སེམས་ཀྱི་ཁ་ཕོ་ཆེ་རུ་སྒྲོགས་པ་ནི་དེ་བས་ཀྱང་གླེན་རྟགས་ཤིག་རེད། དེང་འུ་ཚོའི་སྤྱི་ཚོགས་ནང་ཤེས་ཡོན་སློབ་གཉེར་གྱི་བསྟི་གནས་སློབ་གྲྭ་དང་དགོན་སྡེ་བཅས་སུ་རིག་གནས་རྣམ་གྲངས་སྤྱི་ཡོངས་ལས་སྙན་ངག་ལ་ཕྱོགས་པ་ནི་མང་མོས་ཀྱི་ཚུལ་དུ་ཡོད་པ་ནི་རྒྱུན་ལྡན་གྱི་གནས་སྟངས་ཤིག་ཆགས་ཡོད་མོད། འོན་ཀྱང་སྙན་ངག་འབྲི་བའི་གཞི་རྐང་ཚུགས་ཡོད་པ་ནི་ཆེས་ཉུང་ཉུང་ཞིག་སྟེ་རེ་གཉིས་ཙམ་ལས་མངོན་དུ་མེད་ལ། རེ་གཉིས་པོ་དེ་ཡང་སྙན་ངག་པ་ཚད་ཐུབ་ཅིག་ཏུ་གྱུར་མེད་པ་ནི་ད་ལྟ་འཛམ་བུའི་གླིང་གི་མི་རིགས་གཞན་རྣམས་དང་བསྡུར་ན་འུ་ཚོ་ནི་གོ་ལ་ཟླུམ་པོ་འདིའི་རྩོམ་རིག་གི་གར་སྟེགས་སྟེང་འཛེག་མ་ཐུབ་པར་རང་ས་ན་ཁུ་སིམ་མེར་ལྷག་ནས་ཡོད་པ་འདིས་ར་སྤྲོད་གསལ་བོ་བྱེད་ཐུབ།
ད་ལྟའི་འུ་ཚོའི་མི་རབས་འདིའི་གྲས་ཀྱི་སྙན་ངག་པར་བགྲངས་པ་ཚོ་ནི་རེ་རེ་བཞིན་བརྩི་མི་དགོས་པར། མགོ་ཐོག་གི་སྤྱི་ཚོགས་འདིའི་དབང་དུ་བཏང་ན་ལོ་ན་སུམ་ཅུ་ནས་ལྔ་བཅུའི་བར་མཚམས་དུ་གནས་ཡོད། དེ་ཚོའི་ཁྲོད་ཀྱི་སྙན་ངག་པ་རྒན་གྲས་ཚོ་སྙན་ངག་ལ་འཇུས་ནས་ལོ་ངོ་ཅི་ཙམ་སོང་བ་དེ་ཙམ་ཀྱི་རིང་སྙན་ངག་ལའང་གསར་རྙིང་གི་འགྱུར་བ་ཆེན་པོ་ཞིག་ཐེབས་ཡོད། ཡིན་ནའང་དེ་ནི་བར་དོན་འདིར་གླེང་མི་མཁོ་བའི་གནས་ཚུལ་གཞན་ཞིག་རེད། དེ་བས་འུ་ཚོའི་སྤྱི་ཚོགས་ནང་མང་པོ་ཞིག་གིས་ནི་སྙན་ངག་པ་ཚོ་ད་ལྟའི་ཤེས་ཡོན་པར་བགྲངས་པ་ནི་ཚད་བརྒལ་གྱི་གདེང་འཇོག་བྱེད་སྟངས་ཤིག་རེད་ལ། སྙན་ངག་པ་ཚོས་ཀྱང་ཤེས་ཡོན་པ་ཡིན་པར་རློམ་པ་ནི་སྒེར་སེམས་ཀྱི་རང་ལྟ་ཆེན་པོ་ཞིག་རེད། འུ་ཚོས་ཤེས་ཡོན་པ་ཡིན་པའི་ཚད་གཞི་དེ་ཙམ་གྱིས་བཟུང་ན་ནི་ཤེས་ཡོན་པ་ཟེར་བའི་ཐ་སྙད་ཀྱི་བཏགས་དོན་ཧ་ཅང་གི་རྒྱ་ཆུང་བ་དང་དམའ་དྲགས་པ་ཞིག་རེད་སྙམ། སྤྱིར་ང་ཚོ་བོད་མི་རིགས་ལ་རིག་གནས་རྣམ་གྲངས་མང་པོ་ཞིག་ཡོད་པ་ལས་སྙན་ངག་ནི་རིག་གནས་བྱེ་བྲག་པ་ཞིག་ཡིན་ནའང་། དེ་ནི་རིག་གནས་གཞན་འགའ་ཞིག་དང་བསྡུར་ན་རིན་ཐང་གི་ཆ་ནས་དེ་འདྲའི་གཏིང་ཟབ་ཅིང་རྒྱ་ཆེ་བ་ཞིག་མ་རེད་སྙམ། འདི་ནི་ཕྱི་རོལ་གྱི་བྱ་དངོས་ལས་བྱུང་བའི་དགའ་སྐྱོའི་སེམས་ཚོར་དང་། འདུ་ཤེས་འཛིན་སྟངས། སྨྲ་བརྗོད་བཅས་དུས་གཅིག་ཏུ་སྐྱ་འཐབ་ནས་གྲུབ་པའི་སྐབས་ཐོག་གི་ངག་རིག་ཅིག་ཡིན་པས། གནད་ཀྱི་དོན་པོར་སྙན་ངག་གིས་འུ་ཚོའི་སྤྱི་ཚོགས་ཀྱི་འཚོ་གནས་ན་དེ་འདྲའི་གོ་གནས་ཆེན་པོ་ཞིག་བཟུང་མེད་པར་སེམས། འདི་ནི་ཁོ་བོས་རིག་གནས་གཞན་ཞིག་གི་སྒེར་གཤིས་ཤིག་བཟུང་ནས་ཕྱོགས་ཞེན་གྱི་སྐད་ཆ་བཤད་པ་གཏན་ནས་མིན། ཁོ་བོར་མཚན་ནའང་ཅི་ཡང་མི་འཇོན་གང་ཡང་མི་འཁྱོངས་ནའང་ཚིག་གི་སྡེབ་ཙམ་ཤེས་པ་ནས་སྙན་ངག་འབྲི་བའི་ལས་ལ་སྤྲོ་སྣང་ཆེན་པོ་ཡོད་མཁན་ཞིག་ཡིན། ཡིན་ཡང་ཞིབ་ཏུ་སེམས་ན་སྙན་ངག་ཙམ་ཞིག་འབྲི་ཤེས་པའི་གནས་རིམ་ལས་ཤེས་ཡོན་པ་ཆགས་པ་མེད་པ་དང་། སྙན་ངག་ཙམ་ཞིག་འབྲི་ཤེས་པ་ལས་ཕར་བརྒལ་གྱིས་རིག་གནས་གཞན་ལ་གཏིང་ཚུགས་ཀྱིས་བལྟ་ཐུབ་ཀྱི་མེད་པ་ནི་ནོར་ཉེས་ཆེན་པོ་ཞིག་རེད་སྙམ་པའི་བསམ་བློ་ཡང་ཡང་འཁོར་མྱོང་ཡོད།
ད་ལྟའི་སྙན་ངག་པ་ཚོས་ནི་རང་རང་ལ་བདོག་པའི་ཚོར་སེམས་ལས་སྙན་ངག་རེ་འབྲི་བར་བརྩོན་ནས་ཉི་མ་བསྐྱལ་བ་ཙམ་ལས། དེ་བས་གཞན་ང་ཚོར་ཡོད་པའི་ཐུན་མོང་རིག་གནས་ཀྱི་རྣམ་གྲངས་གཞན་རྣམས་ཀྱི་ཕྱོགས་ལ་མགོ་རྨོངས་ནས་བླུན་པོ་གནག་རྫི་ལྟ་བུའི་འདུ་ཤེས་བཟུང་ནས་ཡོད་པ་ནི་སྙན་ངག་གི་བཟི་ཁས་བསྐྲུན་པའི་ཤེས་རྨོངས་ཀྱི་ཆ་ཞིག་དང་། དེ་ནི་སྙན་ངག་པ་ཚོས་ཤེས་ཡོན་སློབ་པའི་བརྒྱུད་རིམ་ལས་བློ་རྒྱ་ཡངས་པོས་རིག་གནས་ཀྱི་གཞི་རྩ་དང་རིན་ཐང་ལ་བལྟ་མ་ཐུབ་པར། ཕྱོགས་ཡན་གར་བ་ཞིག་ལ་ཤི་འཐམ་རོ་འཐམ་གྱིས་བལྟ་རྒྱ་དང་ཐོས་རྒྱ་ཆེ་རུ་བསྐྱེད་མ་ཐུབ་པའི་སྐྱོན་ཉེས་རེད། དེ་བས་ད་ལྟ་གསར་དུ་ཤེས་བྱ་ཡོན་ཏན་སློབ་པའི་ལམ་དུ་བསྐྱོད་མཁན་རྣམས་ཀྱིས་ནི་འདི་ལྟར་སྙན་ངག་ཁོ་ནར་ཡིད་སེམས་ཕྱོགས་ནས་མི་འདུག་པར་ཤེས་བྱའི་རྣམ་གྲངས་གཞན་རྣམས་ལའང་བལྟ་རྒྱ་ཐོས་རྒྱ་བྱེད་ཐུབ་པ་དགོས་ཟེར་བ་དེ་བརྗོད་འདོད་པའི་སྐད་ཆའི་སྙིང་དོན་ཡིན་ལ། ཁོ་བོས་ནི་འདི་ལྟར་གླེང་དོན་སྙན་ངག་ནི་མི་མཁོ་བའི་རིག་གནས་ཞིག་ཏུ་རྩིས་ནས། དེར་འཇུག་སྙན་ངག་པ་ཚོར་དམའ་འབེབས་དང་མཐོང་ཆུང་བྱས་པ་གཏན་ནས་མ་ཡིན་པར། འུ་ཚོས་ངེས་པར་རིག་གཞུང་གི་རྩ་བ་དང་ཡན་ལག་དབྱེ་འབྱེད་གསལ་ཤེས་ཀྱིས་རྩ་བ་དེ་རྨང་གཞིར་བཟུང་ནས་རིག་གནས་ལ་རོལ་ཤེས་བྱས་པ་ཡིན་ན། ད་གཟོད་ཤེས་ཡོན་ཀྱི་གཞི་རྐང་བརྟན་པོ་ཞིག་ཚུགས་ཐུབ་པ་དང་། ཤེས་ཡོན་པ་ཞེས་པའི་ཐ་སྙད་དེ་ཡང་བཏགས་དོན་མཚུངས་པ་ཞིག་ཡིན་པའི་འདུ་ཤེས་བཟུང་ནས་གླེང་བ་ཡིན།
༤མི་རབས་གསར་པས་སྲོལ་རྒྱུན་རིག་གནས་ཀྱི་ཟབ་ཁྱད་དང་
རིན་ཐང་འཚོལ་ཞིབ་ཀྱི་གནད་དོན།
ང་ཚོ་བོད་མི་རིགས་ནི་རིན་ཐང་གཞལ་དུ་མེད་པའི་ཤེས་བྱ་རིག་གནས་ཀྱིས་ཕྱུག་པའི་མི་རིགས་ཤིག་ཡིན་ནའང༌། ད་ལྟ་དུས་རབས་ཉེར་གཅིག་པ་འདིར་ང་ཚོའི་མི་རབས་གསར་པའི་ངོས་ནས་ཤེས་བྱ་རིག་གནས་ཀྱི་ཁྱད་ཡོན་ལ་གདེང་འཇོག་དེ་ཙམ་བྱེད་ཀྱི་མེད་ཁར། ཤེས་ཡོན་ཀྱི་རིན་ཐང་འཚོལ་ཞིབ་བརྩད་དཔྱོད་ཀྱི་བསམ་བློ་དཀྱེལ་ཡངས་པོ་མེད་པར། རང་ཉིད་སྒེར་ཚུགས་ཀྱི་ལྟ་བ་ཞིག་བཙན་གྱིས་བཟུང་ནས་ཡོད་པའི་ཀུན་གཤིས་ཀྱི་སྣང་ངོར་འཆར་བའི་ལོག་རྟོག་གི་སེམས་བྱུང་ཞིག་ཐོལ་བྱུང་དུ་སྐྱེས་ཏེ། སྲོལ་རྒྱུན་རིག་གནས་ཀྱི་ཐད་ལ་དམའ་འབེབས་དགག་སྒྲུབ་ཀྱི་མཚོན་འདེབས་པ་ནི་ད་ལྟའི་མི་རབས་གསར་པའི་ནང་ཉུང་ཉུང་ཞིག་མ་རེད། ཕལ་ཆེར་དེ་ནི་འུ་ཚོའི་མི་རབས་གསར་པའི་གྲས་ཀྱི་སློབ་གྲྭ་ཆེན་མོ་བ་འགའ་རེ་དང༌། ཡང་ན། ལས་ཞུགས་དགེ་རྒན་སོགས་ཀྱི་གྲས། གཞན་གྲྭ་བའི་སྤྱི་ཚོགས་ལས་བུད་པའི་གྲྭ་ལོག་འགའ་རེ་ཡིན་པར་ཆ་འཇོག་བྱས་ན་ཐལ་ཆེ་མེད་པར་སྙམ།
དོན་དངོས་སུ་དེ་དག་གི་གྲས་ལ་ཤེས་ཡོན་ཀྱི་གཞི་རྐང་གཏིང་ཟབ་པོ་ཞིག་ཆགས་ནས་རང་ཉིད་སྒེར་སེམས་ཀྱི་དཔྱོད་ཤེས་རིག་སྟོབས་ཀྱིས་སྲོལ་རྒྱུན་རིག་གནས་རྡོག་རལ་དུ་བཏང་སྟེ། རྣམ་པ་གསར་པའི་རིག་གནས་གཞན་ཞིག་བོད་མི་རིགས་ལ་གསར་བཏོད་དང་ཁྱབ་བརྡལ་གཏོང་ཕོད་པའི་སྐྱེས་སྟོབས་ཀྱི་མཁྱེན་དཔྱོད་ཅིག་ཡོད་པ་རེད་དམ་ཟེར་ན། དེ་ནི་རྩ་བ་ཉིད་ནས་སྟོང་སེམས་ཀྱི་བསམ་བློ་དགོད་བྲོ་པོ་ཞིག་རེད། འུ་ཚོའི་བློ་ཡིད་ལ་འཆར་བའི་རྙིང་དོར་གསར་སྤེལ་གྱི་འདུན་པ་དེ་རིག་གཞུང་གསར་རྙིང་གི་ལེགས་ཉེས་དབྱེ་འབྱེད་མ་ཤེས་པར་འུར་འདྲོགས་ལངས་པ་ཙམ་གྱིས་ནམ་ཡང་འགྲུབ་ཐུབ་མེད་པ་ཞིག་རེད།
ཡིན་ནའང༌། འུ་ཅག་མི་རབས་གསར་པའི་གྲས་ལ་རྙིང་དོར་གསར་སྤེལ་གྱི་བསམ་བློ་གསར་པ་ཞིག་སྐྱེས་ཡོད་པ་དེ་ནི། ད་ལྟའི་དུས་རབས་འདིའི་འཕེལ་འགྲོས་སམ་རྒྱུ་ཕྱོགས་ཀྱིས་འུ་ཚོའི་ཀུན་གཤིས་ལ་བཞག་པའི་བསམ་བློ་ཡར་ཐོན་ཀྱི་ཆ་ཙམ་ཡིན་པས་དེ་ནི་དོན་བཟང་ཞིག་ཏུ་རྩིས་ཆོག འུ་ཚོ་ཡང་ངེས་པར་དུ་སྤྱི་ཚོགས་གསར་པའི་ལམ་དུ་བསྐྱོད་དགོས་ལ། འུ་ཚོས་གསར་བཏོད་ཀྱི་ལམ་དུ་བསྐྱོད་པར་ནམ་ཡང་ཤུགས་སྣོན་རྒྱག་དགོས། ཡིན་ཡང༌། འུ་ཅག་ལ་ཤེས་ཡོན་གྱི་བློ་མིག་ཡངས་པོ་དང་བསམ་སྤྱོད་ལ་ཡར་རྒྱས་ཤུགས་ཆེར་ཕྱིན་མེད་པ་དང༌། ཇི་ལྟར་བྱས་ནས་གསར་བཏོད་ཀྱི་ལམ་དུ་བསྐྱོད་དགོས་མིན་གྱི་ཐད་ནས་དཔྱོད་རྟོག་གི་རིག་སྟོབས་དང༌། ཉམས་མྱོང༌། ལག་ལེན། ཤེས་ཡོན་བཅས་ཀྱིས་འདང་མེད་ནའང༌། འོལ་ཚོད་དང་ཁེངས་སེམས་སྒེར་ཚུགས་ཀྱིས་ནང་བསྟན་ཆོས་ལུགས་ཀྱིས་མཚོན་སྲོལ་རྒྱུན་རིག་གནས་ལ་སྡང་སེམས་ཀྱིས་དམའ་འབེབས་དགག་རྒྱག་བྱེད་པའི་ཀུན་གཤིས་དེ་ནི་ཆེས་ནོར་འཁྲུལ་གྱི་གནད་དོན་ཞིག་རེད།
དེང་གི་སྐབས་ནང་བསྟན་ཆོས་ལུགས་ཀྱི་ཐ་སྙད་འགའ་ཞིག་རྡོ་ཆག་བཙན་སྦྱར་ལྟ་བུར་སྒྲིག་སྦྱོར་བཀོད་ཤེས་ཙམ་ལས། ནང་བསྟན་ཆོས་ལུགས་ཀྱི་གཏིང་ཟབ་སར་འཛུལ་ཏེ་རིན་ཐང་དང་ཁྱད་ཡོན་འཚོལ་ཞིབ་བྱེད་མ་ཐུབ་པར། ནང་བསྟན་ཆོས་ལུགས་དགྲ་རུ་བཟུང་ནས་རྒོལ་སློང་བ་ནི་གཡག་སྣ་ཁུ་ཚུར་གྱིས་ཕུག་འདོད་སྟོང་བསམ་དེའི་ཟླ་རུ་གྱུར་འདུག ནང་བསྟན་ཆོས་ལུགས་ཀྱི་རྩ་བའི་གཞུང་ཆེན་མོ་དེ་དག་ཚར་གཅིག་ཀློག་རྒྱུ་ཕར་ཞོག ཐ་ན་གཞུང་ཚིག་ཤོག་ལྷེ་གཅིག་ཀྱང་སྤུས་དག་གིས་ཀློག་རྒྱུ་བྱུང་མེད་ནའང༌། གཞུང་ལུགས་ལ་ངེས་ཆ་དང་རིག་སྟོབས་ལ་གསལ་ཆ་ཡོད་མདོག་གིས་གཞུང་མིང་ལོག་འདོགས་ཀྱིས་བཀྱལ་ཚིག་སྨྲ་བ་དང༌། དེར་མཚུངས་སྟོན་པ་ཤཱཀྱ་ཐུབ་པ་ནས་བཟུང་ནང་བསྟན་ཆོས་ལུགས་དང་འབྲེལ་བའི་སྐྱེས་བུ་དམ་པ་མང་པོ་ཞིག་ལ་མཚན་སྨོད་དམའ་འབེབས་ཀྱི་ཚིག་རྩུབ་སྨྲ་བ་ནི་ད་ལྟའི་ན་གཞོན་ཤེས་ཡོན་གྱིས་ཁོག་སྟོང་ནས་ཁེངས་དྲེགས་ཀྱིས་མགོ་འཕངས་མཐོ་བ་འགའ་རེ་ཡིན་འདུག དེ་དག་ལ་དངོས་དོན་ནང་བསྟན་ཆོས་ལུགས་ལ་དགག་སྒྲུབ་བྱེད་པའི་མཁྱེན་དཔྱོད་དང༌། རིག་སྟོབས། ཤེས་ཡོན་བཅས་ཁྱད་དུ་འཕགས་པ་ཞིག་ཡོད་པ་རེད་དམ་ཟེར་ན། སྐྱེས་པ་ཉིད་ནས་གཞན་དང་མི་མཚུངས་པར་རིག་པའི་ཀློང་བརྡོལ་བ་ཞིག་ཡིན་ན་མི་ཤེས་མོད། ། འོན་ཏང་ད་ལྟའི་འུ་ཅག་ཚོ་ཤེས་ཡོན་སྦྱོང་གཉེར་ལ་ཞུགས་པའི་ཚད་གཞིའི་དུས་ཡུན་དང༌། རོལ་མྱོང་བྱེད་སྟངས། རང་སྟེང་གི་རྩོལ་སྒྲུབ་ཀྱི་ནུས་པ། བསམ་བློའི་ཀུན་གཤིས་བཅས་ལ་དཔག་ནང་བསྟན་ཆོས་ལུགས་ཀྱི་གཞུང་ཆེན་མོ་དག་གི་དོན་ལ་དགག་སྒྲུབ་བྱ་རྒྱུའི་ཤེས་ཡོན་གྱི་གཞི་རྐང་ཟབ་པོ་ཞིག་ཚུགས་ཐུབ་མེད་པ་ནི་སེམས་ཐག་ཆོད་པས་བཤད་ཆོག ཁོ་བོས་ནི་མི་ཤེས་ཤེས་མདོག་གིས་ནང་བསྟན་ཆོས་ལུགས་ལ་དགག་རྒྱག་དམའ་འབེབས་བྱེད་མཁན་གྱི་གྲས་དེར་ནང་བསྟན་ཤེས་ཡོན་གྱི་ཆ་ནས་གྲྭ་སའི་དགེ་བཤེས་ཤིག་ལ་འགྲན་རྒྱུ་ཕར་ཞོག ཐ་ན་གྲྭ་སར་གཞུང་ཆེན་མོར་ཐོས་བསམ་སློབ་གཉེར་བྱེད་པའི་གྲྭ་བཙུན་ཕལ་བ་ཞིག་གི་དོ་ཟླར་ཡང་མི་ཡོང་ཞེས་མགྲིན་པ་གཟེངས་སུ་བཏེགས་ནས་སྨྲ་ཐུབ།
མདོར་བསྡུས་ནས་བཤད་ན། ཤེས་བྱ་ཡོན་ཏན་ཅི་ཡང་མངོན་དུ་མེད་པར་ནང་བསྟན་ཆོས་ལུགས་ཀྱིས་མཚོན་སྲོལ་རྒྱུན་རིག་གནས་རྩ་མེད་དུ་གཏོང་དགོས་ཚུལ་གྱི་འུར་སྒྲོགས་བྱེད་པ་ནི། དུས་རབས་གསར་པའི་འཕེལ་ཤུགས་ཁྲོད་མི་བུ་རང་ཉིད་ལ་འཇགས་ཡོད་པའི་ཤེས་བྱ་ཡོན་ཏན་ཉི་ཚེ་བ་ཙམ་པོ་དེས་ར་བཟི་སྟེ། སྟོང་སེམས་སུ་མངོན་པའི་ཅི་ཡང་མི་འཁྱོངས་གང་ཡང་མི་འཇོན་པའི་ལྟ་བ་རྟུལ་པོ་ཞིག་དང༌། འོལ་ཚོད་ཀྱིས་རང་ཚུགས་སུ་མངའ་བའི་སྒེར་གཤིས་ཀྱི་ཀུན་སློང་རབ་རིབ་དེས་དབང་གིས་རེད།
འོ་ན་འུ་ཅག་མུ་མཐུད་དུ་སྲོལ་རྒྱུན་རིག་གནས་ཀྱི་གཞི་རྩར་འཇུས་ནས་སྲོལ་རྒྱུན་གྱི་འཚོ་བ་བསྐྱལ་དགོས་པ་རེད་དམ་ཟེར་ན། དེ་ནི་མ་ཡིན་ཏེ། འུ་ཚོ་ཡང་ངེས་པར་དུ་འཛམ་བུ་གླིང་ལ་ཁ་ཕྱོགས་རྒྱུ་ནི་སྤྱི་ཚོགས་ཀྱིས་དེད་ཡོང་བའི་འུ་ཅག་གི་དགོས་མཁོ་གལ་ཆེན་ཞིག་རེད། ཡིན་ནའང༌། འུ་ཚོས་གསར་བཏོད་ཀྱི་དགོས་མཁོ་དེ་སྒྲུབ་མ་ཤེས་པར་སྔར་ནས་ཡོད་པའི་དགོས་མཁོ་མང་པོ་ཞིག་གི་རིན་ཐང་འཚོལ་ཞིབ་མ་ཐུབ་པར་བོད་མི་རང་ངོས་ནས་རྐྱེན་ལམ་ལ་བརྫངས་ཉེན་འདུག་ཟེར་བ་ཡིན། དེ་ནི་ད་ལྟའི་འུ་ཅག་གི་མི་རབས་འདིའི་སྲོག་རྩ་ལྟ་བུར་གྱུར་པའི་སྲོལ་རྒྱུན་གྱི་ཆོས་དང་རིག་གཞུང་དག་རེད། འུ་ཚོའི་ཆོས་དང་རིག་གཞུང་འདི་དག་བོད་མིའི་ཤ་ཁྲག་རུས་གསུམ་གྱི་གཏིང་རུམ་ལ་འཐུམས་ཏེ། མི་རིགས་ཤིག་གི་ངོ་བོར་བསྐྱེད་པའི་བརྒྱུད་རིམ་ལ་ད་ལྟའི་བར་ལོ་ངོ་སྟོང་ཕྲག་མང་པོ་ཞིག་འགོར་ཡོད་པའི་རིང་དེར་མཐོ་སྒང་གི་རི་ལུང་འདི་ནས་བོད་ཅེས་པའི་མིང་འདི་ཡལ་དུ་མེད་པར་ད་ལྟའི་བར་འཚོ་གསོན་ཐུབ་པ་ནི། འུ་ཚོའི་ཆོས་དང་རིག་གཞུང་འདི་དག་མི་རབས་གོང་མ་ཚོས་རྒྱུན་འཛིན་འཚོ་གནས་ཐུབ་པའི་རིན་ཐང་དང་སྐྱ་འཐབ་ནས་ཡོང་བ་ཞིག་ཡིན་པའི་གནས་ལུགས་འདི་ཤེས་པར་བྱ་རྒྱུ་དང་། འུ་ཚོའི་སྲོལ་རྒྱུན་རིག་གནས་འདི་དག་ནམ་ཞིག་སྟབས་མ་ལེགས་པར་གོད་ཆག་ཉམས་ཉེས་ཀྱིས་རྩ་མེད་ཤུལ་མེད་དུ་གྱུར་ན་དེ་དུས་བོད་ཅེས་པའི་མི་རིགས་འདི་ཡང་འཆི་ལམ་ལ་བསྐྱལ་ཚར་བའི་དོན་གནད་འདི་ངེས་རྟོགས་བྱ་དགོས།
དེང་གི་སྐབས་འུ་ཚོ་མི་རབས་གསར་པའི་གྲས་སུ་སྲོལ་རྒྱུན་གྱི་ཤེས་བྱ་རིག་གནས་དེ་དག་གི་རྩ་བའི་ཁྱད་ཡོན་དང་རིན་ཐང་འཚོལ་ཞིབ་མ་ཐུབ་པར། གཏོར་བཤིག་གི་འུར་སྒྲོགས་དགག་རྒྱག་བྱེད་པར་སྤྲོ་བ་ནི་ཆེས་ནོར་འཁྲུལ་གྱི་བྱ་སྤྱོད་ཅིག་རེད། འུ་ཚོས་རིག་པ་ཡང་དག་གི་སྒོ་ནས་ནང་བསྟན་ཆོས་ལུགས་ཀྱིས་མཚོན་སྲོལ་རྒྱུན་རིག་གནས་ལ་སྤུས་གཙང་དག་གསེད་ཀྱིས་རོལ་མྱོང་བཀོལ་སྤྱོད་བྱ་ཐུབ་ན། འུ་ཚོའི་མི་རིགས་འདི་སྤྱི་ཚོགས་གསར་པའི་ལམ་དུ་བསྐྱོད་པར་སྲོལ་རྒྱུན་རིག་གནས་ཁག་གིས་བཀག་འགོག་གང་ཡང་བྱ་མི་ཐུབ། དེ་བས་མི་སྒེར་རང་ཉིད་ལ་བློ་མིག་ཡངས་པའི་དཔྱོད་ཤེས་ཀྱི་རིག་སྟོབས་ཤིག་དང༌། ཀུན་ལ་སྙེག་པའི་བསམ་ཤེས་ཀྱི་ཀུན་སློང་ཡང་དག་ཅིག་འཇགས་པར་བྱས་ཏེ། ནང་བསྟན་ཆོས་ལུགས་ཀྱིས་མཚོན་སྲོལ་རྒྱུན་རིག་གནས་ཁག་གི་ཁྱད་ཡོན་དང་རིན་ཐང་ངོ་མ་འཚོལ་ཞིབ་ཀྱིས་སྙིགས་དོར་བཅུད་ལེན་བྱ་རྒྱུ་ནི་གལ་འགངས་ཆེ་ཤོས་དེ་ཆགས་ཡོད་པར་སེམས།
མཐའ་དོན་ནང་བསྟན་ཆོས་ལུགས་དང་སྲོལ་རྒྱུན་རིག་གནས་ལ་སྡང་བའི་ན་མཉམ་གྲོགས་པོ་དག་ལ་ཞུ་རྒྱུར། མི་བུ་རང་ཉིད་ལ་དངོས་དོན་ནང་བསྟན་ཆོས་ལུགས་ཀྱི་གཞུང་ཆེན་མོ་དག་ལ་དཔྱད་བཟོད་ཀྱི་བློ་སྤོབས་དང་ཚིག་མཚོན་འདེབས་ཕོད་པའི་མཁྱེན་དཔྱོད་ཡངས་པོ་ཞིག་ཡོད་ན། མཐའ་གཅིག་ཏུ་ནང་བསྟན་ཆོས་ལུགས་ཀྱི་ཉེས་པའི་ཕྱོགས་ཁོ་ན་གླེང་བ་ལས་བཟང་ཕྱོགས་ནས་བལྟ་ཐུབ་ཀྱི་མེད་པ་ནི་ཅི་ཞིག་གིས་ལན།
ནང་བསྟན་ཆོས་ལུགས་ལ་ཉེས་པའི་ཆ་རྐྱང་ལས་བཟང་བའི་ཆ་གང་ཡང་མངོན་དུ་མེད་པ་ཞིག་རེད་ཟེར་ན། དེ་ནི་གཏན་ནས་ཁས་ལེན་མ་ཐུབ་པའི་འུར་ཤོབ་ཅིག་རེད། དེང་སྐབས་སྒེར་ཚུགས་ཀྱིས་ཚན་རིག་གི་ལྟ་བ་འཛིན་མཁན་ནུབ་ཕྱོགས་ཚན་རིག་མཁས་ཅན་མང་དག་ཅིག་གིས་ཀྱང་ནང་བསྟན་ཆོས་ལུགས་ཀྱི་རིག་པའི་རྗེས་སུ་འབྲངས་ནས་ཆོས་ལུགས་ལ་མཐོང་ཆེན་བྱེད་ཀྱིན་ཡོད་པ་འདིས་ར་སྤྲོད་གསལ་བོ་བྱ་ཐུབ། དཔེར་ན། དབྱིན་ཇིའི་མཁས་པ་མུ་ཏོན་གྱིས། ༼དེང་སྐབས་ཚན་རིག་དང་མཚན་ཉིད་རིག་པ་ཤིན་ཏུ་དར་རྒྱས་ཕྱིན་པའི་དུས་ཡིན་ཡང༌། ཁོ་ཚོས་ཤེས་པའི་བདེན་དོན་རྣམས་སངས་རྒྱས་ཆོས་ལུགས་དང་ཆ་འདྲ་ཞིང༌། དེ་ལས་བརྒལ་མི་ཐུབ་པ་མ་ཟད་སངས་རྒྱས་ཆོས་ལུགས་ལ་དེ་བས་ཟབ་པ་དང་རྒྱ་ཆེ་བའི་གནས་ཡོད།༽ ཅེས་གསུངས་ཡོད་པ་འདིས་མཚོན་ཚན་རིག་པ་མང་པོ་ཞིག་གིས་སངས་རྒྱས་ཆོས་ལུགས་ལ་བསྟོད་བསྔགས་དང་གདེང་འཇོག་ཤུགས་ཆེར་བྱེད་ཀྱིན་ཡོད།
འུ་ཚོས་རང་མི་རིགས་དང་རིག་གཞུང་ལ་ཤ་ཞེན་ཡོད་མདོག་གི་ཁ་ཕོ་ཆེ་རུ་སྒྲོགས་བཞིན་པར། ནང་བསྟན་ཆོས་ལུགས་ཀྱི་ཟ་ཟུར་ནས་རྟོག་བཏགས་ཀྱི་སྐྱོན་ཉེས་རེ་གླེང་བ་ལས། ཆོས་ལུགས་ཀྱི་དངོས་གཞིའི་ཁྱད་ཡོན་གྱི་ཆ་ནས་ཚན་རྩལ་རིག་པ་སོགས་དང་བསྡུར་ནས་གླེང་ཐུབ་ཀྱི་མེད་པ་འདི་ཅི་ཞིག་གིས་ཉེས་པ་རེད་ཟེར་ན། དེ་ནི་འུ་ཚོར་ནང་བསྟན་ཆོས་ལུགས་ཀྱི་ཕྱོགས་ནས་ཤེས་བྱ་ཡོན་ཏན་གྱི་དྲི་ཙམ་ཡང་འགོས་པ་མེད་པ་མ་ཟད། ནང་བསྟན་ཆོས་ལུགས་ཀྱི་གཞུང་ལ་བལྟ་རྒྱ་ཐོས་རྒྱ་བྲ་སྐྱག་ཙམ་ཞིག་ཀྱང་མེད་པའི་མངོན་རྟགས་ལྷང་ལ་བུད་པ་རེད། མ་ཟད་འུ་ཆོས་འུ་ཚོའི་མི་རིགས་འདིའི་སྲོལ་རྒྱུན་རིག་གནས་སོགས་ཀྱི་རིན་ཐང་དང་ནུས་པའི་ཐད་ནས་ཀྱང་འཚོལ་ཞིབ་དཔྱོད་ཤེས་ཀྱིས་སྨྲ་སྤོབས་ཀྱི་མེད་པ་དེ་ཡང་འུ་ཚོ་ལ་རང་ཉིད་གྲགས་འདོད་ཀྱི་སྒེར་སེམས་དེ་ལས། སྤྱི་གཙོ་ཀུན་ཕན་གྱི་བསམ་བློའི་འདུན་པ་ཡང་དག་ཅིག་མ་སྐྱེས་པའི་མངོན་རྟགས་རེད་ཟེར་ཆོག་གོ།།
ཉིད་ཀྱི་ཡོན་ཏན་ལ་ཡིད་སྨོན་ཤོར་སོང་།
ཉིད་ཀྱི་ཤེས་ཡོན་ལ་ཧ་ལས་སོང་། བདག་གི་སྙན་ངག་ལ་ཡིད་ཆད་སོང་།
ཤེས་ཡོན་པ་ནི། གཤིས་སྤྱོད་གཉིས་ལྡན་ཞིག་དགོས་པ་ཙམ་མ་ཟད། སྤྱི་དོན་དུ་བློས་བཏང་ཆེན་མོ་ཅིག་ཀྱང་དགོས་བགྱིད་ཡོད་པ་བསྟན་མི་འདུག་གམ། མཚོ་འབྱུང་ལྷ་མོས་བོད་རིགས་ཤེས་ཡོན་པ་རྣམས་སྲུངས་འགྱུར་ཅིག །
གོ་རྒྱུ་ཡོད་པ་ཞིག་་བྲིས་འདུག
ཡག་པོ་ཞིག་བྲིས་ཡོད་ས་རེད་དེ་འོན་ཀྱང་རིང་དྲག་ནས་ཀློག་ཐུབ་མ་སོང་དགོང་དག
རྩོམ་ཡིག་དངོས་གནས་ཡག་པོ་བྲིས་འདུག ཐུགས་རྗེ་ཆེ། འོན་ཀྱང་ཤེས་ཡོན་དང་ཤེས་ཡོན་པ་ངེས་འཛིན་བྱེད་ཕྱོགས་ལ་བལྟས་ན་བསམ་བློ་རྗེས་ལུས་ཀྱི་རྣམ་པ་ཕྲན་བུ་མངོན་འདུག སྤྱིར་ཤེས་ཡོན་དང་ཤེས་ཡོན་པ་ཞེས་པ་འདི་དུས་རབས་དང་མཐུན་པའི་འགྲོ་བ་མིའི་སྤྱི་ཚོགས་ཀྱི་དགོས་མཁོ་ལ་ལྟོས་ནས་འཇོག་ཐུབ་ན་བཟང། འདི་ལ་ཁྱེད་ཀྱིས་མོས་མཐུན་ཡོད་ན་ཤེས་ཡོན་དང་ཤེས་ཡོན་པ་ངོས་འཛིན་བྱེད་ཕྱོགས་འགྱུར་བ་གཏོང་རོགས། གལ་ཏེ་མོས་མཐུན་མེད་ན་རྒྱུ་མཚན་བསྣམས་ནས་འཕེབས་ན་སླར་ཡང་མཇལ་ཡོང།།
ཐུགས་རྗེ་ཆེ། དངོས་གནས་ཡག་པོ་ཞེ་དྲག་བྲིས་ཞག ང་ཚོའི་ཤེས་ཡོན་པའི་དཔུང་སྡེ་ནི་ཁ་བཤད་དང་ལག་ལེན་གཉིས་གོ་ལྡོག་ཏུ་འགྲོ་བཞིན་ཡོད་པས་ཤེས་ཡོན་པའི་ཚོགས་ཀྱིས་མནོ་བསམ་ཞིབ་ཏུ་གཏོང་རྒྱུ་གལ་ཆེན་པོ་རེད།
གོ་རྒྱུ་ཡོད་མེད་མི་ཤེས་ཀྱང་རིང་དྲགས་ནས་བཀླག་འདོད་ཀྱི་འདུན་པ་རྦད་དེ་བཅོམ་སོང།
དེ་སུ་ལན་པ་རེད།
རྗེས་མ་དྲ་ཐོག་ཏུ་དེབ་བྲིས་བྲིས་མ་བྱེད་རོགས།
very good
thank you very much
མགོ་ནས་ཕྲན་བུ་ཞིག་ཀློག་ཡིན།ཆ་ཚང་ཀློག་ཐུབ་མ་སོང་སྟེ་རིང་བོ་རིང་བོ་བྲིས་པས་སོ།ཨོ་ཟི་ཡོད་པ་འདྲ།
འགར་ཚེ་རྒྱལ་གྱིས་གསུངས་པ་ནི་ཇི་འདྲའི་རྨད་དུ་བྱུང་བའི་ལེགས་བཤད་ཅིག་རེད་ཨང་། དངོས་གནས་ང་ཚོ་བོད་མི་རྣམས་ནི་ཀ་ཁའི་མགོ་སྔ་སྒྲིག་ནས་རྩོམ་འཆལ་ཞིག་འབྲི་མཁན་དག་ལ་ཤེས་ཡོན་པ་དང་མཁས་དབང་གི་ཆོ་ལོ་སྩོལ་ལ་མཉེས་པ། ཁོང་ཚོས་ཀྱང་ཅི་མི་སྙམ་པར་ཆོ་ལོ་དེ་རང་ཉིད་ཀྱི་སྐེ་ལ་བཏགས། མགོ་ལ་གྱོན་ནས་ཤེས་ཡོན་གྱི་གཏིང་ཟབ་ས་ཤིག་ལ་འཇུས་ཏེ་སུས་ཀྱང་མ་རྟོགས་པ་ཞིག་རང་ཉིད་ཀྱིས་མཁྱེན་ཡོད་ཁུལ་བྱེད་མཁན་ནི་རང་རེའི་སྤྱི་ཚོགས་ན་མང་སྐྱོན་མ་གཏོགས་ཉུང་སྐྱོན་མེད་པའི་ཚོད་དུ་སླེབས་ཡོད།
ཁོ་བོའི་རྩོམ་ཡིག་ཀློག་མ་ཐུབ་པས་ཟེར་བ་མིན། སྤྱིར་རྩོམ་ཡིག་གང་དང་གང་ཡིན་ན་རིང་པོ་རྣམས་ཀློག་འདོད་མེད་མཁན་ཚོ་ནི། དྲ་ཐོག་ནས་ཉི་མ་བསྐྱལ་ཐུབ་ཀྱིས་བལ་ཅོལ་དང་ངག་ཀྱལ་རིགས་ལ་མགོ་འཁོར་ནས་བསྡད་ཡོད་མཁན་ཚོ་ཡིན་རྒྱུ་རེད། རྩོམ་ཡིག་རྒྱས་བསྡུས་ནི་རྩོམ་མཁན་ཁོ་རང་གི་གླེང་འདོད་དང་འབྲེལ་བ་ཡོད་པ་ཞིག་ཡིན་སྟབས། སྐབས་རེ་རིང་པོ་འབྲི་དུས་ཡོད་ལ། སྐབས་རེ་ཐུང་ཐུང་འབྲི་དགོས་དུས་ཡོད། འབྲི་འདོད་པ་ཞིག་བཙན་གྱིས་བསྡུས་འབྲི་བྱས་ན་རྩོམ་མཁན་ལ་ཕངས་སེམས་སྐྱེ་སྲིད་ལ། འབྲི་ཡུན་མེད་པ་ཞིག་བཙན་གྱིས་རྒྱས་འབྲི་བྱས་ན་ཚིག་ཉོག་ཏུ་འགྲོ་སྲིད། དེའི་ཕྱིར་རྩོམ་ཡིག་རྒྱས་བསྡུས་དེ་ཀློག་མཁན་གྱིས་ཐག་གཅོད་ཐུབ་པ་ཞིག་མ་རེད།
ཡང་དྲ་ཐོག་གི་རྩོམ་ཡིག་ཐུང་དགོས་ནི་རེད་ཟེར་ན། དེ་ཡང་དྲ་རྒྱའི་ཤོང་ཚད་དང་ཁྱད་གཤིས་སོགས་དང་བསྟུན་དྲ་རྒྱ་དེ་གནས་སྐབས་ཀྱི་གླེང་མོལ་བྱེད་ས་ཞིག་མིན་ན་རྩོམ་ཡིག་གི་རིང་ཐུང་གང་འདྲ་ཞིག་བྲིས་པ་ཡིན་ན་འགྲིག་གི་རེད་བསམ། དྲ་ཐོག་ནས་ཁོ་བོའི་རྩོམ་ཡིག་རིང་དྲགས་ནས་ཀློག་འདོད་མེད་ཚོ་སུན་པོ་བཟོས་སོང་བས་ཞོར་དུ་དགོངས་དག་ཞུས་པ་ཡིན།
འགར་ཚེ་རྒྱལ་གྱིས།
ཡོད་སྨོན་ཤོར་སོང། མུ་འཐུད་ནས་བྲིས། ཀློག་གི་ཡིན། རིང་ན་དེ་ལས་བཟང་། རྒྱུ་མ་རིང་ན་ཟ་རྒྱུ་ཡོད། གཏམ་་རིང་ན་གོ་རྒྱུ་མང་ཟེར་ནི་རེད།
མགར་ལགས་ཁྱེད་ཀྱིས་ངའི་དྲི་བ་ལ་ལན་མེད་པ་འདི་ཅི་ཡིན།
བྱ་ཁྲ་བསོད་ནམས་ལགས་སུ།
སྐུ་ཉིད་ཀྱིས་ཁོ་བོས་གཙོ་གནད་དུ་བཟུང་བའི་བརྗོད་བབ་ཀྱི་ངོས་ནས་མ་བལྟས་པར་ཕྱོགས་གཞན་ཞིག་གི་སྣེ་ལ་འཇུས་ཏེ་དཔྱད་ལན་ཞིག་བཞག་ཡོད་སྟབས། ཁོ་བོ་ནམ་རྒྱུན་དཔྱོད་མ་ཤེས་པར་གང་བྱུང་གི་གཏམ་གླེང་སྤེལ་མཁན་ཚོའི་མཉམ་དུ་ཚིག་བརྗོད་སྤེལ་རེས་བྱེད་པའི་སྤྲོ་བ་མེད་མཁན་ཞིག་ཡིན་པས། ཉིད་ཀྱང་དེ་འདྲ་ཞིག་ཡིན་རྒྱུ་རེད་བསམ་ནས་ལན་མི་ལྡོན་པར་བཏང་སྙོམས་སུ་འཇོག་དགོས་བསམ་སོང༌། འོན་ཀྱང་སྐུ་ཉིད་ཀྱིས་བསྐྱར་དུ་དྲི་བ་ལ་ལན་མེད་པ་འདི་ཅི་ཡིན་ཞེས་ནན་ཅན་དུ་བརྗོད་ཡོད་སྟབས། སྐུ་ཉིད་ནི་ཤེས་ཡོན་གླེང་བརྗོད་ཀྱི་ཕྱོགས་ལ་སྤྲོ་མོས་ཡོད་མཁན་ཞིག་ཡིན་པར་འདོད་དེ་བསམ་ཚུལ་ཐུང་ངུ་གླེང་བ་ཡིན།
ཤེས་ཡོན་དང་ཤེས་ཡོན་པ་ངོས་འཛིན་བྱེད་སྟངས་ཉིད་ཀྱི་དམིགས་གཏད་བསམ་ཕྱོགས་དེ་བཞིན་ཁོ་བོའི་བསམ་བློ་རྗེས་ལུས་རེད་ཟེར་བ་དེ་ནི་མི་སོ་སོར་རང་ཉིད་ཀྱི་གཤིས་བབ་ལ་དཔག་པའི་བསམ་ཚུལ་རེ་ཡོད་སྟབས་ཉིད་ཀྱིས་བརྗོད་རུང་བ་ཞིག་རེད། ཁོ་བོས་འབོལ་རྩོལ་དེར་ད་ལྟའི་འུ་ཚོའི་མི་རབས་གསར་པ་ཚོས་ཤེས་ཡོན་སློབ་སྦྱོང་བྱེད་པའི་ཡུན་ཚད་དང༌། དེ་ལ་དཔག་པའི་ཤེས་ཡོན་པ་ཟེར་བའི་མིང་ཐོབ་བཀོལ་སྤྱོད་བྱེད་ཀྱིན་ཡོད་པ་དེ་ལྟར་གྱིས་འུ་ཚོའི་མི་རབས་གསར་པས་ཤེས་བྱ་ཡོན་ཏན་གཏིང་ཚུགས་པ་ཞིག་སྦྱངས་གཉེར་བྱེད་ཐུབ་ཀྱི་མེད་པ་དང༌། ཤེས་ཡོན་པ་ཟེར་བའི་མིང་ཐོབ་དེ་ཡང་རང་སྟེང་ལ་འབྱོར་བའི་ཤེས་ཡོན་ཉི་ཚེ་བ་དེ་ལ་དཔག་ན་ཁྱབ་རྒྱ་ཆེ་དྲགས་ཡོད་པའི་གནད་དོན་གྱི་སྐོར་ནས་བསམ་ཚུལ་ཙམ་གླེང་ཡོད་པ་ལས། ཤེས་ཡོན་དང་ཤེས་པར་ངོས་འཛིན་དང་ཚད་གཞི་འཛིན་སྟངས་ཀྱི་ཐད་ནས་ཁོ་བོས་གནད་བཟུང་གིས་གླེང་མེད།
ཉིད་ཀྱིས་ཟུར་ཞིག་ནས་སྣེ་བཟུང་གིས་གིས་༼ཤེས་ཡོན་དང་ཤེས་ཡོན་པ་ཟེར་བ་འདི་དུས་རབས་དང་མཐུན་པའི་འགྲོ་བ་མིའི་སྤྱི་ཚོགས་ཀྱི་དགོས་མཁོ་དང་ལྟོས་ནས་འཇོག་ཐུབ་ན་བཟང་༽ཞེས་པ་དེ་ཁོ་བོའི་བསམ་ཕྱོགས་ཀྱི་གཞོགས་ཤིག་དང་མཐུན་གྱི་ཡོད་ནའང༌། ཁོ་བོས་བརྒྱ་ལ་དེ་ལྟར་ངོས་འཛིན་མི་བྱེད་ཟེར་རྒྱུ་ཡིན་ལགས།
གླེང་ཕྱོགས་བརྗོད་བབ་མ་བདེ་བར་ཕོག་ཐུག་རེ་བཟོས་ཡོད་ན་དགོངས་དག་ཞུ་རྒྱུ་ཡིན།
འགར་ཚེ་རྒྱལ་གྱིས།
འགར་ཚེ་རྒྱལ་ལགས། ཁྱེད་ཀྱིས་ངའི་དྲི་བ་ལ་ལན་གནང་བ་ཙམ་མ་ཟད་། གནང་སྟངས་དེ་ཡང་ཞི་ཞིང་དུལ་བའི་ཀུན་སྤྱོད་ཀྱི་ཐོག་ནས་གནང་སྟངས་དེར་ང་རང་སེམས་གཏིང་ནས་ཡིད་མོས་སྐྱེས་སོང་། ཁྱེད་ཀྱི་ཀུན་སྤྱོད་ལ་བསྔགས་བརྗོད་དང་ལན་བསྐྱོན་པར་ཐུགས་རྗེ་ཆེ་ཞུ་རྒྱུ་ཡིན། ཁྱེད་ཀྱིས་སྐུ་ཉིད་ནི་ཤེས་ཡོན་གླེང་བརྗོད་ཀྱི་ཕྱོགས་ལ་སྤྲོ་མོས་ཡོད་མཁན་ཞིག་ཡིན་པར་འདོད་དེ་བསམ་ཚུལ་ཐུང་ངུ་གླེང་བ་ཡིན། ཟེར་བ་འདི་དངོས་གནས་བདེན་པ་རེད། ངས་རང་མི་རིགས་ཀྱི་མགོ་བོ་གྱེན་དུ་འདེགས་ཐུབ་པའི་གནས་སྟངས་དེའི་འོག་ནས་བསམ་ཞིབ་མང་པོ་བྱས་པའི་གྲུབ་དོན་དུ་ངེད་ཅག་བོད་མི་རིགས་ཀྱིས་དུས་རབས་འཕོ་འགྱུར་དང་མཐུན་པའི་འགྲོ་བ་མིའི་སྤྱི་ཚོགས་ཀྱི་དགོས་མཁོར་ལྟོས་ནས་ཤེས་ཡོན་དང་ཤེས་ཡོན་པ་ངོས་འཛིན་མ་ཐུབ་པར་བརྟེན་ནས་ཉེས་པ་འདི་ཕོག་པ་མིན་ན་སྙམ། སྤྱིར་གཞུང་ལུགས་ཁག་གི་འགྲེལ་བ་ལྟར་ཤེས་ཡོན་དང་ཤེས་ཡོན་པ་ཟེར་བ་འདི་མང་པོ་ཞིག་ལ་གོ་ཆོག་ནའང། འཇིག་རྟེན་པའི་སྤྱི་ཚོགས་ཤིག་གི་ངོས་ནས་བཤད་ན་འདི་འདྲ་ཞིག་ལ་ཤེས་ཡོན་དང་ཤེས་ཡོན་པ་ངོས་འཛིན་མ་བྱས་ན། ཁ་བདེ་མགོ་བདེ་ཚང་མ་ཤེས་ཡོན་ཅན་གྱི་གྲལ་དུ་ཚང་སྟེ་ཤེས་ཡོན་ཅན་ངོས་འཛིན་མི་ཐུབ་པའི་གནས་སྟངས་འདི་བྱུང་བ་རེད།
མི་ཁོ་བོས་བལྟས་ན་ཤེས་ཡོན་ཟེར་བའི་བརྡ་ཆད་ནི་ཤེས་བྱ་རིག་པའི་ཡོན་ཏན་ཟེར་བའི་བསྡུ་ཚིག་ཡིན་པ་འདྲ། མགར་ཚེ་རྒྱལ་གྱིས་ཡག་པོ་བྲིས་འདུག བསླབ་པ་གསུམ་གྱི་ཡོན་ཏན་ནི་སྐྱ་སེར་ལ་དབྱེ་བ་མེད་པར་ཀུན་ལ་ཚང་དགོས་པ་དང། དེའི་ནང་གི་ཤེས་རབ་ནི་ཤེས་ཡོན་ལ་གོ །ཚུལ་ཁྲིམས་ནི་རང་ཚུགས་ཐུབ་པ་ལ་གོ །ཏིང་ངེ་འཛིན་ནི་བརྟན་པ་ལ་གོ་ལགས། མགོན་པོ་ཀླུ་སྒྲུབ་ཀྱིས། མཐོང་དང་མ་མཐོང་ཡོན་ཏན་ནི།།ཀུན་གྱི་རྩ་བ་ཤེས་རབ་ཡིན།།ཞེས་གསུངས་པ་ལྟར་གོ་བ་ལེན་དགོས་པ་མང་པོ་ཡོད།