ཁྲག་ཐིགས།
ད་ལོའི་གོང་ས་མཆོག་ནས་སྐུ་ཉིད་བགྲེས་ཡོལ་ཆ་ཚང་གནང་བའི་དམིགས་བསལ་གྱི་གསུང་འཕྲིན་འདིས་བོད་གཞུང་དམངས་གཙོས་རྒྱལ་གཅེས་སྤྱི་ཚོགས་ཀྱི་གསར་ལམ་ཁག་ལ་གླེང་སློང་མི་ཉུང་བ་ཞིག་བསླངས་ཡོད། དེ་དག་ལས་དྲང་འཁྱོགས་ཅི་རིགས་སྒོས་འགྲེལ་བཤད་སྣ་ཚོགས་ཤིག་རྒྱག་གིན་འདུག་ལ་ལྷག་པར་དུ་བཙན་བྱོལ་སྤྱི་ཚོགས་ལས་གླེང་སློང་ཤུགས་ཆེན་ཞིག་བྱེད་གྱིན་འདུག དེ་འདྲའི་གླེང་སློང་དེ་ཡང་རང་བཙན་གྱི་ལྟ་བ་ཁྱེར་བའི་ཕྱོགས་གཅིག་དང་ལམ་དབུ་མའི་ལྟ་བ་ཁྱེར་བའི་ཕྱོགས་ཁག་གཉིས་ནས་གོང་ས་མཆོག་བགྲེས་ཡོལ་ཏུ་ཕེབས་ན་བོད་གཞུང་དམངས་གཉིས་ཀར་དགེ་མཚན་ཅི་ཡོད་དང་གོད་ཆག་ཅི་འབྱུང་གི་རྩོད་གླེང་སྣ་ཚོགས་ཤིག་བྱེད་གྱིན་འདུག་མོད་ཐེངས་འདིའི་གོང་ས་མཆོག་གིས་བགྲེས་ཡོལ་གནང་བ་འདི་ལོ་རྒྱུས་ཀྱི་དཀྱོགས་མཚམས་གལ་ཆེན་ཞིག་ ཏུ་གྲུབ་འདུག་པ་གདོན་མི་ཟ།
བཙན་བྱོལ་སྤྱི་ཚོགས་ཀྱི་མི་ལོ་ལྔ་བཅུའི་བཞུད་ལམ་ལ་ཕྱི་མིག་ཅིག་འཕངས་བ་ཡིན་ན་གཞུང་དམངས་གཉིས་ཀའི་སྒེར་ངོས་ནས་འཁྱར་འཁྱོར་གྱི་རྐང་རྗེས་ཙམ་མ་གཏོགས་རང་སྐྱ་འཕེལ་བ་ཞིག་དང་རང་ལྕོག་ཐུབ་པའི་གོམ་པ་ཞིག་ནམ་ཡང་སྤོས་མྱོང་མི་འདུག དཔེར་ན་གཡས་གཡོན་ནས་བརྡོལ་བའི་སྣོད་ཁ་ཞིག་ལྟར་སྐུ་ཉིད་ནས་གཟིགས་ཞིབ་དང་ལྷན་པ་རེ་རྒྱབ་མེད་ཚེ་དེ་ལས་ཆུ་སྐྱོར་བའི་དུས་སྐབས་ཤིག་ཀྱང་ནམ་ཡང་ཡོད་མི་སྲིད་ཕྱིན་ཐེངས་འདིའི་སྐུ་ཉིད་ཀྱི་བགྲེས་ཡོལ་འདིས་བོད་གཞུང་དམངས་གཉིས་ཀར་ནར་སོན་པའི་གོ་སྐབས་བཟང་པོ་ཞིག་བྱིན་པའང་ཡིན་འདུག སྐུ་ཉིད་ནས་ཀྱང་འཕྲལ་ཕུགས་ཀྱི་དངོས་དོན་ཅི་རིགས་གཟིགས་པའི་སྒོས་ནམ་རྒྱུན་ངེད་ཅག་ལ་གསུངས་དོན་ཁྱེད་ཅག་གིས་རྒྱལ་བ་རིན་པོ་ཆེ་མེད་བསམ་པའི་ངང་གཞུང་འདིའི་སྒྲིག་འཛུགས་དང་འཛིན་སྐྱོང་གི་ཐད་ལ་ལས་དོན་སྒྲུབ་རྒྱུ་གལ་ཆེན་པོ་འདུག་ཅེས་ཡང་དང་བསྐྱར་ཏུ་བཀའ་སློབ་གནང་བ་འདིས་ཀྱང་མཚོན་ནུས། ཡིན་ཡང་། ངན་པ་ལང་ཤོར་ཟེར་བའི་དཔེ་ལྟར་གཞུང་ཞབས་དང་དམངས་ངོས་ནས་བཙན་བྱོལ་གཞུང་འདི་དཀའ་ཉོག་གང་དང་འཕྲད་ཡང་རྒྱལ་བ་རིན་པོ་ཆེའི་ཕྲག་ཏུ་འགལ་རྒྱུ་ལས་དེ་དག་ལ་རང་ནུས་སྒོས་ཐག་གཅོད་བྱེད་པའི་འགན་ཁུར་གཙང་མ་ཞིག་ནམ་ཡང་ཁུར་མ་མྱོང་། དེའི་ཕྱིར་རྒྱལ་བ་རིན་པོ་ཆེ་སྐུ་འཚོ་བཞུགས་ཐོག་ངེད་ཅག་གིས་རང་ནུས་རང་ལྕོག་གི་ནུས་པ་ཞིག་དང་རང་འགན་རང་འཁུར་གྱི་བསམ་བློའི་རྨང་གཞི་བརྟན་པོ་ཞིག་རེ་བ་བཟང་ས་ནས་དང་གྲྭ་སྒྲིག་སྡུག་ས་ནས་བྱོས་ཟེར་བའི་དཔེ་བཞིན་བྱེད་དགོས་རྒྱུ་ནི་གནད་གལ་ཏུ་མི་འདུག་གམ
ཁ་ཤས་ཤིག་ནས་རྒྱལ་བ་རིན་པོ་ཆེ་བགྲེས་ཡོལ་ཏུ་ཕེངས་པ་ཡིན་ན་འཕྲད་སྲིད་པའི་ཉེན་ཁ་མང་པོ་ཞིག་འཆད་ཀྱིན་འདུག་མོད་དེ་ནི་འཕྲད་སྲིད་པར་གདོན་མི་ཟ་བ་སྟེ་ལོ་ངོ་འདི་དག་གི་རིང་སྐུ་ཉིད་ནས་ཆོས་སྲིད་གཉིས་ཀྱི་ཐད་ལ་ལམ་སྟོན་དང་འགན་མི་ཉུང་བ་ཞིག་བླངས་ཡོད་པས་ཡིན་འདུག དེ་བས་ངེད་ཅག་གིས་བཙན་བྱོལ་འདིའི་འབྱུང་འགྱུར་ལ་བསམ་ཞིབ་བྱེད་དགོས་པ་ཞིག་སྟེ་སྐུ་ཉིད་ནས་བཙན་བྱོལ་འདིའི་དུས་གསུམ་ལ་གཟིགས་ཞིབ་མ་བྱས་ཀྱང་རང་ཅག་ནས་འགན་ཁུར་ཐུབ་པའི་དུས་སྐབས་ཤིག་གི་འཆར་གཞི་ད་ནས་གཏོང་དགོས གལ་སྲིད་རྒྱལ་བ་རིན་པོ་ཆེ་མ་བཞུགས་པའི་ཉིན་མོ་ཞིག་ལ་ད་དུང་བོད་གཞུང་དམངས་གཉིས་ནས་རྒྱལ་རི་འཚོལ་དགོས་ན་དེ་ནི་ཉེན་ཁ་འཚོལ་བའི་བྱ་སྤྱོད་ཅིག་ལས་གཞན་ཅི། དེའི་ཕྱིར་བོད་གཞུང་མང་གཉིས་ནས་སྐུ་ཉིད་ཀྱི་བགྲེས་ཡོལ་འདི་རྒྱུ་བྱས་ནས་སྙིང་ལ་རུས་པ་བཅུག་ནས་མདུན་དུ་བསྐྱོད་རྒྱུ་ལས་བློ་ཚབ་སྒོས་གཡས་གཡོན་ལ་མིག་རིག་རིག་བྱེད་དགོས་བ་ཞིག་མི་འདུག། ཡང་གཅིག་བཤད་ན་འདི་ནི་བོད་གཞུང་དམངས་གཉིས་སྒེར་ཚུགས་ངང་གོམ་ཁ་དང་པོ་སྤོ་བའི་སྔོན་འགྲོ་ཞིག་དང་བཙན་བྱོལ་གཞུང་གི་དམངས་གཙོ་དེ་ཉིད་འཛམ་གླིང་ལ་ཡང་བསྐྱར་གསལ་སྟོན་ཞིག་གམ ཡང་ན རྒྱ་ནག་དམར་བོའི་གཞུང་ལ་བོད་གཞུང་དམངས་གཉིས་ནས་ཟིལ་ཤུགས་ཤིག་ངོམ་དུ་འཇུག་ཆེད་འང་ཡིན་འདུག
(ཚང་མས་ཁ་བྱང་འདི་ཀློག་ཡོང་དུས་དགོད་བྲོ་ཅིག་དང་ཅི་ཞིག་འཆད་ཀྱིན་ཡོད་བསམ་མོད་མི་སུ་ཞིག་ཡིན་རུང་ནར་སོན་པ་ནས་རང་ལྕོག་ཐུབ་པའི་སྐབས་དེར་ཕ་མས་སློབ་གྲྭར་གཏོང་རྒྱུའི་འཆར་གཞི་འགོད་ལ་དེ་དུས་རང་ཉིད་ཀྱང་སློབ་གྲྭར་འགྲོ་བའི་དུས་སྐབས་ཡག་ཤོས་ཤིག་དང་རང་གི་མི་ཚེ་ལ་དབུ་ཁྱུད་ཐོག་མ་འབྲི་བའི་དཀྱོགས་མཚམས་ཁྱད་པར་ཅན་ཞིག་ཏུ་ཁེལ་འདུག་པས་ད་ནི་བོད་གཞུང་དམངས་གཉིས་ཀྱང་ནར་སོན་ནས་རང་ཉིད་ལ་རང་གིས་རུས་རྐང་ཞིག་འཚོལ་དགོས་ཕྱིན་སློབ་གྲྭར་འགྲོ་རན་འདུག་ཅེས་པའོ།)
ཡིག་ཆུང་འདི་ཡིག་ཟམ་སྟེང་བསྐུར་ཡོད་མོད་བཀོད་མི་འདུག་འདིར་མཆན་བུ་དུ་བཀོད་པའོ།
བོད་གཞུང་དམངས་གཉིས་ཀ་སློབ་གྲྭར་བཏང་བ་ཡིན་ན་དགེ་རྒན་ནི་ཁྲག་ཐིག་གིས་གནང་རྒྱུ་ཡིན་པ་ཐེ་མི་ཚོམ།
ཁྲག་ཐིགས་ཟེར་བའི་མིང་འདི་རྩུབ་པ་ལ། མིང་སྙན་ཙམ་འདོག་དང་།
མིང་འདི་ལས་སྙན་མོ་ཞིག་གནམ་སའི་བར་མཚམས་གང་དུ་འཚོལ་རྒྱུ་མི་འདུག་ལ་བརྐོ་རྒྱུ་འང་མི་འདུག
ཁྲག་ཐིགས་ཀྱི་རྩོམ་དེ་དག་ཀླགས་ཡིན་ཡག་པོ་འདུག
ངོ་མ་མེ་ཏོག་ལགས་ཀྱིས་གསུངས་པ་བཞིན།
དེང་སང་མི་འདི་ཚོས་དེབ་དང་རྩོམ་ཡིག་སྨྱུག་མིང་ལས་སོགས་སུ་འཇིགས་སུ་རུང་པའི་མིང་བྱང་སྦྱར་སྲོལ་ཞིག་འདུག
ང་ཚོས་མིང་འདོགས་པའི་ཚེ་ན་འདྲ་བ་དང་འབྲེལ་བ་རྒྱུ་མཚན་དུ་བྱས་པའི་མིང་ཞིག་ངེས་པར་དུ་ཡོད་དགོས།
དཔེར་ན་དེབ་ཞིག་ལ་ཆ་བཞག་ན།་
མིང་བྱང་ཙམ་ལ་བརྟེན་ནས་ནང་དོན་ཡོངས་སུ་རྫོགས་པ་ཞིག་དབང་རབ་པ་རྣམས་ལ་འཆར་ཐུབ་པ་ཞིག་དང་དབང་འབྲིང་དང་དབང་ཐ་རྣམས་ལའང་དེ་དང་དེ་ཡིན་གྱི་མཚན་ཉིད་ཅིག་བློར་རགས་ཙམ་ཞིག་སྐྱེ་ངེས་ཡིན།
འོན་ཀྱང་ཁྲག་ཐིགས་ཞེས་པ་ལའང་གོ་དོན་ལོས་ཡོད།
མེ་ཏོག་དཀར་པོ་ལགས་ཁྱེད་ཀྱི་མཚན་འདོགས་པ་པོར་ཁོང་ལའང་མཚན་ཞིག་ཞུ་རོགས།
ཨ་ལགས་སྐུ་རྩེད་ཞུས་ཡིན།
གྲོགས་པོ་ཁྲ་ཐིགས་ལགས། ངེད་ཅག་མི་ལོ་ལྔ་བཅུའི་རིང་མགོན་པོ་ཁོང་ཉིད་ཀྱི་བཀའ་སློབ་ལམ་སྟོན་འོག་སློབ་གྲྭར་འགྲིམས་ཏེ་སློབ་གཉེར་གནང་བ་འདི་ད་གཟོད་རྒྱུགས་སྤྲོད་བའི་དུས་ལ་སླེབས་པ་རེད་ཟེར་ན་གང་འདྲ་འདུག ཏོག་ཙམ་གོ་རྒྱུ་ཆེ་བ་མི་འདུག་གམ།
བོད་གཞུང་དམངས་གཉིས་རྒས་ཡོལ་དང་། དུར་ཁང་ལ་འགྲོ་བའི་དུས་ཚོད་ལས་སློབ་གྲྭར་འགྲོ་དགོས་དོན་གང་ཡོད་དམ། སློབ་གྲྭར་ཕྱིན་ཚར་བ་དེ་ཚོས་བོད་གཞུང་གིས་འཛིན་སྐྱོང་དང་། གཞན་པ་ཚོས་དམངས་བྱས་ནས། བཙན་བྱོལ་སྒྲིག་འཛུགས་སྲ་ཐག་ཐག་གིས། གཞོན་སྐྱེས་ཚོ་སློབ་གྲྭར་གཏོང་དགོས་པའི་དུན་ཚོད་ལ་སླེབས་ཚར་རེད་དོ། །
མི་ལོ་འདི་དག་གི་རིང་ལ་བོད་གཞུང་དམངས་གཉིས་ཀ་དམར་འབྱར་གྱི་ཕྲུ་གུ་ཞིག་ལྟར་ཏྰ་ལས་བླ་མ་མཆོག་ནས་ནམ་ལངས་ན་ས་རུབ་ན་སྐུ་ཉིད་ཀྱིས་བདག་སྐྱོང་འོག་ད་ལྟའི་འདི་འདྲའི་གནས་སུ་ཕྱིན་འདུག་ཕྱིན་ད་ནི་བོད་གཞུང་དམངས་གཉིས་ཀས་ཀྱང་རང་ཉིད་ཀྱི་མདུན་ལམ་དང་བདེ་སྡུག་གི་ཆེད་དུ་སློབ་གྲྭར་འགྲོ་དགོས་པ་མ་ཡིན་ནམ།
སློབ་གྲྭར་མ་རེད། མ་འཇོན་པ་རྣམས་རྩ་དགོངས་དང་། འཇོན་མཁན་ཚོ་ངར་བའི་དུས་ཚོད་རེད། སློབ་གྲྭ་མང་ཆེ་བ་དང་པོ་ཉིད་ནས་རྗེས་ལུས་ཐེབས་ཟིན་པ་ལ། རྒད་པོ་རྒད་མོས་ཅི་བྱར་ཡོད། སློབ་གྲྭར་ཕྱིན་ནས། རྩེད་མོ་ཡིན།
གྲོགས་པོ་ལགས། སློབ་གྲྭར་འགྲོ་རན་འདུག་ཟེར་བ་ཐད་གར་དུ་གོ་བ་མི་ལེན་པར་ཞུ། ངའི་སྒང་ནས་དེ་ལ་མཆན་ཡང་བཀོད་ཡོད།
གྲོགས་པོ་ལགས། ཁྱེད་ཀྱིས་མཆན་བཀོད་ཡོད་ཟེར་བ་འདི་བདེན་པ་རེད། ཁྱེད་ཀྱིས་ཀྱང་དོན་དེ་ལ་ཐ་སྙད་འདི་འཇུག་མི་བདེ་བར་བརྟེན་ནས་མཆན་ཞིག་བཀོད་འདུག ངས་ཀྱང་སློབ་གྲྭ་ཞེས་པའི་ཐ་སྙད་འདིའི་སྤྱི་ཡོངས་ཀྱི་གོ་བ་ལྟར་ན། དོན་འདི་ལ་འཇུག་མི་བདེ་སྟབས། འདི་ལྟར་གནང་ན་ཞེས་གྲོས་འདེབས་པ་རང་ཡིན།
བོད་གཞུང་དམངས་གཉིས་ཀས་ད་ནས་བཟུང་བྱིས་པ་ཞིག་ལྟར་ཐོག་མར་སློབ་གྲྭར་འགྲིམ་པ་ལྟ་བའི་རྨང་གཞི་འཛུག་དགོས་ནི་རེད། ད་བར་དུ་ཏྰ་ལའི་བླ་མའི་ཐུགས་བསྐྱེད་འོག་གཞུང་དམངས་གཉིས་ནས་རང་འགན་གཙང་མ་ཞིག་ཁུར་མྱོང་མེད་པས་ད་ནས་རང་ལྕོག་ཐུབ་པ་ཞིག་དགོས་ན་སྲོག་ཤིང་བརྟན་པོ་ཞིག་འཛུགས་དགོས་པ་མ་ཡིན་ནམ། གཞན་ཡང་གཞུང་ཞབས་ཁ་ཤས་ཤིག་ལ་བཤག་བཅོས་ཐེངས་ཤིག་བྱེད་དགོས་མོད་དེ་ད་དུང་དུས་ལ་བབས་མི་འདུག་གི ངས་བཀོད་པའི་མཆན་དང་པོ་དེ་སྤྱིར་ན་རྩོམ་ཡིག་འདིའི་མགོར་བཀོད་ནས་ཁ་བརྡ་ཚང་ལ་བསྐུར་མོད་ཁོང་ཚོས་མ་བཀོད་ཕྱིན་ད་ནི་ལྷན་པ་ལྟ་བུ་ཞིག་ཆགས་འདུག་མོད་སྐྱོན་མི་འདུག
གྲོགས་པོ་ལགས། སྐུ་རྩེ་ཞུས་པ་ཡིན ང་ཚོ་བོད་རིགས་ཙམ་མ་ཟད་འགྲོ་བ་མི་ཐམས་ཅད་སངས་མ་རྒྱས་བར་མདུན་བསྐྱོད་མི་ཐུབ་པའི་ལོང་བ་ངང་ཚུལ་ཅན་ཞིག་ཡིན་སྟབས། ང་ཚོ་མ་འཆི་བར་ངེས་པར་སློབ་གྲྭར་འགྲོ་དགོས་ལ་སློབ་དཔོན་ཡང་ཡང་དག་ཞིག་ལ་བསྟེན་དགོས།