༅༅། །མཛའ་ཞིང་བརྩེ་བའི་ཆོས་ཀྱི་གྲོགས་པོ་རྔ་པ་རང་སྐྱོང་ཁུལ་སྤྱི་དང་ལྷག་པར་རྔ་པ་རྫོང་གི་སེར་སྐྱ་མི་མང་རྣམས་ལ་གསལ་འདེབས་ཞུ་རྒྱུར།
དེ་ཕྱོགས་སུ་ཛ་དྲག་གི་དོན་རྐྱེན་བྱུང་བར་བློ་འཚབ་ཚད་མེད་དང་འབྲེལ་ཤི་རྨས་སོང་བའི་ནང་མི་སྤུན་མཆེད་དང་བཅས་པར་ཐུགས་གསོའི་འཚམས་འདྲི་དང། གཤིན་པོ་རྣམས་སླར་ཡང་དལ་འབྱོར་གྱི་མི་ལུས་བཟང་པོ་ཐོབ་ནས་སངས་རྒྱས་ཀྱི་བསྟན་པ་རིན་པོ་ཆེར་མཇལ་བ། རྨས་མ་རྣམས་ཀྱི་ནད་གཞི་མྱུར་དྭངས། བཙོན་པ་རྣམས་ཁྲིམས་མུན་ལས་མྱུར་དུ་ཐར་བ། སེར་སྐྱ་མི་མང་བྱིངས་རྣམས་འཇིགས་སྐྲག་གི་སྡུག་བསྔལ་དྲག་པོ་འདི་ལས་མྱུར་དུ་ཐར་བའི་གསོལ་འདེབས་འཕྲིན་བསྐུལ་ཞུ་བ་དང་ཆབས་ཅིག་རེ་འདུན་ཞུ་རྒྱུར། ད་ལམ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དབུ་ཁྲིད་རྣམས་དང། ལྷག་པར་སི་ཁྲོན་ཞིང་ཆེན། རྔ་པ་རང་སྐྱོང་ཁུལ། རྔ་པ་རྫོང་བཅས་ཀྱི་འབྲེལ་ཡོད་ལས་བྱེད་རྣམས་ལ་དེ་ཕྱོགས་སུ་འཇིགས་བསྐུལ་དྲག་གནོན་དང་གཡོ་ཐབས་བསུན་གཙེར་གང་བྱུང་བྱེད་བཞིན་པ་འདི་དག་མྱུར་དུ་མཚམས་འཇོག་དགོས་པའི་རེ་འདུན་འདི་ནས་ཞུས་ཡོད། 
འབྲེལ་ཡོད་སེར་སྐྱ་མི་མང་རྣམས་འུ་ཐུག་ཐབས་ཟད་ཀྱི་གནས་སུ་གྱར་བས་རྒྱ་དམག་དང་གདོང་ཐུག་གིས་དྲག་གནོན་ཡོང་དང་ཡོང་བཞིན་པ་འདི་ནི་བཟོད་ཐབས་མེད་པ་ཞིག་ཡིན་ནའང་སྡུག་ཐོག་སྡུག་བརྩེགས་ཡིན་པར་དགོངས་པ་ཆེ་བཞེས་ཀྱིས་ལས་དོན་གང་བྱས་ཐམས་ཅད་འཚེ་མེད་ཞི་བའི་རྒྱ་ལས་མ་བརྒལ་བ་དང། ཡང་བསྐྱར་རྒྱ་དམག་དང་གདོང་ཐུག་དྲག་པོས་ཤི་རྨས་སླར་ཡང་མི་འབྱུང་བའི་ཐབས་སུ་རང་ངོས་ནས་བཟོད་སྒོམ་གྱིས་ཞི་འཇམ་དུ་འགྲོ་བའི་ཐབས་ལམ་ཞིག་མང་ཚོགས་ནས་བསྟེན་གང་ཐུབ་གནང་དགོས་པའི་རེ་འདུན་ནན་པོ་ཞུ་བཞིན་ཡོད་པ་ཡིད་འཇགས་གྱིས།
རྒྱ་གར་འཕགས་ཡུལ་ནས། ཀིརྟི་སྤྲུལ་མིང་པས། ཕྱི་ལོ་ ༢༠༡༡ ཟླ་ ༤ ཚེས་ ༡༣ ལ།
བྱང་ཆུབ་སེམས་པ་གང་ན་སུ་བཞུགས་པ།། དེ་དག་ཀུན་གྱིས་སྨོན་ལམ་མྱུར་འགྲུབ་ཤོག།
སྐྱབས་རྗེ་ཀིརྟི་རིན་པོ་ལགས་ཁྱེད་སྐུ་ངོ་མ་མིག་བཙུམས་ནས་རྔ་བ་ཡུལ་དུ་ཕེབས་པ་ཡིན་ན། མི་མང་གི་དགག་བར་ཆད་ཆ་ཚང་མ་སེལ་ཐུབ།
རྔ་པ་མི་མང་གི་སྙིང་སྟོབས་ཆེ། བླ་མ་ཀིརྟིའི་ཐུགས་རྗེ་ཆེ། བོད་དོན་ཐོག་ལ་ནུས་པ་ཆེ། ཆེ་གསུམ་འཛོམས་པ་ངོ་མཚར་ཆེ།
རྔ་བ་མི་མང་གི་སྡུག་བསྔལ་འདི་བོད་མི་མང་གི་སྡུག་བསྔལ་ཡིན། རྒྱུ་མཚན་བོད་མིའི་སྐྱིད་སྡུག་གི་ཆེད་དུ་འཐབ་རྩོད་བྱས་པ་ཡིན་པ་ལས། ས་ཁུལ་ཞིག་གི་བདེ་སྡུག་གི་ཆེད་དུ་ཡར་ལངས་བྱས་པ་མིན། ང་ཚོ་བོད་མི་ཡོངས་ཀྱིས་སྐྱིད་སྡུག་མཉམ་ཁུར་གྱིས་ཞུ་ཡིག་མཉམ་སྦྲངས་བྱས་དགོས་པའི་དུས་ཤིག་གོ