གཙང་བུས།
རྟེན་འབྲེལ་གྱི་རྒྱལ་མཚོའི་ནང༌།
ཡན་ལག་བཅུ་གཉིས་ཀྱི་རྦ་རླབས་རིམ་གྱིས་གཡོ།
བགྲང་བྱའི་གཉེར་མའི་བང་རིམ་དཔྲལ་ངོས་སུ་བབས།
ལང་ཚོའི་གངས་ལྷ་མེ་ཏོག་བུ་ཡུག་གསེབ་ཏུ་འཚང༌།
ལུས་སྟོབས་ཀྱི་ཟུངས་ཁྲག་དམར་པོ་ས་ལ་ཟགས།
ཆེས་སྙིང་ལས་གཅེས་པའི་དྲིན་ཅན་གྱི་ཨ་ཕ་ལགས།
ཁྱོད་ངེས་མེད་འཇིག་རྟེན་ཕྱི་མའི་སྨག་གིས་བསྟུམས་པའི་རྫ་འཕྲང་རིང་མོར་བགྲོད་ཉིན།
ངེད་མ་སྨད་རྣམས་ལ་ཕྱིར་ལྟོས་ཤོར་སོང་ངམ།
ཆེས་སྙིང་ལས་གཅེས་པའི་ཨ་ཕ་ལགས།
ཁྱོད་གྲོགས་མེད་གཅིག་པུ་གཤིན་རྗེའི་དམག་ཚོགས་ཀྱིས་བསྐོར་ཞིང༌།
མདའ་མདུང་མཚོན་གྱིས་ལུས་ལ་འབུགས་ཉིན།
ངེད་མ་སྨད་རྣམས་ལ་དྲན་སོང་ངམ།
བརྩེ་བའི་ཨ་ཕ་ལགས།
དཀར་ནག་ལས་འབྲས་ལ་གཟིགས་པོ་མིག་སྟོང་ལྡན་དེའི་མདུན་སར།
བུ་ཆུང་དཀར་པོའི་མགོ་བོ་སྨད་ཅིང༌།
ནད་པོའི་གད་རྒྱངས་ཀྱིས་རི་བོ་བསྙིལ་བཞིན།
མི་དགེ་ལས་ཀྱི་སྒྱེལ་བུ་ནག་པོ་རི་བོ་འབིགས་བྱེད་བཞིན་སྤོ་མཐོ་བ་དེ་ཁ་འབྱེད་ཉིན།
ངེད་མ་སྨད་རྣམས་ལ་འཁང་ར་རེ་སྐྱེ་སོང་ངམ།
བརྩེ་བའི་ཨ་ཕ་ལགས།
ངེད་མ་སྨད་རྣམས་ཀྱི་ཆེད་དུ་ཟ་མ་མྱོང་བའི་ཟས་སྣ་མང་ཡང༌།
ལས་མ་མྱོང་བའི་ལས་ཀ་ཅི་ཞིག་ཡོད་དེ་ཡོད་མི་སྲིད།
དེ་ཐམས་ཅད་ཀྱི་རྣམ་སྨིན་ནི་ཁྱོད་གཅིག་པུས་མྱོང་ལ།
ཁྱོད་གཅིག་པུའི་ལུས་སེམས་གཉིས་ཀྱིས་མྱོང་དགོས།
དྲིན་ཅན་གྱི་ཨ་ཕ་ལགས།
བུ་རུལ་ངས་ཅི་ཞིག་མ་ནུས་ལ།
ཅི་ཞིག་མ་ཐུབ།
ཡོད་པ་ནི་སྡུག་གི་མཆུ་མ་མིག་ཟུང་དུ་འཁོར་བ་དེ་ཡིན།
དྲིན་ཅན་གྱི་ཨ་ཕ་ལགས།
ངས་ཁྱོད་ལ་དགོངས་དག་ཞུ།
ཕ་ལུ་ལགས།
དགོངས་པ་དྭངས་རོགས་གནང༌། ང་ལ་ཡོད་པ་ནི་ཚིག་འདི་རེད་ལ།
ངའི་ནུས་པའང་འདི་ཙམ་རེད།
ཡབ་ཆེན་ལགས་་་་
ངས་འདི་ལྟར་གསོན་སྙིང་ལག་མགོར་བཟུང་ནས
ཁྱོད་ཀྱི་ལས་དབང་ལ་འཁང་ར་བྱས་ཀྱང་།
བདག་ལ་ཇི་ལྟར་སྡང་བ་ནི་འཇིག་རྟེན་ནག་པོའི་ཁ་དུག་ཚ་བོ་ཞིག་ལགས་་་་