རྨིག་སྒྲ།
ལོ་རབས་ལྔ་བཅུ་པའི་སྐེད་ཚིགས་ནས་ལོག་སྨོན་དུས་སུ་བརྡོལ་བའི་ཤ་ཁྲག་རུས་གསུམ་ལ་རྔམ་པའི་འབྱུང་པོ་རྒྱ་དམར་ྐླ་ྐློས་བོད་ཆོལ་གསུམ་ཁྱོན་ལ་ཤིན་ཏུ་གདུག་རྩུབ་ཆེ་བའི་དབང་ཤུགས་དྲག་པོས་བཙན་འཛུལ་བྱས་ཏེ་ལོ་ངོ་ཆིག་སྟོང་ལྷག་གི་རིང་མངོན་བྱོན་མཁས་ཁྲི་ཕྲག་གིས་འབད་འབུངས་ཀྱིས་གསར་གཏོད་དེ་ཤུལ་དུ་བཞག་པའི་བརྡ་སྤྲོད་ཀྱི་ནུས་པ་དང་། གཅིག་གྱུར་གྱི་རང་བཞིན། གོ་བདེ་དོན་ཟབ་ཀྱི་ལེགས་ཆ་དང་བཅས་གང་ཐད་ནས་མི་དམན་པའི་བོད་ཡིག་དེ། རྒྱུ་མཚན་མེད་པར་ཝ་སྐྱེས་སེང་གེར་རློམ་མཁན་གྱི་རང་འདོད་ལྟར་རྩེད་མོ་རྩེས་ནས་རིག་གཞུང་དེ་དག་ཐམས་ཅད་རྨོངས་དད་དང་རྗེས་ལུས་ཀྱི་རིགས་སུ་བརྩིས་ཏེ་འགོ་ནད་བཞིན་དུ་རྩ་མེད་བཟོ་ཐབས་བྱས་པ་མ་ཟད་རང་མི་རིགས་ཀྱི་ལ་ཞེན་རྒྱ་དངུལ་དང་བརྗེ་བོ་བརྒྱབ་མཁན་རང་རིགས་མི་ཉུང་བ་ཞིག་གིས་ཀྱང་རང་གི་རིག་གཞུང་ལ་དམའ་འབེབས་དང་ཁྱད་གསོད་བྱས་ཏེ་མི་རིགས་ཀྱི་ངོ་བོ་མཚོན་བྱེད་ཀྱི་སྐད་ཡིག་འདི་ཡང་རྗེས་ལུས་ཡིན་པའི་འཆལ་གཏམ་གྲངས་ཀྱིས་མི་ལངས་པ་སྤེལ་ཡོད། རང་རེའི་ཆོས་རིག་ལྟག་ཆུ་ཆད་པའི་རྫིང་པོ་ཇི་བཞིན་གྱུར་བའི་དུས་རབས་གོང་མའི་ནང་སློབ་དཔོན་ཁྱེད་ཀྱིས་རང་གི་མི་རིགས་ལ་བཅངས་པའི་བཅོས་མིན་གྱི་ལྷག་བསམ་དང་ལ་རྒྱ། གདུང་ཞེན་སོགས་ཀྱི་མ་བཟོད་པར་ཡ་ང་བའི་དུས་ཀྱི་དཀྱོག་མཚམས་ཆེན་པོ་དེའི་ནང་ངལ་དུབ་བརྒྱ་ཕྲག་ལྷུར་བཞེས་གནང་སྟེ་ཉིད་ཀྱི་རླབས་ཆེན་དགོངས་པའི་ྐློང་ཡངས་ལས་ཕྱག་དེབ་མང་པོ་བློ་གསར་དོན་གཉེར་ཅན་གྱི་མིག་ལམ་དུ་བཤམས་ཡོད། དེ་ཡང་བསམ་ངན་སྦྱོར་རྩུབ་ཤིན་ཏུ་ཆེ་བའི་བསྟན་དགྲ་རྒྱ་དམར་གྱིས་བཀོལ་སྤྱོད་འོག་ཡབ་མེས་ཀྱི་ཆོས་དང་སྐད་ཡིག་དྭངས་མ་ཞིག་ནམ་ཡང་ཐོས་ས་མེད་པའི་ཡ་ང་བའི་དུས་ངན་དེར། རིག་གཞུང་བཟང་པོ་འདི་ཉིད་མི་ཉམས་རྒྱུན་འཛིན་དང་ཡར་རྒྱས་གོང་འཕེལ་སླད་དུ་ཐབས་མཁས་པའི་རྣམ་དཔྱོད་རྩལ་ལས་ཚིག་འགའ་རེ་རྒྱ་གཞུང་ལ་བསྟོད་པའི་ཚུལ་དུ་བྲིས་གནང་བ་སྙན་ངག་ལ་འཇུག་ཚུལ་ཚིག་རྒྱན་རིག་པའི་སྒོ་འབྱེད་ལྟ་བུ་དོན་དངོས་ཐོག་རང་མི་རིགས་ཀྱི་རིག་གཞུང་རྒྱུན་གནས་ཐུབ་ཆེད་འབའ་ཞིག་ཡིན། སྙན་ངག་དེའི་ནང་མེ་ལོང་མའི་རྒྱན་སོ་སོའི་འགྲེལ་བ་ཁ་གསལ་ཞིང་དཔེར་བརྗོད་ཡང་རྒྱ་གཞུང་གི་མེ་ལོང་མ་ལྟར་བུད་མེད་མཛེས་མའི་ཁྱད་ཆོས་རྐྱང་པ་ལ་སྦྱར་བ་དེ་འདྲ་མ་ཡིན་པར་སྐྱེ་བོ་ཀུན་གྱི་མཐོང་ཆོས་སུ་གྱུར་བའི་འཚོ་བ་དངོས་དང་སྦྱར་གནང་བས་གོ་བདེ་བ་མ་ཟད། བློ་གསར་དོན་གཉེར་ཅན་ཚོས་རྒྱན་རྣམས་བློར་ངེས་བདེ་བའི་ཆེད་དུ་རྒྱན་སོ་སོའི་མཚན་ཉིད་དང་དབྱེ་བ་རྣམས་སྡོམ་ཚིག་ཏུ་བཀོད་གནང་སྟེ་ཡབ་མེས་རིག་གཞུང་གིས་གནད་ལ་རྨོངས་པའི་གངས་ཕྲུག་ཚོའི་འདྲེན་བྱེད་དབང་པོར་ཟིམ་ཆར་གྱིས་དགའ་སྟོན་བཤམས་ཡོད། དུང་དཀར་ཚིག་མཛོད་ཆེན་མོ་འདི་ཉིད་དེང་གི་དུས་སུ་བོད་རིག་པར་ཞིབ་འཇུག་གནང་མཁན་གྱི་བློ་གསར་གཞོན་ནུ་ཚོར་སྔོན་མེད་འཕྲུལ་གྱི་མེ་ལོང་ལྟ་བུའི་དཔྱད་གཞི་འཇོག་གནང་མཛད་ཡོད་པ་མ་ཟད་ད་དུང་ཆོས་སྲིད་ཟུང་འབྲེལ་གྱི་སྐོར་དང་། གྲུབ་མཐའི་རྣམ་བཤད། སྐད་ཡིག་དང་སློབ་གསོ་ལ་སོགས་པོད་བརྒྱད་ལྷག་བོད་མི་ཕྱི་རབས་པ་རྣམས་ལ་རྟེན་སྐལ་དུ་བཞག་གནང་ཡོད། རང་ཡུལ་ལ་རྒྱ་དམར་གདོན་འདྲེས་བཙན་ཤེད་དང་། གདུག་རྩུབ་ཐ་ན་དྲང་གཏམ་ཚིག་གཅིག་ཀྱང་ཤོད་མི་ཕོད་པའི་དྲག་གནོན་འདི་འདྲའི་འོག་ལ་གཞིས་བཞུགས་རྩོམ་པ་པོ་རྣམས་ཀྱིས་རང་མི་རིགས་ལ་བཅངས་པའི་ལྷག་བསམ་དང་ལ་རྒྱའི་ཆེད་རྙེད་པར་དཀའ་བའི་དལ་བརྒྱད་འབྱོར་བཅུ་ཚང་བའི་རྟེན་བཟང་འདི་ཉིད་ཀྱང་རྒྱ་དམར་སྲིན་བུའི་མེ་མདའི་འབེན་ལ་བཙུགས་ཏེ་ཞུམ་མེད་སྨྱུག་ཁ་བར་མདོའི་འཕྲང་དུ་ལུས་པའི་མི་རིགས་འདིའི་རྣམ་ཤེས་ཀྱི་རྒྱུན་སྐྱོབ་རྒྱུའི་འཐབ་རྩོད་དང་ལ་རྒྱའི་སྐོར་ལ་ཕྱོགས་ཡོད། འོན་ཀྱང་སེམས་ཕངས་ཤིང་ཡིད་སྐྱོ་དགོས་པ་ཞིག་ལ་བཙན་བྱོལ་རང་དབང་ལུང་པར་འཚོ་བཞིན་མཆིས་པའི་དོན་དམ་དུ་གནས་ཚད་ཡོད་མིན་མི་ཤེས་ཀྱང་རྩོམ་པ་པོའི་མིང་འཛིན་པ་ཕལ་མོ་ཆེའི་སྨྱུ་གུའི་རྩེ་མོ་དེ་ཆོས་ལུགས་དང་ཆོལ་ཁའི་དབར་དབྱེན་སྦྱོར་དཀྲུག་ཤིང་དང་། ཤོག་སྒྲིལ། ཆགས་སྡང་ཕྱོགས་རིས། རང་རྒྱལ་གཞན་ཕམ་བཅས་ཀྱིས་དུས་འདའ་བཞིན་པ་མིག་ལྡན་བསམ་ཡོད་ཀུན་གྱིས་མཐོང་ཆོས་སུ་གྱུར་ཡོད། དཔེ་མཚོན་ཙམ་བརྗོད་ན། སྐུ་ཚེ་གང་པོ་བོད་མི་རིགས་ཀྱི་ཆོས་རིག་གོམས་སྲོལ་གྱི་དོན་དུ་སྐུ་ངལ་ཚད་མེད་སྐྱོན་པ་མ་ཟད་ཐ་ན་སྐུ་སྲོག་ཀྱང་རང་མི་རིགས་ཀྱི་ཆོས་དང་རིག་གཞུང་ཆེད་དུ་གཏོང་གནང་མཛད་མཁན་རང་ཅག་ཁ་བ་རི་པ་རྣམས་ལ་བཀའ་དྲིན་བླ་ལྷག་ཏུ་ཆེ་བའི་གངས་ལྗོངས་རིགས་པའི་ཁྱུ་མཆོག་སློབ་དཔོན་ཆེན་མོ་དུང་དཀར་བློ་བཟང་འཕྲིན་ལས་མཆོག་ལ་མཚན་སྨད་དང་སྒྲོ་བཀུར་བྱེད་བཞིན་འདུག །སློབ་དཔོན་མཆོག་གིས་ཆབ་སྲིད་ཀྱི་དགོས་དབང་གིས་གསུངས་པའི་ཚིག་འགའ་རྡོག་སྒྲུག་བརྒྱབ་སྟེ་་‘‘གདོང་དམར་བ་ཞིག་ཕར་ཟད་ང་ཚོའི་འགྲན་རྩོད་དུ་ལངས་པའི་རྒྱ་མི་ཞིག་གི་ཁ་ནས་ཀྱང་འོང་དཀའ་བའི་གནས་ཚད་རེད་’’་ཅེས་ཚིག་ངན་སྒྲོག་སྟེ་སློབ་དཔོན་མཆོག་གི་མཚན་སྙན་ཉི་ཟླར་འགྲན་པ་དེ་ཆོལ་ཁའི་འཐེན་འཁྱེར་གྱི་དུག་རླངས་ནག་པོས་སྒྲིབ་ཐབས་བྱེད་ཀྱིན་འདུག །དེ་ཡང་མཁས་དབང་མཁྱེན་རབ་འོད་གསལ་ལགས་ཀྱིས་‘‘འདི་ནི་ཡང་དག་པ་དང་འདི་ནི་ཡང་མིདག་པའོ་ཞེས་མཁས་པའི་གསུང་ལ་ཅོ་འདྲི་བ་ནི་ཡང་ན་གཞན་ལ་ཤོད་མི་ནུས་པའི་ནང་གི་ཆགས་སྡང་ངན་པའི་རང་གཟུགས་ཤུགས་མ་ཐུབ་ཀྱིས་ཕྱིར་མངོན་པའམ། ཡང་ན་མི་ཚེ་ཕྱོགས་རིས་དང་ང་རྒྱལ་ལ་གོམས་པའི་གཡོ་ཅན་འགའ་ཞིག་གིས་རྒྱུད་བསྐུལ་ཏེ་དེ་ལྟར་སྨྲས་བ་ལས། རང་གི་རིགས་ལ་ཞེན་པ་ཕྲ་མོ་ཙམ་ཡོད་པ་དང་། གཟུར་གནས་ཀྱི་དཔྱོད་ལྡན་སུ་ཞིག་གིས་དེ་ལྟར་སྨྲ་རིགས་ཏེ་སྨྲ་མི་རིགས་སོ་’’ཞེས་གསུངས་པ་ནི་ཤིན་ཏུ་རྨད་དོ། ད་ལྟ་བོད་ནང་ལ་སྐྱེ་བ་དུ་མར་ལམ་གོལ་དུ་ལ྄ྭྷུང་ཞིང་ལོག་པར་སྨོན་པའི་འབྲས་བུ་དུས་སུ་སྨིན་པའི་ནང་པའི་བསྟན་པ་དང་འགྲོ་བ་ལ་གཅིག་ཏུ་གནག་པའི་ནག་ཕྱོགས་རྒྱ་དམར་སྲིན་འབུས་གཞིས་སུ་བཞུགས་པའི་རང་རིགས་ཆོལ་གསུམ་གྱི་སྤུན་ཟླ་རྣམས་ལ་ཡ་ང་སྙིང་རྗེ་བྲལ་བའི་ཆེད་གདུག་རྩུབ་ཀྱིས་ཁྲག་དྲི་བྲོ་བའི་དྲག་གནོན་བྱས་ན་ཡང་ཁོང་རྣམ་པའི་འགྱུར་བ་མེད་པའི་ལ྄ྭྷག་བསམ་དང་། ཞུམ་པ་མེད་པའི་སྙིང་སྟོབས་ཀྱིས་ཡབ་མེས་སྤྲེའུའི་རིགས་རུས་ལ་གདུང་ཞེན་ཟབ་པས་གཅེས་པའི་སྐུ་སྲོག་ཀྱང་རང་མི་རིགས་ཀྱི་འཕྲལ་ཕུག་བདེ་བའི་སླད་དུ་ད་དུང་བཏང་དང་གཏོང་མུས་ཡིན་དེ་དག་ལ་འདང་ཞིག་རྒྱབ་ནས་བྱེས་བཞུགས་ཆོལ་གསུམ་གྱི་རྩོམ་པ་པོའི་མིང་འཛིན་པ་རྣམས་ཀྱིས་ཆོལ་ཁ་དང་ཆོས་ལུགས་ཀྱི་འཐེན་འཁྱེར་དྲ་བ་ལས་གྲོལ་ཏེ་གོམ་པའི་འདེགས་འཇོག་མཉམ་དུ་སྤོས་ནས་སྐྱིད་ལ་ཁའི་རྩྭ་ལ་མཉམ་ཟ་དང་། སྡུག་སྔོན་མོའི་ཆུ་ལ་མཉམ་འཐུང་ཡིན་ཞེས་པའི་དཔེ་ལྟར་སྐྱིད་ན་སྐྱིད་པའི་དགོད་བྲོ་བའི་ཞབས་གཞས་མཉམ་འཁྲབ་དང་། སྡུག་ན་སྡུག་པའི་སྨྲེ་ངག་མཉམ་དུ་སྒྲོགས་ཏེ་ཕྱི་ཡི་དགྲ་བོ་ལ་དཔུང་པ་མཉམ་བཤིབས་ཀྱིས་ངང་ནས་རྡུང་རྡེག་དང་ཁ་གཏད་བཅག་ནས་ནང་གི་སྤུན་ཟླ་དག་རྡོག་རྩ་གཅིག་ཏུ་སྒྲིལ་ཏེ་དྲག་སྤྱོད་ལ་ལྷག་པར་མོས་པའི་ྐླ་ྐློས་རང་རེའི་ལ྄ྭྷད་མེད་ཀྱི་རྒྱལ་རབས་དང་། ལོ་རྒྱུས། ནང་བསྟན་གྱི་བྱུང་རབས་ཡང་སྲིད་ངོས་འཛིན་ཞུ་ཕྱོགས་སྐོར་སོགས་ལའང་འཁྱོག་བརྗོད་དང་རྫུན་བཟོ་བྱས་པའི་གཉེན་འབུར་དེ་དག་ལ་ང་ཚོས་དྲང་བདེན་གྱི་སྤུ་གྲི་བཙུགས་ཏེ་གཏོལ་དགོས་པ་མ་ཟད་རང་ཉིད་སྐྱབས་བཅོལ་བ་ཞིག་ཡིན་པའི་ཆ་ནས་བོད་མིའི་འོས་འགན་རང་དབང་སླར་གསོའི་དོན་དུ་ཁ་ཡོད་ལག་ཡོད་ཀྱི་རྡོག་རྩ་གཅིག་སྒྲིལ་གྱི་ངང་ནས་འབད་བརྩོན་བྱེད་དགོས། ༸གོང་ས་མཆོག་གིས་‘‘བོད་བསྟན་པ་ཆབ་སྲིད་ཀྱི་གནད་དོན་འདི་བོད་པ་རེ་གཉིས་ཤིག་ལ་འཁྲི་བའི་ལས་འགན་ཞིག་མ་ཡིན་པར་བོད་མི་ངོ་རེའི་ཕྲག་སྟེང་ན་ཡོད་པའི་ལས་འགན་ཞིག་ཡིན་’’ཞེས་གསུངས་པ་བཞིན། གུས་པའི་རེ་བར་ད་ནས་བཟུང་བྱེས་བཞུགས་ཀྱི་རྩོམ་པ་པོའི་མིང་འཛིན་རྣམས་ཀྱིས་༸གོང་ས་མཆོག་གི་བཀའ་ཡི་གདོང་འབག་གྱོན་ནས་ཆོས་ལུགས་དང་ཆོལ་ཁའི་དབར་ལ་འཐེན་འཁྱེར་གྱི་རྩོམ་ཡིག་དང་སྐད་ཆ་སོགས་ནམ་ཡང་མཚམས་འཇོག་གནང་རོགས་ཞེས་སྙིང་དབུས་ནས་ཞུ་བཞིན་ཡོད།།