ས་གནས་ནས་ཐུབ་རྒྱལ་གྱིས།
ར་པུར་དཔལ་ས་སྐྱའི་ཆོས་སྒར་རུ་མཁའ་མཉམ་སྐྱེ་འགྲོ་ཀུན་གྱི་མགོན་དཔུང་དམ་པ་སྐྱབས་མཆོག་༸གོང་མ་བདག་ཁྲི་རིན་པོ་ཆེ་མཆོག་གིས་དེར་འདུས་མི་མང་བཞི་སྟོང་ལྷག་ལ་འཆི་མེད་ཚེ་དབང་ཟབ་མོའི་ལྗགས་ དབང་བསྩལ་གནང་སོང་། ཟླ་འདིའི་ཕྱི་ཚེས་༢༣ཉིན་སྔ་དྲོ་ཕྱག་ཚོད་དགུ་པའི་ཐོག་དངོས་སུ་བཀའ་དབང་དབུ་འཛུགས་གནང་བ་དང་སྐབས་དེར་མགོན་པོ་གང་གིས། སྔོན་འགྲོ་ཡན་ལག་བདུན་པ་དང་ནང་ཆོས་ངོ་ སྤྲོད་གནང་བ་མ་ཟད། གཙོ་ཆེ་ཤོས་དེ་ཀུན་སློང་ཀུན་སྤྱོད་ལེགས་པ་གསལ་བཏབ་དགོས་པས་ཚེ་དབང་ཞུ་བར་ཁྲལ་དང་ལྟད་མོ་ལྟ་བུའི་འདུ་ཤེས་འཁྱེར་ནས་དབང་གྲལ་དུ་ཞུགས་པ་ཡིན་ན་དབང་མི་འཐོབ་ཁར་ཉེས་དམིགས་སུ་འགྲོ་རྒྱུ་ལས་དགེ་མཚན་མེད་པ་བཀའ་གནང་སོང་། དངོས་གཞི་རྗེས་གནང་གྲུབ་རྗེས་བཛྲ་གུ་རུ་སོགས་ཀྱི་ལྗགས་ལུང་ཡང་གནང་སོང་། 
དེ་རྗེས་མི་མང་ལ་བླང་དོར་གྱི་བཀའ་སློབ་འདི་ལྟར་བསྩལ་སོང་། དལ་འབྱོར་གྱི་ལུས་རྟེན་འདི་བཞིན་ཧ་ཅང་རྩ་ཆེན་པོ་ཡིན་པས་མི་ལུས་རིན་པོ་ཆེ་འདི་དོན་མེད་ཆུད་ཟོས་སུ་མི་གཏོང་བར་མི་ཚེ་དོན་ལྡན་ཞིག་ཡོང་བར་འབད་དགོས་པ་དེ་ཧ་ཅང་གལ་ཆེན་རེད། ལྷག་པར་དུ་ན་གཞོན་ རྣམས་ཀྱིས་མྱོས་རྫས་རིགས་སོགས་སྤང་བླང་ཚུལ་བཞིན་གནང་དགོས་པ་དང་། དེ་ལྟར་ཐུབ་ཚེ་རང་ཉིད་ཀྱི་མི་ཚེ་དེ་ཡང་དོན་ལྡན་ཞིག་ཡོང་རྒྱུར་མ་ཟད་མི་རིགས་ཀྱི་རྩ་དོན་ལ་ཡང་དེ་ ལས་ལྷག་པའི་སྲིད་ཞུ་ཞིག་མེད་སྟབས་ཚང་མས་ཐུགས་སྣང་གནང་རོགས་གནོངས་ཤེས་གསུངས་སོང་། བཀའ་དབང་འདི་བཞིན་ལག་ཐོག་ཁ་པར་གྱི་རྒྱུད་ནས་བོད་ནང་ཐད་གཏོང་གནང་མཁན་ཡང་བྱུང་འདུག
དད་མེད་དབང་གྲལ་མེད་ན་ལེགས་ཞེས་གདམས། །
དད་ལྡན་སྨྱོ་རྫས་ཟ་བ་མི་རུང་ཞེས། །
དངོས་དང་ཁ་པར་བརྒྱུད་ནས་དབང་ལུང་སྦྱིན། །
༸རྩ་བའི་༸བླ་མའི་༸སྐུ་ཚེ་ཡུན་བརྟན་ཤོག །
དལ་འབྱོར་གྲུ་ཆེན་མི་ལུས་རིན་ཆེན་འདི། །དོན་མེད་རྣམ་གཡེང་ངང་དུ་མ་གཏོང་ཞེས། །བཀའ་སློབ་དྲིན་ཆེན་གསེར་གྱི་ཡང་ཞུན་འདི། །རང་རེ་གཞོན་ནུ་རྣམས་ཀྱིས་སྙིང་དབུས་ཆོངས།