དགེ་འདུན་པཀྵི།
མདང་གི་མཚན་མོར་རྨིས་པའི་རྨི་ལམ་ཞོགས་པའི་ལྡོག་འཕྲོའི་འོད་ཀྱིས་དཀྲོགས།།
ཁྱེད་ཀྱི་ཞལ་རས་མཇལ་བའི་ཏིང་འཛིན་ལྷན་ཅིག་སྟོང་བའི་དབྱིངས་སུ་ཐལ།།
གསང་ངེར་འབྱིན་པའི་དབུགས་རིང་དང་བཅས་མལ་གྱི་ཁྲི་ལས་ལྡང་བའི་ཚེ།།
སླར་ཡང་ལོ་ལས་རིང་བའི་ཉི་མ་གཅིག་པུས་སྐྱེལ་བར་ཞེ་ནས་ཁྲེལ།།
འདི་ལྟར་ལོ་ལས་རིང་བའི་ཉི་མ་བཙན་གྱིས་བསྐྱལ་བའི་ལོ་ཟླའི་ཁྲོད།།
བདག་གི་ཡིད་ལ་རྟག་ཏུ་འཆར་བ་གང་ཁྱོད་ཞལ་གྱི་དཀྱིལ་འཁོར་ཏེ།།
སེམས་ཤིང་སེམས་ཤིང་རབ་ཏུ་སེམས་པས་ཏིང་འཛིན་རང་རྩལ་རྫོགས་གྱུར་ནས།།
གཏད་པ་མེད་ཀྱང་ཡིད་ཀྱི་ངོས་སུ་ལོ་དང་ཟླ་བའི་ཁོར་མོར་རོ།།
ལྷགས་རླུང་ལྡང་བའི་འོ་དོད་རྣོན་པོས་དགུན་གྱི་འབོད་ཚིག་བསྐྱར་བ་ན།།
ཕུག་རོན་བྲེད་པའི་ཀུ་ཅོ་དག་གིས་རྣ་བའི་བུ་གར་གཙེ་བར་བྱེད།།
ཐིང་སྒྲོག་མཚན་མོའི་མཆིས་མལ་གནས་ན་ཏིང་འཛིན་སྒོམ་པའི་བདག་པོ་ཡང་།།
ཕུག་རོན་བཞིན་དུ་ཉམ་ངའི་གླུ་དབྱངས་མཆི་མའི་གང་བུར་བསྒྲེས་ནས་འབྱིན།།
ཉི་མའི་ཕྲེང་བ་སོར་མོས་བགྲངས་ནས་ལོ་དང་ཟླ་བ་རིམ་གྱིས་འདས།།
ཁྱེད་ཀྱི་ཞལ་རས་ཟླ་བའི་དཀྱིལ་འཁོར་མཇལ་བའི་དུས་དེ་མི་སླེབས་ཅི།།
དགོང་ཞོགས་རྒྱུན་མར་མཐུད་པའི་འཁོར་ལོར་བདག་གིས་ཁྱོད་མཚན་གླུ་རུ་གྱེར།།
ཕུག་རོན་ངུས་པའི་སྨྲེ་སྔགས་དེ་ལས་ལན་ལྡོན་བྱེད་པོ་སུ་ཞིག་མཆིས།།
ལྗང་མདོག་བཀྲ་བའི་དབྱར་གྱི་ལང་ཚོ་ཙག་དང་བསེར་བུས་ཁམ་ཟས་བགྱིས།།
ཁུ་བྱུག་མོན་དུ་ལོག་པ་ཡིན་ནམ་ཀོ་ཀིའི་དབྱངས་སྙན་བག་ལ་ཞ།།
སྡུག་སྨྲེ་འབྱིན་བཞིན་ལྷོ་རུ་བཞུད་པའི་ཁྲུང་ཁྲུང་ཚོགས་ནི་དབྱིངས་སུ་ཐིམ།།
ཀྱེ་མ་ནམ་མཇུག་རླུང་བོའི་ཁྲོད་དུ་ཁོ་བོའི་ལས་སྐལ་མི་རྫོགས་ཅི།།
དུས་ཀྱི་འཁོར་ལོ་རེས་ཀྱིས་འཁོར་ནས་སྨིན་དྲུག་ཟླ་བ་ཟླ་བ་རྫོགས་པར་གྱུར།།
མཁའ་གླང་ངུས་པའི་མཆི་མ་དག་ཀྱང་དྲུག་ལྡན་ཁ་བའི་འདབ་མར་སྤྲུལ།།
གངས་ཤུད་གློད་པའི་བྱིས་བ་དག་ལ་དགའ་བའི་དངོས་གྲུབ་བསྐྱར་དུ་ཐོབ།།
འོན་ཀྱང་གྱེས་བྲལ་སྐལ་བར་སྨིན་པ་དག་ལ་སྡུག་གི་ཕུང་བོར་གྱུར།།
བུ་ཡུག་འཚུབ་པའི་འཁྱགས་རླུང་རུམ་ན་ཁ་བའི་འདབ་མ་ལྡིང་སྐོར་བྱེད།།
ལྷགས་པས་བདས་པའི་ཅོ་གའི་ཚོགས་ཀྱིས་རང་གནས་སྟོར་བའི་འོ་དོད་འབྱིན།།
གཞན་ཡུལ་བསྙེགས་པའི་སྐྱེ་བོ་དག་ལ་ཀུན་ཀྱང་སྐྱོ་བའི་རྒྱུ་ཉིད་དེ།།
རེ་བ་དོན་དུ་མ་སྨིན་ཚེ་ན་སུས་ཀྱང་སྡུག་བསྔལ་བྱེད་པ་ཉིད།།
རེ་ཞིང་སྒུག་པའི་ལྷན་འཛོམས་དུས་ཤིག་འབྱུང་འགྱུར་ལོ་ཟླའི་ཁོར་ཡུག་ལ།།
བཟློག་མེད་ལས་ཀྱི་སྐལ་བ་ཉིད་དུ་འཐོབ་པར་འགྱུར་ཞེས་བདག་གིས་སེམས།།
དེ་སླད་ཁྱོད་ཀྱང་སྡུག་བསྔལ་མང་པོ་བདག་གིར་བྱེད་པ་མི་རིགས་ཏེ།།
མི་འགྲུབ་ལས་ལ་མྱ་ངན་བྱེད་པ་ངེས་པར་རྒྱུ་མཚན་མེད་པ་ཉིད།།
བདག་གིས་རང་སེམས་གཅུན་པའི་མོད་ལ་ཉི་མའི་ཕྲེང་བ་ནུབ་རིར་བསྐྱལ།།
གང་ཁྱོད་ཞལ་རས་བསྙེལ་བ་མེད་པར་ཡིད་ཀྱི་ཁང་བར་གཏེར་དུ་སྦས།།
དེ་བཞིན་ཁྱོད་ཀྱང་ལོ་ཟླའི་ཁྱུད་མོར་བདག་ཉིད་བརྗེད་པ་མི་རིགས་ཞེས།།
རྟག་ཏུ་སེམས་ཤིང་གནས་པར་གྱིས་ཞེས་དམར་པོ་སྙིང་འདིས་ཁྱོད་ལ་འོ།།