གཙང་བུས
བོད་མི་དམངས་ཀྱི་བཀའ་ཁྲི་མཁས་དབང་བློ་བཟང་སེང་གེ་མཆོག་ལ་འཚམས་འདྲི་བཀྲ་ཤིས་བདེ་ལེགས་ཞུ། ཁོང་གི་ལས་དོན་ཐམས་ཅད་འབད་མེད་ཀྱིས་ཡོང་མི་སྲིད་པས་འབད་རྩོལ་གྱིས་འགྲུབ་པར་ཤོག སྤྱིར་བཏང་བཤད་ན་ཁོང་ནི་བོད་མི་མང་གི་བཀའ་ཁྲི་ཡིན་པས་ངའི་བཀའ་ཁྲི་རུ་གྱུར་པ་རེད། དེ་མིན་ངའི་སེམས་ནང་གི་བཀའ་ཁྲི་ནི་སྙིང་སྟོབས་དང་ཞབས་རྗེས་གཟེངས་སུ་མཐོ་བའི་རྒྱལ་བའི་སྐུ་གཅེན་བཀའ་ཟུར་རྒྱལ་ལོ་དོན་གྲུབ་མཆོག་ཡིན། ཡིན་ན་ཡང་འགྲན་བསྡུའི་ཕྲད་ཁོང་གིས་ཤོར་བ་རེད། གཅིག་བྱེད་ན་འཇོན་ཐང་དང་བྱས་རྗེས་ཅན་བཀའ་ཟུར་ཁོང་ལྟ་བུ་ཞིག་བཀའ་ཁྲི་ལ་འཁོས་པ་ཡིན་ན། རྡ་སའི་བཙན་བྱོལ་བོད་གཞུང་འདི་ལ་བསྒྱུར་བཅོས་གང་འཚམས་ཤིག་ཏན་ཏན་གཏོང་ངེས་རེད་ལ། གཏོང་ཐུབ་རྒྱུ་ཡང་རེད། ཁོང་ནི་རྣམ་དཔྱོད། ཤེས་ཡོན། ལྷག་བསམ། སྙིང་སྟོབས། རྒྱབ་དཔུང་སོགས་གང་གིས་ཀྱང་འགྲན་དུ་མེད་པ་ཞིག་ཡིན་པས་རེད། ང་ཚོས་འདས་པའི་ལོ་རྒྱུས་ལ་བསམ་བློ་ཞིག་བཏང་བ་ཡིན་ན། ཁོང་གིས་བཞག་པའི་རླབས་ཆེན་གྱི་བྱས་རྗེས་ལྟ་བུ་ཞིག་༸གོང་ས་མཆོག་ལས་གཞན་སུ་ཞིག་གིས་ནུས་པའི་ལོ་རྒྱུས་མེད། ལས་ཀ་གང་ཞིག་ལ་གྲུབ་འབྲས་བཟང་ངན་ཅི་བྱུང་ཡང་ཁོང་རང་གིས་འགན་ལེན་པ་ལས་༸གོང་ས་མཆོག་གིས་དགོངས་གཞི་ཡིན་ཚུལ་སོགས་རྩ་བ་ནས་གསུངས་མྱོང་མེད། ཁོང་གིས་བོད་མི་མང་དང་གཞུང་འདིའི་ཆེད་དུ་གཅེས་པའི་ལུས་སྲོག་གཏར་མར་བཞག་ནས་ཕྱག་ལས་མང་པོ་ཞིག་གནང་མྱོང་ཡོད་པས། མི་ཁག་ཅིག་གི་ཁ་ལ་ཕོག་མྱོང་ལ། ལ་ལས་མགོ་བོ་ལའང་ཕོག་ཡོད། དེས་ན་རང་དོན་ཡིད་བྱེད་ཀྱིས་ཀུན་ནས་བསླངས་ཏེ་ཁོང་ལ་ཁ་རྡུང་དང་ངོ་རྒོལ་དངོས་ ཤུགས་བརྒྱུད་གསུམ་ནས་མི་ཉུང་བ་ཞིག་བྱས་དང་བྱེད་བཞིན་དེ་ལྟར་ཡང་ཁོང་གིས་ སྙིང་སྟོབས་ལ་རྒྱ་ལ་གཡོ་འགུལ་ཙམ་ཡང་ནུས་མེད། བཀའ་ཁྲི་བློ་སེང་ལྟ་བུ་ཞིག་ལ་མཚོན་ན། ཤེས་ཡོན་དམིགས་བསལ་བ་དང་། ཉམས་མྱོང་གང་འཚམས་ཤིག་ཡོད་ངེས་ཀྱང་རྡ་སའི་གཞུང་འདིའི་ནང་། ཁོང་ལ་རྒྱབ་དཔུང་གང་འདྲ་ཡོད་པ་དང་། དེ་ཡང་ནུས་པ་དང་འཇོན་ཐང་སོགས་ཅི་འདྲ་ཞིག་ཡོད་པ་དེ་ཧ་ཅང་གི་གལ་ཆེ། གལ་སྲིད་ནུས་པ་ལྡན་པ་དེ་འདྲ་ཞིག་མེད་པ་ཡིན་ན་ཁོང་གི་རྡ་སའི་འཕྲུལ་འཁོར་རྙིང་བ་དེ་གཡོ་འགུལ་ཞིག་རྩ་བ་གཏོང་ཐུབ་རྒྱུ་མ་རེད། དེ་ཡིན་ན་ཁོང་གིས་ཁ་ལ་བལྟས་ནས་ཁོང་བཀའ་ཁྲིར་བདམས་པའི་མི་མང་ཚོའི་སེམས་ལ་ཆུ་ཆག་ཅིག་ལྡུག་རྒྱུ་རེད། ཡིན་ན་ཡང་འདི་ནི་བློ་སེང་ལགས་ཀྱིས་ནག་ཉེས་མིན་པ་རེ་བ་དང་ཡིད་ཆེས་མང་དྲགས་པ་དག་གིས་ཉེས་པ་རྐྱང་པ་རེད། བློ་སེང་ལགས་བཀའ་ཁྲིར་འཁོས་པ་འདིར་དགོས་པ་ཆེ་ཕྱོགས་ཞིག་ཡོད་པ་ནི། ཁོང་དེང་རབས་ཀྱི་མཁས་དབང་གི་མཚན་གནས་ཡོད་པས་རྒྱལ་ཕྱི་ནང་ལ་དྲིལ་བསྒྲགས་སོགས་བྱ་དགོས་ཐུག་ཚེ་ནུས་པ་དམིགས་བསལ་ཞིག་ཡོད་ངེས་རེད། ཡིན་ན་ཡང་རྡ་སའི་རི་ངོགས་འདི་ན་ཁོང་གི་ཞབས་རྗེས་ཅི་འདྲ་ཞིག་འཇོག་ཐུབ་མིན་དེ་ཕྱག་རོགས་བཀའ་བློན་དག་ལ་བརྒྱ་ཆ་བརྒྱད་ཅུ་རག་ལས་ཡོད། མ་བསམ་ས་ནས་ཁོང་འཁོས་ཟིན་པ་རེད། ད་ནི་ལས་བྱེད་རྒན་བར་གཞོན་གསུམ་གྱིས་མི་མང་འདི་དང་གཞུང་འདི་ཐུགས་ལ་བཅངས་ནས་ཁོང་གི་བཀའ་ལྟར་ཕྱག་རོགས་གནང་རོགས་ཞེས་ཞུ་བ་ཡིན། ང་ཚོས་ཆོ་ཁ་དང་ཆོས་ལུགས་ལུང་ཚན་སོགས་འཐེན་འཁྱེར་བྱེད་པར་དགོས་པ་རྩ་བ་ནས་མི་འདུག ངས་ང་རང་གི་ལོ་རྒྱུས་ལ་ཕྱིར་ལྟ་ཞིག་བྱེད་དུས་ངས་བློས་ཐུབ་ཀྱི་གྲོགས་འཛིན་པ་དེ་དག་གིས་ང་ལ་དགྲ་བོ་མི་ཉུང་བ་ཞིག་སྦྱིན་འདུག་ལ།
ངས་དགྲ་བོའི་འཛིན་པ་དེ་དག་གིས་ངའི་སེམས་ནང་གི་གྲོགས་པོ་བློས་ཐུབ་དེ་ངའི་རྩར་གཡུགས་པ་ཞིག་རེད་འདུག དེས་ན་གྲོགས་པོས་དགྲ་བོ་སྦྱིན་ལ། དགྲ་བོས་གྲོགས་པོ་སྦྱིན། འདི་དངོས་ཞིག་རེད། དེས་ན་སུ་ཞིག་གིས་ཕན་ཐོགས་དང་སུ་ཞིག་གིས་གནོད་པ་སྐྱེལ་གྱི་ཡོད་པར་ངེས་འཛིན་ཐུབ་པ་མ་རེད། བོད་ཀྱི་བཀའ་ཁྲི་མཁས་དབང་བློ་སེང་ལགས་རྒྱལ་གྱུར་ཅིག