ཟླ་ཀླུང་གིས་ཕུལ།
སེམས་གཏིང་ནས་བརྩེ་བའི་བུ་མོ་ཀར་སྒྲོན་ལགས། ངས་ཁྱོད་རང་འདི་ལྟར་མཐོང་བྱུང༌། གོ་ལ་ཧྲིལ་བོ་འདི་རུ་གཟུགས་བྱད་མཛེས་པའི་བུ་མོ་ཆེས་མང་ནའང༌། ངའི་མིག་ལམ་དུ་སྣང་བའི་ལྷ་མོ་ནི་ཁྱོད་རང་གཅིག་པུ་རེད། ཁྱོད་ནི་གཟུགས་བྱད་ཀྱི་དབྱིབས་མཛེས་ཤིང༌། དཀར་དམར་གྱི་མདངས་གསལ། གཞོན་ཤ་ཆགས་པའི་གཟུགས་པོ་ལས་དྲི་བཟང་གི་ངད་ཐུལ། འཛུམ་པའི་ཉམས་དང་ལུས་ཀྱི་རྣམ་འགྱུར་ཆེས་ལེགས། སྙན་པའི་གད་མོ་དང་བཅས་ཏེ་སྒྲ་དོན་གསལ་བའི་གཏམ་སྨྲ། བཟང་ངན་ཤོང་བའི་ཁོག་རྒྱ་དང་ཤེས་རབ་ཀྱི་རྩལ་ཆེ། རྟག་པར་གཞན་དང་མཐུན་ཞིང་དགའ་སྤྲོའི་སྣང་བས་དུས་འདའ། འཇམ་ཞིང་དེས་པའི་གཤིས་སྤྱོད་ལས་རྩུབ་པའི་ངང་ཚུལ་ཤིན་ཏུ་དབེན། དེས་ན་ཁྱོད་ནི་ཇི་འདྲའི་ཡིད་དུ་འོང་བ་ཞིག་མ་རེད་དམ། ཕུན་ཚོགས་ཀྱི་ཡོན་ཏན་མངའ་བ་ཁྱོད་ལྟ་བུ་ཡོད་པ་ནི་དངོས་གནས་འཇིག་རྟེན་འདིའི་གཟི་བརྗིད་རེད་ལ། ཁྱོད་ཀྱི་ཆ་ཤས་རེ་རེས་ཀྱང་བུ་མོའི་ཀླུང་རྟ་ཡར་དར་བྱེད་པས་ཁྱོད་ནི་འཛམ་གླིང་བུ་མོའི་དྭངས་རྩེ་དང་དཔུང་གཉེན་ཀྱང་རེད། ཁྱོད་ནི་བཟང་པོའི་ལས་ལ་ངང་གིས་འཇུག་ཅིང་ངན་པ་ནམ་ཡང་མི་བྱེད་པས་ལེགས་ཚོགས་ཆར་སྤྲིན་བཞིན་འདུས་ཏེ་གར་སོང་ས་རུ་བཀྲ་ཤིས་པས་ལྷ་ཡི་བུ་མོ་ཞེས་གྲགས་ཆེ་ནའང་ཁྱོད་ལས་ལྷག་པ་ཞིག་ཡོད་མེད་ཅི་ཤེས ཁྱོད་ཀྱི་ལུས་ངག་དང་འཛུམ་ཟེར་གྱིས་གང་ལ་རེག་པ་དེ་ལ་ཞི་བདེའི་སྣང་བ་གསར་པ་ཞིག་སྟེར་བས་བདུད་རྩིའི་བུ་མོ་ཞེས་བཏགས་ནའང་མ་ཆོག་པ་མི་འདུག །ཁྱོད་ཀྱི་དགེ་མཚན་དེས་འཁོར་བའི་སྡུག་བསྔལ་མཐའ་དག་ཟིལ་གྱིས་མནན་ནས་བདེ་བ་ཅན་གྱི་ཞིང་ཁམས་ཚེ་ལུས་འདིར་ཉམས་སུ་མྱོང་བར་བྱེད་པས་ཁྱོད་ཀྱི་དཔལ་ཡོན་ལ་སྤྱོད་པའི་སྐྱེས་པ་དེ་ནི་ངེས་པར་སྐལ་བ་རེ་བཟང༌། དམན་པ་ང་ཚོར་ཁྱོད་རང་གི་མཛེས་སྡུག་སྣང་བ་ཙམ་ལས་རྒྱུ་རྐྱེན་དུ་མའི་དབང་གིས་ཁྱོད་དང་སྐྱིད་སྡུག་མཉམ་མྱོང་གི་སྐལ་བ་དབེན་པ་འདི་ནི་ཅི་འདྲའི་སེམས་པ་སྐྱོ་བ་ལ་ཨང༌།