སྐྱུ་རྩི་ནས།
ཀ་བ་ལྟ་བུའི་བསམ་བློ་དྲང་པོ་ཞིག་བཏང་ནས།
ཁ་རུ་ཁ་ཐུག་སྐད་ཆ་ངོ་མ་དེ་བཤད་ན།
ག་ནས་བལྟས་ཀྱང་ད་ལྟའི་དུས་ངན་གྱི་སྐབས་འདིར།
ང་ཡི་བཀའ་ཁྲི་ཁྱོད་ལས་ངེས་པ་རང་མིན་འདུག
ཅ་ཅོ་བཤད་དུ་མི་སེམས་འགུགས་པ་ལ་མཁས་ལ་།
ཆ་ལུགས་ཕྱི་ཚུལ་བོད་ལྭ་རིང་པོ་དེ་བསྣབས་ཤིང་།
ཇ་ཆང་གཉིས་ནས་ཆང་ལ་དགའ་བོ་རང་མེད་ན།
ཉ་མོ་ང་ཡི་སེམས་པ་དེ་བས་རང་བདེ་སོང་།
ཏ་ལའི་བླ་མའི་བཀའ་སློབ་སྤྱི་བོ་རུ་བཀུར་ཞིང་།
ཐ་ཤལ་ངན་པའི་ས་འོག་དར་ཐག་ལ་གཟབ་ནས།
ད་གཟོད་མི་རབས་གསར་པའི་དཔུང་སྣེ་ཁྲིད་དེ།
ན་གཞོན་བོད་མི་ཀུན་གྱིས་བཀུར་བ་རང་གནང་རོགས།
པ་ལགས་དམ་པས་བཅའ་ཁྲིམས་མཆོད་བཤོམ་དུ་བཤམས་ཤིང་།
ཕ་བཟང་བུ་ཡིས་ཁྲིམས་ལུགས་འབུམ་རམ་གྱི་ལག་ཁྱེར།
བ་བུའི་མེ་ཏོག་ལས་ཀྱང་གྲགས་སྙན་རང་འབར་བ།
མ་རྒན་རྒན་མོ་ཡིས་ཀྱང་བུ་བཟང་ཞེས་བསྔགས་སོང་།
རྩ་བ་༧གོང་སའི་དགོངས་དོན་དབུ་མ་ཡི་ལམ་བཟང་།
ཚ་ཚིག་མིན་པར་བག་ལྷིངས་བརྟན་པོ་ཡིས་ངང་ནས།
ཛ་དྲག་བོད་ཀྱི་བདེན་མཐའ་གསལ་བ་ལ་འབད་ཅིང་།
ཝ་རྒན་རྒྱ་དམར་ཕྱོགས་ལ་དོག་གཟོན་དེ་གནང་དགོས།
ཞྭ་མོའི་མདོག་ནས་བཏགས་པའི་ཞྭ་སེར་སོགས་གྲུབ་མཐའ།
ཟ་མ་ཆ་ལུགས་མི་འདྲའི་མཐོ་སྒང་གི་ཆོལ་ཁ།
འ་ཅག་ཕ་རྒན་བྲག་སྲིན་ཁྲག་རྒྱུན་ལས་མཆེད་པའི།
ཡ་རབས་གཅེན་ཆུང་ཡིན་པའི་ལམ་སྟོན་རེ་གནང་རོགས།
ར་བ་གངས་རིས་བསྐོར་བའི་པུར་རྒྱལ་གྱི་ལྗོངས་དེ།
ལ་རྒྱ་མེད་པའི་རྒྱ་དམར་ཇག་པ་ཡིས་བཅོམ་ནས།
ཤ་ཁྲག་གཅིག་སྤུན་ཟླ་དམར་གསོད་དེ་གཏོང་དུས།
ས་སྟེང་འདི་ནས་ཁྱེད་ཀྱིས་ཅི་དྲག་རང་གནང་རོགས།
ཧ་ཅང་ཚིག་ཙོག་མང་ཞིང་དག་ཆ་ཡི་དབེན་ཡང་།
ཨ་ཙི་བསམ་ནས་ར་བཟིའི་སྐྱུག་གོང་དེ་བཤད་ཡོད།
ཨ་རོགས་སྐྱུར་རྩི་སྐྱུར་གྱིས་བཟི་ནས།
ཧ་ཅང་དྲང་མོའི་གཏམ་ཞིག་བྲིས་ཐལ།
ཧ་ཧོར་ཀ་བཤད་མ་བྲིས་མ་གཏོགས།
ཨ་རོགས་དབུ་ལ་འོ་རྒྱལ་བཟོས་ཡོང་།