དོལ་སྨྱོན།
དྭངས་གཙང་གི་སེམས་པ་དེ་རྨས་ཚར་དུས། རྣམ་དག་གི་བརྩེ་དུང་དེ་བསྲེགས་ཚར་དུས།
ངས་སུ་ཞིག་ལ་འཁང་ར་བྱེད། དེ་རིང་།
ངས་སློབ་གླིང་གི་གྲུ་ཟུར་ཞིག་ནས། རང་ཉིད་ཀྱི་ལས་དབང་དང་།
མི་རིགས་ཀྱི་གོད་ཆགས་ལ་བསམ་གཞིགས་བྱེད་ཐུབ་ནའང་།
ང་ཡི་སེམས་པ་འདི། སྔར་བཞིན།
གྲང་ཤུར་ཤུར། སྐྱོ་ལྷང་ལྷང་།
དོན་ངོ་མར་ངས་ད་དུང་ཡང་ཁྱོད་དྲན་བཞིན་ཡོད།
ཡིད་ཆེས་ཀྱི་རེ་བ་དེ་བརླགས་ཚར་དུས། བརྩེ་སེམས་ཀྱི་འདུན་མ་དེ་འཐོར་ཚར་དུས།
ངས་ཅི་ཞིག་ལ་རེ་ལྟོས་བྱེད། དེ་རིང་།
ངས་དུས་ཚིགས་ཀྱི་ཀྱོག་མཚམས་འདི་ནས། སྔོན་སོང་གི་བྱ་བཞག་དང་།
འབྱུང་འགྱུར་གྱི་མདུན་ལམ་ལ་བསམ་གཞིགས་བྱེད་ཐུབ་ནའང་།
ཁེར་རྐྱང་གི་སེམས་པ་འདི། སྔར་བཞིན།
འགྱོད་གདུང་དང་ཡིད་ཆད་ཀྱིས་མནར་དུས། ངས་སླར་ཡང་ཁྱོད་དྲན་བཞིན་ཡོད།
སྤྲོ་སེམས་ཀྱི་འཛུམ་མདངས་དེ་ཡལ་ཚར་དུས། བདེ་སྐྱིད་ཀྱི་གོད་སྒྲ་དེ་འཇོམས་ཚར་དུས།
ངས་སུ་ཞིག་ལ་བློ་གཏད་བྱེད། དེ་རིང་།
ངས་ལྷིང་འཇགས་ཀྱི་མཚན་ལྗོངས་འདི་ནས། དངོས་ཡོད་ཀྱི་གནས་ལུགས་དང་།
དྲང་བདེན་གྱི་རྒྱུ་མཚན་ལ་བསམ་གཞིགས་བྱེད་ཐུབ་ནའང་།
ཤི་ཟིན་པའི་སེམས་པ་འདི། སྔར་བཞིན།
ཁྱོད་ཕྱོགས་སུ་ཡང་ཡང་ཤོར་དུས། ངས་སླར་ཡང་ཁྱོད་དྲན་བཞིན་ཡོད།
བརྩེ་སེམས་ཀྱི་མདུད་པ་དེ་ཆད་ཚར་དུས། དྭངས་གཙང་གི་མཐུན་ལམ་དེ་ཡལ་ཚར་དུས།
ངས་ཅི་ཞིག་ལ་ཡིད་ཆེས་བྱེད། དེ་རིང་།
ངས་མུན་ནག་གི་འཇིག་རྟེན་འདི་ནས། བཟང་པོ་ལ་བཟང་ལན་ཞིག་དང་།
ངན་པ་ལ་ངན་ལན་ཞིག་བྱིན་ཐུབ་ནའང་།
ཤོར་ཟིན་པའི་སེམས་པ་འདི། སྔར་བཞིན།
ཁྱོད་ཁོ་ན་དྲན་ཞིང་ཁྱོད་ཁོ་ནར་བསམ་དུས། ངས་ད་དུང་ཡང་ཁྱོད་དྲན་བཞིན་ཡོད།
དུས་ཚིགས་ཀྱི་ཀྱོག་མཚམས་ཤིག་ནས།
འཕུར་ལ་གོམས་པའི་བྱིའུ་ཆུང་ཆུང་ཞིག
རེ་བ་དང་ཡིད་ཆེས་ཀྱི་རྡོག་འཕྲེས་ཆེན་པོ་ཞིག་འཁུར་ནས།
འཕུར་འཕུར་བའི་མཐར་འབབ་སའི་ས་ཆུང་ལག་མཐིལ་ཙམ་ཞིག་ཀྱང་མ་བརྙེད་པ་ནི།
དངོས་གནས་མཁྱེན་ཚར་མིན་ནམ།