—— འགར་ཚེ་རྒྱལ།
རྟེན་ཅིང་འབྲེལ་བ་ནི་ཆོས་དང་འཇིག་རྟེན་གཉིས་ཀྱི་ངོས་ཐད་ནས་ངེས་པ་དོན་གྱིས་དགོས་པ་ཞིག་རེད་མོད། འོན་ཀྱང་མི་ཞིག་ཡིན་ཕྱིན་རང་ཉིད་གཞན་སུའི་ལད་རྗེས་སུ་འབྲང་ཆོག་ཆོག་མིན་པའི་རང་ཚུགས་བརྟན་པོ་ཐུབ་པའི་རང་རྟོན་གྱི་བསམ་བློ་ཞིག་ཅིས་ཀྱང་དགོས་ངེས།
—— སྔོན་འགྲོའི་གཏམ་དུ།
ཅི་སྟེ་འུ་ཚོ་མི་རབས་གསར་པ་ནི་སྤྱི་ཚོགས་ཆུང་ཆུང་འདིའི་ཁྲོད་ཡག་སྡུག་ཅི་ཞིག་ཡོད་ན་མ་གསང་མ་སྦས་པར་ཕན་ཚན་ལ་བསམ་བློ་བརྗེ་རེས་དང་རིག་པ་སྐོར་བསྡུར་བྱེད་མཁན་གྱི་དུས་མཉམ་མི་རབས་ཤིག་ཡིན་པའི་འདུ་ཤེས་བཟུང་ནས་ཁོ་བོ་རང་སྣང་གི་བསམ་བྱ་འགའ་ལབ་གླེང་བྱེད་ཀྱི་ཡིན་མོད། འོན་ཏང་སུ་ཞིག་གི་ངོས་ཐད་ནས་ཅི་གང་ལ་མི་གཏོགས་པའི་བླུན་པོ་གནག་རྫིའི་འཆོལ་གཏམ་དང་། སུ་གང་ལ་མི་ཐེ་བའི་སྨྱོན་པའི་ལབ་བརྡོལ། ཚིག་གནད་ལ་མི་ཕོག་པའི་དགྲ་བོའི་རྒོལ་གཏམ་གང་དུ་ངོས་བཟུང་ཆོག
དེང་སྐབས་འུ་ཅག་མི་རབས་རྗེས་མའམ་ན་གཞོན་གསར་པའི་ནང་མང་པོ་ཞིག་ནས་དམིགས་ཡུལ་ཞིག་རྙེད་སོང་བ་དང༌། དམིགས་ཡུལ་དེའི་ཚོད་ཀྱིས་ལྟ་བ་ཞིག་ཀྱང་ཡོད་སོང་བའི་ཚོད་དུ་རང་ཉིད་ཀྱིས་ཉི་མ་བསྐྱལ་སའི་ཁོར་ཡུག་དེ་ཆོས་ལུགས་ཀྱི་ངོ་གདོང་ནས་དག་ཐེར་བྱེད་རྒྱུའི་ཀུན་སློང་ཞིག་བཟུང་ནས་འཕག་གིན་ཡོད་པ་རེད། དེ་ནི་རབ་དང་གནད་ལ་དཔག་སྟེ་བཤད་ན་བསམ་བློ་གསར་པ་དང་ཀུན་སློང་རྣལ་མ་ཞིག་གི་ལམ་ལ་འཚོལ་སྙེག་གིས་ཞུགས་པའི་གྲལ་དཔུག་ཅིག་གི་གནད་འཁེལ་འབྲས་སྨིན་གྱི་འཕག་སྟངས་ཤིག་ཡིན་ན་དགའ་འོས་པ་ཞིག་རེད་མོད། ཡིན་ནའང་དེ་ལ་དེའི་ཚོད་དུ་སྒུལ་ཤུགས་སྟོབས་ནུས་ཀྱི་ཕྱོགས་ཆ་ཅི་ཡང་མངོན་དུ་མེད་པར། ཆོས་དོན་ལ་དགག་པའི་ཀུན་སློང་དེ་ནི་སོ་སོ་རང་རང་གི་རྣམ་དཔྱོད་དང་ཞིབ་མོ་རྣམ་འཐག་གི་རིག་སྟོབས་ཀྱིས་བཙལ་བསྔོགས་བྱས་ནས་གསར་དུ་རྙེད་སོང་བ་ཞིག་མ་ཡིན་པར། དེ་ནི་གཞན་ཞིག་གི་ཤུགས་རྐྱེན་ཏེ་སྐུ་ཞབས་ཞོགས་དུང་ལགས་ཀྱིས་རང་སྟོབས་རང་དཔྱོད་ཀྱིས་ཆོས་ལུགས་ཁྲོད་ཀྱི་ལྷད་སྐྱོན་ལྟ་སྤྱོད་འཐུང་སྟེ་རྨོངས་ནས་ཡོད་པའི་བོད་མི་རིགས་འདི་ཆོས་མིན་ཆོས་བཟུང་གིས་བཟི་སྨན་གང་ཞིག་འཐུང་སྟེ་མགོ་འཐོམ་ནས་ཡོད་པ་དང༌། བཀྱིག་ཐག་གང་ཞིག་གིས་བསྡམས་ཏེ་འཕག་མ་ཐུབ་པར་ཡོད་པའི་ངོས་སྔོགས་འདོན་དག་ཐེར་བྱས་པའི་རྩོམ་ཡིག་༼བག་ཆགས་དོང་སྤྲུགས་༽ཟེར་བ་སོགས་སྤེལ་པ་དེ་འབྲེལ། བོད་ཡུལ་ཀྱི་སློབ་གྲྭ་ཁག་དང་དགོན་སྡེ་ཁག་བཅས་ཤེས་ཡོན་པའི་སྡེ་དཔུང་དང་། ངལ་རྩོལ་མང་ཚོགས་བཅས་བོད་སྤྱི་ཚོགས་ནང་གཡོ་འགུལ་བསླངས་པ་དེ་མཚུངས་ཁོང་གི་རྗེས་འབྲངས་ལད་ཟློས་ཀྱིས་གཞུང་དོན་ལ་ལྟ་རྒྱ་ཐོས་རྒྱ་མེད་པ། ཐ་ན་བརྡ་སྤྲོད་ཀྱི་འགྲོ་སྟངས་ཀྱང་རབ་རིབ་སབ་སིབ་ཡིན་པའི་མི་བུ་སྐོར་ཞིག་གིས་ཀྱང་ཨ་འདྲོགས་ལ་སྐྱ་འདྲོགས་ལངས་ཏེ། གང་གང་གསལ་ཐང་དུ་བརྗོད་དུ་མེད་ནའང་ལད་ཟློས་རང་བཞིན་གྱིས་སྐུ་ཞབས་ཞོགས་དུང་གི་བསམ་བློའི་ཟུར་ཞིག་ལ་འཇུས་ནས་ཆོས་དོན་གླེང་ཁུལ་གྱིས་ཆོས་ལུགས་ཀྱི་ངོ་གདོང་ལ་མཛུབ་མོ་འཛུགས་མཁན་གྱི་གྲས་སྐྱ་སེར་གཉིས་ཀྱི་ནང་ཇེ་མང་ནས་ཇེ་མང་དུ་སོང་བ་རེད།
ཆོས་དོན་ལ་དག་སེལ་དགག་སྒྲུབ་ཀྱི་མཛུབ་མོ་འཛུགས་མཁན་རབ་བྱུང་བ་ཚོར་མཚོན་ན་གཞན་ཞིག་གི་སྐུལ་སློང་ཟེར་ནའང་ཆོག ཡང་ན་རང་ཉིད་ཀྱི་འདོད་མོས་ཡིན་ཟེར་ནའང་ཆོག གང་ལྟར་ངུར་སྨྲིག་གི་གོས་བཟང་ལུས་ལ་བགོས་ཏེ་འདོན་གྲོང་ཆོག་དང་ཚོགས་ཆོས་གྲྭ་འགྲིམ་པའི་སྐབས་དུས་སུ་དད་པ་དག་སྣང་ཟེར་ནའང་འདྲ། གང་ལྟར་སྐབས་དེར་བསྟུན་གྱིས་ཆོས་ལ་འཛིན་པའི་སྣང་ཚུལ་ཞིག་དང་བསམ་བློ་གཏོང་སྟངས་ཤིག་ཏག་ཏག་ཡོད་པ་རེད། དེ་ནི་བོད་པའི་ཁོར་ཡུག་དེ་བསྟུན་གྱི་ཆོས་པ་ལ་ཆོས་པའི་ཚོད་ཀྱི་བསམ་བློ་ཞིག་ཡོད་པ་དེའི་གཤིས་ལུགས་ཏེ། འཆང་བུ་བཅོས་ནས་བགེགས་སེལ་གྱི་དག་སྣང་སྒོམ་པའི་རུམ་ཁུགས་ན་འདའ་མ་ཐུབ་པར་ཡོད་པ་དེ་རེད། སྣང་ཚུལ་དེ་ནི་དེང་སྐབས་སྐུ་ཞབས་ཞོགས་དུང་གི་ལད་ཟློས་རྗེས་འབྲངས་པ་མང་པོ་ཞིག་གིས་ངོས་ཟིན་ཡོད་པའི་ཁུལ་གྱིས་ཁ་ཡར་གྲག་དང་མར་གྲག་ལ་གླེང་གིན་པའི་བག་ཆགས་ཟེར་བ་དེས་ལྷད་ཡོད་པས་ཡིན་རྒྱུ་རེད།
ཡིན་ནའང་དེང་སྐབས་ཁོ་ཚོའི་ཁྲོད་དུ་ཆོས་གོས་ལུས་ལ་བགོས་ནས་ཆོས་དོན་ལ་དག་སེལ་དགག་གཞག་གི་མཛུབ་མོ་འཛུགས་མཁན་གྱི་གྲས་བྱུང་གིན་ཡོད་པའི་སྣང་ཚུལ་དེ་ནི་ཆོས་དོན་ལ་རྟོག་རིག་གི་གདེང་ཐོབ་ནས་རྨོངས་གཉིད་ཀྱི་དྲ་བ་ལས་སངས་སོང་བའི་རང་རྟགས་ཕྱིར་མངོན་པ་ཞིག་མ་རེད། དོན་དམ་དུ་བཤད་ན་རང་ཚུགས་མ་ཐུབ་པའམ་རང་རྟོན་གྱི་བསམ་བློ་མེད་པར་གཞན་གྱི་ལད་ཟློས་ཀྱིས་ཚོད་ཚོད་ལ་འཕག་འཚག་རྒྱག་གིན་ཡོད་པ་རེད།
འོ་ན་ཆོས་ལུགས་ཀྱི་ངོས་ཐད་ལ་སྐྱོན་ཉེས་དོགས་སློང་གིས་སྤྱི་ཚོགས་ཀྱི་འགལ་འདུའི་གནས་བབ་གླེང་རྒྱུ་མེད་པ་ཨེ་རེད་ཟེར་ན། དེ་ནི་མ་ཡིན་ཏེ། ཡང་དག་པའི་ཆོས་ལ་མ་དག་ཆོས་མིན་གྱི་ལྟ་སྤྱོད་གང་མང་མང་ཞིག་འདྲེས་པའི་སླད་སྐྱོན་གྱིས་གོས་ཏེ་མི་སེམས་ལ་བཙན་འཛུལ་བཀག་སྡོམ་གྱིས་སྤྱི་ཚོགས་ཧྲིལ་པོའི་འཕེལ་རྒྱས་ལ་གནོད་སྐྱོན་ཏག་ཏག་ཐེབས་ཀྱིན་ཡོད་པ་རེད། དེའི་ཕྱིར་དེ་ལ་དཔག་པའི་ཆོས་ཀྱི་གཞུང་དོན་མཐུལ་རྟོགས་ངེས་ཤེས་ཀྱི་ཡོན་ཏན་ངོ་གནོང་མི་དགོས་པ་ཞིག་དང༌། དེ་འབྲེལ་གྱི་དོན་གནད་སྐྱོན་ཡོན་ལ་དཔྱོད་རྟོག་གསལ་ཤེས་ཀྱི་རིག་སྟོབས་དཀྱེལ་ཡངས་པ་ཞིག་མེད་ན། གོ་ཐོས་བརྡ་ཤེས་ཙམ་ཞིག་གི་རང་མཐོ་ང་རྒྱལ་གྱིས་ཆོས་དོན་གྱི་གཏིང་ནས་སྔོགས་ཏེ་དག་སེལ་བྱེད་རྒྱུ་ཡིན་ཟེར་ན་དེ་ནི་མཛུབ་མོ་གཅིག་གིས་གནམ་འགྱོགས་པའི་སྣང་བ་ཙམ་ལས་མ་འདས་སོ།།
དེ་དང་དེར་མཚུངས་ཀྱིས་ང་ཚོ་བོད་མི་རིགས་འདི་དུས་རབས་གསར་པའི་ཁ་དབུགས་སུ་བགྲོད་པར་གཉིད་ལས་སད་སྟངས་དང་འཕག་འཚག་རྒྱག་སྟངས་མ་ཤེས་པར་ཡོད་པའི་སྐབས་འདིར། འུ་ཅག་ན་གཞོན་གསར་པའམ་མི་རབས་གསར་པའི་དཔུང་ཁག་ཆུ་སྣ་གར་ཁྲིད་ལྟར་རང་རྟོན་མེད་པའི་བསམ་བློས་གཅིག་གིས་གཅིག་གི་ལད་ཟློས་རྐྱང་རྐྱང་ལ་འཚང་ཁ་ཤིག་ཤིག་གིས་ཞུགས་ནས་འདུག་པ་ནི་སྤྱི་འགྲོས་ཤིག་ཆགས་འདུག དེའི་ཕྱིར་སྤྱི་ཚོགས་ཀྱི་གནས་བབ་ལ་དཔག་སྟེ་རང་རང་གི་ངོས་ཐད་ནས་གསར་གཏོད་ཀྱི་ལམ་ཁ་ཞིག་འཚོལ་སྒྲུབ་བྱེད་པའི་སྒུལ་ཤུགས་ཧ་ཅང་ཞན་པའི་ཚུལ་དུ་ཡོད་པ་ནི་མི་རབས་གསར་པའི་གྲལ་དཔུང་ཡིན་ཟེར་མཁན་ཚང་མས་ཤེས་དགོས་པ་དང་གཟབ་དགོས་པའི་གནད་དོན་ཞིག་རེད་ཅེས་རང་གི་བསམ་ཚུལ་ཙམ་གླེང་བ་ཡིན།