ཕུན་ཚོགས།
ཉེ་བའི་དུས་རབས་གོང་མ་ནས་བོད་དོན་འཐབ་རྩོད་ཀྱི་ཁ་ཕྱོགས་དབུ་མའི་ལམ་དུ་ཕྱོགས་ཡོད་ཅིང་། དབུ་མའི་ལམ་དུ་ཕྱོགས་པའི་བརྒྱུད་རིམ་ཀྱང་མང་མོས་ཟེར་བའི་ཚིག་འདི་བརྒྱུད་སྔ་ས་ནས་ལམ་དུ་ཆས་ཚར་ཡོད། དབུ་མའི་ལམ་གྱི་ཁ་ཕྱོགས་ལ་ངེས་པ་རྙེད་ཀྱང་ཆོག་ལ་མ་རྙེད་ཀྱང་ཆོག་མོད། བོད་ཀྱི་ཆབ་སྲིད་ལོ་རྒྱུས་ཀྱི་འཕེལ་རིམ་སྔ་ས་ནས་ཕྱིར་མི་བཟློག་པའི་གནས་སུ་གཏན་ཁེལ་ཚར་བ་ནི་ཅིས་ཀྱང་ཧ་གོ་དགོས་ཤིང་། ད་ལྟ་ལོ་རྒྱུས་དང་ཆབ་སྲིད་སོགས་གང་གི་ངོས་ནས་བལྟས་ཀྱང་སེམས་ནས་དུས་ཚོད་སྐར་ཆ་གཅིག་ལའང་འབོར་མི་ཉན་པའི་གནད་འགག་གལ་ཆེན་ཞིག་ཏུ་གྱུར་ཚར་བའང་ཧ་གོ་དགོས།
དེ་ལས་ཀྱང་གལ་ཆེ་བ་ནི། བོད་ཀྱི་གཞུང་ཟེར་བའི་མིང་ཚིག་འདི་ཡོད་ཀྱང་ཡོད་གོ་མི་ཆོད་པ་དང་། མེད་ཀྱང་མེད་གོ་མི་ཆོད་པའི་གནས་སུ་གྱུར་ཡོད་པ་ནི་སྤྱི་འཐུས་སྐབས་གང་དང་དུས་གང་ལའང་རགས་མི་ལས་པ་མ་ཟད། བཙན་བྱོལ་བཀའ་ཤག་་སུ་གཅིག་གི་བྱས་ཉེས་མ་ཡིན་པར། འུ་ཚོས་གཞུང་ཟེར་ཀྱང་ཆོག་ལ། སྒྲིག་འཛུགས་ཟེར་ཀྱང་འཐུས་པའི་གནད་འགག་འདི་ཆབ་སྲིད་ལོ་རྒྱུས་དང་སྐུ་དྲག་ལོ་རྒྱུས་ཀྱི་བཤིབ་བསྡུར་ལས་གསལ་ཁ་དོད་ཡོང་བ་གསལ་བོ་ཡིན་སྟབས། ལོ་རྒྱུས་ལ་ཕྱིར་བལྟ་དང་དངོས་ཡོད་སྤྱི་ཚོགས་ལ་ཞིབ་ལྟ་བྱ་རྒྱུ་ནི་གལ་འགངས་ཤིན་ཏུ་ཆེ་བ་ཡིན།
ཆབ་སྲིད་ཆེད་མཁས་པ་མང་པོ་ཞིག་གིས། ལོ་རྒྱུས་དང་ཁྲིམས་ལུགས་ཀྱི་ཉིན་སྲུབ་གང་དུ་དཔང་རྟགས་རླུང་གིས་མི་ཁོག་པ་ཇི་ལྟར་ཡོད་ཀྱང་། འདས་པའི་ལོ་རྒྱུས་ལ་གདེང་འཇོག་བྱེད་རྒྱུ་ཙམ་ལས་མ་འོངས་སྔོན་དཔག་གི་སྐྱ་ཐིག་འདེབས་ཡུལ་ལ་མི་རུང་བ་གཏན་ཁེལ་བཞིན་དུ། འུ་ཚོས་ཅི་ཞིག་དཔྱད་ཅིང་གང་ཞིག་རྩོད་ཀྱིན་ཡོད་དམ། གང་ལྟར་ཆབ་སྲིད་ཐ་སྙད་ཀྱི་རྩོད་པ་འདི་ནི་དོན་མེད་ཀྱི་རྩོད་པ་ཞིག་རེད་ལ། དོན་མེད་ཀྱི་རྩོད་པ་འདིས་ནི་སླར་ཡང་ཆབ་སྲིད་ཀྱི་གོ་བ་མག་མོག་ནས་བན་བུན་གྱི་གནས་སུ་སྐྱེལ་གྱིན་པ་གསལ་བོ་ཡིན་སྟབས། ཆབ་སྲིད་ཀྱི་མིག་རྒྱང་དང་དཔྱོད་ཤེས་བཅས་ཡོད་པའི་ཆེད་ལས་ཉམས་ཞིབ་པ་དག་བརྒྱུད། འུ་ཚོའི་མིག་མདངས་དང་གོ་བ་དག་ལ་བསྐྱར་ཞིབ་བྱ་དགོས་ཀྱི་ཡོད་པ་དེ་གསལ་བཤད་བྱེད་ཀྱིན་འདུག
གསལ་བོ་བཤད་ན། གཞུང་དང་སྒྲིག་འཛུགས་ཀྱི་རྩོད་པ་འདི་ནི་ཕ་ཤི་བའི་རྗེས་ཀྱི་མིང་ལ་རྩོད་པ་བྱེད་ཀྱིན་པ་རང་ཡིན་པ་དང་། མ་གྲོངས་པའི་ཤུལ་གྱི་སྐྲ་ལ་ཚོས་གཞི་ཞུགས་མིན་གྱི་རྩོད་པ་བྱེད་པ་དང་ཀུན་ནས་མཚུངས་སྟབས། ངེས་པར་འུ་ཚོའི་ལོ་རྒྱུས་ལ་ངེས་ལེན་དང་། དངོས་ཡོད་ལ་དང་ལེན་བཅས་བྱེད་དགོས་ཀྱི་ཡོད། འདི་ནི་འདོད་ཀྱང་ཆོག་ལ་མ་འདོད་ཀྱང་རུང་བའི་ལོ་རྒྱུས་ཀྱི་འགྱུར་བ་ཞིག་དང་། ཆབ་སྲིད་ལོ་རྒྱུས་ཀྱི་དངོས་ཡོད་སྤྱི་ཚོགས་ལ་གོམ་པ་སྤོ་ཚུལ་གྱི་བདེན་པ་ར་འཕྲོད་པ་ཞིག་བཅས་ཡིན་སྟབས། སུ་ལའང་ལེ་བདའ་བྱེད་རྒྱུ་མེད་ཅིང་། གང་ལའང་མིག་ཆུ་འདོན་རྒྱུ་མེད་པར། མིག་ཆུ་ཤམ་ཤམ་དང་སྐྱོ་བ་ལྷང་ལྷང་གིས་དང་ལེན་མི་བྱེད་རང་བྱེད་དུ་གྱུར་ཡོད་པ་ཧ་གོ་དགོས་སོ།
གོ་རྒྱུ་ཡག་པོ་འདུག
གོ་བ་བཟང་གི། རྡོ་སྤུས་པ་ལ་བཀའ་དྲིན་ཆེ་ཞུ་གི་ཡོད།