ཆོས་སྟོན་ལ་ཕེབས་རོགས།

སློབ་དཔོན་འཇིགས་མེད་བློ་གྲོས་རྒྱལ་མཚན།

ཤ་རུས་གདུང་རྒྱུད་གཅིག་ཏུ་འབྲེལ་ཞིང་། འཇིག་རྟེན་གྱི་འདྲེན་པ་ཆེན་པོ་༧གོང་ས་སྐྱབས་མགོན་རྒྱལ་བའི་དབང་པོས་དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཚོམ་བུ་གཅིག་ཏུ་སྨིན་པར་མཛད་པའི་ཆོས་གྲོགས་རྣམ་པ། ཁོ་བོ་འཇིགས་མེད་བློ་གྲོས་རྒྱལ་མཚན་མིང་ཅན་གྱིས་ལོ་སྔོན་མའི་ཕྱི་ཟླ་དྲུག་པ་ཙམ་ནས་མགོ་བཙུགས་ཏེ་ཁ་སང་གི་བར། ཉིན་མཚན་ལྷོད་མེད་ཀྱི་བརྩོན་པ་ཆེན་པོས་སྔ་འགྱུར་རྒྱུད་འབུམ་ཆེན་མོར་དཀར་ཆག་ཤིན་ཏུ་རྒྱས་པ། དེབ་ཆེ་ཚད་ཀྱི་ཤོག་ངོས་བརྒྱད་བརྒྱར་ལོངས་པའི་ཚད་ཙམ་ཞིག་ལེགས་པར་བྲིས་ཏེ་མཇུག་གྲུབ་པ་ཡིན་ཞིང་། སྤྱིར་སྔ་འགྱུར་རྒྱུད་འབུམ་རིན་པོ་ཆེ་ལ་རིག་འཛིན་འཇིགས་མེད་གླིང་པས་མཛད་པའི་དཀར་ཆག་འཛམ་གླིང་མཐའ་གྲུ་ཁྱབ་པའི་རྒྱན་དང་། དགེ་རྩེ་འགྱུར་མེད་ཚེ་དབང་མཆོག་གྲུབ་ཀྱིས་མཛད་པའི་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་ལྷའི་རྔ་བོ་ཆེ་ལྟ་བུའི་གཏམ་དང་། དུས་ཕྱིས་མི་ཉག་ཐུབ་བསྟན་ཆོས་དར་གྱིས་བརྩམས་པའི་རྙིང་མ་རྒྱུད་འབུམ་གྱི་དཀར་ཆག་གསལ་བའི་མེ་ལོང་རྣམས་བཞུགས་ཀྱང་། ཀུན་མཁྱེན་འཇིགས་མེད་གླིང་པས་མཛད་པའི་དཀར་ཆག་ནི། བདེ་བར་གཤེགས་པའི་བསྟན་པ་སྤྱི་དང་། བྱེ་བྲག་ནང་རྒྱུད་ཡོ་ག་སྡེ་གསུམ་གྱི་བྱུང་བ་རིག་འཛིན་བརྒྱུད་པ་དང་བཅས་པའི་ལོ་རྒྱུས་བཞུགས་པས་རྙིང་རྒྱུད་སྤྱིའི་ཆོས་འབྱུང་གི་ཆ་ལག་ཏུ་གྱུར་པ་ལས། གླེགས་བམ་གྱི་བཞུགས་བྱང་ནི་འཇིགས་མེད་གླིང་པ་རང་གིས་བཞེངས་པའི་རྒྱུད་འབུམ་གྱི་དཀར་ཆག་ཡིན་པས་ད་ཡོད་རྒྱུད་འབུམ་རྣམས་ཀྱི་དཀར་ཆག་ཏུ་བཀོལ་མི་བཏུབ་ཅིང་། དགེ་རྩེའི་རྙིང་རྒྱུད་དཀར་ཆག་ནི་སྡེ་དགེའི་རྒྱུད་འབུམ་གྱི་དཀར་ཆག་ཡིན་ཡང་། གཙོ་བོ་ཆོས་ཀྱི་བྱུང་བ་སྤྱིའི་ལོ་རྒྱུས་རྒྱ་ཆེ་ཞིང་རྒྱས་པར་བྱུང་བ་ལས། གླེགས་བམ་སོ་སོའི་དཀར་ཆག་ཧ་ཅང་བསྡུས་ཆེ་ཞིང་། མདོར་བསྡུས་སུ་བཞུགས་པ་དེ་ཡང་རྒྱུད་འབུམ་རང་གི་གླེགས་བམ་རེ་རེ་དང་གཏུགས་སྐབས་ལེའུའི་གྲངས་དང་། འགྱུར་བྱང་སོགས་མི་འདྲ་བས་མ་བུ་ངོ་སྤྲོད་བྱེད་མི་ཐུབ་ས་ཤིན་ཏུ་མང་བ་དང་། མི་ཉག་དཀར་ཆག་ཀྱང་གོང་ལྟར་བསྡུས་ཆེ་བའི་ཁར་ཅིས་ཀྱང་དགོས་པའི་དོན་མང་པོར་མཐའ་མ་བཅད་ཅིང་། མགོ་མཇུག་ཀུན་ཏུ་ནོར་ཡོད་ས་ཡང་ཧ་ཅང་མང་བས། འདིར་དོན་གཉེར་ཅན་རྣམས་ལ་ཕན་པ་དང་། མ་འོངས་པའི་བསྟན་རྒྱུན་ལ་ངེས་པར་མཁོ་ཞིང་མེད་དུ་མི་རུང་བར་མཐོང་ནས། ཡི་དམ་ཞི་ཁྲོའི་ལྷ་ཚོགས་ཀྱི་སྤྱན་སྔར་ཅི་འབྱོར་གྱི་མཆོད་པ་དང༌། བསྐང་བཤགས་བསྟོད་གསོལ་སོགས་སྔོན་དུ་བཏང་སྟེ། ཡོ་ག་སོ་སོའི་རྒྱུད་སྡེའི་བཞུགས་ཚུལ་དང་། ཞུ་དག་ཁུངས་ཕེར་སོགས་ཕྱོགས་གང་ཐད་ནས་སྡེ་དགེ་ལྷུན་གྲུབ་སྟེང་དུ་བཞུགས་པའི་རྒྱུད་འབུམ་འདི་ཁོ་ན་གཞན་ལས་འཕགས་པས། འདི་ཉིད་གཞིར་བཟུང་ནས་དཀར་ཆག་འབྲི་བའི་བརྟུལ་ཞུགས་དང་དུ་བླངས་པ་ཡིན།
སྤྱིར་དཀར་ཆག་འདི་ཡང་ཕྲན་གྱིས་ལོ་མང་པོའི་སྔོན་ནས་འབྲི་བཞིན་པའི་༼རང་བཞིན་རྫོགས་པ་ཆེན་པོའི་ཆོས་འབྱུང་མདོ་རྒྱུད་བསྟན་བཅོས་བཀའ་གཏེར་དག་སྣང་གི་ཐེམ་བྱང་ཆེན་མོ་ ༽ཞེས་བྱ་བའི་ཆ་ཤས་ཤིག་ཡིན་རུང་། དོན་གཉེར་ཅན་རྣམས་ཀྱི་ཉེར་མཁོའི་ཆེད་དུ་གནས་སྐབས་སུ་དེབ་ཧྲིལ་པོ་གཅིག་ལྟ་བུར་མགོ་མཇུག་ཚང་བ་ཞིག་བྱས་ནས་བྲིས་ཡོད། རྒྱུད་འབུམ་གྱི་དཀར་ཆག་འདི་ཉིད་འབྲི་སྐབས་མ་ཕྱི་མཚལ་དཔར་ཡིན་པ་དང་། ཡི་གེ་མི་གསལ་བ་སོགས་ཀྱིས་ཚེ་གཅིག་ལ་བརྗེད་དཀའ་བའི་དཀའ་ལས་ཤིག་རྒྱག་དགོས་བྱུང་བར་བརྟེན། མཇུག་ལེགས་པར་གྲུབ་རྗེས་ཆོས་སྟོན་ཕྲན་བུ་ཞིག་བྱེད་འདོད་པ་ཡིན་ཞིང་། དེ་ཡང་དེ་རིང་ཕྱི་ཟླ་༦པའི་ཚེས་༥ཉིན་ནི་ཁོ་བོའི་འདུན་གྲོགས་མོན་བཟའ་ཚེ་དབང་རིག་འཛིན་ཆོས་སྐྱིད་དབང་མོ་ལགས་ཀྱི་སྐྱེས་སྐར་གྱི་ཉིན་ཡིན་པས། ཁོ་བོ་འབྱོར་བས་དམན་པའི་ཐོས་བསམ་པ་དཀྱུས་མ་ཞིག་ལ་གསེར་དངུལ་ཕ་ལམ་སོགས་ཀྱི་ལེགས་སྐྱེས་འབུལ་རྒྱུ་མེད་པར་བརྟེན། རང་གི་ཤེས་རབ་ཀྱི་ལག་རྗེས་ལས་བྱུང་བའི་དམ་པ་ཆོས་ཀྱི་གྲུབ་འབྲས་འདི་ཉིད། ཁོ་མོའི་བསོད་ནམས་གོང་དུ་འཕེལ་བའི་རྟེན་འབྲེལ་གྱི་ལེགས་སྐྱེས་སུ་འབུལ་ཆེད་ཆོས་སྟོན་ཡང་ཁོ་མོའི་སྐྱེས་སྐར་གྱི་ཉི་མ་འདི་དང་ཁེལ་བར་བྱས་ཏེ། དེ་རིང་ཕྱི་ཚེས་༤རེས་གཟའ་སྤེན་པའི་ཉིན་མཇུག་ཡོངས་སུ་རྫོགས་པར་བྲིས་པ་ཡིན།
འོན་ཀྱང་ཕྲན་བུ་རང་ནི་ཁ་པར་དང་གནམ་ཀླད་སོགས་ཀྱི་བརྒྱུད་ལམ་ཙམ་མ་གཏོགས། ལོ་ཧྲིལ་པོ་གཅིག་གི་རིང་བོད་རིགས་སྤུན་ཟླ་རྡོག་གཅིག་དང་ཐུག་དཀའ་བའི་ཨ་རིའི་ས་དཀྱོག་ལུང་ཁུག་ཅིག་ཏུ་སྒུར་བསྡད་ཡོད་པས། རིགས་པའི་གྲོགས་པོ་རྣམས་དང་ཆོས་སྟོན་མཉམ་དུ་འཇོག་ཐབས་མེད་པར་བརྟེན། ཕྲན་སྒེར་གྱི་དྲ་རྒྱ་ http://lightof-wisdom.blogspot.com དང་། ངོ་དེབ་ http://www.facebook.com/#!/profile.php?id=100002059112077 ཕྲན་དང་འབྲེལ་བ་ཡོད་པའི་དྲ་རྒྱ་ http:// www.amahoweb.org བཅས་ཀྱི་ཐོག་ཏུ་ཆོས་གྲོགས་རྣམས་གདན་ཞུ་བྱས་ཏེ་དྲ་ལམ་གྱི་ཆོས་སྟོན་འཇོག་རྒྱུ་ལས་ཐབས་གཞན་མེད་ཅིང་། དེ་ཡང་དཀའ་ལས་བྱས་པའི་གྲུབ་འབྲས་རྣམས་ཁྱེད་རྣམས་ཀྱི་སྤྱན་སྔར་བཀོད་དེ། སུ་ལ་མཁོ་ཡང་འདིར་ཕེབས་ནས་རིན་མེད་དུ་བཞེས་རོགས་གནང་ཞུ་བ་ཙམ་ལས་གཞན་ཅི་བྱ་མི་འདུག་ལགས།
ཞོར་དུ་ཞུ་རྒྱུ་ཞིག་ལ། ཕྲན་གྱི་གློག་འཕྲིན་ཁ་བྱང་རྙིང་པ་བེད་མེད་དུ་གྱུར་ནས་ཡུན་རིང་འགོར་ཟིན་སྟབས། རྒྱལ་ཕྱི་ནང་དུ་བཞུགས་པའི་རིགས་པའི་གྲོགས་པོ་མང་དག་ཅིག་གིས་ཡིག་འབྲེལ་གནང་ཡང་། ཡིག་ལན་ཕུལ་མ་སོང་དགོངས་བཞིན་ཡོད་སྐད་འདུག་པས། ཕྲན་ལ་ཡིག་འབྲེལ་གནང་འདོད་ཡོད་མཁན་རྣམས་ཀྱིས་གློག་འཕྲིན་ཁ་བྱང་འདིའི་ yeshede_bci@yahoo.com ཐོག་ནས་འབྲེལ་བ་གནང་རོགས་ཞུ་བ་ལགས།
སླར་རྗེ་བཙུན་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་བྱང་ཆུབ་ལམ་གྱི་རིམ་པ་མཛད་པའི་མཐར། དེར་ནི་རིང་དུ་འབད་ལས་ཚོགས་གཉིས་ནི།། མཁའ་ལྟར་ཡངས་པ་གང་ཞིག་བསགས་པ་དེས།། བློ་མིག་མ་རིག་གིས་ལྡོངས་འགྲོ་བ་རྣམས།། རྣམ་མཁྱེན་རྒྱལ་བའི་གོ་འཕང་ཐོབ་པར་ཤོག། ཅེས་སོགས་ཀྱི་ཐུགས་སྨོན་མཛད་པའི་རྗེས་སུ་འབྲངས་ཏེ། འདིར་ཡང་སྔ་འགྱུར་རྒྱུད་འབུམ་རིན་པོ་ཆེའི་དཀར་ཆག་ལེགས་པར་གྲུབ་པའི་ཆོས་སྟོན་དུ་སྨོན་པ་ནི།

ཨོཾ་སྭ་སྟི། སྐྱེས་སྦྱངས་ཤེས་རབ་སྤོབས་པའི་རྒྱ་མཚོ་ལས།།
ཤུགས་དྲག་བརྩེ་བས་འཕྱུར་བའི་རྦ་རླབས་འདིས།།
མཚན་འཛིན་བྱེ་མའི་ཁང་བུ་རབ་བཅོམ་ནས།།
གཉིས་སྣང་འཁྲུལ་བའི་གདུང་བ་འཕྲོག་གྱུར་ཅིག།

ཐུགས་རྗེ་དྲི་མེད་འོད་ཟེར་སྟོང་འབར་བ།།
ཀློང་ཆེན་རབ་འབྱམས་རྒྱལ་པོའི་དགོངས་པ་ཡི།།
སྒོམ་པ་མཁྱེན་བརྩེའི་འོད་ཀྱིས་ས་གསུམ་གསལ།།
རྒྱལ་བའི་མྱུ་གུའི་སྤྱོད་ལ་གནས་པར་ཤོག།

མདོ་རྒྱུད་མན་ངག་རྒྱ་མཚོའི་ཕ་རོལ་ཏུ།།
ཐོས་བརྩོན་ཤེས་རབ་གཟིངས་ཀྱིས་རབ་བརྒལ་ཏེ།།
འོད་གསལ་ཐེག་པ་མཆོག་གི་སེང་གེའི་སྒྲ།
འཇིགས་བྲལ་རྒྱུན་མི་ཆད་པར་སྒྲོག་གྱུར་ཅིག།

སྣང་སྲིད་གདོད་ནས་ཡེ་དག་རྒྱལ་བའི་སྐུ།།
དོན་དམ་མཉམ་པ་ཆེན་པོའི་ཕྱག་རྒྱ་རུ།།
དབྱེར་མེད་སྒྱུ་འཕྲུལ་དྲྭ་བའི་ལམ་གྱི་གསེང་།།
འགྲོ་བ་ཀུན་གྱི་སྙིང་ལ་གནས་གྱུར་ཅིག།

ཕུང་པོ་ཁམས་དང་དབང་ཡུལ་རྟོག་པའི་ཚོགས།།
བདེ་གཤེགས་ཞི་ཁྲོ་སེམས་དཔའི་སྐུར་རྫོགས་པ།།
གདན་གསུམ་རྒྱལ་བ་དགྱེས་པའི་དཀྱིལ་འཁོར་ཆེ།།
རྒྱུད་ལྔར་འཕྱན་པའི་འགྲོ་ལ་མངོན་གྱུར་ཅིག།

གདོད་མའི་མགོན་པོ་དཔལ་ལྡན་བླ་མ་ལས།།
དོན་བརྒྱུད་རྟོགས་པ་འཕོས་པའི་བྱིན་རླབས་ཀྱིས།།
རྩོལ་མེད་རང་བྱུང་ལྷུན་གྲུབ་རིག་པའི་གཤིས།།
སྒྲིབ་བྲལ་རྗེན་པའི་རང་ངོ་མཐོང་གྱུར་ཅིག།

གང་དུ་བཅོམ་ལྡན་འདས་པའི་དཀྱིལ་འཁོར་དུ།།
རང་སྣང་ཞི་ཁྲོའི་འཁོར་ལ་དབང་བསྒྱུར་བ།།
འོག་མིན་ལྷུན་གྲུབ་ཆེན་པོའི་རྒྱལ་ཐབས་ཀྱི།།
ཀུན་བཟང་རྒྱལ་པོའི་ཁྲི་ལ་དབང་བསྒྱུར་ཤོག།

རྒྱལ་བསྟན་དྲི་མེད་དར་ཞིང་ཡུན་དུ་གནས།།
བསྟན་འཛིན་སྐྱེས་བུའི་སྐུ་ཚེ་མཛད་ཕྲིན་འཕེལ།།
མ་ལུས་སྐྱེ་དགུ་བདེ་དགའི་དཔལ་གྱིས་འཚོ།།
ཡངས་པའི་འཇིག་རྟེན་ཀུན་ཏུ་ཤིས་གྱུར་ཅིག།
ཅེས་ཕྲན་འཇིགས་མེད་བློ་གྲོས་རྒྱལ་མཚན་ནམ་མིང་གཞན་སློབ་དཔོན་སྣ་ཚོགས་གཟུགས་ཅན་དུ་འབོད་པས་ཕྱི་ལོ་༢༠༡༡ཟླ་༦ཚེས་༤ཉིན་ཕུལ་བ་དགེ་ལེགས་འཕེལ།། །།