ཏྲེ་ཧོར་ཐུབ་བསྟན་གྱིས།
བཙན་བྱོལ་གཞུང་གི་མིང་བརྗེ་བསྒྱུར་གྱིས་སྒྲིག་འཛུགས་ཞེས་བཏགས་པའི་ཆབ་སྲིད་ཀྱི་ ཁ་ཕྱོགས་གསར་པའི་གནད་དོན་དེར་དཔྱད་ཞིབ་བྱེད་པར་ཐོག་མར་ལྷ་སའི་བོད་གཞུང་དགའ་ ལྡན་ཕོ་བྲང་ནས་འགོ་བཙུགས་དགོས་པར་བསམ། གང་ལགས་ཤེ་ན། འདི་ལོ་རྒྱུས་ཀྱི་བརྒྱུད་རིམ་ཞིག་དང་འབྲེལ་བ་ཡོད་ཅིང་གནད་དོན་དེ་རྣམས་གཞིར་ བཟུང་དེ་ཕྱོགས་ཡོངས་ལ་བལྟས་ནས་བཤད་ན་ད་གཟོད་ཤེས་རྟོགས་ཐུབ་ངེས།
བོད་གཞུང་དགའ་ལྡན་ཕོ་བྲང་ནི་རྒྱལ་བ་ལྔ་པ་ཆེན་པོའི་སྐབས་སུ་གསར་ཏུ་གཏོད་ཅིང་སྲིད་འཛིན་གྱི་ཁྱབ་ཁོངས་ཀྱང་དབུས་གཙང་ཆོལ་ཁ་ལས་མ་བརྒལ་བ་ལོ་རྒྱུས་ཀྱི་ཡིག་ཆ་དག་ལས་གསལ།བར་སྐབས་ཀྱི་མི་ལོ་བརྒྱ་ཕྲག་ཁ་ཤས་རིང་དགའ་ཕོ་བྲང་གཞུང་དང་བོད་གཞུང་གི་མིང་ཐོག་ནས་སྲིད་བསྐྱངས་པ་རེད། འོན་ཀྱང་། ཕྱིས་ཀྱི་དུས་འགྱུར་ཆེན་མོའི་ཡོ་ལང་ཁྲོད་རྒྱ་ནག་གི་སྲིད་དབང་གུང་ཁྲན་གྱིས་བཟུང་བ་ནས་བཟུང་ལྷ་སའི་བོད་སྡེ་པ་གཞུང་དང་པན་ཅིན་པར་དུ་འཆིང་ཡིག་དོན་ཚན་བཅུ་བདུན་ཅན་བཞག་པ་ནས་བོད་རང་བཙན་གྱི་རྣམ་པ་རྨང་ནས་བཤིག་ཅིང་རྩར་ནས་བྲེག་ཏེ་ས་གནས་སྲིད་གཞུང་གི་ངོ་བོར་བསྒྱུར་བ་རེད།དོན་དུ་དེ་ནི་བཙན་ཤེད་ཀྱིས་བཞག་པ་ཞིག་ཡིན་ཀྱང་ལག་ལེན་ཁྲོད་བོད་ཀྱི་སྲིད་དབང་རྩིས་སྤྲོད་བྱས་ཟིན། རིམ་བཞིན་རྒྱ་གཞུང་གིས་དོན་ཚན་ཁག་རྩིས་མེད་ཀྱིས་དྲག་གནོན་བྱུང་སྐབས་ད་གཟོད་རྒྱལ་བ་རིན་པོ་ཆེ་གཙོས་པའི་བོད་སྲིད་གཞུང་གི་མཐོ་རིམ་མི་སྣ་ཕལ་ཆེར་རྒྱ་གར་དུ་སྐྱབས་བཅོལ་ལ་འབྱོར་ཡོད་པ་རེད།དུས་དེ་བཟུང་བོད་གཞུང་དགའ་ལྡན་ཕོ་བྲང་གི་སྲིད་འཛིན་གྱི་ས་ཁུལ་ཁག་ཡོངས་རྗོགས་རྒྱ་གཞུང་གི་ཐད་ཀར་དབང་བསྒྱུར་འོག་ཤོར་ཡོད་པ་དང་། བོད་དུ་དགའ་ཕོ་བྲང་ཞེས་པའི་མིང་དེ་གཏིང་ནས་མེད་པར་དུ་གྱུར་པ་རེད། འོན་ཀྱང་། དགའ་ལྡན་ཕོ་བྲང་གཞུང་གི་དབུ་ཁྲིད་རྣམས་ནི་ད་དུང་རྒྱ་གར་ཏུ་ཡོད་པས་ཁོང་ཚོས་བོད་རང་བཙན་སླར་གསོའི་ཁྱབ་བསྒྲགས་སྤེལ་ཡོད། དེ་ལྟར་ནའང་དོན་དུ་བོད་ཀྱི་འཛིན་སྐྱོང་ཡོད་དོ་ཅོག་སྔར་གུང་ཁྲན་གྱི་ལག་ཏུ་ཡོད་པས་དེ་ནི་རང་བཙན་སླར་གསོའི་སྒྲིག་འཛུགས་ཙམ་ལས་དོན་མཚན་ཉིད་ཚང་བའི་གཞུང་ཞིག་ལ་ངོས་འཛིན་བྱས་ཐབས་བྲལ། རྒྱུ་མཚན་ནི། རྒྱལ་ཁབ་སུ་ཞིག་གི་གཞུང་གང་ཞིག་ཡིན་ནའང་གཞུང་དེ་ནི་རྒྱལ་ཁབ་གོང་བུར་དབང་བསྒྱུར་བའི་ཆབ་སྲིད་ཀྱི་ཚོགས་པ་ཞིག་ཡིན་དགོས་ཤིང་།རྡ་རམ་ས་ལའི་གཞུང་ལ་དེ་དག་གི་ཆ་རྐྱེན་མེད་པ་མ་ཟད།རང་ཉིད་ཀྱང་གཞན་ཡུལ་དུ་ཉེན་ཡོལ་ལམ་སྐྱབས་བཅོལ་དུ་འབྱོར་བའི་ཡུལ་གྱར་པ་ཡིན་པས་རེད། ཡིན་ནའང་རྒྱལ་བ་རིན་པོ་ཆེས་དབུ་ཁྲིད་པའི་བཙན་བྱོལ་བོད་མི་རྣམས་ཀྱིས་རྒྱལ་སྤྱི་ཚོགས་ཐོག་བོད་དོན་ཁྱབ་བསྒྲགས་ཀྱི་ལས་འགུལ་ཧ་ཅང་ཚགས་ཚུད་དང་ལམ་ལྷུང་ བྱུང་ཡོད་ཅིང་།དེང་གི་དུས་འདིར་མི་སུས་ཀྱང་ཤེས་པའི་རྒྱལ་སྤྱི་རང་བཞིན་ཅན་གྱི་གནད་དོན་ཞིག་ཆགས་པ་དེའང་བཙན་བྱོལ་དུ་ཡོད་པའི་རྒྱལ་བ་རིན་པོ་ཆེ་དང་དེའི་གཞུང་གིས་ལས་དོན་གྱི་གྲུབ་འབྲས་ཉག་གཅིག་རེད། བོད་དོན་འདི་རྒྱལ་སྤྱི་ཅན་དུ་འགྱུར་བ་དེ་ནས་བཟུང་འཛམ་གླིང་གི་སྲིད་གཞུང་གང་མང་ཞིག་དང་བསྟུན་དགོས་པའི་ཆབ་སྲིད་ཀྱི་གནད་དོན་གལ་ཆེ་ཞིག་ཏུ་ཆགས་ཤིང་དེ་དང་ སྟབས་བསྟུན་རྒྱ་ནག་ཀྱང་ཉིན་རེ་བཞིན་རྒྱལ་སྤྱིའི་སྤྱི་ཚོགས་ཁྲོད་རྣམ་པ་གསལ་བའི་སྟོབས་ལྡན་གྱི་རྒྱལ་ཁབ་ཅིག་ཏུ་མཚར་ལོངས་བྱུང་ཡོད་པ་རེད། རྒྱ་ནག་གི་ཡར་རྒྱས་ནི་བོད་རང་བཙན་དང་ཐད་ཀར་འབྲེལ་བ་ཡོད་པའི་གནད་དོན་ཞིགརེད། གང་ལགས་ཤེ་ན། བོད་དོན་རྒྱལ་སྤྱིའི་སྤྱི་ཚོགས་དང་བསྟུན་ནས་ཐག་གཅོད་བྱེད་དགོས་ཤིང་། རྒྱ་ནག་སྟོབས་ཅི་ཙམ་རྒྱས་ན་དེ་ཙམ་གྱི་རྒྱལ་སྤྱིའི་སྤྱི་ཚོགས་ཀྱིས་བསྟུན་དགོས་ངེས་ཆགས་པས་བོད་རང་བཙན་ནི་མི་སྲིད་པའི་ཚད་དུ་སླེབས་པ་རེད།རྒྱལ་བ་རིན་པོ་ཆེས་དོན་དེ་མཁྱེན་ནས་ཐུགས་རྒྱ་ཡངས་པོའི་སྒོ་ནས་བོད་རང་བཙན་རྩོད་ལེན་མི་བྱེད་པའི་ཕུགས་རྒྱང་རིང་བའི་ཆབ་སྲིད་ཀྱི་སྲིད་ཇུས་དེ་གཏན་ལ་ཕབ་ཡོད། ཡོངས་གྲགས་སུ་དབུ་མའི་ལམ་ཞེས་འབོད། དེ་ནས་བཟུང་རིམ་བཞིན་རྒྱ་ནག་དང་མཉམ་དུ་གྲོས་མོལ་ཐེངས་མང་བརྒྱུད་དེ་བོད་ཀྱི་གནད་དོན་ཐག་བཅད་བྱེད་པར་རེ་བཞིན་པ་རེ་བ་རྒྱག་ཡོད། ཡིན་ནའང་གུང་ཁྲན་གཞུང་འཛིན་པས་ད་དུང་མུ་མཐུད་དུ་སྲིད་ཇུས་མཁྲེགས་བཟུང་གིས་ཡ་ལན་སྤྲད་མེད་ཀྱང་དོན་དུ་རྒྱལ་སྤྱིའི་སྤྱི་ཚོགས་དང་ལྷག་པར་བོད་མི་མང་ཆེ་བའི་སྤྱི་མོས་ཀྱི་རྒྱབ་སྐྱོར་ཐོབ་པའི་སྲིད་ཇུས་གཅིག་པོ་དེ་ཆགས། པན་ཅིན་གཞུང་དང་མཉམ་དུ་གྲོས་མོལ་གྱི་བརྒྱུད་རིམ་ཐེངས་མང་བརྒྱུད་རྡ་རམ་ས་ལས་ ངོས་ནས་བོད་དུ་མིང་དོན་མཚུངས་པའི་ཆོལ་གསུམ་གཅིག་ཏུ་བསྒྲིལ་བའི་རང་སྲིད་རང་སྐྱོང་ཡོང་ཐབས་ཀྱི་རེ་མདུན་བཏོན་ཡོད་པ་དང་། རྒྱ་གཞུང་ཕྱོགས་ནས་དེ་ལ་འགལ་རྐྱེན་གྱི་ཡི་མ་རང་བའི་རྣམ་འགྱུར་དང་ཡ་ལན་ཡང་སྤྲོད་བཞིན་ཡོད། བོད་རྒྱ་འབྲེལ་མོལ་གྱི་བརྒྱུད་རིམ་འདིར་ད་དུང་དོན་དངོས་ཀྱི་གྲུབ་འབྲས་སོན་མེད་ཀྱང་ཕན་ཚུན་ཕྱོགས་གཉིས་ཀྱི་དགོས་མདུན་ཁག་རྣམ་པ་ཇེ་གསལ་དང་ཁ་གཏིང་ཇེ་གསལ་དུ་བཏང་ཡོད། དེ་བཞིན་བོད་ཀྱི་བདག་དབང་དེ་རྒྱ་ནག་དབུས་གཞུང་ལ་ཡོད་པར་ཁས་བྱས་ཟིན་པ་མ་ཟད། བོད་གཞུང་ཞེས་པའི་མིང་འདི་ཡང་སྔོན་ནས་བརྗེ་བསྒྱུར་བྱས་མེད་ཀྱང་དོན་དུ་སྟོང་པར་གྱུར་ཟིན། གང་ཡིན་ཟེར་ན། ད་ལྟའི་དབུ་མའི་ལམ་གྱི་དགོངས་དོན་ནི་རྒྱ་ནག་དབུས་སྲིད་གཞུང་གི་འཛིན་སྐྱོང་འོག་ཤར་བསྐྱོད་བྱ་རྒྱུའི་སྲིད་ཇུས་ཡིན་པས་རེད། རྒྱལ་ཁབ་གཅིག་ལ་གཞུང་གཉིས་ཡོང་མི་སྲིད་པས་ཀྱང་རེད། ད་ལོར་རྒྱལ་བ་རིན་པོ་ཆེས་ཆབ་སྲིད་ཀྱི་འགན་དབང་ཡོངས་རྗོགས་མི་དམངས་ཀྱི་འོས་འདེབས་བྱས་པའི་མི་འགོ་ཁྲིད་ལ་རྩིས་སྤྲོད་བྱས་ཡོད་པ་དང་འབྲེལ་ཡོད་ཀྱི་རྩ་ཁྲིམས་བསྐྱར་བཅོས་དགོས་པའི་བཀའ་ཡིག་བཞིན་བརྗེ་བསྒྱུར་བྱས་གྲུབ། དེ་དང་མཉམ་དུ་བོད་མི་མང་དག་ཅིག་ལ་ཚོར་ཤུགས་རྣོ་བའི་གནད་དོན་གཅིག་ནི་བོད་གཞུང་ ཞེས་པའི་ཐ་སྙད་འདི་བསྒྱུར་ཡོད་པའི་ཐད་ཀྱི་བསམ་ཚུལ་དེ་རེད། ངས་བལྟས་ན། འདི་ནི་ཧང་སང་དགོས་པ་དང་ཧ་ལས་དགོས་པའི་གནད་དོན་ཅིག་གཏན་ནས་མིན། ད་ལན་བར་མིང་མ་བསྒྱུར་ནས་ཡོད་པ་ཙམ་ལས་དོན་དུ་མིང་འདིའི་དབང་ཆ་སྔར་ནས་རྩིས་སྤྲོད་བྱས་ཟིན། གོང་དུ་བཤད་ཟིན་པ་ལྟར། བོད་གཞུང་གི་གོ་དབང་༥༩ལོ་ནས་འཕྲོག་ཟིན་པ་དང་། རྡ་རམ་ས་ལའི་བོད་གཞུང་གི་མིང་དེའང་དབུ་མའི་ལམ་ཐོག་བསྐྱོད་པ་ནས་དོན་དུ་མི་གནས་པའི་མིང་སྟོང་ཞིག་ཏུ་ཆགས་ཟིན་པས་རེད། ད་ཐེངས་གི་འབྲེལ་ཡོད་ཀྱི་ཐ་སྙད་བརྗེ་སྤོ་དང་རྩ་ཁྲིམས་བསྐྱར་བཅོས་ནི་དབུ་མའི་ལམ་དང་མིང་དོན་མཚུངས་པའི་ལག་ལེན་ཁྲོད་ཀྱི་རྣམ་པ་གསལ་བོ་ཞིག་ཡིན་པ་མངོན་ཡོད་པ་ཡིན། དབུ་མའི་ལམ་གྱི་ཐོག་མཐའ་བར་གསུམ་དུ་ཚིག་དོན་ཁག་དང་ མཐུན་ཞིང་དེ་རང་ཕྱོགས་ནས་ཡང་བསྐྱར་འཐབ་རྩོད་ཀྱི་གྲ་སྒྲིག་གསར་པ་ཞིག་དང་ཆབ་སྲིད་ཀྱི་ལག་ལེན་གལ་ཆེན་ཞིག་ཡིན་ངོས་འཛིན་ཞུ་བཞིན་ཡོད། གཞན་བོད་མི་ཁག་ཅིག་གིས་གཞུང་མིང་བརྗེ་བསྒྱུར་བྱེད་པ་ནི་ཆབ་སྲིད་ཀྱི་གཞི་འཛིན་ས་མེད་ཅིང་བོད་མིའི་ལ་རྒྱ་དང་བོད་ལ་འཛིན་པའི་འདུ་ཤེས་དང་སེམས་ཁམས་ལ་གནོད་པ་དང་འཚེ་བའི་སྐྱོན་དུ་བཤད་པ་ནི་ད་དུང་དབུ་མའི་ལམ་ལ་ལག་ལེན་གྱི་འདུ་ཤེས་མེད་ཅིང་སྔ་ཕྱིའི་ཆབ་སྲིད་ཀྱི་བརྒྱུད་རིམ་ལ་རྒྱུས་ལོན་ཞན་པ། བརྩེ་སེམས་མཚོན་ཐབས་གཅིག་པུའི་ཆབ་སྲིད་གཏན་ནས་སྐྱངས་ཐབས་མེད་པ་དེ་རེད། བདག་གིས་ནི་ད་ཐེངས་ཀྱི་རྡ་སའི་ཆབ་སྲིད་ཀྱི་འཕོ་འགྱུར་དེ་བོད་ཀྱི་ལོ་རྒྱུས་རིམ་བྱུང་ནང་དུ་བྱུང་མ་མྱོང་བའི་ཡར་ཐོན་དང་སྔོན་ཐོན་གྱི་བསམ་བློ་ཞིག་དང་། དེང་གི་ཆབ་སྲིད་གནས་བབ་དང་མཚམས་པའི་བརྒྱུད་རིམ་ཁྲོད་ཀྱི་ལག་ལེན་གལ་ཆེན་དུ་ངོས་འཛིན་བྱེད་ལ། རྗེས་སུ་ཡང་དེ་བསྟུན་གྱི་གྲ་སྒྲིག་འཐུས་ཚང་སྒོས་ལམ་དབུ་མའི་སྲིད་ཇུས་རྒྱུན་བསྐྱངས་དང་མགྱོགས་ནས་མྱུར་དུ་ལམ་ལྷུང་དང་གྲུབ་འབྲས་ཐོན་པའི་རེ་མདུན་ཅི་ནས་ཀྱང་ཆེ་བ་མ་ཟད། རྒྱལ་བ་རིན་པོ་ཆེ་བོད་ལ་མྱུར་དུ་ཆིབས་བསྒྱུར་གྱིས་བོད་ཀྱི་གནད་དོན་ཡོངས་སུ་སེལ་ཏེ་བོད་མི་རྣམས་རང་རང་གི་མི་ཚེ་རྒྱུན་ལྡན་བཞིན་བདེ་སྐྱིད་དང་ལྡན་པ་ཞིག་ཡོང་བའི་སྨོན་འདུན་ཤུགས་དྲག་དང་བཅས།།
ཏྲེ་ཧོར་ཐུབ་བསྟན་ལགས་དྲ་ཐོག་འཕེབ་པར་དགའ་སུ་ཞུ་འོན་ཀྱང་སྐུ་ཉིད་གསུང་པའི་བོད་གཞུང་དགའ་ལྡན་ཕོ་བྲང་ ནི་རྒྱལ་བ་ལྔ་པ་ཆེན་པོའི་སྐབས་སུ་གསར་ཏུ་གཏོད་ཅིང་སྲིད་འཛིན་གྱི་ཁྱབ་ཁོངས་ ཀྱང་དབུས་གཙང་ཆོལ་ཁ་ལས་མ་བརྒལ་བ་ལོ་རྒྱུས་ཀྱི་ཡིག་ཆ་དག་ལས་གསལ་ཞེས་གསུང་འདུག་འོ་ན་ཁམ་ཀྱི་ས་ཆ་རྡེམ་ཆེན་ཉེར་ལྔ་དང་ཆབ་མདོ་ལ་སོགས་པ་དེ་ཚོ་དབུས་གཙང་མཆོག་ཁའི་ཁུང་ལ་འཇོག་རྒྱུ་ཡིན་ནམ།
སྐུ་ཉེད་ཐུག་སམ་ཡག་པོ་ཞེས་རོག་གནང།
ངས་བཤད་པའི་བོད་གཞུང་དགའ་ལྡན་ཕོ་བྲང་གི་ཐད་ཀར་དབང་བསྒྱུར་བའི་སྲིད་འཛིན་ས་ཁུལ་གྱི་ཁྱབ་ཁོངས་སུ་དབུས་གཙང་ཆོལ་ཁ་ལས་མ་བརྒལ་ཞེས་པ་ནི་སྲིད་དབང་བསྒྱུར་བའི་ཆོལ་ཁ་སྤྱི་དང་བྱེ་བྲག་གི་དབང་དུ་དབྱེ་སྟེ་སྲིད་འཛིན་ས་ཁུལ་གྱི་ལྟེ་བ་གཙོ་འཛིན་གྱིས་བཤད་པ་ཞིག་ལས་དབུས་གཙང་ཆོལ་ཁ་གཅིག་པུ་ཞེས་སམ་ཡང་དེའི་ས་མཚམས་དང་ཁྱབ་ཁོངས་སོགས་ཞིབ་གསལ་བྲིས་མེད་པས། མདོར་ན་དེ་ནི་བོད་གཞུང་དགའ་ལྡན་ཕོ་བྲང་གི་སྲིད་འཛིན་ལྟེ་གནས་དབུས་གཙང་ངམ་དེའི་དེའི་མངའ་ཐང་ཕལ་ཆེར་དབུས་གཙང་ལ་ཁྱབ་པ་ཙམ་རྒྱུ་མཚན་ཙམ་དུ་བྱེད་དེ་བཀོད་པ་ཡིན་གྱི་ཉིད་ཀྱིས་གསུངས་པ་ལྟར་ཁམས་ཀྱི་ས་ཆ་འགའ་ཞིག་དབུས་དགའ་ལྡན་གཞུང་གི་འཛིན་སྐྱོང་འོག་ཡོད་བདེན་ཡང་། ས་ཁུལ་དེ་དག་ནི་དབུས་ཆོལ་ཁའི་ཁོངས་སུ་འདུས་པར་སྨྲ་བའི་སྤོབས་པ་ནི་བདག་ལ་ནམ་ཡང་མ་མཆིས་སོ་ཞུས་ཞུའོ།
ཏྲེ་ཧོར་ཐུབ་བསྟན་ནས་དཔྱད་བརྗོད་སྤེལ་བར་བསམ་ཚུལ་འགའ་ཙམ་གླེང་ན།དང་པོ་བོད་གཞུང་དགའ་ལྡན་ཕོ་བྲང་གི་དབུས་གཙང་ཆོལ་ཁ་ལས་ཁྱབ་ཀྱི་མེད་པ་ལོ་རྒྱུས་ཀྱི་ཡིག་ཆར་གསལ་གསུངས་ཐད།དེ་འདྲའི་ལོ་རྒྱུས་ཡོད་མེད་གང་ལྟར་ཡང་ལོ་རྒྱུས་ལས་དངོས་ཡོད་གཙོ་ཕྱིར་ལོ་རྒྱུས་ལ་གཞི་འཛིན་དགོས་དོན་མི་འདུག་འོ་ན་དངོས་ཡོད་ཇི་ལྟར་ཞེ་ན།དབུས་གཙང་ཆོལ་ཁ་མ་ཡིན་པའི་ཁམས་ཀྱི་ལུང་པ་མང་པོར་དགའ་ལྡན་ཕོ་བྲང་པ་ཆེན་པོའི་སྲིད་དབང་གི་ཁྱབ་ཀྱི་ཡོད་པ།དཔེར་ན་ཁམས་ཀྱི་ལུང་པ་མང་ཆེ་བ་ནས་སྡེ་བ་གཞུང་ལ་ཁྲལ་དང་འུ་ལག་རྒྱུན་ཆད་མེད་པ་འཇལ་དགོས་ཀྱི་ཡོད་པ་དངོས་ཡོད་རེད།དེའི་གོང་གི་ཁམས་ཀྱི་ལུང་པ་དེ་དག་སྡེ་བ་གཞུང་གི་ཆབ་འབངས་ཡིན་པ་གསལ་བས་ལོ་རྒྱུས་ལ་ལྟོས་དགོས་དོན་མེད་ཞུ་གི་ཡོད།གཉིས་པ་ཆིངས་ཡིག་དོན་ཚན་བཅུ་བདུན་བཞག་པ་ནས་སུས་བྱས་སུས་ལན་ལ་མ་ལྟོས་པར།བོད་ལྗོངས་འདི་རྒྱ་ནག་གི་མངའ་སྡེའི་རྣམ་པ་ཆགས་ཟིན་པ་ནི་བསུབ་ཏུ་མེད་པའི་རྨ་ཤུལ་ཞིག་རེད།འོན་ཀྱང་དེའི་བོད་གཞུང་ཕྱིར་བསྡུ་དགོས་པའི་རྒྱུ་མཚན་གང་ཡང་ཡོང་གི་མ་རེད།དེ་མཚུངས་སུ་མདོ་ཁམས་ཕྱོགས་ནས་དཔའ་བོ་མང་པོའི་རང་སྲོག་བློས་བཏོང་གིས་ཆིངས་ཡིག་དོན་ཚན་བཅུ་བདུན་ལ་ངོས་ལན་མེད་པའི་རྣམ་པ་གསལ་པོར་སྟོན་པ་དང་།༧གོང་ས་མཆོག་ནས་ཀྱང་ཆིངས་ཡིག་དེ་ལ་ངོས་ལན་མེད་པའི་ཡོངས་ཁྱབ་ཀྱི་བསྒྲགས་གཏམ་སྤེལ་གནང་མཛད་པ་མ་ཟད།གཉལ་ལྷུན་རྩེ་རྫོང་དུ་བོད་གཞུང་བསྐྱར་འཛུགས་མཛད་པ་སོགས་ཀྱི་མཚོན་ཆིངས་ཡིག་དང་བོད་གཞུང་ཕྱིར་བསྡུ་གཉིས་ལ་འབྲེལ་བ་དེ་ཙམ་མེད་པ་རེད།ད་བོད་གཞུང་ཕྱིར་བསྡུ་དེ་མིང་དང་དོན་གང་ཞིག་ཡིན་ཡང་།གཙོ་བོ་མ་འོངས་འབྱུང་འགྱུར་གྱི་དགོས་དམིགས་ངེས་ཅན་ཡོད་དགོས་པ་ལས།འདས་པའི་ལོ་རྒྱུས་ཐོག་ནས་བོད་གཞུང་ཕྱིར་བསྡུ་གནང་དགོས་བྱུང་སྐོར་བརྗོད་པ་ནི་ཆེས་མ་འོས་པ་ཞིག་མཐོང་སོང་ཞུ་གི་ཡོད།
ཆོས་འགྲུབ་ལགས་ཀྱིས་བསམ་ཚུལ་གསུངས་བ་དེ་ལ་གུས་པའི་ཕྱོགས་ནས་ལན་མདོར་ཙམ་བྲིས་ན། བོད་སྡེ་པ་གཞུང་གི་སྐབས་སུ་ཁམས་ཁུལ་གྱི་ས་ཁུལ་ཁག་ཁ་ཤས་ཤིག་གིས་བོད་སྡེ་པ་གཞུང་ལ་ཁྲལ་དང་འུ་ལག་འཇལ་དགོས་ཀྱིན་ཡོད་པ་བདེན་ཡང་། ཁམས་ཕྱོགས་ལུང་པ་མང་ཆེ་བ་ཞེས་པ་ནི་ཅུང་མི་བདེན་པར་བསམ་ཏེ་་འབྲི་ཆུའི་ཡར་མིན་གྱི་བཤད་སྲོལ་ཞིག་འདུག་པས་དེ་ལྟར་ཡང་ཁམས་ཁུལ་གྱི་བཞི་ཆ་གཅིག་ཀྱང་མི་ཟིན་པས་མང་ཆེ་བ་ག་ལ་འགྱུར། གང་ལྟར་དེ་ཙམ་གལ་ཆེ་མིན་པར། གཙོ་བོ་བོད་གཞུང་གི་མིང་འདི་སྔར་བཞིན་བསྐྱུར་དགོས་མིན་ཐད་ཀྱི་བསམ་ཚུལ་དེ་རེད། སྐབས་དེར་འཆིང་ཡིག་གི་དོན་ཚན་ཁག་ལ་ངོས་ལེན་མ་ཞུས་ཀྱང་དྲག་པོའི་སྟོབས་ཀྱིས་དབང་བསྒྱུར་རྒྱུ་ཉག་གཅིག་ཡིན་པས། གཞུང་འདི་རང་བཞིན་གྱིས་འཐོར་ཞིག་ཏུ་སོང་བ་མིན་ཡང་དྲག་པོས་གཏོར་བཤིག་མེད་པར་གྱུར་ཡོད་པ་ནི་མིག་མཐོང་ལག་ཟིན་རེད། དེ་ལྟར་ནའང་རྡ་རམ་ས་ལའི་གཞུང་ལ་བོད་གཞུང་དགའ་ལྡན་ཕོ་བྲང་ཟེར་རམ། སྔར་གྱི་གཞུང་ལྟར་མཚན་ཉིད་ཚང་བམ། ད་ལྟ་གཞུང་འདིའི་ལས་དོན་ཐམས་ཅད་གཞུང་མིང་འདིའི་ཤི་གསོན་ལ་འབྲེལ་བ་ཡོད་དམ། མ་འོངས་པར་ཡང་གཞུང་འདི་བོད་ནང་བཙུགས་ཐུབ་བམ། དེ་དག་རེ་རེ་བཞིན་ཞིབ་ཏུ་བསམ་ནས་དོན་དངོས་ལ་མདང་རེ་རྒྱག་ཚེ་ཡང་བསྐྱར་ལམ་དབུ་མའི་འདི་སེམས་ལ་དྲན་འོང་གིན་འདུག ཡང་སྙིང་ལམ་དབུ་མའི་ལངས་ཕྱོགས་འདི་ལ་བོད་མི་ཅི་ཙམ་གྱིས་རྒྱབ་སྐྱོར་ཡོད་དམ། བོད་གཞུང་མིང་ཕྱིར་བསྡུ་བྱས་པ་དེ་དབུ་མའི་ལམ་གྱི་དགོངས་དོན་ཁག་དང་མཐུན་ནམ། གལ་སྲིད་ལངས་ཕྱོགས་འདི་མངོན་འགྱུར་ཡོང་ན་གཞུང་འདི་གནས་ཐུབ་བམ་སོགས་བསམ་པའི་མོད་ལ། དབུ་མའི་ལམ་ལ་རྒྱབ་སྐྱོར་ཡོད་པའི་དབང་དུ་བཏང་ན་གཞུང་མིང་ཕྱིར་བསྡུ་བྱས་པ་དེ་མཐུན་རྐྱེན་ལས་འགལ་རྐྱེན་དུ་གཏན་ནས་མི་འགྲོ ལྟ་བ་དང་ལངས་ཕྱོགས་ཁ་གསལ་པོ་ཆགས་ན་དེ་བསྟུན་གྱིས་གྲ་སྒྲིག་དང་འཐབ་རྩོད་ལ་མཐུན་ཕྱོགས་དང་དངོས་ཡོད་ཀྱི་ལག་ལེན་དགེ་མཚན་མཐོང་བས་གེག་ཏུ་མི་འགྱུར་བར་བསམ་མོ།
གྲོགས་པོ་ཏྲེ་ཧོར་ཐུབ་བསྟན་ལགས།བོད་གཞུང་དགའ་ལྡན་ཕོ་བྲང་གི་སྲིད་དབང་།ཁམས་ཁུལ་མང་ཆེ་བ་ལ་ཁྱབ་པའམ་ཁམས་ཁུལ་འགའ་ལ་ཁྱབ་པ་གལ་ཆེན་ཡིན་མིན་ཇི་ལྟར་ཡང་།གུ་ཤྲི་བསྟན་འཛིན་ཆོས་རྒྱལ་གྱིས་ཤར་དར་རྩེ་མདོ་ནས་ནུབ་ལ་དྭགས་ཚུན་གྱི་ས་སྡེ་མི་གསུམ་གྱི་བདག་དབང་གོང་ས་ལྔ་པ་ཆེན་པོར་ཡོད་པ་དྲིལ་བསྒྲགས་ཞེས་པ་དེ་མ་རྗེད་ན་ཡག་གི་རེད།ཡང་ཉིད་ནས་རྒྱལ་ཁབ་གཅིག་གི་གཞུང་ཞིག་ཡིན་ན་རྒྱལ་ཁབ་དེ་ནི་རྒྱལ་ཁབ་གོང་བུར་དབང་བསྒྱུར་བའི་ཆབ་སྲིད་ཀྱི་ཚོགས་པ་ཞིག་ཡིན་དགོས་ཞེས་པ་ལ་ངས་འདི་ལྟར་ཟེར།འོ་ན་སྔོན་གྱི་དགའ་ལྡན་ཕོ་བྲང་གི་སྲིད་གཞུང་འདི་རྒྱལ་ཁབ་གཅིག་གི་གཞུང་ཡིན་ཟེར་རམ་མིན་ཟེར།ཡིན་ཟེར་ན་གོང་ས་ལྔ་པ་ཆེན་པོའི་སྐབས་ཙམ་ནས་རྒྱ་སོག་གི་སྲིད་ཤུགས་ཆེ་རུ་སོང་སྟེ་བོད་ལྗོངས་འདི་རང་དབང་དང་རང་སྐྱོང་ཕྱེད་མའི་ཚུལ་དུ་གནས་པ་དང་།རྒྱལ་མཆོག་བདུན་པའི་སྐབས་ཙམ་ནས་རྒྱ་ནག་གི་སྲིད་ཤུགས་ཧ་ཅཆེ་རུ་སོརང་སྐྱོང་གི་རྣམ་པའི་ཐོག་ཏུ་གནས་
རྒྱ་ནག་གི་སྲིད་ཤུགས་ཧ་ཅང་ཆེ་རུ་སོང་ནས་རང་སྐྱོང་གི་རྣམ་པའི་ཐོག་གནས་པས་རྒྱལ་ཁབ་གོང་བུར་དབང་བསྒྱུར་བྱེད་པའི་གོ་ཐོབ་ཇི་ལྟར་ཡོད།གལ་སྲིད་མིན་ཟེར་ན་ཉིད་ནས་རྡ་སའི་གཞུང་ལ་ཆ་རྐྱེན་དེ་དག་མེད་པས་ཞེས་པའི་ཞིབ་ཆ་དགོས་མེད་ཆགས་པ་རེད།ཡང་ཉིད་ནས་ད་ལྟའི་གཞུང་ལ་སྔོན་གྱི་གཞུང་གི་མཚན་ཉིད་ཡོད་དམ་ཞེས་པ་དང་།མ་འོངས་བོད་ལ་གཞུང་འདི་བཙུགས་ཐུབ་བམ་སོགས་ལ།ད་ལྟའི་གཞུང་ལ་མཚན་ཉིད་མ་ཚང་ནའང་ཨེ་ཚང་ལྟ་རྒྱུ་དང་།མ་འོངས་བོད་ལ་བཙུགས་མི་ཐུབ་པའི་ཐག་མ་ཆོད་པས་ཨེ་ཐུབ་ལྟ་རྒྱུ་ལས།ད་ལྟ་མཚན་ཉིད་མ་ཚང་བ་དང་མ་འོངས་བོད་ལ་གཟུག་ཐུབ་མིན་མ་ངེས་པས།གཞུང་ཕྱིར་བསྡུ་བྱེད་པ་དབུ་མའི་ལམ་དང་འབྲེལ་བ་མེད་པར་སྙམ།སྔོན་དུས་སུ་ལོ་ངོ་བརྒྱ་ཕྲག་མང་པོར་གཞུང་ལ་མཚན་ཉིད་ཚང་མིན་དང་མ་འོངས་ཡུན་གནས་ཐུབ་མིན་ལ་མ་ལྟོས་པར་གཞུང་གི་རྒྱུན་འཛིན་ཅི་ཐུབ་ལས་ཕྱིར་བསྡུ་མ་བྱས་པ་ལ་རྒྱུ་མཚན་ལོས་ཡོད་སྙམ།གང་ལྟར་ཡང་ཉིད་ཀྱི་བསམ་དོན་འགྲུབ་པར་ཤོག།བོད་རྒྱལ་ལོ།
གྲོགས་པོ་ལགས་གོང་གི་ཁྱེད་ཀྱི་རྩོམ་དེ་ངའི་ཞིབ་ཀློགས་བྱེད་ཁོམ་མ་བྱུང་ཡང་འོང་ཀྱང་གོ་བ་རག་པ་ཞིག་ལ་ཁྱེད་ཀྱི་་་་་༼བོད་གཞུང་དགའ་ལྡན་ཕོ་བྲང་ནི་རྒྱལ་བ་ལྔ་པ་ཆེན་པོའི་སྐབས་སུ་གསར་ཏུ་གཏོད་ཅིང་སྲིད་འཛིན་གྱི་ཁྱབ་ཁོངས་ཀྱང་དབུས་གཙང་ཆོལ་ཁ་ལས་མ་བརྒལ་བ་ལོ་རྒྱུས་ཀྱི་ཡིག་ཆ་དག་ལས་གསལ། ༽་ཅེས་ཟེར་་་་དེས་ན་དབུས་གཙང་ཆོལ་ཁ་ལས་མ་བརྒལ་བ་ལོ་རྒྱུས་ཀྱི་ཡིག་ཆ་དག་ལས་གསལ་བའི་གསལ་ལུགས་གསལ་སྟངས་ཤིག་་ཤོད་རྒྱུ་ཡོད་ན་་་་་དེ་འདྲའི་ལོ་རྒྱུས་ཀྱི་་ཡིག་ཆ་ཚད་ལྡན་ཞིག་བསྟོན་རྒྱུ་ཡོད་དམ་་་་གལ་སྲིད་དེ་ལྟར་ཡོད་་ན་ཁྱོད་དང་ང་རང་གཉིས་་་་་ཁོངས་སུ་གཏོགས་པའི་རྒྱ་ཆེན་མདོ་ཁམས་མི་མང་རྣམས་ཅི་འདྲའི་མགོ་བོ་རྨོངས་པ་དང་ནོར་འཁྲུལ་གྱི་ལམ་དུ་ཞུགས་པ་མ་དམ་རེད་དམ་་་་ང་ཚོའི་ཁྲིམས་མཐུན་གྱི་གཞུང་དེ་ཀྲུང་གོ་གུང་ཁྲན་ཏང་ཡིན་རྒྱུ་ལས་་་་བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་ཡིན་ཀྱི་མ་རེད་་དེར་བརྟེན་འུ་ཚོའི་རང་བཙན་དགོས་ཞེས་བཤད་པའང་ཅི་འདྲའི་སྨྱོ་ཧམ་ཞིག་དང་་་རྒྱ་གཞུང་གིའི་བཤད་པ་ལྟར་དེ་ནི་མེས་རྒྱལ་མགོ་གཏིང་སློགས་པའི་ཉེས་པ་བསགས་པ་རེད་་་་་་་།་་་ཡང་ཁྱེད་ཀྱི་པན་བོད་གཉིས་འཆིང་ཡིག་དོན་ཚན་བཅུ་བདུན་བཞག་པ་ནས་བཟུང་བོད་རང་བཙན་རྨང་ནས་བཤིག་ཅིང་རྩར་ནས་བྲེག་པ་རེད་ཅེས་ཟེར་་ཡང་བཙན་དབང་སྒོ་ནས་བཞག་པའང་རེད་ཟེར་་དེས་ན་བཙན་གྱི་བཞག་པ་ཡིན་ཚེ་་་རྨང་ནས་བཤིག་ཅིང་རྩར་ནས་བྲེག་་དོན་གང་ཡིན་་་་།་ཡང་ཁྱེད་ཀྱི་༼དེ་ལྟར་ནའང་དོན་དུ་བོད་ཀྱི་འཛིན་སྐྱོང་ཡོད་དོ་ཅོག་སྔར་གུང་ཁྲན་གྱི་ལག་ཏུ་ཡོད་པས་དེ་ནི་རང་བཙན་སླར་གསོའི་སྒྲིག་འཛུགས་ཙམ་ལས་དོན་མཚན་ཉིད་ཚང་བའི་གཞུང་ཞིག་ལ་ངོས་འཛིན་བྱས་ཐབས་བྲལ། རྒྱུ་མཚན་ནི། རྒྱལ་ཁབ་སུ་ཞིག་གི་གཞུང་གང་ཞིག་ཡིན་ནའང་གཞུང་དེ་ནི་རྒྱལ་ཁབ་གོང་བུར་དབང་བསྒྱུར་བའི་ཆབ་སྲིད་ཀྱི་ཚོགས་པ་ཞིག་ཡིན་དགོས་ཤིང་།རྡ་རམ་ས་ལའི་གཞུང་ལ་དེ་དག་གི་ཆ་རྐྱེན་མེད་པ་མ་ཟད།རང་ཉིད་ཀྱང་གཞན་ཡུལ་དུ་ཉེན་ཡོལ་ལམ་སྐྱབས་བཅོལ་དུ་འབྱོར་བའི་ཡུལ་གྱར་པ་ཡིན་པས་རེད། ༽ཅེས་ཟེར་་་་གྲོགས་པོ་་་ཁྱེད་ལ་འདི་ལྟར་དོག་པ་ཞིག་གང་ནས་བྱུང་བ་རེད་་་་སུ་ཞིག་གིའི་ད་ལྟའི་དུས་སུ་་བསྐྱབས་བཅོལ་གཞུང་འདི་མངའ་དབང་ལྡན་པའི་རྒྱལ་ཁབ་གོང་བུར་དབང་བསྒྱུར་བའི་ཆབ་སྲིད་ཀྱི་ཚོགས་པ་ཡིན་་ཟེར་གི་འདུག་་་་་ད་ལྟའི་དུས་སུ་རྒྱལ་ཁབ་ཀྱི་་བདག་དབང་དེ་མི་ཡི་ལག་ཏུ་ཤོར་ཟིན་ནས་་་་་ང་ཚོའི་་་་་བོད་ཀྱི་བདག་པོ་བོད་མི་ཡིན་་་་་རྒྱ་མི་བོད་ནས་ཕར་རྒྱུགས་ཤིགས་་་ཅེས་སྐད་འབོད་བྱེད་ཀྱིན་ཡོད་་་།གྲོགས་པོ་ལགས་་ད་ཁྱེད་དང་མཉམ་དུ་་རྩོད་པ་ཞུ་ཁོམ་མི་འདུག་་དོན་དངོས་ཐོག་་་་ང་ཚོའི་བཙན་བྱོལ་བོད་གཞུང་ཞེས་པའི་མིང་དེ་བསྒྱུར་དགོས་ཐད་བསམ་ཞིབ་ནན་པོ་བྱེད་དགོས་་་་དེས་ན་དབུ་ཁྲིད་ཚོ་ལ་འགྱུར་བ་དེ་ལྟར་བཏོང་དགོས་པས་རྒྱུ་མཚན་གསལ་པོ་ཞིག་གསུངས་རྒྱུ་མི་འདུག་པ་མ་ཟད་་་་།མ་གཞི་ནས་ལག་རྟགས་དངོས་པོ་ཆུང་ཆུང་ཞིག་ཕར་གཏད་ཚུལ་ལེན་བྱེད་ཀྱིན་ཡོད་ན་་ནའང་་དངོས་སུ་ཐུག་འཕྲད་བྱས་སྟེ་སྐད་ཆ་བཤད་ཆོད་མོད་་་ཚ་གེ་ཚ་གེའི་་ཁ་པར་ཞིག་གི་ནང་ནས་འདི་ལྟར་་ཐག་བཅོད་བྱེད་སྟངས་བལྟས་ན་་་་ཁོ་པ་ཚོར་གྲ་སྒྲིགས་དང་་་དེའི་རྒྱབ་ལོག་་ཆབ་སྲིད་ཀྱི་རང་བཞིན་ལྡན་པའི་བསམ་བློ་དང་དམིགས་ཡུལ་་་་ཅི་ཙམ་ཡོད་མེད་གསལ་པོར་མཐོང་ཐུབ་་་་འོང་ཀྱང་ཁོང་ཚོའིབཤད་རྒྱུར་་་་རྒྱུ་མཚན་ནི་བཙན་བྱོལ་སྒྲིགས་འཛུགས་་རྒྱ་གར་ནང་དུ་གཏན་པོར་གནས་ཐབས་དང་རྒྱ་གཞུང་ལ་བསྟུན་མཁས་ཀྱི་ཞི་མོར་འཁོར་ཡུག་བསྐྲུན་ཐབས་བྱས་པ་ཞིག་ཡིན་ཟེར་་་་དེ་ལྟར་ན་་ཡང་་ང་ཚོ་ལ་་དྲི་བ་གཉིས་ཏེ་་བཙན་བྱོར་སྒྲིགས་འཛུགས་འདི་ཡུན་རིང་གཏན་པོར་གནས་དགོས་་ན་་དགོས་པ་དང་རྒྱུ་མཚན་ཅིའི་ཕྱིར་དུ་་གནས་དགོས་་།་བཙན་བྱོལ་གཞུང་འདི་ཐོག་མར་འཛུགས་དགོས་པའི་དམིགས་ཡུལ་གང་ཡིན་་ཞེས་པ་དང་། དྲི་བ་གཉིས་པ་་དེ་་་ཞི་མོར་ཡོང་ཐུབ་བམ་་ཞི་མོར་གྱི་ལམ་ནས་དཀའ་ངལ་སེལ་ཐུབ་བམ་་ཞེས་པ་འདི་གཉིས་རེད་་་ངས་དྲི་བ་འདི་གཉིས་དོན་དུ་བསམ་ཞིབ་རེ་བྱེད་དུས་དབུ་འཁྲིད་ཚོའི་དགོངས་པ་ཞེས་སྟངས་ལ་ངུ་ཡང་ཤོར་ལ་རྒོད་ཡང་ཤོར་གི་འདུག་་ང་ཚོའི་དབུ་འཁྲིད་ཚོ་དང་དེའི་རྗེས་འབྲང་འགའ་ཞིག་་ཕར་ཕུད་པའི་ད་ལྟར་འཚོ་ཞིང་གནས་པའི་ས་ཆེན་པོ་འདིའི་ཁྱོན་ལ་འདི་ལྟར་རྒྱ་བོད་གཉིས་ཞི་མོར་གྱི་ལམ་ནས་ཐག་ཆོད་ཡོང་གི་རེད་ཟེར་མཁན་སུ་ཡང་མི་འདུག་ དེའི་རྒྱུ་མཚན་ནི་་ང་ཚོར་བདེན་པ་མེད་སོང་བ་མིན་ཀྱང་་་མི་རྣམས་ཀྱི་་རྒྱ་དམར་གྱི་རང་བཞིན་གསལ་པོར་ཤེས་ཀྱི་་ཡོད་པས་རེད་་་་།་འདི་ནི་ངའི་སེམས་ཚོར་ཙམ་དང་ཚོར་སྣང་ཙམ་ཞིག་མིན་།་་དངོས་ཡོད་གནས་ཚུལ་རེད་་་ཁྱེད་ཀྱི་་མིག་གཉིས་ཀའི་བལྟས་་་རྣ་ཆོག་གཉིས་ཀའི་ཉན་ན་་་ཤེས་རྒྱུ་རེད་་་་།།
གོང་གི་གྲོགས་པོ་གཉིས་ཀྱིས་བདག་གི་བྲིས་པའི་གཞུང་མིང་ཕྱིར་བསྡུ་སྐོར་ལ་དགོངས་ཚུལ་ལྷུག་པོར་སྤེལ་བ་དེར་བསྔོད་བརྗོད་དང་སྦྲགས་ཡང་བསྐྱར་འདི་ནས་ཁྱོད་གཉིས་ཀྱིས་གསུངས་པའི་ལྟ་ཚུལ་ཁག་ལ་ལན་འདེབས་རེ་བྱེད་ན་འདི་ལྟར། གོང་གི་གྲོགས་པོ་དང་པོས་གསུངས་པའི་གུ་ཤྲི་བསྟན་གྱིས་བསྒྲགས་པའི་སྨད་དར་རྩེ་མདོ་ནས་སྟོད་ལ་དྭགས་བར་གསུངས་པ་དེ་ནི་སྔར་གྱི་བོད་བཙན་པོའི་དུས་སྐབས་ཀྱི་མངའ་ཁོངས་ཀྱི་ཚད་རེད། བོད་ཀྱི་རྒྱལ་རབས་འཐོར་ཞིག་ཏུ་སོང་བ་ནས་དུས་ད་ལྟའི་བར་དུ་སྔར་གྱི་བཙན་པོའི་མངའ་ཁོངས་ཀྱི་ས་ཁུལ་ཡོངས་རྫོགས་བདག་ཏུ་བཞེས་ཏེ་དབང་བསྒྱུར་བའི་གཅིག་གྱུར་གྱི་གཞུང་ཞིག་ཡོང་མ་མྱོང་བ་ནི་ཡོངས་སུ་གྲགས་པ་ལྟར་དེ་ལ་ལོ་རྒྱུས་ཀྱི་ཁུངས་མིང་བཤད་དགོས་པའི་རྒྱུ་མཚན་མི་འདུག ཡང་དགའ་ལྡན་ཕོ་བྲང་གི་མངའ་ཁོངས་སྐོར་ལ་རྒྱ་བོད་ཀྱི་ལོ་རྒྱུས་ཡིག་ཆ་དང་དེ་བཞིན་མདོ་ཁམས་ཀྱི་ས་ཁུལ་གང་སར་ཡུལ་ལུང་རེ་ལ་དབང་བསྒྱུར་བའི་ཚོགས་ཁག་དང་ཡུལ་སྡེ་མི་དཔོན་གྱིས་དབང་བསྒྱུར་བཞིན་པ་ནི་ཡོངས་གྲགས་ལྟར་རེད་ལ། དེ་བཞིན་སྐབས་དེ་དུས་སུ་རྒྱ་ནག་པོའི་ཡུལ་གྱི་མངའ་ཁོངས་མདོ་ཁམས་ཡུལ་གྱི་ས་ཁུལ་མང་པོར་རྒྱ་སྐྱེད་མྱོང་བ་ཡང་ལོ་རྒྱུས་ལྟར་རེད། གང་ལྟར་དེ་དག་ནི་བོད་གཞུང་དགའ་ལྡན་ཕོ་བྲང་གི་ཆེས་ཉམས་དམས་པའི་ཆབ་སྲིད་ཀྱི་ཁོར་ཡུག་དང་ལོ་རྒྱུས་ཀྱི་རྒྱབ་ལྗོངས་ཙམ་རེད། དོན་དུ་དེ་དག་ནི་དུས་སྐབས་སོ་སོའི་ཆབ་སྲིད་ཀྱི་གོ་བབ་ཙམ་ལས་། བོད་རིགས་སུ་སྐྱེས་པ་དག་ནི་སྔར་བཞིན་སྐད་དང་ཡི་གེ་ཆོས་དང་རིག་གཞུང་ཡུལ་གོམས་གཤིས་ལུགས་སེམས་ཁམས་དང་འདུ་ཤེས་སོགས་གང་དང་ཅིའི་ཐད་ནས་ཀྱང་ཁ་བྲལ་མ་མྱོང་བ་རེད། བར་སྐབས་ཀྱི་གུང་ཁྲན་སྲིད་གཞུང་ཡར་ལངས་པ་ནས་རྣམ་པ་ཧ་ཅང་མངོན་གསལ་དུ་སོང་ཡོད་པ་དང་དོན་ཚན་བཅུ་བདུན་ཅན་དེ་ཞི་དྲག་གི་ཁོར་ཡུག་ཅི་ལྟར་ཞིག་གི་འོག་ཏུ་སོང་མིན་གང་ལྟར་ཡང་། སྔར་གྱི་དགའ་ལྡན་ཕོ་བྲང་གཞུང་དེའི་རང་བཙན་གྱི་ངོ་བོ་དེ་ས་གནས་སྲིད་གཞུང་གི་རྣམ་པ་རུ་ཕབ་ཡོད་པ་ནི་དངོས་ཡོད་རེད། དེ་ནི་འདོད་པ་ཡོད་མིན་གྱི་སྐད་ཆ་མ་རེད། དངོས་སུ་བྱུང་བའི་ལོ་རྒྱུས་ཀྱི་རྨ་ཁ་ཞིག་རེད། བོད་དེ་ལོ་རྒྱུས་ཐོག་རང་བཙན་ཡིན་མིན་གྱི་སྐད་ཆ་ཡང་མ་རེད། དུས་སྐབས་དེར་གཞན་གྱི་སྟོབས་ཀྱིས་དབང་དུ་ཁུམ་སོང་བའི་དོན་རེད། དུས་དེ་ནས་བཟུང་དགའ་ལྡན་ཕོ་བྲང་འཇིག་སོང་བ་རེད། རང་བཙན་ཤོར་སོང་བ་རེད། བོད་གཞུང་འཐོར་སོང་བ་རེད། གཞུང་མེད་སོང་བ་རེད། ཡིནའང་སྔར་གྱི་གཞུང་འཛིན་པའི་མི་སྣ་དག་རྒྱ་གར་ཡུལ་དུ་བྲོས་བྱོལ་དུ་འབྱོར་ཡོད་པ་མ་ཟད་དུས་ད་ལྟ་ལ་ཐུག་གི་བར་དུ་བོད་དང་བོད་མིའི་ཆེད་དུ་སྔར་ཡོད་པའི་དངོས་པོ་འཕྲོག་སོང་བ་དེའི་ཆེད་དུ། འབྱུང་འགྱུར་མི་རིགས་ཤི་གསོན་གྱི་དོན་དུ་མི་ལོ་ལྔ་ཅུ་ལྷག་ལ་སྐུ་ལས་བསྐྱོན་དགོས་པའི་གནད་དོན་ཡང་དེ་རེད། ཡིནའང་སྔ་ཕྱི་བར་གསུམ་དང་ཕྱི་ནང་གསང་གསུམ་རྒྱུ་དང་རྐྱེན་ཁོར་ཡུག་སོགས་གང་མང་ཞིག་ལ་གཞིགས་ཏེ་དབུ་མའི་ལམ་གཏན་ལ་ཕབ་པ་རེད། བོད་ཀྱི་བདག་དབང་གུང་ཁྲན་དབུས་གཞུང་ལ་སྤྲད་ཚར་པ་རེད། སྔོན་འཕྲོག་སོང་བ་རེད། ད་ལྟ་སྤྲད་ཟིན་པ་རེད། མ་འོངས་པ་དེའི་ལམ་དུ་བསྐྱོད་པའི་གྲ་སྒྲིག་བྱེད་བཞིན་པ་རེད། དེ་ནི་སྔར་རང་བཙན་གྱི་ལོ་རྒྱུས་མེད་མྱོང་བ་མ་རེད་དེ། དེ་(སྲིད་པའི)་ཕྱོགས་ཀྱི་གནས་ལུགས་དང་རྒྱུ་མཚན་ཁོར་ཡུག་སོགས་ཞན་པས་ཕུགས་རྒྱང་རིང་པོའི་ཆབ་སྲིོད་ཀྱི་སྲིད་ཇུས་གཏིང་པ་རེད། རྒྱ་བོད་བར་མཁོན་འཛིན་མེད་པའི་དོན་མ་རེད། རྒྱལ་སྤྱིའི་ཐོག་བོད་དེ་རྒྱ་ནག་གི་ཆ་ཤས་ཡིན་པ་ཁ་གཅིག་གྲགས་ཀྱི་ཁས་ལེན་བཞིན་པ་རེད། དེ་ལྟར་ཕྱི་ནང་གི་ཁོར་ཡུག་དང་གནས་སྟངས་འབྱུང་འགྱུར་གྱི་གནད་དོན་སོགས་གང་མང་ཞིག་ལ་མདང་ཞིབ་ཏུ་རྒྱག་ཏེ་བསམ་བློ་རེ་བཏང་ན་རྡ་རམ་སའི་གཞུང་མིང་འདི་ལ་དགོས་པ་དང་རྒྱུ་མཚན་གང་ཡང་མི་འདུག གོང་ས་རྒྱལ་བ་རིན་པོ་ཆེ་མཆོག་དང་རྡ་སའི་ཆབ་སྲིད་དབུ་ཁྲིད་དག་གིས་གཏན་ནས་ནོར་མི་འདུག གཞན་རང་བཙན་ལམ་ལ་ཨུ་ཚུགས་བྱེད་པ་དག་གི་དེའི་ཐད་ཀྱི་བསམ་ཚུལ་ཁ་ཁ་རེད། དབུ་མའི་ལམ་གྱི་དགོངས་དོན་གཞིར་བཟུང་བོད་ཀྱི་མ་འོངས་པའི་ལས་དབང་ལ་བསམ་གཞིགས་རེ་བྱེད་ན་ཧ་ཅང་འཐུས་པ་དང་འོས་པའི་གདམ་ཁ་ཞིག་ཡིན་པ་ནི་གོང་གི་རིགས་པའི་འགྲོས་ལྟར་རེད། ཡང་གཅིག་བཤད་ན། བོད་མི་རིགས་འདིའི་ཟ་དང་ཟུར་གཡས་དང་གཡོན་མང་པོ་ཞིག་གི་ཐད་ནས་འཆི་བཞིན་པ་རེད། དེ་ནི་ཛ་དྲག་གི་མྱུར་སྐྱོབ་ཀྱི་དུས་ཚོད་ཅིག་ལ་ཐུག་ཡོད་པ་རེད། ང་ཚོ་ལ་མཚོན་ན་དུས་ཚོད་ནི་ཧ་ཅང་གནད་འགག་ཆེ་བའི་རྒྱུ་རྐྱེན་ཞིག་རེད། ང་ཚོས་ལྐུགས་པའི་ཨུ་ཚུགས་ཀྱིས་ཁ་ནས་རང་བཙན་བཤད་བསྡད་ན་དུས་ཚོད་ཀྱིས་ང་ཚོ་ལ་འཆི་ལམ་དུ་བརྗངས་ངེས་རེད། དེ་ནི་ཆབ་སྲིད་མ་རེད། ཨུ་ཚུགས་རེད། ལྐུགས་རྟགས་རེད། ཡང་བོད་རྒྱ་ཞི་མོལ་ལ་འཛམ་གླིང་གི་མི་ཆེན་དང་སྟོབས་ཆེན་གྱི་རྒྱབ་ཁབ་དག་གིས་མངོན་ལྐོག་གཉིས་སུ་རྒྱབ་སྐྱོར་དང་སྐུལ་མ་གནང་བཞིན་པ་རེད། ཚང་མས་ཡིད་ཆེས་བྱེད་བཞིན་པ་རེད། ས་ཆེན་པོ་འདིའི་ཁྱོན་ན་ཞི་མོལ་གྲུབ་འབྲས་མེད་པར་སྨྲ་བ་དག་སུ་ཡིན་ན། རྣ་རིང་པོ་དང་མིག་ཆེན་པོ་གདང་དགོས་ས་ནི་དེ་དག་རེད། གཞན་རྡ་སའི་ཆབ་སྲིད་ཀྱི་སྤྱི་ཚོགས་ཆུང་ངུ་འདིར་དོགས་པ་དང་རྣམ་རྟོག་གིས་གང་ཏེ་སུ་ལའང་བདེན་ཁ་མི་སྟེར་བར་ཨུ་ཚུགས་ཀྱིས་སེམས་ཤུགས་ཡོད་མདོག་བྱས་ཀྱང་དོན་དངོས་ལ་ཕན་ཐོགས་དང་གྲུབ་དོན་གང་ཡང་ཡོད་མ་རེད། ཤེས་དགོས་པ་ནི་ཆབ་སྲིད་དང་དེའི་རྒྱབ་ལྗོངས་དམིགས་ཡུལ་་་་ད་དུང་ཁོར་ཡུག་སོགས་ལ་མདང་ཞིབ་པ་དང་མིག་རྒྱང་ཡངས་མོ་དགོས་པ་ནི་ཁ་ཚ་དགོས་གཏུགས་ཀྱི་མིག་སྔའི་གནད་དོན་རེད། ཅེས་གོང་གི་གྲོགས་པོ་སྐལ་བཟང་དང་ཆོས་འགྲུབ་གཉིས་ཀྱིས་བྲིས་པའི་ལན་དུ་གུས་པས་ཕུལ་ལོ།
ཏག་ཏག་རེད་གྲོགས་པོ་ཁྱེད་རང་འགྱོགས་པོར་བོད་ལ་ལོག་འདོག་ཡོད་ས་རེད་་་་ལོག་ན་འགྲིགས་གི་རེད་་དེའི་ཆེད་དུ་་དབུ་མའི་ལམ་དང་རང་བཙན་གང་ཡང་བཤད་དགོས་ཡག་ཡོད་མ་རེད་་་་།།་དེས་ན་་་་༼་འགའ་ཞིག་མཚན་མཐོང་ཆེད་དུ་དབུ་མ་བཤད་།།་་འགའ་ཞིག་རྐུབ་ཅག་ཆེད་དུ་དབུ་མ་བཤད་་་།།་་འགའ་ཞིག་ཕ་ཡུལ་ལོག་ཆེད་དབུ་མ་བཤད་་།།་དབུ་མའི་ལྟ་བའི་བོད་ཀྱི་རྒྱལ་ཁབ་བརླགས་་།།༽་ཅེས་ཟེར་རོ་་་་་ད་དུང་ཁྱེད་ཀྱི་་་་་ང་ཚོས་ལྐུགས་པའི་ཨུ་ཚུགས་ཀྱིས་ཁ་ནས་རང་བཙན་བཤད་བསྡད་ན་དུས་ཚོད་ཀྱིས་ང་ཚོ་ལ་འཆི་ལམ་དུ་བརྗངས་ངེས་རེད།་་་ཟེར་་་ དེ་ནི་ཁྱེད་ཀྱི་དངོས་ཡོད་གནས་ཚུལ་ལ་འཁྱོད་བཤད་བྱས་པ་རེད་།་་་ང་ཚོའི་རང་བཙན་བཤད་པས་ཤི་ལམ་དུ་བརྫངས་མེད་་།་་་་ང་ཚོའི་རྒྱལ་གཅེས་དཔའ་བོ་དཔའ་མོ་ཚོའི་་་ཚེ་སྲོག་་དང་བཟུང་ཁྲག་གི་འགྲོ་གྲོན་བཏང་ཏེ་་་་ད་ཟོད་ཞི་ནས་བོད་པའི་ཆབ་སྲིད་ཀྱི་གནད་དོན་དེ་རྒྱལ་སྤྱིའི་སྡིངས་ཆའི་སྟེངས་ད་བསྐྱལ་ཐུབ་ཡོད་་།།་་་དཔེར་མཚོན་ཞིག་དྲངས་ན་༢༠༠༨་ལོའི་ས་བྱིའི་ཞི་རྒོལ་ཆེན་མོ་ལྟ་བུ་རེད་་་་་དེས་་ན་་རང་བཙན་བཤད་པ་ནི་་ཆབ་སྲིད་མ་རེད། ཨུ་ཚུགས་རེད། ལྐུགས་རྟགས་རེད།་གསུངས་པ་ནི་ཁྱེད་རང་གི་ལྐུག་རྟགས་་ཤིག་བསྟན་་པ་་མ་ཟད་་་་།་་་དེ་ནི་བོད་མིའི་མངོན་འདོད་ལའང་རྡོག་རོལ་བཏང་བ་ཞིག་ཆགས་ཡོད་་།།་་་་རྒྱལ་གཆེས་དཔའ་བོ་དཔའ་མོ་འབུམ་ཕྲག་མང་པོའི་འདི་ཡི་ཆེད་དུ་ཚེ་སྲོག་བཏང་ཡོད་་་།་་་རྣམ་ཤེས་འབུམ་ཕྲག་མང་པོའི་ང་ཚོར་བལྟས་ནས་སྡད་ཡོད་་་།།་་་སྐད་ཆ་འདི་ལྟར་བཤད་པ་ནི་་་་ལས་འབྲས་དང་སྙིང་རྗེ་མེད་པའི་སྐད་ཆ་རེད་།།།་་་་་་འཛམ་གླིང་འདིའི་ཐོག་གི་ད་ལྟའི་རྒྱལ་ཁབ་ཆེ་ཆུང་སུ་གང་ཡིན་ཀྱང་་་གཞན་གྱི་བཙན་འཛུལ་བྱེད་་་མ་མྱོང་བ་དང་་་་གཞན་གྱི་བཙན་གནོན་འོག་ཏུ་བསྡད་་་མ་མྱོང་མཁན་་་མེད་པ་ལྟ་བུ་རེད་་་ང་་ཚོ་ད་ལྟར་ཡང་་་བཙན་གནོན་འོག་ཏུ་ཡོད་པ་རེད་་་་བཙན་འཛུལ་འོག་ཏུ་ཡོད་པས་རྒྱུ་མཚན་འདིའི་་་་ང་ཚོའི་་བཙན་འོག་ནས་་་ཐར་ཐབས་དང་་་རང་དབང་ཐོབ་ཐབས་་་བྱེད་བཞིན་ཡོད་་།།་་་ང་ཚོར་རྒྱ་དམར་གྱིས་བཙན་ཤེད་བྱེད་་མྱོང་བ་དང་་་བཙན་བཟུང་བྱེད་བཞིན་པས་་་རྒྱུ་མཚན་གྱིས་་་རང་བཙན་བརྩོད་རྒྱུ་མེད་པ་ཆགས་མི་སྲིད་་འཇིགས་རྟེན་གྱི་འགྲོ་ལུགས་ལ་་གཞན་ལ་ཤོར་སོང་བ་དེ་བརྩོད་ལེན་བྱེད་རྒྱུའི་གོ་སྐབས་ག་དུས་ཡིན་་ནའང་ཡོད་སྲིད་་་་་གཞན་ལ་བསྤྲད་པའི་དངོས་པོ་དེ་ཚུལ་ལ་་་བརྩོད་ནས་ལེན་རྒྱུའི་ལུགས་སོལ་མེད་་་་་ཡིན་ནའང་སེམས་ཕམ་ཞིག་ལ་་་ད་རེས་བཙན་བྱོལ་བོད་གཞུང་ཞེས་པའི་མིང་དེ་་་་གཞན་གྱིས་ཕྲོགས་ནས་ཤོར་བ་མ་་རེད་་་་་གཙོང་ནས་བཟས་པ་ཡང་མ་རེད་་་་་རིན་མེད་དུ་ཕུལ་གཏང་བ་རེད་་་་་ཡང་ཁྱེད་ཀྱི་་བོད་རྒྱ་ཞི་མོལ་ལ་འཛམ་གླིང་གི་མི་ཆེན་དང་སྟོབས་ཆེན་གྱི་རྒྱབ་ཁབ་དག་གིས་མངོན་ལྐོག་གཉིས་སུ་རྒྱབ་སྐྱོར་དང་སྐུལ་མ་གནང་བཞིན་པ་རེད། ཅེས་ཟེར་་་་དེས་ན་ཁོང་ཚོས་མངོན་ལྐོག་གཉིས་ཀྱི་རྒྱབ་སྐྱོར་བྱེད་སྟངས་དེ་ཅི་འདྲའི་རེད་་། ཁོང་ཚོའི་ཁ་ནས་རྒྱབ་སྐྱོར་ཡོད་ལབ་པ་ཙམ་གྱི་་རྒྱ་དམར་གྱི་ཞི་མོལ་བྱེད་སྲིད་དམ་་་་ཡང་གོང་དུ་ངའི་བཤད་པའི་སྐད་ཆའི་ལན་དུ་ཁྱེད་ཀྱི་་ས་ཆེན་པོ་འདིའི་ཁྱོན་ན་ཞི་མོལ་གྲུབ་འབྲས་མེད་པར་སྨྲ་བ་དག་སུ་ཡིན་ན། རྣ་རིང་པོ་དང་མིག་ཆེན་པོ་གདང་དགོས་ས་ནི་དེ་དག་རེད།་་ཅེས་གསུངས་འདུག་་་དེ་ན་ཁྱེད་ཀྱི་གཉིད་ཡག་པོ་སད་མིག་ཡག་པོ་བལྟས་ཀློགས་ན་་ངའི་་བཤད་པའི་སྐ་ཆ་དངོས་ནི་་ང་ཚོའི་དབུ་འཁྲིད་ཚོ་དང་དེའི་རྗེས་འབྲང་འགའ་ཞིག་་ཕར་ཕུད་་་་ད་ལྟར་འཚོ་ཞིང་གནས་པའི་ས་ཆེན་པོ་འདིའི་ཁྱོན་ལ་འདི་ལྟར་རྒྱ་བོད་གཉིས་ཞི་མོར་གྱི་ལམ་ནས་ཐག་ཆོད་ཡོང་གི་རེད་ཟེར་མཁན་སུ་ཡང་མི་འདུག་ ་་་ཅེས་ཞུས་ཡོད་་་་དེ་ཁྱེད་ཀྱི་གསུངས་གསུངས་ལྟར་རེད་་་་ད་ལྟར་འཛམ་གླིང་འདིའི་སྟེང་དུ་་་སྲིད་དོན་ཉམས་ཞིབ་པ་དང་་་མཁས་དབང་མི་སྣ་སུ་གཅིག་གིས་་རྒྱ་བོད་གཉིས་་་་ཞི་མོལ་བྱས་ནས་་་ཐག་ཆོད་ཡོང་གི་རེད་ཅེས་་་་་སྐད་ཆ་ཚིག་དུམ་ཞིག་དང་་་ཤོག་བུ་ཤོས་ངོས་ཅིག་མེད་པ་་་་ཁྱེད་ཀྱི་རྣ་རིང་པོ་དང་མིག་ཆེན་པོ་གདང་ནས་བལྟས་ན་མཐོང་གི་རེད་་་འདི་ནི་གནད་དོན་རེད་་་་ཅིའི་ཕྱིར་ཁོ་ཚོའི་མ་བཤད་པ་རེད་དམ་་་་་ཞི་མོལ་གྱི་ལམ་བུ་ཞིག་མཐོང་བཞིན་དུ་མ་བཤད་པ་རེད་དམ་་དེ་ལྟར་མ་་མཐོང་ནས་བཤད་རྒྱུ་མ་་བྱུང་བ་རེད་འདི་ངེས་པར་ཁྱེད་ཀྱི་བསམ་ཞིག་བྱེད་དགོས་་།།།་
ཧཧ་ཧ་གྲོགས་པོ་ཁྱོད་ཀྱིས་གསུངས་པའི་གུས་པ་ང་བོད་བོད་ལ་ལོག་འདོད་ཡོད་མིན་གྱི་སྐད་ཆ་དེ་ཡང་རྒྱུ་མཚན་གཞན་ཞིག་རེད། གོང་དུ་ངེད་གཉིས་ཀྱིས་བགྲོ་གླེང་བྱེད་བཞིན་པའི་བོད་ཀྱི་མ་འོངས་པའི་མདུན་ལམ་དང་འབྲེལ་བའི་མི་རིགས་ཀྱི་ལས་དབང་དང་འབྲེལ་བ་མེད་པ་ཞིག་རེད། གང་ལྟར་ང་ཙམ་མ་ཟད་ཕྱི་ལོགས་སུ་སྐྱབས་བཅོལ་ལ་ཡོད་པའི་བོད་རིགས་སུ་སྐྱེས་པ་ཚང་མ་མགྱོགས་པོར་བོད་ལ་ལོག་འདོད་ཡོད་པའི་ཡིད་ཆེས་ནི་ང་ལ་བརྒྱ་ཆ་བརྒྱ་ཡོད། ལོས་ཡོད། བོད་ནི་ང་ཚོའི་ཕ་ས་ཕ་ཡུལ་དང་རང་ས་རང་ཡུལ་རེད། ང་ཚོས་དེའི་ཆེད་དུ་ལས་ཀ་བྱེད་བཞིན་པ་རེད། མགྱོགས་པོ་ལོག་རྒྱུ་བྱུང་ན་ཅི་འདྲིའི་དགའ་བ་ལ། ཡིན་ནའ་གྲོགས་པོ་ཁྱོད་རང་གིས་གསུངས་ཚུལ་ལ་བལྟས་ན། ཁ་ནས་བཤད་པ་དེ་ཕལ་ཆེར་ཆབ་སྲིད་དང་དགོས་དབང་ཙམ་ལས་དོན་དུ་བོད་ལ་མགྱོགས་པོར་ལོག་འདོད་ཀྱི་སེམས་ཤུགས་དང་དེའི་ཆེད་དུ་སྐུ་ལས་བསྐྱོན་པའི་སྐུལ་སློང་མེད་པ་འདྲ། དེའང་འགྲིག་གི་རེད། ནུབ་ཕྱོགས་རྒྱལ་ཁབ་ཁག་ཏུ་ལོ་གྲངས་ཚང་སོང་ན་སྐྱབས་བཅོལ་བའི་ཐོབ་ཐང་ཚང་མ་ཡོད་རབས་འདུག བོད་ལ་ལོག་པ་ལས་སྐྱབས་བཅོལ་བརྟན་པོ་ཞིག་ཐབས་ཤེས་བྱེད་བསམ་པ་དེའང་ཡག་པོ་ཡོད་རེད། གཞན་ང་ཚོས་དངོས་ཡོད་ལ་ཁ་ཕྱོགས་ཏེ་དོན་དངོས་ལ་ཁས་ལེན་བྱེད་རྒྱུ་ནི་ཧ་ཅང་གལ་ཆེན་དང་དོན་ཆེན་ཞིག་རེད། བོད་ནང་ཙམ་མ་ཟད་བོད་ཀྱི་ཆོས་རིག་སྲུང་སྐྱོབ་བྱེད་པར་སྨྲ་བའི་བཙན་བྱོལ་སྤྱི་ཚོགས་ནང་དུའང་མི་རིགས་ཁྱད་ཆོས་ག་ཚོད་ཉམས་བཞིན་འདུག སྐད་ག་ཚོད་འགྱུར་བཞིན་འདུག བོད་ཡིག་དབྱིངས་ག་ཚོད་འདུག མདོ་དབུས་མཐོ་སྒང་གི་བོད་མི་རིགས་ཀྱི་རང་གཤིས་སུ་གྲུབ་པའི་སེམས་ཁམས་གཙང་མ་ག་ཚོད་ཙམ་ལྷག་འདུག རྒྱ་གར་ཏུ་འབྱོར་ནས་ལོ་བཅུ་སོང་འགོར་བ་དང་ལོ་ལྔ་སོང་བའི་མི་བར་ལ་ཧེ་བག་དང་ཁྱད་པར་ག་ཚོད་འདུག རྒྱ་གར་ཏུ་སྐྱེས་པའི་མི་རབས་དང་པོ་དང་གཉིས་པ། གསུམ་པ་་་་མཚར་བཞིན་པའི་བཞི་པ་སོགས་ཀྱི་བར་ལ་ཁྱད་པར་ག་ཚོད་འདུག སྡུག་ས་ནས་བཤད་ན་ཕལ་ཆེར་མི་རིགས་གཞན་ཞིག་གྲུབ་བཞིན་པའམ་སྔོན་གྱི་བོད་པ་དེ་མ་ཡིན་པ་ཆགས་ཟིན་པ་ལྟ་བུའི་རྣམ་པ་མངོན་པའི་བོད་རིགས་ག་ཚོད་འདུག གྲོགས་པོ། དེ་དག་རེ་རེ་བཞིན་བསམ་བློ་ཞིབ་ཏུ་བཏང་དང་། བོད་ནང་དུ་འགྱུར་བ་དེ་དེ་ཙམ་མི་མྱུར་ཀྱང་ག་ལེར་གཅིག་པར་འགྱུར་རྒྱུའི་རྒྱུ་རྐྱེན་ཚང་མ་འཛོམས་ཡོད་རེད། ངས་བཤད་པའི་དུས་ཚོད་ཀྱིས་ང་ཚོ་འཆི་ལམ་དུ་བརྫང་ངེས་རེད་ཅེས་ཚིག་ཐག་ཆོད་པོས་བཤད་དགོས་པའི་རྒྱུ་ཚད་ནི་དེ་དག་རེད། ད་དུང་རང་བཙན་བཤད་བསྡད་ན་རང་སྲོག་རང་གིས་བཅད་པ་དང་གཅིག་པ་རེད། དབུ་མའི་ལམ་ལ་རེ་བ་མེད་པའམ་གཞན་གྱིས་ཞི་མོལ་ལམ་ནས་རྒྱ་བོད་དཀའ་ངལ་སེལ་ཐུབ་པར་སྨྲ་མཁན་མེད་པར་བདེན་ན། རང་བཙན་ལ་ནི་དེ་བས་ཀྱང་གྲུབ་འབྲས་ཡོད་པར་བཤད་མཁན་མེད་པ་ཐག་གིས་ཆོད། རིགས་པས་གྲུབ། དེ་ལས་གོང་བཤད་པ་ལྟར་རྒྱལ་བ་རིན་པོ་ཆེས་དགོངས་དོན་གཞིར་བཟུང་བོད་མི་རིགས་ཀྱི་རིག་གནས་དང་མི་རིགས་ཀྱི་ཁྱད་ཆོས་སོགས་མི་ཉམས་རྒྱུན་འཛིན་དང་དར་སྤེལ་སླད་རྒྱ་ནག་དང་མཉམ་དུ་གྲོས་མོལ་གྱི་ལམ་ནས་ཐག་བཅད་དེ་མི་རིགས་རང་སྐྱོང་གི་གནས་བབ་རྩོད་ལེན་བྱེད་པ་ནི་གོང་གི་ཉེན་ཁ་ཚང་མ་སེལ་ཐུབ་པའི་བླ་ན་མེད་དང་གོང་ན་མེད་ཅིང་ཆེས་རིག་པ་ལྡན་པའི་ཐབས་ལམ་མཆོག་ཏུ་གྱུར་པ་དེ་རེད། གཞན་རང་ཅི་འདི་མེད་པར། རང་བཙན་ཙམ་ཁ་ནས་བཤད་ཤེས་པ་དང་ལབ་ནུས་པ་ཙམ་གྱིས་བོད་དང་བོད་མི་ལ་ཕན་པའི་ནུས་པ་ཅི་ཡང་མེད་པ་མ་ཟད། དཔེར་ཆུང་ཆུང་ཞིག་གི་ལམ་ནས་བཤད་ན། ཁྱོད་བུ་ཡིན་ན་ང་ཡང་བུ་ཡིན། ངེད་གཉིས་དེ་རིང་སུ་གསོན་ལྟའོ་ཞེས་པར་ལྟ་བུའི་བླུན་པོའི་རིགས་པ་ཙམ་མོ། དེ་ལྟར་རང་བཙན་བཤད་པ་དག་གིས་ནི་ཤི་སྒུག་བཤད་པ་དང་གཉིས་སུ་མ་མཆིས་སོ། དེ་དག་ནི་མི་རིགས་ཀྱི་ལས་དབང་དང་འབྲེལ་བའི་སྐད་ཆ་ཡིན་གྱི་མི་སྒེར་དག་གང་དུ་སོང་མིན་ནི་ཞོར་འཕྲོས་ཙམ་མོ། ཞེས་བསྐྱར་དུ་གྲོགས་བསྐལ་བཟང་ལ་གུས་པ་ཏྲེ་ཧོར་ཚང་གིས་ཕུལ་ལོ།
གུ་ཤྲི་བསྟན་འཛིན་ཆོས་རྒྱལ་ཀྱིས་ཤར་དར་རྩེ་མདོ་ནས་ནུབ་ལ་དྭགས་བར་གྱི་ས་སྡེ་མི་གསུམ་གྱི་བདག་དབང་། གོང་ས་ལྔ་པ་ཆེན་པོར་ཡོད་པ་དྲིལ་བསྒྲགས།ཞེས་པའི་སྐད་ཆ་དེ་བཙན་པོའི་སྐབས་ཀྱི་སྐད་ཆ་མ་རེད།སྐབས་དེ་དང་དེའི་དུས་ཀྱི་སྐད་ཆ་རེད། ལར་ནས་ཁམས་ཁུལ་དུ་ལུང་ཚན་རེ་ལ་དཔོན་རེ་ཡོད་ཀྱང་དེའི་བོད་གཞུང་གི་མངའ་འབངས་མིན་པར་སྒྲུབ་མི་ནུས། ད་རེས་བོད་གཞུང་གི་མིང་ཕྱིར་བསྡུ་གནང་བ་ཡིན་ནའང་འདྲ། དོན་ཕྱིར་བསྡུ་གནང་བ་ཡིན་ནའང་འདྲ་གཙོ་བོ་དགོས་དམིགས་ལ་ཡིད་ཆེས་ཕེར་ངེས་ཤིག་དགོས་པ་ནི་དངོས་ཡོད་རེད། འོན་ཀྱང་དགོས་དམིགས་ཁག་ལ་ཞིབ་ལྟ་དང་ཞིབ་ཉན་ཇི་ཙམ་བྱས་ཀྱང་།
ཚོད་དཔག་ཙམ་གྱིས་ཐག་གཅོད་ལས་ད་དེ་ལས་ཐབས་གཞན་མི་འདུག་སྙམ་པའི་སེམས་ཚོར་སྤྲོད་ཐུབ་པ་མ་བྱུང་བ་ནི་དངོས་བདེན་ཡིན། ཉིད་ནས་དབུ་མའི་ལམ་གྱི་སྐོར་འགའ་ཞིག་གསུངས་འདུག་མོད། དེ་ནི་དེ་ཙམ་གྱི་རྒྱུ་མཚན་ཅན་དུ་མ་མཐོང་། གང་གི་ཕྱིར་ཞེས་ན་དབུ་མའི་ལམ་གྱི་སྲིད་ཇུས་ནི་བོད་རྒྱའི་བཀའ་སྙོག་སེལ་ཐབས་ཡོད་ན་མེད་ན་དེ་ཡིན་པ་མ་ཟད། བོད་མི་མང་ཆེ་བ་ཞིག་གི་རེ་བ་བཅོལ་ཡུལ་ཉག་ཅིག་ཡིན་པར་བཤད་ཡམ་ཇི་ཙམ་འཐེན་བཞིན་ཡོད། དེ་འདྲའི་བོད་མི་མང་པོའི་བློ་སྙིང་བྲང་གསུམ་གཏད་སའི་སྲིད་ཇུས་ཁེབས་པ་ཅན་དེ་དང་། བོད་གཞུང་གི་དོན་དང་ཐ་སྙད་སོགས་ལྷན་ཅིག་མི་གནས་པ་ལྟ་བུའི་བཤད་པ་འདི་རིགས་ནི་བློར་འཕྲོད་པར་དཀའ་ཁག་ཅི་བས་ཅང་ཆེ། མ་ཟད་བོད་མི་ཚོར་ཡོད་ན་དེས་ཆོག་མེད་ན་དེ་མེད་ལྟ་བུའི་སྲིད་ཇུས་དེའི། བོད་མི་མང་ལ་ཕན་ཇི་ཙམ་ཐོགས་པ་དེ་ཙམ་བོད་གཞུང་གི་མིང་དོན་གཉིས་ལ་ཡང་ཐོགས་དགོས་པ་ལས་། སྲིད་ཇུས་དེའི་ཆེད་དུ་ཡོད་ཚད་ནས་ཡོད་ཚད་ཕྱིར་བསྡུ་དང་བློས་གཏང་བྱེད་དགོས་བྱུང་ན། ལྷ་བདུད་དུ་བབ་པ་ལྟ་བུ་ལས་གཞན་མེད་པས་སོ། ཡང་ཉིད་ནས་བོད་རང་བཙན་གྱིས་ང་ཚོ་འཆི་ལམ་དུ་རྫོང་གི་ཡོད་ཚུལ་གསུངས་འདུག དེ་ནི་གལ་སྲིད་རང་བཙན་ནས་ང་ཚོ་འཆི་ལམ་དུ་རྫོང་གི་ཡོད་ན། དབུ་མའི་ལམ་གྱིས་ཀྱང་ང་ཚོ་ངེས་པར་དུ་འཆི་ལམ་དུ་རྫོང་བཞིན་པ་རེད། དཔེར་ན་དབུ་མའི་ལམ་གྱི་གནོན་ཤུགས་འོག་ང་ཚོར་ཤ་རྐང་རུས་པའི་བསེབ་ན་ཤ་འཐེམ་པགས་འཐེམ་དུ་ཡོད་པའི།རང་བཙན་འདི་ལྟར་འཆི་ལམ་དུ་བསྐྱལ་བ་རེད། ད་དུང་བོད་གཞུང་ཕྱིར་བསྡུ་ཡང་འདི་དང་འབྲེལ་ཚེ་འཆི་ལམ་དུ་སུས་བསྐྱལ་བ་རེད་འདུག་ཤེས་ཚོད་རེད། བཤད་ཕྱོགས་གཞན་ཞིག་ནས་བཤད་ན་ཆེ་ཆེའི་ཕྱིར་དུ་ཆུང་ཆུང་བློས་བཏང་བ་ནི་ལུགས་མཐུན་གྱི་འགྲོ་སྟངས་ཤིག་རེད། འོན་ཀྱང་གདེང་ཚོད་ཆེན་པོ་མེད་པར་བློས་གཏོང་རྐྱང་བྱས་རྐྱེན་མཐར་ཆེ་ཆུང་གཉིས་ཀ་བརླག་ན་ཇི་འདྲའི་གྱོང་གུད་ཆེ་བ་ཞིག་རེད། ང་ཚོའི་དབུ་མའི་ལམ་གྱི་ལྟ་གྲུབ་གཞི་རྩ་ལ་བཞག་ནས་གྲུབ་འབྲས་ཕྱོགས་ལ་འདང་རྒྱག་རེ་བྱས་ན། ང་ཚོས་དམིགས་ཡུལ་འགྲུབ་ཐུབ་པའི་ཡིད་ཆེས་དང་གདེང་ཚོད་སུ་ལ་ཡང་ཡོད་པ་མ་རེད། ཡིན་ན་ཡང་ངེས་གཏན་མེད་པའི་དམིགས་ཡུལ་འདིའི་ཆེད་དུ། སྟོང་བསམ་ནར་མོ་རེ་དང་རེ་སྙེག་འཐུག་པོ་རེ་ཁུར་ཏེ་ང་ཚོ་འདི་ལྟར་འཆི་ལམ་དུ་འགྲོ་གི་ཡོད་པ་རེད། ང་ཚོ་དབུ་མའི་ལམ་ལ་དུང་ཞན་ཇི་ལྟར་ཆེ་ཞིང་རེ་བ་ཇི་ལྟར་ཟབ་ཀྱང་། ཁ་གཏད་ཕྱོགས་ཀྱི་རྣམ་འགྱུར་ལ་འགྱུར་བ་མེད་ན། ང་ཚོས་ལག་པ་ཡ་གཅིག་གི་བཟློག་པའི་དཔེ་ལྟར། བློས་གཏོང་དང་ཕྱིར་བསྡུ་ཇི་ཙམ་བྱས་ཀྱང་རང་མགོ་ཆུ་ཁྲིད་ལས་ཡོང་རྒྱུ་མེད་པར་ས་རིས་ཐང་གསལ་རེད། ནམ་ཞིག་ལ་གོང་ཁྲེན་ཚང་ཡང་དག་པའི་མང་གཙོའི་་ལམ་ལ་ཁ་ཕྱོགས་པའི་དུས་ཤིག་ཤར་ན།དེའི་ཚེ་དེའི་དུས་ན་ང་ཚོས་རང་སྐྱོང་དང་རང་བཙན་གང་རྩད་ན་ཡང་རེ་བ་ཆེན་པོ་གཏན་གཏན་ཡོད་པ་རེད།གོང་གི་དུས་བཟང་དེ་ཤར་བའི་དུས་ཤིག་མེད་སོང་བ་ཡིན་ན་ང་ཚོས་ག་རེ་རྩད་ཀྱང་གྲུབ་འབྲས་ཐོན་པ་དཀའ་མོ་རེད། མ་གཞི་ནས་ད་ལྟའི་སྐབས་སུ་དབུ་མའི་ལམ་ལ་ཡིད་ཆེས་ཡོད་མདོག་སྟོན་མཁན་མང་ན་ཡང་ཕལ་ཆེ་བ་རྫུས་མ་ཡིན་པ་མ་ཟད་ད་ལྟའི་བཀའ་ཤག་འདིའི་ནང་ལ་ཡང་དབུ་མའི་ལམ་ལ་ཡིད་ཆེས་མེད་མཁན་དེ་འདྲ་ཡོད་ཚོད་འདུག དེ་འདྲ་ཡིན་དུས་ཉིད་ཀྱི་རྒྱུ་མཚན་ལ་གནས་ལུགས་ཀྱི་ནུས་པ་དེ་ཙམ་མེད་པ་རེད། ག་འདྲས་བཤད་ཀྱང་ད་རེས་ཀྱི་བཅོས་སྒྱུར་འདི་ནི་གོང་ཁྲེན་ཚང་གི་མི་སྣའི་རྟག་པར་བཤད་བསྡད་པའི་ཏ་ལ་རུ་ཚོགས་ཀྱི་སྲིད་གཞུང་བརྫུན་མ་དེ་མེད་པར་མ་བཟོས་ན། ནམ་ཞིག་ཁོ་པ་ཚོས་མེས་རྒྱལ་གོང་བུ་གཅིག་གྱུར་ལ་ཁ་བྲལ་གཏོང་གི་རེད་ཅེས་བཤད་པ་དེ་ལ་བདེན་ཁ་སྟེར་བ་དང་ངོ་སོ་རེ་ཨེ་འོངས་རེ་བ་རེད། དེ་ནི་ཇི་འདྲའི་བྱེད་ཐབས་བརྡུག་པ་ཞིག་རེད་ཨང་། གོང་ཁྲེན་ལ་ངོ་དགའ་སྤྲེལ་ལད་ཇི་ཙམ་ཞིག་འཁྲབ་པ་ཡིན་ན་ཡང་། ཁོ་པ་ཚོ་ཇེ་ངན་ཇེ་མཁྲེགས་ལས་བཟང་དུ་འགྲོ་མི་སྲིད་མོད། ང་ཚོ་འདི་ལྟར་ལོང་བ་གཡང་འཆོང་དགོས་དོན་གང་ཡིན་ནམ།། གྲོགས་པོ་སེམས་མ་ཕམ་འདི་ནི་ང་ཚོས་ལས་རེད་གྲོགས་པོ་ཏྲེ་ཧོར་ལགས།ངས་ཀྱང་འདི་སྒྱུར་དུ་མེད་པའི་ལས་ཤིག་རེད་བསམ་གྱི་འདུག དཔྱོད་ལྡན་ཐུབ་བསྟན་ལགས། ང་ཡི་ཏྲེ་ཧོར་ཐུབ་བསྟན་ལགས་སེམས་མ་སྐྱོ།།
ཅི་སྟེ་གི་ཤྲི་བསྟན་གྱིས་་་་དེ་ལྟ་བུའི་བསྒྲགས་ཡིག་ཅིག་སྤེལ་ཡོད་པའི་དབང་དུ་བཏང་ཡང་ཤོག་སྟོང་ནང་གི་ཡིག་སྟོང་ཙམ་ལས་དོན་དང་སྲིད ཁྲིམས་ཀྱིས་མངའ་ཐང་དེ་ཙམ་རྒྱས་མེད་པ་ནི་ཕར་བལྟས་ཚུར་གཟིགས་རེད། གཞན་རྒྱ་དབང་ལྔ་པར་དད་པའི་གདུལ་བྱའི་ཁྱབ་ཚད་ཀྱི་མངའ་ཁོངས་བཤད་པ་ཡིན་ན་ནི་བདེན་མོད། ཆབ་སྲིད་ནི་དེ་ལྟར་མ་ནུས་སོ། ལར་ནས་རང་བཙན་དང་དབུ་མ་གཉིས་ཀྱི་སྐོར་ལ་དཔྱད་པའི་དགོངས་ཚུལ་གསུངས་པ་དེར་ཡང་སྐྱོན་འདི་ལྟ་མཆིས་ཏེ། ༡དབུ་མའི་ལམ་ལ་གྲུབ་འབྲས་འབྱུང་མི་སྲིད་ཚེ་་་་་རང་བཙན་ལ་རེ་བ་ཡོད་དམ། དེ་གཉིས་ནི་གཅིག་པ་ཡིན་པར་གསུངས་སྲིད་མོད། དེས་ན་རང་བཙན་བཤད་ཡང་འཆི་ལམ་རེད། དབུ་མ་ལབ་ཀྱང་འཆི་ལམ་རེད། དོན་དུ་རང་བཙན་འདོད་པ་དག་གི་སེམས་ཤུགས་ནི་སྔར་ནས་ཉམས་ཟིན་ཀྱང་དགོས་དབང་གིས་བཤད་པ་ཙམ་རེད། དོན་དངོས་ལ་ཕན་ཐོགས་མེད་པའི་སྐད་ཆ་ཙམ་རེད། ༢ཡང་དབུ་མ་ལས་རང་བཙན་ལ་རེ་བ་ཆེ་རབས་བཤད་སྲིད་མོད། དེ་ལྟར་ན། རྒྱ་གཞུང་གི་ཕྱོགས་ནས། རྒྱལ་སྤྱིའི་ཐད་ནས། བོད་པ་ནང་ཁུལ་ནས་རྒྱ་ནག་དང་གྲོས་མོལ་མི་བྱེད་པར་ཐབས་ལམ་དང་སྲིད་ཇུས་ཅི་ལྟ་བུ་ཞིག་གི་འོག་རང་བཙན་ལེན་ཐུབ། དེ་ལྟ་བའི་བསམ་ཚུལ་དང་འཆར་གཞི་ནི་མིག་སྔར་རང་བཙན་བཤད་མཁན་སུས་ཀྱང་བློ་ཡུལ་ན་མེད། གླེན་རྟགས་ཤིག་རེད། ཡང་ན་འགན་མ་འཁུར་བའི་དགོས་དབང་དང་སྐབས་བབ་ཀྱི་སྐད་ཆ་ཙམ་རེད། ཧཧཧཧ་རྩེད་མོ་ཡིན། གོང་གི་གྲོགས་པོ་ཆོས་འགྲུབ་མཚན་ཅན་གྱིས་དཔྱད་བསྡུར་གནང་བ་ཐུགས་རྗེ་ཆེ། ཏྲེ་ཧོར་བས་སྨྱོན་གཏམ་བཤད་པ་ཙམ་ཡིན།