སེར་ཤུལ་རིན་ཆེན་དོན་གྲུབ།
ཡང་དང་བསྐྱར་དུ་བསམ་གཞིགས་བྱེད་སྐབས་འཚོ་བ་ནི་ཟློས་གར་ངོ་མ་ཞིག་རེད། ཟློས་གར་ནི་སྔོན་བྱུང་གི་གཏམ་རྒྱུད་དམ་དངོས་ཡོད་ཀྱི་གནས་སྟངས་གང་ཞིག་བསྐྱར་དུ་འཁྲབ་སྟོན་བྱས་པ་ཞིག་ལ་གོ་ཆོག ཟློས་གར་གྱིས་མི་རྣམས་ཀྱི་སེམས་ཁུང་དུ་བདེ་སྐྱིད་དང་སྤྲོ་སྣང་སྦྱིན་ཐུབ་ལ། དེ་ལས་ལྡོག་སྟེ་སྡུག་བསྔལ་དང་གདུང་ཚོར་ཡང་སྦྱིན་པར་བྱེད། དེ་ནི་ཟློས་གར་འཁྲབ་སྟོན་པའི་ཉམས་འགྱུར་དང་འཁྲབ་སྟངས་ཁོ་ནར་རག་ལས་པ་ཞིག་མ་རེད། དོན་ངོ་མར་འཚོ་བ་སྐྱེལ་མཁན་གྱི་མི་རྣམས་ཀྱིས་ཟློས་གར་འཁྲབ་བཞིན་ཡོད་ལ་འཁྲབ་སྟོན་པ་དང་ལྟད་མོ་བ་གཉིས་ཀ་འཚོ་བ་སྐྱེལ་མཁན་གྱི་མི་རྣམས་ལས་གཞན་མེད། འོ་ན་འཚོ་བ་སྐྱེལ་མཁན་གྱི་མི་རྣམས་ཀྱིས་ཅིའི་ཕྱིར་ཟློས་གར་འཁྲབ་སྟོན་བྱེད་པ་ཡིན་ནམ་སྙམ་སྲིད། དེ་ནི་ལན་ཐུང་ཐུང་ཞིག་སྟེ་བདེ་སྐྱིད་ལྡན་པའི་འཚོ་བ་ཞིག་དང་དྲོད་ཁོལ་འཁྱིལ་བའི་འཚོ་བ་ཞིག་གི་ཆེད་དུ་རེད། ང་བདེ་སྐྱིད་འཚོལ་ཕྱིར་གྲྭ་ཆས་གྱོན་ནས་དགོན་པར་འོང་བ་རེད། འོན་ཀྱང་ཁོང་གིས་བདེ་སྐྱིད་འཚོལ་ཕྱིར་གྲྭ་ཆས་ཕུད་ནས་གཉེན་བསྒྲིགས་བྱས་པ་རེད། ཡ་མཚན་པ་ཞིག་ལ་ཁྱོད་ཀྱིས་བདེ་སྐྱིད་འཚོལ་ཕྱིར་ཁྱིམ་ཚང་གཡུགས་ནས་ཁེར་རྐྱང་གི་འཚོ་ལམ་བསྙེགས་པ་རེད། འདི་ནི་འཚོ་བའི་ཟློས་གར་འཁྲབ་སྟངས་ཀྱི་ངོས་ཤིག་རེད། དེ་ལས་ཀྱང་གལ་ཆེ་བའི་གནད་དོན་ཞིག་ཡོད་པ་ནི་ང་དང་ཁྱོད་ཁོ་གསུམ་གྱིས་བདེ་སྐྱིད་ལྡན་པའི་འཚོ་བ་ཞིག་རྙེད་ཡོད་མེད་ཀྱི་གནད་དོན་དེ་རེད། ང་དགོན་པར་སོང་རྗེས་བུད་མེད་དང་འཇིག་རྟེན་གྱི་བདེ་སྐྱིད་དྲན་ནས་འཚོ་བ་ལ་བདེ་དྲོད་མ་ཁུག ཁོང་གྲྭ་བ་ལོགས་རྗེས་སྐྱེས་སྨན་དང་ཕྲུ་གུའི་གསོ་ཚགས་ཀྱིས་བདེ་སྐྱིད་མ་ཐོབ། ཁོང་གིས་ཁྱིམ་ཚང་གཡུགས་རྗེས་ཁེར་རྐྱང་གི་སྐྱོ་སེམས་དང་གདུང་ཡུས་ཀྱིས་འཚོ་གནས་ལ་དགོད་སྒྲ་དང་སྤྲོ་བ་མ་ཚོར། རྒྱུ་མཚན་འདིས་གསལ་བོར་སྟོན་ཐུབ་པ་ནི་བདེ་སྐྱིད་ཀྱི་འཚོ་བ་ནི་ཁོར་ཡུག་དང་འཚོ་བའི་གནས་བབ་ཁོ་ནས་སྟོབས་ཤུགས་ཀྱིས་སྐྲུན་མི་ཐུབ་པར་དེ་ལས་གཞན་པའི་སྟོབས་ཤུགས་ཀྱི་ནུས་པ་ཞིག་ཡོད་པ་དེ་རེད། དེ་ནི་འཚོ་བའི་ཟློས་གར་ལ་ལྟ་སྟངས་དང་ལྟ་སྟངས་དེ་དམ་ཛིན་བྱེད་མཁན་གྱི་གཞི་རྩའི་བསམ་བློ་དེ་རེད། ང་ཚོས་ཡིད་སྐྱོ་བའི་ཟློས་གར་ཞིག་ལ་ལྟ་སྐབས་སྐྱོ་སྣང་དང་གདུང་ཡུས་ཚང་མ་རང་ཐོག་ཏུ་བླངས་ནས་ངུ་བཤུམ་མི་བྱེད་པར་རང་ཉིད་ལྟད་མོ་བ་ཞིག་གི་འདུ་ཤེས་ཀྱིས་བལྟས་ན་རང་ཉིད་ཀྱི་བདེ་སྐྱིད་དང་དགོད་སྒྲ་ནམ་ཡང་འཇགས་མི་སྲིད། མཐར་གཏུགས་ན་འཚོ་བའི་བདེ་དྲོད་ནི་རང་ཉིད་ཀྱི་ལྟ་ཕྱོགས་ནས་རྒྱས་ཤིང་རང་ཉིད་ཀྱི་ལྟ་ཕྱོགས་ནས་འཕེལ་དགོས། དེ་ནི་ཟློས་གར་ལྟ་སྟངས་ལ་རག་ལས་པའི་ནང་དོན་ངོ་མ་དེ་ཡིན། ངས་མཚམས་རེར་འཚོ་བ་ནི་སྤྲོ་སྐྱིད་ལྡན་པ་ཞིག་ཏུ་ཚོར་ལ་ཡང་མཚམས་རེར་འཚོ་བ་ནི་ཞེ་མེར་བའི་འདམ་རྫོབ་ཅིག་ཏུ་མཐོང་། དེ་ནི་ཚོར་ཤེས་སྐྱེན་པའི་མི་རྣམས་ཀྱི་རྒྱུན་ལྡན་གྱི་བསམ་བློའི་འཁོར་ཕྱོགས་ཤིག་ཡིན་པས་ཡ་མཚན་སྐྱེ་དགོས་པ་ཅི་ཡང་མ་རེད། འོན་ཀྱང་འཚོ་བ་སྐྱེལ་མཁན་གྱི་མི་རྣམས་ཀྱིས་འཚོ་བའི་བདེ་དྲོད་གང་ནས་འཚོལ་དགོས་པའི་ཕྱོགས་སུ་ཞིབ་འཇུག་བྱ་རྒྱུ་ནི་ཅི་ནས་ཀྱང་གལ་ཆེ་བའི་རྩ་དོན་ཡིད་ནས་བཅངས་ཏེ་འཚོ་བའི་བདེ་དྲོད་ཡིད་ཀྱིས་བསྐྲུན་དགོས་ཤིང་འཚོ་བའི་སྤྲོ་སྣང་སེམས་ནས་འཚོལ་དགོས་པའི་ལྟ་ཕྱོགས་བཟུང་བ་ཡིན། དཀྱེལ་ཡངས་དང་། བསམ་ཤེས། བཟོད་བསྲན་གསུམ་ནི་རྒྱལ་མཚམས་མེད་པའི་འཚོ་བའི་བདེ་སྐྱིད་ཀྱི་འབྱུང་ཁུངས་ཡང་དག་ཅིག་རེད་ལ་འགྲོ་བ་མིའི་རིགས་ཀྱི་ཁྱད་ནོར་དང་རིན་ཐང་བླ་ན་མཐོ་བའི་ནོར་མཆོག་གཅིག་པུ་རེད། ང་དང་། ཁོང་། ཁྱོད་གསུམ་གྱིས་འཚོ་བའི་བདེ་དྲོད་ཀྱི་ཆེད་དུ་འཚོལ་དགོས་པ་ནི་ནོར་མཆོག་འདི་དག་ཡིན་ལ་ཐོབ་དགོས་པའང་ནོར་མཆོག་འདི་དག་ཡིན།།
གསལ་བཤད། (གོང་གི་མིང་ཚིག་སྟེ་ང་དང་། ཁྱོད། ཁོང་གསུམ་ནི་གང་ཟག་བྱེ་བྲག་པ་ཞིག་ལ་མི་གོ་བར་སྤྱི་སྒྲ་ཙམ་ལ་གོ་དགོས)
༢༠༡༠/༢/༢༩/མཚན་ཆུ་ཚོད་༡༢ལ་བྲིས།
དོན་ངོ་མར་འཚོ་བ་ནི་འཁྲབ་སྟོན་རེད་ལ། འཚོ་བར་རོལ་བ་ཡང་འཁྲབ་སྟོན་འཁྲབ་པ་རེད།འོན་ཀྱང་མི་རྣམས་ཀྱིས་འཚོ་བ་ནི་འཁྲབ་སྟོན་ཞིག་ཏུ་མི་བརྩི་ལ་གཡེལ་ཆུང་ཡང་གཏན་ནས་མི་བྱེད། འཁྲབ་སྟོན་ནི་འཚོ་བ་དངོས་མར་མི་བརྩི་ཞིང་འཚོ་བའི་ཁྲོད་ཀྱི་ཡན་ལག་ཙམ་དུ་བརྩི། མི་རྣམས་ལ་འཚོ་བ་ནི་འཁྲབ་སྟོན་ཙམ་རེད་ཅེས་བརྗོད་ན་མི་རྣམས་ཀྱི་བློར་གཏན་ནས་མི་འབབ། དེ་ནི་མི་རྣམས་འཚོ་བར་འཁྲེང་ཞེན་ཆེ་ཐག་ཆོད་པ་ལས། འཚོ་བ་འཁྲབ་སྟོན་མིན་པ་མཐོང་བས་མིན།འཚོ་བ་འཁྲབ་སྟོན་མིན་པའི་རྒྱུ་མཚན་མེད་ལ་འཚོ་བ་འཁྲབ་སྟོན་མི་པ་མཐོང་བའང་མེད། འོན་ཀྱང་རྒྱུ་མཚན་མེད་པའི་འཁྲེང་ཞེན་ཞིག་གིས་འཚོ་བ་དང་འཁྲབ་སྟོན་གཉིས་སོ་སོར་འབྱེད་པ་ལ་མི་རྣམས་བློ་ཁ་ཡོངས་སུ་ཚིམས་ནས་བསྡད་ཡོད་པ་རེད།།
དྲ་གྲོགས་ཆོས་གྲུབ་ཀྱིས་གསུང་བ་དེ་དེ་བཞིན་ནོ།།