ཆོས་པས་མི་ཆོས་གསུང་བ།

སེར་ཤུལ་རིན་ཆེན་དོན་གྲུབ
དགེ་བའི་བཤེས་གཉེན་གྱི་མཆོག་མཚང་ལ་རྒོལ་བ་ཡིན།
བཙུན་པའི་མཆོག་སེམས་རྒྱུད་ཐུལ་བ་ཡིན།
གདམས་ངག་གི་མཆོག་རྟག་ཏུ་རང་སེམས་ལ་བལྟ་བ་ཡིན།
དཔལ་མཉམ་མེད་ཇོ་བོ་རྗེས།
དུས་རབས་ཀྱི་རླུང་བུ་དལ་བུར་ལྡིང་པ་དང་དུས་མཚུངས་མི་རྣམས་ཀྱི་སེམས་ཀྱི་ཞིང་སར་འཕོས་པའི་དཔྱོད་ཤེས་དང་ལྟ་ཚུལ་ཡང་རླུང་བུ་དེའི་འཚུབ་ཆ་དང་བསྟུན་ནས་གཡོ་ཞིང་རྒྱུ། བསམ་བློ་མི་འདྲ་བ་དང་དཔྱོད་ཤེས་མི་འདྲ་བ་དེ་ནི་འགྲོ་བ་མིའི་ལྷན་སྐྱེས་རང་བྱུང་གི་ཆོས་ཉིད་ཅིག་ཡིན་ཞིང་ཁྱད་པར་དེས་རྙོག་འཛིང་ཅན་གྱི་ལྟ་གྲུབ་མི་འདྲ་བ་ཁག་དང་དབྱེ་ཞིབ་ཀྱིས་ཐག་གཅོད་དཀའ་བའི་གནས་ལུགས་ཇི་སྙེད་ཅིག་གི་ས་བོན་ཡང་འཇིག་རྟེན་གྱི་ཞིང་སར་བཏབ། འདི་དག་གི་སྐབས་སུ་ཆོས་ལུགས་དང་། རྫུ་འཕྲུལ། ཐར་བ། སངས་རྒྱས་ཀྱི་གོ་འཕང་། བདེ་བ་ཅན་སོགས་ལྐོག་གྱུར་རང་བཞིན་དང་ཕྲ་བའི་རྟོག་ཡུལ་དག་ལ་ཡིད་ཆེས་དང་བློ་གྲོས་ཀྱི་འཇུག་པ་ཇེ་ཉུང་ནས་ཇེ་ཉུང་དུ་གྱུར་ཅིང་དངོས་གཙོ་དང་དངོས་མཐོང་སྨྲ་བའི་ལྟ་ཚུལ་གྱི་ཁྱབ་རྒྱ་ཇེ་ཆེ་ནས་ཇེ་ཆེར་གྱུར། འདི་ནི་ལྐོག་གྱུར་གྱི་ཕྲ་བའི་གནས་ལུགས་དག་གི་རྫུན་རྐུབ་བརྡོལ་བ་མིན་ལ་རླབས་ཆེན་གྱི་སྟོན་མཆོག་དག་གིས་ལོག་ཆོས་གསུང་བའི་བདེན་དཔང་བྱས་པའང་གཏན་ནས་མིན། དེ་ནི་ཧུར་བརྩོན་རང་བཞིན་གྱི་བསམ་བློའི་ནུས་པ་ཆུང་དུ་སོང་བ་དང་གང་ཞིག་དགོས་པ་དེ་དུས་ཡུན་ཐུང་ཐུང་ཞིག་གི་ནང་དུ་རེག་དགོས་པའི་ཧམ་ཤེད་རང་བཞིན་གྱི་བསམ་བློའི་དབང་སྒྱུར་གྱི་སྟོབས་ཤུགས་ཆེས་ཆེར་འཕེལ་བས་ཡིན་ཞིང་དེ་ཡང་འཕྲུལ་ལས་དང་སྟབས་བདེའི་ལག་རྩལ་གྱིས་མི་རྣམས་ལ་སླུ་བྲིད་ཀྱི་སྦྱོར་བ་བརྩམས་དྲགས་པས་ཡིན། སྐབས་འདིར་ང་ཚོས་ཡང་་བསྐྱར་བློ་གྲོས་ཀྱི་མིག་ཟུང་ཆེས་ཆེར་ཅེར་ཏེ་མི་ཆོས་དང་ལྷ་ཆོས་ཀྱི་ཟབ་གནད་ཀྱི་རྣམ་དབྱེ་དང་། འཚོ་བའི་ལག་ལེན་གྱི་ཁྲོད་དུ་རིན་ཐང་ལྡན་པའི་སློབ་གསོ་གང་ཞིག་ཡོད་མེད་ཀྱི་སྐོར་ལ་ཞིབ་འཇུག་དང་གྲོས་བསྡུར་གྱི་བྱ་བ་བརྩམས་ཏེ་ཕན་ངེས་རང་བཞིན་གྱི་སློབ་གསོའི་ལེགས་ཆ་ལེན་དགོས་པ་ནི་འཛམ་གླིང་དང་། དུས་ཚོད། མི་རིགས་བཅས་ལ་མེད་དུ་མི་རུང་བའི་དགོས་མཁོའི་གསོས་སྨན་ཞིག་ཡིན། རྒྱུ་མཚན་དེ་དག་ལ་བརྟེན་ནས་ངས་འདིར་ནང་བསྟན་ཆོས་ལུགས་ཀྱི་མཁས་གྲུབ་ཆེན་པོ་ཇོ་བོ་རྗེ་དཔལ་ལྡན་ཨ་ཏི་ཤའི་གསུང་ཚིག་འདིའི་བརྗོད་སྙིང་གསེད་བཀྲོལ་དང་སྦྲགས་དངོས་ཡོད་འཚོ་བའི་ལག་ལེན་དུ་མཁོ་གལ་རང་བཞིན་གྱི་སློབ་གསོ་འདིའི་རིགས་ཐར་བ་སྒྲུབ་ཆེད་ཙམ་མིན་པར་འཚོ་བའི་བདེ་སྐྱིད་ཀྱི་ཆེད་དུའང་ཡིན་པའི་གནས་ལུགས་བགྲང་འདོད་བྱུང་།
གཅིག
དགེ་བའི་བཤེས་གཉེན་གྱི་མཆོག་མཚང་ལ་རྒོལ་བ་ཡིན།
དགེ་བའི་བཤེས་གཉེན་ཞེས་པའི་ཚིག་འདི་ནང་ཆོས་ཀྱི་ཐ་སྙད་ཅིག་ཡིན་ཞིང་འདོར་དྲིལ་ན་བླང་དོར་འབྱེད་པའི་བློ་གྲོས་སྦྱིན་མཁན་གྱི་དགེ་རྒན་ཞིག་ལ་ཟེར། དེང་དུས་ཀྱི་འབོད་སྲོལ་ལྟར་ན་ཡང་དག་པའི་སློབ་གསོ་སྨྲ་བའི་མཁས་དབང་ཞིག་ལ་གོ་ཆོག འགྲོ་བ་མི་གང་ཞིག་གི་ལེགས་ཉེས་ནི་དེའི་ཀུན་སྤྱོད་དང་འཇོན་ནུས་ཀྱི་ཚད་ཐིག་གི་ཐོག་ནས་འཇོག་ཅིང་དེ་ཡང་བསམ་བློ་དང་ཀུན་སྤྱོད་ལ་རག་ལས་པས་དེ་ནི་མ་ནོར་བའི་བླང་དོར་སྩོལ་བའི་སློབ་སྟོན་པ་ཞིག་གམ་དགེ་རྒན་ཞིག་ལ་བསྟེན་དགོས་པའི་གནས་ལུགས་འདིས་ནང་བསྟན་རིགས་པའི་གཞུང་ལུགས་དག་ཏུ་བླ་མ་དང་དགེ་རྒན་གྱི་ཤེས་ཚད་དང་། ཀུན་སྤྱོད་ཀྱི་ཚད་གཞི་ཡང་དག་པ་ཞིག་དགོས་པ་དང་དེ་ལྟར་ལྡན་པའི་སློབ་དཔོན་གྱི་བླ་མེད་རིན་ཐང་ལ་བརྩི་བཀུར་དགོས་པ་སོགས་དེའི་གལ་ཆེའི་རང་བཞིན་ལ་ཕྱོགས་བསྡོམས་ཀྱིས་ལམ་གྱི་རྩ་བ་བཤེས་གཉེན་བསྟེན་ཚུལ་འདི་གལ་གནད་ཆེ་བར་བཟུང་ཡོད། འདི་ནི་ཆོས་དང་ཐར་བའི་སྒྲུབ་ཕྱོགས་ཙམ་མིན་པར་མི་ཆོས་ཏེ་ཚེ་འདིའི་འཚོ་བའི་ལག་ལེན་གྱི་ཁྲོད་དུ་གོ་ས་ངེས་ཅན་ཞིག་བཟུང་ཡོད་ཅིང་ད་བར་མི་ཆོས་ཁོ་ན་སྨྲ་མཁན་ཚོས་རང་ལ་ཕན་པའི་ལེགས་ཆ་འདི་ཚོར་ཞིབ་འཇུག་ཙམ་ཡང་མ་བྱས་པར་སྣང་མེད་དུ་བསྐྱུར་རྐྱང་བྱས་པ་ནི་འཚོལ་ཞིབ་ཀྱི་སྟོང་ཆ་ཆེན་པོ་ཞིག་ཡིན། ཚེ་འདིའི་འཚོ་གནས་ཙམ་དོན་དུ་གཉེར་མཁན་ཚོ་ནི་ནང་བསྟན་རིགས་པའི་ལྟ་གྲུབ་ཀྱི་ཐོག་ནས་བལྟས་ན་དམིགས་ཐག་ཐུང་བའི་བསམ་བློ་ཅན་ཞིག་ཡིན་ཏེ་ཚེ་རབས་ནས་ཚེ་རབས་བར་གྱི་དུས་ཡུན་རིང་བའི་ཕུགས་འདུན་ལ་བལྟོས་ན་ཚེ་འདི་ཙམ་ཞིག་ནི་འཚོ་བའི་ཆ་ཤས་ཆུང་ཆུང་ཞིག་ལས་ཅི་ཡང་མིན། འོན་ཀྱང་ཚེ་འདི་ཙམ་དོན་དུ་གཉེར་མཁན་ཚོར་ཡང་ཚེ་འདིའི་གནས་བབ་དང་མཐུན་པའི་འཚོ་བ་སྐྱེལ་སྟངས་དང་མི་ཚེའི་དམིགས་ཚད་འཛིན་ཕྱོགས་སོགས་ཀྱི་ཐད་ལའང་གོང་གི་ཚིག་བརྗོད་འདིས་ལམ་སྟོན་ཆེན་པོ་ཞིག་གནང་ཡོད། རང་ལ་སློབ་སྟོན་བྱེད་མཁན་མཆོག་ཏུ་གྱུར་བ་ནི་རང་གི་མཚང་ལ་རྒོལ་བ་འདི་ཡིན་ལ་གཞན་ལ་སློབ་སྟོན་བྱེད་མཁན་མཆོག་ཏུ་གྱུར་བ་ཡང་གཞན་གྱི་མཚང་ལ་རྒོལ་བ་འདི་ཡིན། འདི་ནི་ཐེར་འདོན་རང་བཞིན་དང་སྐྱོན་བརྗོད་རང་བཞིན་གྱི་ལས་བྱ་དག་གིས་སྤྱི་ཚོགས་ཡར་རྒྱས་དང་མདུན་སྐྱོད་ཀྱི་ཕྱོགས་སུ་སྐུལ་དེད་བྱེད་པར་སྨྲ་བའི་དེང་རབས་ཀྱི་བཤད་སྟངས་དང་འདྲ་མཚུངས་སུ་སྣང་ཞིང་བྱེད་ཕྱོགས་ནི་ཞི་བ་དང་། སློབ་གསོ། རང་ཉིད་ལ་དེ་ལྟར་བྱེད་ནུས་པའི་ནུས་པ་ཡོད་པ་རྒྱུ་མཚན་དང་རིགས་པས་བསྒྲུབས་ནས་བྱ་བར་འཇུག་པས་དེང་དུས་ཀྱི་བྱེད་ཕྱོགས་དང་ཁྱད་པར་ཆེན་པོ་ཡོད་ཅིང་བྱེད་ཕྱོགས་འདི་ནི་ཉིན་རེའི་་འཚོ་བའི་ནང་མི་ཚེ་བདེ་སྐྱིད་ཀྱིས་སྐྱེལ་བའི་ཆ་རྐྱེན་དམ་པ་ཞིག་རེད་ཅེས་སྨྲ་བར་སྤོབས། གཞན་རྐྱང་རྐྱང་ལ་ཁ་ཕྱོགས་ནས་བལྟས་པ་མ་ཡིན་པར་རང་ཉིད་ཀྱི་བསམ་བློ་དང་ཀུན་སྤྱོད་ལའང་བལྟས་ཏེ་མཚང་གི་ཕྱོགས་ལ་རྒོལ་བ་ནི་འཚོ་བ་ཞི་འཇམ་དང་འཆམ་མཐུན་གྱི་ཕྱོགས་སུ་སྐྱོད་པའི་ཐབས་ལམ་ཡང་དག་པ་ཞིག་ཡིན་ལ་ཡར་རྒྱས་ཀྱི་འབོད་སྒྲ་ཞིག་ཀྱང་ཅིས་མ་ཡིན། དཔེ་མཚོན་ཆུང་ཆུང་ཞིག་ནི། རང་གི་ཁྱིམ་ཚང་དང་རང་གི་ནང་མི་དག་ལ་ཁ་རྩོད་དང་རྙོག་གླེང་བྱུང་སྐབས་སུ་ཡིན་ཡང་འཚོ་བར་བདེ་སྐྱིད་དང་དོན་སྙིང་ཡོད་མི་སྲིད། སྐབས་དེར་རང་གི་ཉེས་སྐྱོན་ལ་བརྟག་ནས་རྒོལ་ཏེ་གཞན་ལ་བསྟུན་ཐབས་བྱེད་པ་ནི་འཚོ་བ་ཞི་འཇམ་དང་བདེ་སྐྱིད་ཀྱི་རྩ་བ་ཡིན་པ་ལས་གཞན་གྱི་མ་འགྲིག་པ་ཁོ་ན་གླེང་ན་ཁྱིམ་ཚང་ཁ་འཐོར་གྱི་ཕྱོགས་སུ་ཕུད་དེད་བྱེད་པ་དང་བདེ་སྐྱིད་ཀྱི་འཚོ་བ་གཏོར་བཤིགས་བཏང་བ་ཁོ་ན་ཡིན། གནས་ལུགས་འདིས་ཁྱིམ་མཚེས་དང་། སྤྱི་ཚོགས། མི་རིགས། འཛམ་གླིང་བཅས་ལ་ཇི་ལྟར་བསྟུན་དགོས་པ་དང་རང་གི་ཚེ་འདིའི་བདེ་སྐྱིད་ཇི་ལྟར་འཚོལ་དགོས་པའི་སློབ་སྟོན་བླ་མེད་གནང་ཡོད། མཚང་ལ་རྒོལ་དགོས་པ་མ་ཟད་དེ་ཡང་དྲང་བདེན་དང་བློ་གྲོས་ཀྱི་གྲོགས་དང་ལས་བྱེད་པོ་དང་ལས་གཉིས་དབྱེ་འབྱེད་བྱས་ཏེ་བྱ་སྤྱོད་ངན་པ་འགོགས་ཐབས་དང་སྤྱོད་ངན་ཅན་གྱི་གང་ཟག་དེ་བློས་མི་སྟོང་བར་བརྩེ་བས་བསྐྱངས་ཏེ་ལེགས་ལམ་སུ་འཁྲིད་དགོས་པའི་རིན་ཐང་དགུ་བརྩེགས་ཀྱི་སློབ་སྟོན་འདི་དག་ནི་ཉིན་རེའི་འཚོ་བའི་ལག་ལེན་གྱི་ཁྲོད་དུ་ཅི་འདྲའི་རིན་ཐང་ཆེ་ཨང་། རང་ཉིད་ཀྱིས་དགེ་བའི་བཤེས་གཉེན་ག་གེ་མོས་ཅི་གསུང་བཀའ་བསྒྲུབ་དགོས་པ་དང་དེ་ལས་བརྒལ་ན་ཡོད་ཚད་ཀྱི་རྗེས་སུ་ལུས་པའི་གནས་ལུགས་སྣ་གཅིག་མ་བགྲངས་པར་རང་དང་གཞན་གྱི་མཚང་ལ་རྒོལ་བ་ནི་རང་གི་བཤེས་གཉེན་མཆོག་ཏུ་གྱུར་བ་ཞིག་ཡིན་པའི་གདམ་ངག་འདི་ནི་མི་ཆོས་བསམ་བློ་ཡི་ཆེས་མཐོ་རིམ་གྱི་ཚད་གཞི་ཞིག་གོ།
གཉིས།
བཙུན་པའི་མཆོག་སེམས་རྒྱུད་ཐུལ་བ་ཡིན།
བཙུན་ནི་འཆལ་བའི་ལྡོག་ཟླ་སྟེ་ལུས་ངག་གི་སྤྱོད་པ་བཟང་པོ་མ་ཉམ་པར་གནས་པ་ལ་གོ་ཞིང་དེ་ལྟར་གནས་པའི་སྐྱེ་བོ་དེར་བཙུན་པ་ཞེས་བཏགས་པ་ཡིན། དེང་ཡོངས་གྲགས་སུ་བཙུན་པ་ཞེས་པ་དགེ་ཚུལ་སློང་གི་སྡོམ་པ་ལྡན་པའི་གང་ཟག་ཁོ་ནར་གོ་བ་ནི་གྲགས་ཚད་ཙམ་མམ་གཙོ་བོའི་དབང་དུ་བྱས་པ་ལས་མཐའ་དཔྱད་པའི་ཚད་ཐིག་ཏུ་བཟུང་ན་དོན་དངོས་ལ་རེག་པའི་བཤད་པ་ཞིག་མིན། སེམས་རྒྱུད་ཐུལ་བ་ནི་ཐར་བ་དང་ཐམས་ཅད་མཁྱེན་པ་ཁོ་ནའི་ཆེད་དུ་དགོས་པ་ཞིག་མ་ཡིན་པར་འཇིག་རྟེན་སྤྱི་ཡོངས་ལ་དགོས་པའི་རིན་ཐང་ཅན་གྱི་ནོར་མཆོག་ཅིག་ཡིན་ཏེ་རྒྱུ་མཚན་ནི་འགྲོ་བ་མི་ཡོངས་ལ་ཀུན་སྤྱོད་བཟང་པོ་དང་ཞི་བདེའི་ཁོར་ཡུག་གི་དྲི་ཞིམ་གླིང་ཀ་དགོས་པ་མ་ཟད་སྒེར་འཛིན་འདུ་ཤེས་དང་སྒེར་གཅོད་བསམ་བློའི་གད་སྙིགས་མི་དགོས་པས་ཀྱང་རེད། འཆལ་སྤྱོད་ནི་ཚིག་གཅིག་གིས་བརྗོད་ན་རང་དང་རང་གི་ཉེ་འཁོར་གྱི་སྐྱེ་བོ་ཚོར་སྡུག་བསྔལ་བར་བྱེད་པའི་བསམ་སྤྱོད་དག་རེད། སྐྱེ་བོ་སུ་ཡིན་རུང་སྡུག་བསྔལ་མི་འདོད་པའི་ཆོས་ཉིད་ཀྱི་གནས་སྟངས་འོག་ནས་བདེ་བ་ལ་དགའ་ཞིང་དུང་བའི་ཚོར་ཤུགས་རིམ་འཕེལ་གྱི་འཚོ་བའི་མདུན་འགྲོས་ཁྲོད་དུ་བཙུན་པའི་རིན་ཐང་བླ་མེད་དུ་མངོན་ཞིང་མཐོང་བར་འགྱུར། འཆལ་སྤྱོད་བསྡོམ་པ་ནི་བཙུན་པ་ཡིན་ཞིང་བཙུན་པ་ནི་རང་སེམས་ཀྱི་སྐྱོན་མཚང་ལ་རྒོལ་ནས་ཞི་བར་བྱེད་དགོས་པའི་གནས་ལུགས་འདི་ནི་མིའི་རིགས་ཀྱི་འཚོ་བའི་གུར་ཁྱིམ་ན་གཟི་འོད་ལམ་ལམ་དུ་མཆེད་པའི་གདམས་པ་ཉག་གཅིག་གོ། སེམས་རྒྱུད་ཐུལ་བ་ནི་ཆེས་མཐོ་རིམ་གྱི་བདེ་གཤེགས་ལམ་བཟང་བརྙེས་པ་ནས་དམའ་རིམ་གྱི་རང་གི་ཉེ་འཁོར་ལ་སེམས་བཟང་དང་ལྷག་བསམ་བྱས་པ་ཡན་ཆད་ཀྱི་འབྱུང་རྩར་བརྩི་ཆོག་པ་ལས་འཇིག་རྟེན་བློས་དོར་དང་བྱ་བྲལ་གྱི་དབེན་ལམ་སྙེག་པའི་ལས་བྱ་ཙམ་ལ་བལྟས་ན་གོ་རྟོགས་ཀྱི་རྒྱ་ལས་བརྒལ་བའི་རང་འདོད་ཁེར་རྐྱང་ཞིག་ལས་ནམ་ཡང་བརྒལ་མེད། སེམས་རྒྱུད་ཐུལ་བ་ནི་གཞན་ལ་གནོད་གཞི་རྩོམ་པའི་བྱ་སྤྱོད་ལ་འགོག་བསྡོམས་བྱས་པ་ཞིག་དང་སྤྱི་ཚོགས་བདེ་སྐྱིད་ཀྱིས་འཚོ་བར་རྨང་གཞི་བསྐྲུན་པ་ཞིག་ཡིན་ཞིང་དེ་ནི་འཚོ་གནས་དོན་གཉེར་བ་ཚོས་བརྗོད་བཞིན་པའི་བདེ་སྐྱིད་དེ་མ་ཡིན་ནམ། སེམས་པ་ནི་ཆོག་ཤེས་མེད་པའི་རྒན་པོ་ཞིག་དང་འདྲ་ལ་སྐབས་རེར་སྡུག་བསྔལ་ཡང་སྐྱིད་དུ་རློམ་ཞིང་ལན་རེར་བདེ་སྐྱིད་ཀྱང་སྡུག་བསྔལ་དུ་ཚོར་བས་ཁོ་རང་གང་འདོད་དུ་བྱེད་དུ་འཇུག་པ་ནི་བདེ་སྐྱིད་ཆེ་ཤོས་སུ་བརྩི་བའི་བསམ་བློ་འདི་ཡང་སྐབས་འཕྲལ་དུ་ཡིན་ཡིན་འདྲ་བར་མཐོང་མོད་ཞིབ་ཏུ་བསམ་ན་དེ་ཡང་རྒྱུ་མཚན་ལྡན་པའི་གནས་ལུགས་ཤིག་ཏུ་ཇི་ལྟར་འགྱུར། ང་ཚོར་ཉམས་མྱོང་ཡོད་པ་ལྟར་གང་བྱེད་འདོད་ཀྱི་ལས་དེ་རང་གིས་ཅི་འདོད་འདོད་དུ་བྱེད་པའི་གོ་སྐབས་ཐོབ་སྐབས་དེར་ཞེ་མེར་བའི་ཚོར་བ་འབྱུང་ཞིང་དམིགས་བསལ་གྱི་བདེ་ཚོར་གང་ཡང་མི་མྱོང་བར་འགྱུར་འགྲོ་བའི་གནས་ལུགས་འདིས་རང་སེམས་གང་འདོད་དུ་གཏོང་བ་ནི་བདེ་སྐྱིད་ངོ་མ་ཞིག་གི་འབྱུང་རྩ་མིན་པའི་གསལ་བཤད་བྱས་པ་རེད། འཇིག་རྟེན་གྱི་འཚོ་གནས་དོན་གཉེར་ཅན་ཚོས་སྐྲ་ལོ་བྲེགས་ནས་རབ་བྱུང་བསྒྲུབ་མི་དགོས་ཤིང་གཟན་ཤམ་གྱོན་ནས་དགོན་པར་འགྲོ་མི་དགོས་མོད་རྟེན་འབྱུང་ལྟ་གྲུབ་དང་། བྱམས་བརྩེའི་མྱོང་གོམས། སེམས་རྒྱུད་ཞི་བྱེད་ཀྱི་སྨན་མཆོག་འཐུང་ན་འཚོ་བ་བདེ་སྐྱིད་དང་བཟའ་ཚང་འཆམ་མཐུན་གྱིས་སྐྱེལ་བར་རོགས་རམ་བྱེད་ངེས་ཡིན་པ་ནི་སུས་ཀྱང་བསྙོན་དུ་མེད། མདོར་ན་ནང་སེམས་ཀྱི་ཁ་ཕྱོགས་ལ་ཞིབ་འཇུག་བྱས་ཏེ་ལེགས་ཉེས་འདོར་ལེན་གྱི་ཐོག་ནས་དམིགས་འདུན་འཚོལ་བ་ནི་སངས་རྒྱས་ཀྱི་གོ་འཕང་ཐོབ་པའི་ཆེད་དུ་ཙམ་མ་ཡིན་པར་ཚེ་འདིའི་འཚོ་བའི་བདེ་སྐྱིད་ཀྱི་དགོད་སྒྲ་ཡིད་དུ་འོང་བ་ཞིག་གི་ཆེད་དུའང་ཡིན་ནོ།།
གསུམ།
གདམས་ངག་གི་མཆོག་རྟག་ཏུ་རང་སེམས་ལ་བལྟ་བ་ཡིན།
གདམས་ངག་ནི་ཕན་པའི་རང་བཞིན་གྱི་ཚིག་ཅིག་ལ་ཟེར་ཞིང་ཕན་ཞེས་པའི་ཚིག་འདིའི་ཁྱབ་ཚད་ནི་སངས་གྱི་སྐུ་བཞིའི་གོ་འཕང་ནས་གནས་སྐབས་ཀྱི་བདེ་སྐྱིད་ཉི་ཚེ་བའི་བར་གྱི་བདེ་བར་སྦྱོར་བ་ཡོད་དོ་ཅོག་ལ་བསམ་ཆོག ཕན་བདེ་ཞེས་པའི་མིང་ཚིག་འདི་ང་ཚོར་མཁོ་གལ་ཆེ་བའི་རང་བཞིན་གྱི་ཇི་འདྲ་ཞིག་ཡིན་པ་ནི་སུས་ཀྱང་ཤེས་ནུས་ཏེ་ཕན་པའི་ང་ཚོར་བདེ་བའི་མགྲོན་པོ་ཕེབས་བསུ་བྱེད་ཅིང་ཁོར་ཡུག་དང་འགྲོ་བ་མིའི་རིགས་ལ་སྐྱིད་པའི་ཉི་མ་ཤར་བར་བྱེད། ཕན་པ་ནི་འཇིག་རྟེན་འདིར་ཆེས་གལ་ཆེ་བའི་ནོར་བུ་རིན་ཐང་ཅན་ཞིག་ཡིན་པ་སུས་ཀྱང་ཁས་ལེན་བྱེད་ངེས་མོད་ཇི་ལྟར་བྱས་ནས་ང་ཚོར་ཕན་པ་ཡོང་མིན་གྱིི་གནས་ལུགས་ལ་སུས་ཀྱང་བསྡོམས་ཚིག་ཡང་དག་ཅིག་རྒྱག་ཐུབ་མེད་པའི་གནས་སྐབས་དེར་ཏག་ཏག་གནས་ལུགས་འདོམས་པའི་སྨྲ་བ་ཟླ་མེད་པ་ཆེན་པོ་སྟོན་པ་བཅོམ་ལྡན་འདས་ཀྱིས་བདེ་བ་ཐམས་ཅད་སེམས་ནས་ཡོང་ཞིང་སྡུག་བསྔལ་ཐམས་ཅད་སེམས་ནས་སེལ་བའི་གདམ་པ་ཟབ་མོ་འཇིག་རྟེན་ལ་བསྩལ་ཡོད། ནང་ཆོས་ཀྱི་ལྟ་གྲུབ་ལྟར་ན་གནས་སྐབས་དང་མཐར་ཐུག་གི་བདེ་བ་ནི་གཙོ་བོར་སེམས་ནས་བྱུང་ཞིང་ལེགས་ཉེས་ཀྱི་རྣམ་དབྱེ་ཐམས་ཅད་སེམས་ལ་རག་ལས་པའི་འདོད་ཕྱོགས་བཟུང་ཡོད། རྒྱུ་མཚན་དེའི་དབང་གིས་ནང་ཆོས་ཀྱི་གཞུང་ཆེན་མོ་དག་ཏུ་སེམས་ཀྱི་ངོ་བོ་དང་ལྟ་སྟངས། ཇི་ལྟར་བྱས་ནས་སེམས་འདུལ་དགོས་པ་དང་སེམས་རྒོད་ལ་བཏང་བའི་ཉེས་དམིགས་སོགས་ཞིབ་ཅིང་ཕྲ་བར་གཏན་ལ་ཕབས་ཡོད། རྒྱུ་འབྱོར་བ་དང་མཚན་སྙན་གྲགས་ཀྱིས་ང་ཚོར་གནས་སྐབས་ཀྱི་བདེ་བ་སྦྱིན་པར་བྱེད་པ་ནི་སུས་ཀྱང་བསྙོན་དུ་མེད་པའི་གནས་སྟངས་ཤིག་ཡིན་ཞིང་འཇིག་རྟེན་སྤྱི་ཡོངས་ཀྱི་ཆ་ནས་དགོས་ངེས་ཀྱི་ལས་སུ་ཁས་ལེན་ངེས་མོད་ང་ཚོ་འདི་དག་ལ་སྲེད་དྲགས་པའི་དབང་གིས་སེམས་ཀྱི་ཞི་བདེ་དང་འཇིག་རྟེན་སྤྱི་ཡོངས་ཀྱི་འགན་འཁྲི། འཛམ་གླིང་སྤྱི་ཕན་གྱི་ལས་འཆར་དག་ལ་དུས་ནས་དུས་སུ་འགོག་རྒོལ་དང་འགལ་རྐྱེན་བཟོས་ཡོད་པ་ནི་མཐོང་ཆོས་སུ་གྱུར་ཡོད། ནང་སེམས་ཀྱི་འདོད་རྔམ་ཤུགས་དྲགས་པའི་དབང་གིས་འཛམ་གླིང་འདིའི་ཐོག་ཚེ་སྲོག་སྣང་ཆུང་གིས་ཉམ་ཆུང་མི་མང་ཁྲི་སྟོང་མང་པོ་སྡུག་བསྔལ་གྱི་འོབ་ཏུ་བཅུག་པ་དང་། རྡུལ་ཕྲན་ནུས་ཤུགས་ཀྱིས་འཇིག་རྟེན་གོ་ལའི་སྐྱེ་འགྲོ་ཡོངས་ཀྱི་འཚོ་གནས་ལ་འཇིགས་སྐྲག་དང་སེམས་ཁྲལ་འཕར་མ་ཞིག་བཟོས་པ་སོགས་ནི་དཔེ་མཚོན་ཙམ་ཡིན། སྐབས་རེར་ཕུགས་རིང་གི་གནས་ཚུལ་ལ་རྨོངས་པའི་དབང་གིས་ང་ཚོ་ནོར་འཁྲུལ་གྱི་ཕྱོགས་སུ་འགྲོ་བཞིན་ཡོད་ལན་རེར་བདེ་བ་བཅོས་མ་དག་གི་བསླུ་བྲིད་འོག་ང་ཚོ་སྡུག་བསྔལ་གྱི་ཕྱོགས་སུ་སྐྱོད་བཞིན་ཡོད། འདི་དག་ཐམས་ཅད་བསྡོམས་བརྒྱབས་ནས་ལྟ་སྐབས་དེ་ནི་རང་སེམས་ལ་རྟག་ཏུ་རྣམ་དཔྱོད་དང་དྲན་ཤེས་ཀྱིས་བལྟས་ནས་རང་སེམས་ལ་རྟག་ཏུ་ལོག་ལམ་དུ་མི་འགྲོ་བའི་འགོ་བསྐོན་གྱི་སྦྱོར་བ་བརྩམས་དགོས་པ་འདིའོ།། རྟག་ཏུ་རང་ཉིད་ཀྱིས་ལེགས་ཉེས་གང་དང་གང་བྱེད་ཀྱི་འདུག་རང་སེམས་ལ་བརྟགས་ཤིང་རང་སེམས་ལ་འདྲི་དགོས་ཞིང་དྲིས་པའི་གྲུབ་དོན་ལེགས་ཉེས་འདོར་ལེན་བྱ་དགོསཔ་འདི་ཉིན་རེ་ཉིན་རེའི་འཚོ་བའི་མཁའ་དབུགས་བདེ་སྐྱིད་ཀྱིས་སྐྱེལ་བའི་གདམ་པ་རུ་གསུང་བ་འདི་ནི་འཚོ་བ་སྐྱེལ་མཁན་གྱི་མི་ཚང་མས་ཉམས་སུ་ལེན་འོས་པའི་ལམ་སྟོན་མཆོག་ཏུ་གྱུར་བ་ཞིག་ལས་ཐར་བའི་ཞིང་ཁམས་འཚོལ་བའི་སྐྱེ་བོ་ཚོ་ཁོ་ནའི་བསམ་དགོས་པ་ཞིག་གཏན་ནས་མིན་ནོ།། །། ༢༠༡༡/༦/༢༠ལ་བྲིས།