ལྷོ་ཕྱོགས་ཉི་ཟླ་།
སྤྱིར་གདན་ས་ཁག་ནི་ནང་བའི་ཆོས་ཀྱི་ལྟེ་གནས་ངོ་མ་ཞིག་ཏུ་ཀུན་གྱིས་ངོས་འཛིན་གནང་དང་གནང་བཞིན་པ་མ་ཟད་ད་ལྟ་ཡིན་ན་ཡང་གཙོ་བོར་སེར་འབྲས་དགེ་གསུམ་གཙོའི་རིས་མེད་ཀྱི་ཆོས་སྡེ་མང་པོ་ཞིག་ནང་བའི་ཆོས་ཀྱི་ལྟེ་གནས་ཞིག་ཏུ་ཆགས་ཡོད་པ་སྨོས་མེད་རེད། དེ་དག་གི་ནང་ནས་རང་ཉིད་ལ་ཆ་རྒྱུས་དང་ཕྱོགས་གང་ཐད་ནས་ཐག་ཉེ་བའི་ཆ་ནས་སེར་འབྲས་དགེ་གསུམ་གྱི་ད་ལྟའི་གནས་བབ་དང་འབྱུང་འགྱུར་གྱི་ཁ་ཕྱོགས་ཙམ་ཞིག་བརྗོད་འདོད་སྤྲོ།
སྤྱིར༸གོང་ས་མཆོག་ནས་དུས་ནས་དུས་སུ་གསུངས་དང་གསུང་བཞིན་པ་རེད། གདན་ས་ཁག་ནས་གཙོ་བོ་སློབ་གཉེར་བ་ཡོངས་ལ་དུས་རབས་དང་མཐུན་པའི་ཤེས་ཡོན་སྤྲོད་སྟངས་ཕྱོགས་ལ་ཧ་ཅང་བཀའ་སློབ་རྒྱས་པོ་ཐེངས་མང་གནང་ཚར་ཟིན། འོན་ཀྱང་དེ་ཙམ་གྱིས་གདན་ས་ཁག་གི་ལས་ཀྱི་སྣེ་མོ་པ་ཚོས་འགན་ཞིག་བླངས་ཐུབ་ཨེ་འདུག་བསམ་པ་ཞིག་རང་བཞིན་གྱི་དྲན་ཡོང་གིན་འདུག ཕྱོགས་ཡོངས་ནས་ཞིབ་ཏུ་བལྟས་བ་མ་གཏོགས་ཟུར་ཙམ་རྒྱུ་མཚན་དུ་བྱས་ནས་བརྗོད་ཀྱིན་མེད། གཙོ་བོ་ཞན་ཆ་དེ་དག་ཐོག་མར་གང་ནས་བསུབ་དགོས་ཀྱི་འདུག་ལབ་ན་དགེ་ལྡན་རྒྱུགས་སྤྲད་ཆེན་པོ་ནས་གདོང་ལེན་བྱེད་དགོས་བ་ཞིག་ཏུ་ཚོར་བྱུང་།
གང་ཡིན་ཞེ་ན་སྤྱིར་གཞུང་བཀའ་བོད་ལྔ་ལ་སློབ་སྦྱོང་བྱས་ཟིན་ནས་དགེ་ལུགས་རྒྱུགས་སྤྲད་ལ་འགྲོ་དགོས་བ་རྩོད་མེད་རེད། ཡིན་ཡང་ལོ་དྲུག་རིང་ལ་ཞིབ་ཏུ་མགོ་ནས་མཇུག་རྫོགས་མཚམས་བར་དུ་བསྐྱར་ཀློག་ཙམ་གྱི་འགྲོ་སྟངས་ཤིག་འདུག་པས་དེ་ནི་ཡག་པོ་ཞིག་ཏུ་མཐོང་མ་སོང་། རྒྱུ་མཚན་གང་ཡིན་ཞེ་ན་བསྐྱར་ཀློག་འདྲ་བོ་ཞིག་མ་གཏོགས་ཡར་རྒྱས་དམིགས་གསལ་བ་ཞིག་ཡོང་གི་མེད་པ་དངོས་མཐོང་རེད། དེ་དག་ལས་ལྡོག་སྟེ་དམིགས་ཡུལ་གསར་བ་ཞིག་དང་ལམ་ཁ་གསར་བ་ཞིག་ཏུ་བསྐྱོད་ཐུབ་ན་དགེ་མཚན་ཡང་ཆེ་བར་སྣང་ངོ་།
ལམ་ཁ་དང་དམིགས་ཡུལ་ནི༸གོང་ས་མཆོག་གི་བཀའ་དགོངས་དང་མཐུན་པའི་སྒོ་ནས་འགྲོ་ཐུབ་རྒྱུ་འདི་ཞེ་དྲག་གི་གནད་འགག་ཆེན་པོ་རེད་དྲན་གྱི་ཡོད། ལམ་ཁ་དང་བསྐྱོད་ས་དེ་གང་ཡིན་ཟེར་ན་གཞུང་ཆེན་བཀའ་བོད་ལྔ་ལ་རིག་གཅིག་རྐང་འཛིན་གྱི་ལམ་ཁ་འདི་ལ་གོམ་པ་དང་པོ་སྤོ་དགོས་བ་མ་ཟད་འདི་ལ་གདེངས་འཇོག་ཡང་ཆེ་རུ་བྱེད་དགོས། དཔེར་ན་ལོ་དང་པོ་ནས་རྒྱུགས་སྤྲད་ལྟར་དུ་གཞུང་ཆེན་བཀའ་བོད་ལྔ་ལ་རིམ་པ་བཞིན་དུ་ཆེད་སྦྱངས་ཐུབ་པར་སོ་སོར་ཕྱེ་ནས་ལོ་རིམ་དང་པོ་ནས་གཞུང་ཆེན་གཅིག་ལ་ཆེད་དུ་སྦྱངས་བ་ཙམ་མ་ཟད་རྒྱ་གཞུང་གཙོ་བོ་བཟུང་ནས་ཆོས་ལུགས་རིས་མེད་ཀྱི་གཞུང་དེ་དག་ཡང་གོ་ བ་ལེན་ཐུབ་པར་བྱེད་དགོས།
དཔེར་ན། དབུ་མ་རིག་གཅིག་རྐང་འཛིན་ཡིན་ན་རྒྱ་གཞུང་གཙོ་བོར་བཟུང་སྟེ་ལོ་དྲུག་རིང་ལ་ཆེད་དུ་དགེ་ལྡན་རྒྱུགས་སྤྲད་ཆེན་པོའི་སྐབས་སུ་ཡིན་ན་ཡང་ཁོ་ལ་བརྒྱ་ཆ་མ་མཐར་ཡང་༧༥ཟིན་དགོས་བའི་སྒྲིག་གཞི་ཞིག་བཟོས་ནས་རིགས་གཅིག་རྐང་འཛིན་ཞིག་བྱེད་ཐུབ་ན་ད་དུང་གཞུང་ཆ ེན་བཀའ་བོད་ལྔ་ལ་ཆེད་མཁས་ཕུལ་བྱུང་བ་མང་པོ་ཞིག་ཐོན་ཐུབ་པ་སྨོས་མེད་རེད། དེ་ཙམ་གྱི་སྤྱི་ཚོགས་ལ་ནང་ལ་ནུས་བ་ཞེ་དྲག་ཆེན་པོ་ཞིག་ཐོན་ཐུབ་ཀྱི་རེད་བསམ་པའི་གདེངས་ཚོད་ཆེན་པོ་བྱེད་ཀྱིན་ཡོད།
བསམ་འཆར་བཏོན་པར་དགའ་བསུ་ཞུ།
xxxxxxxxxxxxxxxxxx
སྟོན་མཆོག་སྨྲ་བའི་རིང་ལུགས་འཛིན་པ།།
མདོ་སྔགས་ཉི་ཟླའི་རྣ་ཆ་གཡོ་བ།།
མཁས་གྲུབ་གསེར་རིའི་ཕྲེང་བ་བསྟར་བའི།།
གདན་ས་ཆེན་པོ་སེ་འབྲས་དགའ་གསུམ།།
ཡ་རབས་མེ་ཏོག་འཛུམ་གྱིས་རྒོད་པའི།།
སྟོན་པ་མཉེས་པའི་མཆོད་སྤྲིན་ཉིད་དུ།།
བསླབ་སྐྱོར་ཆོས་གྲོགས་བཙུན་པའི་སྡེ་ལ།།
སྙིང་ནས་ཕྱག་འཚལ་ངག་གིས་བསྟོད་དོ།།
ཁྲིམས་ལས་འདས་པའི་ཉེས་དམིགས་བཅུ་གས།།
སྙིང་ལ་ཚེར་མའི་རེག་བྱ་རྩུབ་ཡང་།།
བཤགས་སྡོམ་ཉམས་ལེན་རྟག་ཏུ་འབད་པའི།།
ཁྲིམས་ལྡན་བཙུན་པ་བདག་གིས་མཐོང་ངོ།།
རྒྱན་དྲུག་གཞུང་ལུགས་ནམ་མཁའི་མཐའ་ལ།།
ཤེས་རབ་སྣང་བ་འབུམ་དུ་བརྩེགས་པའི།།
རྩོད་སྒྲའི་ང་རོ་འབྲུག་སྟོང་ལྡིར་བ།།
རྔམ་སྟབས་ཙམ་མིན་བདག་གིས་མཐོང་ངོ་།།
འདོད་ཆུང་ཆོག་ཤེས་འཚོ་བ་སྐྱ་ཆད།།
གསོ་སྦྱོང་མེ་ཏོག་ལྟ་བུར་མཛེས་པའི།།
བླ་གོས་གུར་ཀུམ་ཚལ་དང་འགྲོགས་ཤིང་།།
ཁྲིམས་ལྡན་གྲྭ་བ་བདག་གིས་མཐོང་ངོ་།།
གདན་སའི་ཚུལ་ཁྲིམས་མུ་གེས་མ་གུམ།།
ཟབ་མོའི་གཞུང་ལ་གློག་འོད་འཁྱུག་འཁྱུག།
ཞི་བའི་ལམ་ནས་ཞི་བར་ཕྱོགས་པའི།།
དགེ་སྦྱོང་དམ་པ་བདག་གིས་མཐོང་ངོ།།
ཕྲག་དོག་སྦྲུལ་གྱི་དུག་ལྕེ་བསྐྱོད་པའི།།
འཐབ་རྩོད་ལྷུར་ལེན་རིང་དུ་བཏང་ནས།།
མཚན་སྙན་གཟི་དཔལ་སྟོང་གིས་མཛེས་པའི།།
ཆོས་ཀྱི་བཀོད་པ་བདག་གིས་མཐོང་ངོ།།
ལེགས་ཚོགས་ཀུན་གྱི་གཏེར་རྒྱ་རྡོལ་བའི།།
བསམ་སྦྱོར་འོད་སྟོང་མཁའ་ལ་མཛེས་པ།།
གཞན་ལ་བསྟན་པའི་དགྲ་ཞེས་མི་འཛེར།།
ཚུལ་ལྡན་དགེ་བཤེས་བདག་གིས་མཐོང་ངོ།།
སྡིག་པ་གཞོམ་ཕྱིར་ལུས་གདུང་རྩོམ་པ།།
བླུན་པོ་ཤེས་འཆལ་རྟགས་སུ་གསུངས་མོད།།
བློ་དང་བརྩོན་འགྲུས་དོ་ཟླ་མེད་པའི།།
བཙུན་ཆུང་གཞོན་ནུ་བདག་གིས་མཐོང་།།
སྤྲིན་དཀར་ལགས།
གདན་སའི་གྲྭ་པས་ཆང་རག་ཚོད་མེད་འཐུང་བགྱིད་ཡོད་པ་དཔང་པོ་ར་སྤྲོད་གནང་རོགས། དེ་མིན་ན་ཁ་སྡིག་མ་བསགས་ན་ལེགས། ང་ཚོའི་དགྲ་རྒྱ་མིའི་ལས་བྱེད་དེ་ཚོ་རེད་མ་གཏོགས་བོད་པའི་དགེ་འདུན་པ་དེ་ཚོ་ག་ལ་ཡིན།
རྗེ་རིན་པོ་ཆེའི་གདན་ས་ཡིན་པས་གདན་ས་གསུམ་ཟེར། དེ་ལ་གྲྭ་ཚང་དྲུག་ཡོད་པ་ཡང་རྩ་བ་གཅིག་ལས་མཆེད་པའོ།། གྲྭ་ཚང་དྲུག་པོ་རེ་རེར་ཡིག་ཆ་མ་འདྲ་བ་རེ་ཡོད་པ་དེས་རྗེ་རིན་པོ་ཆེའི་ལེགས་བཤད་དག་གི་དགོངས་དོན་གཤིས་ཕྱིན་པ་འཚོལ་བ་ལ་ཕན་རླབས་ཡོང་གི་ཡོད་པ་གསལ་བོ་རེད། འཇང་དགུན་ཆོས་ཆེན་མོ་ཞེས་ཡོངས་སུ་གྲགས་པའི་བགྲོ་གླེང་ཆེན་མོ་དེའི་སྐབས་གྲྭ་ཚང་དྲུག་གི་རིགས་སྨྲ་བ་ཚོ་འདུས་ནས་ཚད་མ་རྣམ་འགྲེལ་གྱི་སྟེང་ནས་བགྲོ་གླེང་དོགས་གཅོད་དང་ཡིག་ཆ་མ་འདྲ་བའི་བཤད་ཚུལ་རྣམས་གོ་བསྡུར་ལྷུག་པོར་གནང་ཐུབ་ཀྱི་ཡོད་པ་རེད། སྤྱི་ནོར་གོང་ས་མཆོག་གིས་བཀའ་སློབ་ལམ་གྱི་འོག་ནས་དེང་སང་བཀའ་བརྒྱུད་དང་ཇོ་ནང་སོགས་ཆོས་རྒྱུད་ཁག་གཞན་ནས་ཀྱང་འཇང་དགུན་ཆོས་ལ་ཕེབས་མཁན་ཡོད་པ་དང་རེ་ཟུང་ནི་ཡིག་ཆའི་ཞེན་ཁོག་ཙམ་གྱིས་མཆོང་རྒྱུག་བྱེད་མཁན་ཡོད་ན་ཡང་དེ་ཚོ་བགྲོ་གླེང་འདི་ལ་ཞུགས་པའི་དགོས་པ་འགྲུབ་ཡོད་པ་མ་རེད། གཙོ་བོ་བསམ་ཚུལ་བརྗེ་ལེན་གྱི་སྤྱོད་པ་འདི་ཚན་རིག་གི་སྤྱོད་པ་དང་མཐུན་ལ་འཇང་དགུན་ཆོས་ལྟ་བུའི་བགྲོ་གླེང་ཆེན་མོའི་སྤྱོད་པ་དང་ཡང་མཐུན་པས་དོན་གྱི་གནད་ལ་མ་རེག་པའི་ཡིན་མིན་རྩོད་པ་ཙམ་ཞིག་ག་ལ་ཡིན། གྲྭ་ཚང་དྲུག་གི་ལུགས་གཉིས་ཀྱི་བྱ་བ་རྣམས་སྐྱབས་མགོན་རིན་པོ་ཆེ་ལ་དགོངས་སྐོར་ཞུས་ནས་ཐག་གཅོད་པ་ལས་ལས་ཀྱི་སྣེ་མོ་བ་རེ་ཟུང་ཞིག་གིས་བསྒྱུར་ཆོག་ཆོག་ཅིག་མ་རེད། ཆོས་ཕྱོགས་ནས་བཤད་ན་སྒྲིག་འཛུགས་དམ་ལ་ཆང་འཐོང་རྒྱུ་ཕར་ཞོག་དང་ཐ་ན་གྲོང་གསེབ་ཁག་ན་འགྲོ་སྐྱོད་བྱེད་པ་མཐོང་ཚེ་ཆད་པ་ནན་མོ་གཏོང་ངེས་རེད། ངས་བསམ་ན་གདན་ས་ཁག་གི་སློབ་གཉེར་ཡར་རྒྱས་དང་གང་ཅིའི་ཐད་ནས་གཞན་དང་བསྡུར་ཐབས་མེད་པ་ཞིག་བྱུང་བ་འདི་སྒྲིག་འཛུགས་དམ་པོ་ཞིག་ཡོད་པ་དེའི་བཀའ་དྲིན་རེད་བསམ་གི དེ་མིན་གང་དགའ་གང་སྐྱིད་ཀྱི་ཕྱོགས་སུ་ལྷུང་ངེས་མ་རེད་དམ། གཙོ་བོར་རང་རང་གི་ལུགས་སྲོལ་དྲི་མ་མེད་པ་དེ་མ་ཉམས་པར་ཉར་ཚགས་བྱ་རྒྱུ་ནི་ཁ་ཚ་དགོས་གཏུགས་ཆགས་ཡོད་ལ། འཛམ་གླིང་གི་རིག་གཞུང་སྲུང་སྐྱོབ་ཀྱི་ཆ་ཤས་གལ་ཆེ་ཞིག་ཀྱང་ཆགས་ཡོད་པ་རེད་སྙམ། གུང་ཐང་རིན་པོ་ཆེས། རྩ་བ་བོར་ནས་ཡལ་ག་མ་འཛིན་ཨང་།། ཞེས་པ་སྒྲ་སྙན་སྨན་རྩིས་སོགས་ཐུན་མོང་གི་རིག་གནས་སྤྱི་དང་ཁྱད་པར་དེང་དུས་ཤེས་ཡོན་གྱིས་མཚོན་པའི་ཤེས་བྱ་སྣ་མང་ལ་སྦྱང་དགོས་པ་ནི་གལ་ཆེ་ཡིན་ན་ཡང་དེ་ཚོ་ཞོར་འཕྲོས་སུ་སྦྱང་དགོས་བ་ལས་གཙོ་བོར་སྦྱང་བྱ་མ་རེད། ཡུལ་དུས་ཀྱི་དབང་གིས་འདུལ་བའི་བཅས་ཁྲིམས་དེ་ཡང་རུང་བ་དང་མཐུན་ན་སྤྱད་པར་བྱ་བ་དང་རུང་བ་དང་མི་མཐུན་ན་མི་སྤྱད་པར་བྱ་བ་སོགས་འདུལ་བ་མདོར་བསྡུས་གསུངས་དགོས་པའི་རྒྱུ་མཚན་ཤེས་དགོས་པ་ཡུལ་དུས་ཀྱི་དབང་གིས་རེད། འདུལ་བ་ལས་དགེ་སློང་ཚོས་ཉི་མའི་སུམ་ཆ་གཅིག་ལ་ཕྱི་རོལ་རིག་བྱེད་ཀྱི་གཞུང་ལ་སྦྱང་དགོས་གསུངས་ནའང་དེང་སང་ཡུལ་དུས་ཀྱི་དབང་གིས་ཕྱི་རོལ་རིག་བྱེད་ཀྱི་གཞུང་ལ་སྦྱང་པའི་དགོས་པ་རྒྱུ་མཚན་ཆེར་མེད་ལ། དེ་ལས་དེ་ལ་རུང་མཐུན་སྦྱར་ནས་དེང་དུས་ཀྱི་རིགས་གསར་ལ་སྦྱང་ན་ཡུལ་དུས་ཀྱི་དབང་གིས་དགོས་པ་ཆེ་ལ་སྐྱབས་མགོན་རིན་པོ་ཆེའི་དགོངས་གཞི་ཡང་དེ་རེད།
བསམ་འཆར་བཏོན་པར་རྒྱུ་མཚན་ཡོད་འདྲ་བོ་རེད་ངོ་མ་དེ་འདྲ་ལ་བསམ་ཞིག་གནང་ན་དགེ་མཚན་ཆེ་བར་མཐོང་།
མིག་བརྒྱད་པ་ནས་ གནད་ལ་ཁེལ་བའི་དོགས་གཅོད་ཟབ་གནད་གནང་འདུག་པས་དེ་འདྲ་གང་མང་ཞིག་གི་རང་ཉིད་ཀྱི་བསམ་ཚུལ་ཇི་བཞིན་བྲིས་ན་དེ་ནི་རྒྱུ་མཚན་ཡོད་མེད་གང་ལྟར་ཡང་བསམ་ཞིག་བྱེད་ས་གལ་ཆེན་ཞིག་རེད། གང་མང་ཞིག་གིས་བསམ་ཚུལ་འདོན་པའི་རེ་བ་བཅས།
གདན་སའི་སློབ་གཉེར་གནང་ཕྱོགས་དང་སློབ་ཚན་བསྒྲིག་ཕྱོགས་ལ་འགྱུར་པ་གཏོང་དགོས་ན་མི་རབས་གསར་པ་ཞིག་དབུ་ཁྲིད་དམ་དབང་ཆ་ཡོད་མཁན་ཞིག་སླེབ་དགོས་པ་རེད་དེ་མིན་དཀའ་མོ་ཞིག་རེད། གདན་ས་ཁག་ནི་བོད་ཀྱི་རིག་གཞུང་གི་ལྟེ་བ་ཞིག་ཡིན་ཅིང་དེ་ལ་ཕྱོགས་གང་ཐད་ནས་གྲྭ་སྒྲིག་འཐུས་ཚང་ཞིག་བྱུང་ན་སིན་ཏུ་ནས་ལེགས། དེ་ངས་སྨྲ་འདོད་པ་ནི་སློབ་ཚན་ཀྱང་གཙོ་བོ་རང་རང་གི་གཞུང་ལུགས་དང་དེ་ནས་ཕྱི་ནང་གི་གྲུབ་མཐའ་ཀུན་ལའང་མཐོང་རྒྱ་ཐོས་རྒྱ་ཆེན་པོ་ཡོང་ཕྱིར་ངེས་པར་དུ་དེ་དག་གི་ལྟ་གྲུབ་ལའང་མཐོང་ཕུལ་ཆེ་བ་ཞིག་དགོས་རྒྱུ་ནི་ཤིན་ཏུ་ནས་གལ་ཆེ། དེ་ལྟར་བྱུང་ན་གྲུབ་མཐའ་རིས་མེད་དམ་ཆོས་ལུགས་ནང་ཁུལ་མཐུན་ལམ་དམ་ཚིག་འོ་ཆུ་འདྲེས་པ་ཟེར་བ་དེ་ཡོང་ངེས་ཡིན། དེ་མིན་རང་གི་གཞུང་ལུགས་གཅིག་པོ་ལས་གཞན་གྱི་ལྟ་གྲུབ་ལ་རྒྱུས་མངའ་གང་ཡང་མེད་ན་གཞན་ལ་དགག་བཞག་བྱེད་པ་ཐམས་ཅད་ཀྱང་གཡག་ཞར་གྱིས་རྩ་བཟའ་བའི་ངང་ཚུལ་ལས་མ་འདས། དེས་ན་ཆོས་ལུགས་ནང་ཕན་ཚུན་མཐུན་ལམ་དང་དམ་ཚིག་འོ་ཆུ་འདྲེས་པ་ཞེས་པ་དེ་ཡོང་འདོད་ན་རང་གཞན་གྱི་གྲུབ་མཐའ་ཀུན་ལ་གཟིགས་རྟོགས་གནང་གལ་ཆེ།
དེ་ཡང་ལུང་ལས།
དག་སྣང་ཕྱོགས་མེད་དུ་སྦྱོང།
ཉམས་ལེན་ཕྱོགས་གཅིག་ལོང།
ཞེས་གསུངས་པ་ལྟར་ཡོང་ཐུབ།
འོན་ཀྱང་གྲུབ་མཐའ་དང་ཆོས་ལུགས་ཐམས་ཅད་ཉ་ཉུང་མཉམ་བསྲེས་བྱེད་དགོས་ཞེས་ཞུས་མེད་དོ།
ལ་སྟོད་བུས་གསུངས་པ་དེར་རྒྱབ་སྐྱོར་དང་དེ་ག་རང་རེད་ཅེས་ཞུ་འདོད་བྱུང་། ཚད་མ་སྡེ་བདུན་འཛམ་གླིང་ན།།སངས་རྒྱས་བསྟན་པ་གསལ་བྱེད་པ།།ཞེས་གསུངས་ལྟར་གདན་ས་ཁག་གིས་གཙོ་བོར་ཚད་མ་སྡེ་བདུན་གྱི་རིགས་པའི་གཞུང་ལུགས་གཞིར་བཟུང་ནས་དེའི་དཔྱོད་ཐབས་ཀྱི་རིགས་ལམ་བེད་སྤྱོད་ཀྱིས་ཡིག་ཆའི་ཚིག་ཟིན་མཐུན་མིན་མཐུན་དང་དོན་གྱི་གནད་ལ་གཏུགས་པའི་རྩོད་གླེང་བྱེད་ཀྱི་ཡོད་པ་རེད། བོད་དུ་ཚད་མའི་གཞུང་ལ་སློབ་གཉེར་བྱེད་སྲོལ་འདི་ས་སྐྱ་པཎ་ཆེན་ཀུན་དགའ་རྒྱལ་མཚན་གྱིས་ཚད་མ་རིགས་གཏེར་བརྩམས་པ་ནས་འཕེལ་རྒྱས་ཕྱིན་པ་དང་ཚད་མའི་གཞུང་ལ་མཁས་པ་ཕྱ་བ་ཆོས་སེང་བརྒྱད་ཀྱི་སྐུའི་རིང་ལ་བསྡུས་གྲྭའི་རིགས་ལམ་སྲོལ་གཏོད་པ་ནས་ད་ལྟའི་བར་དུ་བོད་ཀྱི་ཆོས་རྒྱུད་ཕན་ཚུན་བར་ཚད་མའི་བགྲོ་གླེང་དང་དོགས་གཅོད་གནང་བའི་ཡིག་འཇོག་སོགས་དུ་མ་བྱུང་ཡོད་པ་རེད། གདན་ས་ཁག་གི་ལམ་དང་ལུགས་སྲོལ་གྱི་ཆུ་མགོ་གངས་ལ་ཐུག་པ་ནི་རྗེ་རིན་པོ་ཆེ་ཡིན་ལ། ཁོང་གིས། གྲུབ་དབང་ཀརྨ་རོལ་བའི་རྡོ་རྗེ་ལ་སོགས་པ་བཀའ་རྒྱུད་པའི་ཆོས་རྒྱུད་འཛིན་པ་དང་། བླ་མ་གྲུབ་ཆེན་ཁྱུང་པོ་ལྷ་ལ་སོགས་པ་རྙིང་མའི་ཆོས་རྒྱུད་འཛིན་པ་དང་རྗེ་བཙུན་རེད་མདའ་བ་སོགས་ས་སྐྱའི་ཆོས་རྒྱུད་འཛིན་པའི་བླ་མ་ལྔ་བཅུ་ལྷག་ལ་བརྟེན་ནས་བོད་ཀྱི་བཤད་སྲོལ་ཡོད་དོ་ཅོག་ལ་སྦྱངས་པ་མཛད། ཁྱད་པར་འཇམ་པའི་དབྱངས་ཀྱིས་རྗེས་སུ་བཟུང་ནས་འཛམ་གླིང་རྒྱན་དྲུག་མཆོག་གཉིས་ཀྱི་རྒྱ་གཞུང་དྲི་མ་མེད་པ་ལ་ཐོས་ལོ་དང་ཤེས་ལོ་ཙམ་མིན་པར་རིགས་པས་ཕུ་ཐག་ཆོད་པར་སྦྱངས་བར་མཛད་པ་དང་ཡང་སྒོས་མགོན་པོ་ཀླུ་སྒྲུབ་ཡབ་སྲས་ཀྱི་མདོ་སྔགས་ཀྱི་གཞུང་ལ་བརྟེན་ནས་ཟབ་མོའི་ལྟ་བ་བརྙེད་པའི་ཚུལ་སོགས་རྣམ་ཐར་ན་ཡོད་པ་དེ་དེ་བཞིན་རེད། དེ་བཞིན་དགེ་ལྡན་པའི་མཁས་པ་རེ་རེའི་གསུང་འབུམ་ཁྲོད་ན་ཆོས་རྒྱུད་གཞན་གྱི་ལྟ་གྲུབ་སྐོར་ལ་དོགས་དཔྱོད་གནང་བ་མང་པོ་ཡོད་པ་རེད། དེ་བཞིན་ཀརྨ་མི་བསྐྱོད་རྡོ་རྗེ་དང་འབྲུག་པ་པད་དཀར་དང་འཇུ་ཕམ་དང་རྡོ་སྤྲུལ་བསྟན་པའི་ཉི་མ་དང་རྫ་དཔལ་སྤྲུལ་རིན་པོ་ཆེ་ལ་སོགས་པ་མཁས་གྲུབ་མང་པོས་ཀྱང་རྗེ་རིན་པོ་ཆེའི་གཞུང་ལ་ངེས་པ་བརྙེད་དེ་བསྟོད་པ་མཛད་པ་ཡང་ཡོད་པ་ལྟར་རེད།
ཡིན་ན་ཡང་ཕྲག་དོག་གིས་སྨྱོས་བའི་མཁས་པ་ཤཱཀ་མཆོག་དང་གྲུབ་རྫུ་པདྨ་གླིང་བ་གཉིས་ཀྱིས་གཏེར་ཡིག་རྫུན་མ་བྲིས་ནས་ཡར་འབྲོག་མཚོ་འགྲམ་ལ་གཏེར་དུ་སྦས་ནས་དེ་ཉིད་པདྨ་གླིང་པས་གཏེར་ནས་བཏོན་ཚུལ་ནི་མཁས་གྲུབ་རིན་པོ་ཆེའི་གསུང་ལས། རྗེ་བཙུན་བླ་མའི་འཕྲིན་ལས་ཉིན་བྱེད་འོད།།ཕྲག་དོག་སྦྲང་བུའི་གཤོག་པས་སྒྲིབས་སྙམ་སྟེ།།ཞེས་སོགས་གསུངས་པ་ལྟར་མཁས་པ་དེ་ཚོས་ཆོས་ལུགས་ནང་ཁུལ་ལ་གཏོར་བརླག་བཏང་ཡོད་པ་རེད་ལ། དེ་ནས་བཟུང་གཏེར་ཡིག་ལ་ཡིད་ཆེས་བརླགས་པ་དང་བསྟན་པ་འཇིག་པའི་རྐྱེན་དུ་གྱུར་བ་སོགས་ཆག་སྒོ་རབ་དང་རིམ་པ་མང་པོ་ཞིག་བྱུང་ཡོད་པ་རེད། རྗེ་རིན་པོ་ཆེ་རང་གིས་རིགས་པ་དང་འགལ་བའི་གྲུབ་མཐའ་ཁས་བླངས་ན་སྨྲ་བ་པོ་ཚད་མའི་སྐྱེས་བུ་མི་རུང་ཞེས་པ་ལྟར་རིགས་པའི་རྗེས་སུ་འབྲངས་ཏེ་མཁས་པ་གཞན་གྱི་གསུང་ལ་དཔྱད་པ་མཛད་ཚེའང་རྩོམ་པ་པོའི་མིང་བཟུང་མི་མཛད་པ་སོགས་ཁོང་གི་ཞི་དུལ་གྱི་མཛད་སྤྱོད་བཟང་པོ་དང་བསྟན་པ་ལ་མཛད་རྗེས་ཆེ་བའི་བཀའ་དྲིན་ལས་ཁོང་གི་རྗེས་འཇུག་པ་མཁས་གྲུབ་ཟམ་མི་ཆད་པར་བྱོན་པ་དང་ད་ལྟའི་འཚོ་བཞུགས་པ་སྐྱབས་མགོན་རིན་པོ་ཆེའི་བར་དུ་བུ་སློབ་བགྲང་གིས་མི་ལང་བ་བྱུང་ཡོད་པ་རེད།
གདན་ས་མང་དུ་ཡོད་ཀྱང་གདན་ས་གསུམ་གཙོ་བོ་ཞེས་པ་འདི་ལ་རྒྱུ་མཚན་ངེས་ཅན་ཞིག་སྟོན་རྒྱུ་མེད་ན། ཆོས་ལུགས་གཞན་གྱི་ཡིད་ལ་ཆེར་མི་འབབ་པའི་ཚིག་ཅིག་ཡིན་པ་མཁྱེན་དགོས། དགེ་ལྡན་པའི་གདན་ས་ཁག་གི་ནང་ནས་གཙོ་བོ་གདན་ས་གསུམ་ཡིན་སྲིད་ཀྱང་། ཆོས་བརྒྱུད་གཞན་གྱིས་གདན་ས་གསུམ་གཙོ་བོ་རེད་ཅེས་ནམ་ཡང་ཁས་ལེན་བྱེད་སྲོལ་མེད།
དེ་བཞིན་དུ་གཏེར་སྟོན་པདྨ་གླིང་པ་དང་། མཁས་མཆོག་ཤཀྱཱ་མཆོག་ལྡན་གཉིས་ལ་བརྙས་དམོད་དང་བཅས་ཁ་གཏོང་བསྐྱངས་བྱས་ན་ཅུང་ཨེ་འགྲིག ཁོང་གཉིས་ཀྱི་གསུངས་ནོར་བ་ཡིན་ན་ནོར་ཚུལ་དང་རྒྱུ་མཚན་བཤད་ན་ལོས་འགྲིགས། རྗེ་རིན་པོ་ཆེར་ཁ་གཏོང་ན་ཁྱེད་རང་གི་ཐུགས་མི་སྐྱིད་པ་བཞིན། ཁོང་རྣམས་གཉིས་ལ་ཁ་གཏོང་ན་དེའི་རྗེས་འཇུག་པ་མང་པོ་ཞིག་ཐུགས་མི་བདེ་བར་འགྱུར་ཞིང་། དེ་ནས་ཕན་ཚུན་མཚངས་འབྲུ་སྣ་ཚོགས་བྱས་ནས་བསྟན་པའི་ཞབས་འདྲེན་ལས་ཞབས་འདེགས་སུ་ནམ་ཡང་འགྱུར་དཀའ། ཕན་ཚུན་སྐྱོན་མཚངས་འབྲུ་བར་བརྩོན་ན་ཆོས་བརྒྱུད་དང་གདན་ས་སུ་ལའང་སྐྱོན་ཡོད་པ་སྨོས་མེད་རེད། སྐྱོན་ཡོན་ཚད་ཁྱབ་བསྒྲགས་བཏང་ན་ཕན་ཐོགས་ཆེ་བར་མཐོང་ཚེ་ཚིག་ཤུགས་ཆེ་རུ་བཏང་ནས་ད་དུང་མང་དུ་བྲིས་དང་ཁྱེད་ཅག་ལ་ལན་ངེས་པར་དུ་ཡོང་ངེས་ཡིན།
མདོར་ན་སངས་མ་རྒྱས་བར་དུ་སུ་ལའང་སྐྱོན་ཡོད་པ་ཐུགས་ལ་ཉར་ནས། རང་ཉིད་དགའ་མོས་ཆེ་བའི་གདན་ས་དང་ཆོས་བརྒྱུད། གྲུབ་མཐའ་དང་གྲུབ་མཐའི་སྲོལ་འཛིན་སོགས་མཁས་པ་གཞན་གྱིས་སྐྱོན་བཏང་བ་ཙམ་གྱིས་མཐའ་གཅིག་ཏུ་མི་འགྲིགས་པ་སྙམས་པ་དེ་འདོར་དགོས་པ་རེད།
དཔེར་ན་རྗེ་ཙོང་ཁ་བའི་ལྟ་དགོངས་ལ་མཚོན་ན། ས་སྐྱ། བཀའ་བརྒྱུད། རྙིང་མ་གསུམ་ཀའི་ཁྲོད་ཀྱི་མཁས་གྲུབ་ཚད་ལྡན་མང་པོས་དགག་པའང་རྒྱབ་ཡོད་ལ། བསྟོད་བསྔགས་ཡང་གནང་ཡོད་པ་རེད། དེས་ན་བསྟོད་བསྔགས་གནང་བའི་ཕྱོགས་ནས་ཁོང་གི་ཡོན་ཏན་དང་བཀའ་དྲིན་རྗེས་སུ་དྲན་པར་བྱ་ཐུབ་ན་ཡག་པོ་རེད།
མིག་བརྒྱད་པ་ལགས་༼མཁས་པ་ཤཱཀ་མཆོག་དང་གྲུབ་རྫུ་པདྨ་གླིང་བ་གཉིས་ཀྱིས་གཏེར་ཡིག་རྫུན་མ༽་དཔེ་དེབ་དེ་གཉིས་ཀྱི་མཚན་བྱང་ག་འདྲ་ཡོད་མེད་དང་གང་དུ་ཡོད་མེད་ཅིག་གསུང་ཐུབ་པ་འདུག་གམ།་ལྟ་འདོད་ཆེ།
དབང་འདུས་ནས་ལགས།
དེ་དག་གི་ནང་ནས་རང་ཉིད་ལ་ཆ་རྒྱུས་དང་ཕྱོགས་གང་ཐད་ནས་ཐག་ཉེ་བའི་ཆ་ནས་སེར་འབྲས་དགེ་གསུམ་གྱི་ད་ལྟའི་གནས་བབ་དང་འབྱུང་འགྱུར་གྱི་ཁ་ཕྱོགས་ཙམ་ཞིག་བརྗོད་འདོད་སྤྲོ། ཅེས་བའི་ཚིག་འདི་ལ་གོ་ཞིག་ལེན་གྱི་ཡོད་དམ།
བདག་གིས་སྤྱིར་གདན་ས་མང་ཀྱང་རང་ཉིད་ལ་སྐབས་བབ་ཆ་རྒྱུས་ཡོད་སྟབས་གླེང་གིན་ཡོད།
ཐུགས་བསམ་རེ་བཞེས་དང་གནད་འགག་ཞིག་མ་རེད་སྙམ།
བསམ་ཚུལ་ཡོད་ན་གསུང་དང་དགའ་བསུ་ཞུ།
དྲ་གྲོགས་གཞན་དག་ཚོ་ཕེབས་པ་ལ་མགྲོན་བསུ་ཞུ་བཞིན་ཡོད།
ཇི་སྐད་དུ། ཡུལ་འཁོར་སྐྱོང་གིས་ཞུས་བའི་མདོ་ལས།། དགེ་སློང་དག་གམ་མཁས་རྣམས་ཀྱིས།།བསྲེགས་བཅད་བརྡར་བའི་གསེར་བཞིན་དུ།།ལེགས་པར་བརྟག་ལ་ང་ཡི་བཀའ།།བླང་བར་བྱ་ཡི་གུས་ཕྱིར་མིན།།ཞེས་སངས་རྒྱས་ཀྱི་བཀའ་ཡིན་རུང་ལེགས་པར་དཔྱད་དགོས་པར་གསུངས་ན་གཞན་ལ་ལྟ་ཅི་སྨོས། གུས་པ་རྒྱུ་མཚན་དུ་བྱས་ནས་དཔྱད་མི་ཆོག་ན་དེ་འདྲ་གསུངས་དགོས་དོན་ཅི་ཡོད། མཁས་གྲུབ་རིན་པོ་ཆེའི་གསུང་ཐོར་བུ་ལས། སྤྲུལ་བའི་སྐྱེས་མཆོག་པདྨ་འབྱུང་གནས་ཀྱིས།།ང་སྤྲུལ་ཡིན་ཞེས་གཏེར་མིན་གཏེར་འདྲ་འདོན།།དམ་ཉམས་གར་ཡང་མ་བྲིན་ཁྱུ་གཅིག་ཚོགས།།ཉ་མའི་མགོ་སྐོར་འབྲེལ་མེད་ཆོས་བཤད་བྱེད།།ལུང་བསྟན་འདི་ཡང་ད་ལྟའི་གཏེར་སྟོན་མཁན།།པད་གླིང་ཐོལ་ལ་བརྟེན་པའི་སྟེང་དུ་འབབ།།ཅེས་སློབ་དཔོན་བཀའ་དྲིན་ཅན་གྱིས་ལུང་བསྟན་པ་ལྟར་གཏེར་སྟོན་རྫུན་མ་འདོན་མཁན་དང་དམ་ཉམས་དང་་སློབ་མའི་ཚོགས་ལ་འབྲེལ་མེད་ཆོས་བཤད་བྱེད་མཁན། ་པདྨ་གླིང་པའི་མིང་ཁུར་ནས་ཆོས་ལུགས་ནང་ཁུལ་ལ་གཏོར་བརླག་མཁན་དེ་ཡིན་པ་ཤེས་དགོས། པདྨ་བཀའ་ཐང་ལས་གསུངས་པའི་གཏེར་སྟོན་དུ་ལུང་བསྟན་པའི་པདྨ་གླིང་པ་དེ་ནི་གྲུབ་ཐོབ་ཚད་ལྡན་ཞིག་ཡིན་པ་ཡོངས་གྲགས་རེད། འདི་གཉིས་ཀྱི་ཁྱད་པར་མ་ཤེས་བར་མགོ་བོ་འཐོམས་ཏེ་གཏེར་སྟོན་པདྨ་གླིང་བར་འཁྲུལ་མཁན་མང་པོ་ཡོད་ཚོད་འདུགརྗེ་རིན་པོ་ཆེའི་རྣམ་ཐར་རྒྱས་པ་སོགས་ནའང་ཡོད་པས་མཁས་གྲུབ་རིན་པོ་ཆེའི་གསུང་དེ་ལས་གསལ་བོ་བསྟན་འདུག་པ་འདི་ལྟར། དེ་ལ་བསམ་ནས་ཆེན་པོ་ཤཱཀ་མཆོག་དང་།།པདྨ་གླིང་པར་འཆོས་པའི་སྙིང་ཆེན་གཉིས།།རྗེ་བཙུན་བླ་མའི་འཕྲིན་ལས་ཉིན་བྱེད་འོད།།ཕྲག་དོག་སྦྲང་བུའི་གཤོག་པས་སྒྲིབས་སྙམ་དུ།།ཁོ་བོ་མཁས་པ་ཡིན་པས་འདི་བརྩམ་ཞིང་།།ཁྱོད་ནི་གྲུབ་ཐོབ་ཡིན་པས་འདོན་དགོས་ཞེས།།གྲོས་ངན་བཤམས་ཤིང་དགེ་སློང་བཞི་བཏང་སྟེ།།ཡར་འབྲོག་མཚོ་ཡི་འགྲམ་དུ་གཏེར་དུ་སྦས།།དེ་ཉིད་པད་གླིང་བརྫུས་མས་བཏོན་པས་ན།།ཞེས་སྙིང་ཆེན་ཞེས་པ་སྙིང་སྟོབས་སམ་བློ་ཁོག་ཆེན་པོ་ཡོད་པ་ལ་གོ རྗེ་རིན་པོ་ཆེའི་མཛད་པ་འཕྲིན་ལས་ལ་ཕྲག་དོག་གི་སྒྲིབ་པའི་མཁས་པ་ཤཱཀ་མཆོག་གིས་ལུང་རྫུན་བརྩམས་པ་དང་པདྨ་གླིང་བར་བཅོས་བའི་གྲུབ་བརྫུས་དེས་འདོན་དགོས་ཞེས་རྣམ་པ་གཉིས་ཀྱིས་གྲོས་ངན་བཤམས་ཏེ། དགེ་སློང་བཞི་བཏང་ནས་ཡར་འབྲོག་མཚོའི་འགྲམ་དུ་གཏེར་དུ་སྦས་བ་པད་གླིང་བརྫུས་མས་བཏོན་ཁུལ་བྱས་ཚུལ་གསལ་བོར་གསུངས་འདུག། རྗེ་རིན་པོ་ཆེ་རང་གིས་ཆོས་ལུགས་གཞན་ལ་དེ་འདྲར་མཛད་པ་ཕར་ཞོག་དང་མཁས་པ་གཞན་གྱི་གསུང་ལ་དཔྱད་པ་མཛད་ཚེའང་མིང་བཟུང་མི་མཛད་པར་ཕྱིས་ཀྱི་ཁ་ཅིག་དང་སྔོན་ཁ་ཅིག་ཞེས་ཁོང་གི་གསུང་རྩོམ་དག་ཀློག་ན་ཤེས་ཐུབ།
གདན་ས་ཁག་ནི་བསྟན་པ་སྤྱིའི་མིག་རེད། དེ་ལ་སྐྱོན་དུ་ལྟ་བ་མི་སྒེར་སྐྱོན་རེད། མི་རེ་ཟུང་གིས་མི་འགྲིག་པ་ཡོང་སྲིད་པ་རེད། དེས་བསྟན་པ་སྤྱི་ལ་སྦྱར་ན་གཏན་ནས་འགྲིག་པ་མ་རེད། སེར་འབྲས་དགའ་གསུམ་ལ་མཚོན་ན་ཡིད་སྨོན་དང་དགེ་ལུགས་བསྟན་པའི་འབྱུང་གནས་རེད། གྲྭ་ས་དང་བཤད་སྒྲུབ་ལ་སྐྱོན་བརྗོད་ན་རང་སྐྱོིན་། དེ་མིན་སློབ་སྦྱོང་མི་དགོས་པར་སྤྲུལ་རྩོད་དང་ཁྲི་རྩོད་དང་འཇིག་རྟེན་མི་ནག་ལས་ཐུ་བའི་རྐུ་རྫུན་གཡོ་སྒྱུ་མཁན་ཚོ་ལ་སྐྱོན་འདོད་བྱས་ན་མི་སྐྱོན་པ་རེད།
སྤྱིར་བཏང་ཡིག་ཚད་གཏོང་བའི་ལམ་སྲོལ་འདི་ལེགས་པ་ཞིག་ཏུ་སྣང་མོད། ཡིག་ཚད་གཏོང་སྟངས་ཀྱི་ལག་ལེན་ཁྲོད་ནས་ཕྱོགས་ཞེན་དང་གཡོ་སྒྱུའི་དབང་དུ་ཤོར་འགྲོ་བའང་མང་པོ་ཞིག་འདུག ཡིག་ཚད་བཟོ་མཁན་དང་གཏོང་མཁན་ཞིབ་འཇུག་བྱེད་མཁན་རྣམས་ལོག་གར་དགོས་པ་གནད་ཆེན་པོ་ཞིག་རེད། དེ་མེད་ན་ཡིག་ཚད་ཀྱི་ཚད་གཞི་མ་ཚང་བ་དང་ཡིད་རྟོན་བྱེད་མི་ཐུབ། མཚན་ཉིད་ཀྱི་ཡིག་ཚད་འདི་འབྲི་རྒྱུགས་གཙོ་བོ་བྱེད་རྒྱུ་མ་ཡིན་པར་རྩོད་རྒྱུགས་གཙོ་བོ་བྱེད་དགོས་པ་རེད། དེ་མིན་གདན་ས་འགའ་རེར་མཚན་ཉིད་ཀྱི་ཡིག་རྒྱུགས་གཏོང་སྐབས་མཚན་ཉིད་དེ་ཙམ་མི་ཤེས་ཤིང་དག་ཡིག་ལེགས་ཙམ་ཡོད་པ་ཚོར་ཨང་ཀི་མང་པོ་ཐོབ་པ་མཐོང་ཆོས་རེད། དོན་དུ་འདི་མཚན་ཉིད་ཀྱི་ཡིག་རྒྱུགས་མ་ཡིན་པར་དག་ཡིག་གི་ཡིག་རྒྱུགས་རེད་ཟེར་ན་འགྲིག་འདུག ད་དུང་། ཡིག་ཚད་ཀྱི་ཨང་ཀི་སྤྲོད་ཕྱོགས་ལ་གཡོ་སྒྱུ་བྱས་པ། རང་གི་དགའ་ཉེ་འགའ་རེར་ཡིག་ཚད་ཀྱི་དྲི་གཞི་སྔོན་བསྒྲགས་བྱས་པ། དེ་ལྟ་བུའི་སྣང་ཚུལ་མང་པོ་ཞིག་ཡོང་བཞིན་ཡོད། དེ་ལྟར་བྱས་ན་ཡིག་ཚད་གཏོང་བ་ལས་མ་བཏང་ན་ལེགས།
དེ་རིང་ཡང་ལྷོ་ཕྱོགས་ཉི་ཟླ་ལགས་ཀྱིས་རྩོམ་ཡིག་དོན་སྙིང་ཅན་ཞིག་སྤེལ་འདུག དགའ་བསུ་ཞུ་རྒྱུ་ཡིན། རྒྱུ་མཚན་འདུག དངོས་གནས་རྒྱུགས་སྤྲོད་སྐབས་ཀྱི་ལམ་ལུགས་དེ་བསྒྱུར་བཅོས་བྱེད་ཐུབ་ན། མ་འོངས་པར་རང་རེའི་སྐྱབས་དང་མགོན་ཉིད་དུ་གྱུར་པའི་གྲྭ་སའི་དགེ་འདུན་པ་རྣམས་སྔར་གྱི་པཎ་ཊི་ད་དང་ལོ་ཙཱ་པ་གནམ་གྱིས་ས་བཀབ་པ་ལྟ་བུ་བྱུང་བ་ལྟར་མང་དུ་འབྱུང་བར་ཐེ་ཚོམ་མི་དགོས་སྙམ་ཞིང༌། གྲྭ་སའི་དགེ་འདུན་པ་དང་གྲྭ་ལོག་ཟུར་པ་ལྷན་རྒྱས་སུ་ཡིན་ཡང༌། གྲྭ་སར་རྒྱུས་མངའ་ཟབ་པས་དགེ་འདོན་སྐྱོན་སེལ་གྱི་བསམ་ཚུལ་འདི་ལྟ་བུ་སྤེལ་ཐུབ་ན་དགེ་མཚན་ཆེ་ལ། སྐྱ་བོ་དག་ལ་མཚོན་ནའང་རྒྱབ་སྐྱོར་དང་རྗེས་སུ་ཡི་རང་བྱ་ངེས། དེ་མིན་གྲྭ་སའི་དགེ་བསྐོས་བཙན་ལུགས་དང་མཁན་པོའི་དབང་ཆ་ཆེ་ལུགས་སོགས་བརྗོད་པ་ནི་ཆེས་རྣར་མི་སྙན་པའི་གཏམ་དུ་མཐོང༌།
དྲ་གྲོགསdawaལགས་ཕེབས་པ་ཙམ་མ་ཟད་དཔྱད་རྩོམ་འདི་ལ་མཐོང་ཆེན་དང་རྒྱབ་སྐྱོར་བྱས་བ་དགའ་ནས་ཡོད།
རང་ཉིད་ཀྱི་བསམ་བློ་འཆར་ཕྱོགས་དང་ཕྱེ་སྒོ་དེ་དག་ལ་བལྟས་ན་དགའ་འོས་བ་ཞིག་ཡིན་པ་མ་ཟད་རྗེས་སུ་ཡི་རེང་བྱེད་བཞིན་ཡོད།
རྟག་པར་དྲ་ཐོག་ཏུ་ཕེབས་ནས་ཀུ་ཡང་གི་བསམ་ཚུལ་གསུངས་བ་ངོ་མ་བཟང་གི
དབང་འདུས་ལགས། ༼ རྗེ་ཙོང་ཁ་བའི་ལྟ་དགོངས་ལ་མཚོན་ན། ས་སྐྱ། བཀའ་བརྒྱུད། རྙིང་མ་གསུམ་ཀའི་ཁྲོད་ཀྱི་མཁས་གྲུབ་ཚད་ལྡན་མང་པོས་དགག་པའང་རྒྱབ་ཡོད་ལ། ༽ སྐུ་ཉིད་ཀྱིས་དགག་པ་བརྒྱབ་ཡོད་ཅེས་བཤད་འདུག་པར་བལྟས་ན་དགག་པ་བརྒྱབ་པ་མ་རེད། དོགས་པ་བསླངས་བ་རེད། གནས་ལུགས་དང་མི་མཐུན་པར་སྨྲ་ན་དེ་ལ་དགག་པ་བརྒྱབ་ཟེར་ན་ཆོག་གི་རེད། དེ་འདྲ་མ་རེད། རྗེ་རིན་པོ་ཆེའི་ལྟ་དགོངས་ནི་ཟབ་ཅིང་རླིངས་པ་ཡིན་སྟབས། འབྲུག་པ་པད་དཀར་གྱིས། སྟོང་ཉིད་སྨྲ་བའི་ཁྱུ་མཆོག་ཙོང་ཁ་བ།།ཞེས་པ་སོགས་རྒྱུ་མཚན་མཐོང་བའི་བསྟོད་བསྔགས་རེད། རྗེ་རིན་པོ་ཆེས་གཙོ་བོར་རྒྱ་གར་ནཱ་ལན་ཊའི་མཁས་གྲུབ་དག་ལ་ཁུངས་གཏུགས་ནས་གསུངས་པ་ཡིན་སྟབས་བོད་ཀྱིས་བཤད་པ་དང་མི་མཐུན་པ་ཅུང་ཟད་རེ་ལོས་ཡོད། ཚིག་ལ་མི་རྟོན་དོན་ལ་རྟོན་པ་གཙོ་བོར་མཛད་པས་རེད། དེས་ན་དཔྱད་པ་དང་དགག་པ་གཉིས་ལ་ཁྱད་ཆེན་པོ་ཡོད་པ་ཤེས་དགོས།