སེར་ཤུལ་རིན་ཆེན་དོན་གྲུབ།
གྲྭ་བ་ཚོས་དེང་རབས་ཀྱི་སློབ་སྦྱོང་ངེས་པར་དུ་བྱེད་དགོས། དེ་ལྟར་མ་བྱས་པར་ནང་ཆོས་ཁོ་ན་སྦྱངས་ཏེ་གྲྭ་བ་མཐར་ཕྱིན་ན་ཡག་པོ་རེད་དེ། གྲྭ་བ་ལོག་ཚེ་གང་ཡང་བལྟ་ས་མེད་པ་དེ་འདྲ་ཆགས་ན་གྲྭ་བ་བྱེད་མཁན་ཉུང་དུ་འགྲོ་གི་རེད། ༸གོང་ས་མཆོག་གིས།
ང་ཚོར་དགོས་པ་གང་མང་མང་ཞིག་ཡོད་མོད་འོན་ཀྱང་ང་ཚོས་བསྒྲུབས་པ་གང་ཉུང་ཉུང་ཞིག་ལས་མེད། དེ་ནི་འགྲོ་བ་མིའི་དགོས་པ་དང་བསྒྲུབས་པའི་བར་གྱི་སྟོང་ཆ་རེད། ང་ཚོས་དགོས་པའི་དམིགས་ཡུལ་ཞིག་གི་ཆེད་དུ་འབད་བཞིན་ཡོད་མོད་དམིགས་ཡུལ་དེ་འགྲུབ་དང་མ་འགྲུབ་ཀྱི་ས་མཚམས་ནི་ཁོར་ཡུག་དང་རང་གི་འཇོན་ནུས་གཉིས་ཀ་ལ་བལྟོས་ནས་གྲུབ་པ་ཞིག་ལས་ཁེར་རྐྱང་རང་ཚུགས་ཀྱིས་ཡོང་ཐབས་མེད་པ་ཞིག་རེད། རྒྱུ་མཚན་དེའི་དབང་གིས་བྱ་བ་གང་ཞིག་ཡིན་ཡང་ཁོར་ཡུག་དང་སྤྱི་ཚོགས་ཀྱི་གནས་བབ་ཀྱི་མཐུན་སྦྱོར་འོག་གྲུབ་དགོས་པའི་གནས་ལུགས་འདིས་ཡོད་ཚད་སྤྱི་ཚོགས་ཀྱི་ཕྱི་རོལ་ཏུ་བཀྱེད་དེ་སྒྲུབ་ཐབས་མེད་པའི་རྒྱུ་མཚན་བགྲང་བཞིན་ཡོད། ད་ལྟའི་བོད་ཀྱི་གྲྭ་བ་ཞིག་ལ་མཚོན་ན་ཚེ་འདི་ལས་ཕྱི་མ་དང་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་པའི་ཆེད་དུ་རབ་ཏུ་བྱུང་ཡོད་པའི་ངེས་པ་གཏན་ནས་མེད་ལ་གལ་སྲིད་དེ་ལྟར་ཡོད་པའི་དབང་དུ་བཏང་ཡང་དམིགས་ཡུལ་དེའི་ཆེད་དུ་ལག་ལེན་ལ་གཞོལ་མཁན་ནི་ཧ་ཅང་ཉུང་། གལ་སྲིད་དམིགས་ཡུལ་ལྟར་གྱི་ལག་ལེན་ཅུང་ཙམ་ཡོད་མཁན་ཞིག་ཡིན་ནའང་སྤྱི་ཚོགས་ཁྲོད་དུ་ཁོང་གི་རིན་ཐང་མངོན་པ་དཀའ་བ་མ་ཟད་རང་ཉིད་གཅིག་པུས་ས་སྟོང་བྲག་ཁུག་ཅིག་ཏུ་སྒོམ་སྒྲུབ་ཉམས་ལེན་བྱས་པ་དེས་རང་ཉིད་ལ་ཕན་དགེ་ངེས་ཅན་ཞིག་ཡོད་ངེས་མོད་ཀྱི་རང་ལས་གཞན་པའི་སེམས་ཅན་ཐམས་ཅད་ཀྱི་ཆེད་དུ་བསམ་པ་དང་སྒོམ་པ་བཞིན་ལག་ལེན་གྱི་ཐོག་ནས་སེམས་ཅན་ཐམས་ཅད་ལ་ཕན་ཐོགས་གང་འདྲ་ཞིག་ཡོད་མེད་ཀྱང་བསམ་དགོས་པ་ཞིག་ཡིན། སྤྱིར་བཏང་བསྒྲུབ་དཀའ་བ་དང་སྒྲུབ་མཁན་ཉུང་བའི་རྒྱུ་མཚན་གྱིས་དེའི་ཕྱོགས་ལ་འབད་བརྩོན་ལྷོད་དུ་གཏོང་བ་དང་དེ་ལས་ཕྱིར་བཀྱེད་བྱེད་དགོས་པའི་རྒྱུ་མཚན་བཤད་པ་ནི་ཡང་དག་པ་ཞིག་མིན་ལ་དེ་ལྟར་བྱ་དགོས་པར་ཟུར་ཙམ་ཡང་བཤད་མེད། རེད་དེ་དགོན་པ་གྲྭ་ཚང་ཁག་རང་ཉིད་ཀྱི་རྒྱུད་ལ་ཉོན་མོངས་སྤངས་པའི་ཐར་བའི་གོ་འཕང་ཁོ་ན་སྒྲུབ་མཁན་གྱི་གྲྭ་བ་ཡང་མ་ཡིན། དེང་རབས་ཀྱི་སློབ་སྦྱོང་དང་བྱ་སྤྱོད་ཀྱི་ཕྱོགས་ནས་མིའི་སྤྱི་ཚོགས་ཀྱི་རྗེས་སུ་ལུས་པའི་ཕོ་ཧྲེང་གི་བསྟི་གནས་ཤིག་ཆགས་ན་སངས་ཀྱི་བསྟན་པ་དང་། ད་ལྟའི་སྤྱི་ཚོགས། སོ་སོ་རང་ཉིད་གང་ལ་ཡང་ཕན་ཐོགས་དཀའ་བའི་དངོས་ཡོད་ཀྱི་གནས་ལུགས་གསོན་པོ་འདིས་ང་ལ་གྲྭ་བར་དེང་དུས་ཀྱི་སློབ་སྦྱོང་དགོས་པའི་སྐུལ་དེད་བྱེད་དུ་བཅུག་པ་རེད། བྱ་བ་གང་ཞིག་ཡིན་ཡང་སྐབས་དེའི་དོན་དངོས་ལ་བལྟས་ནས་མདུན་སྐྱོད་བྱེད་དགོས་པ་ལས་དམིགས་ཡུལ་དང་སེམས་ཅན་སོགས་སྦོབ་པོ་རྐྱང་རྐྱང་བཤད་བཞིན་དེའི་ལྡོག་ཕྱོགས་ཀྱི་ལག་ལེན་ལ་གཞོལ་བ་འདིས་ང་ཚོར་ཅི་ཞིག་ཕན་གྱི་ཡོད་ངེས་པར་དུ་བསམ་དགོས། དེ་ལས་རང་གིས་གང་ཤེས་པ་དང་གང་ལ་ཉམས་ལེན་དུ་གཞོལ་བའི་གྲུབ་དོན་དེ་དེང་རབས་ཀྱི་སློབ་སྦྱོང་དང་། ཀུན་སྤྱོད་ཀྱིས་དེང་རབས་ཀྱི་སྤྱི་ཚོགས་སུ་འགྲེལ་སྤེལ་བྱས་ན་བསྟན་པ་སྤྱི་དང་ད་ལྟའི་བོད་ཀྱི་རྩ་དོན་གང་ལའང་ཕན་ཐོགས་ཆེ་བར་མཐོང་། རྒྱུ་མཚན་འདི་དག་ནི་ངས་གྲྭ་བར་དེང་དུས་ཀྱི་སློབ་སྦྱོང་ཡོད་དགོས་པར་བཤད་པའི་རྒྱུ་མཚན་གཙོ་བོ་ཞིག་ཡིན། དེང་དུས་ཀྱི་བསམ་བློ་དང་ཀུན་སྤྱོད་ནི་གཙོ་ཆེ་བ་ཕྱིའི་དངོས་པོ་ཡར་རྒྱས་དང་། ནང་པའི་ཆོས་ཀྱི་གཞུང་ལུགས་ནས་ཆེས་སྡུག་ཤོས་སུ་བསྟན་པའི་འདོད་ཆགས་ཞེ་སྡང་གཏི་མུག་གཙོ་བོར་གྱུར་པའི་ཉོན་མོངས་པའི་གཞན་དབང་དུ་གཏོང་གང་ཐུབ་བྱ་རྒྱུ་དེ་ཡིན་པ་ངས་ངོས་འཛིན་བྱེད་ཀྱི་མེད། དེ་ནི་དེང་དུས་ཀྱི་མིའི་བསམ་ སྤྱོད་ཀྱི་ཕྱོགས་གཅིག་ཡིན་སྲིད་མོད་དེང་དུས་ཀྱི་བསམ་སྤྱོད་ལག་ལེན་དུ་བསྟར་བ་ལ་ངེས་པར་དུ་དགོས་པའི་བསམ་སྤྱོད་དེ་གཏན་ནས་མ་རེད། དེང་གི་བོད་པ་བཙན་བྱོལ་བའི་སྤྱི་ཚོགས་སུ་གྲྭ་བར་རིན་ཐང་དང་ཆེ་མཐོང་མེད་པར་ཁྱེད་ཅག་གིས་མ་མཐོང་བ་དེ་མ་མཐོང་བ་རང་ཡིན་པ་ལས་དེ་འདྲའི་གནས་ཚུལ་མེད་པའི་སྒྲུབ་བྱེད་མ་རེད། མ་མཐོང་བ་དང་མེད་པར་མཐོང་བ་གཉིས་རྦད་དེ་ཁ་ཁ་རེད། འདི་ཁྱེད་ཅག་གིས་ཤེས་དགོས་ཚོད་ཡིན། ངས་དེ་སྔོན་སྤེལ་བའི་(དེང་གི་སྤྱི་ཚོགས་སུ་གྲྭ་དགོས་མཁོ་ཡོད་དམ་)ཞེས་པའི་རྩོམ་ཡིག་དེ་དང་འདི་གཉིས་ཀྱི་དགག་ཕྱོགས་ནས་ལངས་མཁན་དག་གིས་ངེས་པར་དུ་ཤེས་དགོས་པ་ཞིག་ལ། དགོས་པ་དང་ཐུབ་པ་གཉིས་ནོར་མི་རུང་། དམིགས་ཡུལ་དང་ལག་ལེན་གཉིས་བཤིབ་བསྡུར་བྱ་དགོས། རྒྱུན་སྲོལ་དང་དོན་དངོས་གཉིས་ཞིབ་མོར་འབྱེད་དགོས། ངས་ད་བར་དུ་གང་གླེང་བ་ནི་ད་ལྟའི་སྤྱི་ཚོགས་ཀྱི་དོན་དངོས་ལ་ཁ་ཕྱོགས་པ་རྐྱང་རྐྱང་ཡིན་ལ་ཁྱེད་ཅག་གི་བསམ་ཚུལ་དག་ནི་སྲོལ་རྒྱུན་དང་དམིགས་ཡུལ་ལ་བསྙད་པའི་ལྐོག་གྱུར་དང་ཐོབ་པར་དཀའ་བའི་རྒྱང་རིང་གི་མཛེས་པའི་ཞིང་ཁམས་རྐྱང་རྐྱང་རེད། རྒྱུ་མཚན་དེའི་དབང་གིས་བསམ་ཚུལ་འདི་གཉིས་མཐུན་ཐབས་མེད་པའི་རྣོ་ངར་ཅན་གྱི་ལྟ་ཚུལ་གཉིས་ཆགས་པ་རེད། ཁྱེད་ཅག་གིས་གང་གསུང་བ་དེར་རྒྱུ་མཚན་རྩ་ནས་མེད་པའི་བདེན་དཔང་བྱེད་མི་ཐུབ་མོད་རང་གིས་བཤད་པའི་དོན་དངོས་དེ་ཚོར་རྒྱུ་མཚན་དང་། རྒྱབ་ལྗོངས། གནས་ལུགས་བཅས་སྲ་ཞིང་ལྗིད་པ་ཞིག་ཡོད་པར་སྤོབས་པ་ཆེན་པོས་འགྲེལ་བཤད་རྒྱག་ཐུབ་པའི་གདེང་ཚོད་ཡོད་དོ།།
༢༠༡༡/༨/༥
གྲ་བའི་དགོས་དོན་ཐར་པ་སྒྲུབ་རྒྱུ་དང་།། དེ་ཡི་ཐབས་སུ་ནང་ཆོས་ཉམས་ལེན་དགོས།།
དེང་རབས་མི་རབས་སོགས་ཀྱང་དགོས་ལེ་མིན།། གྲ་བ་གྲ་བའི་ས་ནས་བསྡད་ན་མཛེས།།
སེར་ཤུལ་རིན་དོན་གྲུབ་ལགས།
ངས་མང་པོ་མི་བཤད་པར་དོན་ཚན་གཉིས་ཞུ་འདོད་བྱུང།
དང་པོ། ས་སྟོང་བྲག་ཕུག་ནང་ལ་སྒོམ་ལ་བརྩོན་པ་དེས་རང་ཉིད་ལ་ཕན་པ་ལས་ལག་ལེན་དངོས་ཀྱི་ཐོག་ནས་གཞན་ལ་མི་ཕན་ཚུལ་བཤད་འདུག ངས་དེ་ལ་ཁས་ལེན་བྱེད་ཐུབ་པ་མི་འདུག དེ་ཡང་ཁྱེད་ཀྱིས་གསུངས་པ་ལྟར་ན། རྗེ་བཙུན་མི་ལ་རས་པས་ལག་ལེན་དངོས་ཀྱི་ཐོག་ནས་གཞན་ལ་ཕན་པ་སྒྲུབ་མེད་པ་རེད་དམ། དེ་བཞིན་དེང་སྐབས་ཀྱང་བྱ་བྲལ་བ་མི་ཉུང་བ་ཞིག་ཡོད་པ་དེ་དག་གིས་སྤྱི་ཚོགས་ལ་ཕན་པ་སྒྲུབ་ཀྱི་མེད་དམ། འོ་ན་དྷ་སའི་ཁྲོམ་ལམ་དུ་ཁྱི་སྨྱོན་ལྟར་རྒྱུགས་བཞིན་པའི་སྐྱ་མིན་སེར་མིན་མགོ་རིལ་དབྱིན་ཇིའི་རྗེས་ལ་རྒྱུགས་མཁན་དེ་དག་གིས་ལག་ལེན་དངོས་ཀྱི་ཐོག་ནས་གཞན་ལ་ཕན་བདེ་བསྒྲུབ་བཞིན་ཡོད་དམ།
གཉིས་པ། ཉིད་ཀྱི་དགོངས་ཚུལ་ལྟར་ན། གྲྭ་པས་དེང་དུས་སློབ་སྦྱོང་བྱེད་དགོས་པའི་རྒྱུ་མཚན་ནི་ཕྱིས་འབྱུང་གྲྭ་པ་ལོག་སྐབས་ཕ་རེངས་ཁྱུ་གཅིག་མི་ཡོང་པའི་ཆེད་ཡིན་པ་རེད། འོ་ན་གྲྭ་པ་བྱེད་པ་དེ་ཡང་གནས་སྐབས་ཙམ་ལས་མི་ཚེ་མཐའ་འཁྱོལ་ཐོག་ནས་ཚེ་གཅིག་སོ་ཐར་གྱི་སྡོམ་པ་ཚུལ་བཞིན་དུ་སྲུང་རྒྱུའི་འཆར་གཞི་མེད་མཁན་ཚོས་དང་ཐོག་ནས་གྲྭ་པ་མ་བྱས་ན་མི་དགའ་འམ། གྲྭ་པ་བྱེད་དང་མི་བྱེད་སོ་སོའི་རང་དབང་ཡིན་པ་ལས་སུ་གཅིག་གིས་ཀྱང་བཙན་བཀའ་གཏོང་མཁན་ཨེ་ཡོད་ན། གལ་སྲིད་ཉིད་རང་དགེ་འདུན་པ་ཞིག་ཡིན་ཚེ། གྲྭ་པ་ལོག་རྒྱུ་ཡིན་པ་གདོན་མི་ཟའོོོ།།།།
རིན་ཆེན་དོན་གྲུབ་ལགས། དང་པོ་རང་གིས་དག་ཡིག་ཡག་པོ་སྦྱོངས་དེ་ནས་གཞན་གྱི་རྩོམ་ལ་མཆན་ཁོད་དང་ཤིན་ཏུ་མཛེས།
དྲ་གྲོགས་བཀྲ་ཤིས་ལགས། གྲྭ་བར་དེང་དུས་ཀྱི་སློབ་སྦྱོང་དགོས་པའི་རྒྱུ་མཚན་ཕྱིས་འབྱུང་གྲྭ་བ་ལོག་དུས་ཕན་ཐོགས་པའི་ཆེད་དུ་ཡིན་པ་གང་དུ་ཡང་བཤད་མེད། ང་གྲྭ་བ་ཡིན་པ་མ་ཟད་མི་ཚེ་གཅིག་གྲྭ་བ་བྱས་ནས་སྡོད་པའི་དམ་བཅའ་ཡོད་མཁན་ཞིག་ཡིན། ཁྱེད་ཀྱི་ལུང་བསྟན་དེ་ཕྱིན་ཅི་ལོག་ཏུ་ཕྱིན་སོང་།
དེང་རབས་ཚན་རིག་འཕྲུལ་གྱི་ཕོ་ཉ་ལས། །གླིང་བདུན་འཛིན་མའི་དངོས་པོ་མཐའ་དག་ཀུན། །
ཉིན་བཞིན་མཐོང་བ་སྙོན་འདིང་མི་རིགས་པའི། །ཤེས་རབ་སྣ་རེ་བསྐྲུན་པའང་ཁྱེད་ཀྱི་དྲིན། །
མུན་ནག་དུས་ཀྱིས་ཟོས་བའི་གངས་ལྗོངས་སུ། །ཆོས་ཚན་ཟུང་གི་སྒྲོན་མེ་དགུང་དུ་བཏེགས། །
ཁྱེད་ཀྱི་ལྷག་བསམ་དཀར་པའི་མཛད་འཕྲིན་འོད། །ནམ་ཡང་གོ་ལ་ཟླུམ་པོའི་ཏོག་ན་འཚེར། །
དགེ་འདུན་པ་རྣམས་ལ་དེང་རབས་ཀྱི་སློབ་སྦྱོང་དགོས་པའི་བསམ་ཚུལ་དེ་ང་ལ་དེ་སྔོན་ནས་ཡོད། གཅིག་བྱས་ན་ངའི་མིག་འགྱངས་ཐུང་དྲག་པས་ལན་པ་ཡིན་སྲིད། ངས་བསམ་ན་ལོ་ཆུང་མང་པོ་ཞིག་དགོན་པར་ཕེབས་ནས་གྲྭ་སར་བཞུགས་ཀྱི་ཡོད་མང་་ཆེ་བ་ནི་འཁོར་བའི་སྡུག་མངལ་ལས་ཐར་ཐབས་ཀྱི་་ངེས་འབྱུང་རྣལ་མ་ཞིག་སྐྱེས་ནས་གྲྭ་སར་བཞུགས་ཀྱི་ཡོད་ཀྱང་། ཕྱིས་སུ་རྐྱེན་ངན་མང་པོ་ཞིག་ལ་བརྟེན་ནས་དགོན་པར་བཞུགས་མ་ཐུབ་པར་འཇིག་རྟེན་པའི་གྲལ་དུ་ཕེབས་པ་ཡང་མང་པོ་ཞིག་ཡོད་པ་ནི་མིག་མཐོང་ལག་ཟིན་ཡིན་ཞིང་། ཁོང་ཚོར་དེང་རབས་ཀྱི་སློབ་སྦྱོང་གིས་ཕོངས་ནས་མི་ཚེའི་མདུན་ལམ་ཐོག་དཀའ་ངལ་སྣེ་མང་ཞིག་ཕྲད་བཞིན་པ་དགོན་པའི་ཆོས་མེད་ཞོལ་གྱི་ཐུག་པ་མེད་ཅེས་པའི་དཔེ་ལྟར་རེད། དེ་ན་དེངས་རབས་ཀྱི་སློབ་སྦྱོང་ཡོད་ན་མདོ་སྔགས་རིག་གནས་ཀུན་ལ་མཁས་པའི་དབང་པོ་གྱུར་པ་རྣམས་ལ་ཚན་རིག་གིས་མཚོན་པའི་ཤེས་བྱའི་གནས་གསར་པ་སྦྱང་རྒྱུའི་རྒྱན་ཏུ་གྱུར་པ་དང་། ཆོས་མགོ་མ་ཐོན་པ་རྣམས་ལ་དགོན་པའི་ཆོས་དང་། ཞོལ་གྱི་ཐུག་པ་མེད་པའི་དཔེ་ལྟར་མིན་པར་མ་འོངས་པའི་མི་ཚེ་ཤེས་ཡོན་ལ་བརྟེན་ནས་ལས་རིགས་ལེགས་པ་རག་པའི་ཕན་ཐོགས་པ་བཅས་ཡོང་ངེས་ཀྱང་། ཁ་ཤས་ཀྱི་བསམ་ཚུལ་ལ་དགོན་པར་དེང་རབས་ཀྱི་སློབ་སྦྱོང་བསླབས་ན་འཇིག་རྟེན་གྱི་གནས་ཚུལ་ཚང་མ་ཤེས་ནས་བྱ་ཕུར་པ་ལྟར་དགོན་པ་སྐྱུར་ནས་འགྲོ་ཡི་ཡོད་པའི་འཆར་སྣང་དེས་དགོན་པ་ཁག་གི་ནང་དབང་ཆ་སྒང་ཆེ་ཟིན་ཡོད་པ་ནི་གུས་ཀྱི་ཉམས་མྱོང་ཡོད།
མདོ་ན་ངས་གདན་ས་ཁག་ལ་དེང་རབས་ཀྱི་སློང་སྦྱོང་དགོས་པའི་རྒྱུ་མཚན་གཉིས་ཀྱི་ཐོག་ནས་དགེ་མཚན་མཐོང་གི་ཡོད། ༡་གཡང་རྩེའི་སྒང་ཡལ་སྒྲོན། མདོ་སྔགས་རིགས་པ་སྨྲ་བའི་ཕྱུ་མཆོག་རྣམས་ལ་དེང་རབས་ཀྱི་མཚན་རྩལ་གྱིས་མཚོན་ཤེས་བྱ་གསར་པ་མང་པོར་བློ་མིག་འབྱེད་པའི་སྒོ་མོ་ཕྱེ་བ་དང་།
༢)་ཆོས་མགོ་མ་ཐོན་པ་རྣམས་ལ་རང་གི་རྣམ་དཔྱོད་ལ་བརྟེན་ནས་དེང་རབས་ཀྱི་ལས་གནས་གལ་ཆེར་ཁག་ལ་ལག་པ་འཆང་རྒྱུའི་གོ་སྐབས་ཐོབ་པ་ཡིན།
ང་ཚོའི་དཔེ་ཆའི་གཞུང་ན་ཤིང་སྡོང་ཞེས་པ་ཅི་ཞིག་ལ་བརྟེན་ནས་གྲུབ་པ་ཡིན་མིན་ཐད་འགྲེལ་བཤད་མེད་ཀྱང་། དེའི་སྟེང་གི་གནས་ལུགས་མང་པོ་ཞིག་གཏན་ལ་འབེབས་ཀྱིན་ཡོད། ཤིང་སྡོང་སྐད་ཅིག་སྐད་ཅིག་གིས་འཇིག་པ། བདག་མེད་པ། ལྟོས་ནས་གྲུབ་པ། དེའི་སྟོང་བ་ཉིད་སོགས་ཁྱད་གཞི་ཤིང་སྡོང་ལ་བརྟེན་ནས་འཇོག་གི་ཡོད། སྐྱེས་དངོས་རིག་པ་ཚོས། རྩི་ཤིང་དང་སེམས་ཅན་གང་འདྲ་ཡིན་རུང་cell་ཞེས་པའི་སྐྱེས་ལྡན་ཕྲ་གཟུགས་ཤིག་ལ་བརྟེན་ནས་གྲུབ་སྟངས་ཤོད་ཀྱིན་ཡོད། སེམས་ཅན་དང་རྩི་ཤིང་གཉིས་ཀྱི་བར་འབྲལ་དུ་མི་རུང་བའི་འཚོ་གནས་ཀྱི་གྲུབ་ཆ་དཔེར་ན་oxygen ་དང་ carbon dioxide ་སོགས་འཚོ་རླུང་གི་ཕན་ནུས་དེ་དག་གོང་ནས་བཤད་པ་ལྟར་སྟོང་བ་དང་བདག་མེད་པ་སོགས་དང་འབྲེལ་ནས་ཡོད་པ་ཡང་ཏག་ཏག་ངོ་འཕྲོད་པ་ཞིག་ཡོང་ངེས་རེད།