གཡུ་དྲུག་དཀར། རྡ་ས།
ཉི་མ་ཉིན་གང་བོར་མཚམས་རེར་ཐོག་ཁ་ཞིག་ནས་རྐང་པ་ས་ལའང་མ་ཐུག་པར་ཇ་རེ་འཐུང་ཞོར། ཡར་ལྟ་མར་ལྟ་བྱས། སྐབས་རེར་དོར་མ་སྲང་ནས་ཡར་འཁྱམ་མར་འཁྱམ་བྱེད་ཞོར་ཕར་ལྟ་ཚུར་ལྟ་བྱས། མདོར་ན་ཉི་མ་ཉིན་གང་བོར་དལ་དལ་ལྷོད་ལྷོད་ཀྱིས་རི་སྒང་གི་སྲང་ལམ་དོག་མོ་འདི་ནས་ས་འཛམ་བུ་གླིང་གི་དྲུག་གསུམ་བཅོ་བརྒྱད་དེ།མི་དཀར་ནག་སེར་གསུམ་ཡར་བཞུར་མར་བཞུར་བྱེད་ཀྱིན་པ་དག་གི་ངོ་ལ་ཅེར་རེར་ལྟ་བཞིན།རང་ཉིད་འབོར་གྱིན་པའི་ངང་ཚུལ་ཞིབ་ཏུ་བཀླགས་སམ།ཡང་ན་རྐང་རྗེས་ཀྱི་ཆེ་ཆུང་དང་།ཁ་དོག་་་དབྱིབས་སོགས་དྲུག་གསུམ་བཅོ་བརྒྱད་ཅན་གྱི་མི་ཚོགས་སྣ་ཚོགས་སྣ་ཚོགས་ཤིག་གདོང་གིས་བསུ་བཞིན། རང་གི་ཚུགས་ཀ་ད་དུང་འགྱུར་མེད་པའི་གཏན་ཚིགས་ལ་ཚ་འདྲི་བྱས་སམ།
སྲང་གི་ཚོང་ཁང་དང་འགྲོན་ཁང་།ཟ་་ཁང་སོགས་ཁང་བརྩེགས་མཐོ་དམན་ཡོངས་ཀྱི་ཐོག་ཁ་རུ།མཚོན་མདངས་འདྲ་མིན་སྣ་ཚོགས་ཅན་གྱི་དར་ལྕོག་རིང་པོ་རིང་པོ་དག་ལྷབ་ལྷབ་ཏུ་གཡོ་སྟངས་དེ་།རང་གི་གྲིབ་གཟུགས་ཀྱི་འགུལ་རིས་དང་།དེ་ཡི་ལྷབ་སྒྲ་རང་གི་རྣམ་ཤེས་ཀྱི་དབྱངས་སུ་འཐིམ་དུས།ས་འདིའི་ཇ་ཧུབ་གང་རེས་ཀྱང་རང་གི་བླ་སྲོག་ཡོངས་སུ་ནེམ་ཞིང་།ཟུངས་ཁྲག་ལ་བཅུད་འཛོམས་སུ་འཇུག་པའི་སྣང་བ་ཞིག་འགོག་མེད་དུ་འཆར་ཡང་། མི་ཚོགས་ཀྱི་གཡས་གཡོན་རྒྱབ་མདུན་ན། སྲང་ལམ་གྱི་འགོ་བར་གཞུག་གསུམ་ན། ངོ་གདོང་སྨུག་པོ་ཅན་གྱི་ང་ཚོ་གཞན་ཁོ་ན་ལ་ཅེར་ནས།གཞན་གྱི་རྐང་རྗེས་སྙེག་གིན།ད་དུང་གཞན་དང་གཞན་ཞིག་ཁོ་ན་འཚོལ་གྱིན་ཁོམ་གྱིན་མེད་པའི་སྲང་ལ་ཡོང་ནས།གོམ་པ་རེ་རེ་དང་བསམ་གཞིག་རེ་ལྷན་དུ་མདུན་ལ་སྤོ་དུས།རྒྱབ་ལོག་ནས་རང་ཉིད་སུ་ཞིག་གིས་འདེད་ཀྱིན་པའི་བྲེལ་འཚུབ་ཅིག་གིས་ནོན་ཏེ་ཡོང་བ་དང་།ལྷག་པར་དུ་བསམ་ཚུགས་ལ་མ་ཚུགས་ཁེལ་གྱིས་རྡོ་ལ་རྡར་གྱི་དབུ་རྩེ་སྤྲིན་པ་ནག་ལྡིག་ལྡིག་ཅིག་གིས་བཏུམས་ཏེ་བདོ་བ་དེར་བལྟས་ན།སེམས་རང་བཞིན་གྱིས་ནེམ་འགྲོ་བ་མ་ཟད།འབྲུག་སྒྲ་ལྡིར་ལྡིར་ཅིག་དང་གློག་དམར་ཤར་ཤར་རེ་སྣང་ལ་ཤར་དུས།ཞེད་སྣང་དང་འཇིགས་སྐྲག་གིས་ཤ་འདར་རྒྱག་ཏུ་འཇུག་པས།རང་གི་གོམ་པ་ལྷོད་ལྷོད་པོ་དེའང་རང་བཞིན་གྱིས་ཇེ་མགྱོགས་ཇེ་མགྱོགས་རེད་ཨང་།
ཕྱི་དྲོར་སླེབས་དུས་ལག་ན་ཆེ་ཆུང་སྣ་ཚོགས་ཅན་གྱི་ཕྲེང་བ་རེ་ཐུར་ཏུ་དཔྱངས་ནས་གླིང་སྐོར་དང་གཙུག་ལག་ཁང་གི་སྐོར་ལམ་བསྙེགས་ཏེ་བུད་འགྲོ་བའི་རྒན་རྒོན་དེ་ཚོ་མཐོང་ཡོང་། ཐོག་མར་ན་ནིང་ལས་ད་ལོར་ཇེ་མང་དུ་སོང་བ་འདྲ་སྙམ་ཡང་། ཞིབ་ཏུ་བལྟས་ན་ན་ནིང་ལས་ད་ལོར་ཇེ་ཉུང་དུ་སོང་བར་ཡང་སྣང་།སྲང་མདོ་ཞིག་ནས་འདི་ལྟར་སྣང་གནས་ཐོ་གཏུག་མ་ཐུབ་པར་ཡུད་ཙམ་ལ་ཧད་དེ་ལུས་སོང་པའི་བར་ཐག་དེ་རུ།ང་ཚོའི་མདུན་ན་དུས་གཏན་གྱི་གནས་མལ་སྙེག་བཞིན་པའི་འདར་འདར་འཁྱར་འཁྱོར་གྱི་རྒན་རྒོན་ཚོར་ཕར་བལྟས་ཚོད་ལ།སྨིན་ཐག་ཆོད་པའི་ལོ་ཏོག་ཅིག་ལྟར་ནང་དུ་དུད་པའི་ཁོང་ཚོའི་འཕངས་སེམས་ཀྱི་མགོ་བོ་ཅི་འདྲ་ལྕི་ཨང་།ཁོང་ཚོ་ཕར་ཕར་ལ་སོང་ཤུལ་ན།རང་ཉིད་ལ་བཅོལ་གྱིན་པ་ལྟ་བུའི་རེ་བཞག་གི་རྐང་རྗེས་ནར་ནར་བོ་དེ་དག་ཅི་འདྲ་ཆེ་ཨང་།མ་གཞི་ཁོང་ཚོའི་མདུན་ཐད་ཀྱི་གཞི་ལམ་དཀར་བོ་དེ།ཕ་ཡུལ་གྱི་སྐོར་ལམ་ཞིག་ཡིན་ཆོག་ན།ཁོང་ཚོའི་རྣམ་ཤེས་སྦྲང་མ་འདྲ་བོ་ཅི་འདྲའི་བདེ་བདེ་ལྷོད་ལྷོད་ཀྱིས་འཕུར་ཆོག་ཨང་།
འདི་ལྟར་དྲུག་གསུམ་བཅོ་བརྒྱད་ལ་ལྟ་ཞོར་འགྲོ་ཞོར།ཅི་དྲན་འདི་དྲན་གྱི་རྒྱ་མི་ཆོད་པར་མ་ཟད།དོར་མ་སྲང་གི་ཉ་ཉོག་དང་མཉམ་དུ་ཉོག་ནས་འགྲོ་དུས། རང་ཉིད་ཅི་ཞིག་ཏུ་འགྱུར་གྱིན་པའི་ཚ་རླབས་ཤིག་གིས་གཅུན་ནས་ཡོང་ངོ་།།