བློ་བཟང་སེང་གེ་འདི་ལྟར་ལངས་སོང་།

༼བཀའ་ཁྲི་བློ་བཟང་སེང་གེ་མཆོག་གི་རྒྱབ་སྐྱོར་བ་ཞིག་གིས་བཀའ་ཁྲིའི་འོས་འདེམས་ཆེན་མོ་མགོ་ནས་མཇུག་བར་བརྒྱུད་པའི་ཚོར་སྣང་རག་བསྡུས་ཤིག༽

བོན་རྒྱ་བསྟན་འཛིན་རབ་རྒྱས།

ང་ཚོ་བོད་པ་ལ་མཚོན་ན། གནའ་སྔ་མོར་འབྲོང་གི་གཤིས་ཀ་དང་ཐག་ཉེ་ལ། སྤོབས་པ་དང་། ལ་རྒྱ། ཚེ་སྲོག་གསུམ་དོ་མཉམ་དུ་འཛིན་པའི་ལྟ་བ་ཤུགས་ཆེ་ཞིང་། སྟག་ཤར་གྱི་སྣང་བས་ནམ་མཁའི་སྤྲིན་པ་ལའང་དོ་འགྲན་པ་དང་། སྟག་ཤར་ར་ཞིག་གི་མ་མཐའི་ཆ་རྐྱེན་གཡུལ་ཐོག་ནས་ཤི་ཐུབ་དགོས་པ་དེ་ཡིན་པས། གདོང་དམར་སྲིན་པོའི་བུ་རྒྱུད་འདིས་ས་གཤགས་ནས་གནམ་ལ་གཡུགས་མྱོང་ལ། གནམ་བཀོག་ནས་ས་ལའང་སྦྱར་མྱོང་། ཡིན་ནའང་། དུས་ཚོད་དང་ཁོར་ཡུག་གི་འཕེལ་རིམ་ཞིག་གིས་སྲིན་པོའི་མི་རིགས་དེའང་”ལྷ་བཤོས་ཁྱི་ཡིས་ཟོས་ན་འཛུམ་དམུལ་དམུལ། །མར་མེ་རླུང་གིས་བསེད་ན་འཛུམ་ཤིག་ཤིག །”ཟེར་བའི་ཚད་གཞི་རུ་ཁད་ཀྱིས་གྱུར་ཏེ། རྒྱ་ཁྱིའི་ཆོམ་རྐུན་ལའང་རྒོལ་ལན་སྤྲོད་མི་ཐུབ་པའི་ཚད་དུ་གྱུར་མོད། སྟོང་ལོ་གསར་བ་ནས་བཟུང་གློ་བུར་དུ་གོ་རྟོགས་རྒྱས་པ་དང་བག་ཆགས་སད་པ་ལྟ་བུ་ཞིག་གིས་ས་བྱི་ཞི་རྒོལ་ཆེན་མོ་དང་། སྐྱེ་རྒུའི་ས་ཡོམ་ཆེན་མོ་བཅས་ཀྱི་སྐབས་སུ་དོན་གྱི་བདག་པོ་གཞིས་བཞུགས་རྒྱ་ཆེ་མི་མང་གིས་སྔ་ན་མེད་པའི་དཔའ་རྟགས་བཞག་པ་མ་ཟད། སློབ་ཕྲུག་གཡུང་ལྷུན་འགྲུབ་དང་། གྲྭ་ཕྲུག་ཕུན་ཚོགས། གྲྭ་གཞོན་བཀྲ་བྷེ་སོགས་ཚེ་སྲོག་མར་ལོ་འདྲ་བོ་དང་མི་རིགས་ཀྱི་ལ་རྒྱ་དོ་མཉམ་དུ་འཛིན་པའི་དཔའ་བོའི་དཔུང་སྡེ་ཞིག་དང། སྒྲོལ་མ་སྐྱབས་དང་། འོད་ཟེར། འཇམ་དབྱངས་སྐྱིད། ཐེའུ་རང་། གཉན། ཞོགས་དུང་སོགས་གསེར་སྨྱུག་འབྲོང་གི་རུ་ཐར་འདྲ་བོ་དགྲ་ལ་གཏད་པའི་རྩོམ་པ་པོའི་དཔུང་སྡེ་ཞིག གླུ་བ་ཤེར་བསྟན་དང་། བཀྲ་ཤིས་དོན་འགྲུབ་སོགས་རྒྱུད་སྐད་ཕྲ་མོའི་འདེགས་འཇོག་ནས་མཐུན་སྒྲིལ་དང་དཔའ་བོའི་ངར་སྒྲ་གྱེར་བའི་གླུ་བའི་དཔུང་སྡེ་ཞིག ད་དུང་སྤྲུལ་སྐུ་བསྟན་འཛིན་བདེ་ལེགས་དང་། རོང་རྒྱས་ཨ་གྲགས། བླ་བྲང་ཨ་ཁུ་འཇིགས་མེད་། སྒྱིས་ཚང་སྟག་སྨྲིག་སོགས་མི་རིགས་ཀྱི་སྐྱིད་སྡུག་སྐད་གསེང་གིས་གླེང་ཞིང་སྨྲ་ལྕེ་ལ་མེ་སྟག་འཚུབ་པའི་དཔུང་སྡེ་ཞིག་བཅས་རང་རང་གི་གནས་སུ་སྟག་ངར་ངར་གྱིས་ཡར་ལངས་ཏེ། མི་རིགས་ཀྱི་ལ་རྒྱ་དང་སྙིང་སྟོབས་ཁུར་ནས་མངོན་བྱུང་བས། བོད་བཙན་པོའི་དཔའ་ངར་གྱི་རྟོགས་པ་དང་ཆིག་སྒྲིལ་གྱི་གཉུག་གཤིས་སད་འགོ་ཚུགས་སོང་བར་སྨྲས་ནའང་བདེན་ཆ་ཆེ་བའི་ཚོད་དུ་གྱུར། གཏུམ་དྲག་སྲིན་པོའི་མཆེ་བར་ནས་འཁྱུག་པའི་དཔའ་བོའི་ངར་སྐད་དེ་དག་གིས། ཡང་ན་གངས་ལྗོངས་གཡང་གི་ར་བ་ནས་མཆེད་པའི་དཔའ་བོའི་གླུ་སྐད་དེ་དག་གིས་ཤི་མ་གསོན་གྱི་བཙན་བྱོལ་ལའང་རང་བཞིན་གྱིས་ངར་ཆུང་ཞིག་བསླངས།
དེ་ལྟར་བོད་མི་རིགས་ནི་འབར་ཆོག་ཆོག་གི་མེ་རྟ་ཞིག་དང་འདྲ་བར་མེ་སྟག་གཅིག་གིས་ནགས་རྫོང་བསྲེག་པའི་ནུས་པ་ལྡན་པ་བཞིན་ལས་འགུལ་གཅིག་གིས་བོད་ཁམས་སྒུལ་བའི་གོ་རྟོགས་ཤིག་སད་དེ། བོད་མི་རིགས་འདི་སྔར་བཞིན་སྙིང་སྟོབས་ལ་དགའ་ཞིང་ལ་རྒྱ་ལ་དུངས་མཁན་གྱི་མི་རིགས་ཤིག་ལ་འགྱུར་འགོ་ཚུགས་ཡོད། མཁས་དབང་བློ་བཟང་སེང་གེ་ལགས་ད་ལོར་རྒྱལ་སོང་བ་དེ་ཡང་འདི་འདྲའི་སད་རྟོགས་ཤིག་གི་ཤུགས་རྐྱེན་དང་རྒྱུ་མཚན་ལ་བགྲང་འོས་པ་མ་ཟད། ད་ལོའི་བཀའ་ཁྲིའི་འོས་འགྲན་ཆེན་མོ་བརྒྱུད་བློ་སེང་ལགས་བོད་གཞིས་བྱེས་གཉིས་ཀྱི་རེ་བའི་མིག་དང་སྤོབས་པའི་ཚད་གཞི་རུ་གྱུར་བ་དང་། ལྷག་པར་བཙན་བྱོལ་བའི་མི་རབས་གསར་བ་ཚང་གི་སྤོབས་པ་དང་དར་ཆ་ལྟ་བུ་རུ་གྱུར་བ་དེ་ཡང་གཞིས་བཞུགས་དཔའ་རྒོད་དག་གི་དཔའ་བོའི་གད་རྒྱངས་ཀྱིས་སྒུལ་ཤུགས་དང་། བློ་བཟང་སེང་མཆོག་གི་སྙིང་སྟོབས་ཀྱི་ངར་ཤུགས་དང་ཡིད་ཆེས་ཀྱི་གདེང་ཚོད་བཅས་ཀྱིས་མི་སེམས་སྒུལ་ཞིང་མི་སེམས་དྲོས་པ་རེད། དཔེར་ན། བློ་བཟང་སེང་གེ་ལགས་དང་པོར་གཞིས་ཆགས་མོན་གྷོ་ལ་སླེབས་དུས་”ང་བློ་བཟང་སེང་གེ་ད་ལྟའི་བར་དུ་འོས་འགྲན་རྐྱང་བའི་བརྒྱུད་རིམ་ནས་ནར་སོན་པ་མ་ཟད། མི་ཚེ་འདིའི་ནང་ཐེངས་གཅིག་ལའང་ཕམ་མ་མྱོང་། ད་ཐེངས་ཡང་ང་ཕམ་རྒྱུ་མ་རེད་བསམས་ཀྱིན་ཡོད་”ཅེས་དང་། “ང་མ་ཤི་བར་དུ་བོད་རྩ་དོན་གྱི་ཆེད་དུ་ལས་ཀ་ལས་རྒྱུ་ཡིན་”ཞེས་བཤད་པ་དང་། ཆེས་ཐོག་མའི་བཀའ་ཁྲིའི་བགྲོ་གླེང་ཆེན་མོ་སྦེལ་ཀོབ་ནས་འཚོགས་དུས་ཀྱང་”ཨོ་བྷ་མ་ངེད་གཉིས་སློབ་གྲྭ་གཅིག་པ་རེད། ང་བློ་བཟང་སེང་གེ་ཨོ་བྷ་མ་བྱེད་པ་ལས་གཞན་ཞིག་བྱེད་མི་སྲིད་”ཅེས་གདེང་ཚོད་ཀྱི་ལན་འདེབས་གནང་བ་མ་ཟད། “ངས་རྒྱ་གུང་ཁྲན་གྱི་རྩིས་དེ་རྩིས་ལོག་ལ་གཏོང་གི་ཡིན་”ཞེས་ཡོངས་བསྒྲགས་བྱས་སོང་ཞིང་། དེ་ལྟའི་ཁོང་གི་སྙིང་སྟོབས་ཆེན་པོ་དང་གསོན་ཤུགས་ལྡན་པའི་སྐད་ཆ་རེ་རེས་མི་མང་གི་སེམས་ཡོངས་སུ་གཡོས་ཤིང་འཕྲོག་པ་དང་། དེ་ཡང་མི་མང་གི་སྤྲོ་བའི་འུར་སྒྲ་དང་དགའ་བའི་ཀི་འབོད་ཀྱིས་མི་ཚོགས་ཀྱིས་སྟེམས་པའི་ཚོགས་ཁང་ཆེན་མོ་ཡོམ་ཡོམ་སྒུལ་བ་མ་ཟད། སུད་སི་གཉིས་པ་རུ་གྲགས་པའི་སྦེལ་ཀོབ་གཞིས་ཆགས་ཆེན་པོ་དེའང་རལ་བར་བྱས་པའི་སྣང་བ་ཤར།
འདི་ལྟར་བློ་བཟང་སེང་གེ་ལགས་ཀྱིས་གདེང་ཚོད་ལྡན་པའི་གཏམ་བཤད་དང་བཅས་བཙན་བྱོལ་ནང་སྐོར་བ་ཞིག་བརྒྱབ་རྗེས་དྲང་བདེན་དང་ལ་རྒྱ། མི་རིགས་བཅས་ལ་དགའ་ཞིང་བརྩེ་བའི་མི་རབས་གསར་བ་སྣང་བ་མཐོན་པོ་ཅན་རྣམས་ཀྱི་བློར་བབ་ཅིང་། ཡིད་ཆེས་དང་གདེང་ཚོད་མཐོན་པོས་རྒྱབ་སྐྱོར་བྱེད་འགོ་ཚུགས་པ་རེད།
ང་རང་ཉིད་ལ་མཚོན་ནས་བཤད་ནའང་། དང་པོར་བཀྲས་མཐོང་ལ་འོས་ཆ་ཆེ་བའི་ལྟ་ཚུལ་འཛིན་མཁན་ཞིག་ཡིན་མོད། སྙིང་སྟོབས་ཀྱིས་ཁེངས་པའི་བློ་སེང་ལགས་གསལ་བོ་ཞིག་མཐོང་རྗེས་ངས་རང་གི་ལྟ་ཚུལ་ལ་འགྱུར་བ་བཏང་བ་ཡིན། ཡིན་ནའང་། ངས་རང་གི་ལྟ་ཚུལ་ལ་མཁྲེགས་བཟུང་མ་བྱས་པར་འགྱུར་བ་བཏང་བའི་སྐབས་དེར། བློ་སེང་ལགས་སུ་ཐོབ་པའི་རེ་བ་ཅན་ཕར་ཞོག འཐོབ་མི་སྲིད་པ་མ་ཟད་ཐ་ན་འོས་གཞིའི་ནང་དུའང་སླེབས་མི་ཐུབ་པའི་ཁོག་རྩིས་རྒྱག་མཁན་ནི་ཁོང་གི་རྒྱབ་སྐྱོར་བ་ནང་མ་དག་གི་ནང་དུའང་འདུག་མོད། ངས་ནི་རྣམ་ཀུན་ཆོལ་ཁ་དང་ཆོས་ལུགས་ཀྱི་ཕྱོགས་རིས་ཁྱི་སྐྱག་ལྟ་བུ་དེའི་དབང་དུ་གྱུར་ནས་བདེན་པ་སྣོག་སྣོག་ལ་ཡོད་མཁན་དག་ནི། ཆབ་སྲིད་པའི་ཁོར་ཡུག་གི་ཚོགས་པ་སྐྱིད་སྡུག་ནང་གི་མི་དེ་དག་དང་། གཞན་གྱི་བཀའ་མངགས་འོག་བསྡུས་པའི་ཡིག་ཐོགས་པ་རྫུན་མ་ཚོ་ཡིན་པ་ལས། བོད་མི་སྤྱི་བྱིངས་ནས་བདེན་པར་གོ་བརྡ་འཕྲོད་བཞིན་དུ་ནག་བསུབ་མི་བྱེད་པའི་ཡིད་ཆེས་ཤིག་བཅངས་ཤིང་། ཡིད་ཆེས་དེའི་ང་རྒྱལ་གྱི་ངང་ནས། བདག་གིས་མང་འཚོགས་ལ་གོ་བརྡ་སྤྲོད་པར་འབད་པ་བྱས་པ་ཡིན་ལ། དེ་ཡང་རླུང་འཕྲིན་དང་དྲ་རྒྱ། ཚགས་པར་དང་། བགྲོ་གླེང་འདུ་འཛོམས་བཅས་སུ་བློ་སེང་ལགས་ཀྱི་མཚན་དངོས་སུ་བསྙད་ནས་འོས་བབ་ཆེ་བའི་སྐོར་ཤུགས་ཆེན་པོས་བཤད་དེ་ནུས་ཚོད་ཀྱིས་རྒྱབ་སྐྱོར་བྱས་པ་ཡིན། ཡིན་ནའང་། སྐབས་དེར་མི་དག་གིས་གད་མོ་དང་བཅས་”བློ་བཟང་སེང་གེ་ལ་ཇི་ལྟར་ཐོབ་དགོས་པ་རེད། གླེན་པ་ཁྱོད། རྒྱབ་རྩ་བྱེད་ན་ཐོབ་པར་རེ་བ་ཅན་ཞིག་ལ་རྒྱབ་རྩ་བྱེད་དགོས་པ་ལས་མི་ཐོབ་པ་གཏན་འཁེལ་བཞིན་དུ་ད་དུང་དེ་ཡག་རབས་རྒྱན་རབས་བཤད་ནས་ཅི་བྱེད་”ཅེས། སེམས་ཐག་ཉེ་རིང་ཅི་རིགས་ཀྱིས་དོན་དངོས་ཡིན་མིན་སྣ་ཚོགས་ཀྱི་སྐད་ཆ་སྙིང་ལ་གཟན་པ་ཤ་སྟག་རྣ་ལམ་དུ་འུར་གྱིན་འདུག་མོད། བདག་ནི་བླུན་པོ་འུར་རྗེས་འབྲངས་པ་ཙམ་མིན་པར་དང་པོར་ཁོང་གི་ལོ་རྒྱུས་བཙལ། བར་དུ་ཁོང་གི་རྩོམ་ཡིག་བཀླགས། ཐ་མར་ཁོང་གི་བགྲོ་གླེང་གཏམ་བཤད་ཁག་ལ་ཉན་ཏེ། ཁོང་བཀའ་ཁྲིའི་འོས་མིར་ལངས་པ་ཀུན་ལས་ཆེས་འོས་ཤོས་དེ་ཡིན་པའི་ལྟ་ཚུལ་བྱུང་ཡོད་པས། དེ་དག་གིས་བདག་གི་ལྟ་ཚུལ་གཏན་ནས་སྒུལ་མ་ཐུབ་པ་མ་ཟད། སུ་གང་གིས་བརྒྱུད་ལམ་ཁག་ལ་བློ་སེང་ལགས་ཀྱི་མིང་འདོན་བྱེད་ཐུབ་ཀྱི་མེད་པའི་སྐབས་སུ་བདག་གིས་ཐེངས་དང་པོར་དུས་བབ་དྲ་ཚིགས་སུ་ཁོང་གི་མིང་འདོད་བྱས་པ་ཡིན་ལ། དགུ་བཅུ་གསུམ་ཚོགས་པས་བཀོད་སྒྲིག་བྱས་པའི་མི་རབས་གསར་བའི་བགྲོ་གླེང་གི་སྐུ་མགྲོན་ལ་འབོད་སྐབས་སུའང་འོད་སྡེར་བརྒྱུད་ཁོང་གི་མཚན་འདོན་བྱས་པ་དང་། དེ་རྗེས་ཨེ་ཤ་ཡ་རང་དབང་རླུང་འཕྲིན་ཁང་གི་སྟག་ལྷ་རྒྱལ་གྱིས་བཅར་འདྲི་བྱེད་སྐབས་དང་། དབུ་མའི་ལམ་གྱི་གསར་འཕྲིན་བརྒྱུད་ལམ། བོད་གཞུང་ཟློས་གར་ཁང་དུ་མཐོ་རིམ་སློབ་མས་བཀོད་སྒྲིག་བྱས་པའི་བཀའ་ཁྲིའི་བགྲོ་གླེང་སོགས་ཀྱི་སྐབས་སུ་ཁོང་ལ་རྒྱབ་སྐྱོར་བའི་ཆ་ཤས་བླངས་པ་མ་ཟད། ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་སྐལ་ལྡན་བློ་གྲོས་ཀྱི་གཙོ་སྐྱོང་འོག་བོད་ཀྱི་དཔེ་མཛོད་ཁང་དུ་བཀའ་ཁྲིའི་འོས་མི་གསུམ་གྱི་རྒྱབ་སྐྱོར་བ་གསུམ་དང་ལྷན་ཕྱོགས་གང་སར་དྲ་རྒྱ་དང་རླུང་འཕྲིན་བརྒྱུད་ཐད་གཏོང་གི་བཀའ་ཁྲི་སྐབས་གསུམ་པ་འོས་འདེམས་ཀྱི་བགྲོ་གླེང་ཐ་མ་བྱེད་སྐབས་བཅས་སུ་འགྲོན་འབོད་བྱས་པ་བཞིན་སྤོབས་པ་དང་གདེང་ཚོད་ཆེན་པོས་ཁོང་ལ་རྒྱབ་སྐྱོར་བྱས་པ་ཡིན།
དེའི་ཕྱིར་ད་ཐེངས་ཁོང་ལ་ཚད་མཐོ་བའི་འོས་ཀྱི་རྒྱལ་ཁ་ཐོབ་པ་དེ་ང་དང་ང་ལྟ་བུའི་དྲང་བདེན་ལ་དགའ་ཞིང་གནས་ལུགས་ལ་སྨོན་པ་དག་གི་ཚད་མཐོ་བའི་རེ་བ་ཞིག་རེད་སྙམ་པའི་དམིགས་བསལ་གྱི་ཚོར་སྣང་ཞིག་བྱུང་བ་མ་ཟད། གཞུང་དྲང་རྒྱུད་ཡག་གི་བོད་མི་རིགས་ལ་ཚད་མཐོ་བའི་ཡིད་ཆེས་ཐོལ་བ་ཞིག་སྐྱེས་ཤིང་། སེམས་ངོས་ལ་ཕྱོགས་ཞེན་གྱི་ནད་ཡམས་མ་ཞུགས་པའི་མི་རབས་གསར་བའི་དཔུང་ཁག་ལ་འདང་བརྩེ་ཇེ་ཆེ་རུ་གྱུར།
ཡིན་ནའང་། དཀྲོག་གཏམ་པ་མང་པོ་ཞིག་ལ་དུས་ཐོག་ལན་འདེབས་བྱེད་མ་ཐུབ་པ་ནི་ངས་ཁོང་ལ་ནུས་པ་ཡོད་ཚད་ཀྱིས་རྒྱབ་སྐྱོར་བྱེད་མ་ཐུབ་པའི་ངོས་དག་ཡིན། དཔེར་ན། བློ་སེང་གིས་ལི་ཐང་བརྟན་བཞུགས་སྐབས་གནང་བའི་གཏམ་བཤད་ནང་ནས་ཚིག་དུམ་ཞིག་བཅད་ནས་གང་སར་དཀྲོག་གཏམ་སྤེལ་བ་དང་། པེ་ཅིན་ལ་བསྐྱོད་པ་དེའང་ཁ་ཤས་ཀྱིས་སྣ་བཅད་ནས་རྣ་ལ་སྦྱར། རྣ་བཀོགས་ནས་ཁ་ལ་ལྷན་པ་སོགས་འུར་ཆེན་པོས་དཀྲོག་གཏམ་རིམ་པ་བཞིན་དུ་སྤེལ་སྐབས། བདག་གིས་སྒེར་དེབ་《ཤལ་མ་ལིའི་ཁྲག་སྡོང་། 》མ་འགྲུབ་པར་དེར་འབད་དེ། ལན་འདེབས་ཀྱི་ཁོམ་ལོང་མ་བྱུང་བ་ཡིན། དེ་མིན་བདག་གིས་དེ་དག་མ་ཚོར་བ་མིན་ལ་དེ་དག་གི་ཕྱི་ནང་མ་ཤེས་པའང་མིན་ཏེ། དཔེར་ན། ལི་ཐང་གི་བརྟན་བཞུགས་དེ་ག་རང་ལ། ཁྲོམ་ཐོག་རིན་པོ་ཆེ་དང་། མཁན་ཟུར་བློ་བཟང་ཚེ་འཕེལ་རིན་པོ་ཆེ་སོགས་ལི་ཐང་གི་ཆེ་ཆེ་དྲག་དྲག་དག་གདན་བཞུགས་པའི་དབུས་སུ་བློ་བཟང་སེང་གེ་ལགས་ཀྱིས་”ལི་ཐང་ཟེར་བ་འདི་ལ་དགའ་དགོས་པ་དང་། སྐྱོ་དགོས་པ་དང་། སེམས་ཤུགས་འཕར་ཞིང་སྤོབས་པ་སྐྱེ་དགོས་པ་བཅས་ཀྱི་ལོ་རྒྱུས་ཡོད། ཅེས་ལི་ཐང་གི་ཡུལ་གྱི་བཀོད་པ་སོགས་བཤད་དེ་ལི་ཐང་ནི་དགའ་དགོས་པའི་ཡུལ་ཞིག་ཡིན་རབས་དང་། ལི་ཐང་ཟེར་བ་འདིས་བོད་བསྟན་སྲིད་ཀྱི་ཆེད་དུ་རྒྱ་དང་རིམ་པར་འཐབ་སྟེ་མི་ཁྲི་ཕྲག་ཁྲི་ཕྲག་མཚོན་ཁ་ནས་འགྱེལ་ཞིང་མནར་གནོད་ཀྱིས་གྲོངས་ཡོད། དེ་དག་ནི་བསམ་ན་མིག་ཆུ་རྫོགས་འགྲོ་བའི་སེམས་སྐྱོ་བའི་ལོ་རྒྱུས་ཡིན། དེ་མིན་ཨ་འབྲུག་མགོན་པོ་སོགས་དཔའ་བོ་བརྒྱ་ཕྲག་མང་པོ་བྱོན་ནས་བོད་བསྟན་སྲིད་ལ་ལག་རྗེས་བཞག་ཡོད། དེ་ནི་ནམ་ཡང་སྤོབས་པ་སྐྱེ་དགོས་པའི་ལོ་རྒྱུས་ཡིན། དཔའ་བོ་དཔའ་མོ་དེ་དག་གིས་སྐུ་མདུན་རིམ་བྱོན་ལ་དད་པ་དག་སྣང་བྱས། བོད་གཞུང་གི་བཀའ་སྒྲུབ་ཞིང་། ཆོལ་ཁ་གསུམ་ཆོས་བརྒྱུད་ལྔ་དང་བཅས་པ་ཆིག་སྒྲིལ་བྱས་ཡོད་པ་རེད། དེ་ནི་ང་ཚོ་སྤོབས་པ་སྐྱེ་དགོས་པ་དེ་ཡིན། ད་ལྟའི་གནས་སྐབས་སུའང་ལི་ཐང་ན་བོད་བསྟན་སྲིད་ལ་ཞབས་འདེགས་རླབས་ཆེན་ཞུ་མཁན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དང་། རོང་རྒྱས་ཨ་གྲགས་སོགས་མང་པོ་ཡོད་ལ། མ་འོངས་པར་ངེད་ཚོས་ཀྱང་དེ་ལྟར་བོད་བསྟན་སྲིད་ལ་ཞབས་འདེགས་ཞུ་ཐུབ་གི་རེད། ཐུབ་པའི་རེ་བ་དང་ཡིད་ཆེས་ཡོད་”ཅེས་ཆིག་སྒྲིལ་དང་ལྷག་བསམ་གཞི་རྩར་བཞག་སྟེ་དོན་ལྡན་གྱི་བརྗོད་བྱ་སྲོག་ཏུ་བཟུང་བའི་གཏམ་བཤད་སྤེལ་བཞིན་པ་ནི་མཐོང་བ་ཙམ་གྱིས་ཉམས་དགའ་བ་ཞིག་རེད་དེ། ངས་དེ་དག་དུས་ཐོག་ཏུ་གཞུང་དྲང་གི་མི་མང་ལ་གསལ་བཤད་སྤེལ་ཁོམ་མ་བྱུང་བ་ནི། ང་ལ་མཚོན་ན་རང་གི་ནུས་པ་ཡོད་རྒུས་ཁོང་ལ་རྒྱབ་སྐྱོར་བྱེད་མ་ཐུབ་པའི་ངོས་ཡིན། ཡིན་ནའང་། དཀྲོག་གཏམ་དེ་དག་གིས་མི་མང་གི་སེམས་བསྒྱུར་མ་ཐུབ་པར་ད་ལྟ་དངོས་སུ་ཁོང་བཀའ་ཁྲིར་འདེམས་ཐུབ་པ་ནི་བཙན་བྱོལ་བོད་པའི་ལོ་རྒྱུས་ནང་གསེར་ཡིག་གིས་འབྲི་འོས་པའི་རྒྱལ་ཁ་ཞིག་ཡིན་ཞིང་། དེ་ནི་ང་ཚོས་ནམ་ཡང་སྤོབས་པ་བྱེད་འོས་པ་ཡིན།
ཡང་གཅིག་བཤད་ན་ཐེངས་འདིའི་རྒྱལ་ཁ་འདི་ནི་བློ་སེང་ལགས་དང་ང་ཚོ་རྒྱབ་སྐྱོར་བ་ཉིས་ཁྲི་ལྷག་ཙམ་གྱི་རྒྱལ་ཁ་མིན་པར། བྱེས་འཁོད་བོད་མི་རིགས་ཀྱིས་གཞིས་བཞུགས་སྤུན་ཟླ་ཁྲི་སྟོང་གི་རེ་བ་འབུར་གཟུགས་ཀྱིས་བཞེངས་པའི་རྣམ་པ་དང་། རྒྱ་གུང་ཁྲན་གྱི་ཁོག་རྩིས་ཁྱི་སྐྱག་ལྟ་བུ་དག་རྩིས་ལོག་ལ་བཏང་བ་དང་། བཙན་བྱོལ་བའི་བོད་ཟེར་བ་འདིའང་གཞིས་བཞུགས་སྤུན་ཟླ་དག་དང་འདྲ་བར་གནད་འགག་གི་སྐབས་སུ་དྲང་བདེན་གྱི་ཕྱོགས་སུ་ལངས་མཁན་དང་ཆིག་སྒྲིལ་གྱི་ནུས་པ་སྤུངས་མཁན་ཞིག་ཡིན་པ་དེ་འཛམ་བུ་གླིང་ལ་གསལ་བོ་བྱས་པ་རེད། རྒྱ་རྒན་ཚོས་ཀྱང་གནས་ཚུལ་འདི་མིག་གིས་མ་བཟོད་པར་བློ་བཟང་སེང་གེ་དྲག་སྤྱོད་པའི་འགོ་བ་ཞིག་ཡིན་རབས་དང་། ད་ལྟ་བཙན་བྱོལ་གཞུང་དྲག་སྤྱོད་པའི་ལག་ཏུ་ཤོར་རྒྱུ་ཡིན་རབས་ཀྱི་དཀྲོག་གཏམ་སྣ་ཚོགས་ཐ་མའི་འོས་འབྲས་མ་ཐོན་པའི་སྔོན་ནས་བཀྲམ་པ་ལྟ་བུ་རེད། འདི་ནི་རྒྱ་རྒན་ཚོས་ཀྱང་བློ་བཟང་སེང་གེ་ཡི་སྙིང་སྟོབས་ལ་ཤོར་བའི་ན་ཟུག་གི་འཁུན་སྒྲ་ཙོར་རོ་ཞིག་རེད།
དེ་ལས་ཀྱང་དོན་ངོ་མར་བཤད་ན། ཐེངས་འདིར་བཙན་བྱོལ་ནང་གི་གཞོན་སྐྱེས་ཚོས་རང་ཚུགས་བཟུང་སོང་ལ། སྒལ་ཚིགས་ངོམ་སོང་བ་དེ་རེད། དེ་མ་གཏོགས་བཙན་བྱོལ་ནང་གི་ཆབ་སྲིད་པ་ཁ་ཤས་ཀྱིས་ས་འོག་ནས་དར་ཐག་འཐེན། ས་ཐོག་ནས་དཀྲོག་གཏམ་སྤེལ། དྲ་ཐོག་ལ་དྲ་འབུ་བཏང་སྟེ་དོན་ཆེན་འདི་ལམ་ལྷུང་འབྱུང་བར་འགོག་རྒོལ་ཆེན་པོ་བྱས་སོང་། དེ་ཡང་དངོས་གཞིའི་འོས་བསྡུ་ཐོན་ལ་ཉེ་དུས་”རྡ་ས་ནས་མི་གཅིག་གིས་ཀྱང་་བློ་སེང་ལ་འོས་རྡུགས་ཀི་མི་འདུག”ཅེས་པའི་དཀྲོག་གཏམ་ཞིག་ལྷོ་ཕྱོགས་སུ་རླུང་གིས་ཡར་འཁུར་མར་འཁུར་བྱས་ནས་འགྲོ་གིན་པ་མ་ཟད་། དཀྲོག་གཏམ་དེས་རྒྱལ་མཚམས་བརྒལ་ཏེ་ཡོ་རོབ་ལ་བསྐྱོད་ཅིང་ཡོ་རོབ་ནས་བདག་གི་གྲོགས་པོ་ཞིག་གིས་”རྡ་ས་རུ་མི་གཅིག་གིས་ཀྱང་བློ་སེང་ལ་འོས་རྡུག་གི་མི་འདུག་ཟེར་བ་བདེན་པ་ཨེ་རེད་”ཅེས་ཁ་པར་སླེབས་སོང་བས། བདག་ལ་རང་བཞིན་གྱིས་ཤ་འདར་ཞིག་བརྒྱབ་པ་མ་ཟད། ས་སྟོང་ལ་”ཆབ་སྲིད་པ་ཨཱ་ཆབ་སྲིད་པ་”ཞེས་དབང་མེད་ཀྱི་ཆིག་ལབ་ཞིག་ཀྱང་ཤོར། སྐབས་དེར་བདག་གིས་རྒྱ་གར་ལྷོ་ཕྱོགས་ནས་རྡ་ས་བར་དུ་སྐོར་བ་ཞིག་བརྒྱབ་པ་ཡིན་ལ། སྐབས་དེར་དཀྲོག་གཏམ་པ་དག་གི་གཏམ་འཆལ་སྣ་ཚོགས་སྤུར་གྱིན་པ་མ་ཟད། འོས་མི་གཞན་པའི་རྒྱབ་སྐྱོར་བ་དག་གི་ཟང་ཟིང་གི་རྣམ་པ་དེ་ནི་ཆེས་ཚད་མཐོ་བ་དང་འཆར་གཞི་ལྡན་པ་ཞིག་རེད། གྲྭ་ཤག་ནས་ཉལ་བསྡད་ན་སྒོ་བར་ལ་ཚགས་པར་དང་འོད་སྡེར་བརྫངས་ནས་ཡོང་གི་འདུག་ལ། སྲང་ལམ་ཀུན་དང་ཁང་པའི་གྲུ་ཟུར། ཐ་ན་ལམ་འགྲམ་གྱི་བྲག་རྡོ་ཚུན་ཆད་ལ་འོས་མི་གཞཉ་གྱི་སྐུ་པར་གྱིས་བཀང་ཞིང་། ཐ་ན་ངལ་གསོ་ས་དང་། ཇ་འཐུང་ས། རླངས་འཁོར་ལ་སྒུག་ས་བཅས་སུའང་འོས་མི་གཞན་གྱི་ཁྱབ་བསྒྲགས་སྤུངས་ནས་བཞག་འདུག་པ་དང་། དེ་ཡང་ལྷོ་ཕྱོགས་ནས་ལྡི་ལི། ལྡི་ལི་ནས་རྡ་ས་བཅས་སུ་འོས་མི་གཞན་གྱི་ཁྱབ་བསྒྲགས་ཁངས་སྐྱ་འབབ་འབབ་དང་། སྡོང་ལོ་འཐོར་འཐོར་རེད་དེ། བློ་སེང་གི་ཁྱབ་བསྒྲགས་ནི་དེ་ལས་རྒྱ་ཆུང་བ་འདུག ད་དུང་དྲ་ཐོག་ཀུན་ལའང་བློ་སེང་གི་སྐད་ཆ་དུམ་བཅད་ཀྱིས་སྐྱོན་འདོགས་བྱེད་པ་དང་། ཉེས་འཛུགས་བྱེད་པ། ཐ་ན་དཔྱོད་ཤེས་པར་བརྩི་བའི་དྲ་རྩོམ་པ་ཞིག་གིས་ཀྱང་”ཨ་རི་དང་བོད་པའི་ཡུལ་མིའི་གཞི་མཐུན་ཡོད་ཆོག་ནའང་། རྒྱ་ནག་དང་བོད་པའི་ཡུལ་མིའི་གཞི་མཐུན་ཡོད་ཆོག་གི་མ་རེད་”ཅེས་སྐད་ཆ་དགོད་ཤོར་བ་དྲ་ཐོག་ལ་བཀྲམ་ནས་སྤྱི་ཚོགས་ལ་དཀྲོག་གཏམ་སྤེལ་བ་རེད། དེ་ནི་རྒྱ་ནག་གི་རྩོམ་པ་པོ་ཡན་ཧོང་ཕེན་གྱིས་”ཧོ་ཧོ་དེས་ཀྱང་རྒྱ་ནག་ལ་ཆ་རྒྱུས་ལོན་མི་འདུག”ཅེས་བཙན་བྱོལ་སྐུ་ངོ་ཞིག་གི་སྐད་ཆར་ཧབ་དགོད་བྱས་ཡོད་པ་དང་འདྲ་བར། ངས་ཀྱང་”ཧོ་ཧོ་དེས་ཀྱང་བོད་མི་རིགས་ལ་ཆ་རྒྱུས་ལོན་མི་འདུག་”ཅེས་ཧབ་དགོད་ཅིག་བྱ་འདོད་བྱུང་སོང་། སྤྱིར་ན་བོད་མི་རིགས་ནི་གོ་རྟོགས་མེད་པ་དང་ཕྱོགས་ཞེན་ཚ་བའི་ཉམས་སྣང་ཞིག་སྟེར་ནའང་དོན་དངོས་སུ་ཁྲམ་པ་རེ་ཟུང་གིས་གང་ལ་ཁྲིད་ཆོག་ཆོག་ཅིག་མིན་པ་དེ། ས་བྱི་ཞི་རྒོལ་ཆེན་མོ་དང་། ཡུལ་ཤུལ་ས་ཡོམ་ཆེན་མོ། ཐེངས་འདིའི་འོས་བསྡུ་ཆེན་མོ་བཅས་སུ་རིམ་པར་བསམ་བློ་བཏང་ན་གསལ་བོར་ཤེས་རྟོགས་ནུས་ཏེ། གནད་འགག་གི་སྐབས་སུ་བོད་མི་རིགས་ཀྱིས་རྒྱུ་འབྲས་སྲུང་སྟངས་དང་། དྲང་བདེན་དང་ཆིག་སྒྲིལ་ལ་བརྩི་བཀུར་བྱེད་སྟངས་ནི་བརྗོད་ཡུལ་ལས་འདས་པ་ཞིག་ཡིན།
སྤྱིར་ན་ཐེངས་འདིར་དྲ་ཐོག་ནས་ཁོང་གི་སྐྱེས་དམན་གྱི་སྐྱེ་ཁུངས་ཚུན་ཆད་བལ་སེལ་སེལ་གྱི་ཞིབ་འཇུག་བྱས་པ་དེ་ནི། མང་གཙོའི་ཚད་གཞི་མཐོན་པོར་གྱུར་བའི་མངོན་རྟགས་སུ་མ་ཟད། དགའ་འོས་པའི་དོན་དག་ཅིག་ཡིན་ཏེ། ལམ་ལུགས་དེས་མ་འོངས་པའི་བཀའ་ཁྲི་དང་སྤྱི་འཐུས་ལ་ལྐོག་ལྐོག་ཁུ་སིམ་གྱིས་འཛུལ་ས་མེད་པ་ཞིག་ལ་བསྒྱུར་སྤྱིར་ན་ཆབ་སྲིད་ལ་ལྷག་བསམ་དང་དག་སྣང་སྦྱངས་པ་ནི་ལྐུགས་གཤིས་ཤིག་ཡིན་པས། ཞིབ་འཇུག་དང་དཔྱད་ཞིབ་ཀྱིས་ཕྱི་གསལ་ནང་གསལ་ཇི་ཙམ་ཆགས་པ་དེ་ཙམ་གྱིས་ཆབ་སྲིད་ནི་སྤུས་ཀ་ཅན་དང་དྲང་བདེན་གྱི་ལམ་དུ་འགྲོ་བ་ཡིན།
བློ་བཟང་སེང་གེའི་རྒྱབ་སྐྱོར་བ་མང་ཆེ་བ་ནི། གཞོན་སྐྱེས་དང་སློབ་གྲྭ་ཆེ་འབྲིང་། དགོན་སྡེ་ཁག་བཅས་ནས་ཆོལ་ཁ་དང་ཆོས་ལུགས་དབྱེ་བ་མེད་པར་ཐོན་ཡོད་པས། ཐེངས་འདིར་བཙན་བྱོལ་ནང་གི་ཡིག་ཐོགས་པ་ཚོས་ཀྱང་དཔྱོད་ཤེས་ཀྱི་རང་ཚུགས་ཅུང་མངོན་སོང་ངོ་། །ཡིན་ནའང་། བློ་སེང་གི་རྒྱབ་སྐྱོར་བ་ཁ་ཤས་ཀྱིས་འོས་མི་གཞན་ནག་པོ་བཟོ་འདོད་ཀྱི་ཀུན་སློང་གིས་འོས་མི་གཞན་ལ་དྲི་བ་འདྲི་སྐབས་གདན་སའི་རྟགས་གསལ་གྱི་ཁྱབ་འགོ་འཛུགས་འཛུགས་བྱས་ནས་ཁེད་ཀྱི་རྣམ་པ་ཅན་གྱི་དྲི་བ་འདྲི་བ་དང་། ཧབ་དགོད་བྱེད་པ། ཚིག་ངན་ཁ་ནས་གང་ཐོན་བེད་སྤྱོད་བྱས་པ་དང་། དེ་བཞིན་འོས་མི་གཞན་ལའང་ཐལ་ཆེ་བའི་སྐྱོན་བརྗོད་བྱས་པ་དག་ལ་བདག་ནི་འཐད་པ་མ་བྱུང་བ་མ་ཟད། ང་རང་ངོས་ནས་བློ་སེང་ལགས་སུ་རྒྱབ་སྐྱོར་བྱེད་སྐབས་འོས་མི་གཞན་སུལའང་གཞི་རྩ་མེད་པའི་སྐྱོན་འཛུགས་དང་དགག་རྒྱག་གི་ཚིག་ངན་ཐལ་མེད་ལ། བློ་སེང་ལགས་ཀྱིས་ཀྱང་དེའི་ཐད་ལ་བགྲོ་གླེང་མང་པོའི་སྐབས་སུ་འབོད་སྐུལ་ནན་མོ་ཞུས་པ་མ་ཟད། སྔོན་འགྲོའི་འོས་བསྡུ་གྲུབ་མ་ཐག་ཡིག་ཐོག་ནས་བརྒྱུད་ལམ་ཁག་ལ་”ང་ལ་རྒྱབ་སྐྱོར་བྱེད་མཁན་དག་གིས་བག་དང་ལྡན་པའི་སྒོ་ནས་རྒྱབ་སྐྱོར་བྱེད་རོགས་”ཞེས་ཡོངས་བསྒྲགས་རང་བཞིན་གྱི་འབོད་སྐུལ་བྱས་པ་དེ་ནི་དངོས་གནས་དཔྱོད་ཤེས་མཁས་དབང་ཞིག་གི་སྒམ་ཚུགས་འབུར་གྱིས་མངོན་པའི་སྣང་བ་ཤར།
དེ་ལྟར་འོས་བསྡུའི་ཁུགས་སོ་རིམ་པར་བརྒྱུད་ནས་ད་ལྟ་དངོས་སུ་བཀའ་བློན་ཁྲི་པར་བཞེངས་ཤིང་། ༸གོང་ས་སྐྱབས་མགོན་ཆེན་པོ་དབུ་བཞུགས་ཀྱི་དམ་འབུལ་མཛད་སྒོའི་སྟེང་དུ། རང་གི་སྙིང་སྟོབས་དང་དཔའ་ཚུགས་མ་འཆོལ་བར་འཛམ་གླིང་གི་མཐོང་ས་དང་རྒྱ་ནག་གི་རིག་ས་ནས་དཔའ་ཁས་ལེན་གྱི་དམ་བཅའ་རིམ་པར་བྱས་པ་དེས་གསོན་ཤུགས་གསར་བ་ཞིག་གི་སྐྱེ་སྟོབས་མཐོང་ཞིང་། སྟག་ཤར་རྒོད་པོ་ཞིག་སྣང་བའང་བསྟན་སོང་། ལྷག་པར༸གོང་ས་སྐྱབས་མགོན་ཆེན་པོ་མཆོག་གི་ཐུགས་ཡིད་ཡོངས་སུ་ཚིམ་པའི་ཉམས་སྣང་གི་བཀའ་སློབ་རིན་པོ་ཆེ་དེས་ཁ་སང་གི་མཛད་སྒོ་དེ་ནི་རེ་བ་སྟོང་ཕྲག་གི་ཉི་གཞོན་ཅིག་ཅར་འཆར་བའི་བཀྲ་ཤིས་པའི་ཉིན་མོར་བསུས་ཤིང་། དེ་རིང་གི་བཀའ་བློན་ཁྲི་པའམ་ཁ་བ་གངས་ཅན་པའི་སྲིད་སྐྱོང་བ་བློ་བཟང་སེང་གེ་ལགས་ནི། བདེ་སྐྱིད་ཀྱི་གངས་ལྗོངས་བསུ་བའི་སེང་གེ་མཐུར་མེད་ཅིག་ལ་གསུང་གི་གནང་བ་ཐོབ་པའི་སྐལ་བ་ཅན་དུའང་བྱས་སོ། །

སྤྱི་ལོ ༢༠༡༡ ལོའི་ཟླ་ ༨ ཚེས་ ༨ ཉིན་མགོ་བརྩམས་ཤིང་སྤྱི་ལོ་ ༢༠༡༡ ལོའི་ཟླ་ ༨ ཚེས་ ༡༡ ཉིན་རྫོགས་པར་བྱས།