རིན་ཆེན་དོན་འགྲུབ་ཀྱི་དྲ་རྩོམ་ཞིག་ལ་དཔྱད་པའི་གཏམ།

ལྷོ་ཕྱོགས་ཉི་ཟླ་ནས།

སྤྱིར་རྩོམ་པ་པོ་ཞིག་ཡིན་ན་གུ་ཡངས་ཀྱི་བསམ་བློ་དང་རྣམ་དཔྱོད་ཀྱི་གཤོག་རྩལ་རབ་ཏུ་རྒྱས་པའི་སྟེང་ནས་དགག་སྒྲུབ་ཀྱི་དབྱེ་འབྱེད་དག་ཕྱོགས་སུ་མ་ལྷུང་བའི་སྒོ་ནས་དྲང་བདེན་གྱི་སྤོབས་པ་དང་རང་ཉིད་ལ་གདེངས་འཇོག་ཚད་ལྡན་ཞིག་གི་སྒོ་ནས་མི་རིགས་ཀྱི་སྐྱོན་ཡོན་གླེང་དགོས་པ་དང་བརྗོད་དགོས་པ་འདི་ཆེས་འོས་འགན་བླ་ན་མེད་པ་ཞིག་ཏུ་མཐོང་། ཡིན་ཡང་ཁ་སང་དྲ་གྲོགས་རིན་ཆེན་དོན་འགྲུབ་ལགས་ཀྱིས་སྤྲུལ་སྐུ་དང་གྲྭ་ལོག་གི་སྤྱོད་འཚར་ཞིག་བརྗོད་འདུག རང་ཉིད་ཀྱིས་ཞིབ་ཏུ་བཀླགས་ཀྱང་ཡ་མཚར་བ་ཞིག་ལ་སྐྱོན་ཡོན་གཉིས་ཀྱི་སྒོ་ནས་བརྗོད་དགོས་པ་ལས་སྐྱོན་རྐྱང་རྐྱང་མ་གཏོགས་རྩ་བ་ཉིད་ནས་གླེང་མི་འདུག དེ་བས་ཀྱང་རང་ཉིད་ཀྱི་སེམས་ལ་བབ་མ་སོང་། ཐད་ཀར་རྩོམ་པ་པོ་ཁོང་ལ་ཆེད་དུ་གསལ་ཁ་ཞིག་སྟོན་རྒྱུ་དྲན་བྱུང་།
སྤྱིར་སྤྲུལ་སྐུ་ལབ་ན་ཆེན་པོ་ཞིག་ཏུ་འཇོག་དགོས་པ་དང་གོ་དགོས་པ་ཞིག་ག་དུས་ཡིན་ནའང་རང་ཉིད་ཀྱིས་མཐོང་གི་མེད་ལ་ཚད་ཆེན་པོ་ཞིག་ཡང་འཇོག་གི་མེད། བླ་མ་དང་སྤྲུལ་སྐུ་ལ་མུ་གསུམ་མུ་བཞི་འཇོག་དགོས་པ་དེ་གནད་འགག་ཆེན་པོ་ཞིག་རེད་བསམ་གྱིན་ཡོད། སྤྲུལ་སྐུ་ཡིན་ན་བསྟན་དོན་དུ་ཕེབས་དགོས་པ་ཞིག་ལུང་དང་རིག་པ་གང་ནའང་གསུངས་མེད་པར་མ་ཟད་སྒྲུབ་དགོས་ཀྱང་སྒྲུབ་ག་ལ་ཐུབ། དེ་བས་སྤྲུལ་སྐུ་དང་སྤྲུལ་མིང་འཛིན་པ་གཉིས་ལ་ཡང་ཁྱད་པ་ཆེན་པོ་ཡོད་ཤེས་གདའ།
དཔེར་ན། སེང་རྡོར་དང་སྒོ་མོ་ཁོང་གཉིས་ལྟ་བུ་ལ་སྤྲུལ་མིང་འཛིན་པ་ལབ་རྒྱུ་ལས་སྤྲུལ་སྐུ་ཞེས་སེམས་དང་ལྡན་པ་སུ་ཞིག་གིས་བརྗོད་ཀྱི་རེད་དམ། ཆོས་ལ་རྨོངས་པའི་ཨ་མ་རྒན་མོ་དག་གིས་དེ་ཚོའི་ཁྱད་པ་དབྱེ་འབྱེད་ཤེས་ཐུབ་དཀའ་བ་ཙམ་ལས་ཁྱེད་མཚན་ཉིད་རིག་པ་བ་ཞིག་གིས་འདི་དག་གཅིག་ཏུ་འདྲེན་པ་དེ་ཁོ་བོ་ཡ་མཚར་སྐྱེས་སོང་།
ཁོ་བོ་དག་གིས་ཆོས་དང་མ་འདྲེས་བའི་རང་མི་རིགས་ཀྱི་བདེན་དོན་དུ་གང་ཡོང་ཅི་ཡོང་གི་ཞབས་ཞུ་མི་དམན་པ་ཞིག་བསྒྲུབ་དང་སྒྲུབ་བཞིན་པ་རེད། ཁོང་རྣམ་པའི་གསར་གཏོད་དང་གཅིག་སྒྲིལ་གྱི་ལམ་ཁ་འདིའི་ནང་དུ་ང་ཚོ་བོད་མི་རིགས་ཀྱིས་མདུན་བསྐྱོད་ཅིག་བྱེད་ཐུབ་ན་ཅི་མ་རུང་སྙམ།
སྤྲུལ་སྐུ་སེང་རྡོར་གྱིས་ཆགས་པའི་འགྲེལ་བཤད་བརྩམས་ཤིང་། སྒོ་མོ་སྤྲུལ་སྐུས་ཆགས་པའི་ཉམས་འགྱུར་ཅན་གྱི་གཞས་གར་འཁྲབ། འདི་ནི་སྤྲུལ་སྐུའི་ནང་ནས་ཅུང་ཟུར་ཐོན་གྱི་སྤྲུལ་སྐུའི་མཛད་སྤྱོད་མ་འདྲ་བ་གཉིས་ཡིན་ཞིང་ཧམ་པ་ཆེན་པོས་ངན་བྱས་ངོ་སོ་རུ་ངོམ་པའི་སྤྲུལ་སྐུའི་མཛད་སྤྱོད་གཉིས་ཀྱང་ཡིན། རྩོམ་པ་པོ་ཁོང་གིས་འགྲེལ་སྟངས་འདི་གནས་ལུགས་ཤིག་ཏུ་མཐོང་མ་སོང་། ཁོང་གཉིས་ཀྱིས་ཆགས་པའི་སྒྱུ་རྩལ་དེ་སྨྱུག་ཐོག་དང་རྣམ་འགྱུར་གྱིས་བསྟན་པ་དེ་ཙམ་གྱི་སྤྲུལ་སྐུའི་མཛད་སྤྱོད་མ་འདྲ་བ་་གཉིས་བསྟན་སོང་ལབ་ན་རང་ཉིད་ལ་ཧམ་པ་ཆེ་དྲགས་སོང་། ཁོང་གཉིས་ཀྱི་མཛད་པ་དེ་སྤྲུལ་སྐུའི་མཛད་པ་མ་རེད། སྤྲུལ་མིང་བའི་མཛད་པ་ཙམ་བཞག་ན་མི་ཆོག་པ་མེད། བཞག་དགོས་པ་ཞིག་ཏུ་མཐོང་མ་སོང་།

གྲྭ་ལོག་བསམ་མེད་མདོ་མེད་འགས་དེ་ལ་བསྟོད་བསྔགས་འཐེན་བཞིན་གསར་གཏོད་དང་དེང་དུས་ཀྱི་འགྲེལ་བཤད་འོག་ནས་བྱས་རྗེས་ཆེ་རབས་ཟེར། ཨ་རིག་འགྱུར་མེད་ཀྱི་འཁྲིག་གཏམ་དམར་རྗེན་མའི་དེབ་དེ་རྩོམ་པ་པོ་རང་ཉིད་ཀྱི་ཉམས་མྱོང་དང་མྱོང་ཚོར་ཆེན་པོའི་སྒོ་ནས་བྲིས་འདུག་པས་བསྔགས་བརྗོད་ལས་འོས་མེད། ཡིན་ཡང་ཆོས་ལུགས་གཅིག་ལ་ཤི་འཐམ་རོ་འཐམ་རྒྱག་མཁན་གྱི་གྲྭ་བ་འགས་འདི་ལ་མི་མཛེས་མདོག་འདྲ་བོ་སྟོན་མཁན་ཡོད་སྲིད་ཀྱང་། ང་ཚོ་སྤྱི་ཚོགས་ཀྱི་འཁོར་ཡུག་ཆུང་དྲགས་པས་ངོ་ཚ་མདོག་འདྲ་བོ་དང་། ཆོས་ལུགས་དང་རྒྱབ་འགལ་རེད་ལབ་མཁན་དག་གིས་ཐུགས་བསམ་ཡག་པོ་མ་བཞེས་པའི་ཐན་སྐད་ཅིག་ལས་གཞན་མ་དམིགས་སོ།

ཆགས་སྲེད་ཀྱི་སྐྱོན་ཡོན་དང་ཨ་རག་གི་སྐྱོན་ཡོན་འདི་མ་གླེང་ན་མི་མང་པོ་ཞིག་རྟག་པར་བཟི་ནས་ལམ་ཁ་ཡོད་ཚད་ནས་ཡོད་ཚད་འགག་འགྲོ་བའི་ཉེན་ཁ་ཆེན་པོ་ཡིན་ཙང་གླེང་དགོས་པ་འདི་རྩོམ་པ་པོ་ཞིག་གི་འོས་ཞིག་ཡིན་པ་ངེས་པར་མཐོང་།
དཔེར་ན་མཁས་དབང་དགེ་འདུན་ཆོས་འཕེལ་གྱི་འདོད་པའི་བསྟན་བཅོས་དེ་ཡང་སྒྱུ་རྩལ་གྱི་ཕྱོགས་ཡོང་ནས་ཆེས་སྙིང་དོན་ཅན་གྱི་རང་རྩོམ་ཞིག་ཡིན་པ་མ་ཟད་ང་ཚོའི་ཁོར་ཡུག་ཆུང་ཆུང་འདི་དང་འབྲེལ་ན་གསར་གཏོད་ཀྱི་རྣམ་པ་ཞིག་གསལ་བར་མངོན། ངོ་བོས་གནས་ཚུལ་གྱི་གཏམ་ག་རེ་བརྗོད་ཀྱང་རྗེས་སུ་ཡི་རངས་ཞུ་བ་ལས་དེ་ལ་དགའ་མིན་དགའ་མདོག་བྱས་ན་སྤྱི་ཚོགས་ལ་ཡར་རྒྱས་མེད་པར་མ་ཟད་བོད་མི་རིགས་ལྟ་བུ་ལ་མཚོན་ན་ཡང་འགག་རྡོ་ཆེན་པོ་ཞིག་ཡིན་པས་རྩོམ་པ་པོ་དང་བསམ་བློ་པ་ཆབ་སྲིད་པ་གཞུང་སྒེར་སུ་ཡིན་ཡངས་གུ་ཡངས་གི་བསམ་བློ་འདི་མེད་དུ་མི་རུང་བ་ཞིག་ཡིན་པས་ཚང་མས་འདི་ལ་ཐུགས་ཁུར་ཆེ་བཞེས་གནང་དགོས་པ་ཞིག་ཏུ་མཐོང་ངོ་།