རུ་ཤུལ་ཆོས་གྲུབ་ཀྱིས
གོ་ལར་ཟླུམ་པོ་འདིའི་ཐོག་རྩེད་མོའི་རྣམ་གྲངས་གྲངས་ལས་འདས་པ་ཞིག་ཡོད་ལ་རྩེད་མོ་དེ་དང་དེའི་འབྱུང་ཁུང་དང་རྩེད་སྟངས་སོགས་མི་རིགས་རང་གི་འཚོ་བ་དང་འབྲེལ་བྱུང་རིམ་གྱི་ལོ་རྒྱས་རེ་བཤད་རྒྱུ་ཡོད་པ་སྨྲ་མ་དགོས། འུ་ཅག་བོད་པ་ཚང་ཡང་དེ་མཚུངས་ཀྱི་རྩེད་རིགས་སྣ་ཚོགས་ཞིག་ཡོད་མོད་ལོ་རྒྱས་དང་དུས་ཀྱི་དབང་གིས་མང་པོ་ཞིག་ཉམ་རྒུད་དུ་སོང་ཡོད་ཀྱང་ད་དུང་ཡང་མ་ཉམ་པའི་རྩེས་མོའི་རིགས་མདའ་རྩལ་འགྲན་པ། འགྱོག་རྡོ། ཐག་འཐེན། རྐང་རྒྱུགས། རྟ་རྒྱུགས། གཡག་རྒྱུགས། ཆུ་གཤིབ་སོགས་རྩེད་དང་རྩེད་བཞིན་ཡོད། ད་དུང་དེ་ལས་ཀྱང་དགའ་སྤོབས་སྐྱེ་དགོས་པ་ཞིག་ལ་ཉེ་སྔོན་རྨ་ཆུའི་རྟ་རྒྱུགས་འགྲན་ཚོགས་ཆེན་མོའི་ཉིན་གསུམ་གྱི་ཡར་སྔོན་ལ་རྟ་ཐོག་སྤོ་ལོའི་རྩེད་འགྲན་ཞིག་ཕྱི་ཟླ་༨པའི་ཚེས༡༠ཉིན་དངོས་སུ་སྤེལ་ཅིང་ཚེས་༡༡ཉིན་མཇུག་བསྡུས་ཏེ་ཉིན་གཉིས་རིང་རྩེས་ཡོད་འདུག ཐེངས་འདིའི་འགྲན་ཚོགས་སུ་རྨ་ཁུགས་རྟ་རའི་རྟ་ཐོག་སྤོ་ལོའི་རུ་ཁག་དྲུག་ཞུགས་པ་དང་། ཉིན་གཉིས་རིང་གི་ཛ་དྲག་གི་འགྲན་སྡུར་བརྒྱུད་ནས་མཐར་རུ་ཁག་གཉིས་པར་བྱ་དགའ་ཨང་དང་པོ་ཐོབ་ཅིང་བྱ་དགའི་གཟེངས་རྟགས་ལ་དངུལ་དམངས་སྒོར་ཆིག་ཁྲི་ཐོབ་འདུག དེའི་དོན་དྲ་ལམ་འགའ་རེ་ནས་ཤེས་གསལ་ལྟར་ན་“ན་ནིང་ནས་བཟུང་། རྨ་ཆུ་རྫོང་གི་རྨ་ཁུགས་རྟ་རས་མདོ་སྨད་རྟའི་ཆོལ་ཀའི་རིགས་བཟང་རྒྱུད་གཙང་གི་རྟའི་རིག་གནས་གོང་སྤེལ་གཏོང་བ་དང་། གནའ་བོའི་ལུས་རྩལ་དེ་བོད་ཡུལ་ནས་ཉམས་པ་སླར་གསོ་བྱ་ཆེད་ནང་སོག་ནས་ཆེད་ལས་མཁས་པ་གདན་དྲངས་ཏེ། ཡུལ་དེ་གའི་རྟ་རྩལ་ལ་བྱངས་པའི་གཞོན་ནུ་ལོ་ཆུང་ཚོར་ལུས་རྩལ་དེ་ཇི་ལྟར་རྩེ་བའི་སྐོར་གྱི་ཡུལ་དངོས་སློབ་སྟོན་བྱས་ནས་རྟ་ཐོག་སྤོ་ལོའི་རུ་ཁག་བརྒྱད་རྩ་འཛུགས་བྱས་ཤིང་།
ད་ལོ་ནས་བཟུང་འགྲན་སྡུར་དངོས་སུ་མགོ་བརྩམས་པ་དང་རྗེས་མར་ཡང་ལོ་རེ་བཞིན་འགྲན་ཚོགས་དེ་བསྡུ་བའི་འཆར་གཞི་ཡོད་འདུག”ཟེར། ཕྱིར་རྩེད་མོའི་རིགས་ཤིག་ཡིན་ཕྱིན་དེའི་རྩེད་སྟངས་དང་འགྲིག་ལམ་བཅས་ཤེས་དགོས་རྒྱུ་ནིཧ་ཅང་གི་གལ་ཆེན་ཡིན་ན་ད་ཐེངས་ཀྱི་རྩེད་མོ་དེའི་རྩེད་སྟངས་དང་སྤོ་ལོ་ཇི་ལྟར་འཕྲོགཔ། རྟ་ཁ་ཇི་ལྟར་དཀྱུ་པ། འགྲིག་ལམ་དང་མི་འགལ་བའི་སྒོ་ནས་ལུས་རྩལ་ཇི་ལྟར་ངོམ་པ། སྤོ་གཡུག་ཇི་ལྟར་གཡུག་པ་སོགས་ཀྱི་ཤེས་བྱ་མང་པོ་ཞིག་ལོ་ངོ་གཅིག་གི་སྔོན་ནས་སྦྱོང་བརྡར་དང་ལག་ལེན་བྱས་རྗེས་སྦྱང་བ་ལ་བྱང་ཆུབ་སྐད། འབྲོག་པའི་ན་གནོན་ཁོ་ཚོས་འབྲོག་པའི་སྤང་ཐང་ལ་ཤིན་ཏུ་འཚམ་པའི་གནའ་བོའི་ལུས་རྩལ་དེའི་རྒྱུན་ལེགས་པོར་བཟུང་སྟེ་རྗེས་མར་ཕྱོགས་སོ་སོའི་འབྲོག་སྡེ་མང་པོའི་ནང་སྤེལ་ཐུབ་ཚེ་གསར་བུ་མང་པོ་ཞིག་རྒྱན་པོ་འགྱེད་པ་དང་། དོན་མེད་དུ་སྲང་ལམ་འཁྱམ་པའི་ལས་དང་རྦད་དེ་གྱེས་ཐུབ་པའི་རེ་བ་བཟུང་འདུག་ཟེར། རྩེད་མོ་འདི་དར་སའི་ཡུལ་རོ་མན་སོགས་ཡུལ་ལུང་སྣ་ཚོགས་ཤིག་བཤད་རྒྱུ་ཡོད་ཀྱང་རེ་རེ་བྱས་ནས་བགྲང་ན་ཧ་ཅང་གི་མང་། ཞིབ་མོ་ཤེས་འདོད་ན་ google ནང་དུ་གཟིགས། ཡང་དཔྱད་གཞིའི་ཡིག་ཆ་འགའ་རེའི་ནང་ཤེས་གསལ་ལྟར་ན་རྩེད་མོ་འདི་རྒྱ་ནག་བརྒྱུད་བོད་ནས་དར་ཟེར། བོད་རྒྱལ་གདུང་རབས་སོ་གསུམ་པ་སྲོང་བཙན་སྒམ་པོས་རྒྱ་ཟ་ཀོང་ཇོ་བོད་དུ་བསུ་སྐབས་རྟ་ཐོག་སྤོ་ལོ་འདི་རྩེས་རྗེས་རྒྱ་ནག་ཏུ་དར། དེ་ནས་ཕྱི་གླིང་གི་རྒྱལ་ཁབ་གཞན་དང་གཞན་དུ་དར་ཏེ་མིང་ལ་སྤོ་ལོ་ཟེར། དེང་སྐབས་ཀྱང་རྩེད་མོ་འདི་ལ་སྤོ་ལོ་ཟེར་བཞིན་ཡོད་པ་ལ་དཔག་ན་སྐད་ཆ་དེ་ལ་ཅུང་བདེན་ཁ་མེད་དམ་སྙམ་མོ།
ཤིན་ཏུ་ལེགས། རྟ་ཐོག་གི་མི་རིགས་སུ་འབོད་པའི་བོད་གངས་ཅན་པ་ལའང་རང་གི་ཡུལ་སྲོལ་གོམས་གཤིས་དང་འཚམ་པའི་རྩེད་མོའི་རིགས་དགོས་པ་ཡིན། རྩེད་མོ་འདི་རིགས་མང་ཙམ་དར་ན་རྩ་ས་བརྩད་ནས་རྒྱག་རེས་རྒྱག་རྒྱུའང་ཅུང་ཉུང་དུ་འགྲོ་སྲིད་ལ་རྒྱན་འཛུགས་འཁྱམ་ཉུལ་སོགས་ཀྱང་དེ་བཞིན་ནོ།
ཡག་པོ་རེད། ཁྱེད་རང་ངའི་གྲོགས་པོ་ཆོས་གྲུབ་ཡིན་ནམ། ཡིན་ན་ཁྱེད་ཀྱི་རྩོམ་འབྲིའི་བྱ་བ་རྒྱུན་སྐྱོང་ཡོང་བའི་འབོད་སྐུལ་ཞུ་རྒྱུ་ཡིན།