ཚེ་དབང་ནོར་བུ་མེར་བསྲེགས་ཀྱང་། ཤི་མི་འདུག

འདྲེ་མགོ་རྡོ།

བསམ་བློ་བཏང་གིན་བཏང་གིན།
རང་གིས་རང་ལ་བློས་གཏོང་ག་ཚོད་ཅིག་ཡོད་མེད་ལ་དྲི་བ་གཏོང་གྱིན་གཏོང་གྱིན།
ཁབ་རྩེ་ཙམ་གྱིས་ལུས་ལ་བསྣུན་ན་ཁ་ནས་” ཨ”་ཤོར་འགྲོ་བའི་གཤིས་ཀ་ལ་བསམས་ན།
སྐྱིད་གཉལ་རང་བདེ་འབའ་ཞིག་གི་མི་ཚེ་འཚོལ་རྒྱུ་ལ་འཁོར་དུས།
མཐོན་པོའི་ཁྲི་ན་སྒེར་དོན་གཉེར་བའི་ཉི་མ་ཞག་ཕུད་ཀྱི་ལས་དོན་བྱེད་ཕྱོགས་ལ་ལྟོས་དུས།
ཁྱེད་ཀྱི་བློས་གཏོང་དེ་དངོས་གནས་རང་བློ་ཡིད་འདིར་ཤོང་ཐབས་མེད་པ་ཞིག་རེད།

དོན་དངོས་འདི་དང་མེ་ལྕེ་ལྷབ་ལྷབ་དུ་འཕྱུར་བ་དག་ལ་ལྟོས་ཀྱིན་ལྟོས་ཀྱིན།
བདག་གིས་ལྷ་སྒྲུང་ཞིག་ལ་ཡིད་ཆེས་བྱེད་རྒྱུར་ཧ་ཅང་ལས་སླ་བོ་ཡིན་པ་རྟོགས།
དངོས་གནས་ཡིད་ལ་ཤོང་མ་མྱོང་། ཤོང་གི་མི་འདུག ཤོང་ཐབས་མི་འདུག

ཏཱ་ལའི་བླ་མ་འདི་ཕྱིའི་སྐྱབས་གནས་ཡིན་པ་དང
བུ་རབས་ཚ་བརྒྱུད་ལ་བོད་དྲི་རྣལ་མ་ཞིག་དགོས་ཆེད
ཁྱེད་ཀྱིས་རང་ལུས་མེ་བསྲེགས་གཏོང་སའི་ས་ཆ་དེ་ནས
རྒན་གཞོན་གཉིས་ཀ སྐྱ་སེར་གཉིས་ཀ
རྒྱ་གར་དུ་ཆུ་བོ་བཞུར་བཞུར་ཡིན་ཡང
ངས་ཁྱེད་རང་ལྟ་བུའི་དཔའ་བོ་དག་ལ་ངོ་ནོངས་ནས་ཞུ་མི་ཐུབ་པ་ཞིག་ནི
ཁོང་ཚོས་བོད་དྲི་རྣལ་མ་ཞིག་ད་དུང་རྙེད་མེད་ཅེས་པ་འདི་རེད

དོན་དངོས་འདི་དང་མེ་ལྕེ་ལྷབ་ལྷབ་དུ་འཕྱུར་བ་དག་ལ་ལྟོས་ཀྱིན་ལྟོས་ཀྱིན།
བདག་གིས་རང་གིས་རང་ལ་མགོ་བསྐོར་གཏོང་རྒྱུ་ཧ་ཅང་ལས་སླ་བོ་ཡིན་པ་རྟོགས་ཀྱང།
ཁྱེད་རང་། དངོས་གནས་ཡིད་ལ་མ་ཤོང་། ཤོང་གི་མི་འདུག ཤོང་ཐབས་མི་འདུག

རྒྱ་གར་འཕགས་པའི་ཡུལ་ཡིན ༧ཏཱ་ལའི་བླ་མ་བཞུགས་ས་རེད
དགའ་ལྡན་ཕོ་བྲང་གནས་ས་རེད
བཙན་བྱོལ་སྤུན་ཟླ་མང་ས་རེད
ཁྱེད་ཀྱིས་བརྗོད་ཚིག་འདི་དག་གི་མ་ཎི་བཟློ་བཞིན གླུ་དབྱངས་ལེན་བཞིན
ཁྱེད་ཀྱིས་མ་ཎི་ལྟ་བུའི་དེ་དག་ལ་བཅངས་པའི་དད་པ་ཁུར་བཞིན
རང་ཉིད་མེ་ལྕེ་ལྷབ་ལྷབ་ཏུ་བསྟིམས

ངས་རྒྱ་གར་དང་ཐག་མི་རིང་བའི་ས་ནས་ཁྱེད་ཀྱི་རེ་བ་དེ་དག་ཐོས
ངས་གསར་འགྱུར་དང་པར་རིས་ཁྲོད་ནས་མེ་ལྕེས་ཟོས་པའི་ཁྱེད་ཀྱི་སྐུ་ཕུང་ནག་རིལ་མ་དེ་མཐོང
དེ་ནི་སྟོད་འགག་སེར་བོ་མནབས་པའི་སྐུ་ཞབས་གཟི་བརྗིད་ཅན་དེ་རེད་ཟེར

པར་རིས་འདི་དང་མེ་ལྕེ་ལྷབ་ལྷབ་ཀྱིས་ཟོས་པ་གཉིས་ལ་ལྟོས་ཀྱིན་ལྟོས་ཀྱིན།
ང་རྒྱ་གར་དང་དགའ་ལྡན་ཕོ་བྲང་། བཙན་བྱོལ་སྤུན་ཟླ་ཚོའང་མཇལ་མྱོང་མཁན་ཞིག་ཡིན་སྟབས།
ཁྱེད་རང་། དངོས་གནས་ཡིད་ལ་མ་ཤོང་། ཤོང་གི་མི་འདུག ཤོང་ཐབས་མི་འདུག
བོད་ཕྱིའི་སྙན་ངག་གི་ཆུ་སྐམ་འཕྲལ་འདྲེ་མགོ་རྡོས་སྙན་ངག་ལ་ལད་མོ་བྱས་ནས་བྲིས། ༢༠༡༡། ༨། ༢༥། ཉིན།