ཁྱོད་ཀྱི་སྐྱེས་སྐར་ལ་ཕུལ།
འགར་ཚེ་རྒྱལ།
དེ་རིང་ནི་ཁྱོད་ཀྱི་མི་ཚེ་ལ་དབུ་ཁྱུད་བྲིས་པའི་ཉི་མ་དེ་རེད།
མཐའ་ཡས་པའི་ནམ་མཁའ། ཁོད་ཡངས་པའི་ས་གཞི།
དེ་རིང་གི་ཉི་མ་འདི་ཡོད་པས་ཁྱོད་ཀྱི་མངའ་ཐང་ཡིན།
ངས་ཀྱང་དེ་རིང་གི་ཉི་མ་འདི་མཛུབ་རྩེར་སྒྲོན་ནས།
རྒྱང་རིང་ནས་ཁྱོད་ལ་བཀྲ་ཤིས་པའི་ཁ་གཡང་སྒྲོགས།
ཁྱོད་ཀྱི་སྐྱེས་སྐར་ལ་བཀྲ་ཤིས་བདེ་ལེགས།
དེ་རིང་གི་ཉི་མ་འདིར་ཁྱོད་ཀྱིས་སྔོན་ཆད་ཀྱི་ལོ་ཟླ་དག་དྲན་ནམ།
བྱིས་དུས་ཀྱི་སྤྲོ་སྣང༌། གཞོན་དུས་ཀྱི་རྨི་ལམ།
ཡོད་ཚད་དེ་རིང་གི་ཉི་མ་འདི་ཡོད་པས་ཁྱོད་ཀྱི་བདེ་སྐྱིད་ཡིན།
ངས་ཀྱང་དེ་རིང་གི་ཉི་མ་འདི་སེམས་ངོར་བྲིས་ཏེ།
རྒྱང་རིང་ནས་ཁྱོད་ལ་བཀྲ་ཤིས་པའི་སྨོན་འདུན་ཞུ།
ཁྱོད་རང་ཕྱི་རོལ་དུ་བསྐྱོད་ནས་མཁའ་དབྱིངས་ལ་ཐེངས་གཅིག་བལྟ་རྒྱུ་མ་བརྗེད།
ནམ་མཁའ་འདི། ད་དུང་ཟླ་འོད་ལ་སྙེས་བའི་སྐར་མའི་ཚོགས།
དགུ་ཚིགས་ཀྱི་ཧྲག་བར་ནས།
དོ་དགོང་ངས་ཁྱོད་ལ་ཆེད་དུ་བཤམས་པའི་སྐྱེས་སྐར་གྱི་གསོལ་སྟོན་ཡིན།
དེ་རིང་ནི་ཁྱོད་ལ་མདུན་བསྐྱོད་ཀྱི་སྒོ་མོ་ཕྱེས་པའི་ཉི་མ་དེ་ཡིན།
སེམས་ཁོང་གི་ཕུགས་མདུན། རེ་སྨོན་གྱི་བྱ་གཞག
མ་འོངས་པའི་རྒྱལ་ཁ་ཐམས་ཅད་ཁྱོད་ལ་དབང༌།
ངས་ཀྱང་མཚན་དགོང་འདིའི་ངོ་གདོང་ནས་དཀར་གསལ་གྱི་སྒྲོན་མེ་ཞིག
ཁྱོད་ཁོ་ནའི་ཆེད་དུ་འོད་ལམ་ལམ་སྦར་ཡོད།
ཁྱོད་ཀྱིས་མིག་ཟུང་བཙུམ་ནས་ངའི་ཕྱོགས་ལ་དྲན་པ་ཐེངས་གཅིག་གློད་རྒྱུ་མ་བརྗེད།
དེ་རིང་གི་ཉི་མ་འདི་ཁྱོད་རང་གི་ཡིན་སྟབས།
ངས་ཀྱང་དོ་དགོང་གི་ནམ་མཁའ། ད་དུང་ཟླ་འོད་དང་སྐར་མའི་ཚོགས།
མཚན་མོ་འདིའི་མཛེས་སྡུག་ཡོད་ཚད་ལ་འོ་བྱེད་བཞིན་ཡོད།