རྡོ་རྗེ་བདུད་འཇོམས་ནས་བྲིས།།
༧གོང་ས་སྐྱབས་མགོན་ཆེན་པོས་ད་ཆ་ང་ཚོ་བོད་མི་གཅིག་འཕྲོ་བརླག་ཏུ་སོང་ཡང་ཕངས་སེམས་སྐྱེ་གཞི་རེད་ཅེས་གསུངས་པ་ལྟར།བོད་མི་རིགས་ཆགས་འཇིག་གཉན་འཕྲང་སྐབས་འདིར་སྤྱིར་བོད་མི་ཅིག་དང་ཡང་སྒོས་གཞོན་སྐྱེས་ཚོ་འཕྲོ་བརླག་ནུས་མེད་དུ་སོང་ན།ཆེ་ས་ནས་མི་རིགས་ཀྱི་འཐབ་རྩོད་ལ་ཕན་རོགས་མི་ཐུབ་པ་དང་ཆུང་ས་ནས་རང་གི་འཚོ་གོས་ཙམ་ཡང་དོན་གཉེར་མི་ཐུབ་མཁན་ཅིག་ཆགས་ན།མི་རིགས་ཀྱི་གྱོང་དང་སྤྱི་ཚོགས་ཀྱི་ཁུར་བོ་ཡང་ཡིན་པས་བོད་མི་སྤྱི་སྒེར་སུ་ཡིན་ན་གནད་འགག་འདིར་ཟབ་དགོས་སྙམ། རྒྱ་གར་ནང་ཡོང་མྱོང་མཁན་བོད་མི་ཅིག་ཡིན་ན་མཁྱེན་ཆུབ་ལྟར་བཞུགས་སྒར་ཁུལ་འདི་སྤྱིར་བཏང་འཛམ་གླིང་མི་སེར་དང་ཡུལ་བསྐོར་མཁན་སྣ་ཚོགས་འཛོམས་ས།བོད་ཕྱི་ནང་གི་བོད་མི་བཙན་བྱོལ་བ་ཚོའི་རྒྱལ་ས་འདྲ་བོ།ལྷག་པར་ཉེ་ལམ་ལོ་ཤས་ནས་རྒྱ་གར་ཡུལ་བསྐོར་བ་གང་བྱུང་གི་རྫོབ་དོང་ལྟ་བུ་ཆགས་ཏེ།ཁྲོམ་ལ་ཚལ་ཅུང་ཉོ་ཆེད་འགྲོ་རྒྱུར་ཡང་དཀའ་ངལ་རྙོག་འཛིངས་ཆེན་པོ།ཁྲོམ་དང་ཐག་ཉེའི་ས་ཁུལ་ཕར་བཞག་ནས་ཉེ་འཁོར་གྲོང་གསེབ་ཁག་ཏུའང་དགོང་མོ་རྟག་པར་ཆང་འཐུང་གི་རྒྱག་རེས་དང་ཉལ་ཐ་འཐེན་མཁན་ཕྱི་རྒྱལ་བ།བོད་མི།བལ་བོ།རྒྱ་གར་ཡུལ་མི་བཅས་ཁྱུ་ཚོགས་བྱས་ཏེ་སྤྲོས་མེད་ཀྱི་སྤྱོད་ལམ་སྣ་ཚོགས་དང་བཅས།མཚན་གང་བོར་རོལ་ཆ་སྣ་ཚོགས་འབུད་རྡུང་གིས་བཟི་འཁྱོམ་གྱི་ངང་སྐད་ངན་བརྒྱབས་ཏེ་གཉིད་མི་བཅུག་ཅིང་།གཞོན་སྐྱེས་ལས་མེད་དང་ཉལ་ཐ་འཐེན་མཁན་མང་དྲག་ནས་རྐུན་མ་དང་འཕྲོག་བཅོམ་མཁན་མང་པོ་ཡོད་པ།ཡང་ཕྱི་གླིང་བ་ཚོས་ཧེ་ཕེ་རུ་འབོད་པ་བག་ཡངས་སྤྲོ་སྣང་རིང་ལུགས་པ་མང་དྲག་ནས་ཕོ་མོའི་ལུས་འབྲེལ་གང་བྱུང་བྱེད་པ་སོགས་ཀྱིས་སློབ་ཕྲུག་མང་པོ་དུས་མ་རན་གོང་ནས།རྡ་སར་ཡོང་རྒྱུར་རྔམ་དྲག་དང་ཧ་ལམ་རྒྱ་གར་ཡུལ་མི་སྦག་སྦག་ཅན་ཁྱོ་ཀ་སྟོང་ཚོ་མང་པོའང་འདི་རིགས་ཀྱི་འཆལ་སྤྱོད་ལ་བརྟེན་ནས་འཇགས་མ་མེ་ཁྲིད་བྱེད་བཞིན་པ་མ་ཟད།རྡ་ས་འདི་དེང་འཛམ་གླིང་ཤར་ནུབ་ཀྱི་མི་རིགས་འདྲ་མིན་འདུས་ཚོགས་ཆེ་རུང་ལས་ཀ་བྲེལ་འཚུབ་དང་མི་ཕན་ཚུན་དོགས་ཟོན་ཟབ་པའི་གྲོང་ཆེ་ཆུང་དང་མི་འདྲ་བར།མི་རིགས་དབྱེར་མེད་ངང་ཕོ་མོས་ལུས་འབྲེལ་གང་བྱུང་བྱེད་ས་ཅིག་ཡིན་སྟབས། aids,tbལྟ་བུ་དང་དེ་མིན་འཁྲུག་སྤྱོད་ལས་འགོས་ཁྱབ་ན་ཚ་མང་པོ་ཡོད་པ།རྒྱ་གར་དང་བོད་མིའི་འབྲེལ་ལམ་ཐོག་གཞུང་འབྲེལ་སྒོས་ཕྱི་ནས་ཕན་ཚུན་འདྲ་ཆགས་མདོག་ཙམ་སྟོན་པ་ལས་ནང་སྙིང་དུ་རྐྱེན་ཆུང་ཙམ་གྱིས་འགད་ཆོག་གི་འབར་རྫས་ཤིག་དང་མཚུངས་པས།གལ་ཏེ་དོན་རྐྱེན་འདྲ་ལྷག་ན་མི་ཁེར་རྐྱང་ཞིག་གང་དུ་བྲོས་རྐྱང་གབ་རྐྱང་ཡིན་མོད།བཟའ་ཚང་བུ་ཕྲུག་ཅན་ཚོ་ཉེན་འགན་ལྗི་མོ་རེད།རྒྱ་གར་ནང་མི་མང་གིས་ཕན་ཚུན་རྙོག་ལངས་དེ་རིགས་ལ་གཞུང་དང་བསྐོར་སྲུང་བ་ཁྲིམས་ཀྱིས་དེ་ཙམ་ནུས་འདོན་སྲུང་སྐྱོབ་མི་ཐུབ་པ་སོགས།མདོར་ན་ང་ཚོ་བྱེས་གྱར་གཞོན་སྐྱེས་མང་པོ་འཚར་སའི་རྡ་ས་འདི་འཁོར་ཡུག་རྒྱུན་ལྡན་ཅིག་མིན་པའི་ཆ་ནས།སྤྱིར་བོད་མི་གཞོན་སྐྱེས་དང་དགོས་སུ་ནང་དང་ཕ་མ་མེད་མཁན་གྱི་གཞོན་སྐྱེས་མང་པོ་སྤྱི་ཚོགས་ཀྱི་དབང་དང་ལས་ཀའི་དབང་།ཨ་གསར་གཡམ་རྒྱུགས་ཀྱི་དབང་དང་མཐུན་རྐྱེན་ཞན་དབང་སོགས་བརྒྱུད་ལམ་སྣ་ཚོགས་ལ་བརྟེན་བོད་མིའི་ངོ་བོར་གནས་མི་ཐུབ་པ་དང་།མཐའ་ན་མང་པོ་ཅིག་རང་གི་ལྟོ་གོས་ཙམ་འཚོལ་མི་ཐུབ་པར་རིམ་པས་ཤ་སྐམ་ལུས་རུད་དུ་གྱུར་ཏེ་ཁྲོམ་སྲང་ནའང་འཆི་བཞིན་པ་སོགས།ཕྱོགས་དང་རྒྱུ་མཚན་འདྲ་མིན་གྱི་ཐོག་འཕྲོ་བརླག་འགྲོ་བཞིན་པ་མངོན་གསུམ་མྱོང་གྱུར་ཁག་བསྡུས་ཏེ་བཤད་ན།
སྐབས་ཐོག་དང་པོར་རྡ་རམ་ས་ལར་ཆབ་སྲིད་ཀྱི་བོད་དོན་རྒྱབ་སྐྱོར་མཁན་དང་ནང་ཆོས་ལ་དོ་སྣང་ཉམས་ལེན་མཁན་གྱི་རིགས།དེ་མིན་ཡུལ་བསྐོར་བ་ཉུང་ཙམ་ལས་སླེབས་མི་འདུག།ཡིན་ནའང་བར་སྐབས་ཤིག་ནས་༧གོང་ས་ཆེན་པོའི་མཚན་གྲགས་དང་གནས་དེར་བོད་མི་བཙན་བྱོལ་བའི་གཞུང་ཡོད་པ།མི་རིགས་སྣ་འདུས་དང་ཞི་ལྷོད་ཀྱི་རི་ཁུལ་ཅིག་ཡིན་པ་གང་སར་ཁྱབ་རྗེས།འཛམ་གླིང་ཤར་ནུབ་ཀྱི་ཡུལ་བསྐོར་འདྲ་མིན་པད་ཚལ་དུ་བོང་བའི་སྤྲིན་ཚོགས་འཁོར་བ་ལྟར་བྱུང་སྟེ་ཉེ་ལམ་ནས་ས་ཁོད་ཆུང་བའི་རྡ་སའི་སྲང་ལམ་དུ།སྣུམ་འཁོར་རིགས་དང་སྦག་སྦག་མི་ཚོགས་ཀྱི་འཚང་ཁས་མི་ལ་རྐང་ལག་བཅག་པ་དང་རྒན་རྒོན་ཚོའི་རྐང་པའི་ཐོག་སྣུམ་འཁོར་རྒྱུགས་པ་འདྲ་བོ་དོན་རྐྱེན་ཆུང་ཙག་མང་པོ་བྱུང་བཞིན་པ་ལྟ་བུ་རྡ་སའི་ཕྱིའི་རྣམ་པ་དང་།ནང་དོན་རྡ་སར་རྒྱ་གར་ཡུལ་མི་རྒན་གཞོན་མང་པོ་ཅིག་ལ་ས་ཁང་ནང་མི་ཡོད་རྐྱེན་ཟས་གོས་ཀྱི་དཀའ་ངལ་མེད་པས།ནམ་རྒྱུན་ཡུལ་བསྐོར་བ་ཚོ་ལ་ཚོང་ཙག་ཙིག་རེ་གཉེར་ཞོར་ཁོང་ཚོ་དང་ལྷན་ཧ་ཤི་ཤི་དང་མ་རེ་བ་ན་ལྟ་བུ་མྱོས་འགྱུར་གྱི་རྫས་རིགས་སྣ་ཚོགས་འཐེན་ཏེ།སྣང་བ་གང་སྐྱིད་དང་ཉི་མ་གང་འཁྱོལ་གྱིས་བསྡད་ཡོད་པ་རྡ་སའི་ཕྱི་ནང་གཞོན་སྐྱེས་ཚོ་དང་ཁ་ཐག་ཉེ་ཤོས་ཀྱི་འཚོ་བ་ཡིན་ཙང་།༼གནས་ཚུལ་འདི་རིགས་བདེན་མིན་རྡ་རམ་ཀོ་ཌི་དང་པཱཀ་སོས་ནཐེ་སོགས་ལ་མྱུལ་དང་ཤེས་ངེས།༽འཁོར་ཡུག་འདིར་སློབ་སྦྱོང་དང་ལས་ཀའི་གྲུབ་འབྲས་ཐོག་ཡར་ལྟོས་ས་ཉུང་ཙམ་དང་ངན་གོམས་ཀྱི་ནང་འཐིམས་གཞི་དང་།ཁྲེལ་མེད་གཡོ་སྒྱུ་ལྟ་བུའི་རིགས་འཁོར་ཡུག་ཆུང་རུང་ཆབ་སྲིད་འཁྲུག་པས་གཞོན་སྐྱེས་ཚོར་ཆུང་དུས་ནས་སློབ་སྦྱོང་ཐོབ་ཡོད།དེ་འདྲས་རྐྱེན་རྡ་སའི་གཞོན་སྐྱེས་མང་ཆེ་བར་ཕུགས་བསམ་དང་དམིགས་ཡུལ་ལངས་ཕྱོགས་འདྲ་གང་ཡང་མེད་པས་ཕོངས་ཡོད་སྙམ།གང་ལྟར་འཁོར་ཡུག་འདིའི་ནང་ཁོང་ཚོ་འཛམ་གླིང་ཡུལ་ལུང་གང་ས་ནས་ཡོང་མཁན་ཡུལ་བསྐོར་བ་དང་འབྲེལ་ལམ་བྱུང་གི་ཡོད་ཅིང་།དེ་ལ་འབྲེལ་བ་བྱུང་སའི་བརྒྱུད་ལམ་མི་འདྲ་བ་གསུམ་འདུག་བསམ་སོང་།དང་པོ་བོད་ནས་གང་འཚམ་ལུས་སེམས་གཉིས་ཆ་འཚར་ལོངས་བྱུང་གྲུབ་ཀྱི་གཞོན་སྐྱེས་ཕོ་སར་མང་པོས་སྐབས་འཕྲལ་ཟ་ཁང་དང་ཁཱོ་ཧྥེ་ཇ་ཁང་དུ་ལས་ཀ་བྱེད་བཞིན།མང་ཆེ་ཤོས་ཕྱི་རྒྱལ་བུ་མོ་རེ་ལ་འཕྲད་ནས་ཆ་རྐྱེན་བཟང་བོའི་རྒྱལ་ཁབ་ཅིག་ཏུ་བསྐྱོད་རྒྱུར་རེ་མོས་གནང་གི་ཡོད་རུང་།དེང་སང་དེ་སྔོན་ནང་བཞིན་ཕྱི་མོ་ཚུལ་ལྡན་ཚོར་བོད་པའི་ཕོ་སར་ལ་ཨ་སར་མེད་སྟབས།ལས་ཀ་དེ་རིགས་གནང་མཁན་ཕོ་སར་མང་ཆེ་བ་ཕྱོགས་གང་ཐད་ནས་གོ་སྐབས་དང་མཐུན་རྐྱེན་ཧ་ཅང་ཉམ་ཞན་ངང་གནས་ཏེ་མང་པོ་ཅིག་བློ་སྟོབས་ཉམ་ནས་བོད་ནང་ལོག་པ་དང་།རེ་ཟུང་འདོད་པ་ཐོག་བབ་ངང་ཕྱི་མོ་རེར་གཉེན་སྒྲིག་གིས་ཕྱི་རྒྱལ་ལ་ཐར་པ།ཡང་ལེ་ལོ་ཅན་ཁ་ཤས་མི་ཚེ་དེ་འདྲའི་ངང་རྫོགས་འགྲོའོ།།
འོན་ཀྱང་དེ་ཚོ་ལས་བོད་ནང་འགྲོ་མཁན་ཙམ་མ་གཏོགས་རིགས་གཞན་གཉིས་ཀ་ཕལ་ཆེར་འཕྲོ་བརླག་འགྲོ་ཀི་ཡོད།གཉིས་པ།དགུང་ལོ་ཆུང་དུས་
བོད་ནས་རྒྱ་གར་དུ་ཕེབས་ཏེ་བོད་ཁྱིམ་སོགས་ལ་འཛུལ་ཞུགས་ཀྱི་སློབ་ཕྲུག་མང་པོར་ལུས་སེམས་འཚར་ལོངས་བརྒྱུད་རིམ་ནང་།ཤ་ཚ་དང་སློབ་གསོ་ཉམས་མྱོང་རྒྱུས་སྟོན་མཁན་གྱིས་མ་འདང་བ་དང་།ཕྱི་ཟས་གོས་གནས་མལ་གྱི་མཐུན་རྐྱེན་ཞན་དབང་གིས་སློབ་སྦྱོང་ལ་དང་དོད་མེད་པར་དུས་མ་རན་གོང་ནས།དགའ་རོགས་སྒྲིག་པ་དང་སློབ་གྲྭའི་ནང་མྱོས་རྫས་འཐུང་པ།
རིམ་པར་སྤྱི་ཚོགས་སྟེང་གི་འདོད་ཡོན་ལ་འགྲམ་ཆུ་ལྡང་ནས་ཕྱི་ལ་འཐོན་དུས།ནར་མ་སོན་པའི་བྱིས་བློ་དེས་ཁ་ཕྱོགས་དང་དམིགས་འབེན་ཅི་གང་མེད་པར་བག་མེད་རྩིང་སྤྱོད་འཁྱར་འཁྱོར་གྱི་ངང་གང་འཚམ་ནས།རྡ་སའི་
སྤྱོད་པ་རྩིང་ལ་མྱོས་རྫས་ཉལ་ཐ་གང་བྱུང་འཐེན་མཁན་ཡུལ་བསྐོར་བ་ཚོ་དང་ཁ་ཐུག་གིས་མི་ཚེ་ཡོངས་འཕྲོ་བརླག་འགྲོ་གི་ཡོད།འདིའི་རིགས་རྡ་ས་ན་བོད་པ་ཕོ་སར་ཧ་ལམ་བརྒྱ་ཚོ་བརྒལ་བ་ཡོད་པ་ལས་ཁོང་ཚོར་ལས་ཀ་མེད་པར་བག་གཡེང་འཆལ་སྤྱོད་ཁོ་ནའི་ནང་འཐོམས་ཡོད་ཙང་།དགུང་མོ་རྐུན་འཕྲོག་གི་དོན་རྐྱེན་མང་པོ་ལྷག་གི་ཡོད་ལ།ཡ་མཚན་པོ་ཅིག་ནི་མི་འདི་ཚོར་མྱོས་རྫས་དབང་གིས་ཡིན་ནམ་སེམས་ཁམས་འཚར་ལོངས་མ་བྱུང་བ་གང་ཡིན་མ་ཤེས་མོད།ཁོང་ཚོ་ལོ་རྒན་༤༠བརྒལ་བ་ཚོའང་སེམས་ཁམས་དང་སྤྱོད་ཚུལ་ཕྲུག་ཆུང་དང་གཅིག་པ་རེད།གང་ལྟར་འདི་རིགས་བརྒྱ་ཆ་༨༠བརྒལ་བ་མཐའ་སྔ་ནད་མནར་གྱིས་འཕྲོ་བརླག་འགྲོ་གི་ཡོད།
གསུམ་པ་བོད་ནས་ཡོང་བ་དང་སློབ་གྲྭ་ཁག་ནས་འཐོན་པ་བུ་མོ་ལོ་ཆུང་མང་པོ་སེམས་ཁམས་དང་སྤྱོད་ལམ་ཆ་རྡ་སར་གང་འཚམ་འཕྲོ་བརླག་འགྲོ་གི་ཡོད།འོན་ཀྱང་།གཞོན་སྐྱེས་ཕོ་རྣམས་དང་བསྡུར་ན་དེ་ཙམ་ཉེན་འགན་ལྗི་མོ་མིན་རུང་།རྩ་བ་རྡ་སར་བོད་མོ་ན་གཞོན་མང་པོ་ཡོད་ཀྱང་སྟབས་ཡག་པོ་ཅིག་ལ་ཁོང་ཚོར་བོད་པ་བུ་ནང་བཞིན་འཚོ་གོས་ཀྱི་དཀའ་ངལ་ཅན་ཉུང་ཙམ་ཡིན།བར་ལམ་ནས་བོད་མི་ཕོ་ཧྲེང་དང་གྲྭ་ལོག་མང་པོ་ནུབ་ཕྱོགས་སུ་སླེབས་ཐུབ་པ་དེས་རྒྱ་གར་དང་བལ་ཡུལ་གྱི་བོད་མོ་ལོ་ཆུང་མང་པོར་ཉིན་རེའི་འཚོ་གོས་དཀའ་ངལ་སེལ་ཡོད།དེ་ནི་ནུབ་ཕྱོགས་སུ་སྤྱིར་ཤར་གླིང་གི་མི་དང་དགོས་སུ་ཕྱི་མི་གཞིས་སྤོས་པ་ཚོས་སྐྱེས་དམན་འཚོལ་རྒྱུ་ལས་སླ་བོ་ཅིག་མིན་པ་ཁོང་ཚོའི་སེམས་ནང་གསལ་ཐིང་ཡོད་རྐྱེན།གྲོགས་ཉེ་དུ་ཁག་ལ་མངགས་བཅོལ་སྒོས་རྒྱ་བལ་བོད་གསུམ་ནང་བུ་མོ་ཅིག་གཏན་གྲོགས་སུ་བཙལ་གང་ཐུབ་བྱས་ཏེ་ཕྱི་རྒྱལ་ལ་ལེན་ཐབས་གནང་གི་ཡོད།
ཡིན་ནའང་།ཕྱི་བསྐྱོད་ཡིག་ཆ་paper works་མཇུག་གྲུབ་དང་དབྱིན་
སྐད་སྦྱོང་བརྡར་སོགས་དུས་ཡུན་རིང་པོའི་བརྒྱུད་རིམ་ནང་།བུ་མོ་ཚོར་ཕྱིའི་ཁྱོ་ཀ་དེས་ཟླ་རེར་ཨ་རི་དང་ཡོ་རོབ་སྒོར་བརྒྱ་ཕྲག་འགའ་ནར་གཏོང་ཡིན་ཙང་།དེང་སང་རྡ་སར་ཞིབ་ཚགས་ངང་ཉམ་འཇོག་ཙམ་བྱས་ན་དབྱིན་ཡིག་འཛིན་གྲྭའི་སློབ་ཕྲུག་བརྒྱ་ཆ་༩༠གྲྭ་པ་དང་བུ་མོ་ཡིན་ཞིང་།ཡུལ་བསྐོར་བ་ཚོས་ཨ་མཚར་སྤྲོ་གསེང་གནང་ས་དབྱིན་སྐད་ཁ་བརྡ་འཛིན་གྲྭ་ལྟ་བུ་གོ་སྐབས་འདྲ་མིན་བརྒྱུད།བསམ་བློ་གུ་ཡངས་དང་དེང་རབས་ལ་རྔམ་པའི་གྲྭ་པ་མང་ཤོས་མར་ལོག་དང་།བུ་མོ་མང་པོས་མཚར་འདོད་དང་ཨ་གསར་ཅི་ཡིན་གང་ལྟར་ཡུལ་བསྐོར་བ་ཕོ་སར་འདྲ་མིན་ལ་ལྐོག་ནས་ལུས་འབྲེལ་གྱིས་དུས་ཐོག་གཅིག་ལ་ཡུལ་བསྐོར་ཕོ་སར་༣ནས་༤ཉར་མཁན་ཡང་མང་པོ་ཡོད་ཅིང་།དེ་འདྲ་འཚོ་གོས་ལ་སེམས་ཁྲལ་མེད་པར་ལྐོག་སུད་ཀྱིས་
མི་རིགས་མི་གཅིག་ཁྱོ་ཀ་གང་འདོད་བརྗེ་སྤོར་ངང་འདོད་ལས་ཁོ་ན་ཙམ་གཉེར་བཞིན་པ་དེས།བུ་མོ་ཚོར་མགོ་བདེ་དང་གཡོ་སྒྱུ་གཞན་བརྟེན་དང་ཁྲེལ་མེད་མི་བེད་སྤྱོད་གཏོང་རྒྱུ་སོགས་གཤིས་སྤྱོད་ལ་འགྱུར་ལྡོག་ཆེན་པོ་ཐེབས་ནས།ཕྱི་རྒྱལ་དུ་ཐར་རྗེས་ཁྱོ་ཀ་གཡུག་རྐྱང་གི་དོན་རྐྱེན་ལྷག་གི་ཡོད་པས་ད་ཆ་བུ་མོ་ཚོའི་ཉེ་འབྲེལ་ནང་མི་དང་ཁྱོ་ཀའི་བར།ཕྱི་རྒྱལ་ཐར་རྗེས་བུ་མོས་ཁྱོ་ཀ་མི་གཡུག་རྒྱུར་ཕན་ཚུན་ཆོད་ཡིག་འཇོག་མཁན་ཡང་བཙན་བྱོལ་ནང་མང་པོ་བྱུང་བཞིན་པ་རེད།།
དེ་མིན་རྡ་ས་འདིར་རྒྱ་གར་བ་དང་བོད་མིའི་འབྲེལ་ལམ་གནས་སྟངས་ཡང་ཧ་ཅང་ཛ་དྲག་ཡིན་རུང་།གནས་ཚུལ་དེ་ཚོ་འདི་ཁུལ་བོད་མི་རྣམ་པར་མྱོང་པ་མངོན་གྱུར་ཡིན་པས་ཡིག་ཚོགས་ལ་འཇིགས་ཏེ་འབྲི་རྒྱུ་མིན།གང་ལྟར་གོང་གི་གནས་ཚུལ་དེ་ཚོར་བོད་མི་སྤྱི་སྒེར་དང་ཚོགས་པ་ཁག་ཚང་མས་ཐུགས་ཞིབ་གནང་སྟེ་བོད་གཞོན་རྣམས་འཕྲོ་བརླག་མི་འགྲོ་ཐབས་སུ།གཞོན་སྐྱེས་ཚོར་རང་གི་འཇོན་ནུས་ལ་དཔག་པའི་སློབ་སྦྱོང་དང་ལས་ཀའི་གོ་སྐབས་སྐྲུན་ཐབས་འབད་བརྩོན་དང་།བོད་མིའི་སྒྲིག་འཛུགས་ནས་ཛ་དྲག་གིས་བོད་གཞོན་སྤྱི་དང་དགོས་སུ་རྡ་ས་ཁུལ་དུ་ཞིབ་འཇུག་ཚོགས་ཆུང་ནུས་འཐོན་ཅིག་བཙུགས་ནས།གཞོན་སྐྱེས་ཚོའི་ཕྱོགས་གང་ཐད་དཀའ་ངལ་སེལ་ཐབས་གང་དྲག་གནང་དགོས་རྒྱུ་དང་དམིགས་བསལ་རྒྱ་གར་ཡུལ་མི་དང་བོད་མིའི་བར་དོན་དམ་མཐུན་ལམ་ཅིག་ཡོང་རྒྱུར།འབྲེལ་ཡོད་ཚོགས་སྡེ་ཁག་གིས་ཐབས་ཤེས་ནུས་འཐོན་ཅིག་གནང་རན་ཡིན་ཞིང་།ལར་རྒྱ་གར་དང་བོད་མི་བར་དཀའ་རྙོག་གང་བྱུང་ཡུལ་ཁྲིམས་ཀྱིས་ཐག་གཅོད་ཀྱི་ལམ་ཁ་ཅིག་ངེས་སྟོན་ཐུབ་ན་ཕན་ཁྱད་ཆེ་བ་བཅས།རྡོ་དོན་གནད་དོན་དེ་ཚོར་གང་མགྱོགས་གཞུང་སྒེར་གཉིས་ངོས་འགྱུར་བ་གཏོང་ཐབས་མ་གནང་ན།དེས་བོད་མི་སྤྱི་ལ་གྱོང་རག་བཞིན་པ་དང་འབྱུང་འགྱུར་ཡང་གྱོང་ཚབ་ཆེན་རག་ཉེན་གདའ་སྙམ།།
ཨོ་་་་་་་་ངོ་མ་རྒྱུས་ལོན་དང་ཞིབ་འཇུག་གིས་ཞིབ་ཕྲ་རུ་རྡ་སའི་ཉེན་ཁ་ཞིག་ཐེར་འདོན་འདི་ལྟར་བྱས་ཀྱང་།་་་རྗོད་ཚིག་འདི་དག་གི་འོག་གི་བརྗོད་གཞི་ཁོ་དང་ཁོ་མོ་ཚོ་ནི།་་་་་ད་དུང་འདི་ལྟར་ཆང་དང་ཐ་མག་་་་ཤོ་རྩེད་རྒྱན་འཇོག་ངང་རང་མགོ་རུལ་བའི་དྲི་ངན་སྣ་ཡིས་མི་ཚོར་བར་ཡོད་པ་ལས་དུས་ལ་བབ་པའི་སྨན་ཁབ་ཀྱི་གཏམ་འདི་ཡེ་ནས་མཐོང་ཐོས་མི་འགྱུར་བར་སེམས།
གང་ལྟར་ཉེན་གནས་ལ་ཉེན་བརྡ་གཏོང་མཁན་ཁྱོད་ལ་རང་རེའི་གཞོན་རབས་པ་དང་མ་འོང་སོན་རྩའི་ངོས་ནས་ཉེན་སྐྱོབ་འབོད་སྒྲ་འདི་ལྟར་བསྒྲགས་པ་ལ་ཐུགས་རྗེ་ཆེ་ཞུས་པ་ཡིན་ནོ།།
གནས་ཚུལ་དེ་རིགས་ལ་རྒྱུ་མཚང་ཕྱི་ནང་གཉིས་ཀྱི་ཐོག་ནས་དྲངས་རྒྱུ་ཡོད།
དཔེར་ན། ༡༩༩༠ཡི་ནང་ལ། བོད་ནས་ཡོང་མཁན་མང་ཆེ་བ་སྦི་རི་སློབ་གྲྭར་བརྫངས་པ་རེད། སློབ་སྟོན་དང་ལམ་སྟོན་བྱེད་མཁན་མང་པོ་འདུག་རུང་། དེ་དག་གི་འོག་ལ་འགྲོ་འདོད་མེད་པ་ཤ་སྟག་རེད། དཔེར་ན་ཁམས་ནས་ཡོང་མཁན་གསར་འབྱོར་བ་ཚོར་ཆ་བཞག་ན། སློབ་སྟོན་པ་འཇུ་ཆེན་ཐུབ་བསྟན་རྣམ་རྒྱལ་དང་། སྤྱི་འཐུས་ཡིན་མཁན་ཁམས་པ་བསོད་ནམས་སྟོབས་རྒྱལ། རྙིང་མའི་བླ་མ་ཡིན་ལ་སྤྱི་འཐུས་ཡིན་མཁན་སྤྲུལ་སྐུ་ཨུ་རྒྱན་སྟོབས་རྒྱལ། དེ་བཞིན་ཨ་མདོ་བ་ཚོར་ཨ་ལགས་འཇིགས་མེད་དང་། མེག་ལོར་གྱི་ཟ་མཁང་བདག་པོ་ཨ་མདོ་ཆོས་འབྱོར། ས་དབང་རྒྱ་ལོ་དོན་གྲུབ། ད་དུང་ཨ་མདོ་བ་བཟོད་པ་རྒྱ་མཚོ་སོགས་རེད། དབུས་གཙང་ལ་ལམ་སྟོན་པ་གཙོ་བོ་ནི་ཞེ་བོ་བློ་བཟང་དར་རྒྱས། སྐུ་སྒེར་དྲུང་ཆེ་རྟ་ར་བ་བསྟན་འཛིན་ཆོས་ཉིད་སོགས་རེད།
ཁོང་རྣམས་ཀྱིས་རང་རང་གི་འཇོན་ཚོད་དང་ནུས་པར་ལྟོས་པའི་སློབ་གསོ་དང་ལམ་སྟོན་བྱས་ཡོད་རུང་། དེའི་ནང་ནས་བརྒྱ་ཆ་ལྔ་བཅུ་དངོས་གནས་བོད་སྤྱི་ལ་ཕན་གྱི་ཡོད་རུང་། བརྒྱ་ཆ་ལྔ་བཅུ་ཆོལ་ཁ་དང་ཆོས་ལུགས་ཀྱི་འཐེན་ཁྱེར་ལ་གནོད་པའི་སློབ་གསོ་ཤ་སྟག་རེད།
ཁ་ཞེ་གཉིས་མེད་ཀྱི་གཞོན་སྐྱེས་ཀྱི་མདུན་ལམ་དང་བོད་སྤྱི་པའི་ཆེད་དུ་མི་སྣ་གསོ་སྐྱོང་གནང་མཁན་དེ་ནི་གྲི་བཅུ་གྲངས་བཙུགས་ནས་བཀྲོངས་སོང་། ཁོང་ནི་ཚད་ཉིད་ཀྱི་དགེ་བཤེས་རྒན་བློ་བཟང་རྒྱ་མཚོ་ཞུ་བ་དེ་རེད། རྒན་དེས་བོད་ཆོལ་ཁ་གསུམ་དང་ཆོས་ལུགས་རིས་མེད་ཀྱི་ཆིག་སྒྲིལ་ལ་གཙོ་བོ་ཤུགས་བརྒྱབ་ནས་ཨ་མདོ། ཁམས་པ། དབུས་པ་སོགས་ན་གཞོན་མང་པོ་གསོ་སྐྱོང་གནང་སོང་།
དོལ་རྒྱལ་བ་ཚོས་ཁ་གཏད་ཟད་ནས་ཁོང་ལ་གྲི་བརྒྱབ་ནས་བཀྲོངས་སོང་བ་དེས་དོལ་རྒྱལ་བ་ཚོ་ངོ་མ་བོད་ཀྱི་ཁེ་ཕན་ལ་རྩ་བ་ནས་རྒྱབ་འགལ་བྱེད་མཁན་གྱི་རིགས་ཤིག་ལ་མཐོང་སོང་།
དེ་འདྲའི་ཞེད་སྣང་ལ་ཨང་།
རྒན་བློ་བཟང་རྒྱ་མཚོའི་མིང་ཐོས་སྐབས་ངུ་ཤོར་ཡོང་གི་འདུག་། རྒན་དེ་མཐོ་དཔོན་ལ་མགོ་བོ་མི་བཞུམ། དམའ་སྤྲང་པོར་མཐོང་ཆུང་མེད་མཁན། མཉམས་རང་གི་རོགས་ཚོར་ཕྲ་མདོག་མེད་མཁན་རང་སེམས་རང་འོག་ཏུ་བཅུན་ཐུབ་པའི་ཆོས་པ་ངོ་མ་ཞིག་རེད། ངས་རྒན་གྱི་སྐད་ཆ་འགའ་འདིར་དྲངས་ཆོག
༼ཁ་སང་རྒྱལ་བ་རིན་པོ་ཆེར་མཇལ་ཁའི་སྙང་གསེང་ཞུས། ཡང་བསྐྱར་སྙན་གསེང་ཞུས་ནས་ཕྱིར་འཐེན་བྱས་པ་ཡིན། སེམས་ནང་ལ་ད་རེས་རྒྱལ་བ་རིན་པོ་ཆེ་མཇལ་དུས་མཚན་ཉིད་གྲྭ་ཚང་གི་བྱས་རྗེས་རེ་གཉིས་ཤོད་འདོད་སྐྱེས་ནས་ཡང་སེ་སྣང་བར་སྐད་ཆ་དེ་ཚོ་དྲན་གྱི་འདུག། ཆོས་ལོག་གི་བསམ་པ་ཤར་ཙང་དེ་མ་རུང་བ་རེད། བྱས་ཙང་མེད་པ་བཟོས་པ་ཡིན་གསུངས་། ༽
༼ཨུ་རུ་སུའི་སྦྱིན་བདག་ཡིན་མཁན་ཚོར་ཁ་ལག་བཏང་དུས་སེམས་ནང་ལ་སྐད་ཆ་སྙན་པོ་འཁོར་ཡོང་གི་འདུག་བྱས་ཙང་ལམ་གསེང་དི་རིང་གཟུགས་པོ་བདེ་པོ་མིན་འདུག་ལབ་ནས་སྐད་ཆ་མང་པོ་བཤད་མེད། ༽
བོད་མི་རིགས་རྩ་སྟོང་དུ་འགྲོ་མི་འགྲོ་གཙོ་བོ་སོ་སོའི་ཁྱིམ་ཚང་གི་ཕ་མ་ནས་འགན་ཞིག་ཁུར་དགོས་པ་དང་། འདི་ལྟར་སྤྱོད་ལམ་བག་མེད་ཀྱི་དབང་དུ་སོང་ནས་ནམ་ཞིག་ན་བོད་མི་རིགས་ཡིན་མིན་ངོ་ཐག་མི་ཆོད་པ་ཞིག་འབྱུང་ཉེན་ཆེ་བས། བོད་ནང་དང་མི་འདྲ་བར་བཙན་བྱོལ་ཁྲོད་ཀྱི་བོད་ཕྲུག་ཡིན་ཟེར་མཁན་ཁྲོད་ན་རྒྱ་གར་གྱི་གདོང་པ་འདྲ་བོ་དང་མགོ་སེར་འདྲ་བོ་གང་མང་མཐོང་རྒྱུ་ཡོད་པ་སེམས་ཁྲལ་སྐྱེས་གཞི་ཞིག་རེད། ལྗེའུ་མི་རིགས་ཚོ་གཞན་གྱི་གཉའ་གནོན་གྱི་འོག་ནས་ལོ་ངོ་སྟོང་ཕྲག་རིང་ཁ་འཐོར་དུ་གནས་ཀྱང་རང་གི་མི་རིགས་ཀྱི་ངོ་བོ་གསོན་པོར་གནས་ཐུབ་པ་ནི། ཁོ་ཚོ་ལ་ཆོས་ལུགས་ཀྱི་ཤུགས་རྐྱེན་འོག་མི་རིགས་གཞན་ལ་ཆང་ས་བརྒྱབ་མི་ཆོག་པ་བཟོས་ཡོད་པས་རེད། འདི་ལྟར་བོད་ཕྲུག་མང་པོ་མི་རིགས་གཞན་དག་ལ་འཆལ་སྤྱོད་མུ་མཐུད་སོང་ན་ལོ་ངོ་བརྒྱ་ཕྲག་གཅིག་གི་རྗེས་ནས་ཧ་ལམ་བཙན་བྱོལ་བོད་མི་བརྒྱ་ཆའི་ལྔ་བཅུ་མི་རིགས་ཀྱི་གཞན་གྱི་ནང་དུ་འཐིམ་འགྲོ་བའི་ཉེན་ཁ་མཐོང་གི་འདུག ང་ཚོས་སོ་སོའི་མི་རིགས་ཀྱི་ཆེད་དུ་འཐབ་རྩོད་བྱས་པ་དོན་མེད་ཆགས་འགྲོ་བ་མ་རེད་དམ། རྩོམ་པ་པོ་མང་པོ་ཞིག་གི་མདུང་རྩེ་དགོན་པ་ཁག་ལ་གཏོད་པ་ལས་འདི་འདྲའི་གནས་ཚུལ་སྤེལ་ནས་སྐྱ་བོ་དག་ལ་གོ་བརྡ་གསལ་བོ་ཞིག་སྤྲད་ན་མི་བཟང་ངམ།
རྡོ་རྗེ་བདུད་འཇོམས་ནས་ཅི་རྫོ་ལེ་རེད།རྒྱུ་མཚན་གང་ཡང་མེད་པའི་རི་བོང་གནམ་རྡིབ་རང་རེད།
མི་སྣ་འདྲ་མིན་འདུས་ས་ནས་མི་ཡག་སྡུག་མང་པོ་ཡོད་པ་ཆོས་ཉིད་རེད་ལོ།དེ་འདྲ་འཛམ་གླིང་ཤར་ནུབ་གང་དུའང་ཡོང་གི་ཡོད་རེད།ང་ཚོ་གཅིག་པུ་ཙམ་མ་རེད་ལོ།།།།
ངའི་མཆན་དེ་འགྲོ་ཤེ་མི་གདའ།།
གོང་ན་བྲིས་ཡོད་པའི་སྐད་ཆ་ཚང་མ་བདེན་བ་རེད ཡིན་ནའང་སྐྱོན་ཁོ་ན་བཤད་ནས་མི་ཕན་པ དེ་བཅོས་བསྒྱུར་བྱེད་པའི་ཐབས་གང་ན་ཡོད། མ་གཞི་ང་ཚོ་བོད་མི་བྱིངས་ལ་སྐྱོན་ཆེན་པོ་ཞིག་ཡོད་པ་ནི་སྐྱོན་བཤད་པ་ལས་དེ་སེལ་བར་བྱེད་པའི་ཐབས་མི་འཐེན་པ་དེ་རེད
མོ་གཅིག་གིས་ཕོ་གསུམ་བེད་སྤྱད་ཚུལ་རྒྱལ་ཁབ་གཞན་པའི་ལུགས་སྲོལ་ཡིན་པའི་དབང་དུ་གཏང་ན་
མོ་གཅིག་གིས་ཕོ་བཞི་ཙམ་དུས་གཅིག་ཏུ་བེད་སྤྱོད་གཏང་གི་ཡོད་ན་དེ་ཡ་མཚར་བ་ཞིག་རེད་ཡ།
ཡིན་ཡང་ཁོ་བོ་ཐང་རྒྱ་ཞན་པས་ཡིན་ན་ཆོག། ཧཧཧཧ
ད་བལྟས་ནས་སོང་ན་གཞིས་ཆགས་ཁག་གི་ནང་བོད་ཀྱི་རིག་གཞུང་ལ་དེ་ཙམ་གྱིས་དོ་སྣང་ཡོང་གི་མེད་པ་འདི་ཡང་ཉེན་ཁ་ཞིག་རེད། སློབ་སྦྱོང་ཐོན་ཚར་བའི་གཞོན་སྐྱེས་གང་མང་ཞིག་སོ་སོའི་ལྟོ་རྒྱབ་གཅིག་བུའི་ཆེད་དུ་ལས་རིགས་གཞན་དག་གཉེར་བས་མི་རིགས་ཀྱི་འཐབ་རྩོད་ག་ལེར་གཏིང་བརྗེད་དུ་འགྲོ་བ་དང་། ག་དུས་ཡིན་ཡང་བོད་ཀྱི་རིག་གཞུང་དང་སྐད་ཡིག་སྐོར་གྱི་སྐད་ཆ་ཤོད་མཁན་ཕལ་ཆེ་བ་གྲྭ་ཟུར་དང་གྲྭ་བ་དག་ཡིན་པས་ཀྱང་ཤེས་ཐུབ། གོང་ས་མཆོག་གིས་གཞིས་གྲོང་ཁག་ལ་བོད་ཀྱི་སྐད་ཡིག་དང་རིག་གཞུང་ལ་ཤུགས་སྣོན་རྒྱག་དགོས་བའི་བཀའ་མོལ་རབས་དང་རིམ་པ་མང་པོ་ཞིག་གནང་སོང་ལ་རྣ་རྒྱབ་ཀྱི་བསེར་བུ་བཞིན་དུ་གྱུར་བས་ལག་ལེན་དུ་འདེབས་མཁན་དཀོན་པོ་ཆགས་ཡོད་པ་དང་། མི་རབས་རྗེས་མ་རྣམས་ལ་བོད་ཀྱི་རིག་གཞུང་གི་དྲི་མི་བྲོ་བ་ཞིག་འབྱུང་ཉེན་ཆེ་བས་ད་ལྟ་ནས་དེའི་སྐོར་ལ་བསམ་གཞིགས་གནང་ན་དགེ་མཚན་ཆེ། དེ་མིན་ང་ཚོ་ལ་འགྱོད་པ་རྟས་མི་ཟིན་པ་ཞིག་ཡོང་ངེས་རེད་དོ།།
གོང་ན་ཁ་ཤས་ནས་ཐབས་ལམ་བསྟན་མི་འདུག་ཅེས་གསུང་འདུག་པ་ཐུགས་ཉམས་མ་བཞག་རེད།རྡོ་རྗེ་བདུད་འཇོམས་ནས་ཐབས་གསལ་ཐག་ཆོད་བཤད་འདུག་་་མཇུག་གི་བསྡོམས་ཚིག་ཏུ་འབོད་སྐུལ་དང་བཅས་ཏེ་གསུངས་འདུག་་་་འོན་ཀྱང་ལག་བསྟར་དུ་འདེབས་མིན་སྤྱི་སྒེར་ཁོ་རང་ཚོར་ཐུག་ཡོད།