ས་གནས་ནས་ཐུབ་རྒྱལ་གྱིས།
ཁ་སང་ཕྱི་ཚེས་༢༨བོད་རྒྱལ་ལོ༢༡༣༨བོད་ཟླ་བརྒྱད་པའི་ཚེས་གཅིག་ཉིན། འདི་གར་གྱེས་ཀྱི་གདན་ས་ར་པུར་ས་སྐྱ་ཆོས་སྒར་དུ་བརྩེ་ཆེན་བསྟན་པའི་མངའ་བདག་དཔལ་ས་སྐྱའི་ཁྲི་ཐོག་ཞེ་གཅིག་པ་ཆེན་པོ་མཁའ་མཉམ་སྐྱེ་འགྲོ་ཡོངས་ཀྱི་མགོན་དཔུང་དམ་པ་སྐྱབས་མཆོག་༸གོང་མ་བདག་ཁྲི་རིན་པོ་ཆེ་མཆོག་མི་འཇིག་འཇིགས་རྟེན་ཁམས་འདིར་སྐུའི་མཚན་དཔེ་གསར་དུ་བཞད་ནས་ཕྱི་ལུགས་ལྟར་དགུང་གྲངས་རེ་བདུན་དང་བོད་ལུགས་ལྟར་རེ་དྲུག་ལ་ཕེབས་པའི་སྐུའི་འཁྲུངས་སྐར་སྲུང་རྩི་ཞུ་གནང་སོང་། སྐྱབས་རྗེ་འཁོན་གདུང་སྐུ་གཞོན་རིན་པོ་ཆེ་མཆོག་གི་དབུས་པའི་ཆོས་སྒར་གྱི་འདུས་པ་སྤྱི་ནས་ཉིན་གསུམ་རིང་ཚེ་དཔག་མེད་ཆོ་གའི་སྒོ་ནས་བརྟན་བཞུགས་ཀྱི་སྒྲུབ་བཞགས་གནང་ནས་ཁ་སང་སྔ་དྲོ་ཚོུད་དགུ་པའི་ཐོག་མགོན་པོ་གང་ཉིད་ཕོ་བྲང་ནས་སྤྱན་རྒྱལ་སྤོས་དར་སོགས་ཀྱིས་སྣེ་དྲངས་ནས་བཞུགས་ཁྲིར་ཞབས་སུ་འཁོད་འཚམས་གསུང་ཆོག་དབུ་འཛུགས་གནང་རྗེས་འཁོན་གདུང་སྐུ་གཞོན་རིན་པོ་ཆེ་མཆོག་གིས་མནྜལ་རྟེན་གསུམ་འདེགས་འབུལ་དང་བཀྲིས་རྫས་བརྒྱད་དང་རྒྱལ་སྲས་སྣ་བདུན་སོགས་འདེགས་འབུལ་ཞུ་གནང་སོང་།དེའི་རྗེས་སྐྱབས་རྗེ་ངོར་ཀླུ་ལྡིང་མཁན་ཆེན་རིན་པོ་ཆེས་རྟེན་གསུམ་འདེགས་ཞུས་པ་དང་རིམ་བཞིན་དགོན་སྡེ་གྲྭ་ཚང་ཁག་དང་གཞན་ཡང་སྤུ་རུ་ཝ་ལ་ས་གཞིས་དང། ར་སྤུར། བདེ་སྐྱིད་གླིང་སོགས་ཀྱི་ས་གནས་མགོ་འཛིན་རྣམ་པ་དང་གཞུང་འབྲེལ་མིན་པའི་ཚོགས་པ་ཁག་བཅས་ཀྱིིས་འབུལ་ཚོན་དང་མཇལ་ཁ་བཅར་སོང་། དེ་རིང་གི་འཁྲུངས་སྟོན་མཛད་སྒོ་ལ་ཐེ་ཝན་དང་ནུབ་ཕྱོགས་བཅས་ཀྱི་དད་ལྡན་སློབ་མ་མང་པོ་ཞིག་ཀྱང་ཆེད་བཅར་གནང་འདུག་པ་མ་ཟད་ཕྱོགས་མཐའ་ཁག་ནས་ཆེད་ཕེབས་གནང་བའི་གྲྭ་བཙུན་མི་མང་བཅས་ཁྱོན་མི་མང་སྟོང་ཚོ་གཅིག་ཡས་མས་ཞིག་འདུ་འཛོམས་གནང་འདུག མཇལ་ཁ་གྲུབ་འཚམས་ཉིན་གུང་གསོལ་ཚིགས་ལ་རོལ་ནས་མཛད་སྒོ་རྒྱལ་ཁ་ངང་གྲུབ་སོང་། གཞིས་བྱེས་གཉིས་སུ་གནས་པའི་ས་སྐྱའི་དགོན་ཁག་ཚང་མས་རྣམ་པ་འདྲ་མིན་གྱི་ཐོག་ནས་འཁྲུངས་སྐར་སྲུང་བརྩི་ཞུ་གནང་བཞིན་ཡོད་འདུག
ཨོ་གོང་མ་རིན་པོ་ཆེ་ཡི་འཁྲུངས་དཀར་ལ་བཀྲ་ཤིས་བདེ་ལེགས་ཞུ།
ནམ་རྒྱུན་བོད་ལུགས་ལྟར་ན་ལོ་སྔོན་ལ་རྩི་བ་དང། ཕྱི་ལུགས་ལྟར་ན་རྗེས་སུ་འབྱུང་གི་ཡོད།
དཔེར་ན། བོད་ལུགས་ལ་བོད་ཟླ་བཅུ་གཉིས་པའི་ཚེས་གནམ་གང་ལ་སྐྱེས་པ་ཞིག་དེ་ཡི་ཕྱི་ལོའི་བོད་ཟླ་དང་པོའི་ཚེས་གཅིག་ཉིན་ཕྲུག་གུ་དེ་ལོ་གཉིས་སུ་རྩིས་སྲོལ་ཡོད།
ཕྱི་ལུགས་ལ་དེ་ལྟར་མིན་ཅིང་བོད་ཟླ་བཅུ་གཉིས་པའི་ཚེས་གནམ་གང་ལ་སྐྱེས་པའི་ཕྲུག་གུ་དེ་ལོ་རྗེས་མའི་བོད་ཟླ་བཅུ་གཉིས་པའི་ཚེས་གནམ་གང་ལ་མ་སླེབས་པའི་བར་དུ་ལོ་གཅིག་ཡིན་པར་འདོད་ཀྱི་མེད།
དེས་ན།
༼་ཕྱི་ལུགས་ལྟར་དགུང་གྲངས་རེ་བདུན་དང་བོད་ལུགས་ལྟར་རེ་དྲུག༽
དེ་གོང་འོག་ནོར་བ་མིན་ནམ།
སྐུ་ཉིད་ཀྱི་འཁྲུངས་སྐར་ལ་བཀྲིས་བདེ་ལེགས་གྲངས་མེད་ཞུ། ༸ས་སྐྱ་གོང་མ་རིན་པོ་ཆེ་མཆོག་ནི་ཡུན་རིང་བོད་ཀྱི་ཆབ་སྲིད་གཉིས་ཀའི་དོན་ལ་ཕྱག་ལས་ཧུར་བརྩོན་གནང་མཁན་ཞིག་ཡིན་པ་ཡོངས་གྲགས་སུ་བཤད་ཀྱིན་ཡོད། འདི་ནི་ངོ་མ་བདེན་པ་རེད། ཁྱེད་ལྟ་བུ་ཞིག་ཆོས་ལུགས་ཁག་ཚང་མའི་ནང་ནས་གང་མང་ཐོན་ཐུབ་པའི་རེ་བ་ཡོད།
སྐུའི་འཁྲུངས་སྐར་ལ་བཀྲ་ཤིས་བདེ་ལེགས་ཞུ་བ་ཆབས་ཅིག བསྟན་པ་དང་འགྲོ་བའི་དོན་དུ་སྐུ་ཚེ་ཞབས་པད་བསྐལ་བརྒྱར་བརྟན་པའི་གསོལ་འདེབས་སྨོན་ལམ་ཞུ།