དེ་རིང་གི་ཉི་མ།

སྐར་ཁྲི་བཙན།

དེ་རིང་གི་ཉི་མ།
རྒྱལ་གཅེས་དཔའ་བོའི་ཡོད་ཚད་གངས་རིའི་ཆེད།།
རྒྱལ་ཞེན་ཕུ་ནུའི་ཐམས་ཅད་ཁ་བའི་དོན།།
ཁ་བ་གངས་ཀྱི་འཁྱུད་པའི་ཕ་ས་དེར།།
ཕྱི་ནང་ཕུ་ནུས་རྡོག་ས་སྒྲིལ་དུས་ཀྱང་།

དེ་རིང་གི་ཉི་མ།
རྒྱལ་གཅེས་དཔའ་བོའི་དུར་ས་གངས་རིའི་ལྗོངས།།
རྒྱལ་ཚོང་ནང་རུལ་འཛུལ་ས་བཙན་བྱོལ་ཁྲོད།།
ཕྱི་དགྲ་ནང་དགྲ་གཉིས་ཀྱི་སོ་ཁ་ན།།
ལས་ངན་བོད་མིའི་ཚེ་སྲོག་རྟ་ལྔ་བོ།།

དེ་རིང་གི་ཉི་མ།
རྒྱལ་གཅེས་དཔའ་བོའི་སྐུ་ལུས་མེ་ལྕེའི་དབུས།།
རྒྱལ་བཙོང་ཚོང་གི་མ་རྩ་སྐྱབས་བཅོལ་ཁྲོད།།
ཕྱི་དགྲ་ནང་དགྲ་གཉིས་ཀྱི་དཀྲུགས་ཁ་ན།།
བོད་པའི་ཚེ་སྲོག་རླུང་ཁའི་མར་མེ་བོ།།

དེ་རིང་གི་ཉི་མ
གདོང་དམར་དཔའ་བོའི་ལུས་སྲོག་མེ་དཔུང་དང་འགྲོག་ཅིང་།།
བདེན་པའི་གད་རྒྱངས་ཕྱོགས་བཞིའི་གླེང་ཆེན་དུ་ལྷང་དུས།།
སྡར་མ་ངོ་གཉིས་མ་ཡི་ལྟོ་རྒྱབ་ཀྱི་ཆེད་དུ།།
དགྲ་བོའི་འཐབ་ཕྱོགས་པ་ལ་མཐུན་རྐྱེན་ཞིག་སྒྲུབ་དུས།།

དེ་རིང་གི་ཉི་མ།
གངས་རིའི་དཔའ་བོའི་རང་གི་ཡོད་ཚད་དེ་གཏོང་ཞིང་།།
རེ་བའི་ཅོང་བརྡ་རི་རྒྱལ་ཁུངས་གསེང་ན་ལྷང་དུས།།
ཕྱི་དགྲ་མི་ཐུབ་ནང་ལ་ཁ་བཙན་རང་ཆེ་བས།།
བོད་མིའི་སྒྲོག་འཛུགས་གཏོར་བའི་ཁོག་ངན་ཞིག་འཆང་དུས།།

དེ་རིང་གི་ཉི་མ།
ཕྱི་ནང་རྒྱལ་སྐྱོབ་པ་ཡི་ལག་རྡང་ཞིག་སྦྲེལ་ཞིང་།།
འདྲ་མིན་སྲིད་ཀྱི་སྟེགས་ནས་འཐབ་རྩོད་ལ་བྲེལ་དུས།།
དམར་པོའི་གཡོག་གླར་ཆགས་པའི་རྒྱུག་ཁྱི་ཡི་ཚོགས་ཀྱིས།།
གདོང་ལྤགས་མཐུག་པོའི་རང་མཚང་ཕྱི་ལོག་ལ་མངོན་དུས།།

དེ་རིང་གི་ཉི་མ།
ཕ་ས་གངས་ལྗོངས་ན་དཔའ་བོའི་རང་གཟུགས་ཤིག་ངོམ་དུས།།
གཞན་ས་མི་ཡུལ་ནས་བདེན་པའི་རྒྱབ་རྩ་ལ་ལང་དུས།།
ཁྲེལ་ཡོད་མི་བུ་ཡི་རང་ནུས་མི་རིགས་ལ་དབང་དུས།།
ངོ་ཚ་མི་ཤེས་པའི་ཡོད་ཚད་དགྲ་བོ་ལ་དག་དུས།།