བོད། ལྷ་ཀླུ་གཉན་གསུམ།
ཉི་མ་འདི་དག གོ་ན་མི་འདོད་པའི་གཏམ་དག་ནི་མྱ་ངན་གྱི་རོལ་དབྱངས་ཤིག་རེད། དེ་ནི་བོད་ནས་མཆེད་དེ་འོང་བའི་གཅིག་རྗེས་གཅིག་མཐུད་དུ་འོང་བའི་མི་རིགས་ཤིག་གི་གསོན་གནས་ཆེད་དུ་འབར་བཞིན་པའི་དུས་རབས་ཉེར་གཅིག་པའི་ནང་གི་བོད་མི་རིགས་ཀྱི་ལོ་རྒྱུས་ཀྱི་ཀྱོག་མཚམས་གལ་ཆེན་ཞིག་གི་མེ་ལྕེ་དག་གཞོན་སྐྱེས་ཤ་སྟག་གི་ལུས་པོ་ནས་མཆེད་དེ་འོང་བའི་འཛམ་གླིང་ཟླུམ་པོ་འདིའི་སྟེང་གི་མི་སེམས་ཡོད་སུ་ཞིག་གི་གོ་ན་ཡིད་སྐྱོ་བའི་གནས་ཤིག་ལོས་ཡིན། ལྷག་དོན་དུ་བོད་ཀྱི་རིགས་སུ་སྐྱེ་བ་བླངས་པའི་བོད་མི་སྐྱ་སེར་སུ་ཞིག་གི་རྣ་བར་ཡིད་སྐྱོའི་གནས་ཚུལ་འདི་དག་གཅིག་རྗེས་གཉིས་མཐུད་དུ་སླེབས་དུས། ང་དང་འདྲ་བར་བསམ་རྒྱུ་དྲན་རྒྱུ་མེད་པར་གྱུར་ནས། ད་ནི་དུས་ཚོད་གང་ཞིག་ལ་སླེབས་ཡོད་དམ་སྙམ་ནས་རང་གིས་རང་ལ་དྲི་བ་འདོན་པའི་དུས་ཀྱང་ཤར་ངེས་ཡིན།
ངའི་སེམས་པ་འདི་ལྟར་འཚིག་ནས་ཡོད། སྙིང་ཁམས་ཀྱང་མི་བདེ་བར་གྱུར་སོང་། ཐག་རིང་ས་ཞིག་ནས་རང་དབང་ཡོད་ས་ཞིག་ནས། གནམ་འོག་ན་ཡ་ང་བའི་གདུག་རྩུབ་མྱོང་བཞིན་པའི་རིགས་མཐུན་གྱི་སྤུན་ཟླ་དག་གི་ཆེད་དུ། རྐ་ལག་གང་ཡང་འགུལ་བསྐྱོད་བྱེད་མ་ཐུབ་པར་དྲ་ངོས་སོ་སོ་ནས་གསར་དུ་ཐོན་བཞིན་པའི་གནས་ཚུལ་དག་ལ་བལྟས་ནས་སེམས་འཚིག་ནས་ཡོད། སེམས་འཚིག་སྟངས་འདི་ཡང་དངོས་ནས་ཁྱད་མཚར་ཞིག་རེད། མཚམས་རེར་རང་ཉིད་ཀྱི་ལག་པར་དར་ཆ་ཞིག་བཟུང་ནས་རྒྱ་ནག་སྲིད་གཞུང་གི་གཞུང་ཚབ་ཁང་གི་སྒོ་འགྲམ་དེར་སོང་ནས་ངུ་དགོས་སམ། དེ་ལྟར་ངས་ཉིན་མ་ག་ཚོད་ལ་བྱེད་ཐུབ་བམ། ཡང་ན། ཉིན་མ་ག་ཚོད་ཅིག་གི་རྗེས་སུ་རྒྱ་ནག་གཞུང་ཚབ་ཁང་གིས་བཀའ་བཀོད་འོག རྒྱལ་ཁབ་འདིའི་སྤྱི་བདེ་མི་སྣ་ཡིས་ང་རང་ཁྲིད་ནས་འགྲོ་སྲིད། གཅིག་བྱས་ན་ཆུ་ཚོད་ཁ་ཤས་ཀྱི་རྗེས་སུ་ང་རང་གང་ཞིག་ནས་ལུ་གུ་གླག་རྒོད་ཀྱི་བཟུང་བ་ལྟར་འཁུར་ནས་འབུད་འགྲོ་ན་ཐང་། དེ་དུས་ངས་བོད་ནང་གི་སྐྱེ་བོ་དེ་དག་གི་ཁ་ཆེམས་སྒྲུབ་པ་ཡིན་ནམ།
ངའི་སེམས་པ་འཚིག་ནས་ཡོད། དྲ་ངོས་སུ་བལྟས་ན། ནམ་རྒྱུན་ལྟར་བོད་ནང་གི་ལས་འགུལ་ལ་སྒུག་ནས་ཉིན་མ་ཁ་ཤས་དང་དུས་ཚོད་ཁ་ཤས་རིང་དུ་ལས་འགུལ་སྤེལ་མཁན་གྱི་ཚོགས་སྐྱིད་ཁག་ཡང་གྲགས་ནས་འོང་གི་འདུག དེ་དག་གིས་ཀྱང་གློ་བུར་དུ་མདུན་དུ་ཐོན་ནས། གློ་བར་དུ་ཡལ་འགྲོ་ངེས་ཡིན་ནམ། ང་དེ་དག་གི་རྗེས་སུ་འགྲེངས་ནས་ངས་རང་ཉིད་བོད་མི་ཞིག་ཡིན་པ་བདེན་དབུང་བྱེད་དགོས་སམ། དེ་མིན་ན། དབའ་རྒོད་ཁེར་རྒྱུགས་ཤིག་བྱས་ན། ཕན་ཐོག་པ་དང་འཛམ་གླིང་མི་མང་གཉིད་ལས་སད་ནས་བོད་མི་དེ་དག་སྙིང་རྗེ་བའི་ཡུལ་རེད་ཅེས་བཤད་ནས། བོད་མི་དག་ལ་རང་དབང་གི་རྒྱབ་སྐྱོར་བྱེད་དུ་འོང་སྲིད་དམ། དེ་ཡང་བོད་མི་དག་གི་ནམ་རྒྱུན་རྨིས་བཞིན་པའི་རྨི་ལམ་མ་ཡིན་ནམ། དོན་དངོས་ཐོག་བྱེས་གྱར་བོད་མི་དག་བོད་དོན་བྱེད་པ་དང་བོད་མི་མང་གི་རང་དབང་འཐབ་རྩོད་བྱེད་པའི་སེམས་ཀྱི་སྟོབས་ཤུགས་དེ་བོད་ནང་ནས་འབར་བཞིན་པའི་དུས་རབས་ཉེར་གཅིག་པའི་མེ་ལྕེ་དམར་པོ་དེ་དག་གི་སེམས་ཤུགས་ལས་ཚད་འཇལ་ན་ཅི་ཙམ་ཐོན་ཡོད་སྲིད་དམ།
གཅིག་བྱས་ན། ད་རེབས་ཀྱི་ལས་འགུལ་འདི་ནི། ཉིས་སྟོང་བརྒྱད་ལས་ཀྱང་ཁྱད་དུ་འཕགས་པ་ཞིག་དང་བོད་དོན་ཐག་གཅོད་ཡོང་བའི་གྲུབ་འབྲས་ཤིག་ཤར་ཡང་མི་སྲིད་མ་རེད། དེ་འདྲ་ཞིག་ཡོང་མིན་དེ་ནི་ཚོགས་སྤྱི་སྒེར་སུ་ཞིག་ནས་ལས་འགུལ་འགོ་བཙུགས་པ་ཡིན་ན། འགོ་བཟུང་བ་དེར་མཇུག་ཡོད་པ་དང་། མཇུག་དེ་ཡང་གྲུབ་འབྲས་ཡོད་པ་ཞིག་བཟོ་ཐུབ་པ་ཡིན་ན། གཟོད་ནས་ཤི་བའི་ཁ་ཆེམས་དང་གསོན་པོའི་ལག་རྗེས་བཅས་ཡོང་ངེས་ཡིན་པ་མ་ཟད། ཁ་བ་གངས་ཅན་པའི་ལས་དབང་ལ་འགྱུར་བ་ཞིག་འགྲོ་ཐུབ་མིན་དེ་ཡང་ཁ་བ་གངས་ཅན་པའི་མི་རིགས་རང་ཉིད་ལ་རེག་ལས་པ་ཚང་མས་ཐུགས་བསམ་ལེགས་པོ་བཞེས་ནས་ལས་འགུལ་དོན་སྙིང་ཡོད་པ་ཞིག་སྤེལ་བར་ངའི་སེམས་པ་འཚིག་ཞོར། སྙིང་ན་ཞོར། ཡིད་སྐྱོ་ཞོར། རང་ཉིད་བོད་མི་ཞིག་དུ་སྐྱེ་ནས་བོད་དོན་བྱེད་པར་གྲ྄་སྒྲིག་ཨང་གསར་གང་ཡང་མེད་པ་བཅས་ལ་འཁང་ར་དང་བཅས། བོད་རིགས་གང་ན་སུ་ཡོད་པ་ཞིག་གིས་བོད་དོན་དུ་ལས་འགུལ་གང་སྤེལ་བ་དེ་དག་གྲྭ་སྒྲིག་ཡོད་པ་ཞིག་སྤེལ་བར་སྙིང་ཐག་པ་ནས་འབོད་སྐུལ་ཞུས་པ་ཡིན། གཅིག་བྱས་ན། བཙན་བྱོལ་དུའང་རང་ལུས་མེ་རུ་སྤར་བའི་གཞོན་རབས་ཤིག་ཡོང་མི་སྲིད་པ་མ་རེད། དེ་དུས་ཚོགས་སྤྱི་སྒེར་བ་སོགས་ལ་དེ་དག་གི་ཚེ་སྲོག་གི་འབོད་སྐུལ་དེར་དང་ལེན་བྱེད་མིན་གྱི་བསམ་ཚུལ་དང་སྔོན་འགོག་གང་ཡོད་མེད་ཐད་དུ་ཐུགས་བསམ་ནན་གྱིས་བཞེས་རྒྱུ་མཁྱེན།
དྲ་གྲོགས་བོད་ལྷ་གླུ་གཉན་གསུམ་ལགས།
ཉིད་ཀྱི་ཁ་བྱང་དེ་༼སེམས་པ་ཚིག་སོང་། སྙིང་ན་ནས་འཆི་ས་རེད༽ཟེར་ནི་མ་རེད་དམ། ཁ་བྱང་གི་ཡིག་ནོར་ལའང་ཅི་མི་སྙམ་པར་བཏང་བས་ཅི་བྱའོ། འདི་ཡང་བདག་གཞི་མགྲོན་ཚང་མ་བསམ་པའི་ཁུལ་ཡིན།
…..སྤྱན་ཆབ་ཀྱིས།
སྤྱན་ཆབ་ལགས། ཁ་བྱང་ཐད་དུ་ཉིད་ནས་གསལ་བཤད་བྱས་པ་དེར་བཀའ་དྲིན་ཆེ་ལགས།