༄༅།།རིགས་ཞེན་གྱི་ཟུངས་ཁྲག་བཞུར་ཅིང་ཤེས་རིག་གི་འདབ་མ་བཞད་ཀྱིན་པའི་གངས་ཅན་བོད་ཀྱི་ན་གཞོན་སློབ་ཕྲུག་ཡོངས་ཀྱི་སྙན་ལམ་དུ།
འུ་ཅག་གི་ཕ་ས་ཕྱུག་མོར་རྒྱ་དམར་གྱི་བཙན་འཛུལ་སླེབས་པ་ནས་མནར་གཅོད་དང་དྲག་གནོན་རྐྱང་རྐྱང་གི་འོག་བདེན་པ་དང་རང་དབང་གི་སྐད་སྒྲ་ཅུང་ཙམ་ཡང་འབོད་དབང་མི་སྟེར་བར་ལོ་ངོ་དྲུག་ཅུ་ལྷག་འགྲོ་བར་ཉེ་བའི་དུས་ཡུན་འདིའི་རིང།
རྒྱལ་ཞེན་གྱི་མེ་ལྕེ་འབར་བའི་འུ་ཚོ་དང་ཤ་རུས་གདུང་རྒྱུད་གཅིག་པའི་སྤུན་ཟླ་མང་པོས་སྙིང་སྟོབས་ཀྱི་དཔའ་ངར་ཞུམ་མེད་ཀྱིས་བསྐྱེད་དེ་ཁྱོད་དང་ང་། ཁོ་མོ་སོགས་བོད་མི་ཚང་མའི་ཐུན་མོང་གི་བདེ་སྐྱིད་དང་འཚོལ་སྙེགས་ཆེད། དེ་ལྟར་རང་སྲོག་དམར་པོ་འབེན་དུ་བཞག་ནས་བདེན་པའི་དཔང་རྟགས་སུ་གངས་རིའི་ལོ་རྒྱུས་ཀྱི་དར་ཆ་རུ་བསྒྲེངས་འོངས་ན།
རྒྱལ་གཅེས་དཔའ་བོ་དཔའ་མོའི་རླབས་ཆེན་གྱི་མཛད་རྗེས་དང་གཟི་བརྗིད་ལྡན་པའི་ངང་སྐུ་གཤེགས་པར་རྗེས་དྲན་དང་གུས་བརྩི་ཞུ་བ་དང་མཉམ་དུ། འཛམ་གླིང་མི་མང་ལ་དྲང་བདེན་དང་རང་དབང་མེད་པའི་བོད་ཡུལ་གྱི་གནས་སྟངས་ངོ་མར་ནུས་ཤུགས་ཐོན་པའི་རོགས་སྐྱོར་རེ་འཐོབ་སླད།
ངེད་དང་བླངས་ཕ་སྐད་ཞབས་ཞུ་ཚོགས་ཆུང་ནས་གཞོན་སྐྱེས་ཕྱི་སྡོད་བོད་ཀྱི་སློབ་མ་ཡོངས་སུ་《བོད་ཀྱི་དཔའ་བོ་རྗེས་དྲན།》ཞེས་པའི་རྩོམ་ཡིག་དང་རིི་མོའི་འགྲན་བསྡུར་གྱི་བྱ་འགུལ་ཞིག་སྒྲུབ་ཀྱིན་ཡོད་ན། མི་རབས་གསར་པའི་འགན་འཁྲིའི་འདུ་ཤེས་བསམ་ནས་རྩོམ་ཡིག་དང་རི་མོ་གང་མང་འབུལ་བའི་རེ་སྨོན་དང་བཅས།
གཤམ་འཁོད་དོ་སྣང་བྱེད་དགོས་ས་ཁག་གཅིག་ནི།
༡༽རྩོམ་ཡིག་དང་རི་མོ་གང་ཞིག་ཡིན་རུང་ནང་དོན་གཙོ་བོ་གོང་འཁོད་བརྗོད་གཞི་ལ་འབྲེལ་བ་ཡོད་དགོས་པ་ལས་རྩོམ་གྱི་ཁ་བྱང་སོགས་གཅིག་པ་ཡིན་དགོས་པའི་ངེས་པ་མེད།
༢༽ལོ་རིམ་བཅུ་གཉིས་མ་ཐོན་པའི་སློབ་ཕྲུག་སུ་ཡིན་ཡང་འཛུལ་ཞུགས་གནང་བར་དགའ་བསུ་ཡོད།
༣༽ཨང་རིམ་གསུམ་པ་བར་དུ་བྱ་དགའ་གོ་སྒྲིག་ཞུས་ཡོད་ལ་རྩོམ་ཡིག་ལེགས་གྲས་ཁག་གཅིག་རྗེས་མ་ལོའི་ང་ཚོའི་ཆེད་དེབ་༼འགན་འཁྲི་དང་འཚོལ་སྙེགས།༽ཤེས་དེབ་ཕྲེང་གསུམ་པའི་ནང་དུ་འདོན་རྒྱུ་ཡིན། མ་ཟད་རི་མོ་ལེགས་གྲས་ཁག་དྲ་རྒྱ་བརྒྱུད་གང་སར་བཀྲམ་ཐུབ་པ་བྱ་རྒྱུ་ཡིན།
འགྲན་རྩོམ་གྱི་བྱ་དགའ། ཨང་དང་པོར་ཧིན་སྒོར༥༠༠།
ཨང་གཉིས་པར་ཧིན་སྒོར༣༠༠།
ཨང་གསུམ་པར་ཧིན་སྒོར༡༠༠།
རི་མོའི་བྱ་དགའ། ཨང་དང་པོར་ཧིན་སྒོར༣༠༠།
ཨང་གཉིས་པར་ཧིན་སྒོར༢༠༠།
ཨང་གསུམ་པར་ཧིན་སྒོར༡༠༠།
༤༽རྩོམ་ཡིག་རྣམས་རང་མོས་དང་བཅད་རྩོམ་མིན་པའི་རྩོམ་ལུས་གང་ཞིག་ཡིན་ཡང་ཆོག་ལ་ཡིག་འབྲུ་ཉིས་སྟོང་ལས་མ་མང་བ། ཡི་གེ་གཏགས་དུས་སྨོན་ལམ་གསུམ་༼Monlam Uni OuChan༽པའམ་ཧི་གཟུགས་༼Himalaya༽གང་རུང་ཡིན་དགོས།
༥༽༢༠༡༡ལོའི་ཟླ་༡༡པའི་ཚེས༡༠་ཉིན་མ་འགོར་བར་གློག་འཕྲིན་ཁ་བྱང་ druks_84@yahoo.com དང་deng_kunga@yahoo.com གང་རུང་བརྒྱུད་སྤྲོད་ཐུབ་དགོས།
འདི་ནི་དང་བླངས་ཕ་སྐད་ཞབས་ཞུ་ཚོགས་ཆུང་ཞེས་བོད་ཡིག་ལ་དུངས་བ་ཟབ་པའི་གོ་པལ་པུར་བོད་ཁྱིམ་སློབ་གྲྭའི་ནང་དུ་སློབ་གཉེར་བྱེད་ཀྱིན་པའི་སློབ་མ་བརྒྱད་ཀྱིས་གསར་འཛུགས་བྱས་པའི་ཚོགས་ཆུང་ཞིག་གི་ངོ་བོར་གྲུབ་ཡོད་ལ། བྱ་འགུལ་འདི་སློབ་མ་རང་ནས་འགོ་རྩོམ་བཞིན་ཡོད་དུས་རིགས་ཞེན་དང་ལ་རྒྱ་ཆེ་བའི་སློབ་མ་གང་མང་མཉམ་ཞུགས་གནང་བར་མཁྱེན།
དང་བླངས་ཕ་སྐད་ཞབས་ཞུ་ཚོགས་ཆུང་ནས།
ཁྱེད་ཚོའི་ལྷག་བསམ་དང་རིགས་ཞེན་ལ་སྙིང་ནས་གུས་འདུད་ཞུ་བཞིན་ཡོད།
སོན་རྩ་ཚོའི་ལ་རྒྱ་དང་དུང་བ་ལ་ཡིད་སྨོན་ཞུ།