གདུང་སེམས་མཉམ་བསྐྱེད་ཀྱི་ལས་འགུལ

གྲགས་པ་ནས།
སྤྱི་ཟླ་༡༡ཚེས་༡ཉིན་བོད་ནང་གི་རྒྱལ་གཅེས་དཔའ་བོ་ཕོ་མོ་སྐུ་ལུས་མེ་སྲེག་གཏོང་མཁན་རྣམས་ལ་གདུང་སེམས་མཉམ་བསྐྱེད་ཆེད། ཀ་ཐ་མན་ཀྲུའི་ས་གནས་གཞོན་ནུ་དང་སྤོག་ར་ས་ཁུལ་གྱི་ས་གཞོན་གཉིས་ཀྱིས་གོ་སྒྲིག་བྱས་ཏེ་འཇོ་ལ་ཁེལ་དུ་བལ་ཡུལ་བོིད་མིའི་གཞིས་ཆགས་ཀྱི་ཉེ་ཁྲིས་སུ་རྩེད་ཐང་ཆེན་པོ་ཞིག་ཡོད་སར་བལ་ཡུལ་ནང་གི་ སེར་སྐྱ་མང་ཚོགས་འདུ་འཛོམས་ཀྱིས་མཆོད་འབུལ་གཞི་རྒྱ་ཆེ་ཞིག་གནང་འཆར་ཡོད་ཀྱང་། བལ་ཡུལ་ཉེན་རྟོག་པས་འཇོ་ལ་ཁེལ་གཞིས་ཆགས་སུ་འགྲོ་སའི་སྲང་ལམ་ཡོངས་རྫོགས་ལ་ཉེན་རྟོག་པ་འགྲེམ་འཇོག་བྱས་ཏེ་བཀག་འགོག་ཤུགས་ཆེ་བྱས་པས། ས་གནས་དེ་ག་རང་དུ་བོད་མི་འདུ་འཛོམས་བྱེད་ཐུབ་མེད། འོན་ཀྱང་སྤྱི་ཚེས་༣༡ཉིན་གྱི་དགོང་མོ་བལ་ཡུལ་ཀོ་པན་དགོན་པའི་གྲྭ་བཙུན་བརྒྱ་ཕྲག་ལྷག་ཅིག་གསང་སྟབས་ཀྱི་འཇོ་ལ་ཁེལ་གཞིས་ཆགས་ཀྱི་ཚོགས་ཁང་དུ་འཛོམ་ཡོད་ཅིང་། དེ་བཞིན་ཚེས་༡ཉིན་གྱི་ཞོགས་ཀ་ནམ་མ་ལངས་གོང་ལ་བོད་མི་མང་པོས་གསང་ལམ་མང་པོ་བརྒྱུད་ནས་སེར་སྐྱ་མང་ཚོགས་གང་མཚམས་འདུ་འཛོམས་བྱུང་ཐུབ་ཀྱང་། གཞིས་ཆགས་ཚོགས་ཁང་གི་རྒྱ་སྒོ་དང་གློ་སྒོ་ཡོངས་རྫོགས་ཉེན་རྟོག་པས་བཀག་ནས། ཕྱི་ནས་མི་ནང་ལ་མ་བཏང་ནང་ནས་ཕྱི་ལ་མ་བཏང་པར་ བཀག་སྡོམ་ཤུགས་ཆེ་བྱས་སོང་། དེ་ནས་གཞིས་ཆགས་ཀྱི་ཚོགས་ཁང་ར་བའི་ནང་ཁང་རྩེག་མཐོན་པོ་ཞིག་ཡོད་པ་དེའི་ངོས་སུ་སེར་སྐྱ་མང་ཚོགས་ཀྱིས་༧གོང་ས་མཆོག་གི་སྐུ་པར་དང་བོད་ནང་གི་རྒྱལ་གཅེས་དཔའ་བོ་ཕོ་མོ་སྐུ་ལུས་མེ་སྲེག་གཏོང་མཁན་རྣམས་ཀྱི་པར་དང་མིང་འཁོད་པའི་རས་གཞི་ཆེན་པོ་ཞིག་སྒྲིག་བཤམ་བྱས་པའི་མདུན་དུ་མར་མེ་རྒྱ་མཆོད་དུ་མ་ཕུལ་བ་དང་བསྦྲགས་མ་ཎི་སྨོན་ལམ་གསོག་སྒྲུབ ་བྱེད་བཞིན་པའི་སྐབས་སུ་བློ་བུར་དུ་བལ་ཡུལ་གྱི་དྲག་ཆས་ཉེན་རྟོག་པས་པར་དེ་དག་བཤམ་མ་ཆུག་པར་རྒྱལ་གཅེས་དཔའ་བོ་དཔའ་མོ་ཚོའི་པར་དེ་བཙན་འཁྱེར་བྱས་པ་དང་མཆོད་འབུལ་གྱི་ལས་རིམ་ལ་བར་ཆད་བྱུང་སྟེ། མང་ཚོགས་རྣམས་ཁོང་ཁྲོ་ལངས་ནས་ཁག་ཅིག་བཙན་གྱིས་གཞིས་ཆགས་རྒྱ་སྒོ་ནས་ཕྱི་ལ་ཐོན་ནས་ཕུར་ཅོག་ས་གནས་སུ་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཡན་ལག་ལས་ཁུངས་ཀྱི་མདུན་དུ་རྒྱུགས་ནས་གཞི་རྒྱ་ཆེ་བའི་སྐད་འབོད་ངོ་རྒོལ་བྱེད་དགོས་བྱུང་ཡོད། སྐབས་དེའི་སྐད་འབོད་པའི་ཁྲོད་ནས་ས་གནས་་གཞོན་ནུའི་ཚོགས་གཙོ་སོགས་མི་གྲངས་དྲུག་ཅུ་ལྷག་འཛིན་བཟུང་བྱས་འདུག དེ་ནས་གྲྭ་བཙུན་མང་པོ་ཞིག་གིས་སླར་ཡང་མུ་མཐུད་ནས་ཉིན་གང་ཟས་བཅད་ངོ་རྒོལ་དང་བསྦྲགས་ནས་མ་ཎི་སྨོན་ལམ་གསོགས་སྒྲུབ་བྱས་ཡོད།