པ་དོན་ནས་ཕྱི་ལོ་༢༠༡༡ཟླ་༡༡ཚེས་༢༨ཉིན།
གླེང་གཞི་ཅན་དུ་གྱུར་དགོས་པའི་མི་གྲངས་ལྔ་བརྒྱའི་སྦས་སྐུང་གི་ནག་ཉེས་དེ་རིམ་བཞིན་ཇེ་ཆུང་དང་། ཇེ་ཆུང་ནས་ཡལ་བར་སེམས་ལ་ཐ་ན་སུ་ཞིག་གི་ཁས་ལེན་མི་བྱེད་པའི་ནག་ཉེས་ཤིག་ཏུ་གྱུར། འཛམ་གླིང་རྒྱལ་ཁབ་གང་ཞིག་ཏུའང་ཕྱི་བསྐྱོད་ལག་འཁྱེར་ཙམ་ཡང་མེད་པའི་ཕྱི་མི་ཞིག་འགྲོ་འོང་དང་འཚོ་གནས་བྱེད་པ་ནི་ཁྲིམས་འགལ་དང་། དེ་ལ་བརྩད་ཞིབ་ཀྱིས་སྐྱབས་བཅོལ་སོགས་ཆབ་སྲིད་དང་འབྲེལ་བ་མེད་ཚེ་བཙོན་འཇུག་དང་ཡང་ན་རང་གི་གནས་ཡུལ་རྒྱལ་ཁབ་གང་དེར་རྩིས་སྤྲོད་དགོས་པའི་རྩ་ཁྲིམས་གཅིག་བསྒྲགས་རེད། འོན་ཏེ་རང་གི་རྒྱལ་ཁབ་གང་དེའི་སྟོབས་འབྱོར་ལ་མ་ལྟོས་པར། ཆབ་སྲིད་དང་འབྲེལ་བའི་སྐྱབས་བཅོལ་ལེན་གྱིན་ཡོད་པ་ནི་རང་ཁྱིམ་མཚེས་རྒྱལ་ཁབ་དབར་མཛའ་གྲོགས་གི་འབྲེལ་བ་ཡུན་དུ་གནས་ཐབས་དང་གཡོ་ལྷད་མེད་པའི་རྒྱལ་ཁབ་དེའི་ཀྱི་བཟང་སྤྱོད་རྣལ་མ་བ་ཞིག་རེད། དེ་བཞིན་བོད་དང་སོག་པོ། མན་ཇུ། རྒྱ་རིགས་བཅས་ནི་མཚམས་རེ་དམག་རོགས་གཏོང་རེས་དང་། མཚམས་རེ་དགའ་ཟླར་གྱུར་པའི་རྒྱལ་ཁབ་དབར་བར་འཆིང་བྱེད་པའི་སྲོལ་ལུགས་ཞིག་སྔ་མོའི་དུས་ནས་མཆིས་བཞིན། རྒྱ་གར་དང་བལ་ཡུལ་བོད་དབར་ཀྱང་མཚམས་རེ་དམག་རྒྱག་དང་མཚམས་རེ་འཆིང་འགྲིག་ཀྱིས་ལོ་རྒྱུས་དང་།ལྷག་པར་རྒྱ་གར་དབྱིན་ཇིའི་དབང་བསྒྱུར་སྐབས་རྒྱལ་དབང་སྐུ་ཕྲེང་བཅུ་གསུམ་པ་རྒྱ་གར་དུ་ཉེན་གཡོལ་དང་། ཆིག་དགུ་ལྔ་དགུ་ལོར་རྒྱ་དམར་གྱིས་བོད་བཙན་བཟུང་བྱས་རྗེས་༸གོང་ས་མཆོག་གཙོས་བོད་མི་འབུམ་ཕྲག་ཙམ་རྒྱ་གར་དུ་སྐྱབས་བཅོལ་ཁས་ལེན་བྱས་པའི་ནང་མི་རབས་གཞོན་པའི་གྲས་ད་ལྟའང་འཚོ་བཞུགས་བཞིན། རྒྱ་དམར་གྱིས་དྲག་གནོན་དང་གདུག་རྩུབ་ལ་མ་བཟོད་པར་ད་ལྟའི་བར་བོད་མི་སྐྱབས་བཅོལ་བ་ཆད་མེད་དུ་ཡོང་གིན་ཡོད། ཆབ་སྲིད་ཀྱི་འཕོ་འགྱུར་དང་རྒྱལ་ཁབ་ཀྱི་ཁེ་ཕན་ཆེད་རྒྱ་གར་གཞུང་གིས་བོད་མི་སྐྱབས་བཅོལ་ཁས་ལེན་མིན་གྱིས་སྐད་ཆའི་འགྲོས་ཙམ་ལས། ད་ལྟའི་བར་ཕྱི་རྒྱལ་མི་རིགས་གཞན་དང་མི་འདྲ་བར། བོད་མིར་དམིགས་དཀར་གྱིས་ལོ་རེར་འཕར་འགྱངས་ཐེངས་རེ་བྱ་དགོས་པའི་སྐྱབས་བཅོལ་ལག་དེབ་སྤྲོད་བཞིན་པ་དང་། ཉིས་སྟོང་གསུམ་ནས་བལ་ཡུལ་རྒྱལ་གར་གཞུང་ཚབ་ཀྱིས་བོད་མི་སྐྱབས་བཅོལ་བ་ཚོར་ལག་དེབ་དཀར་པོ་ཞིག་འགེངས་དགོས་ཀྱང་། སྐད་བསྒྱུར་དང་ཁ་ཚ་དགོས་གཏུགས་ཀྱིས་ལམ་སྟོན་དག་བལ་ཡུལ་སྣེ་ལེན་ཁང་ནས་བྱེད་ཀྱིན་ཡོད། དངོས་གནས་བྱས་ན་དེབ་དེའི་ནང་ལོགས་སུ་རྒྱ་གར་དུ་འགྲོ་དགོས་པའི་དམིགས་ཡུལ་སོགས་མི་རེ་རེའི་རྗེས་ཕྱོགས་མདུན་ལམ་དང་འབྲེལ་བའི་གལ་གནད་ཅན་ཁག་འཁོད་དགོས་ཀྱི་འདུག་ཀྱང་དེབ་དཀར་ནང་དབྱིན་ཡིག་ཁོ་ནས་གྲུབ བོད་ནས་སྐྱབས་བཅོལ་དུ་ཡོང་མཁན་ནང་རྒྱ་ཡིག་དང་བོད་ཡིག་ཤེས་མཁན་ཁག་གཅིག་དང་། ཕལ་ཆེ་བ་གང་ཡང་མི་ཤེས་ཤ་སྟག་ལས་དབྱིན་ཡིག་ཤེས་མཁན་ནི་ཧ་ལམ་མེད་པ་འདྲ་བོ་རེད། དེར་བརྟེན་བལ་ཡུལ་སྣེ་ལེན་ལས་བྱེད་རྣམས་ཀྱིས་གང་དགའི་ལམ་སྟོན་མ་བྱུང་ཡང་། འགེངས་ཤོག་དཀར་པོའི་ནང་དོན་གང་ཡིན་གསལ་འགྲེལ་དགོོས་རྒྱུ་ནི་མ་མཐར་ཡང་ཁོ་རང་ཚོའི་ལྟོ་ཕོགས་དང་ཆེས་ཐག་ཉེ་ཤོས་རེད། ཉིས་སྟོང་གསུམ་ནས་གཞུང་སྒེར་གཉིས་ཕྱོགས་ནས་དེབ་དཀར་རང་གི་འཐུས་པ་བྱས་ཏེ། སྐྱབས་བཅོལ་ལག་དེབ་ཀྱི་དཀའ་རྙོག་ཅུང་ཁུ་སིམ་མེར་ཡང་། ཉིས་སྟོང་བརྒྱད་ལོར་དེབ་དཀར་གྱི་རིགས་སྐྱབས་བཅོལ་ལག་དེབ་བཟོ་རྒྱུའི་ཐོ་འགོད་བྱེད་སྐབས་སྒྱུ་མིའི་མིག་འཁྲུལ་ཇི་བཞིན་དེབ་དཀར་དེ་ལའང་སྐྱབས་བཅོལ་དང་། སློབ་ཕྲུག གནས་བསྐོར། གཞན་ཞེས་རིགས་སྣ་ཚོགས་སུ་གྱུར། ཁག་གཅིག་དགའ་ནས་གནས་སའི་བར་ལ་འཕར་མཆོངས་བྱེད་པ་དང་། འགའ་རེ་ནི་སྡུག་ནས་ངུ་འབོད་ཀྱིས་ཡར་ཞུ་མར་ཞུ་བར་ནས་ལོ་ངོ་གསུམ་ལ་ཉེ་བར་འགོར། དེ་ནི་ཁག་མེད་དེ་དགོང་གཅིག་གི་ཉལ་ས་གླ་དགོས་ཀྱང་ལག་དེབ་དེ་མེད་ན་གླ་ཐབས་བྲལ་ལ། ཐ་ན་སྐྱབས་བཅོལ་དུ་གནས་སྡོད་བྱེད་མཁན་ཞིག་གི་མི་ཚེའི་མདུན་ལམ་སྟེང་བརྒྱ་ཆ་དགུ་ཅུ་གོ་བདུན་གོ་བརྒྱད་ཙམ་ལག་དེབ་དེ་ཁོ་ནར་བརྟེན་དགོས་པ་རེད་མོད་རིམ་པ་བཞིན་ཡར་ལ་གཏུགས་སྐབས་འགའ་ཞིག་གིས་མི་གྲངས་དེ་དག་ཐོབ་ཐང་ཁོ་ན་རྩོད་མཁན་གྱི་འདུ་ཤེས་འཛིན། གང་ལྟར་གནས་ཚུལ་མཐའ་མ་བཀའ་བློན་གྱི་བར་དུ་མ་གོ་མ་ཤེས་མེད་པར་གྱུར། ཡང་དག་པའི་དམངས་གཙོ་དང་ཕྱི་གསལ་ནང་གསལ་གྱི་སྐྱབས་བཅོལ་སྲིད་གཞུང་གི་རྩ་ཁྲིམས་གང་ཞིག་དུའང་བོད་མི་རིགས་ཡིན་ཕྱིན་འདྲ་མཉམ་གྱི་ཐོབ་ཐང་ནི་ལོས་གསལ་ཡོད་ཀྱང་། གནས་བསྐོར་ཞེས་མི་གྲངས་ལྔ་བརྒྱའི་ཁྲོད་ནས་ཉེ་ཕྱོགས་ཀྱིས་འགའ་ཞིག་ལ་གཞུང་ངོས་ནས་སྐྱབས་བཅོལ་ལག་དེབ་འཕར་འགྱངས་བྱས་རབས་བཤད། དེ་ནི་མི་གྲངས་ལྔ་བརྒྱའི་འཐུས་འཚབ་དབང་གྲགས******༼མིང་གསལ་པོ་མི་ཤེས།༽མིང་ཅན་བརྗོད་དོན་གནས་བསྐོར་འཁོད་པའི་ཁོངས་ནས་ཀྱང་། ཆབ་སྲིད་བཙོན་ཟུར་བཅུ་དགུ ཉིས་ཤུ་ཞིག་ཡོད་པ་དང་། དེ་ནས་ཀྱང་ཁ་ཤས་ཤིག་སྐྱབས་བཅོལ་སྲིད་གཞུང་༼བོད་མིའི་སྒྲིག་འཛུགས༽ངོས་ནས་འཕར་འགྱངས་བྱས་པའི་མིང་དང་བཅས་པ་གསལ་ཁ་བརྗོད་རྒྱུ་ཡོད་ཟེར། ད་དུང་བདེ་སྲུང་དྲུང་ཆེར་མི་གྲངས་ལྔ་བརྒྱའི་བདེ་སྡུག་གིས་གནས་ཚུལ་ཞུ་སྐབས། དྲུང་ཆེས་ལྔ་བརྒྱའི་འཐུས་ཚབ་ལ་ཁྱེད་ལ་དྭོགས་པ་ཡོད་ཚུལ་བརྗོད་བྱུང་ཟེར། འཐུས་ཚབ་ཕུན་ཚོགས་ཆོས་སྡོང་གིས་གནས་བསྐོར་ཞེས་འཁོད་པའི་སྐྱབས་བཅོལ་ལག་དེབ་དེའི་ཐོག་མིའི་རྙོག་གླེང་དང་བར་གྱི་ཞུ་སྐུལ་སོགས་རིམ་པ་གསར་འགོད་པའི་མདུན་ནས་ལན་འདེབས་བྱེད་སྐབས་བལ་ཡུལ་སྣེ་ལེན་ཁང་ནས་ཆོས་སྡོང་ཁོ་པ་གཞུང་དང་མི་དམངས་བར་ལ་འགལ་ཟླ་བཟོ་མཁན་ཡིན་རབས་ཀྱིས་བརྡ་ལན་འབྱོར་བྱུང་ཟེར། ཡང་འཐུས་ཚབ་རྣམས་ཀྱིས་བཀའ་ཟུར་ཟམ་གདོང་མཆོག་ལ་སྙན་སེང་ཞུ་སྐབས་རིན་པོ་ཆེ་མཆོག་གིས་བལ་ཡུལ་སྣེ་ལེན་ཁང་གིས་ནོར་འཁྲུལ་མིན་པའི་ཡི་གེ་འབྱོར་སོང་ཟེར་ནས་ཅུང་དྲག་པོའི་ཚུལ་གྱིས་ཡི་གེ་ཞིག་སྒྲོག་ཙེའི་ཐོག་བཞག་སོང་བར། འཐུས་ཚབ་ནས་མི་གྲངས་ལྔ་བརྒྱའི་ཁྲོད་ཆབ་སྲིད་བཙོན་པ་བཅུ་དགུ་ཉི་ཤུ་ཞིག་ཡོད་པ་དེ་དག་རྒྱ་ནག་གི་རྩ་ཁྲིམས་འོག་སྡོད་མི་ཐུབ་པར་ཆབ་སྲིད་སྐྱབས་བཅོལ་དུ་ཡོང་བ་དག་གནས་བསྐོར་བྱས་ནས་བོད་དུ་ཕྱིར་ལོག་གམ་རིན་པོ་ཆེ་མཆོག་ནས་དགོངས་པ་བཞེས་རོགས་ཞུ་དུས། རིན་པོ་ཆེ་མཆོག་ནས་ཀྱང་ཅུང་འཇམ་པོའི་ཚུལ་གྱིས་གནད་དོན་དེའི་ཐོག་གཞུང་ངོས་ནས་གང་མགྱོགས་ཐབས་ཤེས་བཙལ་ཆོག་གསུངས་བྱུང་ཟེར། གནས་བསྐོར་འཁོད་པའི་མི་གྲངས་དེ་དག་གིས་གནས་བསྐོར་བརྗོད་མེད་པ་ནི་གསལ་པོ་རེད། གང་ཡིན་ཟེར་ན་མི་དེ་དེག་མང་ཆེ་བ་ལོ་བཞི་ལྔ་ལ་སློབ་སྦྱོང་བྱས་དང་བྱེད་བཞིན་དང་། ཆབ་སྲིད་བཙོན་ཟུར་ཁག་གཅིག་ལའང་གནས་བསྐོར་ཞེས་འཁོད་འདུག རྒྱ་གར་རྩ་ཁྲིམས་ཐོག་ནས་ལག་འཁྱེར་གང་ཡང་མེད་པའི་ཕྱི་མི་ཞིག་འཚོ་བསྡོད་བྱེད་བཅུག་པ་ས་གནས་ཉེན་རྟོགས་པའང་དེ་དང་དེ་འབྲེལ་གྱི་གྱིས་ནག་ཉེས་ཡིན་པ་ཤེས་བཞིན་དུ་ལོ་གསུམ་བཞིའི་རིང་ཟུར་ཙམ་ཡང་མི་བརྗོད་པའི་རང་འཁྲིའི་ལས་འགན་མི་འཁྱེར་བའི་ངོས་ལེན་ཙམ་ཡང་མེད་པར་ད་ཆ་ཁྱེད་ཚོ་གནས་བསྐོར་རེད་ཟེར་ནས་འཕར་འགྱངས་མི་བྱེད་པའང་ཧ་སངས་དགོས་པའི་གནད་དོན་ཞིག་ཅི་ལ་མིན།
ཡར་ཞུ་མར་ཞུ་བར་ནས་གཞུང་གིས་ཕར་འགྱངས་བྱེད་ཀྱི་ཡིན་ཚུལ་བརྗོད་བཞིན། དེ་འདྲའི་ངང་ནས་ལོ་ངོ་གསུམ་བཞི་འགོར། ཉིས་སྟོང་གསུམ་ཙམ་ནས་བརྩིས་ན་ལོ་བརྒྱད་ཏག་ཏག་འགོར་འདུག་ཅིང་མི་ཞིག་གི་མི་ཚེའི་ནང་ནས་མི་ལོ་བརྒྱད་ཀྱི་དུས་ཚོད་ནི་ཉུང་ཉུང་ཞིག་གཏན་ནས་མིན། དེའི་ནང་ནས་ཀྱང་མང་ཆེ་བ་མི་ཚེའི་ནང་ནས་ཆེས་དོན་སྙིང་ལྡན་པ་དང་། ཅི་ཡང་བསྒྲུབ་ཐུབ་པའི་ན་ཚོད་ཤ་སྟག་འཕྲོ་བརླག་ཏུ་སོང་བ་རེད།
དེ་འདྲའི་བསམ་གཞིགས་དང་དགོངས་བཞེས་ཀྱིས་སྐྱབས་བཅོལ་སྲིད་གཞུང་༼བོད་མིའི་སྒྲིག་འཛུགས་༽དང་དེ་འབྲེལ་གྱི་ཚན་པ་སོགས་ཀྱིས་མི་གྲངས་ལྔ་བརྒྱ་པོ་བོད་མི་སྐྱབས་བཅོལ་བ་གཅིག་པ་ཡིན་པའི་འདུ་ཤེས་དང་དེ་དག་གི་བདེ་སྡུག་ནམ་མཁའི་འཇའ་མཚོན་བཞིན་ཡལ་མི་འཇུག་པར་གང་མགྱོགས་སེལ་རོགས་ཞུ།
དངོས་གནས་ཁག་མི་འདུག །དཀའ་ངལ་ལོས་ཡོད། དཀའ་ངལ་འདི་གཏན་ནས་སེལ་མི་ཐུབ་པ་ཞིག་ཡིན་ན་གནས་ཚུལ་ཁ་ཁ་རེད། བཙན་བྱོལ་བོད་པ་ཚང་དེ་འདྲའི་ཚད་ལ་ལྷུང་ཡོད་ཀྱི་མ་རེད། བོད་པ་སྐྱབས་བཅོལ་བའི་ཕྱོགས་ནས་མིག་གིས་མཐོང་ཚད་དང་རྣ་བས་ཐོས་ཚད་ཡིད་སྐྱོ་བ་དང་སྡུག་བསྔལ་རྐྱང་རེད། གཏམ་སྙན་པོ་ཞིག་གཅིག་ཀྱང་གོ་ཡ་མི་འདུག །དེ་བས་གོང་ས་མཆོག་གི་གསུང་སྐད་རེ་ཐོས་ན་སེམས་སྐྱིད་པ་དང་བློ་བདེ་བོ། ཚོར་བ་མ་འདྲ་བ་ཞིག་བསྐྲུན་ཡོང་གི་འདུག །
ཁ་བརྡ་དྲྭ་བདག་ལགས་ལ་ཐུགས་བརྗེ་ཆེ་ཞུ་རྒྱུ། སླད་དུས་བབ་ཐོག་བསམ་ཚུལ་འདི་བཏང་ཡོད་པས་དུས་བབ་ཚང་ནས་གང་མགྱོགས་དྲྭ་ཐོག་ཏུ་སྤེལ་གནང་རོགས།
མི་གྲངས་ལྔ་བརྒྱ་དང་འཐུས་འཚབ་རྣམ་པར་ཞུ་རྒྱུར། དེ་འབྲེལ་གྱི་དཔངས་ཡིག་སོགས་དགོས་གལ་བྱུང་ན་མ་གཏོགས་དྲྭ་ཐོག་ཏུ་མ་གཏོང་རོགས་ཞེས་ནན་གྱིས་བརྗོད་རྒྱུ་ཡིན།
སེམས་ཁྲལ་མ་བྱེད། བཀའ་ཁྲི་བློ་སེང་གིས། ཕ་རན་སིར་གཏམ་བཤད་སྐབས། རྒྱ་གར་ནང་གི་བོད་མིའི་སྒྲིག་འཛུགས་དང་ཆབ་སྲིད་ཀྱི་མ་འོངས་གནས་སྟངས་ད་ལྟ་གསལ་བོ་བཟོས་ཟིན། ཞེས་བཤད་འདུག་པ་མ་ཟད། ད་དུང་འོས་གཞིར་ལངས་སྐབས་བོད་ནས་གསར་དུ་འབྱོར་བ་རྣམས་ཀྱི་འཚོ་བའི་བཀོད་སྒྲིག་ཡག་པོ་བྱེད་ཀྱི་ཡིན། ཞེས་བཤད་ཡོད།