ནུ་མོ་པད་མ་ཆོས་སྒྲོན་གྱི་བསྒྱུར་རྩོམ་ལེགས་གྲུབ་བྱུང་འདུག

བསང་ཆུ་འབྲུག་བྷེ།
དེ་རིང་ངས་ཁྱེད་ཅག་ལ་ངོ་སྤྲོད་པར་འདོད་པའི་བརྩམས་ཆོས་གླེགས་བམ་ཞིག་སྟེ།གསར་རྩོམ་གྱི་འཕྱོ་ལ་ཉེ་བའི་རྒྱའི་ཡུལ་གྱར་རྩོམ་པ་བོ་ཡན་ཧོན་པེན་གྱིས་ཕྱག་རྩོམ་མཛད་པའི་དངོས་རྟོག་སྤེལ་མའི་སྒྲུང་དེབ་རྔམ་བརྗིད་རི་བོ་ཚོགས་རྣམས་ཐོད་ཀྱིས་བསུ་ཞེས་པའི་དེབ་དེ་ནུ་མོ་པད་མ་ཆོས་སྒྲོན་གྱིས་ལོ་ངོ་གཅིག་གི་དཀའ་སྡུག་གི་བཞིན་རས་འོག་ནས་ལེགས་གྲུབ་བྱུང་འདུག་པའི་འཕྲིན་བཟང་དེ་ཡིན་ལགས། ནུ་མོ་པད་མ་ཆོས་སྒྲོན་ལ་མཚོན་ན་ལོ་འདིར་ཁྲག་དང་མིག་ཆུའི་ནམ་ཟླ་རེ་ཡི་སྐྱོ་ངལ་འཁུར་ཞིང་། ཟུག་དང་མནར་གཅོད་གང་མང་ཞིག་གི་གདོང་ལེན་འོག་འཚར། ནམ་ཡང་རླབས་ཆེ་བའི་མི་ཚེ་ནི་རླབས་ཆེ་བའི་དཀའ་སྡུག་གི་འབྱུང་གནས་ཡིན་པ་ལྟར།ནུ་མོར་ཅི་འདྲའི་ལུས་སེམས་ཀྱི་དཀའ་སྡུག་མྱོང་ཡང་དངོས་སྒྲུང་བརྩམས་ཆོས་འདི་འདྲ་བ་ཞིག་མ་ཡུམ་གྱི་འོ་སྤྲི་ལས་ཞིམ་པའི་བོད་སྐད་ཡིག་གི་ཚེ་སྲོག་ལ་བརྒྱུས་ནས་མི་ཡུལ་ལ་བཀྲམས་ཐུབ་པ་བྱུང་བ་སྟེ་དངོས་གནས་མི་ཡུལ་གྱི་ཟས་རིན་ཙམ་ལོས་ཡིན། ཡོད་ཚད་བརྩམས་ཆོས་ཀྱི་ངོས་ནས་ཚུར་ཁ་གྲགས་རྒྱུ་ཡིན་པས།ངས་དོན་མེད་ཀྱི་རྒྱན་ཆ་སྣ་ཚོགས་འདི་ནས་འདོགས་དགོས་དོན་མེད་པར་ནུ་མོའི་སྒྲ་བསྒྱུར་མའི་ཚིག་འགའ་ཞེས་པ་གཤམ་ལ་འདྲེན་བཀོད་ཀྱི་ཀློག་པར་འཚལ།

སྒྲ་སྒྱུར་མའི་ཚིག་འགའ།
ངེད་གཉིས་ཀྱིས་རི་མགོའི་བ་ཁ་ཞིག་ནས་འཇིག་རྟེན་མཐུན་འཇུག་གི་འཚོ་བ་མཉམ་པོར་རོལ་རྒྱུའི་འགོ་བཙུགས་པ་ནས་བཟུང་། ཁོ་དང་འབྲེལ་ནས་མི་གསར་བ་རེ་ངོ་ཤེས་པ་དང་ལྷན་དུ་དེབ་གསར་བ་རེའང་ཧ་ལམ་ངོ་ཤེས་ཡོང་གི་འདུག དེ་ནི་གཅིག་བྱས་ན་སྐྱེ་བ་ད་ཐེངས་ཀྱི་ལོངས་སྤྱོད་ཅིག་རེད་ལ། ཡང་ལས་བྲེལ་ཆེ་བའི་མི་ཚེ་ཐུང་ཐུང་འདིའི་ཁུར་རོ་ཐེ་བ་ཞིག་རེད་ཅེས་བཤད་ནའང་མ་ཆོག་པ་མེད།
ཉིན་ཞིག་ལ་སྐུ་ཞབས་ཡན་ཧོང་པེན་གྱིས་སྣེ་ཁྲིད་པའི་རྒྱ་རིགས་གཟིགས་སྐོར་ཚོགས་པ་ངེད་ཚང་ལ་སླེབས་ཤིང་། ཡན་ཧོང་པེན་ལགས་ཀྱིས་དེབ་རྒན་བཞི་ལྔ་ཞིག་ཁོ་ལ (ངའི་བཟའ་ཟླར) ལག་རྟགས་སུ་སྤྲད་སོང་། དེབ་དེ་དག་ནི་བོད་བརྗོད་གཞིར་
བཟུང་ནས་བྲིས་པའི་བརྩམས་སྒྲུང<<གསེར་མདོག་གི་བླ་རི >> ད་ལྟ་ང་ཚོས་ཀློག་བཞིན་པའི <<རྔམ་བརྗིད་རི་བོའི་ཚོགས་རྣམས་ཐོད་ཀྱིས་བསུས >> ཞེས་པའི་དེབ་འདི་དང་། ད་དུང་ཤེར་རྟོགས་རིག་པའི་སྐོར་གྱི<<རྟོག་གེ་བའི་དུང་བ >> ཞེས་པ་ཞིག་དང་། ཆབ་སྲིད་ཆེད་རྩོམ <<ཐེ་ཝན་གྱི་གོད་ཆག་ཆེན་མོ >> དང་ << རྒྱལ་སྐྱོབ་ཇུས་གཞི་ཆེན་མོ >> སོགས་འདུག
སྐུ་ཞབས་ཡན་ཧོང་པེན་ལྷན་རྒྱས་ཕྱིར་ལོག་ཁར། དེབ་འདི་དཔར་སྐྲུན་ཁང་གི་འགན་འཛིན་སྐུ་ཞབས་ཁྲོན་ཀྲིན་ཏིག(ཐའེ་ཝན)དང་རྩོམ་པ་པོ་རྣམ་གཉིས་ཀྱིས་ཁོ་བོར་དེབ་འདི་བསྒྱུར་མཁན་ཞིག་བཙལ་རོགས་ཞེས་མངགས་ཆ་བྱས་འདུག་པ་དང་། ད་དུང་ཨ་སྒོར༥༠༠ བསྒྱུར་མཁན་ལ་སྔ་གཏོང་བྱས་པ་ཡིན་ཞེས་སྤྲད་འདུག ཧ་ལམ་ཁོས་ཟླ་གཅིག་ལྷག་ལ་བསྒྱུར་མཁན་ཞིག་བཙལ་ཀྱང་མ་རྙེད་སྟབས། ཉིན་ཞིག་ངས་བསྒྱུར་ཐུབ་མིན་ལ་ཚོད་ལྟ་ཞིག་བྱས་ན་ག་འདྲ་འདུག་ཅེས་པར། “ ཆོག་གི་་་་་ངས་ཀྱང་ཁྱེད་ལ་རོགས་པ་གང་ཡོང་ཡོང་བྱ་ཆོག ” ཟེར། དྲང་མོར་བཤད་ན་སྐབས་དེར་ཁོས་དེབ་འདི་ཡག་རབ་རྒྱན་རབ་བཤད་པ་ལས། ང་རང་གིས་མ་རྩོམ་ཀྱང་ཀློག་མེད། ”
དེབ་བསྒྱུར་རྒྱུའི་དཔའ་ཁས་ལེན་བྱས་པ་དང་ཆབས་ཅིག ཁོའི་ལག་གི་ཨ་སྒོར༥༠༠ ཚུར་འཕྲོག་ནས་རང་གི་ཨམ་ཕྲག་ནང་བཅུག དེ་དང་ཆབས་ཅིག་ཨམ་གཙིགས་བསྡམས་ཏེ་ཤོག་ངོས༤༠༠ མ་ཟིན་ཙམ་ཡོད་པའི་དེབ་རྒན་དེ་ཁ་ལོ་ཕར་སྐོར་ཚུར་བསྐོར་བྱས་པ་བཞིན། ཉི་མ་དེ་དག་གི་རིང་ངའི་གྲོད་ཁོག་ནང་ཟླ་བ་གསུམ་ལ་སླེབས་གྲབས་ཡོད་པའི་ལན་ཆགས་དེའང་འཕག་འཚག་རྒྱག་འགོ་བཙུགས། (སྐབས་དེར་དྲ་ཐོག་ནས་ཀླུ་མཁར་བྱམས་ཀྱི་སྐོར་སྤུར་གྲགས་ཆེ་བའི་ཁ་ཐུག་རེད། ངས་ཐོག་མར་དེབ་འདིའི་ནང་གི“བོད་ཀྱི་རྒྱལ་ཁབ་བསྐྱར་གསོའི”སྐོར་གྱི་ལེ་ཚན་དེ་བསྒྱུར་ནས་ཚོད་ལྟ་ཞིག་བྱས་པ་ཡིན་ལ། མང་ཚོགས་ནང་འགྱུར་ཡག་པོ་འདུག་ཅེས་སེམས་ཤུགས་སྤར་བར་བརྟེན་ནས་ཤུགས་བརྒྱག་རྒྱུའི་བློ་ཐག་བཅད་པ་ཡིན) སེམས་ཁྲལ་དངོས་ནི་བསྒྱུར་གླ་ལེན་ཐུབ་ཙམ་དེ་མ་ཡིན་པར། དེབ་འདིའི་བོད་ཀྱི་རྩོམ་རིག་གི་སྐྱེད་ཚལ་ཡངས་པོར་མེད་པ་ཁ་སྐོང་ཞིག་མི་ཐུབ་རུང་། ཡོད་པ་ཡར་རྒྱས་ལ་གཞོགས་འདོགས་རེ་ཐུབ་མིན་དེ་ཡིན་ངེས་ན། སེམས་ཁྲལ་དེ་འགྱུར་ལ་ལག་པ་འཆིང་བའི་ཉི་མ་དང་པོ་ནས་བྱུང་ཞིང་། མཇུག་སྒྲིལ་ཟིན་པའི་དེ་རིང་ཡང་དེ་ལྟར་ཐེ་ཚོམ་ངང་ལྷག་ཡོད།
སྐབས་དོན། ང་རང་གི་འགྱུར་རྩེ་གྲས་བྱུང་ཡོད་ཟེར་སྲོལ་མེད་ཀྱང་། བསྒྱུར་མཁན་ནི་ཀློག་མཁན་ཡག་ཤོས་དེ་ཅིས་ཀྱང་ཡིན་དགོས་པས། ངས་དེབ་འདི་བསྒྱུར་བ་དང་ཀློག་པའི་མྱོང་ཚོར་སྐལ་མཉམ་གྱི་ཀློག་པ་པོ་རྣམས་ལ་དྲང་མོར་བཤད་ན། ཁོ་མོས་ཉོབ་སྣང་དང་། མཚེར་སྣང་། ཨུ་ཚུགས་གསུམ་ཀྱིས་དེབ་བསྒྱུར་ནས་རྫོགས་པར་བྱས་ཤིང་། དེ་ལྟར་ཟླ་བ་ལྔ་ལྷག་ཅིག་འགོར་སོང་། དེབ་འདི་མི་རིགས་གཞན་ལ་བོད་ངོ་སྤྲོད་བྱ་རྒྱུར་དམིགས་ཡོད་སྟབས། ད་ཆ་བོད་ངོར་ཚུར་འགྱུར་ཡོང་དུས་ནང་དོན་གྱི་ཆ་ནས་བོད་བསྟོད་རྒྱུ་མང་དྲགས་པ་འདྲ་བོ་དང་། སྒོས་སུ་ཆོས་ལུགས་དང་ཆོས་ལུགས་མི་སྣ་དྲིལ་བསྒྲགས་ཀྱི་རྣམ་པ་ཤུགས་ཆེ་རྐྱེན། ངན་པ་རང་བསྟོད་ལ་དགའ་བའི་ང་ཚོར་སྦྲིད་རྫས་རྩོམ་རིགས་ཤིག་ཆགས་མི་ཡོང་ངམ་སྙམ་པའི་བློ་དོགས་ཆེ་ཁར། རྒྱ་སྐད་ནང་བོད་ཆོས་བཤད་པ་ཚུར་བསྒྱུར་དགོས་ཕྱིན་ཚིག་བསྐྱོར་ཕར་ཞོག་ཐ་ན་དོན་བསྐྱོར་གང་མང་མ་བརྒྱབ་པར་གོ་བརྡ་ཡན་ཆད་འཕྲོད་ཁག་པས། དེར་ཉོབ་སྣང་སྐྱེས་པ་དང་གཅིག ཡང་དངོས་རྟོག་སྤེལ་མའི་འབྲི་ཐབས་འདི་རིགས་བོད་ཡིག་ནང་གསར་བ་ཡིན་སྟབས། ཀློག་མཁན་རྣམས་འདྲིས་བདེ་བོ་མེད་པའི་ཁར། ཚིག་རྒྱན་ཕུན་སུམ་ཚོགས་པ་དེ་སྐད་ཡིག་གཞན་ཞིག་གི་ངོར་རྡོ་ཆག་བཙན་སྒྲིག་བྱ་རྒྱུར་འཚེར་སྣང་ཡོང་བ་དང་གཉིས། གསུམ་ནས་སྐ་ཆ་ཤོར་ཚར་བ་དང་སྒོར་མོ་ཡང་ཟོས་ཚར་དུས་གཡོལ་ས་མེད་སྟབས། ཨུ་ཚུགས་མཐའ་བསྐྱལ་མི་བྱ་ཀ་མེད་ཆགས་སོང་ལ། ཐ་ན་བརྒྱུད་རིམ་དེའི་ཁྲོད་ངས་ཁོ་ལ་ལེ་བདའ་ཤོར་བའང་ཐེངས་གཅིག་མིན།
གཞན་ཡང་ཉམས་འཇོག་བྱེད་དགོས་ས་ཞིག་ལ། དེབ་འདིའི་ནང་མིང་གི་བོས་པ་དང་མ་བོས་པའི་མི་སྣ་ཤི་གསོན་ཉི་ཤུ་ལྷག་ཞིག་ཡོད་ལ། ཁ་ཤས་མི་དང་མིང་དངོས་ཡིན་པ་དང་། འགའ་ཞིག་རྩོམ་པ་པོས་དགོས་དབང་གིས་རྟོག་བཟོ་བྱས་པ་སྟེ། མི་སྣ་གཙོ་བོ་ཅིན་ཧྲིན་པེ(རྩོམ་པ་པོའི་སེམས་ཁམས་ལ་སྦྱར་བ )དང་། གཞོགས་འདེགས་མི་སྣ་མེ་ཏོག་མཚོ(རྩོམ་པ་པོས་རེ་སྨོན་ལ་སྦྱར་བ) མཚན་མོ་ལྟ་བུ(དངོས་མིང་སྦས་སྐུང་བྱས་པ) ད་དུང་ཚེ་དབང་རིག་འཛིན་དང་། ཀླུ་མཁར་བྱམས་སོགས་མི་སྣ་འགའ་ཞིག་མི་དང་མིང་ང་ཚོར་ངོ་འཕྲོད་ཆོག་ཆོག་ཡིན་མོད། ཁོ་ཚོའི་སེམས་ཁམས་དང་གཤིས་སྤྱོད་རྩོམ་པ་པོའི(དགོས་དབང་ལ་སྤྱར་བ)སོགས་འབྲི་ཐབས་དམིགས་བསལ་བ་ཡིན་ན། ཀློག་པ་པོའི་ནང་དུ་དངོས་རྟོག་སྤེལ་མར་འདྲིས་གཤིབས་མེད་མཁན་ཚོར་མཚོན་ན། དེབ་འདི་ཀློག་ཡོང་དུས་རི་གཟར་གྱི་རྐང་ལམ་ནས་བགྲོད་པ་ལྟར་འགྲོ་བདེ་བོ་རང་མེད་ངེས་པས། དེ་ནི་ངའི་སེམས་ཁྲེལ་བྱ་ས་ཐེ་བ་ཞིག་ཀྱང་ཡིན།
མ་གཞི་ནས་ཁོ་མོར་རྩོམ་བསྒྱུར་གྱི་བྱང་རྩལ་མེད་སྟབས། མ་འདང་ས་ཡོད་ངེས་ན་ཤེས་ནས་བརྗོད་མཁན་རྣམས་ཀྱི་སྤྱན་སྔར་བཟོད་གསོལ་ཞུ་རྒྱུ་དང་། ཆབས་ཅིག་རྩོམ་སྒྱུར་འདི་མགོ་ནས་འཇུག་བར་བསྡུར་གཤིབས་གནང་མཁན་ལྷ་སྡེ་གནམ་ལོ་གཡག་དང་། ཞུ་དག་ཐད་མི་ནག་ཚང་ལུང་རིགས་རྒྱལ་ལགས་ཀྱིས་རོགས་མགོན་གནང་བ་བཅས་ལ་ལེགས་གསོལ་ཞུ་རྒྱུ་དང་། མཐའ་དོན་རྩོམ་པ་པོ་ཡན་ཧོང་པེན་ལགས་ཀྱིས་སྒྱུ་རྩལ་སྐྱབས་གནས་སུ་བརྟེན་དེ་བོད་ལ་དེབ་བྲིས་ཤིང་། དེབ་འདིའི་དཔར་རྩའི་བདག་པོ་སྐུ་ཞབས་ཁྲིན་ཀྲིན་ཏིག(ཐའེ་ཝན)ལགས་ཀྱིས་དེབ་བསྒྱུར་རྒྱུའི་ཆོག་མཆན་གནང་བའི་ཁར། བོད་འགྱུར་གྱི་འགྲོ་གྲོན་ཆ་ཚང་ཁོང་གིས་ནར་གཏོང་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་བཅས། བཞུགས་སྒར་རྡ་ས་སྟེ་གནས་རི་གཡར་བོའི་སྲིབ་འཁྱག་ཏུ་རྟེན་གཞི་བྱས་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ལས་ཤག་ནས། སྒྲ་བསྒྱུར་མ་གངས་སྒྲོན་ནམ་པདྨ་ཆོས་སྒྲོན་མིང་འཛིན་མས་རྫོགས་པར་བྱས་པའོ །

སྤྱི་ལོ་༡༠༡༡་ཟླ་༡༢་ཚེས་༦ཉིན།