སྤོབས་པ་མཐའ་ཡས།
གཟའ་ཉི་མ་ནམ་ཡིན་ལ་ཡུལ་འདིའི་ཚགས་པར་ལྡབས་ཁ་ཤས་ཀྱིས་རྒྱགས་པ་ཆགས་ཡོད། གཟའ་ཉི་མའི་ཞོགས་པ་ནམ་ཡིན་ལ་ངས་རང་གི་ར་སྐོར་སྒོ་འགྲམ་གྱི་ཡིག་སྒམ་ཁ་ཕྱེ་ནས་ལྗིག་ཏིག་ཏིག་གི་ཚགས་པར་དེ་ཡར་བཀྱག་ནས་ནང་དུ་ཡོང་ཞིང་མགོ་ནས་མར་ཀློག དེ་ཡང་ང་དགའ་ཤས་ཀྱི་སྡེ་ཚན་ཁག་ནི་རྒྱལ་སྤྱིའི་གསར་འགྱུར། རྒྱལ་ནང་གསར་འགྱུར། ཀློག་པ་པོའི་འཕྲིན་ཡིག ཆེད་རྩོམ་སོགས་ཡིན་སྟབས་ཅུང་དོ་སྣང་གིས་ཀློག རྩེད་འགྲན་དང་ཚོང་ལས་ཁྱབ་བསྒྲགས་ལ་མིག་བཤེར་རེ་ཡང་མི་བྱེད། མཚམས་མཚམས་སུ་ལས་ཀ་འཚོལ་སའི་སྡེ་ཚན་དེར་ཡང་ལྟ་ཙམ་རེ་བྱེད།
དེ་ནས་ངས་རྒྱུན་ལྡན་བཞིན་བོད་ཀྱི་དུས་བབ་དང་བོད་ཀྱི་བང་ཆེན་སོགས་ཀྱི་དྲ་རྒྱ་ཁ་ཕྱེ་ནས་ལྟ། ཡིན་ན་ཡང་ང་ཚོའི་གསར་འགྱུར་དྲ་བ་རིན་པོ་ཆེ་དག་ནི་གཟའ་ཉི་མའི་ཉིན་རྐུབ་ལ་ཉི་མ་ཤར་བ་ཡང་མ་མཁྱེན་པར་གཉིད་ཁུགས་ཡོད་པ་འདྲ། གཟའ་ཉི་མ་ཟེར་དུས་དྲ་རྒྱ་འདི་ཚོའི་ནང་ལ་གསར་འགྱུར་གསར་པ་སྣ་གཅིག་ཀྱང་མེད། སྤྱིར་ན་གཟའ་ཉི་མའི་ཉིན་ལས་རིགས་མང་པོ་ཞིག་མཚམས་འཇོག་པའི་ངལ་གསོའི་ཉི་མ་ཡིན་པས་མི་མང་པོས་དྲ་རྒྱ་སྔོག་པ་དང་གསར་འགྱུར་ལ་ལྟ་ཉན་བྱེད་པའི་གོ་སྐབས་ཅུང་ཡག་དུས་ཤིག་ཡིན་པས་བོད་ཡིག་གི་གསར་འགྱུར་གསར་བ་ཁ་ཤས་རེ་སླེབས་ཡོད་ན་ཅི་རུང་བསམ་གྱིན་འདུག
ཡུལ་ལུང་གཞན་དག་ན་གཟའ་ཉི་མའི་གློག་འཕྲིན་དང་གཟའ་ཉི་མའི་མགྱོག་འཕྲིན་གཟའ་ཉི་མར་སྤེལ་བའི་གསར་ཤོག་མང་པོ་ཡོད་པར་གཞིག་ན་གཟའ་ཉི་མ་ནི་གསར་འགྱུར་འགྲེམ་སྤེལ་གྱི་གོ་སྐབས་ཆེན་པོ་ཞིག་ཡིན་འདུག བཙན་བྱོལ་བོད་མིའི་སྤྱི་ཚོགས་སུ་ཉིན་རེའི་གསར་ཤོག་ཡོད་པ་མ་ཐོས་ཀྱང་བདུན་ཕྲག་རེའི་གསར་ཤོག་ཡོད་པ་ཐོས་པས་དེ་གཟའ་ཉི་མ་དང་བསྟུན་ནས་འདོན་ཐུབ་ན་ལྟ་ཀློག་བྱེད་མཁན་མང་བར་ཕན་ཐོགས་ཏན་ཏན་ཡོད་པ་འདྲ། དེ་བཞིན་མ་འོངས་པར་རང་རེའི་སྤྱི་ཚོགས་སུ་གསར་ཤོག་གི་ལས་ཀ་བྱེད་འདོད་མཁན་ཡོད་ན་གཟའ་ཉི་མའི་ཉིན་འགྲེམ་སྤེལ་དགོས་པར་མངོན།
སྤོབས་པ་མཐའ་ཡས་ཀྱིས་བཤད་པ་ཅིས་མི་བདེན། གཟའ་སྤེན་པ་དང་གཟའ་ཉི་མ་གཉིས་ནི་གུང་གསེང་ཡིན་པས་བོད་ཀྱི་དུས་བབ་གཙོས་བོད་ཡིག་དྲ་རྒྱ་ཁག་གི་སྒོ་ཡང་ཡང་ཕྱེས་མོད་ནང་དུ་ཟ་རྒྱུ་འཐུང་རྒྱུ་ལྷག་མ་རེ་མ་གཏོགས་ཅི་ཡང་མི་འདུག དེ་བས་རྒྱ་ཡིག་དང་དབྱིན་ཡིག་གི་དྲ་རྒྱ་མི་ཀློག་ཀ་མེད་བྱུང་། དྲ་གཉེར་བ་ཚོའི་གཟའ་མཇུག་ལ་ངེས་བར་ཏུ་གསར་འགྱུར་དང་རྩོམ་ཡིག་རིགས་མདུན་ངོས་ལ་འཇོག་ཐུབ་ན་ཀློག་མཁན་མང་བ་མཁྱེན་པར་མཛོད། ཁྱེད་ཚོའི་དྲ་རྒྱ་དང་ཚགས་ཤོག་གཉེར་བ་རང་ཉིད་ཀྱིས་ཀློག་འདོད་པ་གཅིག་པུ་ཡིན་རྒྱུ་མ་རེད།
འདི་རྒྱ་གར་ནང་རེད་ལ་དེའི་ནང་གི་བོད་པའི་ཚགས་དེབ་ཆུང་ཆུང་ཞིག་ཀྱང་རེད། མ་ཟད་གཟའ་ཉི་མར་གུང་སེང་ཡང་རེད། འདིར་ཕྱི་རྒྱལ་ལྟ་བུའི་ཆ་རྐྱེན་མི་འདུག་ལ་གནས་ཚུལ་གསར་བ་ཡང་མང་པོ་མི་འདུག རྩོམ་རྙོག་་ཆོ་མེད་རེ་བཀོད་ནས་ཕན་ཐོག་ཡང་མི་འདུག་ལ། ཁྱེད་ལ་བོད་ཡིག་མང་ཙམ་ཀློག་འདོད་ཡོད་ན་བོད་ནང་གི་དྲ་ཐོག་ཏུ་རྒྱུགས་དང་དེ་རུ་ཉ་ག་ཉོག་གེ་མང་ནི་རེད།
སྤོབས་མཐའི་སྐད་ཆར་ཡིད་ཅུང་རངས། ཤར་ཁུག་ནས་བོད་དོན་དང་འབྲེལ་བའི་དཀའ་སློབ་ཡོད་ན་ལས། རྨོང་དད་ཀྱི་རྗེས་འབྲང་བ་ཞིག་བྱེད་ཉན་མི་བྲོ་ཟེར། མ་བྲོ་བ་ཙམ་ལས་རྨོང་དད་མིན་པའི་སྒོ་གསུམ་གྱི་བྱ་བྱེད་གང་ཡང་ཤེས་རབ་ཀྱི་རྩིས་ལ་བཀོད་པ་མ་མཐོང་ལ། གཞལ་བྱ་ཉེ་རྒྱང་ཅི་ལྟར་ཡང་ཧོལ་རྒྱུག་དང་ལད་མོའི་ས་ཅི་ཆོད་ལས། དཔྱོད་ཤེས་རིག་པའི་འཁོབས་ལ་བཅལ་ནས་རང་རྟོན་གྱིས་དཔྱད་བཤད་བྱས་རིགས་གཏན་ནས་མེད་སོང་འདུག་ན་ཁྱོད་རྨོང་དད་ཀྱི་རྗེས་སུ་འབྲང་བ་མིན་ཅི་རེད། ད་དུང་བོད་དོན་ཐད་ཀྱི་སྐད་ཆ་མིན་ན་ཉན་ཉན་མི་བྲོ་བ་བདེན་ན། དབུ་མའི་ལམ་ལས་འགུལ་ཚོགས་པས་བཤད་བཤད་ཐམས་ཅད་བོད་དོན་ཨེ་རེད།
སེམས་བསམ་པའི་གཏིང་ཞེ་རུས་པའི་གདིང་ནས་བོད་དོན་ལ་ཐུགས་ཁུར་ཅན་གྱི་ཚོགས་མི་ག་ཚད་ཡོད། ད་ཆ་དབུ་མའི་ལམ་གྱི་ལས་འགུལ་ལམ་ལམ་དབུ་མ་སྐྱེ་བོ་སྒེར་གྱི་སློང་གཟེད་ཙམ་དུ་སྒྱུར་བ་དེ་ཡང་བོད་དོན་ལ་ཐུག་པ་ཨེ་རེད།