བོད་ཀྱི་འབྱུང་འགྱུར་ལ་རྒྱང་ལྟ།

ཨོ་རྒྱན་ཉི་མ།
མཐོ་སྒང་གངས་ཅན་པའི་ལུགས་གཉིས་ཀྱི་དོན་ལ་མཁྱེན་པ་རྒྱས་པའི་མཁས་པའིི་དབང་པོ་དག་དང་། གཞན་ཡང་རང་གི་རིགས་ལ་ཞེན་པ་དཀར་བའི་སྐྱེ་བོ་རྒན་གཞོན་རྣམ་པ་སེམས་ལྷོད་ལ་བབས་ཏེ་གཅིག་གསོན་དང་། ང་ཚོར་སྔོན་ཞིག་ལ་འཛམ་གླིང་སུམ་གཉིས་དབང་དུ་བསྡུས་ཞེས་པའི་མཚན་གྱི་སྙན་པས་ཁེངས་ཏེ། སུ་ལ་ཡང་མགོ་མི་དགུར་བསམ་ནས་རང་སྲོག་བློས་བཏང་གིས་རྒྱ་ནག་གཞུང་ལ་ངོ་རྒོལ་དང་། ཡང་བོད་མི་རིགས་དང་རིག་གཞུང་ཞེས་པ་དེ་མི་དགོས་ཞེས་མདོ་ཤོར་གྱི་གཏམ་ཡང་མ་ཡིན་པར། དེ་གཉིས་ཀའི་ཟུར་ཞིག་ནས་སྤྱིར་འཛམ་བུ་གླིང་གི་སྐྱེ་འགྲོ་ལ་སྨན་པ་དང་། དགོས་ཁ་བ་གངས་ཅན་པའི་ཡོད་དགུ་ལ་གསོན་ཤུགས་རྒྱས་ནུས་པ་ནི་ཆོས་དང་རིག་གཞུང་རྙིང་པ་དག་རང་བློར་ཆུད་པའི་ཐོག་ནས། རིག་གཞུང་གསར་བའི་ཉིང་བཅུད་ལེགས་ཚོགས་ནང་འདྲེན་གྱིས་གཞོན་སྐྱེས་དག་གི་མདུན་ལམ་གཟེངས་སུ་ཐོན་པ་བཟོ་ཐུབ་པ་དེ་རེད། དོན་ལག་ལེན་ཐོག་ཏུ་འགྲོ་ཐུབ་པ་ཞིག་ཟེར་དུས་འཚེ་བའི་སྤྱོད་པས་ཕུ་མདའ་ལུང་དཀྲུགས་ཀྱིས་ཟེར་བ་མིན་ལ། དོན་མེད་ཚིག་ཚོགས་མང་པོ་བཀྲམ་ཤོག་ཟེར་བ་ཡང་མིན། ངས་འདི་ནས་ཟེར་འདོད་པ་ནི་རང་གི་རྐང་པའི་ཐོག་རང་ཉིད་ལང་ཐུབ་པ་ཞིག་བྱ་རོགས་ཞེས་སྙིང་ཐག་པ་ནས་རེ་བསྐུལ་ཞུ་བ་ཡིན། རང་གི་རྐང་པའི་གོང་དུ་རྐང་གཉིས་རྐང་བཞི་ཚང་མ་ལང་ནས་སྡོད་ཡོད་པ་མིན་ནམ་ཞེ་ན། ད་ལྟ་ང་ཚོའི་བོད་མི་མང་ཆེ་བ་རྐང་པ་ཡ་གཅིག་རང་གི་རྐང་པ་ཡིན་ཡང་། ཡ་གཅིག་ནི་ཕ་རོལ་པོ་ལས་གཡར་ནས་འདུག་ཡོད་མཁན་རྐྱང་རྐྱང་རེད། དེ་ཕྱིར་རང་གི་རྐང་པ་ཁོ་ནས་སྟེང་དུ་ལང་ན་ལེགས་ཚུལ་གླེང་འདོད་པ་ཡིན།
རང་གི་རྐང་པའི་སྟེང་དུ་ལང་དགོས་ན་རང་ཉིད་གང་ལས་འབྱུང་བ་ཡིན་པ་ཤེས་དགོས་པ་དང་གཅིག རང་གི་ཤ་ཁྲག་དེ་སུའི་ཤ་ཁྲག་དང་འབྲེལ་ཡོད་མེད་རྟོགས་དགོས་པ་དང་གཉིས། རང་ཉིད་འགྲོ་བ་མིའི་རིགས་ཀྱི་གྲལ་དུ་ཚུད་ཐུབ་པར་བྱ་རྒྱུ་དང་གསུམ། རང་གི་ཆོས་དང་རིག་གཞུང་བདག་པོ་རྒྱག་ཐུབ་ངེས་བྱེད་དགོས་པ་དང་བཞི། གཞན་པའི་རིག་གཞུང་ལེགས་ཉེས་འདེམས་ཏེ་ལེགས་པ་ནང་འདྲེན་གྱིས་རང་བློ་མ་ཚིམ་པར་དུ་སྦྱངས་ཏེ་གྲུབ་འབྲས་གཟེངས་སུ་ཐོན་པ་བླངས་པ་ལྔ་ནི་ངེས་པར་ཤེས་དགོས་པའི་གནད་འགག་དག་རེད། དེ་ལྔ་པོ་ཞིབ་མོས་བློ་ཡིས་རྟོགས་ནུས་པའི་ཤེས་ཡོན་དེ་རང་ལ་ལྡན་མིན་ཡང་བསམ་བློ་ལེགས་པར་བཏངས་ཏེ། གལ་སྲིད་ལྡན་ན་འཛམ་བུ་གླིང་འདིའི་གོང་གི་མིའི་རིགས་ཀྱི་གྲལ་དུ་ཚུད་པ་རེད། དེ་དག་མ་ཚང་ན་ད་དུང་མི་ལུས་ཕྱེད་ཀ་ཙམ་ལས་མི་གསོན་པོ་ཞིག་ཏུ་གྱུར་མེད་པས་བརྩོན་འགྲུས་རྒྱ་ཆེན་པོས་འབད་དགོས་སོ། །
བོད་ཀྱི་ཆོས་བརྒྱུད་དག་ལ་མཚོན་ན་སེར་འབྲས་དགེ་གསུམ་ནི་སྤྱིར་གཞུང་བཀའ་པོད་ལྔ་ལ་མཁས་པ་རེད་དེ། ད་ལྟ་དེའི་གོང་དུ་རིག་གཞུང་གཞན་པ་རྒྱ་ཡིག་དང་། དབྱིན་ཡིག ཚན་རིག་གསུམ་གསར་བསྣན་གྱིས་སྦྱང་འབྲས་ལེགས་པར་ཐོན་ཏེ། ལོ་རེར་རྒྱུགས་སྤྲོད་པའི་གྲངས་ཀ་བརྒྱ་ཕྲག་ལས་བརྒལ་བ་དང་། རང་རང་གི་གདན་ས་ཁག་ཏུ་སྦྱངས་པ་ཙམ་མ་ཡིན་པར་ཤར་ནུབ་ཀྱི་མཐོ་སློབ་ཁག་ཏུ་ཡང་མང་པོ་ཕེབས་པ་ཐོས་སོང་། རྗེས་སུ་ཡི་རང་ཡོད། ཡག་པོ་ཞེ་དྲ་རེད། ཡིན་ན་ཡང་ཁོ་ཚོ་ལ་སྐྱོན་ཞིག་ཡོད་པ་དེ་རང་ལྟ་མཆོག་འཛིན་ཆེ་དྲགས་པས། རང་གི་སྐྱོན་མི་མཐོང་ཞིང་གཞན་གྱི་ཡོན་ཏན་མ་མཐོང་བས། དགེ་བཤེས་མདོ་སྔགས་གཉིས་ལ་བློ་ལ་འཆད་ཤེས་མཁན་ཞིག་དང་། ཆོས་བརྒྱུད་གཞན་པ་དག་གི་སློབ་སྦྱོང་ཨེན་ཙམ་ལས་མེད་མཁན་གཉིས་འགྲོ་དོན་ད་དུང་སློབ་སྦྱོང་དམན་པ་ཆེ་བ་རེད། དེ་ནི་ཆོས་བརྒྱུད་རིས་མེད་ལ་དད་པ་དང་དག་སྣང་ཡོད་མེད་དང་། རང་ཕྱོགས་ལ་ཆགས་པ་ཆེར་མེད་པས་རྟགས་རེད། རྙིང་མ་དང་། ས་སྐྱ། བཀའ་བརྒྱུད་གསུམ་ལ་མཁས་པ་མང་པོ་རེད་དེ། དགེ་ལྡན་དང་བསྡུར་ན་ཅུང་ཟད་ཞན་ས་རེད་དྲན་བཞིན་ཡོད། དེ་ཙམ་དུ་མ་དེང་སང་བཤད་གྲྭ་དང་བསྒྲུབ་གྲྭ་ཁག་མང་པོ་རེད། དོན་ནང་ཉམས་གསོན་པོ་ཚད་དུ་བསླངས་ཏེ་འཆད་རྩོད་རྩོམ་གསུམ། བཤད་བསྒྲུབ་ལས་གསུམ་གྱི་དོན་ལ་གཞན་དྲིང་མི་འཇོག་པའི་མཁས་དབང་བཙན་བྱོལ་ནང་ལ་ཉུང་ཉུང་རེད། དེ་ཕྱིར་ཚང་མས་ཐོབ་གོ་ས་ཙམ་དང་། དངུལ་ཁུག་དགང་མིན་ལ་ཐུགས་བསམ་བཞེས་མི་འདུག་པར་བཤད་གྲྭར་ཞུགས་ན་མདོ་སྔགས་རིག་གནས་དང་བཅས་པར་རང་གིས་བསམ་ན་ཡང་ཡོད་བསམ། མིས་བསམ་ན་ཡང་འདུག་བསམ་པ་ཞིག་གི་ཐོག་ནས། གོང་དུ་ཞུས་པ་བཞིན་དབྱིན་རྒྱ་གཉིས་ཀྱི་སྐད་ཡིག་དང་། ཚན་རིག་གི་སྦྱངས་འབྲས་བླངས་ཏེ་དགེ་ལྡན་པ་སོགས་སྔོན་ཐོན་པ་དག་དང་གོམ་པ་མཉམ་དུ་སྤོ་ཐུབ་པ་ཞིག་ལ་རེམ་དགོས་པར་སེམས།
ད་དུང་གཞན་ཞིག་ནི་གོང་ས་མཆོག་གིས་རིས་མེད་གནང་སྟེ་ས་ཆེན་འདིའི་སྐྱེ་དགུའི་རེ་བ་ཡིད་བཞིནདུ་བསྐང་ཐུབ་པ་བྱུང་བ་རེད། དེའི་ཐབས་ལམ་དེ་སླད་ནས་རི་བོ་དགེ་ལྡན་པ་དག་གིས་བེད་ཆོད་བྱ་བ་ལ་གྲ་བསྒྲིག་བྱེད་བཞིན་པ་རེད། རྙིང་མའི་རྫོགས་ཆེན་དང་། བཀའ་བརྒྱུད་པའི་ན་རོ་ཆོས་དྲུག ཇོ་ནང་པའི་སྦྱོར་དྲུག ས་སྐྱ་པའི་ལམ་འབྲས་དག་འཆད་པ་ལ་ཁྲིད་རྒྱུན་དང་ལུང་རྒྱུན་ཆ་ཚང་གསན་མྱོང་བྱས་ཟིན་པ་རེད། སླད་ནས་དེ་འདྲའི་བྱེད་སྒོ་དག་སྤེལ་འོང་དུས་ངའི་རེད། ཁྱེད་ཀྱི་མ་རེད་ཟེར་བ་ཙམ་མ་ཡིན་པར་རང་རང་གི་བརྒྱུད་པའི་ཕྱག་བཞེས་དང་། མན་ངག ཁྲིད་རྒྱུན་དག་སྤེལ་བ་ལ་བྱིན་བརླབས་ཀྱི་ཚན་ཁ་མ་ཉམས་པ་དང་། བརྒྱུད་པའི་མན་ངག་དང་ལྡན་པར་བྱ་རྒྱུ་དེ་གལ་ཆེན་པོ་ཞེ་དྲ་རེད། ཡང་ན་སྐབས་དེ་དུས་སུ་དང་གང་གིས་ཆོས་བརྒྱུད་ནང་ཕན་ཚུན་གྱི་མན་ངག་དག་སྤེལ་འོང་དུས་ཕྱོགས་དང་རིས་སུ་གཅོད་པ་གང་ཡང་མེད་པར། རྗེས་སུ་ཡི་རང་བྱ་ཐུབ་ན་ཆོས་པ་རབ་ཀྱི་བྱེད་སྟངས་རེད། ཡིན་ན་ཡང་དེ་འདྲའི་ཆོག་ཤེས་དང་། ཆོད་སེམས་དེ་ང་ཚོ་ལ་ཡོད་ས་རེད་བསམ་པའི་གདེངས་ཚོད་ང་ལ་མེད། ངས་འདི་ནས་བཤད་པ་མཐའ་དག་ཆོས་ལུགས་ཀྱི་ཆགས་སྡང་བཤད་པ་མིན་ཏེ་ང་རང་ཉམས་ཞིབ་བྱས་པའི་གྲུབ་འབྲས་དང་། རྗེས་ཆོས་བརྒྱུད་མཐའ་དག་འདྲ་མཉམ་ཞིག་བྱུང་ན་བསམ་པའི་རེ་འདུན་ཉག་གཅིག་ལ་སེམས་བཞིན་བྲིས་པ་ཡིན།
ཡང་གཞན་ཞིག་ནི་གོང་ས་མཆོག་དགོང་ལོ་བསྒྲེས་པོ་རེད། ད་ག་ཚོད་བཞུགས་ན་ཡང་ཁོང་གི་རྒྱལ་ཚབ་ཅིག་གྲ་བསྒྲིགས་བྱ་བའི་དུས་ཚོད་ལ་བསླེབ་པ་རེད། གང་ཡིན་ཞེ་ན་བོད་ཀྱི་ལས་དབང་ཆོས་དང་འབྲེལ་བ་ཞིག་རེད། དེ་ཕྱིར་ད་ལྟ་ནས་སྲིད་རྐྱང་པས་རང་འགོ་ཐོན་མི་སྲིད་པས། སྲིད་ཀྱི་ཤེད་ཤུགས་ཡོངས་སུ་མ་རྫོགས་ཀྱི་བར་དུ་ཆོས་ཀྱི་དེད་དཔོན་ཞིག་དགོས་ངེས་རེད། དེ་ཕྱིར་སུ་ཡིས་གོང་ས་མཆོག་གི་རྒྱལ་ཚབ་ཏུ་འོས་སམ་ཞེས་བོད་མི་དག་གིས་རང་ལ་དྲི་བ་རེ་བསྐོར་ཏེ། ཁ་ནང་དུ་བསྐོར་ལ་ཐུགས་བསམ་དྲང་མོ་ཞིག་བཞེས་དང་། ངས་བལྟས་ནས་ཀརྨ་པ་ལས་གོང་ན་ད་ལྟའི་ཆར་གོང་ས་མཆོག་གི་རྒྱལ་ཚབ་ཆོག་པ་ཞིག་སུ་ཡང་མི་འདུག ཀརྨ་པའི་སྐུའི་བསོད་ནམས། གསུང་གི་བརྗོད་པ། རིགས་པའི་སྟོབས། མཛད་པའི་ཕྲིན་ལས་སོགས་གཞན་པ་དག་གིས་ཕར་ཞོགས་གཞུང་ཆེན་བཀའ་པོད་ལྔ་བློ་ལ་བྱང་བའི་དགའ་ལྡན་ཁྲི་པ་དང་། ས་སྐྱ་གོང་མ། རྙིང་མའི་དབུ་འཛིན། བོན་པོའི་ཁྲི་འཛིན་སོགས་ཆེ་དགུ་དག་གིས་ཀྱང་དོ་ཟླ་བྲལ་བ་ཞིག་ཏུ་མཐོང་ནས་ངས་འདིར་སྤོབས་པ་ཆེན་པོའི་ངང་ནས་བཤད་པ་ཡིན། ཁོང་ལ་གོང་ས་མཆོག་གིས་ཐུགས་བརྩེ་གནང་བ་དང་། ཞལ་ཏ་གནང་བ་ཡང་རབ་དང་རིམ་པ་ཐོས་སོང་ལ། བརྙན་འཁོར་མང་པོ་མཐོང་རྒྱུའི་བསྐལ་བ་ཐོབ་པ་དང་། རྒྱ་མི་རིགས་སྡོད་སའི་ཡུལ་གྲུ་ཁག་དང་། ཡོའུ་རོབ། ཨ་རི་སོགས་ནུབ་ཕྱོགས་སུ་ཡང་གོང་ས་མཆོག་གོང་དུ་ཕུད་ན་ཁོང་ལས་འགྲོ་དོན་ཆེ་བ་དང་། ཆོས་པ་ཡིན་མིན་ལ་མ་ལྟོས་པར་དོ་སྣང་བྱེད་བཞིན་པ་ནི་ངས་བཤད་པ་ཙམ་མ་ཡིན་ཁྱེད་རྣམས་པས་ཀྱང་མཐོང་ཆོས་མངོན་གྱུར་རེད། དེ་ཕྱིར་རང་མ་གཏོགས་མིག་གིས་མི་མཐོང་པའི་དགེ་ལྡན་པའི་དགེ་བཤེས་མགོ་མཁྲེགས་དེ་ཚོས་རྒྱལ་བསྟན་སྤྱི་དང་བྱེ་བྲག་ལ་ཐུགས་བསམ་བཞེས་ཏེ། ཀརྨ་པའི་མཛད་འཕྲིན་ལ་རམ་འདེགས་གནང་རོགས་ཞེས་སྙིང་ཐག་པ་ནས་རེ་བསྐུལ་ཡིན། ཁྱེད་ཅག་དགེ་ལྡན་པའི་དགེ་འདུན་པ་དག་གིས་ཐུགས་བསམ་ཞིག་བཞེས་ན་ཆོས་བརྒྱུད་གཞན་པ་ཚོསངོས་ལེན་བྱེད་ངེས་རེད། དེ་མིན་གོང་ས་མཆོག་མ་བཞུགས་དུས་བཙན་བྱོལ་བོད་གཞུང་རྐུབ་སྟེགས་བསྡུ་བསོགས་རྒྱགས་ཏེ་བོད་ལ་ལོག་འགྲོ་རྒྱུ་ཡིན་ན་ཁྱེད་ཅག་གིས་གང་བདེར་གྱིས་ཤིག ང་ལ་དམིགས་བསལ་ཞུ་བ་གཅིག་ལས་གཞན་གང་ཡང་མེད། གཅིག་དེ་ནི་བོད་ཀྱི་མ་འོངས་པའི་གཞོན་སྐྱེས་དག་མི་གསོན་པོ་ཞིག་ཆགས་པ་ལ་མཁས་བླུན་དང་། རྒན་གཞོན་ཚང་མས་ཐུགས་ཀྱི་རྒྱན་དུ་འཆང་བར་ཞུ་ཞེས་གསོལ་བ་འདེབས་པ་ལགས། ང་ཀརྨ་པའི་སྐུ་མདུན་འགྲོ་མྱོང་མེད་ལ། ཁོང་ས་ནས་གང་ཡང་རག་མྱོང་མེད། ཡིན་ན་ཡང་ཉམས་ཞིབ་བྱས་པའི་གྲུབ་དོན་ནམ། ང་རང་གི་མཐོང་ཐོས་དག་ཚད་གཞིར་བཟུང་སྟེ་སྨྲས་པ་ཡིན།
དེ་ལས་གཞན་ཞིག་ནི་བོད་ནས་ཡིན་ན་རེད། བཙན་བྱོལ་ནས་ཡིན་ན་རེད། སྐྱ་སེར་ལ་མ་ལྟོས་པར་མགོ་ཡོད་ཀྱང་ཀླད་པ་མེད་མཁན་དང་། སྙིང་ཡོད་ཀྱང་རྣམ་ཤེས་མེད་པའི་མགོ་སྟོང་མདོ་མེད་འགའ་ཞིག་གིས་ཆོས་ཞེས་པ་དེ་རྩ་མེད་དུ་གཏོང་དགོས་ཀྱིན་འདུག་ཅེས་རང་གི་མ་འཇོན་པ་རྒྱུ་མཚན་དུ་བྱས་ཏེ་བཤད་མཁན་དང་། ཉན་མཁན་མང་པོ་ཞིག་མཐོང་སོང་། ངོ་མ་ང་དེ་ཚོ་མཐོང་འོངས་དུས་ཤ་ཡང་ཚ་ལ་སྙིང་ཡང་རྗེ་ཡོང་གི་འདུག་ལ། ཞེ་ཡང་མེར་ལ་ཁོང་ནས་ཁྲོ་བ་དྲག་ཏུ་ཕྱུར་ཏེ་ཡིད་མི་བདེ་བའི་གནས་སུ་བསྐྱལ་བའང་གྲངས་མེད་ཡིན། དགེ་འདུན་པའི་སྡེ་གཉིས་གང་གི་ཁོངས་སུ་མ་གཏོགས་པའི་ཕུང་གསུམ་འདི་ཚོས་ཁ་ནས་མ་སྨྲས་ཀྱང་། དོན་ལག་ལེན་ལས་འབྲས་མེད་པར་འདོད་པ་དང་། ཆོས་ལ་དད་པ་དང་དག་སྣང་རྩ་བ་ནས་མེད་མཁན་ཚོའི་གྲས་རེད། དེ་ཕྱིར་ངས་ནང་པའི་བསྟན་དགྲ་ངོ་མ་ཕུང་གསུམ་པ་འདི་ཚོ་རེད་འདུག་ཅེས་གྲངས་མེད་ཞུས་ཚར་ཡིན་ཏེ། དོན་གྱི་ངོས་ལེན་ཐོབ་མཁན་མང་དུ་ཡོད་ཀྱང་དངོས་སུ་གདོང་ལ་མཆོང་མཁན་དཀོན་པོ་རེད། དེ་ཕྱིར་ད་ནས་བཟུང་བསྟན་པ་ལ་ཤ་ཚ་དང་། དད་ལྡན་ལ་སྙིང་རྗེ་ལྟ་མཁན་རེ་ཡོད་ན་ཕུང་གསུམ་པ་རྩ་མེད་དུ་གཏོང་བ་ལ་ལས་འགུལ་རབ་དང་རིམ་པ་སྤེལ་དགོས་ཀྱིན་འདུག གལ་སྲིད་ད་དུང་ཕུང་གསུམ་པ་ཚོ་ལ་རང་དབང་སྟེར་བསྡད་ན་ནང་ཆོས་ཀྱི་བྲོ་བ་ཡལ་ངེས་རེད། བོད་པའི་ནང་ཆོས་ནི་བོད་པའི་སྲོག་དང་འབྲེལ་བ་ཡོད་པས། གཞོན་སྐྱེས་དག་གིས་ཀྱང་ནང་ཆོས་ལ་དགག་པ་དང་། ལོག་ལྟ་མི་བྱ་བར་ཆོས་ཉམས་སུ་བླངས་ཏེ་ཚན་རིག་སྦྱང་ན་སྦྱོངས། སྐད་ཡིག་སྦྱང་འདོད་ན་ཡང་རང་མོས་རེད། ཡིན་ན་ཡང་རང་གི་སྐད་ཡིག་དང་། རང་གི་ཆོས་དང་། རང་གི་རིག་གཞུང་དག་ལ་དགའ་ཞེན་དང་དུང་ཞེན་ནི་དུས་ནམ་ཡང་ཡོད་དགོས་པ་ཞིག་རེད། དེ་མེད་ན་ཁྱེད་ཉིད་མི་རིགས་དེའི་གྲལ་ན་ཡོད་བསམས་ཀྱང་རང་བཞིན་གྱིས་ཐོན་ངེས་པས། བདག་ཉིད་བདག་གི་མགོན་དུ་བཞེངས་ཏེ། རང་གི་མདུན་ལམ་རང་གིས་བཟོས་ལ། རང་གི་གཉའ་ཆག་མི་དགོས་པ་དེ་མི་རེ་ངོ་རེ་ནས་བྱ་དགོས་པ་དེ་རང་གི་ལས་འགན་དང་པོ་དེ་རེད།
དེང་སང་བོད་ལ་རྙོག་ཟིང་ཆེ་བའི་སྒང་རེད། དེ་ཡང་ཕར་བལྟ་བསྡད་དུས་འགྲན་བསྡུར་གྱི་ངོ་བོ་ཞིག་ལ་འགྲོ་བཞིན་ཡོད་ས་རེད་བསྙམ་པ་ཞིག་འདུག ཨམ་མདོ་ཡིས་བྱེད་ན་ང་ཚོ་ཁམས་པས་ལོས་བྱེད་བསམ་པ་དང་། ཁམས་པ་བྱས་ནས་དབུས་གཙང་གིས་ལོས་བྱེད་དྲན་བཞིན་རང་སྲོག་བློས་བཏང་གིས་གདོང་ལ་མཆོང་བཞིན་པ་རེད། རང་སྲོག་བློས་བཏང་ཟེར་བ་དེ་སེམས་ཤུགས་ཆེན་པོ་རེད། འདས་པའི་ཆར་ཡང་རྒྱ་གར་གཙོས་པའི་རྒྱལ་ཁབ་མང་པོ་ཞིག་གིས་རང་བཙན་སྲོག་བློས་བཏང་བྱེད་པ་ལ་བརྟེན་ནས་ལོན་པ་རེད། དེ་ཡང་འགྲོ་སྟངས་ཤིག་ལོས་ཡིན། མི་རིགས་སུ་ཡིན་ཡང་རང་དབང་ལ་འཐབ་རྩོད་བྱ་དགོས་པ་དང་། བྱེད་འོས་པ་ཞིག་རེད། ཡིན་ན་ཡང་བོད་ལ་མཚོན་ན་དེ་འདྲའི་ལས་སླ་པོ་ཞིག་གང་ན་ཡོད། ཁྱེད་རང་ཚོས་གཅིག་སོམ་དང་། གཅིག་ནས་འཛམ་བུ་གླིང་རྒྱལ་ཁབ་མང་པོས་སྐྱབས་གནས་སུ་འགྲོ་ལ་ཉེ་བའི་དཔལ་འབྱོར་ཡར་ཐོན་ཅན་གྱི་རྒྱལ་ཁབ་ཅིག་དང་། གཉིས་ནས་ཆབ་སྲིད་དང་དམག་ལ་བྱང་ཆ་བའི་མི་རིགས་ཤིག་དང་། གསུམ་ནས་རྡུལ་ཕྲན་གོ་མཚོན་འཛད་མེད་དུ་ལོངས་སྤྱོད་རྒྱུ་ཡོད་པའི་དམག་དཔུང་ཞིག་དང་། དེ་དག་ཀྱང་རི་བོ་ཧི་མ་ལའི་མགུལ་ནས་འཁྱུད་ཅིང་། འོག་ཏུ་སྦས། བོད་ཀྱི་མཐའ་འཁོར་གྱི་རི་ཆེ་ཆུང་མང་པོའི་ནང་དུ་གོ་མཚོན་དང་དམག་སྦས་འཇུག་བྱེད་ཡོད་པ་ནི་སྨོས་མ་དགོས་པ་ཞིག་རེད། ད་དེ་དག་གི་ལག་ནས་རང་དབང་ཞིག་ལེན་འདོད་པའི་མི་ནི་ལྐུགས་པའི་ཨུ་ཚུགས་རང་རེད།
དབུ་མའི་ལམ་དེས་བོད་ཀྱི་ལོ་རྒྱུས་དང་། བོད་ཀྱི་འབྱུང་འགྱུར་གྱི་རང་དབང་དང་། བདག་དབང་ལ་ནག་ཐིག་ཆེན་པོ་ཞིག་བཟོས་ཚར་བ་རེད་དེ། ང་ཚོ་དེའི་ལམ་ཁ་དེར་མ་འགྲོ་རང་འགྲོ་རེད། ད་ལྟ་གོང་ས་མཆོག་བཞུགས་བཞིན་པ་རེད། དབུ་མའི་ལམ་སྲོལ་བཏོད་མཁན་ཁོ་རང་རེད། དེ་མཇུག་སྐྱོང་མཁན་ཡང་ཁོང་དང་། ཁོང་འདྲ་པོ་ཞིག་ལས་གཞན་པ་ཚོས་བསྐྱང་ཐུབ་པ་ཁག་པོ་རེད། དེ་ཕྱིར་རྒྱ་ནག་ཕྱོགས་ནས་ཀྱང་གོང་ས་མཆོག་གི་གསུང་ལ་ཉན་ན་རང་གཞན་གཉིས་ཀར་ཕན་པའི་ཐབས་མཁས་ཤིག་ལོས་ཡིན། རྒྱ་ནག་ལ་མཚོན་ན་ནང་པ་སངས་རྒྱས་པའི་རྒྱལ་ཁབ་ཆེ་ཤོས་ཤིག་རེད། བོད་ལ་མཚོན་ན་སྔོན་ཆོས་རྒྱལ་དེ་ཚོའི་སྐུ་དུས་ནས་ནང་པའི་རྒྱལ་ཁབ་ཆགས་པ་རེད་ལ། རྒྱ་བོད་གཉིས་འབྲེལ་ལམ་ཆེན་པོ་རེད། དེ་ཕྱིར་གོང་ས་མཆོག་ལྟ་བུ་ཞིག་བོད་དང་རྒྱ་ནག་ལ་གདན་འདྲེན་ཞུས། རྒྱ་བོད་གཉིས་ཀའི་མི་སེར་ལ་བཀའ་སློབ་ཟབ་རྒྱས་ཤིག་གནང་བཅུགས་ན་རང་བཞིན་ཤུགས་ཀྱིས་རྒྱལ་ནང་བདེ་འཇག་ཅིག་བསླེབ་པ་ལ་ངས་སེམས་ཐག་བཅད་ནས་སྨྲ་བཏུབ། བོད་པ་ཚོས་ཀྱང་གོང་ས་མཆོག་གི་གསུང་ལ་ཉན་ངེས་དང་། རྒྱ་ནག་མི་སེར་ལ་མཚོན་ན་ཡང་གོང་ས་མཆོག་ལ་དད་པ་ཆེན་པོ་རེད།
གལ་སྲིད་གོང་ས་མཆོག་མ་བཞུགས་ན་དབུ་མའི་ལམ་དེ་སུ་ཡིས་མཇུག་སྐྱོང་ཐུབ་ས་རེད་ཅེས་པའི་དྲི་བ་དེ་ཡང་བསླེབ་པ་རེད། དེ་ནི་ངས་གོང་དུ་ཞུས་པ་ཀརྨ་པ་ལས་གཞན་སུ་གཅིག་གིས་ཀྱང་ཁག་པོ་རེད། གང་ཡིན་ཟེར་ན་ཀརྨ་པ་རང་ངོས་ཆ་རྐྱེན་དེ་དག་ཚང་བ་སྨོས་མེད་ཐོག ཆོས་བརྒྱུད་ཕལ་ཆེ་བས་ཁེ་ལེན་ངེས་རེད། དེ་ཕྱིར་བློ་བཟང་སེང་གེ་ཆབ་སྲིད་ལ་མཁས་ན་ཀརྨ་པ་བདག་པོ་རྒྱོབས་ཤིག ཟམ་གདོང་བླ་མ་ཆོས་ལ་མཁས་ན་ཀརྨ་པ་བདག་པོ་རྒྱོབས་ཤིག ན་ནིང་ད་ལོའི་ཀརྨ་པའི་དོན་རྐྱེན་དེ་ལ་ལས་ཟེར་ན་ཇག་སྣ་ནང་ལ་ཟུག་འདུག་ཟེར། ལ་ལས་ཟེར་ན་ཇག་སྣ་ཕྱི་ལ་ཟུག་འདུག་ཟེར། གང་ལྟར་ཡང་ངས་བལྟས་ན་ཕྱི་ནང་གཉིས་ཀ་ལ་ཟུག་ཡོད་པར་སེམས། རང་མི་རང་གིས་བདག་པོ་མ་རྒྱག་ན་རྗེས་སུ་འགྱོད་དུས་ཕྱི་སྲིད་པ་རེད་ལ། རང་འགོ་རང་གིས་མ་བསྐྱབས་ན་རྗེས་སུ་མགོན་མེད་ལུས་དུས་ཁག་པོ་རེད། དེ་སང་གཞོན་སྐྱེས་བསམ་མེད་འགའ་ཞིག་གི་སེམས་ལ་བླ་མ་གྲྭ་བ་ཟེར་བ་དེ་ང་ཚོ་བོད་ལ་དགོས་མཁོ་མི་འདུག་ཟེར་མཁན་མང་པོ་རེད། ཡིན་ན་ཡང་དེ་ནི་རང་གི་ལྟོ་དགང་བ་དང་། སྐྱག་པ་གཏོང་རྒྱུ་གཉིས་ལས་བསམ་བློ་གཞན་མེད་པ་ཞིག་གི་བསམ་བློ་དང་། མིའི་ལུས་ལ་དུད་འགྲོའི་འདུ་ཤེས་ཅན་ཞིག་གི་འཛིན་སྟངས་ལས་གཞན་གང་ཡོད།
ལོ་ངོ་བཞིའི་ཡར་སྔོན་གྱི་བོད་མིས་ཞི་རྒོལ་ཆེན་མོ་དང་། ད་ལོའི་རང་སྲོག་བློས་བྱེད་མཁན་ཚོར་ཕྱོགས་གཅིག་ནས་ཡིད་སྨོན་བྱེད་བཞིན་ཡོད། གང་ཡིན་ཞེ་ན་སེམས་ཤུགས་ཆེན་པོ་རེད། ཕྱོགས་གཅིག་ནས་བསམ་བློ་བཏང་བ་ཡིན་ན་ཕུགས་རྒྱང་རིང་བའི་བསམ་བློ་མེད་པའི་འདུ་ཤེས་ཙམ་པོ་ཞིག་དང་། རང་གི་མདུན་དུ་ལང་ཡོད་པའི་ཁ་གཏད་དེའི་འཇོན་ཐང་དང་། ནུས་པ་ལ་ཚོད་དཔག་རྩ་བ་ནས་མེད་པར་གླེན་ལས་བྱེད་པ་ཤ་སྟག་ཏུ་འཁུམས། གལ་སྲིད་ད་དུང་བོད་མི་ཚོ་ཡར་ལང་ན་རྒྱ་ནག་གཞུང་གིས་དུས་ནམ་ཡང་ཕྱིར་ནུར་བྱེད་མི་སྲིད་པ་དང་། བོད་མི་ལང་། རྒྱ་ནག་གཞུང་གིས་དེ་དག་བསད་གང་ཐུབ་བྱེད་ན་ལས་མཐའ་གང་ལ་ཐུག་སོང་། སྐབས་དེ་དུས་ནུབ་ཕྱོགས་རྒྱལ་ཁབ་ག་གེ་མོ་ནས་མཉམ་འབྲེལ་རྒྱལ་ཚོགས་ཟེར་བ་དང་། ཨ་རི་ཟེར་བ་དང་། ཡོའུ་རོབ་ཟེར་བ་ནས་དམག་དང་མཚོན་ཆ་མཉམ་འབྲེལ། ཆབ་སྲིད་དང་དཔལ་འབྱོར་མཉམ་འབྲེལ་ཐོག་ནས་ཧི་མ་ལ་ཡི་མགུལ་དུ་བསླེབ་འོང་ན་རྒྱ་ནག་གཞུང་གི་ཁས་ལེན་རྒྱུ་རེད་པས། དེ་དུས་བོད་མི་ཡོངས་རྫོགས་རྩ་བརླགས་འགྲོ་སྲིད་པ་རེད་ལ། བོད་ཀྱི་རང་བྱུང་གི་ཁོར་ཡུག་གཏོར་བརླགས་ཀྱིས་ལོ་ངོ་སྟོང་ཕྲག་ནས་ཁྲི་ཕྲག་བརྒལ་ན་ཡང་འགྲོ་བ་མིའི་རིགས་ཕར་ཞོགས། རྩི་ཤིང་ནགས་ཚལ་དག་སྐྱེ་བ་ལ་ཡང་ཁག་པོ་ཆགས་ངེས་རེད། ཁྱེད་ཚོས་རྡུལ་ཕྲན་གྱི་ཉིང་དུག་དེ་མཁའ་དབུགས་དང་འགྲོགས། གཙང་ཆབ་དང་འགྲོགས། རྩི་ཤིང་དང་འགྲོགས་ཏེ་སྲོག་ཆགས་ཀྱི་ལྟོ་བར་སོང་ན་དེའི་ལུས་པོ་དུག་ཏུ་གྱུར་བར་མ་ཟད། དེ་དག་གི་སྐྱེས་རྒྱུན་ཡོངས་རྫོགས་དུག་ཅན་དུ་བསྒྱུར་བའི་ལོ་རྒྱུས་གཟིགས་མྱོང་ངམ།
ད་ནས་བཟུང་ཚང་མས་བསམ་ཤེས་ཀྱིས་བོད་གཞིས་བྱེས་གཉིས་སུ་ངོ་རྒོལ་བྱ་རྒྱུ་དེ་ཉུང་དུ་གཏོང་ན་ལེགས་པར་སེམས། གཞོན་ནུ་ཚོགས་པས་བཤད་པའི་ལྟ་གྲུབ་དང་། ལང་ཕྱོགས་སོགས་ཀྱང་ལོ་རྒྱུས་བདེན་དཔུང་བྱེད་བཞིན་པ་རེད། དབུ་མའི་ལམ་པ་དག་གིས་ད་ལྟ་དངོས་ཡོད་ཀྱི་གནས་སྟངས་ལ་གཞིག་ནས་ལག་ལེན་བསྟར་བཞིན་པ་རེད། དེ་གཉིས་ལ་རྒྱུ་མཚན་རེ་དང་། ཁུངས་ལུང་རེ་ཡོད་པས་གཅིག་བདེན་གཅིག་རྫུན་ཞེས་བཤད་པའི་སྤོབས་པ་ང་ལ་མེད་ཀྱང་། ད་ལྟ་ང་ཚོས་རྒྱ་བོད་གཉིས་ཀར་ཕན་པའི་ལས་འགུལ་ཞིག་གི་ཐོག་འགྲོ་བསྐྱོད་བྱ་ཐུབ་པ་ཡིན་ན་ལེགས་པར་སེམས། དེ་མིན་རང་ལ་མེད་མི་ལ་མེད་པ་ཞིག་ཆགས་སོང་ན་དགོས་འབྲས་ཀྱི་སྟོང་པ་མ་ཡིན་ནམ། ཞུ་དག་གྲུབ་མེད།
སྤྱི་ལོ་༢༠༡༢་ཟླ་༠༡་༢༩་ལ་བལ་ཡུལ་རྒྱལ་ས་ནས་ཨོ་རྒྱན་ཉི་མས་སོ། །