ད་ལོའི་ཁ་བ།

ལོ་གསར་པའི་ཐོག་མའི་རྩོམ་ཕུད།

རྩེ་སྐར།

༡ ཁ་བ་དང་ལོ་གསར།

ད་ལོ་ཁ་བ་བབས་བྱུང༌།
མི་རྣམས་ཀྱིས་སྤྲོ་སྣང་ཞིག་རུམ་ནས་བྲེལ་བ་ཧ་ཅང་ཆེ་དུས།
ཡང་ན། མྱ་ངན་ཞིག་མིད་ནས་སེམས་པ་འཁྱག་ཤི་ཐེབས་དུས།
ཁ་བའང་བྲེལ་ཟང་ཟིང་མི་ཡུལ་ལ་ཁད་ཀྱིས་བབས།
ད་ལོའི་ཁ་བ་འབབ་སྟངས་དེ་ནམ་རྒྱུན་དང་མི་མཚུངས་པར།
རོ་ལ་རྔམ་པའི་བྱ་རྒོད་ཀྱི་ཚོགས་བཞིན་བསྙིལ་ཏེ།
དགུན་གཞུང་ན་ཙག་གིས་བསྡམས་པའི་ས་གཞི་དེ་དང༌།
མི་ཚོགས་ཀྱིས་གོས་ཧྲུལ་བཞིན་ཕུད་པའི་ལོ་རྙིང་དེར།
རྐང་བཅག་གིས་དག་ཁྲུས་ཡང་ཡང་མཛད་ཅིང༌།
ལོ་གསར་པ་ཞིག་བསུ་བའི་ཁ་བཏགས་སྒྲོན་པ་དང་མཚུངས།

༢ ཁ་བ་དང་མི་ཚོགས། ད་དུང་གཞན་དག

ད་ལོ་ཁ་བ་འབབ་སྟངས་དེས།
མི་ཚོགས་ལ་ལོ་གསར་དང་ལྷན་དུ་སེམས་འཁྲལ་འཕར་མ་ཞིག་བསྣན་ཏེ།
ནམ་མཁའ་ལ་ཅེར་ནས་ལེ་བདའ་བྱེད་སྟངས་ཤིག་གིས།
རྒྱང་རིང་གི་རི་བོའི་ཚོགས་ཀྱང་དངངས་འདར་ཞིག་རྒྱག་དགོས་བྱུང༌།
ད་དུང༌། གྲང་ཤུར་ཤུར་འཁྱག་ལ་འབྱར་བཞིན་པའི་ཆུ་མིག་དག
མག་གསར་ཞིག་གིས་ཕྱི་བའི་གོང་སྣེ་ན།
མགྲོན་པོ་ཚོར་ལྐོག་ལྟ་བྱེད་པ་དང་འདྲ་བར།
ཁ་བའི་གསེང་རུམ་ན་ཤུབ་ཤུབ་ཀྱིས་བཞུར་སྟངས་དེས།
ལོ་གསར་གྱི་ཞོགས་པའི་ཆུ་ལེན་བུ་མོ་དེར་ཡང༌།
ཞེན་ཆགས་ལྷག་མ་ཞིག་སྐྱེ་རུ་བཅུག་པ་ཡིན་ནམ།
འབྲི་མར་གྱི་ཁ་རྒྱན་བསྐུས་པའི་སྐྱོགས་ནང་ལ་བཅུས་ཏེ།
གནམ་ས་ལ་མཆོད་ཁ་ཐེངས་གསུམ་འཕེན་དགོས་བྱུང༌།

༣ ཁ་བ་དང་སྦྲ་ནག

ད་ལོའི་ཁ་བ་ཆགས་སྟངས་དེས།
ས་གཞི་ལ་ཕྱིང་དཀར་གྱི་ལྭ་བ་མཐུག་པོ་ཞིག
སྐ་རགས་མ་བཅིངས་པར་གཡང་ཤམ་གྱིས་གཡོགས།
གྲོང་བརྡལ་ན་སོ་ཕག་དང་རྡོ་བས་གྲུབ་པའི་ཁང་གསར་དག
ནད་པ་ཞིག་འདྲ་བར་ཁུ་སིམ་སིམ།
གཡོ་འགུལ་མེད་པར་དུས་གཅིག་ཏུ་ཁ་བའི་ནང་ནུབ་པ་དང་མཚུངས།
འོན་ཀྱང༌། རྩྭ་ཐང་གི་གཞི་ན་ཁེར་རྐྱང་གི་ཚུལ་དུ།
གཅིག་རེ་གཉིས་རེ་ཨུ་ཚུགས་ཀྱིས་ལྷག་ཡོད་པའི་སྦྲ་ནག་མའི་གོང་ཁར།
ཁ་བ་ལྷབ་ལྷབ་ཏུ་ཆགས་སྟངས་དེས།
སྙིང་སྟོབས་ཤིག་དང་གསོན་ཤུགས་ཤིག་ལྷག་ཏུ་རྒྱས།
ད་དུང༌། རྩྭ་ཐང་གི་ཞབས་བྲོ་བ་ལྟ་བུའི་ནོར་གནག་གི་དཔུང་ཁྱུ་དང༌།
གཏན་འདུན་གྱི་ལག་རྡང་གཅིག་ཏུ་སྦྲེལ་ཏེ།
ཁ་བའི་ཁྲོད་ནག་རོག་གེར་རྟག་བརྟན་དུ་འགྱེང་བའི་མཛེས་སྡུག་དེ།
སྔ་མོ་ནས་གྲོང་ཁྱེར་དུ་ཆས་ཟིན་པའི་མི་རྣམས་ཀྱིས།
ད་ཆ་སེམས་གཏིང་ནས་བརྗེད་ཡོད་པ་འདྲ་ནའང༌།
དེང་རབས་ཀྱི་མིག་ཤེལ་གྱོན་པའི་ཕྱི་གླིང་པ་རྐྱལ་སྟོང་དེ་ཚོས།
རྩྭ་ཐང་གི་མི་དག་ཨང་།
ཇི་འདྲའི་གླེན་པ་རྐྱང་རེད་ཟེར་བ་ཡིན་ནམ།
ལྡབ་ལྡིབ་ཅིག་སྨྲ་ཞིང་དཔར་ཆས་ཀྱི་ཁ་ལོ་རྩྭ་ཐང་ལ་སྐོར་ཏེ།
ཁ་བ་དེ་དྭངས་གསལ་གྱི་གླེགས་བམ་ཞིག་གི་ཚུལ་དུ།
སྦྲ་ནག་གི་ཚོགས། ནོར་ནག་གི་ཁྱུ།
སྒྱུ་རྩལ་གྱི་བརྩམས་ཆོས་ཤིག་ལ་བལྟ་བ་དང་ཀུན་ནས་མཚུངས།