གནམ་གང་ཉིན་སྐད་ཡིག་བགྲོ་གླེང་ཚོགས་འདུའི་གསལ་བརྡ།

༄༅།།བོད་མི་རིགས་ཀྱི་སྐད་དང་ཡི་གེ་ལ་དུང་ཞེན་ཆེ་བའི་རྒྱ་ཆེའི་སྤུན་ཟླ་རྣམ་པའི་སྙན་ལམ་དུ་
ཆེད་ཞུ།

མཁྱེན་ཡངས་ཀུན་གྱི་དྲན་ངོས་ན་གསལ་བ་བཞིན། བོད་ཀྱི་སྐད་ཡིག་རྒྱུན་འཛིན་ཚོགས་པས་ལོ་རེར་རྒྱལ་སྤྱིའི་སྐད་ཡིག་ཉིན་མོ་སྲུང་བརྩི་བྱས་དང་བྱེད་མུས་སུ་མཆིས་པ་ལགས་ན།ཟླ་འདིའི་ཕྱི་ཚེས་༢༡ཉིན་རྒྱལ་སྤྱིའི་སྐད་ཡིག་ཉིན་མོར་སྟབས་བསྟུན་ཏེ་བོད་ཀྱི་སྐད་ཡིག་གི་ཁྱད་ནུས་མཐོར་འདེགས་ཀྱི་ཕྱིར་དུ།བོད་ཀྱི་དྲ་རྒྱ་དང་དུས་དེབ། ཚགས་པར་བཅས་ཀྱི་རྩོམ་སྒྲིག་པ་དང་རང་དབང་རྩོམ་པ་པོ་རྣམ་པ།དེ་མིན་རྒྱ་ཆེ་ཀློག་པ་པོ་བཅས་སྡེ་ཚན་གསུམ་དུ་བགོས་ནས་རང་རང་གི་དཀའ་ངལ་དང་རེ་འདུན་ཡོད་ཚད་ལྷུག་པོར་བརྗོད་ཆོག་པའི་རང་དབང་གི་གླེང་སྟེགས་ཤིག་གོ་སྒྲིག་བྱས་ཡོད་པས།གོང་གསལ་རྣམ་གྲངས་ནང་ཚུད་པ་རྣམས་ངེས་ཕེབས་ཡོང་བའི་རེ་བ་ཤིན་ཏུ་ནས་ཆེའོ།།

ལོ་འདིའི་རྒྱལ་སྤྱིའི་སྐད་ཡིག་ཉིན་མོ་ནི་བོད་ཀྱི་ལོ་སར་གནམ་སྟོང་གི་ཉིན་མོར་འཁེལ་ཡོད་ཀྱང་།མི་རིགས་འདིའི་འདས་མ་ད་གསུམ་གྱི་ཆེད་དུ།གཞིས་ལུས་སྤུན་ཟླས་ཚེ་སྲོག་གཏོང་ནུས་ན་བཙན་བྱོལ་བ་ཚོས་ཉིན་གཅིག་གི་དུས་ཚོད་གཏོང་ལོས་ཐུབ།དེ་བས། ང་ཚོས་ལག་ལེན་དངོས་ཀྱི་སྟེང་ནས་བསམ་བློ་བརྗེ་རེས་བྱེད་པར་འདོད་མོས་ཆེ་བ་ལགས་ན་ཀུན་གྱིས་དེ་དོན་དགོངས་འཇགས་ཡོང་བར་ཞུ།

ས་གནས། གངས་སྐྱིད་བོད་ཀྱི་དཔེ་མཛོད་ཚོགས་ཁང་།
དུས་ཚོད། 2012 /2 /21 ཉིན་གྱི་སྔ་དྲོའི་དུས་ཚོད། <9:00___12:30>
འབྲེལ་གཏུགས་ཁ་པར། 9882769565.
གོ་སྒྲིག་པ། བོད་ཀྱི་སྐད་ཡིག་རྒྱུན་འཛིན་ཚོགས་པ།

བོད་ཀྱི་སྐད་ཡིག་ཚགས་པར་རྩོམ་སྒྲིག་ཁང་ནས།
སྤྱི་ལོ་༢༠༡༢ལོའི་ཟླ་ ༢ཚེས་ ༥ཉིན།