བོད། ལྷ་ྐླུ་གཉན་གསུམ།
འདི་ནས་བཞུར་བའི་ཕ་རོལ་དུ།།
གང་དུ་སོང་བའི་རྐང་རྗེས་སུ།།
དྲན་ཤིང་ལྕི་མོའི་རང་གཟུགས་དེ།།
སེམས་ཀྱི་མཚོ་མོའི་ཁ་རུ་སྐྱོམས།།
མཛའ་བའི་དུངས་ཞེན་ཆེ་བ་ཡི།།
ཐ་སྙད་དང་བསྟུན་སྤུན་མཆེད་དེ།།
རྒྱང་རིང་རྒྱལ་ཁབ་གཞན་ཡུལ་ན།།
བདེ་བར་ཡོད་པ་སྔ་ནས་ཐོས།།
སེམས་ཀྱི་འབྲེལ་ཐག་ཟབ་ས་ནས།།
ཁ་བརྡའི་གླིང་དུ་ཞུགས་འདོད་ཀྱིས།།
ཐེངས་འགར་ཁ་པར་བཏང་ན་ཡང་།།
ཁ་པར་བརྡ་འཕྲིན་སྟེང་དུ་འདུག།
ཡུན་རིང་གཤིབ་པའི་རྒྱ་གར་དུ།།
ཁང་མིག་ཆུང་ཆུང་ནག་ཁུང་དེར།།
ལོ་དང་ཟླ་བའི་འཚོ་བ་ཞིག།
མཉམ་རོལ་བྱས་པ་ལྷག་དུ་དྲན།།
སྲོག་གི་ཉེན་ཁ་ང་ལ་འཕྲད།།
དེ་དུས་ཉིད་ཀྱིས་ཉིན་མཚན་ཀུན།།
ལུས་ཚེགས་གཉིས་ཀྱི་དཀའ་སྡུག་དག།
ཁྱེད་ཉིད་ཁོ་ནའི་དང་དུ་བླངས།།
རྩ་སྐྱ་སྐམ་པོ་འགམ་དགོས་ཀྱང་།།
ཧིན་སྒོར་བཅུ་ལས་མ་བྱུང་རང་།།
སྐྱིད་སྡུག་མཉམ་རོལ་དམ་བཅའི་ཚིག།
བདག་ལ་སྨྲས་པའི་སེམས་པ་བཟི།།
ང་རང་ཕ་ཡུལ་གངས་ལྗོངས་སུ།།
བྱིན་ནས་ཟླ་ངོ་ཁ་ཤས་རྗེས།།
ཉིད་ཀྱིས་བདག་ལ་ཁ་པར་ཁྲོད།།
ཁྱེད་རང་དྲན་བྱུང་ཟེར་ནས་ངུས།།
ཤ་ཁྲག་ཉེ་འབྲེལ་རིགས་སུ་གཏོགས།།
ཡིན་ཡང་སྔོན་ཆད་ཕ་ཡུལ་དུ།།
འདྲིས་ཤིང་གཤིབ་རྒྱུ་མ་བྱུང་རང་།།
ས་མཐའི་འཚོ་བ་མཉམ་རོལ་མྱོང་།།
ད་ལྟ་ཐག་རིང་རྒྱལ་ཁབ་དུ།།
ཨ་རིར་འབོད་པའི་ཕྱི་གླིང་དུ།།
ཚེ་འདིའི་བཟའ་ཚང་ལྷན་གཅིག་དུ།།
འཚོ་བའི་མངར་སྐྱུར་ག་འདྲ་འདུག།
མཚམས་རེར་བདག་གི་རྨི་ལམ་དུ།།
ཁྱེད་དང་འཇལ་བ་རྨིས་ན་ཡང་།།
རྨི་ལས་སད་རྗེས་དེ་ཉིད་ནི།།
བདེན་པར་མིན་པ་གསལ་བོ་རྟོགས།།
གངས་ཅན་བོད་མིའི་བདེན་དོན་དང་།།
མཛའ་གྲོགས་ཁྲེལ་ཡོད་ཕྱི་ཐག་སོགས།།
ང་ཡིས་ཁ་ལས་བཤད་པ་ལས།།
ཉིད་ཀྱིས་ལག་ལེན་བྱས་པ་མང་།།
ལུས་གཟུགས་བདེ་ཞིང་ནད་མེད་དུ།།
ཚེ་རིང་དོན་འགྲུབ་ཁ་དྲོའི་ངང་།།
རང་གི་ལས་སུ་བརྩོན་ཞོར་དུ།།
འདོད་པའི་བྱ་བཞག་འགྲུབ་པར་སྨོན།།
མི་རིང་ངེད་གཉིས་ཁ་བརྡའི་ཁྲོད།།
སེམས་ཀྱི་གཏམ་དག་བཤད་པའི་སྐལ།།
ཐོབ་འདོད་རེ་བ་ཆེ་བའི་སྤུན།།
ང་ཡིས་ཁྱེད་དྲན་འཕྲིན་འདི་སྤྲིངས།།