བོད་ལ་མིང་དོན་མཚུངས་བའི་རང་སྐྱོང་སྤྲོད་དགོས།

ཨ་རིའི་གྲོས་ཚོགས་ཀྱི་ཚོགས་ཆུང་ཞིག་ནས་བོད་ནང་དོན་དངོས་ཀྱི་ཞི་བདེ་ལྷིང་འཇགས་ཡོང་ཐུབ་ཆེད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལས་ལྷག་པ་སུ་ཞིག་མེད་སྟབས། རྒྱ་ནག་གཞུང་ནས་༧གོང་ས་མཆོག་ལ་སྐྱོན་བརྗོད་ཁོ་ནར་བྱས་དང་བྱེད་མུས་ཡིན་པ་དེའི་ཚབ་ཏུ་དངོས་ཡོད་གནས་ཚུལ་ངོས་འཛིན་གྱིས་བོད་མིའི་ཐོབ་སྟངས་ལྟར་བོད་ལ་མིང་དོན་མཚུངས་པའི་རང་སྲིད་རང་སྐྱོང་སྤྲོད་དགོས་པའི་རེ་འདུན་བཏོན་འདུག

དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཨ་རིའི་གྲོས་ཚོགས་ཀྱི་སྟངས་འཛིན་འོག་ཡོད་པའི་གྲོས་ཚོགས་ཀྱི་འཐུས་མི་ལས་གྲུབ་པའི་རྒྱ་ནག་ལས་དོན་ཚོགས་ཆུང་གིས་རྒྱ་ནག་གི་སྲིད་འཛིན་གཞོན་པ་ཞི་ཅིན་ཕིང་ཨ་རིར་ལྟ་སྐོར་དུ་སླེབས་པ་དང་སྟབས་བསྟུན་ཚོགས་ཆུང་དེའི་ཚོགས་གཙོ་ཁ་སི་ཊོམ་ཁ་རི་དང་ཤཱ་རི་བྷོ་རོན་རྣམས་གཉིས་ནས་ཕྱི་ལོ་ ༢༠༡༢ ཟླ་ ༢ ཚེས་ ༡༤ ཉིན་ཡོངས་ཁྱབ་གསལ་བསྒྲགས་ཤིག་སྤེལ་ཡོད་པའི་ནང་འཁོད་དོན། རྒྱ་ནག་གཞུང་ནས་ཁུལ་དེར་འགྲོ་བ་མིའི་ཐོབ་ཐང་གི་གནས་སྟངས་དང་། རྒྱ་ནག་ནང་ཁྲིམས་ལུགས་དབང་བསྒྱུར་གྱི་ལམ་སྲོལ་ཡར་རྒྱས་གཏོང་དགོས། ཞི་ཅིན་ཕིང་མ་འོངས་པའི་རྒྱ་ནག་གི་སྲིད་འཛིན་དུ་འཁོད་རྒྱུ་ཡིན་སྟབས། ཧུའུ་ཅིན་ཐའོ་གཙོས་དེ་སྔའི་རྒྱ་ནག་གི་སྲིད་འཛིན་རྣམ་པའི་བྱ་སྤྱོད་ལས་ལྡོག་སྟེ་རྒྱ་ནག་ནང་དོན་དངོས་དང་མཐུན་པའི་འགྱུར་བ་ཆེན་པོ་ཞིག་གཏོང་རྒྱུའི་རེ་བ་བྱེད་བཞིན་ཡོད། དེ་བཞིན་དེང་སྐབས་བོད་ནང་རྒྱ་ནག་གཞུང་གིས་དྲག་གནོན་ཚབས་ཆེ་ཤོས་དེ་བྱེད་བཞིན་ཡོད་པ་མ་ཟད། གནས་ཚུལ་བརྒྱུད་ལམ་ཁག་ལ་བཀག་འགོག་བྱེད་བཞིན་ཡོད། ད་ཆ་རྒྱ་ནག་གཞུང་གིས་དྲག་གནོན་ཚབས་ཆེ་བྱས་པར་བརྟེན་བོད་མི་ཉི་ཤུ་བརྒལ་བས་རང་ལུས་མེར་སྲེག་བཏང་བའི་གནད་དོན་དེ་དག་ཐོག་རྒྱ་ནག་གཞུང་ནས་བོད་ནང་དྲག་པོའི་སྲིད་བྱུས་ལག་བསྟར་བྱས་ཏེ་བོད་མི་རྣམས་ནས་རང་གི་ཆོས་དང་རིག་གཞུང་ལ་གཅེས་འཛིན་བྱ་རྒྱུའི་རང་དབང་ལ་རྩིས་མེད་རྡོག་རོལ་བཏང་བའི་རྐྱེན་གྱིས་གནས་ཚུལ་དེ་དག་འཐོན་བཞིན་ཡོད་པ་ངོས་ལེན་མ་བྱས་པ་མ་ཟད། བོད་མི་ཞི་རྒོལ་བའི་ཐོག་མེ་མདའ་བརྒྱབ་སྟེ་དམ་བསྒྲགས་ཇི་ཆེར་གཏོང་བཞིན་ཡོད་པ་དེ་ནི་ང་ཚོར་བློ་ཕམ་དང་སེམས་འཚབ་ཆེན་པོ་ཡོད། རྒྱ་ནག་གཞུང་ནས་བོད་ཀྱི་༧སྐྱབས་མགོན་ཏཱ་ལའི་བླ༌མ་མཆོག་ལ་སྐྱོན་བརྗོད་ཁོ་ནར་མ་བྱས་པར་ཁོང་དང་ཁོང་གི་མི་མང་གི་རེ་འདུན་ལྟར་བོད་ལ་མིང་དོན་མཚུངས་པའི་རང་སྲིད་རང་སྐྱོང་སྤྲོད་དགོས་སྐོར་སོགས་ཀྱི་རེ་འདུན་ཤུགས་ཆེ་བཏོན་འདུག་པ་བཅས། །

ཡོང་ཁུངས་བོད་གཞུང་དྲ་བ། ༢༠༡༢ ཟླ་ ༢ ཚེས་ ༡༦ རེས་གཟའ་ཕུར་བུ།