ནམ་མཁའ་ནས་༡༥/༢/༢༠༡༢ལ་ཡོ་རུབ་ནས་བྲིས།
དེང་སང་རྒྱ་ནག་གི་མེ་མདའ་གཏད་ས་གསུམ་བོད་དང་ནང་སོག་ཞིན་ཅང་གསུམ་ཡིན།
༢༠༠༩ལོར་ཞིན་ཅང་གིས་ཞི་རྒོལ་བྱས་ཏེ་རྒྱ་གཞུང་གིས་ཁྲག་དྲི་བྲོ་བར་དམར་གསོད་བྱས་ཡོད་ལ།
ཡིན་ན་ཡང་༢༠༠༨ལོ་ཡི་བོད་ཆོལ་གསུམ་གཅིག་གྱུར་གྱིས་ཞི་རྒོལ་ཆེན་མོ་ལ་རྒྱ་གཞུང་གི་བརྙན་འཕྲིན་སོགས་ལས་རྡུང་འཕྲོག་བསྲེགས་གསུམ་གྱི་མིང་བཏགས་ཏེ། བོད་ཐོག་གཏམ་སྡིག་གཏོང་བ་བཞིན་སྡིག་དམོད་བྱས་མེད།
དེ་ནི་རྒྱ་གཞུང་གིས་ལོ་གཅིག་གི་རིང་བོད་ཐོག་བརྙན་འཕྲིན་དང་ཚགས་པར་སྒྲ་སྡུད་འཁོར་ལོ་སོགས་གནས་ཚུལ་སྤེལ་སའི་ས་ཡོད་ཚད་ནས་རྡུང་འཕྲོག་བསྲེགས་གསུམ་གྱི་མིང་གིས་གཏམ་སྡིག་བྱས་སྟེ། བོད་རིགས་བྱིས་པ་ཚུན་གྱི་སེམས་སུ་རྨ་ཁ་དང་རུས་གསེང་ལ་ན་ཟུག་སྦྱིན་པའི་ངོས་ཟིན་ཞིག་རེད། རྒྱུ་མཚན་ནི་སྲིད་འཛིན་ཧུའུ་ཅིན་ཐོ་ཡིས་ཁ་ནས་འཆམ་མཐུན་ཞེས་བའི་ཚིག་ཞིག་རྒྱ་ནག་རྒྱལ་ཡོངས་སུ་བསྒྲགས་པ་རེད། ན་ནིང་ལོར་ནང་སོག་ནས་ཞི་རྒོལ་གྱི་འགོ་བརྩམས་ཏེ་དྲག་དམག་གིས་མགོ་བོ་མནན་ཙམ་བྱས།
མི་རིགས་འདི་གསུམ་གྱི་བདེ་སྡུག་འཛམ་གླིང་སྟེང་གླེང་ཙམ་བྱེད་ཀྱི་ཡོད། ཡིན་ཡང་ད་དུང་ཡང་ལེགས་འབྲས་ཅི་ཡང་བྱུང་མེད། རྒྱ་གཞུང་གིས་འཛམ་གླིང་སྟེང་གསལ་བཤད་བྱས་བ་ལ་རྒྱ་ནག་ནང་ཁུལ་གྱི་དོན་དག་ཡིན་པས་ཁྱེད་ཚོས་ང་ཚོའི་ནང་ལ་ཁུལ་ཐེར་གཏོགས་བྱེད་མི་ཆོག་ཅེས་མ་ཎི་བཞིན་འདོན་གྱི་ཡོད།
གང་ལྟར་ཡང་འཛམ་གླིང་སྟེང་མི་རིགས་འདི་གསུམ་གླེང་སློང་ཆར་དུས་ཀྱི་སྦལ་བ་བཞིན་གནས་ཚུལ་རེ་བྱུང་དུས་གྲགས་འགུལ་ཙམ་བྱས་ཀྱི་ཡོད། ལྷག་པར་དུ་ཁ་སང་དེ་རིང་འཛམ་གླིང་སྟེང་གླེང་སློང་ཤུགས་ཆེན་བྱེད་པ་ནི་ང་ཚོའི་བོད་དོན་ཡིན།
བོད་དོན་འདི་ང་ཚོ་བོད་མི་ཚོས་རྒྱལ་སྤྱིའི་སྟེང་བསྐྱལ་བ་ཞིག་མིན། འདི་ནི་རྒྱ་ནག་སྲིད་གཞུང་གིས་
བོད་ཐོག་ཏུ་མེ་མདའ་དང་དབྱུག་པས་བཙན་དབང་བྱས་བའི་འབྲས་བུ་ཞིག་རེད།
གལ་སྲིད་རྒྱ་གཞུང་གིས་བོད་ནང་གི་བོད་མི་ཚོར་འདོད་བློ་ཁེངས་བའི་སྲིད་ཇུས་ལག་བསྟར་བྱས་ཡོད་ཚེ། ༢༠༠༨ལོའི་ཞི་རྒོལ་ཆེན་མོ་བྱུང་མི་སྲིད་ལ། ཁོང་ཚོའི་ཉིན་གུང་གི་རྨི་ལམ་ཏྰ་ལའི་བླ་མ་ཕྱི་ལོགས་སུ་སྐུ་རྐྱང་དུ་ལུས་ཟེར་བའི་རྨི་ལམ་ཡང་མུ་མཐུད་ནས་རྨིས་ཡོད། ཡིན་ན་ཡང་ང་ཚོ་བོད་ལ་སྟབས་ལེགས་དང་མ་ལེགས་གང་བཤད་དགོས་མི་ཤེས་ཀྱང་རྒྱ་གཞུང་གི་རྨི་ལམ་གྱི་ཤོག་དཀར་སྟེང་ལ་ཁྲག་གིས་ལོ་རྒྱུས་གསར་བ་ཞིག་བྲིས་པ་རེད། དེ་ཡང་འཛམ་གླིང་སྟེང་ནམ་ཡང་བསུབ་མི་ནུས་ལ། བོད་ཕྱི་ནང་གང་གི་སེམས་ནས་ཀྱང་ཡལ་མི་ཐུབ་པ་ཞིག་ཡིན། ཤོག་དཀར་སྟེང་གི་ཁྲག་གི་ལོ་རྒྱུས་འདི་ལས་མདོ་སྟོད་སྨད་ཁུལ་ནས་ན་ཟུག་གི་མེ་ལྕེ་ལུས་བོ་ནས་འབར། ད་རུང་ཡང་ཧུའུ་ཅིན་ཐོ་ཡིས་མི་རིགས་འཆམ་མཐུན་ཞེས་བའི་རས་གཞི་འདིའི་འོག་ཏུ་མེ་མདའ་དང་གཡོ་སྒྱུ་ཁྲ་གསུམ་སྦས་ཞོར་ངན་ཁེགས་ཆ་ཚང་བཙན་བྱོལ་གཞུང་ལ་བཀལ་གྱི་ཡོད། སྲིད་འཛིན་ཧུའུ་ལགས། གལ་སྲིད་ཁྱེད་ཀྱིས་བཤད་པའི་འཆམ་མཐུན་ལག་ལེན་དུ་བསྟར་ན་གྲངས་ཉུང་མི་རིགས་སུ་ལ་ཡང་སྐྱིད་སྡུག་བཤད་དབང་མེད་པར་མེ་མདས་ཐག་གཅོད་བྱེད་པ་འདི་ཁ་བཤད་ལག་ལེན་གཉིས་མཐུན་པ་ཞིག་ཡིན་ནམ། ད་ལོ་རྒྱ་ཡི་ལོ་གསར་ཚེ་གཅིག་ལ་ཁྱེད་ཀྱི་རྗེས་འཇུག་པ་ཚོས་ཤོག་སྤག་གི་ཚབ་ཏུ་བོད་མི་ཚོས་ཞི་རྒོལ་ལ་མེ་མདའ་རྒྱབ་སྟེ་དམར་གསོད་དང་རྨས་སྐྱོན་བྱུང་།འདི་ནི་ཁྱེད་ཀྱི་སྲིད་གཞུང་གི་མི་རིགས་འཆམ་མཐུན་ཟེར་བ་དེ་ཨེ་རེད།
ཁྱེད་དང་ཁྱེད་ཀྱི་སྲིད་གཞུང་གིས་མེ་མདའི་ཁ་ནས་མི་རིགས་འཆམ་མཐུན་བྱེད་འདོད་པའི་རྨི་ལམ་གསར་བ་ཞིག་གཏོང་གི་ཡོད། འདི་ནི་ནམ་ཡང་འགྲུབ་མི་སྲིད་པ་ཞིག་རེད། ཁྱེད་དང་ཁྱེད་ཀྱི་སྲིད་གཞུང་གི་མི་རིགས་འཆམ་མཐུན་གྱི་མིང་ལ་ངས་༼རྡུང་འཛིན་གསོད་གསུམ་༽ཞེས་འབོད་ཀྱི་ཡོད། ཁྱེད་ཀྱི་སྲིད་གཞུང་གིས་བཟོས་བའི་རྩ་ཁྲིམས་དག་དཔོན་ངན་བཤུ་གཞོགས་པ་ཚོའི་མདུན་ན་གྲངས་ཉུང་མི་རིགས་དང་མི་དམངས་ཉམ་ཆུང་ཚོར་བེད་སྤྱོད་མེད། དཔེར་ན་ཁྱེད་ཀྱི་སྲིད་གཞུང་གི་རྩ་ཁྲིམས་ཨ་མའི་ནང་གཏམ་བརྗོད་ཀྱི་རང་དབང་ཡོད་ཅེས་བཀོལ་ཡོད། ཡིན་ཡང་། ང་ཚོ་བོད་མི་ཚོའི་གཏམ་བརྗོད་ཀྱི་རང་དབང་གི་གོམས་སྒྲ་ལ་མེ་མདའི་སྐད་ཀྱིས་ལན་སྤྲད་ཀྱི་ཡོད་པ་འཛམ་གླིང་གི་མིག་མདུན་ན་གསལ་བོར་ཡིན། ང་ཚོ་བོད་མི་ཚོར་གཏམ་བརྗོད་རང་དབང་ག་ལ་ཡོད།ཐ་ན་རྒྱ་མི་རིགས་ལ་ཡང་རང་དབང་མེད་པས་༢༠༡༡ལོར་གནམ་བདེ་སྒོ་མོ་ཆེ་ཡི་ཐང་ཆེན་ནས་རྒྱ་རིགས་ཞིག་གིས་འུ་ཐུག་ཐབས་ཟད་ཀྱིས་རང་ལུས་མེ་བསྲེགས་བཏང་བ་མ་ཡིན་ནམ། དེ་མིན་ཧའོ་ཅ་ལ་ཡང་གཏམ་བརྗོད་ཀྱི་རང་དབང་མེད་པར་བཙོན་ཁང་དུ་བཅུགས་པ་མ་ཡིན་ནམ། དེང་སང་བཙོན་ཁང་ནས་གློད་གྲོལ་བཏང་ཡོད་ན་ཡང་གཏམ་བརྗོད་ཀྱི་རང་དབང་འཕྲོག་ཡོད། ཁྱེད་དང་ཁྱེད་ཀྱི་སྲིད་གཞུང་ལ་མི་དམངས་ཀྱིས་སྐྱིད་སྡུག་བཤད་ས་ནམ་ཡང་མེད་པ་གསལ་བོ་ཡིན། སྤྱིར་འཛམ་གླིང་གི་རྒྱལ་ཁབ་གང་ཡིན་ན་ཡང་ཁྲིམས་ཀྱི་མདུན་ན་འདྲ་མཉམ་ཡིན། ཡིན་ཡང་ཐབས་སྐྱོ་བ་ཞིག་ལ་བོད་མི་ཚོར་ཁྱེད་ཀྱི་སྲིད་གཞུང་གི་ཁྲིམས་མདུན་ན་མེ་མདའ་ལ་གཏམ་བཤད་དུ་འཇུག་པ་འདི་ཁྱེད་ཀྱི་མི་རིགས་འཆམ་མཐུན་ཟེར་བའི་ཡ་ང་བའི་སྲིད་ཇུས་ཞིག་ཡིན་པས་དུས་ནམ་ཡང་འཆམ་མཐུན་ཡོང་མི་ཐུབ་པའི་ལམ་ཁོ་ན་ཡིན། ད་རུང་བཤད་རྒྱུ་ཞིག་ལ། ཁྱེད་དང་ཁྱེད་ཀྱི་སྲིད་གཞུང་ལ་གོམས་གཤིས་ངན་ལོབ་ཏུ་སོང་བའི་བྱ་སྤྱོད་ཐ་ཤལ་ཞིག་ལ། ཁྱེད་དང་ཁྱེད་ཀྱི་སྲིད་གཞུང་ནོར་སྐྱོན་འགེབས་སྲུང་ཆེད་ངན་ཁེགས་དཀྲིས་ས་ཡི་མི་ཞིག་བཙལ་ནས་དེར་སྐྱོན་ཆ་ཚང་འགེལ་གྱི་ཡོད།
ཐ་ན་རྒྱ་ནང་དུ་རང་བྱུང་འབྱུང་བཞིས་འཇིག་པ་བྱུང་ནས་མི་དམངས་ལ་རྡབ་སྐྱོན་བྱུང་བའི་གྲངས་ཀ་ཡང་འགེབས་སྲུང་བྱེད་ཀྱི་ཡོད། དཔེར་ན་མི་བརྒྱ་ཤི་སྐྱོན་བྱུང་དུས་མི་བཅུ་ཤི་སྐྱོན་བྱུང་བའི་གྲངས་རྫུན་ཞིག་དང་མི་ཆིག་སྟོང་གི་ཤི་སྐྱོན་བྱུང་ཚེ་མི་བརྒྱ་གྲངས་ཀྱི་རྫུན་ཞིག་ཕྱི་ནང་ཀུན་ལ་བསྒྲགས་བྱེད་ཀྱི་ཡོད།འདི་རང་བྱུང་འབྱུང་བཞིས་འཇིག་པ་ཞིག་ཡིན་པ་ལས་ཁྱེད་དང་ཁྱེད་ཀྱི་སྲིད་གཞུང་གི་ནོར་འཁྲུལ་ཞིག་མ་རེད། ཡིན་ཡང་འདི་ཙམ་ཡང་གསང་སྦས་ཁོ་ནས་མི་དམངས་ལ་མགོ་སྐོར་གཏོང་གི་ཡོད། ལོ་ཤས་སྔོན་ལ་རྒྱ་ནང་གི་གྲོང་ཁྱེར་ག་གེ་མོ་ཞིག་ནས་བྱ་ཕག་འགས་ནད་ཞིག་འཛམ་གླིང་གང་སར་ཁྱབ་དུས་ཁྱེད་ཀྱི་མགྲིན་ཚབ་གསར་འགོད་པ་ཚོས་རྒྱ་ནང་ལ་གནས་ཚུལ་སྤེལ་དུས་ནུབ་ཕྱོགས་ཕྱི་རྒྱལ་ནས་འདིར་ཁྱབས་ཚུལ་བརྗོད་ཀྱི་འདུག འདི་འདྲའི་རྫུན་ཞིག་གིས་དེང་སང་མི་དམངས་ལ་མགོ་སྐོར་དུས་ཡུན་རིང་པོ་བྱེད་ཐུབ་བམ། ངས་གོང་དུ་བཤད་པའི་ཧའོ་ཅ་ཡིས་དམག་མི་ཚོས་འགེབས་སྲུང་བྱས་བའི་འགས་ནད་ཨེ་ཙི་སོགས་ཀྱི་གསང་བ་འགའ་ཕྱི་བསྒྲགས་བྱས་རྗེས་ཁོ་རང་གི་གཏམ་བརྗོད་རང་དབང་ཡོངས་སུ་འཕྲོགས་སྟེ་བཙོན་ཁང་དུ་ལོ་གསུམ་ལྷག་བཅུགས་པས། ཁྱེད་དང་ཁྱེད་ཀྱི་སྲིད་གཞུང་གི་ནོར་འཁྲུལ་ཆ་ཚང་མི་གཞན་ཞིག་གི་སྟེང་འགེལ་གྱི་ཡོད་པ་འདི་རྒྱ་ནག་སྲིད་གཞུང་ལ་འཛམ་གླིང་སྟེང་ཡིད་ཆེས་མེད་པའི་རྒྱུ་རྐྱེན་འདི་རེད།
ང་ཚོ་བོད་མི་ཚོའི་སེམས་ནས་ནམ་ཡང་བརྗེད་མི་ཐུབ་པ་ནི། དུས་རབས་ཉི་ཤུའི་ལོ་རབས་བརྒྱད་བཅུའི་ནང་ཁྱེད་ཀྱིས་བོད་རང་སྐྱོང་ལྗོངས་ཀྱི་འགོ་ཁྲིད་བྱེད་པའི་སྐབས། ཁྱེད་ཀྱི་ལག་གཡས་སུ་དྲག་པོའི་མཚོན་ཆ་དང་ལག་གཡོན་དུ་སྐར་ལྔའི་དར་དམར་འཕྱར་སྟེ་ལྷ་སའི་བར་སྐོར་ནས་རྒན་བྱིས་ཁྱད་མེད་དུ་དམར་གསོད་ཁྲག་དྲི་བྲོ་བར་བྱས། ད་རུང་རྒྱ་མི་རིགས་ཞིག་གིས་བཤད་ཚུལ་ལ་པཎ་ཆེན་སྐུ་གོང་མ་ཡང་ཁྱེད་ཀྱིས་ཟས་དུག་ཕུལ་ཏེ་དཀྲོངས་ཚུལ་གསལ་བོར་འཛམ་གླིང་ལ་བཤད་ཡོད། དུས་རབས་ཉེར་གཅིག་ལ་བོད་མི་ག་ཚོད་དམར་གསོད་བཏང་བ་ཁྱེད་ཀྱིས་འགེབས་སྲུང་བྱེད་འདོད་ཀྱང་བྱེད་རྒྱུ་ཁེགས་པོ་ཡིན། ཡིན་ཡང་འདི་ཚང་མ་ངན་ཁེགས་འགེལ་ས་བཙན་བྱོལ་གཞུང་ལ་བྱེད་པ་འདི་ནི་ཁྱེད་དང་ཁྱེད་ཀྱི་སྲིད་གཞུང་གི་གོམས་གཤིས་ངན་པའི་གཡོ་ཐབས་དེ་རེད།