གཅན་ཡེ་རྒྱམ།
རྒྱ་ནག་གི་སྲིད་འཛིན་གཞོན་པ་ཞི་ཅིན་ཕིང་ཕྱི་ཟླ་གཉིས་པའི་ཚེས་༡༣ ནས་འདི་ག་ཨ་མེ་རི་ཀར་འཚམས་འདྲིར་སླེབས་པའི་སྐབས་དང་བསྟུན་རྒྱལ་ས་དང་ནེའུ་ཡོག་མངའ་ཁུལ་གྱི་བོད་མིའི་ཚོགས་པ་ཁ་ཤས་ཀྱིས་ཞིས་ཅིན་ཕིང་ལ་ངོ་རྒོལ་སྐད་འབོད་ཤུགས་ཆེན་བྱས་ཡོད་རེད། དེ་ནང་བཞིན་ང་ཚོས་ཀྱང་འདི་གར་ཨེའོ་ཝ་ས་གནས་སུ་ཕྱི་ཟླ་གཉིས་པའི་ཚེས་༡༥བཟའ་ལྷག་པ་ཉིན་མི་ནི་སོ་ཊ་ནས་རླངས་འཁོར་ལྔ་ཡི་ནང་ས་གནས་སྤྱི་མཐུན་ཚོགས་པ་དང་། གཞོན་ནུ་ཚོགས་པ། བུད་མེད་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཚོགས་པ་བཞིས་སྣེ་ཁྲིད་པའི་མི་མང་སུམ་བརྒྱ་ལྷག་དང་། ཝི་སི་ཀོན་སིན་ནས་རླངས་འཁོར་གཉིས་ཀྱི་ནང་ས་གནས་སྤྱི་མཐུན་ཚོགས་པ་དང་། གཞོན་ནུ་ཚོགས་པ། བོད་རང་བཙན་སློབ་ཕྲུག་ཚོགས་པ་གསུམ་གྱིས་སྣེ་ཁྲིད་པའི་མི་མང་བརྒྱ་ལྷག ཆི་ཀ་གོའོ་ནས་མི་བཞི་ཅུ་ལྷག སྒེར་གྱི་རླངས་འཁོར་བཏང་ནས་ཡོང་བའི་མི་མང་།བོད་དོན་ལ་རྒྱབ་སྐྱོར་ཏུ་ཕེབས་པའི་ཡུལ་མི་བཅས་ཁྱོན་བསྡོམས་མི་ལྔ་བརྒྱ་ལྷག་གིས་དགྲ་བོ་རྒྱ་དམར་གྱི་སྲིད་འཛིན་གཞོན་པ་ཞིས་ཅིན་ཕིང་ས་གནས་ཨེའོ་ཝ་ཡི་གྲོས་ཚོགས་ནང་དགུང་དྲོའི་གསོལ་སྟོན་ལ་ཕེབས་པའི་དུས་སྐབས་དང་བསྟུན་འཕྲད་དར་དང་། རང་ལུས་མེ་རུ་སྒྲོན་པའི་དཔའ་བོ་རྣམས་ཀྱི་སྐུ་པར་དང་དུར་སྒམ། ཨ་རིའི་རྒྱལ་དར་དང་བོད་ཀྱི་རྒྱལ་དར་མང་པོ་ལྷབ་ལྷུབ་ཏུ་གཡོ་བཞིན་སྐད་འབོད་ཤུགས་དྲག་པོས་ང་ཚོ་བོད་ལ་རང་དབང་དགོས། རྒྱ་མི་བོད་ནས་ཕར་རྒྱུགས་ཤིག བོད་མི་གསོད་རྒྱུ་འཚམས་འཇོག་དགོས་སོགས་སྐད་འབོད་འདྲ་མིན་གྱིས་ས་གནས་དེ་ཡི་རྒྱལ་ས་སྒྲེ་མོན་གྲོང་ཁྱེར་གྱི་དཀྱིལ་ནས་མཐའ་དང་མཐའ་ནས་དཀྱིལ་བར་ཆུ་ཚོད་ལྔའི་རིང་ཞི་བའི་ངོ་རྒོལ་བྱས་ཏེ་ས་གནས་དེ་གའི་མི་མང་དང་། ཞིས་ཅིན་ཕིང་མཉམ་དུ་སླེབས་པའི་རྒྱ་རིགས་བརྒྱ་ལྷག་ཡོད་པ་དེ་དག་ལ་གསལ་བོར་མཐོང་ཐུབ་པ་བྱས་ཡོད་ལ།
གཞན་ཡང་མི་ནི་སོ་ཊ་ས་གནས་གཞོན་ནུ་ཚོགས་གཙོ་དང་རྔ་བའི་གཞན་ཕན་བཟང་པོ་སོགས་ཀྱིས་སྣེ་ཁྲིད་དེ་ཞིས་ཅིན་ཕིང་དམའ་རིམ་ལས་བྱེད་ཡིན་པའི་སྐབས་ཕག་གསོ་སློབ་སྦྱོང་བྱེད་པར་ཡོང་སའི་མ་སི་ཁེི་ཊི྇་གྲོང་གསེབ་ཏུ་འབྱོར་བའི་སྐབས་དང་བསྟུན་སྐད་འབོད་ཤུགས་དྲག་བྱས་ནས་མ་འོངས་པའི་རྒྱ་ནག་རྒྱལ་ཁབ་ཀྱི་མི་རབས་ལྔ་པའི་ཤུལ་འཛིན་འགོ་ཁྲིད་དུ་འགྱུར་བཞིན་པའི་ཞིས་ཅིན་ཕིང་ལ་བོད་ཀྱི་དཀའ་རྙོག་ཁག ༢༠༠༨ ལོར་བོད་ནང་ས་བྱི་ཞི་རྒོིལ་ཆེན་མོ་བྱུང་བ་ནས་རྒྱུན་མཐུད་དེ་ད་ལྟའི་བར་བོད་ཀྱི་ས་ཁུལ་གང་སར་རྒྱ་ནག་གཞུང་ལ་ངོ་རྒོལ་ལས་འགུལ་གྱི་རྣོ་ངར་ཤུགས་ཆེ་རུ་ཕྱིན་ཡོད་པ་མ་ཟད། ད་ལྟའི་ཆར་རང་ལུས་མེ་སྲེག་གི་ངོ་རྒོལ་གྱི་ལས་འགུལ་ནང་དཔའ་བོ་དཔའ་མོའི་མི་གྲངས་ཉེར་གཉིས་ལ་སླེབས་པ་དང་། བོད་མིའི་ཞི་བའི་ངོ་རྒོལ་ལ་རྒྱ་ནག་གི་དྲག་ཆས་ཉེན་རྟོག་པས་དྲག་གནོན་ཚབས་ཆེན་བྱས་ཏེ་བོད་མི་མང་པོ་དམར་གསོད་དང་། བོད་མི་མང་པོར་རྨས་སྐྱོན། བོད་མི་མང་པོ་བཙོན་འོག་ཏུ་མནར་གཅོད་གཏོང་བཞིན་པ་དེ་དག་ང་ཚོས་རྗེས་དྲན་དང་གུས་འདུད་ཀྱི་ལམ་ནས་ཕ་རོལ་པོ་རྒྱ་དམར་ཁྱིའི་ཚོགས་ལ་གསལ་འདེབས་དང་གནོན་ཤུགས་ཡག་པོ་ཞིག་བྱེད་རྒྱུ་བྱུང་། ང་ཚོས་ཁྲོམ་སྐོར་བྱེད་པའི་སྐབས་གསར་འགོད་པ་དང་པར་རྒྱག་མཁན་མང་པོ་ཡོད་པ་མ་ཟད། ཁྲོམ་གཞུང་གི་ལམ་ཁའི་གཡས་གཡོན་དང་ཁང་བརྩེགས་ཡོངས་ཀྱི་སྒེའུ་ནས་ལྟད་མོ་བ་ཚང་མས་ ལག་འཁྱེར་ཁ་པར་ནང་པར་རྒྱག་མཁན་སྟོང་ཕྲག་མང་པོ་བྱུང་བས་ཁྱབ་བསྒྲགས་ཤུགས་ཆེན་པོ་ཡང་བྱུང་སོང་།
བྲེལ་བའི་ཡུལ་ལུང་ནས་དུས་ཚོད་ཕྱུང་ནས་ལས་འགུལ་གང་འཚམས་སྤེལ་བ་ལ་ཡིད་རངས་ཡོད། ང་རང་གི་བསམ་ཚུལ་ལ་མ་འོངས་པར་དེ་འདྲའི་ལས་འགུལ་སྐབས་ནང་པའི་དར་ཆ་ཡང་འཁྱེར་ན་ཧ་ཅང་གི་ནུས་པ་ཆེ་སྙམ། ནང་པའི་དར་ཆ་འཁྱེར་དགོས་ཟེར་བ་ནི་ཆོས་པ་ཡིན་ཟེར་ལབ་དགོས་ཟེར་བ་མིན། གང་ཡིན་ཞེ་ན་ང་ཚོ་དང་ཆོས་སྲིད་ཀྱི་འབྲེལ་ཡོད་ཐམས་ཅད་ལ་སེམས་ཚོར་སྤྲོད་དགོས་པ་གལ་ཆེན་པོ་ཡིན་པས་ནང་པའི་དར་ཆ་འཁྱེར་བ་ཡིན་ན་འཛམ་གླིང་སྟེང་གི་ནང་པ་དུང་འཕྱུར་ཁ་ཤས་ཡོད་པ་ཐམས་ཅད་ལ་སོ་སོའི་ལས་འགུལ་ཡིན་པའི་ཚོར་ནང་ཞིག་སྦྱིན་ཐུབ་པ་དང་། དེ་བཞིན་ནང་པའི་དར་ཆ་དེ་ལ་བརྟེན་ནས་ཞི་བའི་ལས་འགུལ་ཞིག་ཡིན་པ་ཡང་མཚོན་ཐུབ་དཔེར་ན་ཁ་ཆེའི་རལ་གྲི་རྟགས་ཅན་གྱི་དར་ཆ་མཐོང་བ་ཙམ་གྱིས་དྲག་པའི་ཚོར་སྣང་ཞིག་བྱུང་བ་ལྟ་བུ་དང་ཁ་ཆེ་ཕལ་ཆེ་བ་རྡོག་རྩ་གཅིག་ལ་སྦྲེལ་བ་ནང་བཞིན་རེད།
ཞེ་ཅིན་ཕིང་ཨ་རིར་འབྱོར་བ་དང་བསྟུན་ནས་ཨ་རིར་གཞིས་ཆགས་པའི་སྤུན་གྲོགས་ཚོས་་ངོ་རྒོལ་གྱི་རྣམ་པ་ཤུགས་ཆེར་སྟོན་ཐུབ་པ་དེ་ལ་སྙིང་ནས་དགའ་གུས་དང་བརྩི་མཐོང་ཆེ། འོན་ཀྱང་མཆན་བསྟབས་པ་པོས་ནང་པའི་དར་ཆ་འཁྱེར་དགོས་ཟེར་བ་དེ་ལ་ཡི་རང་མེད། རྒྱུ་མཚན་དུ་བགྲང་བ་དེ་ནི་དོ་བདག་དེ་ཉིད་ཀྱིས་ནང་ཆོས་མི་ཤེས་པའི་རང་རྟགས་ཟང་མལ་ཞིག་བསྟན་འདུག་པས། དེས་ན་ཐུགས་ཁག་ཆུང་ཞེས་ཞུ། སྤྱིར་ཆོས་དང་འཇིག་རྟེན་ཟེར་བ་དེ་ལམ་གྱི་རྩེ་མོ་ཤར་དང་ནུབ་པ་ཟུགས་ཡོད་པ་ཤེས་ན་ད་གདོད་འཇིག་རྟེན་པའི་ཆོས་ནི་ཆོས་ཀྱི་ལམ་ལ་མི་འཇོག་ཀ་མེད་རེད། ལོ་ངོ་བརྒྱ་ཕྲག་དུ་མའི་རིང་ནས་རང་རེ་བོད་པ་ཚོས་སྲིད་ཀྱི་མགོ་མ་ཚོས་ཤིང་དེའི་བརྒྱབ་བརྟེན་ཆོས་ལ་བཅོལ་བ་ནི་སྟོན་པ་སངས་རྒྱས་ལ་ངོ་རྒོལ་རྣལ་མ་ཞིག་ཡིན་པ་ཤེས་ལྡན་ཀུན་གྱིས་མཁྱེན། བོད་ལ་རང་དབང་དང་རང་བཙན་གྱི་སྐད་འབོད་སྐབས་ནང་པའི་དར་ཆ་ཞིག་འཁྱེར་ནས་མི་ཕེབས་མཛོད་ཅེས་ནན་བསྐུལ་བྱའོ།
ངས་གང་བཤད་པ་ཡང་གོ་མི་འདུག ནང་པའི་དར་ཆ་ལ་བརྟེན་ནས་ནང་པའི་མི་དམངས་དུང་ཕྱུར་མང་པོའི་རྒྱབ་སྐྱོར་ཐོབ་པ་བྱེད་དགོས་རེད་ཟེར་གྱི་ཡོད། དེ་ལ་དོན་མེད་ཀྱི་ཆོས་སྲིད་ཀྱི་འབྲེལ་བའི་སྐོར་བཤད་དགོས་ཡ་གལ་མི་འདུག