གྲིབ་གཟུགས།
སྟོན་ལོ་སེར་པོ་ཁད་ཀྱིས་ས་ལ་ལྷུང་སྟངས་དང་རླུང་བུས་དྲུད་འགྲོ་བའི་ལོ་མ་སྐམ་པོའི་ཧྲག་སྒྲ་དེ་དག་ནི། ཉིན་འདི་ཚོར་ངའི་སེམས་དང་ཐག་ཉེ་ཤོས་ཀྱི་ཡུལ་ལྗོངས་དང་རོལ་དབྱངས་སུ་གྲུབ་འདུག སྐྱོ་ཤས་ཀྱིས་ཁེངས་པའི་ཁོར་ཡུག་གི་གྲུ་ཟུར་ནས་ཁེར་རྐྱང་གི་གོམ་འགྲོས་འཁྱར་མ་འཁྱོར་གྱིས་སྤོ་དུས་རྒྱང་རིང་གི་ངའི་ཡོད་ཚད་དྲན་ཐབས་རྩ་བ་ནས་མི་འདུག ངས་རང་ཉིད་ནི་ནམ་ཡང་དགའ་སྐྱོ་དེ་ཙམ་མེད་པའི་རྡོ་བའི་སྙིང་ཁམས་ཅན་ཞིག་ཡིན་བསམས་ཀྱང་ཕ་ཡུལ་གྱི་བྱིས་པ་སྣབས་ལུད་དེ་ཚོའི་སྣང་བརྙན་དང་། ཁོ་ཚོའི་མེ་ལྟར་ཚ་བའི་རྣམ་དཔྱོད་དང་བྱིས་པའི་ལོ་ཟླ་དག་གངས་ཁྲོད་ནས་སྒོ་ཟོག་གི་རྗེས་སུ་འུར་རྡོར་འཕེན་བཞིན་པར་དྲན་ན་རྡོ་དང་འདྲ་བའི་སེམས་པ་འདིས་ཀྱང་ན་ཟུག་གསོན་པོ་ཞིག་ལ་མྱོང་རོལ་མ་བྱས་ཀ་མེད་རེད་ལ། སྐམ་ཟིན་པའི་མིག་ཟུང་གཉིས་ནས་ཀྱང་མཆི་མའི་ཐིག་པ་མི་བཞུར་བའི་རང་དབང་ཞིག་མི་འདུག་པས་སེམས་སྐྱ་མོ་འདི་ཡང་ནས་ཡང་དུ་འདི་ལྟར་མནར་འཇུག་འདོད་མི་འདུག
ཕ་མའི་རེ་བའི་མིག་ཟུང་ནམ་ཡང་ཐག་རིང་འདིར་ཡོད་པའི་ང་ལ་གཅེར་ཡོད་ནའང་། རྩ་བ་བཞིའི་དབུགས་ཆད་ལ་ཁད་པའི་སེར་གཟུགས་ཞིག་དྲུད་ནས་ཡོན་ཏན་ཟེར་བའི་ཤེས་བྱ་དེར་ཇི་ཙམ་འབད་འབུང་བྱས་ནའང་དེ་ནི་རང་དོན་རྐྱང་པ་ཞིག་གྲུབ་བཞིན་པར་བལྟས་ན། ཆོས་པ་རབ་ཅིག་བགྱི་ཐུབ་དགོས། ཞེས་པའི་ཕ་མའི་རེ་དོན་དེ་ཡང་རླུང་ལ་བསྐུར་ཟིན་པ་མིན་ནམ།
ཐོག་རྒྱག་ལ་ཕྲད་པའི་གནས་ཚུལ་དེ་ཚོ་ནི་ཁ་ཕྱོགས་ཧ་མི་གོ་བའི་རླུང་འཚུབ་ཞིག་དང་འདྲ་བར་ངའི་མཐའ་ཁོར་གྱི་ལྷིང་འཇགས་ཁྱེར་ནས་བུད་ཟིན། སྐྱིད་རྒྱུ་དེ་ཙམ་མེད་པའི་ཉིན་འདི་དག་ལ་དུས་ཚོད་མ་འཁྱོལ་ནས་ཅི་བྱེད་འདི་བྱེད་མེད་པ་ནི་ང་ལ་མཚོན་ན་སྡུག་བསྔལ་གྱི་ནང་ནས་ཡང་རྩེ་རེད། ཁ་སང་ཏག་ཏག་ལ་ངོ་དེབ་ནང་ནས་གཅེན་པོ་དང་འཕྲད་སོང་བས་དང་ཐོག་སེམས་ཅུང་བདེ་ལ་བབ་ནའང་། ཡིག་ལམ་ནས་ཕན་ཚུན་གྱི་གནས་ཚུལ་འདྲི་དུས་ཧོབ་རྒྱག་ལ་ངའི་དྲན་ངོས་སུ་ཡབ་ལགས་ཀྱི་དཀའ་སྡུག་གི་གཉེར་རིས་ཁེངས་པའི་བཞིན་རས་དང་སྤུན་ཆུང་ཚོའི་ཐལ་མདོག་གི་ངོ་གདོང་དེ་ཚོ་དབང་མེད་དུ་ཤར་ཡོང་། མིག་ཆུ་ནི་ཡང་ན་དགའ་དུས་དང་ཡང་ན་སྐྱོ་དུས་རྡོལ་འོང་བའི་རང་འབབ་བདུད་རྩི་ཞིག་རེད་ཅེས་པ་ཅིས་མི་བདེན། ལོ་འཁོར་མོ་གཉིས་ཀྱི་རིང་ངས་ཕ་ཡུལ་དང་ནང་མིའི་ཆེད་མིག་ཆུ་བཞུར་མ་མྱོང་ནའང་། དེ་རིང་ང་ལ་རང་དབང་མི་འདུག མིག་ཀོང་ནས་མིག་ཆུ་ཤར་ཤར་བཞུར་འོང་དུས་ངས་སྐད་ཤུགས་ཆེན་པོས་ཐེངས་ཤིག་ངུ་དགོས་བསམས་ཀྱང་ལས་གྲོགས་ཚོ་ཉེ་འགྲམ་ན་འདུག་པས་སྐར་མ་བཅུ་ཙམ་གྱི་རིང་ལག་པས་ངོ་གདོང་བཀབ་ནས་བསྡོད་དགོས་བྱུང་།
ད་ལྟ་བསམ་ན་རང་ཉིད་ནི་ཅི་འདྲའི་ཁྲེལ་མེད་ཅིག་རེད་ཨང་། དཀའ་ངལ་དང་སེམས་ཚེགས་མེད་པའི་དུས་ཡུན་དེ་དག་གི་ཁྲོད་ངས་ཕ་ཡུལ་དྲན་པའང་རབ་རིབ་ཅིག་རེད་ལ། ཕ་ཡུལ་དང་ཁྱིམ་མིའི་བདེ་སྡུག་ཆེད་མིག་ཆུ་ནི་དེ་བས་ཀྱང་བཞུར་མ་མྱོང་། སྐམ་གྱོང་དུ་འགྲོ་བཞིན་པའི་ངའི་རྣམ་ཤེས་ཀྱི་ཁོར་ཡུག་ལ་ཁྱིམ་མིའི་བརླན་གཤེར་དྭངས་གཙང་གི་བརྩེ་བ་ནི་ཅི་འདྲའི་མེད་དུ་མི་རུང་བ་ཞིག མི་ཡུལ་གྱི་ས་མཐའ་ནས་ཁེར་རྐྱང་དུ་འཁྱོར་བཞིན་པའི་གྲིབ་གཟུགས་ང་ལ་སེམས་པ་རྣམ་དག་ཞིག་གི་དྲོད་ཁོལ་ནི་ཅི་འདྲའི་མཁོ་བ་ཞིག་་་་་་་་་་་་་་
ཁྱོད་ཀྱི་སྙན་ཚིག་དང་སྙམ་དུ་སེམས་ཚོར་ཡག་པོ་འདུག མུ་མཐུད་ཤུགས་རྒྱོབ་ཨ།
ཁྱེད་ཀྱིས་འཁྱམ་པོ་ངའི་ཟིན་ཐོ་འཁྱར་འཁྱོར་དེར་དུས་ཚོད་ཅུང་ཞིག་སྒྲོན་པར་ཐུགས་རྗེ་ཆེ་ཞུ།
ནམ་ཟླ་སྐྱ་བོ་འདི་ཡི་ཕ་རོལ་ན། དཔྱིད་དཔལ་གཞོན་ནུའི་མཛུམ་མདངས་སྒུག་ནས་ཡོད་པས། ཁྱོད་ཀྱིས་ནམ་ཡང་མདུན་དུ་སྐྱོད་ཅིག ཚངས་སྲས་ལྷ་མོའི་མགྲིན་པ་ནས་དལ་གྱིས་ལོངས་ཤིག རིགས་ཀྱི་བུ།